مقابلة فى شعر الحقيبة..

Posted: الإثنين,27 ديسمبر, 2010 by ياسين شمباتى in ادبية

الشعر الذى تغنى به مطربو الحقيبة الرصين منه والغث _ طبعا فى مية واحد راح يجوا ناطين فى حتة الغث دى_ يبقى مرجعا ومقياسا لتقدم الشعر وثباته او تقهقهره فى السودان…واغلبه من البديع الجيد الذى لا يوصف او يجارى,لكنه ككل شعر فى اى زمان ومكان يحوى السافر من القول والركيك من الكلمات..

ولست هنا بصدد تقييمه او مراجعته,,فلست بالباحث او المتبصر او المهنى الذى يستطيع فعل ذلك,,لكننى كمستمع ومتلق له اجد نفسى وقد أُرُهفت اذنى وملأنى الاعجاب بالكثير الكثير مما لا يحصى او يعد من ذاك المعين الشعرى الذى لم ينضب..واجد نفسى وقد ملئت اعجابا وعجبا بشعراء لم ينالوا حظا وافرا من التعليم لكنهم اجادوا النظم وابدعوا فى رسم الكلم..

وهنا احببت ان انوّه الى بديعة لفظية وتطابق فى المعنى والنظم من اللغتين العربية والانجليزية,,فشاعرنا المبدع/محمد بشير عتيق قد قال (الفطن الوسيم..عرج يا نسيم..بلغو اشتياقى..حبى واعتلاقى)…بدءا كنت اسمعها (الفاتن الوسيم) ولقد ظننت انها قد خففت الى (الفتن) ثم قلبت (فطن) بفعل الانسان ومرور الازمان,,لكنى عدت وبحثت واستمعت ونقبت فى المخطوطات فوجدتها (الفطن)..وشاقنى ان هناك كلمة فى اللغة الانجليزية تستعمل على المعنيين سواءا,وهى كلمة( (SMART….فالشائع استعمالها لوصف (الفطنة والذكاء) واحيانا جدا تستخدم لمعنى (الوسامة والملاحة)..فهل كان شاعرنا يعلم هذا الاستخدام فعرّبه ام هو تقابل وتطابق فقط؟؟

ولا تفوتنى جزئية اختيار بعض الشعراء لكلمات عربية اصيلة يندر استخدامها وقد تبدو كالغريب او اللحن من اللغة,,ففى نفس القصيدة ونفس المقطع وردت كلمة (اعتلاقى),,وايضا ظننتها (اعتلالى) ولربما اخطأ المؤدى او شئ من هذا القبيل,,لكننى واثناء قراءتى لبعض الشعر العربى فى العهد الاندلسى الزاهر قد وجدت الكلمة بحرفها ورسمها !! وهى تعنى شدة الحب والتعلق والوجد,,وهى على وزن افتعال وتأتى على افتعل ايضا,,لكن استخدامها قليل _ينظر لسان العرب لابن منظور والمعجم الوسيط_

جانبية : لربما استمع البعض للاغنية بصوت ( الفرجونى او عباس تلودى او حامد اب سبح),,لكنى انصح بالاستماع لها بصوت المبدع (ترباس) والكورس فى تسجيل قديم..

وهاكم النص :-

للفطن الوسيم عرج يانسيم
بلغُه إشتياقي
حبي وإعتلاقي
روح يانسيم
أستقبل هلالُه
في غُرفُه وظلالُه
ومن ترفه ودلالُه
بين ذويه وآلو
بي حكمة ورويِّه
في قامته الروية
اتأمل شوية
وقول ليه التحية
ولو سألك علىَّ
قولُيه منامُه قلَّ
أصلُه شكايته عله
بالحب ليس إلاَّ
ومهما طال فراقي
أو عزَّ التلاقي
أنا على عهدي باقي
للفطن الوسيم
أنا عاشق مثالي
في حبي وعواطفي لايوجد مثالي
وللهوى إمتثالي
نفسي كريمْ خصالها
بى نُبل العواطف أمتازت أصاله
أشتاق للمحاسن وأتهيب وصالها
من فاتكات لحاظك ومن حدة نصاله
وهاك بعض الملامح
إني وديع مُسامح
وحبي رقيق وجامح
يبعد عن نطاقي
ولى أحبابه شاقي………

ونلتقى…….

