صنع في الصين

Posted: السبت,6 نوفمبر, 2010 by الفاتح جبرا in ساخر سبيل

عندما دخلت إلى منزل جارى (عوض) أشار لى إبنه الصغير بأن والده فى الصالون ، دخلت إلى الصالون لأفاجأ بجارى عوض (معلق فى الحيطة) يقوم بتغيير إحدى اللمبات وما أن رآنى حتى قال لى فى حنق وغضب:

– يا استاذ بالله ده إسمو كلام؟

– (مندهشاً) : مالك يا عوض فى شنو؟

– ياخى على بالحرام دى اللمبة الخامسة  فى ظرف أسبوع ! والله يا استاذ بقينا ندفع للمبات أكتر مما بندفع (للجمرة)

– كدى أنزل هسه ما تطقك لينا كهرباء كمان

– والله لو طقتنا ذااتو تكون ريحتنا من الحياة المقرفة دى .. البلد كووولها أى حاجة تمسكا مصنوعة فى الصين وما تقعد ليها يومين !

 

كما قال جارى (عوض) فقد غزت المنتجات الصينية (الرديئة) الأسواق فى الآونة الأخيرة بصورة لم يسبق لها مثيل إبتداء من الإبرة والخيط مروراً بكافة الأجهزة المختلفة كهربائية وإلكترونية وكذلك الأحذية والألعاب ومستحضرات التجميل والعطورات والأكسسورات، وحتى الملابس الأطفالية والنسائية وحتى الرجالية من (عراريق) وجلاليب وسراويل و(طواقى) هذا خلاف (العربات) والتى لم تجد لها سوقاً رائجة بعد أن قامت (حفرنا) الله يخليها بكشفها (من قولت تيت) !

 

لقد أصبح شيئاً عادياً إنك تقوم من النوم تعاين للساعة فى الحيطة تلقاها (صنع فى الصين) تقوم من السرير الصينى وتلبس سفنجتك اللبنية الصينية تمشى الحمام تتسوك تمسك (الفرشة ) تلاقيها (صنعت فى الصين) وإنتا بتضغط فى المعجون تشاهد مكتوب عليه (صنع فى الصين) ، تتوضا وتخت (السجادة) عشان تصلى أول ما تسجد تعاين قدامك تلاقى فى طرف السجادة عبارة ‏(صنع فى الصين) ، تمشى المطبخ تعمل ليك كباية شاى ، تخت (البراد الصينى) فوق البوتوجاز الصينى وبعد ما الشاى يفور تقوم تكبو فى الكباية الصينية وتديهو سوطة بالمعلقة التى كتب فى طرفها عبارة (صنع فى الصين) !

تقوم بإرتداء البنطلون الصينى ثم القميص الذى كتب على ياقته (صنع فى الصين) ثم أخيراً الحذاء الذى انتجته أردأ مصانع الصين ثم تضع الموبايل الصينى وتخرج إلى المنزل متجهاً إلى العمل حيث تستقل (بصات الوالى) الصينية .

قامت الصين بتقليد كل الصناعات الأوروبية مستخدمة فى ذلك اردأ المواد  وقد قامت بطرح منتجاتها في الاسواق العربية باسعار قد تقل عن النصف لمثيلتها الاوروبية (الأصلية) , ونسبة للأحوال الإقتصادية المتردية فى البلاد العربية (للمواطن وليس المسئول) فقد وجدت لها سوقاً  لأنها ببساطة بضائع (قدر ظروفك) يفرح المواطن لإقتنائها لان دخله لا يمكنة من شراء الأصلى منها غير أنه سرعان ما يكتشف أنه وقع ضحية (الغش الصينى) !

وعلى الرغم من أن العالم كله من حولنا قد حارب الغش وأن معظم البلدان المحترمة قد منعت دخول المنتجات الصينية إلى أراضيها إلا بعد مطابقتها للمواصفات والمقاييس العالمية, لكن (حكومتنا) تقوم بتشجيع هذه السلع والبضائع الصينية غير المطابقة ونجد أن  مؤسسات الدولة تدعم هذه التجارة مغمضة (عيونها) عن هذه السلع المغشوشة لدرجة الركاكة ، وقد تم تسهيل وفتح القنوات التجارية بيننا وبين الصين لدرجة إنو أصبح عادى تسال عن (عوضية الدلالية) يقولو ليك ختفت كراعا و(مشت بكين) !

