التحرش الاقتصادى….

Posted: السبت,11 ديسمبر, 2010 by ياسين شمباتى in إقتصادية, سياسية

لم اجد كلمة تعبر عن ما يحدث للاقتصاد السودانى فى راهن الايام الا كلمة (التحرش),,فهى الاصدق والاوصف للوضع…فدأب الحكومة مع المواطن هو المراودة والتحايل والتمايل والتلون,لكنها آثرت مؤخرا ان تتحرش به اقتصاديا واجتماعيا وسيساسيا وامنيا,,وربما اتينا على كل جزئية بالتفصيل..

لكن ما يمر به الاقتصاد هذى الايام شئ لا يوصف,فما معنى ان ترتفع قيمة الدولار _بيعا وشراءا_ فى غضون ايام تحصى على اصابع اليد الواحدة؟؟وحتى الريال الذى لم يكن يتعدى ال670 جنيها فى البنك ارتفع مع حبيبه الدولار الى 800 جنيه داخل البنك!! الحكومة او البنك المركزى على وجه الخصوص شرح الموقف بان الدولة ترغب فى جمع (عملة صعبة) او اجنبية تحسبا لما يمكن ان يحدث!! أليس هذا هو التحرش الاقتصادى و الامنى بعينه؟؟فانت حين تعبر عن تخوفك مما قد تسفر عنه الايام هكذا دونما تلطف او تعقل فماذا تتوقع من المواطن ان يفعل؟؟حتما سيصيبه الهلع والخوف والفزع من مقبل الاحداث,,وسيتوجس خيفة من نيتك كدولة تجاه الآخر صبيحة او عشية الاستفتاء..

ثم ما بال الدولة لا تملك عملة اجنبية متحوطة لغول الزمان؟؟ أ دولة هى ام (جبّانة وهايصة)؟؟ لا حياء او خجل عند محافظ بنك السودان,,هذا المهنى المطبوع لا يستحى ان يصرح بهاتيك كلمات مخزيات..وقوله هذا يناقض تصريح السيد وزير المالية الذى اكد واغلظ القول بان الاقتصاد السودانى لن يتأثر بمغبة الانفصال ابدا !! وهكذا صرّح غيره من الدهماء والغوغاء منسوبى الحزب الجاثم على صدورنا..

ومن عجب ان السيد نافع على نافع له تصريحات متناقضة قد استمعت لها باذنىّ اللتين سيؤول امرهما الى دود الارض,فيوما صرح بان الوضع الاقتصادى قد يتأثر لمدة سنة,,ويوما آخر قال ان التأثير لن يتجاوز ثلاثة الاشهر!! فداه نفسى كيف يحتسب هذه الحسبة!!؟؟

ومن عجب ان السيد وزير النفط قد صرح قبل ايام ان انتاج مربع (6) من البترول سيرتفع الى مليون برميل يوميا بنهاية الشهر الحالى,,ولك ان تعلم عزيزى المواطن ان انتاجه اليومى هو 70 الف برميل فقط!! فهل يقصد السيد الوزير ان (يشفط) الحقل كلو فى رشفة واحدة ام ماذا ؟؟ وهل الامر تصريح واعتباط ام هى دراسة وتبصر؟؟ كما ان السيد وزير المعادن قد بشّر الشعب بان انتاج السودان من المعادن سيسد (فرقة ) البترول !! عليك الله امشى نوم يا سعادتك..كما نوّه الى اكتشاف الذهب فى العديد من الولايات الشمالية..هذا الذهب الذى اشار له المساعد نافع فى برنامج (حتى تكتمل الصورة),,وعندما حاول مقدم البرنامج الحصيف ان يناقشه بالارقام والحسابات اختصره ب ((ان الله يرزق من يشاء بغير حساب)) ..ونعم بالله يا سعادتك,,لكن الى متى اللعب بالبيضة والحجر ؟؟

كما اعجبنى توجيه السيد الرئيس الذى ينص على (الاسراع فى تطبيع العلاقات مع ايران,,خصوصا فى الناحية الزراعية)!!! صديقى الذى انبأنى بهذا الخبر قال لى 😦 يعنى يا امريكا كيتا عليك انتى فصلتى الجنوب انحنا ماشين على ايران)!! ولعمرى لقد اوجز الوصف وابان المشهد..

