دي بس ما ممكن..!!

Posted: الثلاثاء,16 نوفمبر, 2010 by عزت in اخرى

لم يتركنا الإمام يوم الجمعة الفاتت إلا و أن يذّكرنا بأمور ديننا ودنيانا المرتبطة بعيد الأضحى فطفق يكلمنا عن الأضحية التي يستحب أن يذبحها المسلم براهو وقال لينا (عواطف) ما تغلبك و تقول ليك الخروف غالي و تقوموا تقسموها في الأكياس وعلى الفريزر (فور ليتر يوز)…. لا لا لا لا فحسبك تلت لأكلك و تلت اهداء و التلت الباقي للمساكين… يعني الستماية بتاعت الخروف ينوبك منها زي ميتين كدا…. ما مشكلة… الأتلات دي ممكن تتفاهموا فيها… ما سمعت شيخ منو كدا الكان بيتكلم عن عبادته بكل فخر فسهى شوية عندما أراد أن يكثف الضرب فقال (إحنا الليل دا كلو مساهرينو… فأردف التلت الأول نختموا بالوتر و التلت التاني قراية ساكت للقرآن بيناتا ركعات و التالت نجدد الوضوء و هاك يا قراية و التلت الرابع قراية و في آخروا نستعد للفجر… دحين التلت الرابع بتاع الخروف ممكن (تصبنو) ونوم بي (فتوت) الشيخ…

ولم يترك الإمام لنا فرصة إذ رغّبنا في صوم يوم عرفة فأصبحنا أنا وأولادي صايمين مع انو دايمن كنت مع (حق الحكومة) ما بنعرف ستوت و لا اثنين ولا خميس… و ذكّرنا كمان بأن نطرق الأبواب ما نعمل فيها رايحين و نجي توش داخلين البيت نخلي البيت كلو يتكبكب.. يا بت جيبي لي توبي والراجل يجري لي جوة يلبس جلابية فوق العراقي المشروط فالشاهد إنك جاي لي بيت فالمستحب أن تجد سكانه في أجمل هيئة يودوون أن تراهم فيها… دا كلو ما مشكلة هسة بالله مع المشغوليات والبلد الفايرة الكبيرة الناس بقت تتزاور… ياخ زمان كنا نبيت عديل عن ناس أعمامنا وخالاتنا و مافي زول بيسمح ليك تمشي بدون وجبة والا مبيت وجلابية كمان… هسة بالله تمشي لي خالك وتقعد معاهو في الحوش و هو يتململ كل مرة منتظر منك تنقل إليه خبر كعب لحد ما الشمار يحرقوا و يقوم يقول ليك (انشاء الله خير)….

وبرضو ما نسى يكلمنا أوعو تقوموا تمشوا للبيوت الكانن فيهم بكيات (وتقولوا دا عيدا الأول) وكدا و تجددوا الأحزان.. لكين باقي ليك هو أصلو كان في حزن في بيت البكا في يومو الأول ما الحكاية بقت برنامج فبينما يكون الجثمان مسجيا على العنقريب و في انتظار إتمام الحفر و الدفن تتعالى الضحكات من المشيعيين و ينصرف الناس لأمورهم الحياتية بعد ذلك و يتحول سرداق العزاء بعد ذلك الى بوفيه و وليمة تنحر فيها الخرفان و “كم معلقة يا أستاذ” في الشاي أو القهوة…

عموما وأنا في بالي كلام الإمام و عدم تجديد الحزن… قلت غايتو أتوكل و أمشي لي ناس عمنا باقي دا عيدو الأول لكين في بالي إنو أجد معظم أهل أبوي هناك والواحد يعّيد عليهم بالمرة سريع كدا لمن فطورنا يطلع أصلوا عينهم طلعت لمن لقوا ضباح في البيت الكبير فمن المؤكد سيخرج الفطور قريب اتناشر أكون مشيت و جيت… وأنا داخل على بيت عمنا نطيت لي جدول بتاع دم ناشف مارق من البيت و هناك في الحوش خروفين تاني منتظرين مصيرهم المحتوم… فدخلت فاستقبلوني بالترحاب و الساعة مازالت عشرة صباحا و كل قروب داير يجرني لي صينيته التي تنوعت بالمشوي و المحمر من اللحم و الكمونية أي والله ماعارف متين سووها و الطعمية و ملاح شنو مابعرف و الكسرة الرهيفة البيضاء و صحن الشطة و السلطات التي توسطت الصينية والضحكات المترعة وصوت أحدهم جيبو ليهم صينية جديدة… وخلي بالك الساعة زادت في العشرة صباحا بخمسة دقائق… ضعفت أمام إصرارهم بأن أدخّل يدي وأضوق اللحمة دي… مع إنو الإمام كلمنا انو الواحد ما مفروض ياكل حاجة بالصباح سوى لحمة من ضحيته… لكين مولانا نسى انو (عواطف) في الحج وما في طريقة للضبيحة أول يوم أمام اصرار أهل البيت الكبير بأن الفطور معاهم أول يوم و أهل عواطف تاني يوم و أخوي الجا من برة برضو اليوم التاني….

