زول داقس

Posted: الأربعاء,15 ديسمبر, 2010 by abushagrod2 in اخرى

يعد الزواج كانت المدام في إجازة ورأت أن تأتي لي بما يفرح القلب من السودان ومن خيرات السودان ما لم يوجد في بلاد الخليج وسألت وعرفت أن ثمرة القريب فروت فقط هي الوحيدة الغير متوفرة بكثرة هنالك وفي التفتيش في المطار عندما فتحوا الشنطة الكبيرة في صالة المطار القديمة هربت ثمار القريب فروت في كل الإتجاهات , بعضهم بالغ وقال أنه رآها تجري في شارع أفريقيا ( ثمار القريب فروت طبعا وليس حرمنا )!!!

لا بد أن حرمنا كانت داقسة

منذ صغري وأنا زول داقس والعلامات التي يحملها وجهي ولم تستطع السنون من محوها تثبت ذلك وتظهر أنني مثل جلمود صخرة إمرؤ القيس وهي نازلة تضرب في الأشياء يمين يسار فتحدث دويا وتحدث أثرا إلا أنها تستمر في التدحرج غصبا عنها فإما وجدت فجا في الأرض مرملا وذو تربة إستقرت في وداعة فيه أو وجدت جلمودا آخر كسرته أو تكسرت عليه .

في إمتحلن الشهادة السودانية الذي يحدد أي طريق يسلك الإنسان إخترت أن أتخذ مسارا يوازي مسار آبائي وأجدادي فإخترت أولا المجال العلمي أحياء ولكن أول حصة كانت عناوين المقرر وما زلت بعد ثماني وعشرون عاما أذكر الهيدرا والكلاميدوموناس حتى هربت فور إنتهاء الحصة لفصل الرياضيات وتركت زراعة آبائي وأجدادي وراء ظهري , والحقيقة أن الضحوة والسربة ( زولا سرب سربة خت الجبيل عربه) والعينة والصبنة  أهون على النفس والجسد من تشريحات الشيخ بن سينا ونظريات داروين وكان حسابي واحد زائد واحد يساوي أثنين يؤدي مباشرة ألى الهندسة وما جاورها وعلي مستمعينا في الويب العالمي مراعاة فروق الزمان والمكان . وفي الهندسة إكتشفت أنني زول داقس.

بالله عليكم ما فائدة أن أسهر وأحسب وارسم وأبني ويكون هناك عسكري يرسم بطرف السونكي في ليلة واحدة مصير بلد وطريق أمة ؟؟؟؟؟ ومن ثم يأتي صاحب دكتوراة في شعر أبي نواس الداعر أو في تكفين الموتى فيصعد على سطح دبابة العسكري وما زال يمطرنا ليل نهار بما نعمل أو بما لا يحق لنا أن نفعله وغير كل أفكارنا وقادنا وقاد أمتنا بالدبابات والخطب إلى 9 يناير 2011 , فتبا له طريق الهندسة.

لا شك أنه طريق زول داقس

عندما هربت من بلدي والسماء ملبدة وتنبئ بشر مستطير وقلت لنفسي : ياهو سنة واحدة والواحد يحسن ظروفه ويرجع ثاني لبلدو خاصة وأنو بعد ستة سنوات من التخرج وجدت نفسي أسكن في سكن عزابة في مدينة ليست مسقط رأسي وأصرف راتبا فوق الثلاثمائة جنيه بقليل لا يكفي ثمن وجباتي فما بال أسرتي وأهلي … لا   …   لابد من الخليج وإن طال السفر ……

وأعرف الآن بعد واحد وعشرون عاما أنني زول داقس.