هبشة : اخوف ما اخاف ان تعود الهتافات الهوجاء الجوفاء على شاكلة ( يا امريكا لمى جدادك)..وتجيك امريكا بحاملات الطائرات عشان تلم جدادها,,فحينئذ لا ينفع نفس توبتها واوبتها ما لم تكن قد ادّت فروض الطاعة من قبل…

ونلتقى…………..

 

Advertisements
تعليقات
  1. nono كتب:

    شباتي سلام
    يعني يا شباتي المعاجم دة كلها ناس… لسان العرب ….والقامـوس المحـيط ….محيط المحيط
    مافي اي كلمة مرادفه للاقتصاد دة …. الله ياناس انا مابفهمشششششششششششش في السياسة ……..
    دة المبيد الوحيد الخلانا برة الشبكة (سوداننا)

    كسرة بي ملاح

    شوف ليك ملاح كااااااارب خته في الكسرة دة

  2. عزت كتب:

    معليش يا نونو استحملي ناس سوداننا ديل شوية باقي التحرش بالاقتصاد دا ربما يعدمنا الملاح البنبلبيهو الكسرة…. وطبعن هم ما حيتأثروا لأنو قريشاتنا اللموهم زمان قرشوها في ماليزيا ونحن لينا الله….

    لكين يا شمباتي أخوي البسو فيهو الجماعة ديل بالاقتصاد دا يبدو لي جغمسة سااااااكت بتاعت ناس في مستوى روضة الاقتصاد هذا اذا كان للاقتصاد سلم تعليمي….

  3. ياسين شمباتى كتب:

    نونو..سلام..
    النصيحة ما لقيت,,واحيلك لى فيلم (جعلتنى مجرما) …
    والملاح دا يابتى نلقاهو وين هنا ؟؟لكن ناس فيديكس شغالين كويس..وخليك قريبة..

    عزت..سلام..
    لكن قدر دا !؟؟ والله شئ مخزى ومفجع,,والغايظنى زولهم حمدى,,كلما يستضيفوهو فى برنامج يمسح بيهم البلاط ويطلع فضايحو الزمان بلا خجلة !! اسه عليك الله الداير الجلد منو؟؟

  4. ابكرون كتب:

    شمباتي يا امير
    مشتااااقون
    يا اخوي ما تتور نفسك ديل بديروا الدوله كانها اتحاد طلاب جامعات…اقتصاد شنو البتكلموا عليه …الناس دي فقدت السيطره علي البلاد والسودان بقي ( ship not under control )والسفينة لمن (تعيير زي البعير – كده صاح يا بشار) خلاص تتقاذفها الامواج وتتحطم ، ولو لطف الله بقيض لها قبطانا (سياسيا) يرسو بها في تخوم الجودي ……امس يتساءلون في نشرة العاشرة عن اسباب زيادة الخبز (التي حدثت فجعتن )….! ههههه لاحظ الدولار عمل اربعه وبيسألوا وهم البرفعوا فيه يوميا بنسب مئوية مفتوحة من بنك السودان … ويتساءلون ايضا اين دعم الخبز ؟؟ بينما يصرف علي دوره مدرسية فارغة وفاشلة 26 مليار مضيعة لاموال محمد احمد وباب مفتوح لللغف عجبي……!

  5. والله يا ايكرون الدورة المدرسية دى ممغسانى مغسة شديدة خلاص.

    ناس الحركة استلمو القروش بتاعتا – وشيدو بيها مبانى وجزو منها مشا وين مامعروف – وجو فى النهاية ركبو الناس ديل ماسورة!!

    يجيك الوالى ويدق صدرو ويقول ليك ح نعملا فى الخرتوم؟؟؟

    وتاى قروش وتانى دعم وتانى صرف – ياخى ماتدعم بيها الدقيق ولا السكر الطارو السما ديل !! ولا هم مااولوية عندك – دورة مدرسية بتاعت شنو ؟؟ هو ده وقتو اصلو .
    عالم مابتفهم ولا بتعرف الاولوية وين وشغل كلو بتاع جربندية ساكت.

    شمباتى – والله قرينا الاقتصاد ومما قريناهو ولحد الان مافى شئ منو لقيناهو فى البلد دى – وكل زول بصحى الصياح بجى وبنظر ليك كانو ادم سميث وبدير البلد كانو ماكنزى .