غايتو يا الامام سامحنا في دي ما ممكن… فلتجدد الأحزان كان بالطريقة دي…!!

وتقبل الله منا ومنكم صالح الأعمال…

Advertisements
تعليقات
  1. عبدالرحمن أحمد كتب:

    كل عام وانتم بخير يا دكتور

  2. ودالخلا كتب:

    سلام ياقبيلة،،
    أخي وصديقي دوك عزت وزواره الكرام كل عام وأنتم أجمعين بكل خير وطيبون.
    مالي أراك ياصديقي وقد تطوفت بكل ماهو من هنا وهناك ولم تترك شاردة ولا واردة ألا وأوردتها في هذا اليوم السعيد بس أراك وقد عملت حساب لناس ود البركة وأبيت تجيب سيرة (البحر)، أم أراك قد نسيت أو تناسيت المنى يا روح قلبى والمني ليس يفنيه الدلال، فسقاة الكأس الذين هم من عهد الرشيد، وشفاه عطشي وأخري كئوسها نار وجمرة ولا الدنيا عيد،،،،،،
    طبعا” مع المشاوي والطيبات هنالك سقاة الكأس الذي لا بد وأن يكون هو جزء” من طقوس العيد ولا أدري ماهو الرابط بين هذا وتلك،،،،،
    وأغرقتنى بين أمواج المنى
    والمنى شطّ على بحر الغرام
    وسقتنى خمر أعناب الهنا
    والهنا كأس وهمس وإنسجام
    علمتنى كيف أنسى من أنا
    وأنا لفظ حرام فى الهيام
    يا سقاة الكأس من عهد الرشيد
    وبقية القصيد توجب الحد ياسديقي، فقد سرى نجمها مع الأفق البعيد
    وحطم الكأس وولى وانطفأ نجم تلألأ
    وغدت تبكى على شفتيّ أصداء النشيد
    تحياتي لكم كووولكم وخاصة خالد ود مدني!!

  3. عزت كتب:

    ههههه ههههه

    يا ود الخلا الظاهر الامام عاين للصف الأول بس و لم ينظر لناس خط مية غرب… ربما لانحسار الظاهرة و تقهقرها للوراء فلم تعد هناك مشروبات صديقة للبيئة كما كانت (ق ش) واتكل الكبار الذين كانوا يعرفوا عمل الشربوت…..

    انت عارف العلاقة وثيقة جدا بين هذي و تلك فاللحمة الكتيرة هي المحفز الاساسي ووجود المطارات و الكنكان كمان…!!

    ربنا يعيد العيد و الجميع قد تحللوا من تلك العادات… و تقبل الله منا و منكم

  4. طارق أب أحمد كتب:

    دوك ضيوف العيد العيد كل عام و أنتو تامين و طيبين

    أستمعت للشيخ محمد احمد حسن فى لقاءين قبل العيد و هو له رأى مختلف عن الإمام بتاعكم

    (( لا عندك مشكله لو ضبحت الخروق و دخلتو الفريزه (الفريزر) و اأكلتو أنتا و ولادك الشهرين الجايات ما خلاس أنت سويت السنه))

    كمان له رأى الشربوت فى لأنه ((مكون من تمر و ذبيب و غرنجال و هبهان و قرفه و حبه سوده و خميرة بيره ,,,,,أها خميرة البيره دى بتسوى كيت و كيت وووووووو))

    يعنى تانى ما ناكل رغيف

  5. طارق أب أحمد كتب:

    تصويب

    ما عندك مشكله لو

    طبعن الكلام بالشايقى إذن أخطاء الكتابه وارده ضبحت الخروف و دخلتو الفريزه (الفريزر)

  6. قرن شطة كتب:

    دكتور / عزت
    كل عام وانت والاسرة بخير وسعادة اذا امكن…ضحكتنى حكاية الامام بتاعكم! عندهم راى فى كل ىء وهذه الاراء الدين منها براء… على كل حال انا عندى راى فى الجماعة الافندية الدينين ديل ، وهم مايخلونا نشوف احزانا كيف ووين ونحن ادرى بى مشاعرنا وكده…على كل كان لاقيتك يوم بوريك نظريتى شنو بالخصوص…تحياتى

  7. مشاكل كتب:

    سلامز

    الزمان

    الساعة الآن 43 : 3 فجر اليوم الأول لعيد الأضحى

    المكان

    أرض الله الواسعة منه .. الضيقة علي في أربع جدران

    كم أتمنى لو سافرنا

    نحو بلادٍ يحكمها الغيتارْ

    حيث الحبُّ بلا أسوارْ

    والكلمات بلا أسوارْ

    والأحلامُ بلا أسوارْ

    هات يديك اليمنى

    كي أتخبأ فيها

    هات يدك اليسرى

    كي أستوطن فيها

    قول أي عبارة حب

    حتى تبدأ الأعياد

    فها هو العيد أتى .. و العبد لله يحمل في داخله حزنا لا يتأتى

    فانا لم أعرف أبدا

    أن الدمع هو الإنسان

    أن الإنسان بلا حزن

    ذكرى إنسان

    فحقائب الحزن و البكاء تجعل العصبة تنوء بهذا الحمل الثقيل … حزن على الفراق .. و بكاء من لوعة الإشتياق .. فأتذكر