سكوت المسئولين عن إيقاف هذا الغزو الصينى عن طريق هذه البضائع (الفالصو) بل وتحفيز (تجار الغفلة) للسفر إلى الصين لإستيراد هذه البضائع (المضروبة) يعنى بأن الدولة مبسوطة لما يحدث ، والدولة ليها حق هى ما تكون مبسوطة (كيفن) وهى تتقاضى (كم فى المية كده) ضريبة مبيعات على السلعه او الجهاز الإكتروني الصيني (المضروب) والذى لا يعمل لأكثر من يومين من (تاريخ الانتاج) فيقوم (المواطن) المغلوب على أمره بإعادة الكره وشراء نفس الجهاز  ليدفع مرة أخرى (الضريبة الكم فى الميه كده) تاااانى .. وبذلك يتم إفقار (الشعب) لتربح (الصين) ومعاها (الحكومة) !!

ان من أوجب واجبات الحكومة توعية المواطن بمكامن  النصب والاحتيال ولكن أن تقوم (هى ذاااتا) بجلب المحتالين اليه وتسهيل وصول (تجار الذمم الخربة) لمصاتع الغش (الصينية) ليقوموا بإغراق السوق بهذه السلع الفاسده دون (حسيب أو رقيب) .. هذا والله أمر غريب ومريب !

ان الواجب يقتضى على الحكومة تشجيع المواطنين على شراء السلع الصالحة للاستعمال وتقليل الضرائب المفروضة عليها حتى تكون أسعارها فى متناول الجميع  كما أن الواجب عليها منع ادخال (هذه السلع المغشوشة) التي تنال من أموال ميزانية المواطن (الأساااسن ما ناقصة) !

كسرة :

حقو الحكومة تلحقنا (بى خروف صينى) إن شاء الله بدون (نغمات) نلحق بيهو الضحية الكبست علينا دى !

Advertisements
تعليقات
  1. طفشانة كتب:

    السلام عليكم ورحمة الله
    حقو الحكومة تلحقنا (بى خروف صينى) إن شاء الله بدون (نغمات) نلحق بيهو الضحية الكبست علينا دى !

    حا تشتريهو بكم ؟؟؟؟ ولو طلع ضارب ومات قبل العيد حا تعمل شنو ؟ والاخطر انو اكون عندو انفلونزا اى حاجة امكن تموت انت واولادك لاقدر الله !!!!!!!!!!!!

    • نيام كتب:

      ” كما أن الواجب عليها منع ادخال (هذه السلع المغشوشة) التي تنال من أموال ميزانية المواطن (الأساااسن ما ناقص”…
      العيب ليس عيب الصناعة الصينية و لا عيب الحيكومة الامزونية الخالدة العيب عيب في المواطن ظات نفسو ياخوانا ليه انا اشتري شبشب حمام صيني المنشاء اجي امرقو من رجلي مايمرق زي الحسكنيتة ملصق و غالبا ما يعمل حساسية او بثور او حبوب في القدم…ليه اشتري موبايل اتكلم بيهو و لمان تنتهي المكالمة القاها في الاضان الثانية ما انتهت …ليه اشتري لمبة صينية و الكهرباء تقطع و ترجع القاها مشت ما جات…المواطن يشتري بدل الشبشب سفنجة ماركة محلية و بدل ما ما يشتري 5 لمبات صينية ما يشتري واحدة سويسرية و يركبها في الزاوية البقيف فيها الضب وحيلقاها ولعت البيت كلو لانو الضب المهندس بقيف في زاوية يتمكن منها رؤية كل الحوش…اما المساطر و علب الهندسة و الكراسات و الاقلام فمعليش اشترو امزوني برضو احسن لانو بت اخوي اشترت دستة قلم رصاص صيني الاولاد خلو القراية وبقو كووولهم نجارين تلقا الواحد ماسك القلم و يبرا من الصباح للمغرب …
      كسرة:
      اوع من الخروف الصيني دا عندو متلازمة برنر وبعدين ظاتو ما بقول باع حقتنا دي يعني الاولاد حيقولوا ليك عرّبو لينا…