Advertisements
تعليقات
  1. MAJDI OSMAN كتب:

    فيك الكمال محصور اكظمت كل حسود وحسنك مقامه
    يسود على كل جيل فى عصور
    وطرفك لحاظه تريع اسدا شجاع وهصور
    ليك نفرة الغزلان مع جبرة الفرسان فى هيبة المنصور

    بالله شوف دقة وصف شاعرنا عتيق … ونتمني من تلفزيون السودان اعادة البرامج المصورة لعتيق وغيره من شعراء الحقيبة …لا يكله المشاهد ولا يملــه ..أيام لها عبق

  2. ابكرون كتب:

    شوف درة ابوصلاح دي يا شمباتي تلقي فيها الطباق والجناس والاستعارة والجنون ذاتو
    مش طلع (سنسفيلاااا)
    —————————————–
    ياجـوهـر صـدر المـحافـل روحـي معـاك اتلـطفـيـلا
    * * *************************************

    مالـنور الـفي حـليـهو رافل في حُـق نـهدو قـلوبنا قافل
    كالظـبي الفـي مـقـيلو غافل تـارة يميـل والتـانية جـافل
    وجـهو يــنور والبـدر آفـل فـوق للـبدر يزيــد نفـيلا
    * * *
    يــالنـور خـدك لاح مـقابل للـشعر الـطال لـيلو سـابل
    سـهـم الحـاظك ليـنا نـابل بـي كل شي دون هجري قابل
    ينسـب نـوحي عـلي البلابل وانــت القــمرا بتنـسبيلا
    * * *
    ليك جوز عين نعسـان وكاحل خصراً يمـيّل وصـدرو راحـل
    لـي وجـداً لي جسـمي ناحل بـحر الشــوق مـاليه ساحل
    بيـني وبـين الـنوم مـراحل ويـن للطيــف انا القي حيلة
    * * *
    الـفـرع الـبـتـّنـي راتـل طيرو ينوح في غصـونو حاتل
    بهوي نـسيم لي فكـري شاتل الاسـد الـفي القيــد ينـاتل
    يـتـأكد مـاليـهـو كـاتـل غـير مكـحـول ظبـي النتيلة
    * * *
    ضاوي سـناك لي بريقو راسل لاح بـين عـنابتين عـواسـل
    صدرك يـرجح وكـتفو خـاتل رنـا طرفـك للسـيف يمـاثل
    ليه ما يجــنـدل كل بـاسـل كاحـلة دغـس وخدود اسيلة
    * * *
    يالـمـرنوع الـكـتفو هـادل في دروعو ولمـعـاصمو جادل
    انـا سـاهر والـليـل سـادل شـرط الـحاكم يبــقي عادل
    لا اقــبل لـهـواك مـبـادل كيف اعشـق وارضـي البديلا
    * * *
    امـنعي طيفـك لي يـغـازل داخـل قلبي انا لــيك مـنازل
    يالائــم لاتـبـقـي هـازل انا في الحـب لي روحـي باذل
    العـاشـق يـسـمع لي عاذل خلـّي نصيــحـتك عني زيلا
    * * *
    يوقد جـمري و دمـعي باهل كيف نار تشــعل في مـناهل
    ضاق بي الكـون مع انو ماهل نومي تصعّب ووجـدي سـاهل
    لوبي حـالة سهـري جـاهل في الانـجم اســأل سـهـيلا
    * * *
    لـي طيـفك مالقــيت وسائل غير بسط النســمات رسـائل
    اغـرب شـي واعـجب مسائل حلـم الصاحـي ودمـعو سايل
    لو شـكيـت في امـري سائل الـبدريـن كـونـك مـثـيـلا
    * * *
    زايـد شـوقي ودمـعي هـامل جمر الحب لي جـسمي شـامل
    حتـي الطـيف لـي لا يـجامل مـع كُـلاًّ مــا كــنت آمـل
    دمــي تحـننـي بيـه الانامل هل يرضـيك كـدا ياجـمـيـل

  3. ابكرون كتب:

    يالـمـرنوع الـكـتفو هـادل في دروعو ولمـعـاصمو جادل
    وحااااة الله بالغ جنس بوووووليغ شوف المرتوووع دي
    وعاين جنس ده :
    اغـرب شـي واعـجب مسائل حلـم الصاحـي ودمـعو سايل
    صاحبنا النوم غلبو خلاااااص واتجرس تب :
    انـا سـاهر والـليـل سـادل شـرط الـحاكم يبــقي عادل
    وفقد الامل عديل وبقي يقول درر :
    حتـي الطـيف لـي لا يـجامل مـع كُـلاًّ مــا كــنت آمـل

  4. ياسين شمباتى كتب:

    الحبيب ابكرون..سلام..
    عااارفك بتجيب آخرك هنا !! والله كلنا مكتولين هوى وعينا طالعة,,بس الصبر..
    لكن حقيقة ابو صلاح وود الرضى وعتيق وسيد عبدالعزيز والامى وعبيد عبدالرحمن ختوا شعر لا يطاق او يحتمل !!
    بعدين (جوهر صدر المحافل) دى فيها الكثير من قواعد اللغة العربية وفصيحها وغريبها…احيييييي..

