حمار شغل ..

Posted: الأحد,24 أكتوبر, 2010 by aflaiga in اخرى

الشعب السودانى الحبيب لديه عبارات خاصه جدا فى التخاطب تميزه عن بقية الشعوب وشعبنا الفضل يستخدم بعض العبارات فى التعبير عن احداث او وصف حالة ما باسلوب قلما تجده عند بقية الشعوب ومن هذه العبارات اطلاقهم لقب ( حمار شغل ) توصيفا لل hard worker اى الذى يتفانى فى العمل ويرهق نفسه ويقتطع من زمنه الخاص للعمل جزءا كبيرا .
ولا ادرى لماذا استخدمت كلمة ( حمار ) هنا هل للتعبير عن المجهود الخرافى الذى يقوم به الحمار ام لاستنكار التفانى فى العمل !!! اذكر اننى وفى احد الاشغال السابقة قبل العمل الحالى كان افليقا من المتميزين فى هذا العمل ودوما يتم الاشاده به امام زملائه وكان لديه زميل بالعمل يستنكر هذا السلوك ويستغرب سبب الاشاده وفى احد الايام جمعتهم مامورية لاحدى الولايات وفى لحظة صفا دار الحوار التالى :
س : انت يا افليقا عملت دكتوراه فى حاجه معينه ؟؟
افليقا : ابدا يا س زيى زيكم بالدبلوم .
س : طيب اخترعت حاجه جديده فى الشغله دى ؟؟
افليقا : ابدا والله يا س ياهو زينا وزيكم واحد .
س : طيب قاديننا مالم المدراء ديل متميز متميز ؟؟؟
هنا تدخل صديقى ص : يا س ياخى الزول ده مافى يوم اتاخر ولو ما خلص شغلو ما بيمشى البيت وبيجى يوم الجمعه مارى يتطمن على الشغل وشغلو نضيف ومافيه اى تقصير واى كورس بيودوهو ليه بيجى فيه الاول .
س : ااااا يعنى حمااااار يعنى !!!

من الطرائف ايضا فى نفس الاطار صديقى ص وهو ابن عمى دوما يجدنى اما فى العمل او فى مامورية او فى كورس تدريبى وفى احد الايام قابلنى مع سمسمه فى المستشفى ونحن على وشك استقبال مولودنا عبودى فساقنى على جنبه :
ص : والله يا افليقا ما شاء الله انا قايلك شغال فى المكتب بس !!!

والدتنا حفظها الله وفى احد الايام فى نقاش حول العمل :
افليقا : تعرفى يما عندنا كشف بتاع تقاعد فى الايام الجايه دى احتمال يشيلونا فيهو .
الحاجه : والله لا بيشيلوك لا حاجه .
افليقا : ليه يما ما بيشيلونى ؟؟
الحاجه : يعنى حيلقو واحد حمار تانى زيك وين ؟؟؟
—-
كسره طويله :
حب العمل والاندماج فى تفاصيلو هل هو مرض حميد ام حمد مريض ؟؟ كدى خلونا نناقش المساله دى برواقه وليه بنقول للزول البيحب شغلو وبيتفانى فيهو حمار شغل يعنى ما ممكن نستبدل كلمة حمار دى باى حاجه تانى – نصيحتى لمن يحبون عملهم الا يلتفتو الى هذه الشائعات المغرضه والمحبطه لكين برضو يخلو بالم من البيت شويه عشان ما يقولو ليهم ما شاء الله انا قايلك شغال فى المكتب بس !!!!!

Advertisements
تعليقات
  1. زووووووول كتب:

    فليقا سلاااام يا سيدا
    والله يا عمك الزوول ما بطال يكون حمار شغل لكن ما تتشاطر شديد لانو الشطاره الكتيره بتجيب ليك الحسد من رؤسائك وفووووووووو طيارتك تقوم . يعنى لازم تحسس مديرك بانو هو اشطر زوول فى الدنيا دى .

  2. حاج أحمد السلاوى كتب:

    أبو الأفاليق ..
    القاعدة الشهيرة عند أولاد بمبا تقول : تشتغل كتير ..تغلط كتير ..ما فيش ترقية .
    تشتغل قليل .. تغلط قليل .. تترقى بسرعة .
    عشان كدا لا تحاول تتشاطر زى ما قال ليك صديقك اللدود الزووووول .

  3. aflaiga كتب:

    وانا اقول مافى ترقية ليه ؟؟؟
    تتخيل يا عم السلاوى الواحد بيشتغل كتير وما دار اقول ما بيغلت لكن بيغلت شوية وبرضو مافى ترقيه معناتا مديرنا حاسى بانو نحنا اشطر منو ولا شنو ؟؟ انا قايلو ما بيحس اصلا !!! ههههه
    الزووول : شكلك بتاع شغل ما دار اقول حمار شغل !! وشكلك مزبل مديرك ميه ميه لانو دى خبرات كبيره الواحد لازم يستفيد منها .
    السلاوى : ليه السودانى بره البلد حمار شغل وجوه البلد قراى جرايد وكسار تلج .
    شكرا على المرور

  4. طارق أب أحمد كتب:

    مسطول قال لي مرتو الدنيا دي عامله زي حديقه
    الحيوان الزول من الصباح اصحي زي الحصان وامشي الشغل زي الكلب و
    اشتغل زي الحمار واجي راجع زي ابو القدح واخرتا ساكن مع بقره

  5. مشاكل كتب:

    سلامز

    و الله يا أفلي ريحتني و انا زعلااااااااااااااااااااااااااااان

  6. حاج أحمد السلاوى كتب:

