فى ما تبقى من العام..

Posted: الأحد,7 نوفمبر, 2010 by ياسين شمباتى in اخرى

فى ما تبقى من العام احببت ان اشرككم احبتى فى بعض خواطر وكليمات دونتها قبلا,,هنا او على هاتفى النقال او اماكن اخرى على الاسفير..فى ما تبقى من العام احب ان اسجل شكرى وحمدى لله على جميل النعم واختبارات النقم واساله ان يختم لى ولكم بخير..فى ما تبقى من العام احب ان اشكر كل من آزر وواسى وآسى ابان فقدى الاعظم وما تلاه من خطوب…فى ما تبقى من العام احب ان اعتذر لكل من آذيته او اصابه منى شيئا..فى ما تبقى من العام اسألكم جميل المحبة ودوام الوداد وخالص الدعاء..

*غنى (الكاشف) اغنية هيجت مكامن الشجن واسالت دموع اللوعة واحيت ميت الذكرى,,غنى (غصبا عنك..يلفت نظرك..غصبا عنك..مهما تحافظ وتاخد حذرك غصبا عنك تصبح عاشق.غصبا عنك)..ثم اعقبه (بكرى بشرى) المتسابق فى نجوم الغد فاجاد وابدع واهدى لى لحنا وكلمات بحثت عنها طويلا…تحذير لاولى القلوب الضعيفة..لا تحاولوا ان تسمتعوا لها..

*فى لحظة اعتورنى فيها الضعف وخارت فيها قوى التحمل والتجلد وذهب صبرى سطرت بعض اغنية لمصطفى سيداحمد (فتر حنينى الكان زمان)..لكنى اكرر واجدد العهد باستدامة المحنة والمحبة والمودة…

*بشيش ببشيش غلبنا نعيش…قبض والى البلد بقشيش..دا كلام (حميد) يا جماعة ما كلامى انا..لكن النصيحة دى ما حاااااارة..

*الاستاذ /محمد سليمان فى برنامج نجوم الغد قال لاحدى المتسابقات (عاجبنى فيك الجسد الايقاعى)!! اجى يااااااا  كدة؟؟هو قالوا بسووا كدة يا استاذ؟؟

وفى برنامج (افراح افراح) باغت المذيع /امجد الف الف مبروك العروس سؤال فى التمنيات (جاهزة للمرحلة الجاية دى؟) طبعا العروس وجمت..بس…

ويوم مغنية اسمها (درية الشرق) قالت ليها المذيعة: كيف بتختارى اغانيك؟؟ ردت: انا ما بختار اغنياتى,,لكن الشعراء بجيبوا لى قصايد وانا بختار منها !! اسه دا شنو دا !!؟؟

وكمان فى مصورين فى قناتى هارمونى والنيل الازرق لسه ما قادرين يطلعوا من ثوب تصوير الحفلات الخاصة والاعراس,,الواحد اول ما يشوف ليهو بت سمحة يقوم عامل ليك زوووم وتثبيت!!

والكثير الكثير من مطربينا صاروا يجيبوا اولاد وبنات اثيوبيين يرقصوا معاهم فى الاغانى المصورة!! دا غير الموسيقى وتوزيعها الاثيوبى..

ارجو من الاجهزة الاعلامية مراجعة منسوبيها وموادها ولو قليلا..مع وافر شكرى…

*نصيحة وجهتها الى نفسى اولا واحببت ان يشاركنى فيها كل عزيز او قريب منى (لا تخلى الحزن ياخد من لياليك الكتير…لا تخلى الوجعة تكبر تحرق الغصن النضير)…فالاحزان لا تنتهى ولا تعود بخير ..ابدا..مع حبى وتقديرى للحزن النبيل..دى الافراح تدور يمشولها ..والاحزان تجيك فى الباب…

*اعزائى..اياكم والجزع على ما فات والطمع فيما لا يرجى..فما اشتد خطب الا واعقبه فرج ولا انسد باب الا وسوف ينفرج باذن الله..فان الله عزوجل جعل مع العسر يسرين..فاختر لنفسك ما يقربك ويدنيك الى الله واطرح عنها ما يحزنك ويكربك..وتذكر..ان امر المؤمن كله خير..ان اصابته سراء فشكر فله اجر…وان اصابته ضراء فصبر فله اجر..