وأكاد أجزم أن ناس جمارك مطار الخرطوم وجوازاتها الذين يفتشون شنط السودانيات اللاحقات بأزواجهن في دول الخليج ناس داقسين فأحيانا يخرج منها ( دبايب مرعي ) من حطب وكول ومرس وكجيك وسمك معتق بمختلف الأنواع

ولا شك أن من قنن أن السوداني لا يستطيع أن يخرج من بلده إلا بتأشيرة زول داقس وأصبحنا نحن المغتربين نزيد على كل السودانيين بأننا لا نستطيع الذهاب لبلدنا والرحوع لمناطق عملنا في نفس اليوم كأن تكون عندك وفاة وتريد أن تلحق الدفن وترجع تاني بعد بكرة  أو خلال يومين أو ثلاثة فلا بد لنا من زيارة وزارة تأديب المغتربين فتدفع لكي تغسل عنك عار الغربة ولا بأس من أن تنالك وتصيبك أمراض مثل الضغط والسكري والوسواس القهري والجهري لايهم  فهنالك موظفون في المغتربين في الصحافة الخرطوم  أختيروا خصيصا ليحقنوك هذه البلاوي نظير السماح لك بتعاطي الغربة والهروب من الوطن في زمن لا يقل عن اليومين التامين الكاملين شريطة أن يبدأ اليوم من التاسعة صباحا وإلا دخلت في اليوم الثالث وأصبت بمتلازمة (صم بكم )

لا شك أن كل المغتربين داقسين

أحد أمراضنا الإجتماعية في السعودية هو ما يدعى بزيارة باب شريف ويطلق عليه الحجاج الركن السادس ومكتوب على كل سوداني يعيش بالسعودية مع أبنائه زيارته في كل المناسبات السعيدة وهو بالإضافة  ثقله المادى ومساهمته الفعالة في هدم الميزانيات فهو كابوس ثقيل على الأزواج فعند الذهاب إليه عليك أن تكون في حلم إياس وكرم حاتم والأهم في صبر أيوب فمن مسؤولياتك مراقبة الأولاد حتي لا يضيعوا في الزحمة  فتحمل الصغار وتجر الذين يستطيعون المشي و ( تخت) عينك على الأكبر منهم وحمل الأكياس والمشاركة في إختيار الألوان  والأذواق الذي لا يتأتى بسهولة وينتهي بك أحيانا الأمر بأن تهز رأسك بالموافقة فقط وتدخل يدك في جيبك وتدفع ثمن البضاعة قبل أن تمنح الأمم المتحدة ( متعة التفاوض في السعر ) إعلانا منك بأنك خلاص قد وصلت الحد

في أحد المرات وانا أقوم بعملي على أكمل وجه فإذا بي ألتفت ولم أجد أصغر أبنائي فهو ليس من أمسكه بيدي وهو ليس مع والدته فأين هو فصحت في رعب في زحمة باب شريف (تامر وين ياولية) فزعرت وهرعت إلي من داخل المحل ثم ما أن وصلت إلى حيث أقف حتى إنفجرت بالضحك فقد كنت أحمله ولكنى نسيته في تلك الدايلما الإنسانية وياليتها كانت لوحدها فقد كانت معها والدتها وزوجة أحد زملائي .

لا بد أن كل من يذهب لباب شريف مع العائلة هو زول داقس

غير أن القدر اراد أن ينصفني تلك الليلة , فقد كنا نأتي للتسوق من مدينة ثانية وننزل عن زميلي وصديقي الذي شهدت زوجته هذه الواقعة فذهبنا لمنزلهم بعد التسوق وعند خروجنا كانت لصديقي إبنة في سن أبني الذي دقست فيه ونحن نودعهم تناولت حرمنا إبنة المضيف بدلا عن أبني الذي سبق أن أنزلته للسيارة لأنه كان نائما وصارت هنالك معركة في الباب بين زوجة صديقي والمدام  فهذه تريد أخذ إبنتها وتلك تحلف عليها أن لا تتعب نفسها وتنزل مها السلالم لكي تودعها حتى تدخلنا لحل الخلاف وأن الالتي تحملها حرمنا هي إبنة المضيف وليست إبنها .

لابد أن من بضحك في أخيه يعافيه الله ويبتليه  ولا شك أنه زولة داقسة

زوجة صديقي هذه عند حضورها من السودان أحضر لها زميلنا في الخضار ليمون كبار ضخم لأنه لم يجد الصغير فحسبته برتقالا أو يوسفي وقطعته أنصاص وأتت به مع التحلية .

لا بد أنها زولة تانية داقسة

في تبريرهم لإضافة بند حق تقرير المصير أنو جون قرنق قال ليهم أنا زول وحدوي ولكن ختو الفقرة دي عشان نرضي بيها الجماعة الإنفصاليين .