  5. ياسين شمباتى كتب:

    الاخ مجدى..سلام..
    مرحب بيك مشارك فاعل ومكتول بحب الحقيبة واناس آخرين..
    والله التلفزيون بقى عندو توجهات تانية ! ما ترجى منو خير ابدا..

    وانا من صفاك مسحور..وخليك قريب..

  6. aflaiga كتب:

    شمباتى الحبيب : شنو يا مان ما كنا فى محطة اعقد خلاس رجعنا تانى لى محطة حب تانى ؟؟؟؟ والله لكن عندك جنس نطيط !!!
    بالله رايك شنو فى قائد الاسطول والقافية العجيبه الرباعيه ؟؟؟

  7. البشاوى كتب:

    افليقا شمباتى لاعب حريف ينطط بخطة مدروسة انت عايزو يوقف النطيط عشان يتلب فى الحفرة – دة زول بيستفسد من تجارب الاخرين

  8. aflaiga كتب:

    بيشو : انت بدل تسجل لينا لعيبه جداد فى فريق جهنم الاختيارى تقعد تنصحم لى بعدم الوقوع فى الحفره !! بالمناسبه فحص الحفره يوم شنو ؟؟ شمباتى الله يرميك رميتنا ويلحقك حالتنا انت وسهيل وكل المنططين بره بره .

  9. aflaiga كتب:

    شمباتى : خت دى تحت الضرس الشمال وشوف لو تانى تاورك !!!!؟؟؟؟؟؟

  10. عدى فات كتب:

    إنهم شعراء أثروا الساحة الفنية بالمفردة الجميلة ويكفى أن نميزههم(شعراء الحقيبة)

  11. ابو حميد كتب:

    الاخ الصديق شمباتي احيك هيجته فينا اهات

    الواحد طول منكم شديد بس انتو في الخاطر سلام ليه باقي المجموعه

    اخوي هجار ماخابر بالموضوع ده لكين حقو نديه خبر يخش علي الحلة دة فعلا الشاعر ابوصلاح فية اي حاجة تخطر بي بالك ..

    .اشتياقي وهجرك حرام ……….طش قلبي وسكن الغرام

    يا فؤادي الزاد انضرام …….من بعـــادك والانصرام

    لي خلافك مافى احترام ……..انت قصدي وغاية المرام

    **********

    الطبيب الكشف الألم ……..قالي مرضك عندي أتعلم

    أما عمرك ضاع يا سلام …… انت عاشق ما فيش كلام

    صار علاجك بين استلام …….الفويطر الكشف الظلام

    واللجينة المازجه الكلام ….والنهيد الما شاف غــلام

    ***********

    يا طبيبي علاجي انعدم ………جد وجدي وصبري انهدم

    كيف احصل ضفر القدم ……..كان ده وصفك انا دائي دام

    والله صادق يا طبيب نعم ……. من رأيت البى صديره عام

    أب وضيبا هضليم نعام ……..صرت مضنى وجافى الطعام

  12. ابو حميد كتب:

    يا الفريع اللى ثماره حام … صافى لونك خاتى اللحام

    جيش غرامك عمل ازدحام ……في قليبي الزاد انفحــام

    من رايتك عقلي أتوهم ……..طش فكرى وعــدم الفهم

    فر من قوس حاجبك سهم ……..شق صدري وكيله هــم

    يا شقيقـة بـدر التمام …… يا أم جبينا كشف الغمام

    ************

    يا أم صديرا فضح الحمام …… جرعينا كؤوس الحمام

    يا الضمير الرق انحزم ……..بى صديرك ماح ما لزم

    بى نهيدك حالف جــزم ……… صافى حسنك ما فيه ذم

    يا الضمير الرنع انقسام …… والبريق الفى الابتسام

    ************

    يا الشليخ اللي روحي سام ……….كف لحظك رمشك حسام

    جن ليلى ونومي أتهزم ……… يا شبيهة صــيد الخــزم

    ضاوى خدك فاهك أزم …………..من فويطرك برقا رزم

    **********

    العشوق القبلي أنضرم …………بى هواك ابتلى ما نضم

    اما كان ما زولك أضم ………….كان رآك وغيب كـــضم

    يا جدية وادي البشــام ………. يا الجلاد المرعــاه شام

    دام عفافــك والاحتشام ……….يكفى بنجك دا الليله سام

    ********

    من عيوني البيك هلوسن ……….وين عيوني تلاقى الوسن

    فيك ثلاثة وعزن قــسن ……….. ماء وخضرة ووجها حسن

    القصيدة طويله كل جزئية ليها طعمها

  13. ياسين شمباتى كتب:

    الحبيب افليقا..سلام..
    وبركة بالطلة يا انت !! معقولة بس اقع سرييييع كدة!؟؟ والله لو على اقعد برة الى يوم الساعة,لكن الواحد ربط لسانو وكدة..كدة ابقى عشرة على سهيل وانا هين تب..
    اما الاغنية الختيتها فوق دى بتعمل فينى عمايل!!والله امكن اسمعها فى اليوم 5 مرات وما بكتفى منها,,ليه كدة بس تهيجنى وتشجينى؟؟
    خليك قريب وبطل النطيط بتاعك دا..