*حكى الاستاذ /سعد الدين ابراهيم ان شاعر اغنية (عشان اهلك بخليك) التقى والشاعر/العبادى,,فعاتبه الاخير بان( دا غنا ليكم؟؟ما سمعت انا زمان قلت شنو؟؟ وهل منعوا النسيم يجيب ريك؟) فى اشارة الى اغنيته البديعة(منعوك اهلك)…ولو كنت مكان الشاعر كان قلت ليهو: طيب لو منعوهو اهلو,,كيف الراى؟؟؟

*قال ميمون بن مهران: ثلاث حق المؤمن والكافر فيهن سواء..الامانة تؤديها الى من ائتمنك عليها من كافر او مسلم..والوالدان تبرهما مسلمين او كافرين..والعهد تفى به لمن عاهدت مسلما او كافرا…انتهى….عليكم الله دى ما جوامع حكم عدييييل كدة؟؟

*ويمضى العام بعد العام..بعد العام..وتمضى بيننا الايام..بقايا حريق ثار فى دمنا ونام..نزار قبانى من رائعته (بلقيس)..

*سئل ابراهيم بن ادهم : لم لا تخالط الناس؟ فاجاب: ان صحبت من هو دونى آذانى بجهله…وان صحبت من هو فوقى تكبر على..وان صحبت من هو مثلى حسدنى…فاشتغلت بمن ليس فى صحبته ملل ولا فى وصله انقطاع ولا فى الانس به وحشة…انتهى..الكثير من متاخرة المتصوفة يحدّثون باحاديث مكذوبة عن ابن ادهم,والا فالرجل كان عالما عاملا زاهدا بحق,,لكنه لم يكن مستوحشا او منصرف ومنقطعا الى العبادة فقط..ومثل هذه الاحاديث او الاقوال التى تدعو للانعزال والانقطاع لا مجال لها فى ديننا الحنيف,,فلا رهبانية او تبتل فى الاسلام…

*حجاج بيت الله الحرام..اهلا بكم فى مكة حيث الضيافة ايمان..ومحبتكم شرف..وخدمتكم واجب…الحمدلله لقد اسدلت الخيام ورفعت الاعلام واحاط بنا طالبو بيت الله من كل حدب وصوب..اللهم انعمت..فزد..وبارك..وان لم تلحقنا بهم فلا تحرمنا اجرهم ولا تقطع عنا وصلهم..اللهم ان ذنوبى عظيمة وقليل عفوك اعظم منها..اللهم فامحها وابدلها حسنات…واجعل مآلى الى جنات…والحقنى بالصالحين واجعلنى من ورثة جنة النعيم واجعل اخوانى واحبتى معى على سرر متقابلين..آمين…آمين…

ونلتقى….

Advertisements
تعليقات
  1. عزت كتب:

    آمين يا رب العالمين…..
    عموما رسلنا ليكم قبل شوية (حاجة عواطف) ربنا يكمل ليها و لجميع حجاج بيت الله الحرام حجا مبرورا و ذنبا مغفورا….

    شكرا يا شمباتي ذكرتنا بالعام القرب يخلص دا… لكين مسؤول من الخير انت العام دا ما لسة فيهو شهرين الا شوية….

    عموما مع الأيام الجارية دي الواحد ما يستغرب يجيك ود بتك يصحيك و يقول ليك
    ياجدو انت مش قلت حتفسحنا الليلة في (عطارد)…!!

  2. سماسم كتب:

    شمباتي لك خالص التحايا ……. مالك مذكرنا نهاية العام؟؟؟؟؟؟؟؟؟

    د. عزت ربنا يبلغ عواطفكم الحج ويتقبل منها ….. وعقبال عندنا يا رب
    كسرة : هسه انت بقيت أب … وام ؟؟؟؟؟؟؟؟؟؟؟؟ لكن شكلك صامد ما متجرس زي ناس أفليقا

  3. الصادق ود البركة كتب:

    السلام عليكم ورحمة الله وبركاته
    تحية صباحية ندية للجميع خاصة د.شمباتي
    شنو ياشمباتي قاعد في مكة وجنك سماع غنا ماخليت الكاشف وحتى القالتو درية الشرق يا رااااجل
    الباقي جزاك الله خيراً بتذكيرنا به وقد قيل كل شيئ يبدأ صغير ثم يكبر إلا الحزن يبدأ كبير ثم يصغر رحم الله أمواتنا وأموات المسلمين جميعاً
    د. عزت مالك خليت عواطف تحج براها ولا حجيت قبل كده ؟؟؟؟؟ أعانك الله على الفراق وأوعه تكب الجرسلين وتقبل الله طاعة الجميع ورد الله غربة الجميع

