الكلام المدغمس….

Posted: الإثنين,20 ديسمبر, 2010 by ياسين شمباتى in سياسية

بالامس فى احتفالات البلاد بعيد الحصاد القومى بولاية القضارف كان للمشير البشير العديد من التصريحات النارية,,والتى اعتادها الناس فى مثل هذه التجمعات الجماهيرية,تلك التصريحات التى باتت ك(الملاح البايت)!! فدوما نسمع دوى الجعجعة التى تصم الآذان ولا نرى او نحس او نطعم طحينا,,ذلك الطحين الذى ارتفع سعره حتى ما عاد بامكان المواطن البسيط اكل (عيش حاف) كما يقول اهل شمال الوادى..

الشاهد انه قد صرّح بانه فى حال انفصال الجنوب فان الدستور سيتغير وستكون الشريعة هى مصدره وموجهه..عفوا سيادة الرئيس,,فكلنا يعلم ان هذه الدساتير التى تحكم بلادنا وما جاورها من بلاد الاسلام والعرب والافارقة هى دساتير مزاجية لا تعرف دينا او عدلا,,فلا تحلموا بعالم سعيد يا مواطنى بلادى..فاين كان هذا الدستور الشرعى قبل اتفاقية نيفاشا؟؟ واين كانت الشريعة عندما صرّح الترابى بان من يموت فى الجنوب من مجاهدين هم (فطايس)؟؟ واين كانت الشريعة عندما قتل اهل كجبار والمناصير والشهيد/معتصم ؟؟اتق الله فى نفسك يا ولى الامر..

ولقد قال بالحرف الواحد : (الشريعة ح تكون هى اصل الدستور,,اما كلام انو السودان بلد متعدد الاعراق والثقافات والديانات فدا كلام مدغمس)!!! استغفر الله,,وربما قال (مجغمس)…معروف للكل انو السودان بلد متعدد الاعراق والديانات والثقافات,,غصبا عن اى انسان او متشدق ,,والا فما هذى القبائل المتابينة,,وما الحضارات المختلفة التى سادت دهرا وبقيت آثارها؟؟وهل بعد الانفصال سيصبح السودان قبيلة واحدة ولسانا واحد!!؟؟ قاااااادر الله..

كما اشار الى حادثة جلد الفتاة,,وقال ان القضاء قد قام بدوره المنوط به,وان الشرطة نفذت وهذه الاشياء لا مراجعة فيها,لكن سيتم التحقيق لمعرفة المتسبب فى نشر هذا الفديدو!! فخامة الرئيس,,كلنا يعرف ان قضاءنا غير نزيه وموجه,,وان الشرطة لا تعرف واجبها او مهامها,,وان من اصدر حكما كهذا ولم يراع فيه كيفية التنفيذ وماهية المنفذ لهو شخص لا يعرف الله ولا يعرف دينه,ابدا..لذا لا تخادعنا وانتم قد قبلتم (الدنيّة) من قبل فى دينكم حين وضعتم دستورا علمانيا لا يستند الى شرع الله فى شئ..

من بعيد : ايضا فى برنامج (عدد خاص) قام د.البونى ومنى ابوزيد والاستاذ/احمد المصطفى الصحفى ب(عصر) مدير هيئة الحج والعمرة/احمد عبدالله,,ولما جابوا افادات من برة لعدة حجاج والكلام كان حاااار,,قال ليهم: اسه انتو من ال95 الف حاج ربنا ما فتح عليكم بغير ال20 ديل البقولوا الكلام الصعب دا !!؟؟ اختشى يااااااا مدير,وكل ما يجوهو بجهة يجرى بجهة تانية,,والله حاجة تكسف جدا جدا,,وناس الحج ديل قدر ما اقول اكتب عنهم اقول خليهم لرب العرش يفضحهم يوم لا ستر او غطاء…

وقال انو ما بياخدوا رواتبهم من الدولة او من قروش الحجاج,,الاستاذ /احمد المصطفى سالو: اها بتجيبوا قروش من وين؟؟قال من استثمارات الهيئة!! طيب جبتوا قروش الاستثمار دى من وين؟؟ من قروش قدييييمة للحجاج !! احيييييييييييييييييي انا..