  6. علي سنكل كتب:

    شمباتي :
    كنت أتوقع أن تمر على ( التحرش القانوني ) الذي يعاني من ويلاته فقراء ومساكين الأمازون ، الذين يهانون ويعاقبون بقانون ( حمورابي ) الذي يسمى بإسم الدلع ( قانون النظام العام ).
    كما كنت أتوقع منك الوقوف عند تصريح أول مدير لجهاز أمن الإنقاذ و أول مؤسس لبيوت الأشباح متنفذ النظام نافع علي نافع ، على جلد هذه الفتاة المسكينه ( لطالما جلدت فلا بد من أن تكون فتاة سيئة ) أو ( لو عرفت ما فعلت لكنت تتمنى لو أنها قتلت ).
    أي دين هذا وأي إسلام هذا الذي يبيح الجلد بهذه الوحشية الضاربة في اللا إنسانيه؟ والعقوبة تنفذ بواسطة رجلي شرطة وسط ضحك بقية أفراد الشرطة وتحت عين السيد القاضي الذي كان يستعجلهم في تنفبذ العقوبة بهذا الشكل الهمجي الوحشي.

    بالله هل هذا هو دين السماحة والخلق؟ وهل هذا هو شعارنا الذي نقدمه للعالم حتى يقيم دوله التي تتبع شرع الله؟ وهل هذا هو شرع الله؟
    لو كان الأمر وقف عند حد الشرطة لقلنا والله هذا تجاوز وجهل بالقانون. أما أن يتم التنفيذ بهذه الصورة تحت عين وبإشراف قاضي ، ويدافع عنه عراب النظام وحامي حماه نافع فهذا ما يدهش ويحير العقول.
    هذا ما آلت إليه بلادنا في ظل كهنوت الزمن الحالي ، طالبان السودان الجدد.

    كسره:
    لكن قلت أكيد شمباتي كتب موضوعو قبل ما يشوف الفيديو الفضيحه دا.

  7. محمد النور كتب:

    قبل الانفصال باقل من سنة و الحكومة قامت تجقلب و تبحث عن مصادر دخل اخرى وكأن ما يحدث الان حدث فجأة وهم نيام.. نفهم من كده ان كل الوزراء و كل هذا الكم الهائل من المستشارين ووزراء الدولة وكل كل الشهادات العليا و الالقاب الفضفاضة كلهم كغثاء السيل.. لا هم لهم سوى ملأ جيوبهم و اتخام ارصدتهم المالية.. لكم يوم انشاء الله

  8. عزت كتب:

    بيكون شافوا يا عزيزي سنكل ولكن كان منتظر تنفاعل أولي الأمر على خلفية…
    شهد على عقابها طائفة من الملايين بدلا من المؤمنين بعد نشر الفيديو الفضائحي…
    وهذا الذي رايناهو فما بالك بالذي لم نره من هؤلاء المافونين….

    عموما كالعادة ذهب المؤتمر الصحفي للشرطة مركزا على الفيدو من صوره ومن بثه… واكيد حيسكت على من تسبب فيه….
    عجبي

  9. ياسين شمباتى كتب:

    ابكرون..سلام…
    والله الشوق اكتر..
    هى كانت بقت على جوال العيش الزاد 26 الف كان سكتنا,,لكن جوال السكر زاد فى 24 ساعة اكتر من 60 الف جنيه !!! بعدين يتساءلوا كيف؟؟الزيادة دى بتجى من عند الجيران ولا مضبوطة من البنك المركزى؟؟
    اما عن القبطان السياسى فعمرنا ما ح نلقاهو فى وسط الجماعة ديل,,ومدر مدر يا رواسى انحنا خلاص حصلنا القيفة,,وفك الدفة وادها غيرك وكل انسان فى الارض خليفة..

    استرايكر…سلام….
    عليك الله الوالى قال كدة؟؟ اسه دا ما مفورض يجلدوهو فى القسم دااااااااااك؟؟ وناس الحركة طلعوا مفتحين,قالوا نلغف لينا لغفة ودار ابوك كان خربت,,ياها ذاااااااااااتها..بعدين الوالى دا دخلو شنو فى الدورة المدرسية؟؟مش تابعة لوزارة التربية والتعليم الاتحادية؟؟ولا هو غززان عود ساااااااااااكت؟؟حسبى الله عليهم..