لا بد أن من يوافق على هكذا طرح زول داقس

في زمن الويكيليكس والعولمة يحق لك أن تملك المعلومة وأن تتاجرفيها ولكن لا يحق لك أن تنشرها ولذلك أسانج الأسترالي في السجن بتهم الإغتصاب لأنه زول داقس وقام بنشر الغسيل  كما أوضح الدكتور ثروت قاسم في موقع الراكوبة في مقال بعنوان ويكليكس السودانية في مقال من أروع ما قرأت غير أن مقالات الأخ قرن شطة في ( ساخر سبيل هي التي أوحت إلي بالكتابة عن ( الزول ) بمختلف ألوانه والحقيقة أن الرجل في كتاباته وإبداعاته فالتحية لهما جميعا  .

الكل يعرف أن الإيثانول هو الإسم العلمي للكحول وبالعربي السوداني هو عرقي القصب أو المولاس والكل يعلم أن حكومتنا الراشدة عندما غلبها الأمر وقامت بتصدير أول شحنة من ( الإيثانول ) تحت هتافات التهليل والتكبير بوصفها إنجازا من إنجازات الحكومة الأسلامية الراشدة في الخرطوم  لكن الصحفية لبنى لم تراعي ذلك فلحقها ما لحق صاحب الويكيليكس من السلطات السويدية.

الميثانول والإيثانول هما نوعين من الكحول واحد يصنع من المواد الطبيعية مثل سكر القصب أو البلح أو من الذرة والثاني يحضر من مواد صناعية وهو تقريبا سام فقد مات أو أصيب بالعمى بعض الذين تعاطوا خمرا محضرا منه في مصر ومن بينهم بعض السودانيين في الثمانينات ولا أدري أيهما الطبيعي وأيهما الصناعي ولكن من المؤكد بتاع كنانة طبيعي مية المية ولذلك تم تسويقه بالسرعة الممكنة بالحمد والتهليل والتكبير وهي لله وهي لله لا للمنصب والجاه.

الذي يخلط بين الإثنين قطع شك زول داقس

هنالك كثيرون يودون لو يعملوا ولو بالمجان في مصنع كنانة للإيثانول هذا !!!!!

وقطع شك لن تتأتي لهم هذه الفرصة ومن يحدث نفسه بإختراق هذا الحظر من الذين عاصروا أوائل الثمانينات وفي نفسه شئ من لعاعات الماضي قطع شك زول داقس .

Advertisements
تعليقات
  1. ياسين شمباتى كتب:

    الحبيب ابوشقرود..سلامات..
    والله طلعنا الداقسين انحنا الما عصرنا عليك من زمان عشان تطلع الدرر دى !! والله بالغت جد..وخليك مواصل يا مطر كل الفواصل…

  2. علي سنكل كتب:

    العزيز أبو شقرود . . تحياتي
    كلام زول أبداً ما داقس و كلام في المليان.
    كم هم كثيرون يا عزيزي الداقسون بالطوع والاختيار.
    بالله شفت النسوان دي في السوق بتعمل شنوووو ؟ لو طعنتها بي دبوس ما تكب دم.
    أنا من زمن بعيد لا أذهب معهن إلى السوق ، عشان أنا ما مجنون.
    كتاباتك شبيهة بكاتبات المبدع قرن شطه ، أكتب لينا المزيد من ذي دا.
    تحياتي تاني مره ألف مره.

  3. ابكرون كتب:

    ابو شقرووود والله ضحكتني
    ياخ انت زي ما قال سنكل ما داقس لكن (فاصل) او مفص ودي اسعل منها شيخنا بن برد بشار
    بالله المره الجاية اكتب لينا عن الزوووول الطفس او الزول السمح الشافوه ناس عبد الله
    تحياتي واسمع النصيحة لا تقطر ليك مراه في سوق لا باب شريف لا باب اللوق …ولا باب الشارع

  4. abushagrod2 كتب:

    شكرا ياسين شمباتيوالأخ سنكل وأبكرون
    في الأسبوع الماضي كان زميلي زوج الولية الداقسة بتاعت الليمون التي كادت حرمنا ان تختطف إبنتهم يريد الخروج للعمل وكان دائما يضع الخوذة ( الطاقية البيضاء ) في ضهرية العربية ولما كان ناس جدة يعانون من مشكلة مياه الشرب طلبت منه الولية أن يشيل معاه الباغة الفارغة عشان موية الشراب عندهم قربت تكمل فقام شالها وفي السيارة وضعها في الضهرية مع الخوذة وعندما نزل المكتب كان عليه أن يمر على العمال في الدورين الأول والثاني والمكتب في الدور الثالث فوقف في الموقف وشال الباغة بدلا عن الخوذة وطلع يدي في العمال الأوامر والنواهي وأحيانا يشير بالباغة كأنها طاقية وأحيانا يمسكها قدامو كما كان يفعل عندما لا يكون لابسها إلى أن دخل المكتب وحاول أن يضعها في مكانها المعتاد في المكتب الذي بالطبع لن يسعها
    لا شكل أن اخونا المهندس كان زول داقس

  5. عزت كتب:

    يا سلام يا أبو شقرود… منتهى الجمال

    أضحكتني مفارقات الأزوال الداقسين جدا ….. وذكرني باب شريف بسعد قشرة والسوق الشعبي ففيهما كم ضيعنا شفعنا وهم سغار الله يطرا تلك الأيام بالخير… فالحمد لله ريحنا الزمن وكبر لينا العيال وبقوا يمشو يضيعوا براهم في الأسواق…

    ههههه ههههه…..

    تحية كبيرة ليكم يا ناس ياسين وسنكل و أبكرون فالظاهر قد عانيتم في طقيم البلوزات والشرابات كما عانى أبوشقرود…. وعقبال يا شنباتي ما تطوق قطر المدام في باب شريف انت كمان….

  6. ياسين شمباتى كتب:

    الحبيب عزت..سلام…
    هههههههههههههههههه,,انا مجنون اسوق لى مره السوق!!؟؟؟ غايتو بعد الشيلة الا الكفن!! بس..

    ابوشقرود..سلام..
    باخوى زولك دا ما داقس,دا لاحس,,وفى رواية شربوتهم بى خميرة..هههههههههههههه..

  7. abushagrod2 كتب:

    وأبو العربي شخصية نمطية خيالية شعبية زي ود نفاش عندنا وعمك تنقو تسقط عليه الشعوب الغلبانة أفراحها وأتراحها وهمومها وتطلعاتها وآمالها
    مرة قاعد في القهوة يشرف في شيشة وبعد لحظة تامل قال للحاضرين المترقبين لقفشاته
    :أنا كنت ماشي في الصحراء طلع لي أسد إستخبيت ورا الشجر اللي في الغابة !!!!!!!
    وصاح الحاضرين : يا أبو العربي قول كلام غير كده !!1 هو الصحرا فيها غابة وأشجار
    سكت ابو العربي وبعد عدة شفطات في الشيشة عاد وقال : أنا كنت ماشي في الصحرا طلع لي أسد إستخبيت ورا العمارة
    فقد أحد المستمعين صوابه وصاح : يا أبو العربي إنت عايز تطير البرج اللي في نافوخي !!!!! هو الصحرا فيها عمارات
    سكت أبو العربي وأمسك بعصا الشيشة بقوة ولم يرد
    بعد لحظات قال : أنا كنت ماشي في الصحرا طلع لي أسد وراح واكلني !!! إستريحتو كدا ؟؟؟؟؟
    والعبرة من الحكاية هو أن نترك الآخرين أن يضعوا اللمسات على حكاياتهم مهما إختلفنا معهم .
    ابو العربي قطع شك كان زول داقس فمهما عملنا سنجد من يتم لنا قصتنا وعلى مزاجه

  8. abushagrod2 كتب:

    دكتور عزت الزول السمح الله لا جاب يوم شكرك وإنها لشهادة كبيرة من زول كبير

  9. abushagrod2 كتب:

    ياسين شمباتي لك التحية
    زملائي أثنين كانو في شمال جدة بنفذوا في سوق تجاري زكان مكتبهم من النوع المتنقل (بورتاكابين) وعشان الموقع بعيد عن المناطق المأهولة كانوا بصلوا في المكتب وعاملين سهم إتجاه القبلة وبعد نهاية المشروع نقلوا لمشروع تاني وعشان ظروف الموقع إضطروا لوضع البورتاكابين عموديا على الوضع الأول ورغم ذلك ظلوا يصلون أربعة سنوات على نفس السهم القديم
    قطع شك ديل كانوا داقسين ولاحسين

  10. نيام كتب:

    ابوشقرود:
    علي ذكر الصحرا تعرف يا ابو شقرود مرة عندنا واحد من زملاياتنا الشوام مسافرين بلاندكروزر مع سواق تركي لبير نفطي في الصحراء و بعدين الظاهر التركي دقس و ضيع الطريق فوقف يستعين بينا نحنا و كنا ادقس منو..فقام السوري قال انا معي بوصلة قلت ليهو بلهفة و ينها قال بالشام قعدت اضحك في هستيريا فالتركي ما فاهم حاجة قام سألني قال لي قال شنو قلت ليهو قال عندو بوصلة قالي في نفس اللهفة طيب ما تشوفوها قلت ليهو قال بالشام فالتركي الداقس ولع ضحك و عملنا رايحين في الضحك و نسينا الروحة الحقيقية…

  11. elturkey كتب:

    أبو شرقود ياخ دى دقسة قصدت أبو شقرود … ابداع وظرافة فايتابهناك … ربنا يكتر من أمثالك … دا عصير الغربة ولا عصرت شئون المغتربين … لك التهانى والتقدير

  12. abushagrod2 كتب:

    شكرا أخي التركي
    قبل سهور قليلة طلع وزير الأوقاف لأكبر دولة إسلامية وقال بالحرف الواحد ( إضطررنا لتغيير القبلة في كل المساحد , بعد الف عام إكتشفنا أننا نصلي في إتجاه كينيا ( لا أدري لماذا إختار كينيا ) فإذا كان الناس يصلون في أندونيسيا من قبل الف عام وكان عددهم ألف شخص فقط في ذلك الزمان وعددهم الحالي ميتين مليون طبعا عدد الصلوات خمسة في اليوم فيا ناس الرياضيات إستخدموا المتواليات العددية والهندسية والمصفوفات وكل علم الجبر أحسبوا لنا عدد الداقسين في أندونيسيا منذ ألف عام حتى الآن
    ما قلت ليكم أنا زول داقس

  13. […] هنالك كثيرون يودون لو يعملوا ولو بالمجان في مصنع كنانة للإيثانول هذا !!!!! قبل سهور قليلة طلع وزير الأوقاف لأكبر دولة إسلامية وقال بالحرف الواحد ( إضطررنا لتغيير القبلة في كل المساحد , بعد الف عام إكتشفنا أننا نصلي في إتجاه كينيا ( لا أدري لماذا إختار كينيا ) فإذا كان الناس يصلون في أندونيسيا من قبل الف عام وكان عددهم ألف شخص فقط في ذلك الزمان وعددهم الحالي ميتين مليون طبعا عدد الصلوات خمسة في اليوم فيا ناس الرياضيات إستخدموا المتواليات العددية والهندسية والمصفوفات وكل علم الجبر أحسبوا لنا عدد الداقسين في أندونيسيا منذ ألف عام حتى الآن ما قلت ليكم أنا زول داقس رد […]

  14. عزت كتب:

    طبعن يستحيل الواحد يبدأ ليهو بناية بيت ويقدر يتمو في وقتو المقرر دا طبعا لو ما كان شغال مع المدقسيننا 21 سنة ديل…

    فالشاهد انني قد بدأت بناية منزل ووصلت الى مرحلة توقفت في انتظار الفرج ليتم التشطيب علة الموضوع طول… ناس أخوي و أخواتي عندهم قطعة ودايرين يبدو ليهم في عمارة…
    قام ولدي الصغير قال لي أمو… يا ماما ناس عمو دايرين يبنوا… حقو ما يبدو لو ما معاهم القروش كلها بتاعت البنا… عشان ما يدقسو زينا ونخلي البيت للغفير…!!