كسرة: فخامة الرئيس,,مافى كلام مدغمس او مجغمس غير كلامك دا !!!

nnn6.wav

Advertisements
تعليقات
  1. بعد اذنك يا شنباتى – ختيت ليك اللينك بتاع الكلام فى نهاية البوست

  2. اى زول داير يستمع او فاتو الاستماع لكلام الرئيس – يعفص الرابط اعلاه فى نهاية مقال شنباتى .

  3. نيام كتب:

    كلامك صحيح ام مدغمس
    هو مين اللي جابك تجغمس
    كفاية الرغيف المعصعص
    كفانا الكلام المابلس
    كفانا وطنا المدنس
    كفانا فضايح ويكي ويلكس
    خلاص انصراف او نفلكس
    نغادر بلادنا ونجنس

  4. ياسين شمباتى كتب:

    استرايكر..سلام..
    تسلم يا حبيب والبيت بيتك,,لكن مالو صغيروووونى كدى؟؟ انا كستو كواسة شديدة حتى لقيتو..
    والله يكفينا واياك والبلاد شر العفص..ههههههههههه..

    نيام..سلام..
    (هو مين اللي جابك تجغمس)!؟؟ سؤال موضوعى جدا,,واحد اصدقائى المعتقين قال( انتو العساكر ديل الصنعهم منو!!؟؟)…الحمدلله على امره وقضائه..

  5. عباس ركس كتب:

    سلام شمباتي :
    ياخي الكلام ما واضح ! دي اسمها هرشة استباقية ! عشان ما يجيء واحد بعد 9 ( طبعا قاصد 9 يناير )
    ويقول لينا – ( زي ما قال نميري ) – كاني وماني !!!!
    كسيرة : العساكر وسواق التاكسي اخوان اولاد ام وابو !!!!!

  6. الصادق ود البركة كتب:

    السلام عليكم ورحمة الله وبركاته
    السادة المدونين الكرام دون فرز
    شكرأ دكتور كسرت الرتابة بوضوع ساس يسوس والأمر لله من قبل ومن بعد وكيفما تكونوا يولى عليكم ونسأل الله أن يصلح لنا البواكن والظواهر ويولي علينا خيارنا ولا يولي علينا شرارنا ويزيح هذه الغمة عن كاهلنا
    قال الدكتور شمباتي (احيييييييييييييييييي انا.. ) وأنا كمان
    ملحوظة (هناك أسماء نفتقدها بشدة ما عدنا نراها تكتب اعتزلو اللعب ولا شنو مثل أبكرون …..السلاوي……….. أفليقيا عزت والبقية وينهـــــــــــــــــــم ودمتم

  7. التلب كتب:

    سلام للكل
    يا شمباتي (مدغمس .. مدغمس) ما (مجغمس) ما تحرف كلام السيد الرئيس ياخي !!
    ياخي اخوك كان فاكر انو السودان بتحكمه قوانين الشريعة الاسلامية طيلة السنوات الاخيرة لحد ما جاء الرئيس و فاجأ اخوك بانه الموضوع ده ح يتم تطبيقه ابتداء من العام القادم !!!
    المهم الخطاب بتاع عمك ده طلع ليك قدو قدو و القاضي بتاعه من موضوع التحقيق بكل بساطة .
    كسرة:
    أهم حاجة يا شمباتي إنك ما تكون امتعضت من الفيديو بتاع الجلد لانه الامتعاض ده بيستوجب الغسل على حسب فتوى السيد الرئيس. إذا امتعضت رجاء ما تكتب أي حرف في البوست ده ما لم تغتسل.