  10. ياسين شمباتى كتب:

    سنكل..سلام..
    والله لم يغب عنى ذلك,,لكن زى ما قلت انو البوست اتكتب ونجض قبل الفيديو,,وكان ممكن اضيفو لكن اخوك جهلول فى التكنولوجيا وما بعرف ينزل فيديوهات..والموضوع دا فاتحنو فى الفيسبوك ونيرانو مولعة..
    لكن بالجد شئ يزعل ووالله لم املك الدمع ولا حرقة القلب عند رؤية مطلعه,,ولم استطع اكماله حتى اللحظة..
    (لو عرفت ما فعلت لكانت تتمنى لو أنها قتلت )..طبعا نافع دا اضينة ودموى واكبر متحرش بالشعب,,يعنى عملت شنو بس!!؟؟ والله الموت افضل واشرف من هذا,,لكن نافع دا بالذات ح يجى يوم ويتمنى لو انو جلد بس!!! وربنا على الظالم والمفترى..

    محمدالنور..سلام..
    ومرحب بيك كتير عضو فاعل واخ سودانى اصيل..
    المشكلة انهم ما قبل سنة,ديل قبل 3 اشهر او اقل بس بداوا يفتشوا عن البدائل ! وهيهات هيهات لا جن ولا سحرة..بقادرين على ان يلحقوا اثره…

  11. ياسين شمباتى كتب:

    عزت..سلام..
    فعلا اللجنة مركزة على من نشر الفيديو!! الله ؟؟ وكمان ممثل حقوق الانسان فى السودان فى لقاء على العربية او البى بى سى قال انو نشر الفيديو دا الان قصد به زعزعة الامن فى السودان !! لما المذيع ختاها ليهو وقال : يعنى السودان خلاااص انتهى من الحروب والاستفتاء وبقى الفيديو دا هو اللى حيزعزع الامن؟؟حتى استعدل واتكلم عن حقوق المواطن !! عالم تافهة بشكل..

  12. أحمد الفاضل كتب:

    يحتاج هؤلاء الرعناء لنظام عام يضبط تحرشاتهم بدل أنظمتهم التي فضحت على رؤوس الأشهاد

  13. عزت كتب:

    يبدو يا شمباتي الجلد بقى موضة الأيام دي فقد جاءت الأخبار بأنه نفذ حكم الجلد برجل وشابة اندونيسيين الجمعة لانهما تبادلا القبل في منطقة اتشيه ونفذ الحكم بالجلد ثماني جلدات على الظهر بعصا خيزران لكل امام مسجد مدينة جنتو. جديرا بالذكر أن كلاهما متزوج، قبضو وهما يتبادلان القبل في غابة…..

    ياخ هم مشو لحد الغابة تقوموا تلحقوهم….!!

    وهسة برضو الأخبار جابت أن الدراما السعودية باتت تتسارع ودايرا تلحق بالذين سبقوها وتتسارع في التطوير وتتسابق مع المنافسين إلى حد اننا ولأول مرة شاهد المشاهدون القبلة صريحة في الدراما السعودية، فهل زادت مساحة الحرية الى هذا الحد في الدراما السعودية، ام ان سقف الرقابة تغير ؟ ام هي مجازفة غير مسؤولة من المنتج ؟.

    الكلام دا يا شمباتي قالوا في مسلسل ” هوامير الصحراء ” الذي يعرض على روتانا خليجية، والذي شهد منذ أول حلقاته جرأة ملحوظة، حيث ظهرت مشاهد متعددة في ملاه ليلية و يتخللها شرب الخمر و ” القبلة ” الأولى في الدراما السعودية.

  14. قرن شطة كتب:

    الاخ / شمباتى
    مساء الخير
    والحقيقة نحنا معرفنا نصدق منو ونكذب منو؟ دى مشكلة عجيبة جدا ياصديقى…..

  15. ياسين شمباتى كتب:

    احمد الفاضل..سلام..
    وبركة بالطلة..ديل بس عايزنهم يفوتوا يخلونا..بس..والمغطى على الله كاشف,,عشان كدة كل يوم فضايحهم تتجلى وتنجلى عنها السواتر..