  15. نيام كتب:

    عزت المرطب:
    عزت المرطب تعرف حكاية البناء دي ليها قصة عند المقاولين فهم بقولون ان صاحب العمارة يسكن سنين اقل في عقاره من صاحب الغفارة..فصاحب العمارة غالبا ما يبدأ بامال عراض و اسعار في زمانو ثم بقدرة قادر تتفاعل الاسعار و يطول المشوار فينصلح حال الغفير و يكبرو الاولاد و يتخرجو من الجامعات و هم يظنون ان العمارة حقت ابوهم ..اما صاحب العمارة الذي يزور عقاره بين الفين و الحين فينسي اولاده ان لهم عمارة اصلا..

  16. أحمد الفاضل كتب:

    لمبدع ابو شقرود
    لا أستطيع أن أصف مقطوعتك الساخرة الحاذقة الا بقمة الجمال الذي تفقده كثير من شخابيط من تصدروا لساحة الكتابة في عصرنا فسلم فوك ولا نضب لك مداد

    وكما ذكرت دقسة الغربة التي نوهت اليها هي قمة الدقسة في عالم النكسة

  17. الغبشة كتب:

    صباح مصحصح من زوله دقست لانها طولت ما جات عليكم بس الاسباب خارجة عن اليد……………
    بالجد الزول الداقس هو الزول الما اتسهل ليه ومره على جمعكم الكريم فى هذا الحوش…………….
    أبشقرود : اسلوب ولا أروع……….. والداقسين كتاااااااااااااااااار بس ربك يهون.
    كسره: سلام لكل الحبايب الطولنا منهم

    والى لقااااااااااااااااءءءءءءءءءءءء

  18. الصادق ود البركة كتب:

    السلام عليكم ورحمة الله
    شكراً على الكتابة الراقية أبو شقرود أمتعتنا بالجد بالجد
    (الميثانول والإيثانول هما نوعين من الكحول واحد يصنع من المواد الطبيعية مثل سكر القصب أو البلح أو من الذرة والثاني يحضر من مواد صناعية وهو تقريبا سام فقد مات أو أصيب بالعمى بعض الذين تعاطوا خمرا محضرا منه في مصر ومن بينهم بعض السودانيين في الثمانينات ولا أدري أيهما الطبيعي وأيهما الصناعي ولكن من المؤكد بتاع كنانة طبيعي مية المية ولذلك تم تسويقه بالسرعة الممكنة بالحمد والتهليل والتكبير وهي لله وهي لله لا للمنصب والجاه.)
    يا خي ما تخليها في البيضاء الناس بيبعوه عشان يستخدم في الأغراض الطبية وكده ……………….
    تهليل ….. تكبير …..
    برضو يسأل عن السلاوي أين أراضيه ما بكتب ليه؟؟؟؟؟؟؟؟؟؟؟؟؟؟؟
    شمباتي كدي سوي المرة أولاً وبعدين أتشرط على كيفك ….قال و بوديها باب شريف قال

  19. نيام كتب:

    شمباتي ثرو ودالبركة:
    ما نقول ليك من قبل دا
    الكبري اقطعو قلت لا
    اعرف و فاصح موش كده
    موش كده موش كده
    مع امنياتي لابو الامين بالصحة و العافية

  20. ياسين شمباتى كتب:

    الاحباب نيام وود البركة..سلام..
    والله لقيتوا سوقكم ومسكتوا سوطكم!! غايتو واحد من دوافع الزواج عندى اسكات الاعداء !!!ههههههههههههههههه.والله لو الامانى بايدى كان عملت حاجات كتييييييرة..كتروا الدعوات..

    وبالنسبة للحبيب سلولو فهو بخير وصحة,,علا موضوع الزواج هاميهم شوية!! ترقبوا المفاجاة قريبا..قريبا..

  21. مُخير كتب:

    الحلوين في كل مكان

    سلام مع كميات مهولة من الأشواق

    الأخ أبشقرود: والله إنت زول داقس بحق وحقيقة عشان ما كتبت ونشرت من الزمان يا رجال إنت كاتب من العيار الثقيل وأضم صوتي للحبان لأجدد الترحيب بقلمك الرهيف الحريف كي تسهم إلى جوار كتابنا المبجلين في إضحاكنا على خيباتنا وتنكئة جراحنا الجديدة منها والقديمة.