  4. عباس ركس كتب:

    سلام .
    يا أخوانا شمباتي قاصد نهاية العام بالهجري ! ولا موش كدة يا ولدنا ؟
    عزت مقبولة الحجة مقدما انشاء الله , اها وكيف ناوي تعمل في ظروفنا وحنانا ( الكمونية والمرارة ) ؟؟؟

  5. سحر كتب:

    انت مالك الليله كلامك كلام بيدى احساس بالموت كده ماعارفه ليه

  6. zaroug كتب:

    آمييييييييييييين يا رب العالمين … وبعد هذه هى الأوبة الحقة الى الله ـــــ عزيزنا (ساخر سبيل) رغم أننا نشهد الله ونشهدكم ونشهد أنكم كنتم الأكثر ألما وإحساساً بهموم وقضايا الغلابى والغبش ، فلله درك من صادق امين ومخلص متجرد ، وأذكر جيدا الحلقة التى تمت إستضافتك فيها بخيمة الشروق فكانت من التحف التى جملتنا بها هذه القناة الفتية ، نحن نطلب منك العفو لأننا لم نشاركك الرأى والجهد رغم أنك كنت المهموم بهمومنا (فلك منا العتبى حتى ترضى ) ونغفر لك أى هنة رغم أننى (وهذا رأيى الشخصى) لا أرى لك هنة وأنا من المتابعين الجيدين لكل مقالاتك التى طلبت أن تصلنى على إيميلى الخاص ( وكل عام وأنت بألف ألف خير شيخنا وحبيبنا … فاتح سبيل … وليس ساخر سبيل … لأننا ننهل من سبيلك كلما عطشنا ـــــــــــــــــ ود الأرباب … 0911133482

  7. طارق أب أحمد كتب:

    شمباتى
    ياخى بتتكلم جد
    هو أصلن بدا بتين
    ــــــــــــــــــــــــــــ

    ليلة أمس أستمتعنا ببدايه الشتا مما يدل فعلا على نهاية السنه
    ــــــــــــــــــــــــــــ

    المشكله يا دوك مع نهاية كل سنه و نحن بنعمل فى الميزانيه العموميه و كشف حساب الأرباح و الخسائر الخاص بنا على المستوى الشخصى نلقى المنحنى التاريخى نازل لى تحت
    تانى نرجع نقول ياخ الناس الأنقذونا ديل يا يرجعونا بكان لقونا يا كمان يفكونا عكس الهوا و يمشو يتلموا فى ماليزيا

  8. ياسين شمباتى كتب:

    عزت…سلام..
    تسلم يا الحبيب..لكن انت ما جايب خبر لى الايام البتجرى دى ولا شنو!؟ انا قلت الحقو قبل ما القى 2015 دخلت علينا !!!
    وربنا يتقبل من المدام وياريت لو اديتنا ليهم رقم عشان نقابلهم..

    سماسم..سلام..
    انتى برضك عايزة تزوغى؟؟ وكنت متوقعك تهبشى عزت تقوللى ليهو مالك انت ما بتحج!!؟

  9. ياسين شمباتى كتب:

    الصادق…سلام..
    الله يديك العافية ويوفقك لما فيه خير الاملة والبلاد..دا ما من باب (ساعة فساعة)…وربنا يجيبك لينا نقابلك بى جاى ما دام تعذرت جيتنا نحنا..
    اما عزت دا فلا بكب جرسلين ولا حاجة,,تلقاهو فرحان ومبسووووووط,,بعرفو كويييييييس..

    ركس..سلام..
    هههههه,,,عرفتها يا حبيب,,لكن كان انا قلت كدى يقولوا الولد خلاص نسى قديمو..والله فعلا الهجرى انتهى تب,,بعد الاسبوع الجاى ما فضل شئ..وخليك قريب..