  8. ودالخلا كتب:

    سلام ياقبيلة،،،
    الأخوة شمباتي والآخرين تحية طيبة،،
    لا نشك في وطنيتكم وحبكم لبلادكم ووطنكم، ولكن زراعة الكراهية والفتنة بين الناس مرفوضة، والغمز واللمز والأساءات التي تطرح بهذه الصورة أيضا” مرفوضة، وماكان لنا في هذه المدونة ان نلقي بمثل هذه الكلمات هكذا جزافا” فنصيب بها أخوة أحبة وأعزة علينا قد يمنعهم الحياء وعزة النفس من التداخل والرد علي مثل هذه الترهات التي تطلق هكذا ونظنها قد أطلقت بحسن نية ودون القصد بأيذاء أحد ولكنها قد تفعل، ونرجو توخي الحيطة والحذر، وأتمني من الأخ أسترايكر ان يسحب هذه التعليقات المسيئة دون الدخول في مزيد من التفاصيل…
    غفر الله لنا ولكم

  9. قرن شطة كتب:

    ود الخلا
    سلام ياصديقى
    تانى جيتنا بفيلم (الرجاء سحب التعليقات والمقالات) !!!!!! غفر الله لنا ولك

  10. ياسين شمباتى كتب:

    ركس..سلام..
    هههههههههههههههههههه,,والله بالغت فى حنة التاكسى دى!! ياخ يهرش من ويهرش شنو,,دى ماسورة وانحلجت بس..وهاك 9 يناير دا ههههههههههههههههههههههههه..

    الصادق..وعليكم السلام ورحمة الله وبركاته..
    وندعو معك ليل نهار ان يصلح الحال والسلطان ويزيل الهم والغم والفقر والسقم,,والايام مفترجات وبقايا محرم لا زالت..
    اما عن الجماعة فما اعتزلوا وموجودييييين,,بس انت خليك قريب وبجوك ناطين

  11. ياسين شمباتى كتب:

    التلب..سلام..
    والله غلطان انا الجيت اعدل ليو!! بعدين حقيقة الموضوع بتاع الجلد دا كان بايخ وسخيف ومحرج جدا,,وابان انو السيد الرئيس ما عندو فكرة عن الشريعة العايز يطبقها دى,والا ما كان قال كلامو القالو دا..الله !!
    اما عن الامتعاض فدى حاجة نسيناها لانو بقت عادة ملازمة للواحد,,والغسل دا اصلى ما بمشى عليهو كان ما الجماعة ديل اتخارجوا وبقينا على دين واحد واضح….عليك الله اسه دا كلام ناس عايزين يطبقوا شريعة؟؟احييييييييييييييييييييي انا..

    ود الخلا..سلام..
    القال ليك دا غمز ولمز منو؟؟دا ما كلام وااااااضح وموجه لشخص معين,,بعدين برضو انحنا البنزرع الفتنة والكراهية؟؟عليك الله جيب لى مواطن صالح او مسلم مستقيم بحب الجماعة ديل!!
    هنا منبر حر واى شخص مسئول مما وعما يكتبه,,واسال الله المغفرة والهداية والتوفيق لجميع المسلمين..

  12. نيام كتب:

    د.شمباتي :
    هاك الدعمسة دي ….في ريبورتاج صحفي مع والي القضارف كرم الله عباس
    الصحفي : *هددت بالقضاء على الفساد في حملتك الانتخابية ويرى البعض بأن صوتك هدأ تجاهه ..ما مدى صحة ذلك ؟
    كرم الله عباس والي القضارف (بديل عبدالرحمن الخضر ) :الى الآن لم تصلنا حالة وذهبنا بها للمحكمة أو غيرها , , لازلنا في بداية الفترة…
    مراقب : ياعيني بس خليك علي الخط و حتجيك في كرسيك…
    ودالخلا:
    يا ضي القبيلة منارة
    حدد مين الغشيم اللي فينا اتدارا
    وضح يا فصيح ما بتكفي لينا اشارة
    لقد قرأت كل التعليقات و لم اجد فيها ما يمس الذوق او الشعور العام فنرجو التكرم بالتوضيح…اما ان كانت سياسة ما بعد 9 يناير قد بدأت منذ الان كمان فيدنا النرعي بي قيدنا…