    عينيا ما تبكي

    كفاية أحمل هم

    و أعيش حياتي ألم

    نارية في جسمي

    نيرانا ما بترحم

    و المزيج المتكون من بياض القلوب مع لون الدم الأحمر في عيد الأضحى يجعل هذا المزيج أغلى من مزيج النيل .. ففرصة لقاء الأهل و الأحباب في العيد لا يعوضها درهم الخليج ولا يورو أوروبا .. تجعلني أتوسل لساعي البريد

    بالله يا ساعي البريد

    سلم على الزول البعيد

    قول ليهو غير ما بريد

    أنا ما بريد أنا ما بريد

    فأسمع و أستمتع من ( الخالدي ) رائعته الخالدة

    وجانــــــــــــا الريد يعلمـــنا

    نعــــــيش الدنيا بالإحساس

    نســــــــــامح بي قليب طيب

    نشـــــيل الريد لكل الناس

    عرفنا الريده في الطــــــيبه

    حلاوه الريدة في الاخلاص

    ****************************************

    الزمان

    الساعة الآن 56 : 6 مساء اليوم الثاني لعيد الأضحى

    المكان

    أرض الله الواسعة منه .. الضيقة علي في أربع جدران

    تذكرت فجأة : هون عليك

    أي شيء لم يضع

    مادام للتقبيل في الدنيا وجود

    و على الأرض خدود

    لذلك

    حملت نجمتك الأنيقة في فؤادي … و مشيت نحوك … فانهيت إلى بلادي

  8. مشاكل كتب:

    سلامز مربع
    كل عام و أنتم بخير و السنة الجاية تامين ولامين و بأتم الصحة و العافية و ربنا يحقق كل الأماني
    كتبت هذه الململة في صفحتي هترشات بموقع الفيسبوك .. فهذا هو أو عيد يمر علي و أنا بعيد عن السودان .

    http://www.facebook.com/pages/htrshat/112623218779735?ref=mf#!/pages/htrshat/112623218779735

  9. عزت كتب:

    مشاكل سلام ……. ورد الله غربتك…. انت يا زول متين مشيت اللمارات
    شغل و الا ترفيه..؟

  10. خالد مدني كتب:

    عزت والحبان … سلااااام وحب شديد
    والله يا عزت مقالك زي ام فتفت خلطة عجيبه ولذيذه وحادقة … عيد مبارك علي الجميع اعاده الله علينا وعليكم باليمن والبركات .
    الحبيب ود الخلا … عليم الله القلوب شواهد ومحبتكم كما في الراحتين الاصابع .

  11. سهيل كتب:

    ايد مبارا الينا اليكم و كل سنه تيبون تيبون ….

    عيد مبارك علينا و عليكم و كل سنه طيبين طيبين .. دا يا عمك بلهجة اهلنا الفلاته الزمااااان الطيبين ..
    امك .. هسي ينط لينا واحد من جماعة افليقا بتاعين اسهاقا منا آل البيت .. يورينا المكشن بلا بصل ..

    قرن شطه : شنو يا عمك .. نظريتك بالخصوص دي حصريه علي د. عزت ولا كيف ..

    مشاكل : رفدوك متين يا حبه .. ولا ياربي مشيت الإمارات “حاج” .. شنو يافرده الشغل الكروباي دا .. ياراجل عيب عليك انا قيلك لسه معانا .. اودي وشي وين من طارق اب احمد انا .. تلقاهو المسكين برضو قايلك معانا .. ارسل ليك السي في هارد ولا سوفت كوبي .. انشاءالله هندسة نظافه طرق

  12. عبد المنعم كتب:

    عيد وباي حال عدت يا عيد .
    يا ليتنا عدنا أو عادت الايام … ايام الناس البتسيب خروفها يأكلوه ناس تانين وهم ياكلوا في بيوت غير بيوتهم … أما مسألة نصائح الامام التي يعيدها على مسامعنا كل خطبة ضحية حفظناها عن ظهر قلب لكن حكاية ثلثين توزع وثلث فقط لاهل المنزل دي مافي زول شغال بيها خالص غضب ام رضي هذا الامام او غيره ده زمن قسيم الناس راجية الضحية دي بفارق الصبر ,
    اما صواني اعمامك الكاربة دي فعلا مغرية وما بتتفوت يا راجل كان تكربها للنهاية وان الله غفور رحيم .
    تقبل انت وزوارك الكرام تحياتي مع جزيل الشكر والتقدير ،،،،

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s