  10. حنين كتب:

    د.شمباتى .
    لك عاطر التحايا واجاركم الله فى الفقيدة ولها الرحمة والمغفرة وأرجو معزرتى للتأخير وكنت مبتعد شوية عن المدونة وأخبار الاحبة فلك العتبى .
    د.عزت . ياخى عواطفكم ربنا يتقبل منها ويعيدها سالمة وعقبال لى عواطف أفليقا .
    يازروق ياخوى حبابك وانت شايت وين .
    أب أحمد بترضى الناس ديل يرجعوك محل مالقوك عشان تقعد تتلفت ماتعرف الدرب وين فى بلدك الكبير دة وماتعرف شمالك من الشمال الشرقى …

  11. ياسين شمباتى كتب:

    سحر…سلام..
    ومراحب وياريت استدامة التواصل..والله الموت ما بعيد مننا يا بتى,,وهو اقرب الينا من حبل الوريد..بس يتربى حسن الخاتمة..

    زروق..سلام..
    مرحب بيك وركز معانا شوية!!!

  12. ياسين شمباتى كتب:

    طارق..سلام..
    هههههههههه,,كان ليك,,يعنى يفكوها بالساااااهل كدة؟؟ بعدين لو مشوا ماليزيا يلقوا بقشيش وين؟؟ خليك تفتيحة يا حبيب..

    حنين..سلام..
    بارك الله فيك وما نجيك فى شينة..

  13. عزت كتب:

    شكرا يا أحباب لوقوفكم معانا و ابتدأ أول يوم بدون (حاجة عواطف) لكنها والله ما قصرت ادتنا رنة طمأنتنا و اطمئنت علينا…. ربنا يتقبل منها و من جميع حجاج بيت الله الحرام…. و الظاهر الحكاية بقت سهلة شوية مع التطوير الذي تعتمده السعودية و جابت ليها (قطر) كمان ما بين عرفات و مزدلفة و منى….
    طبعا أنا حجيت قبل التسهيلات دي و مشينا بي كرعينا جنس مشي….
    ما أبدعها من لحظات بس انشاء الله سودانير ما تمغس الحجاج باقي متعوووووده

    عارف يا (ركس) عشان الظروف و الحنان دا قلت ليها احنا الدور دا ما حنضحي….
    قالت لي كيف يعني… عشان أنا كنت بجيها ليكم…
    تمتمت و قلت… لا أصلو … يعني
    يعني شنو…
    بس ما حيكون عندها طعم…!!
    شنو ليك يا ركس…!!

  14. عباس ركس كتب:

    عزت : اسي عليك الله كان خليت الدكترة الما جايبا همها دي وفتحت ليك مصنعين تلاتة الليلات تلج ما كان سويتلك برجين تلاتة واتنين سيدي بيهات وفيلا في ماليزيا وواحدة في دبي مدينة النخيل ؟؟؟
    صدقني بي جنس تلجك دا , برررراحة بتسويهن و و عيني باردة !!!!

  15. الغبشة كتب:

    دكتورنا العزيز: قبل ما نعفى منك كدى اعفى مننا………….المهم العفو لله والرسول ما بقولوا كده؟

    صحى العام على خواتيمه كان هجرى ولا ميلادى…………………………..لكن قصة بكرى بشرى واغنية الكاش ف دى كان تقولها لى قبل ما يقع الفاس فى الراس واسمعها وافتش كلماتها واحقظها دى ياخى ما تحفه دى عزااااااااااااب عديل كده وربك يستر………………..
    وفعلاً زي ماقالوا وقلت هناك فوق (( الافراح تدور يمشولوا والاحزان تجيك للباب))

    ربى يسر ولا تعسر الهم اميييييييييييييييييييييييييين يارب.
    والى لقاااااااااءءءءءءءءءء

  16. ياسين شمباتى كتب:

    ركس…سلام..
    اها انجهوهو !!

    الغبشة..سلام..
    تسلمى يا الملكة والعفو لله وربنا يجمعنا فى عليين..لكن الخلاك تتورطى شنوووووووووووووو؟؟ انا حذلات ذوى القلوب التعبانة غايتو…وتحياتى لمن بطرفك..

  17. نيام كتب:

    الحبيب دكتور شمباتي ، و الله اشراقات من كل نبع قطرة و كلها حلوة حتي الحزن عندك ليهو مقام …اثابك الله عظيم الثواب علي صبرك و عظم الله الاجر ..ومتعنا و اياكم بالصحة و العافية…كل عام و انت بخير…

  18. ياسين شمباتى كتب:

    الحبيب نيام…سلام..
    وانت بالف خير يا اديب ياراقى..وربنا يجمعنا فى ساعات الخير ويبعد عننا كل حزن وشر..وتحياتى شديييييييييييد لى مدنى البريدها وبريد اهلها وترابها..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s