  13. والله يا عمنا نيام – انا زاتى اتحيرت فى مداخلة اخونا ود الخلا – كررت قراتها كلها ولم اجد بها شئ – اللهم الا اذا كان قاصد البوست زاتو – فممكن لو حابى نشبلو ليهو ونوديهو ليو الخور لو حابى.

  14. ودالخلا كتب:

    أحبتي الأكارم بنو الكرام،،
    أنتو لو شايفين مافيهو حاجة، ما في أي مشكلة قد تكون الضبابية في عيني براي، والبوست ياسديقي أسترايكر لا تودهو الخور ولا تودهو الخور، بس الحكاية وما فيها أني ظنيت، وبعض الظن أثم بأن هنالك غمز ولمز ، ويبدو أنه في نظر الآخرين همس وأبتسام!!!!
    عفوا” أحبتي قد أكون أنا المخطئ لأنكم كووولكم أتفقتم بأنه لا شئ يخدش أو يسئ، فأستميحكم العذر، ولأولئك الذين أصابهم الرشاش لهم العتبي والأعتذار، وأسأل الله العليّ القدير ان يغفر لنا ويرحمنا أجمعين،،،،،
    ودمتم..

  15. واحتمال كمان نكون انحنا الغلتانين – كدى ورينى ياتو حتة الفيها المشكلة؟

  16. التلب كتب:

    سلام ود الخلا
    رجاء ابن افصح يا رجل خليتنا نتحسس ساكت !!!
    بعدين انت قلت تعليقات مسيئة يعني ما واحد ؟؟
    بصراحة راجعت التعليقات بما فيها تعليقي و ما شايف تعليقات مسيئة. احتمال يكون في سوء فهم فلو تكرمت اشرح وجهة نظرك

  17. ياسين شمباتى كتب:

    نيام..سلام..
    طبعا كرم الله والخضر ديل فضيحتهم كانت بجلاجل وشكلتهم عمت القرى والحضر,,لما الشيخ على عثمان مشى ليهم بى نفسو وحلفوا قسم ما برضوا بى اجاويد,,قاموا شالوهم الاتنين! تقول لى فساد وشنو ما بعرف داك..وكرم الله دا بالذات مادى جدا ووووووواضح,,ولا انسى خلافه الشهير مع الجمعية الاسلامية الطبية بشأن مستشفى ابورخم الذى لم يتم افتتاحه حتى الآن!! ودا كلو بسبب الدخل يعود لمنو!! تقول لى فساد.. عاد يا ناس القضارف خموا وصورا..

    استرايكر..سلام..
    الخور دا يشيل شنو ويخلى شنو!؟؟

  18. ياسين شمباتى كتب:

    ود الخلا..سلام..
    انا بس نفسى اعرف الغمز واللمز دا كيفنو !!؟؟ واكيد ضميرك صاحى,,لذا اطلب منك التوجه لبوست (دعوة لنقاش فيما يخص حادثة الجلد) عشان نعرف تطبيق الشريعة دا كيفنو !!

    التلب..سلام..
    يا جماعة الموضوع ما كدة,,الموضوع كدة!!

  19. زااااااااااتنا ما عارفين – المهم بنلصق فيهو اى شئ

  20. ياسين شمباتى كتب:

    والله الخور دا حقو يعملوهو مغسلة للاغتسال !!