    الأخ سنكل صدق من قال أن قسيمة الزواج شهادة وفاة الكبرياء وتقدير الذات ولا أبيخ من منظر راجل محترم شايل شافع وأكياس ومزازي عواطف في السوق، شنباتي كوولنا قلنا ماحيجي يوم ونتجرر إلى مثل هكذا مواقف هزيلة، كدي خش الجك وبعدين إتفاصح ههههههه

    عزت والله قلوبنا معك في معركة البناء قبل الفناء، غايتو العاقل من إتعظ بغيره، لذا عليك يمين الله باللي لسة حيلمها النمل طبعن ده كان قررنا الرجوع إلى ما تبقى من وطن …سوف نقوم بشحن خيام ونعمل معسكر داخل القطعة ونتعاون مع العمال في عملية التشييد ولمن يبقى الأمر على التشطيب نستنفر المدام والعيال وكل المتطوعين تفادياً للشرة وكراع جوة وكراع برة ههههههههه

    الصادق ود البركة أضم سوطي إلى صوتك في البحث عن حبيبنا المدعو السلاوي، ووفق ما تناهى إلى مسامعنا أنه صدق بركات جهوده المشتركة مع أبكرون في تذليل نيل قطر إستضافة كأس عالم 2022م وأنه الآن في مهمة تحضيرية لكل من الكويت والإمارات للنظر في إمكانية إنجاح مبادرة إستضافة الأولى للألعاب الأولمبية الآسيوية والثانية للألعاب الأولمبية الشتوية في عام 2024م و2025م على التوالي هههههههه

  22. abushagrod2 كتب:

    عزت ونيام صدقتم والله في حكاية صاحب العمارة وصاحب الغفارة دي
    في الإجازة الفاتت قلت الأوضتين الشطبتهم في البيت في الجور الأرضي( الصالون ما زال منفتحا بدون شبابيك على الحوش ) زائدا المطبخ وهو الوحيد الفيه سيراميك , قلت أطهر فيه أصغر الأبناء لعدة أسبابك
    1 : عشان الجيران يعرفونا
    2 : أخوان الولد الكبار طهرناهم صم بكم في السبوع ولم يحضر أي من أهلي أو من أخوالهم الطهور وأنا زول شاعر بمسؤولية تجاه موروثاتنا وعاداتنا وعايز أحييها ولو بس في ذاكرة أبنائي
    3ك عشان حبوباته بحبن الحاجات دي وعشان كدا لسه محتفظات بالأناتيك بتاعة العرس والطهور ذي الحق بكل الأحجام وزي الهلال وكل عدة الحنة والجرتق وما يلزم
    المهم في الأمر بعد بعض الإضافات هنا وهناك إنتهزنا فرصة بين فراشين وتالت حرسناه في المستفي ولسه اليوم ما تم قمنا عملنا الطهور وعاش تامر إبني أيام رأسمالي زي دقن برنارد شو ( يعني جيوبنا أنحنا زحف عليها الفلس وجيبه ما شاء الله من الخالات والعمات والأعمام محشى بالقروش وأمه أول المستفيدين من القروض الحسنة ( بعلمه والله لمن يكون صاحي )
    وبعد الإجازة وفي مذاكرة مواد الصف الرابع كان بذاكر مع أمه في كتاب مسكننا دار الحوار الآتي ك
    الأم : الأسرة السودانية كيف بتحسن دخلها
    تامر : يعني شنو
    الأم : يعني مثلا لو أنا دايرة أزيد قروشي أعمل شنو
    تامر : بسيطة يطهروكي بس
    أنا غايتو ما عارف لكن عشان أكمل البيت دا لازم يطهروني تاني تلاتة مرات وإنتو معزومين و،شالله ما تقصروا في النقيط
    ما قلت ليكم العرق دساس

  23. abushagrod2 كتب:

    الغبشة ومخير وود البركة أيها الرائعين
    أنا الداقس الما عرفتكم من زمان
    مشكورين على المرور

  24. abushagrod2 كتب:

    thanks dear Ahmd alfadel

  25. abushagrod2 كتب:

    massa alkhair

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s