    عزت..سلام..
    والله ناس اندونيسيا اتلوموا !! طبعا انا ما كنت متصور انو اندونيسيا فيها متشددين او اصوليين حتى قرات ما كتبه صديقنا/ شريف حمدى بمنتديات نخبة السودان بعنوان (الاسلام السياسى),,حيث ذكر وجود هذه الجماعات المتشددة باندونيسيا…لكن ناس الغابة ديل يكونوا ساقوا ليهم شرطة نظام عام من هنا ولا كيف!؟؟ حسبى الله على الظلم فى كل مكان..
    اما عن مسلسل هوامير الصحراء فلقد تم تصويره وانتاجه خارج المملكة_عدا بعض المشاهد_ولقد بشّر المؤلف والمنتج المشاهدين بانهم حيتعرضوا للواقع الخليجى والسعودى بالذات بصورة من الواقعية والموضوعية…لكن خايف الواقيعة دى تورطهم فى حتات عجيبة!!!

  16. ياسين شمباتى كتب:

    قرن شطة..سلام..
    مساك اسعد يا رائع..صدق نفسك النقية دى وبس…وانت عايشت وشفت عن قرب مدى زيفهم وخداعهم..

  17. ياسين شمباتى كتب:

    ودى قصيدة كتبها الدكتور معز بخيت_على ما اعتقد_ فى حق الفتاة التى جلدت :-

    جلدوك جهراً يا فتاة المجد آه..
    جلدوك عمداً
    في الصدور وفي المآقي والجباه
    جلدوك يا امرأة من الماس الأنيق
    ومن حبيبات المياه..
    …لا السوط أسكت حسك المثقوب
    بالصيحات لا خنق الشفاه..
    الآهة السكرى بغدر الآثم الملعون
    يلهب ظهرك المسدول لوعاً وانتباه
    عفواً فإن شوارع الدنيا
    ستهزم صمتنا
    وتضج غضباً يا فتاة..
    وتضيء أنفاق الممات
    على ممرات الحياة..
    وستجعل البركان يخرج بين آهات
    العذاب حملتها بين التنهد
    حين ناظرك اعتراه..
    والله يا بنت الكرامة لن يناموا
    في سرير الأمن بعد الآن
    لن يتنفسوا سراً هواه..
    يا آثمون وظالمون ويا طغاة
    تباً لكم
    إن الفجيعة لم تعد تزهو بكم
    والموت أسمى من لهيب الذل
    من سحت بناه
    ضيم الأسى والموقف المخزيُّ
    شرطيٌ سقيم شاهد الذنب احتواه
    تباً لكم
    يا زمرة الأحقاد يا كل البغائض
    يا ذئاب النار يا زبد اللهاة
    متى تذهبون فتصلح الدنيا
    وتأتلق الخطى..

    وكمان هاكم الرابط دا لمزيد من التوضيح :-
    http://www.sudanile.com/index.php?option=com_content&view=article&id=21220%3A2010-12-12-08-39-39&catid=34%3A2008-05-19-17-14-27&Itemid

  18. elturkey كتب:

    الحبيب شمباتى الأخوة الزملاء أحييكم تحية اقتصادية أصلو اليام دى المابخلى باله ويقتصد ح يقع منه بنطلونه ومن اقتصد فى البنطال فقد جلد امام شاهد عيان …. فى الحقيقة القصة ياخويا فاتت التحرش بهناك وبقت شروع فى التعدى …. يوم الجمعة فى برنامج عدد خاص اثبتو انو جوال الدقيق بكلف اقل من تسعين جنيه وهسع فى السوق بمايقارب الميتين …. الشهر الماضى البنك صرف الدولار بمايقارب التلاتة جنيه ومكتوب على اللوحة ميتين وخمسين (كذب ولا نفاق) وكل يوم موقف النيل الازرق يورينا سعر الدولار برعاية بنك الخرطوم على ميتين كم وخمسين …. بقولو بنوكنا اسلامية وبتحارب الربا نقوم نستلف وفوائد الديون تفوق الأصل وبرضو بنقول شريعة ونعاقب الفتيات بالجلد طيب الشرطى فى دى ماعنده ذنب قانون وبنفذه القاضى اللى عايز يطبق الشريعة وحاضر التنفيذ أثبت التهمة كيف (والتهمة أصلها شنو ؟) دا غير انهم اكتشفوها كيف ؟؟؟ بس تعرف نافع معاه حق الفترة مابتزيد عن تلاتة أشهر لانه فى نفس الفترة تحول من شراء فول العشا بالعراقى من كنتين حينا فى برى لبلوغ الطابق الخامس فى عمارته … ياشمباتى ياخ أثرت مواجع بس نقول شنو ونخلى شنو ….. الله في … القصيدة رائعة لك التحايا والأشواق