    الرد على سؤالك سهل وبسيط جدن ..
    السودانى برة البلد حمار شغل لأنو إذا ما إشتغلت فى محاسبة ويمكن توصل حد التفنيش ..وما فيش يمه ارحمينى ….لاكين لأنو داخل أمازونيا مافى حد بيسأل حد وفى مجاملات شديدة وشيلنى وأشيلك بقت الحكاية إشتغلت أو ما إشتغلت كلو واحد .. إلا من رحم ربك ( نبعد من التعميم ..عشان مايجى زول ينط لى فى حلقى ) ..ز
    مشكلتنا يا أفليقا المجاملات وعدم تفعيل قاعدة الثواب والعقاب ..
    أظنك فاهمنى كويس … موووووش ؟

  7. عزت كتب:

    أيوه والله حكاية الثواب ما مفعلة الا عند ناس الحكومة عندما يغلط أحدهم يرقوهو و الا ينقلوهو لي حتة أحسن علة حكاية العقاب دي ما مفعلة الا أظن عن ناس المرور….

    شوفت كيف ياحاج السلاوي… زمان قالوا خلي بالك من مديرك الحالي فالقادم يمكن أن يكون أصعب…

    فالشاهد أن مدير المرور السابق كانت غرامتو 30 جنيه للمخالفة و كانو قاعدين يقلعوها مننا و هم عابسين و ما قاعد يربطونا الحزام.. هسة المدير الجديد قال الغرامة 50 بس قال لي رجال الشرطة يشيلوها مننا و هم مبتسمين….

    دا اسمو كلام

  8. الغبشة كتب:

    نحن يادوب تمهيدى فى دنيا العمل ومنكم نستفيد
    لكن اللاحظتو ماتشتغل مشكله وتشتغل كتيييييييييييير مشكله اكبر غيره من الفى نفس مستوى عملك بالاخص الاقدم ومن الجداد غتاته منك وانت عامل فيها بتلعب بالبيضه والحجر يعنى,,,,,,,,, ومن المدراء ردم شغل زياده ومحاسبه شديده ,,,,,,,,,,, وربك يستر
    والى لقاااااااااااااااااءءءءءءءءءءء

  9. طارق أب أحمد كتب:

    عزت
    لا فى حكاية الخمسين دى ما عندك حق ياخى لإنو القانون دا مجاز من السنه الفاتت لكن فعلن المدير الجديد قاليهم دفعوهم المخالفات مبتسمين (تكونشى دى إبتسامة الموناليزا اللى بخمسينه دى)

  10. نيام كتب:

    افليقا:
    والله يا ابو الافاليق ما شاء الله في شغلك مكادي عديييييييل كدا…
    عندي بت اخوي عندها ولدها بتاع دليب كده و بعدين مدرستكم مختلطة يعني فيها بنات و اولاد و تاريهو ماكل ليك راسهم انو طوالي هو الشطوري و هو العب زول في البلياردو و هو كمان حريف في السباحة و بعدين في بنية سغنتوتة كدا اعجبت بيهو فقامت قالت لي مامتها ارح نزور ناس حمودي في بيتهم قالت ليها ليه قالت ليها ياخ حمودي دا كل يوم الاول الاول انا عايزه اشوفو بعمل شنو عشان الاول الاول كدا….

  11. aflaiga كتب:

    نيام : ومشت شافت ولا حمودى حنك امها برضو ؟؟

  12. نيام كتب:

    افليقا:
    سألنا حمودي ليه طيب الجماعة ما جو زيارة قال انتو مجانين انا مفتح مابوريهم بيتنا وين لانو قلت ليها بيتنا عمارة سبع طوابق و بنطلع بالاسانسير دايرنهم يجو يلقونا قاعدين تحت الشدرة..

  13. حاج أحمد السلاوى كتب:

    ابو الأفاليق ..
    يعنى إنتو عاوزين إبتسامة مجانن .. لله فى لله .. الإبتسامة دى مش بتكلف رجل المرور تحريك عضلات الوش والفكين .زوالضحكة طالعة من القلب مش عاوزة تسليك ..
    وتيب !!!

  14. قرن شطة كتب:

    اقليقا
    سلام ..ماشاء الله شغل فى المكتب ومستور مع ناس البيت! والله ماقصرت يافردة..تحياتى

  15. aflaiga كتب:

    قرن : وفى البيت كمان والله يا قرن والدليل الثلاث علامات الظاهره على اخره على قول صديقى س تعرف النسوان ديل لو ما كنا جايبين منهن شفع كان نكرونا هههههههه

  16. قرن شطة كتب:

    اقليقا
    ومرات بى بالشفع بيعملوا رايحين أو نعمل رايحينأ او الاثنان معا – الفسالة من اى صايد كعبة!! خليهو ساكت ده موضوع طويل وعريض وتخين يافردة…

  17. سهيل كتب:

    افليقا .. عين ناس عزت و السلاوي و قرن شطه بااااااارده عليك .. مستغربين من شنو الفرد ديل ؟ .. هم شغالين اتجاه واحد ولا كيف ؟؟ ايوااااا .. يخسسسسس

  18. aflaiga كتب:

    سهيل : انشاء الله يكونو الاتجاه الواحد ذاتو مزبطنو تمام ههههههههههههه دى حساده ساى بالله بعدين ورينا الشغل الصاح فى الاتجاهين ما تخزلنا ..

  19. سهيل كتب:

    يا ولد عيب .. نحن في المدونه .. طالعني بيغادي يافرده

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s