    الحبيب البشاوى..سلام..
    عفارم عليك انت يا واعى يا الدارس الكتاب,,قالوا السعيد بشوف فى غيرو والشقى بشوف فى نفسو,,اها عاد انا ابقى شقى ولا سعيد!!؟؟خصوصا انى شايقى نجييييض..

  14. ياسين شمباتى كتب:

    عدى فات..سلام..
    دا زمن الالفة ولا شنو!؟؟ مرحب بيك كتير عضو فاعل ومشارك عاطفى..وخليك قريب…

    ابوحميد..سلام..
    غايتو جنس عواطف عليك يا حبيبنا!! يعنى تغيييب وما تظهر الا فى الحب والعاطفة..واثريت الساحة بجميل نظم ابوصلاح..وكتر لينا من زى دا..تسلم..

  15. ابكرون كتب:

    يا جماعه في زول ما بهوي العيووووون السودا
    ————————-——————————-

  16. ابكرون كتب:

    كف عيونك عني ….لغة العيوووون كاتلاني
    حب الجمال جنني وشوق الوصال أضناني

  17. عزت كتب:

    انت في العيون السودا والا البنية البتضرب عود وتغني… ماشاء الله عليها أول مرة أشوف هكذا ابداع…. ياخ العود بيعمل تطريب عالي خاستا لو صاحبتو كلمات جميلة ولحن جميل وكمان ماسكاه بت…. منتهى الابداع

    كسرة
    وانت يا ابكرون وكت بتهوى العيون السود مالك خاتي لينا عين لونها بني في البروفايل… لكن ما أسمح شوية..!!

  18. ابكرون كتب:

    انت يا عزت العود بنزلق منها ليه؟
    غايتو لو كانت هولك العود ده يكون مدور ال 24 ساعه

  19. ودالخلا كتب:

    سلام ياقبيلة،،
    سديقي أسد الخلا الورور أظنك جفيت مابنت، وأبيت مالنت، وضاربكم جفاف أنت وصاحبك الدكتور، هسي حلاة شنو دي البتقولوا فيهادي؟؟ وقالوا حلو الغُنا في خشيم سيدو، دي عاملة كدة زي القاعدة تقرأ في نشرة أخبار!!
    غايتو ضاربكم جنس جفاف (وتسحر)،،،،
    جنس حسادة!!!!

  20. عزت كتب:

    بكون يا ابكرون يا من الطرب أو الاضطراب ما عارف… السنة كلها ماسكنوا ناس بشير عباس وعمر الشاعر وجابر خميس…!!

  21. نيام كتب:

    د.شمباتي:
    الاديب الاريب الطبيب الحبيب شمباتي و صحبه سمار شعر الحقيبة و انا امتع نفسي بتسميته شعر الحقيقة لانه كان في اغلبه من شعراء اميين صادقين في زمن صدق و محبة لا يكتنفها الغموض و لا تشوبها شائبة الغرض…
    ومن شعراء الأمة الأميين علي احمداي و لعل احدا لا يعرف هذا الاسم فهو علي المساح قال عنه مبارك المغربي انه اروع امي يكتب الشعر فهو لا ينقش حرفا واحدا من لغات الكون الواسعة و لكنه اثارالحروف و اشعل الشجن و صفق له اهل البلاغة و الادب…
    غني له ابراهيم النجار (الكاشف) :
    إنتا بدر السما في صفاك
    قلي من عيني من خفاك
    ياحبيبي متى وفاك
    ماله بدر السماء ما شروق
    من حماه ومنعه المروق
    خده زهري وبسمه البروق
    غير أشوفو أنا ما بروق
    ياحبيبي متى وفاك
    حاجبو يحكي النون والهلال
    طرفو فيه معاني الدلال
    انتا كل الحيا والجمال
    جيدو أتلع ظبي التلال
    ياحبيبي متى وفاك
    يا حليل زمن الجهل
    في رياض الربا في السهل
    من سروفنا بنشرب نهل
    يا زمان هل من عودة هل
    واذا كان المساح يتمني ويلح في التمني لرجعة ذلك الزمان التليد فماذا نقول نحن بعد زماننا …

  22. ابكرون كتب:

    ود الخلا : حلاة الصوت وعذوبته والكلمات ما تمش بعيد….كف حسادتك
    عزت : ما اظن …يكون انزلاق التربة من التضاريس ..!
    نيام : انا المساح دمع البكى…..ياخ علي المساح ده عندو درر بالله اتحفنا بيها

  23. ابو حميد كتب:

    ابكرون /معقول في زول مابهوي العيون خصوصا لوكانت (عيون المها)

    انت قروب جميل شديد ياريت الباقين كلهم يظهرو بي جاي والله رايك ياشمباتي

    السيوف ألحاظك تشهرا
    للفؤاد المن بدرى انهرا
    اخفى ريدتك مرة و اجهرا
    نار غرامك ربك يقهرا

    صيدة غيرك مين الجسرا
    تستلم افكارنا و تأثرا
    حال محاسنك مين الفسرا
    يالثريا الفوق اهل الثرى

    الصدير اعطافك فترا
    النهيد باع فينا و اشترى
    الشعر اقدامك سترا
    رقيصيبو قلوبنا البعترا

    عالى صدرك لى خصرك برى
    فيه جوز رمان جلى البرا
    الخطيبة و ردفك منبرا

    العيون النوركن بجهرا
    غير جمالكن مين السهرا

  24. ياسين شمباتى كتب:

    ابكرون..
    اميمة دى بالجد مبدعة,صوت هادئ وملاحة وعزف عود !! بعدين بتذكرنى حنانا النيل,,ليه ما عارف !!
    لكن لقيتك عاياااااااااان وحب الجمال مجننك..

    عزت..
    لكن ما بالغت !! يعنى عشان مسكتو اميمة قبلتو على الاحباب ديل !؟ عالم هنايين بشكل!!

    ود الخلا..
    لكن حسادتك ما عينة,,ما تخلى الجماعة يطلعوا الهناى الجواهم شوية!و لسه الموضوع ح يجر..اصبر بس.

  25. ياسين شمباتى كتب:

    الحبيب نيام..
    صدقت اذا عزيته للحقيقة,,وهى حق الاحساس وصدق العاطفة فى زمن كانت العواطف فيه مشبوبة والتعريض واجب..
    والمساح مسح من عاصروه من شعراء,,وزيدنا من شعرو وشعرك كمان..

    ابو حميد…
    طبعا الاغنية دى عندى عليها تحفظ شديد !! خصوصا مع الشريعة المتطايرة فوق روسينا اليومين ديل !!ههههههههههههههههه..عاد انت من يدقوا الصيوان تجيب نضارتك وتمسك جريدتك !! صعب..

  26. ابكرون كتب:

    شمباتي : مش حب الجمال…! انا مكتول عديل في الناعس المكحوووول
    ———————————-
    يا الناعس المكحول
    كيف حالك انت الان
    لي يوم لقاءك ظمان
    ضاق بي كل مكان
    ما نابني غير نحول
    أما الفؤاد منحول
    صدري يقيد بركان
    ———————————–

  27. ياسين شمباتى كتب:

    ابكرون..
    ههههه,احب الصراحة..فى حتة (ما نابنى غير نحول) دى انا بجيب صفر ! لانى سمنت واتورمت!!
    احييك واحيي اميمة كمان..

  28. ابكرون كتب:

    شمباتي (شنباتي) : ده كلام شنو معني الكلام ده انت ما (متوك) بيها غاشيها سااااكت مسكينه…! شوف ليك (نحول) يصيبك حتي لو تصوم ليل نهاااار…..شوف اميمه يحي دي منحوله كيف ياااااخ

  29. ياسين شمباتى كتب:

    ههههههههههههههه,,دا ورم يا ابكرون !! وكان على الاكل ما عندى اكل تب,لكن نسوى شنو مع الراحة والدعة ؟؟

    التلب..
    حتى انت متوك !؟ الكترااااااابا..الله يحفظك ويردك سالم وغانم يا حبيب…

  30. ودالخلا كتب:

    سلام ياقبيلة،،
    صديقي التلب اللزوم اللي رجال هزام، تعرف بقدر جمال هذه الكلمات وروعتها الا أن اطباء العيون وليس صرعاها يقولون بان نعاس العيون هو مرض في العيون كذلك ختف الألوان المرة أحمر ومرة أصفر ده مرض عديييل كدة!!
    ولا مش كدة يادوك شمباتي؟؟ 

  31. ياسين شمباتى كتب:

    ود الخلا.سلام..
    صدقت,,وانا ذاااتى العيون الناهسة شديد دى مااا بدورها,,بدور العيون التى فى طرفها حور ! ايون..