  19. نيام كتب:

    دكتور شمباتي:
    “تحرش اقتصادي” الكلمة تدل علي صميم المعني و ليست هنالك كلمة افضل من هذه ورغم انها تمس الحياء العام الا ان الحياء العام ما عاد يعبا بان يمس…فلا الممسوس و لا الماس و لا المماس و لا التماس عادت لها معاني عند المغفور له محمداحمد المزمزوني…فهو لم يعد يفرق بين الكلمات او اللكمات او الكدمات او حتي الشلالايت…فما لجرح بميت ايلام..فقد ذبحوه و صلبوه و ما شبه لهم…
    اولا كم وزيرا للمالية في دولة الامزون ومن هو الوزير المنوط به ان يبلغنا كل صباح اخبار قفة الملاح…هل هو ياتري السيد ابوالكل ام هو ابوالهول ام هو الهول نفسه…
    ثم هل التناقض سببه قلة المال ام سؤ الحال ام جهل المآل…ام كل الاجابات صحيحة…
    والمضحك المبكي ان الجنوبيين الذين لم يبنو دولتهم بعد او حتي اكون دقيقا لم يستلموا مفاتيح دولتهم بعد عندما يتحدثون عن ماليتهم يتحدثون بارقام اقل ما توصف به متفق عليه…اما نحن فتصريحاتنا متصاربة فبينما يصرح ابوالكل بان بترول الجنوب لن يؤثر علي الميزانية العامة و لكن تاثير قوي علي ميزان المدفوعات (دي زاتها عايزة فهامة) بينما يصرح وزير المالية بان ارتفاع السلع ليس له ما يبرره فالحال مستقر و الاقتصاد ليس فيه ما يعيبه..يصرح وزير الدولة بوزارة التجارة بان انتاج البترول يؤثر بمقدار 40% من ميزان المدفوعات …
    وزير الطاقة يصرح بان البلد كلها نفط في الوسط و في البحر الاحمر و في كردفان وان الامزون يقعد علي بتوجاز محتمل الالتهاب في اي لحظة…وقد مللنا الاحاجي و حكاوي شهرزاد وهاهو السوق يطل برأسه فمن كان منكم بلا معصية فليرمه بحجر…

  20. زووووووول كتب:

    العزيز جدا شمباتى وبقية الاخوه الاعزاء جدا جدا سلااام
    والله يا عمك العنوان اسكت خليهو … قلتا ليا الدوله بتتحرش بالمواطنين اقتصاديا ؟؟ طيب ما نكلم ليها قدو قدو يديها مية جلده ؟؟ ههههههههههه والله عندك جنس محن .
    كسره : الدوره المدرسيه 22 بالجد تجيب المصران والضغط والسكرى (هو فضل فيها سكر يا عمك ؟) .المفروض كان وزير التعليم يصدر قرار بالغاء الدوره المدرسيه الى الابد وتحويل الاموال التى ترصد لها سنويا لدعم السلع الاستهلاكيه او لدعم العمليه التعليميه . فماذا يتفيد محمد احمد المسكين من فوز نهر النيل ببطولة السله او فوز جنوب كردفان ببطولة الكره الطائر او تفوق الجزيره فى كرة المضرب . ما الذى يجنيه محمد احمد الغلبان من بروز نجم غد جديد فى الغناء او لاعب ناشئ جديد .
    لكن يا شمباتى لقيتك كدا (نفس وضعك القديم ) غايتو ذكرتنى قصة بلدياتنا حبيب الله الذى كان يردد امام المحكمه حبيب الله كان قرا الجبل ترا .
    وجاييك برواقه

  21. ياسين شمباتى كتب:

    التركى..سلام..
    والله صدقت,,وامس فى برنامج (حتى تكتمل الصورة) لم يستح الوالى ان يفضح جهله امام الناس,,فلقد اثبت ان لا خطة او رؤية للولاية حول الاوضاع الاقتصادية المتردية,,فلقد ابان انهم لا يودون التدخل فى موضوع غلاء سعر الخبز خوفا على اصحاب المخابزو من التضرر !! عليك الله دا انسان ولا …..!!؟؟ كل دول العالم الغنية والفقيرة تدعم الخبز والاساسى من السلع,,الا نحنا كالعادة..ولسه معلق مع موضوع الفراخ ومبسوط انو سعرها نزل لى 9 الف !! عليك اللله شوف لينا موضوع الخبز البنغمسو بعدداك نشوف الغموس…عالم عجيبة!!