  21. ياتو نوع من الغسل لكن ؟؟

  22. ياسين شمباتى كتب:

    الغسل القال عليهو هناى (بالهمز),,وبعدداك نجى نخش الاسلام تاااااانى ونآمن بى الدين الجديد_على طريقة عادل امام_

  23. ياسين شمباتى كتب:

    دغمسى,,جغمسى,,لخمسى,,فطسى,,,شوفيهو لى كان فيهو شئ قوليهو لى ما تختشى..اى شىييييييئ…اغنية موجهة للعزيزة ويكليكس…سلامات..

    http://www.alrakoba.net/news-action-show-id-11832.htm

  24. ابكرون كتب:

    سلاااام
    ود البركة يسأل منك الخير يا امير
    شمباتي والبقية : يا سادة اخوكم وعمكم ود الخلا راجل حساس وعندو قرني استشعار ومتحسسات ومتصنتات عالية الحساسية والذبذبة واكيد رأى ما لم ترونه .. وتقصدون به سوءا وهو تعليق يس والتلب التالي عن العساكر :
    —————————————–
    نيام..سلام..
    واحد اصدقائى المعتقين قال( انتو العساكر ديل الصنعهم منو!!؟؟)…الحمدلله على امره وقضائه..

    رد

    عباس ركس يقول :
    الثلاثاء,21 ديسمبر, 2010 عند 9:01 ص
    سلام شمباتي :
    كسيرة : العساكر وسواق التاكسي اخوان اولاد ام وابو !!!!!
    ———————————————————————–
    واكيد قاصد برضو تحسس زملاء المدونة من العسكريين من هذين التعليقين
    يا سادة ما كل العساكر زي بعض زي ما كل الدكاترة او المهندسين او المدرسين زي بعض فوالي الخرطوم السابق طبيب ود. يس او مامون حميدة طبيب وقس علي ذلك
    ولكم العتبي يا اصدقاء دار العمده

  25. ابكرون كتب:

    معذرة للاخ التلب قاصدا رد الاخ العزيز ركس

  26. عباس ركس كتب:

    سلام يا اخوانا :

    كلامنا ما قصدنا بيهو اساءة لأحد لو كان عسكري او سواق تاكسي وانما هي طرفة ونعتذر لكل من اصابه رشاش كلامنا .

  27. ياسين شمباتى كتب:

    ابكرون..سلام..
    انت عارف وانحنا عارفين انو ما معممين لكن هى تطلق هكذا من غير ما تمييز,,يعنى ما ممكن نكتب (العساكر عدا النزيهين او الطيبين)!!
    كما نكتب عن الكيزان والاطباء والقانوينين والقضاة ومنهم الصالحون ومنهم دون ذلك طرائق مختلفة..
    اما عن ودالخلا فقرنى استشعارو انا عارفهم حسن شنو!!

    واعتذر مع ركس ان اصاب كلامنا اى انسان فى شخصه..بس الحمدلله كلامنا ما مدغمس!! هههههههههههه…

  28. عزت كتب:

    الأحباب شمباتي وسماره سلام

    في البدء نعتذر عن التأخير عن الجغمسة…. وانشاء الله يجغمسو ويدعمسو بي عرق العافية مش بلدهم وهم أوصياء عليها فان شأؤوا أعطوا البترول للجنوب كلو أو منعوهم… ونحن لينا الهامش…

    ومشكور يا ود البركة على السعال… باقي السلاوي مما خلص العرس بقى ما بيظهر… الظاهر قاعد يشتغل تلات دوامات… و أفليقا دا نهائي ما ظاهر يبدو انو زعلان لما آل عليه حال البلد اصلو عندو ود شديد من الجنوبيين… ولسان حالو بيقول…

    قالوا البعيش
    الدنيا ياما تشوفو
    تشقيهو بي فرقة عزيز
    بالحسره ريقو تنشفو
    وإنشاء الله ما يحصل فراق
    لقلوب بعد إتولفو

    كسرة:
    أمبارح ما ورونا الحصل شنو على هامش لقاء الدغمسة الرباعي…!!