  32. ياسين شمباتى كتب:

    احد الاخوة بمنتديات المقل والحجير زودنى بالرابط العجيب دا ..آآآه منك يا ترباس..
    وشكرا تهومى على الرابط..

    http://mosawiland.com/upload/tarbas___alfatin_alwasim.wma

  33. ابكرون كتب:

    تعرف يا يس شمباتي الايام دي مناقشة السياسة وبوستاتها مقرفه ، كرهنا سيرتها بالله خلينا مع العيون ……حتي لو بقودن للجنون زي ما قال صاحبنا :
    _________________
    جنني ياخ العيون ياحبايب .. هن أساس الريد والفتون
    العيون البيض لو صفن .. يجرحنك ويتلاصفن
    مرة نظرن لي وقفن .. شالوا نومي وما أنصفن
    العيون السود كاحلات .. في دلالهن متهاملات
    يجرحنك ما سائلات .. يتركنك متجاهلات
    العيون الفيهن نعاس .. هن أساس معنى الجناس
    هن بثيرن في الناس حماس .. هن بقودوا الزول للجنون
    جنني يااخي العيون ياحبايب .. هن أساس الريد والفتون

  34. نيام كتب:

    ابكرون:
    المساح يفضفض لصديقه الامي :

    الشاغلين فؤادي وتايهين فايقين
    يفت البى ذارف دمع المايقين
    تال القبلة شايف لي برقا لمع
    والصيد في الخما يل ياناس اجتمع
    قوموا يا أحبة نسترق السمع
    ما بطيق القعدة والمايك دمع
    البلابل صاحت في الليل الهجيع
    سهرانات عيوني وجافيت الضجيع
    من الحاله ديه اولا لي النجيع
    وا حسرة شبابي الما لقيت لي وجيع
    كلف احبابى لي يا مولاي قدروا
    انسلبت لحومي واعضائى خدرو
    لاموني العوازل بى حالي ازدروا
    هم تايهين دلالن ساهين ما دروا
    سامرت الكواكب لما الفجر لاح
    منادى الفجر نادى وقال ياهل الصلاح
    صلوا الوقت حاضر قام أهل الصلاح
    وانا الليل قايمو لا خيال لي راح
    النسيم عاودني أقوم من نومي تاب
    مدهوش فكرى حاير مشطوب انشطاب
    يا نسيم بالله جيب رد الخطاب
    اوع الجاهلة نية وما بتحمل عتاب
    جمر الحب ده ولع حفيان ماش عليه
    ماذينى الضنى وانا صابر عليه
    حالته كئيبة أخوك يا محمد على
    وناظم القول أخوك المساح على

  35. ابو حميد كتب:

    عشقتو من نظرة هو قلبو خالي
    كيف الطريقا البيها يتم وصالي
    ما أصلو ما ممكن يرد لي سؤالي
    كأنوا ما شاعر كيف بشغل بالي
    يمر علي كالطيف وتضوي اللآلي
    العقل فار واحتار فيك يا غزالي

    سألت مين ياناس هذا المثالي
    اليانعة وجناتو والخصروا بالي
    المحتشم ومهذب وطرفو حالي
    هل حور أم أنسان أم شيء خيالي

    وفضلت أترقب برقو الموالي
    وأمتع النظرات في كل غالي
    ياالرموش العكسن اعتدالي
    ويا ناس و ياناس أجيبوني عن سؤالي

    وقالو لي ده الملهم في نفسو عالي
    وفارض علينا هواهو وهو سالي
    ده المستحيل ينزل من العلالي
    ده الموحي للشعراء الدرر الغوالي
    عشقتو من نظرة هو قلبو خالي
    كيف الطريقا البيها يتم وصالي
    ولكن غرامي عفيف وأنا ما ببالي
    وروني وين أهلو أكسب منالي

    اها ياناس دة حقيبة يااخ نيام وله نسميها شنو

  36. ابو حميد كتب:

    الاخ شمباتي مسؤول من الخير وين الاخ حاج السلاوي

    ماظاهر في الساحة ….

  37. تاجوج كسلاوية كتب:

    شمباتي ———–البقية سلام للكل اهنيكم بالسنة الجديدة انشاالله تكون سنة خير علي الجميع
    مدونتكم بقي ايقاعة بطئ انشالله السنة ده تزدهر ترجع ذي ما كانت زمان واحسن
    البنوت مشكلات غياب؟؟
    الاخ ابو حميد مشكل حضور طيب انا عارفة القصيدة ده محلها في مكان تاني بس انت ماتزود العيار
    لوم عتاب للاخ استريكر هو عارف السبب؟
    الشادن الكاتلني ريدو هلك النفوس و الناس تريدو
    مـالو لو يـرحم مـريـدو
    ده مرسل مجمل …..