    نيام..سلام..
    لكن ما عصرت على الجماعة ديل لى كلامك دا !!! والله انا بس نفسى اعرف الحاكمنا منو فى البلد دى !! كل واحد يصرح ويهطرق كيفما واينما وشاءما عنّ له…ولتاكيد كلامك عن تضارب اقوالهم وتصريحاتهم فموضوع الفتاة التى جلدت اكد مدير الشرطة ان الموضوع قد فات عليه عام كامل,,لكن الوالى قال انو 10 شهور بس,,فى حين انو ناس شرطة المحاكم قالوا انو حصل قبل 6 شهور !! وعجبى..
    اما عن اسئلتك فالاجابة الصحيحة هى : كل ما ذكر صحيح..

  22. ياسين شمباتى كتب:

    زووووول..وعليكم السلام..
    هههههههههههههههه,,,لقيتك بمبى بس!!
    بالنسبة لموضوع الدورى فعلا يحير ويجنن,,لكن عندى ليهو تفسير واااااااااااااااحد,,دا بند لغف جاهز كيفن عايزهم يضيعوهو ؟؟؟ يعنى اسه الوالى المطرطش دا مش كان افضل يلم قروشو ديل لدعم اصاح البيئة او التعليم او الصحة؟؟او على قولك يدعم بيهو السلع الاستهلاكية الطارت السما دى؟؟
    امس فى تصريح سخيف ليهو قال انو استضاف الدورة المدرسية عشان ما يكسروا بى خاطر الطلبة المساكين الجوا من اصقاع السودان المختلفة !! ياخى تخ!! طيب المواطن المسكين دا البجبر بى خاطرو منو!؟ غايتو دورتهم دى يوم بتجيب ليها (دورة) ودوشة لى مواطن !!
    اضافة: يانا الزمان يا حبيب,,وراجيييييييك..

  23. DAKEEN كتب:

    الدكتور شمباتي والاحبة
    تحرش اقتصادي ، تحرش قانوني ،، قانوني ،،،
    تحرش طبي ،،، تحرش علمي ،،،،
    كثرت التحرشات بالشعب الفضل وما بقى له من كرامة اصبحت في كف عفريت باقي عليه شوية ويجبه تحرش شعبي وتحرش الزامي .
    ليه ما يكون في وزارة التحرش الوطني عشان يعينو ليها وزير ومساعد ومساعد مساعد تربيع كم كدا
    وعشان تقصير الظل التحرشي يكون لها فرع في كل ولاية وكل محلية واللجان الشعبية للتحرش

    وزير التحرش الوطني يصرح : نحن اتحرشنا بمصر وبي امركيا بغلنا نتحرش بشعبنا الفضل .

  24. ياسين شمباتى كتب:

    دكين..سلام..
    حلوة جدا تحرش الزامى دى…..ههههههههه..
    ووالله فكرة حلوة جدا حكاية الوزارة دى,,لكن تقترح نعين ليها منووووووووو؟؟ الباب مفتوح للترشيحات…

  25. زووووووول كتب:

    شمباتى
    ربنا يكفينا واياك وبقية الاخوان شر الدوره ال بين قوسين دى هههههههههه
    فعلا قصة جبر الخواتر (بالتاء) سخيفه جدا من امير المؤمنين !!!

  26. ياسين شمباتى كتب:

    والله يا زووووووول اريتك لو حضرت البرنامج,,امكن يعيدوهو اليوم الساعة 3مساءا,,شوف واضحك وادعى ليهو بالشفاء..اما عن الدورة فالتقع من السما تحملها الوطا…

  27. mahi كتب:

    انكل ياس روق المنقا حننتنا والله البلاد ما خلاص حربت وربك يهون

  28. ياسين شمباتى كتب:

    ماهى..سلام..
    الحمدلله انو امورك سلكت ووافقوا ليك على التدوين !! بس براحة ما تدونى شديد..مرحب بيك وخليك قريبة يا صديقة..

  29. ياسين شمباتى كتب:

    ويستمر التحرش الآثم..
    هذا بالضبط ما كنت اخافه,,وسيستمر حتى يثور الجياع وينتصر المظلومين لانفسهم واهليهم..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s