  2. abuleila كتب:

    البروف الغالي ربنا يحفظك من انفلونزا الصين
    انحنا بقينا في زمن كلو تقليد والخوف كل الخوف يجيبو لينا مشاعر وعواطف صينيه
    هنا يكون الرماد اكل حماد وعواطف السودانيه
    ولك الموده والود السوداني الخالص

  3. طارق أب أحمد كتب:

    والله يا الفاتح أخوى أنا لى زمن بنادى بتكوين منظمه مدنيه لحماية المستهلك من المنتجات الصينيه بس يكتمل النصاب و نعمل الجمعيه و نسافر الصين شان نمثل المستهلك السودانى و أكيد حيقوموا يزبلونا بى همر

    ((طبعن الصين أخدت إمتياز تصنيع الهمر))

    بالمناسبه الصين إتعاقدت مع حكومة الجنوب لمد خط أنابيب عبر ممبسا (يعنى باعت ناسنا المواهيم ديل)

  4. نيام كتب:

    استرابكر:
    يا هندسة انت السيرفر حقك دا صنع في الصين و لا كيف يعني الاحد حق نيام يدخل بين سبتين ليه عليا ديون و لا متاخرات…

  5. ياسين شمباتى كتب:

    البروف…سلام..
    ياربى ما بنلقى لينا حكومة تجميع فى الصين!؟؟ ولا ياها دى ذاااااتها ؟؟ كع..

    نيام..سلام..
    ههههههههههههههههههههه,,ياخ انت مسلط والله..بالغت فوكها دى…ههههههههههههههه

  6. كل حجاتى بقت م الصين
    لبس ولادى بقا من الصين
    حتا فانوس رمضان م الصين
    لبس بناتى وحتا حماتى ويا مراتى
    يستوردو م الصين فساتين
    كل حجاتى بقت م الصين
    مش عارفين هنروح على فين
    ولا عارفين راح نيجى منين
    حتا موبيلى الصينى بتاعى
    بكارتين ميمورى مع شريحتين
    شفتو عجايب شغل الصين
    ناس شغاله شغل صحيح
    مش شغاله شغل المساكين
    شفتو ازاى بقا شغل الصين
    احنا بننتج شغل صحيح
    بس كتير بنكون نيمين
    لكن هما مش بينامو
    وديما ع الارزاق مشين
    شفتو ازاى بقا شغل الصين
    حتا فانوسى شغل الصين
    ناقص تبقا فلوسى م الصين
    شكلى كمان راح هنسى العربى
    واقولك نيهاوشى يا متين
    ولا كمان نهجر ف شقننا
    ونعيش جوه بيوت ميلامين
    شفتم بقا ايه شغل الصين
    شغل جميل وصحيح وسليم
    شغل نضيف وانضف م الصينى

    شوفتو الخيبه حتا دهبنا صبح م الصين
    خايف مره لانام اواصحى
    والقى ترابنا كمان م الصين
    ناس مش نايمه اكيد صحيين
    ناش مشغوله ومش فاضيين
    ناس مسؤله ومش نسسين
    ناس حراميه ومش سارقين
    ناس مش فاضيه ومش عاطلين
    شفتم بقا انضف م الصين
    خايف مره لاقوم الصبح
    القى وطنا صبح ف الصين

    مش تبقى الناس الملاعين
    تبقا ازاى نوقف 000ف الصين
    وننسى تحريرنا فلسطين
    بعد منهتف دوغرى ننام
    نتغطى بكل البطاطين
    والبطاطين هههههه بردو من الصين

  7. طارق أب أحمد كتب:

    هو بعد تزوير عذرية البنات تانى فضل ليهم شنو

    الله يلعنم و يسلط عليهم كيزان يعدموهم صينية الأكل

  8. قرن شطة كتب:

    العزيز جبرة
    كل عام وانت بخير
    تعرف يااخوى ده حرث فى اعالى البحار مافى اى نتيجة منو بس على الاقل نضحك من حكاية الخروف الصينى وكده…غايتو الجماعة ديل خلونا لافين (صينية) تحياتى يامبدع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s