  38. ياسين شمباتى كتب:

    ابكرون..
    صدقت والله,,وانا مخسوووووس نزلت المبكاة دا عشان كدة,لكن مرة مرة بتاورنا السياسة وقرفها !! بنتقريف ليها عدييييييييييل..

    نيام..
    الزول دا ما قاصدنى عدييييييييييييييييل !!
    سهرانات عيوني وجافيت الضجيع
    من الحاله ديه اولا لي النجيع
    وا حسرة شبابي الما لقيت لي وجيع
    وا حسرة شبابى الما لقيت لى وجيع..حليلى انا..

  39. ياسين شمباتى كتب:

    ابوحميد..
    والله لقيت سوقك ! تانى الا نجيب ليك عسكرى حتى نقدر نرفع !
    بالنسبة للحبيب السلاوى فهو بخير وصحة,,وكنت معاهو قبل شوية بالتلفون,,شوية مشغوليات على عامل سن على رطوبات كدة!! وقريييب بجيكم بنيولوك…

    تاجوج,,
    مرحب مرحب بالناس التغيييب وتقب..
    وسنة سعيدة عليك وسعيدين بمداخلتك الجميلة..
    اما عن الشادن فخلينى فى عز الجمر !!

  40. ابكرون كتب:

    ابداع عبيد عبد الرحمن في (ولهان هامي دمعي وسهران ساهي بالي) الي ان يقول :
    ___——————————-

    بعدت عنى دارك و منع الحظ رحالى
    حبك زاد نحولى وشو قك زاد محالى
    أنا ولهان وراضى و مرك عندي حالي
    واللايمنى فيك يا حالى يصيبه حالي

    لحظك دار كؤوسه راح الروح سقالى
    كنت سمير هناى وكنت نشيد مقالي
    قصدي أتم شرابي لكن ما بقالي
    عنب الشام بحبه إلا عصيره غالى
    ———————–
    ابوحميد بطل الجرسة

  41. ابكرون كتب:

    نيام ايها الشاعر الصديح الراقي :

    المساح ده حكايتو حكايه هذا (الترزي الامي) الذي لقب بالمساح لانه كان يمسح المدينه وحواريها بحثا عن الجمال ليقول فيه دررا خالده :
    شوف الكلام ده
    ———————–
    غصن الرياض المايد

    يا غصن الرياض المايد
    يا الناحِلني هجرك وانت ناضر وزايد
    تهجرني ليه.. وأنا ليك رايد؟

    يا غصن الرياض المايد
    ما أظن عن غرامك لو أموت ما حايد
    سهران ليلي طال و العين صِحت ما قايد
    تعبان قصدي ليمك، وإنت ناضر وزايد

    يا الهاجر جفيتني بنظرة لي ماك عايد
    شوفتك زي هلال العيد، وفيهو بعايد

    أنا و حبك ترعرعنا ونشأنا ندايد
    من زمنا قِبيل، أيام قُلال وعدايد
    ما خلِص القديم، و تبين مصايبو جدايد
    حِن يا حبيب .. كفاي مُر العذاب وشدايد

    يا خُلاصة الحواري الـمن جِنان وخوالد
    حُسنك ليك يدوم، لا أم تلِد لا والد
    راسخ في ظلال مجدو التليد التالد
    يا الـلابس العفاف حلية وعقود وقلايد
    —————————
    اما قصيدة : نغيم فاهك يا ام زين دواي …..دي حكايتا حكايه

  42. ياسين شمباتى كتب:

    ابكرون..
    ما تجيب سيرة (النضار) دا هنا !! فى ناس بتتلبش وكدة!
    بعدين قصيدة (نغيم فاهم يا ام زين) دى بتوترنى,,لانها بتذكرنى داية فى رفاعة اسمها (ام زين)! شينة شناة سهيل والله!! بعدين اخلاقها زفتة ولئيمة..اووووووووووووووووووووه منها..

  43. نيام كتب:

    ابو حميد:
    عشقتو من نظرة هو قلبو خالي
    كيف الطريقا البيها يتم وصالي
    ولكن غرامي عفيف وأنا ما ببالي
    انت استمتع يا ابوحميد و سمها ما شئت …قالو ودالجبل (ماعارف جبل وين يمكن عوينات) ياخ اب عمة مكومة داك قالو وقف عربيتو و قال لولد اغسل العربية دي قال ليهو ياخ ما تقول البنز دا قال ليهو ياولدي نحنا بنركبا و انتو سموها زي ما دارين…فتعال يا ابوحميد نستمتع و خلي ابكرون وشمباتي يسموها زي ما دايرين….
    شمباتي:
    سهرانات عيوني وجافيت الضجيع
    من الحاله ديه اولا لي النجيع
    وا حسرة شبابي الما لقيت لي وجيع
    هسع انتو ما نجعتو الله يسهل ليكم الكبري
    ابكرون:
    عليك الله شوف راح الروح دي مريحة راحة لمان بهناك
    لحظك دار كؤوسه راح الروح سقالى
    ولا شوف التورية:
    عنب الشام بحبه إلا عصيره غالى
    تقول لي راجل المرا …ورا ورا