  29. ودالخلا كتب:

    سلام ياقبيلة،،
    أخي وصديقي العزيز أبكرون أسد الكزاز الزام عزيت البلد من اليمن للشام ،،،
    أوفيت وكفيت،،،،
    لا أرغب يا أصدقائي عافاكم الله أن نكون مثل الآخرين تهاترا” ولمزا” وغمزا”كما نري في بعض المدونات الأخري، ونحن ندعو لقيادة رشيدة وواعية وأمينة، وطبعا” لا يمكننا أن ننهي عن خُلق ونأتي بمثله حتي ولو من باب الأضحاك والتندر، فنحن نعتقد بأننا أكبر من تلك الصغائر،،،،،
    قال صلى الله عليه وسلم: « إن العبد ليتكلم بالكلمة ما يتبين فيها، يزل بها إلى النار أبعد مما بين المشرق والمغرب » [متفق عليه].
    اللهم طهر ألسنتنا مما يغضبك، واحفظ جوارحنا عما يباعدنا عن الجنة برحمتك يا أرحم الراحمين.
    والله أعلم وصلى الله وسلم على نبينا محمد، وعلى آله وصحبه أجمعين.

  30. نيام كتب:

    ودالخلا:
    ودالخلا
    صو القبيلة و مجملها
    انتا الحسس انتا الصلة
    وفي الدانقا عندنا بوصلة
    ليك العذر ياخي اقبلها

    ابكرون ثرو بن برد:
    الاحبة اهل المحبة …فكي ابكرون هو منو القال ليكم انتو عساكر …في حساباتنا انتو ناس engineers …عشان كدا مخنا ما مشاء مع الحبيب ودالخلا…نعتذر طبعا لمفهوم العسكرية المحدود لدينا…

  31. ياسين شمباتى كتب:

    عزت..وعليكم السلام..
    مكانك دائما شاغر,,والله بالجد انا متحير للقمة العجيبة المفاجئة دى!! وزى ما قال الاستاذ/ عثمان ميرغنى: اكيد ما جايين ياخدوا صور تذكارية فى السودان قبل الانفصال!! لكن ما جرى خلف الكواليس لايعلمه احد,,لذا اناشد العزيزة ويكليكس بالافصاح السريييييييييييييييع والمبين..

    نيام..سلام..
    والله الموضوع ابسط من كدة,,لكن خلينى النفيق واجيهو بالمهلة !!

  32. قرن شطة كتب:

    الاخوة الاشاوس
    مساء الخير ..
    الاخ ود الخلا ظاهر غلط غلطة إستراتجية ويبدو انه حاول تدارك الامر !! وعلى كل كل إناء بما فيه ينضح ، وانا ماعارف انتو مستغربين ليه مما كتب؟ فى النهاية ح يقول ليكم كم آية كده وكم حديث والسلام على طه الامام ويرفع الحرج…كل الناس هنا فى هذه المدونة مسئولين تماماُ مما وعن مايكتبون ، والذى يعلق أو يرد على مقال يكون وبمنطق الامور العادى ايضا مسئول من تعليقه ولا مو كده؟ كنت اود ان اعرف اين هو الغمز والحاجات دى؟ وقال قيادة رشيدة قال!!!

  33. ياسين شمباتى كتب:

    قرن شطة…سلام..
    تمااااااااااااااااااااااااااااااام جدا..جدا..

  34. monamie كتب:

    سلام يا جماعة وكل عام وانتم بخير وميري كريسماس .بس نفسي اعرف حاجه واحدة ناس حسني والقذافي جو ليه؟ وقالوا شنو؟

  35. monamie كتب:

    ملاحظه: الرقم 9 يلعب دور لدى الرئيس وامكن يكون رقم حظه :9 =يوم الاستفتاء
    9= 9مليار دولار المال المنهوب من دمنا وعرقنا

  36. ياسين شمباتى كتب:

    مون..سلام..
    وبركة بالطلة..والله كلنا نعرف الناس ديل جوا لشنو,لكن خلاص كلها ايام والمستخبى يبان..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s