  44. ابكرون كتب:

    شنباتي : والله بالغته ام زين حقتنا دي كانت اجمل زول في ام درمان ولمن قال المساح فيها الكلام ده كانت متزوجه (شخصية معروف)…يقال ان زوجها احل دمه ..والله اعلم
    ___________
    نغيم فاهك يام زين دواي
    شفاي البجبر قواي
    رقي رقك وجودي بدواي
    ظماي بعدك وقربك رواي

    نيام : مبااااالغه مش ؟

  45. نيام كتب:

    ابكرون:
    كل شعر الحقيبة (الحقيقة) كان المساح او عبيد او العبادي او عبدالرحمن الريح او ابوصلاح فيه معاني قريبة و معاني بعيدة لا تستطيع تمييزها الا بعد لآي…
    رقي رقك وجودي بدواي …اي استرقيني كما شئت و لكن جودي عليا …تقول لي انا يا تتي الحاصل بي سببو انتي…
    ولا شوف عبيد:
    و اللايمني فيك ياحالي يصيبو حالي…شوف الحسادة الراقية دي…
    ولا شوف ابو صلاح:
    مـن نـور خـدك لاح مـقابل للـشعر الـطال لـيلو سـابل
    سـهـم الحـاظك ليـنا نـابل بـي كل شي دون هجري قابل
    ينسـب نـوحي عـلي البلابل وانــت القــمرا بتنـسبيلا
    والمقابلة في نور خدها و ليل شعرها السابل يوحي بان هؤلاء الشعراء يمتلكون ناصية الكلم و بلاغة الفطن و سبرو غور الكلام و هم علي اميتهم او محدودية تعليمهم كانوا اكثر بلاغة ممن نال حظا منه…

  46. ابو حميد كتب:

    تاجوج ملكة الشرق كل عام انتي الجميع بخير ربنا يجعلا سنة وشها حلوه علينا كلنا قولي امين

    بس الشادن الكاتلني ريدو
    هلك النفوس و الناس تريدو
    مـالو لو يـرحم مـريـدو

    كتلتيني كتل
    قلتي اخير تجيبها لي من الاخر

    ______________________________
    شمباتي انت البديت السواقة …..
    نيام علي قولك نستمتع و نخلي ابكرون وشمباتي يسموها زي ما دايرين…

    . الاخ ابكرون الجرسة عامة……………
    كنت سمير هناى وكنت نشيد مقالي
    قصدي أتم شرابي لكن ما بقالي
    عنب الشام بحبه إلا عصيره غالى

    لا بلح الشام لاعنب اليمن

  47. ابكرون كتب:

    ابوحميد : كل شئ ممكن …..
    قصدي أتم شرابي لكن ما بقالي
    عنب الشام بحبه إلا عصيره غالى
    ——————
    لا تيأس وانده الله و (راجل كسلا)….وشوية بكا مع وساطات الي ان العصير الغالي ببقي مجااااان والوحدة تبقى جاذبه بدون (البكا في جوبا)….وان شاء الله ام زين تكون بتقرأ…….!
    نيام : بالجد الناس دي ما كانت عاديه…وناس ام زين ما كانن عاديات والزمن ما كان عادي…..لو بعثوهم اليوم شيطان شعرهم كان آمن وكان انضم للحركات (المصلحة)….!
    شمباتي : زولك جا الدوحة وكان (النضار )كاتلو يلمع ساااااي تقول ثلاثيني . زي (الدبشق)…غايتو ناس حوش (العمده) ديل..!

  48. ياسين شمباتى كتب:

    نيام..
    اريتو عصيرى بعد ها الحال,,والكوبرى عملوهو لكن اليقطعو منو ؟؟

    ابكرون..
    والله يستاهل قطع الرقبة فى ميدان عام,,لزومو شنو يتشبب بالمرة بعد تموا حلوها ؟؟والله كان لحق الشريعة دى كان جلدوهو 375 جلدة فى ميدان عام !!
    اما بخصوص (المخصوص) فاليومين ديل شاكى من ضهرو وكدة!! ويشيلل ويوصينى,,عليك الله امشى زروهم,,لما مشيت قبل شوية وطمنتو عليهم ! شفت الدبشكة دى كيف؟؟ههههههههههه

    ابوحميد..
    انا بديت لكن نزلت !! انت نازل وين!؟ وايتو يرحمك يا مريد..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s