طه . هل وقعت نيفاشا لنشقى ؟؟؟!!!

Posted: الخميس,30 ديسمبر, 2010 by aflaiga in اخرى

اليوم واليوم فقط يقف الحائرون ممن ظلو يحلمون بوطن واحد موحد يقفون كما وقف سيدنا موسى يسال ربه ( رب هل هناك من هو اعلم منى وهل هناك علم لم تعلمنى اياه ؟؟ ) فهل يقف طه اليوم ويجيب كما اجاب الرجل الصالح نبى الله الخضر دعونا نستعرض قصة الخضر وموسى ومن بعد ندع فكر الاستاذ على عثمان محمد طه يجيب علينا بوضوح ( هل وقعت نيفاشا لنشقى – ام انت تريد وانا اريد والله يفعل ما يريد ) ..
– حين طلب الشعب من حكومته ان تاتيه غداءه سلاما ووحدة فقد لقى من سفر نيفاشا نصبا – هل يا ترى اجابه الحزب الحاكم بانه قد نسى سلامه وامنه وما انساه الا الشيطان فاراد الحزب ان يعيدنا الى حيث نسينا حوتنا !! ؟؟؟
– ام ترى ان شعبنا حين صحب طه فى رحلة نيفاشا وحتى الاستفتاء رغم تحذيره بانك لن تستطيع معى صبرا وكيف تصبر على ما تحط به خبرا كان يثق فى ان طه يحيط بما لم يحط به خبرا وصبر احيانا وجزع فى اخرى ؟؟
– ام ترى ان طه حين خرق حزبه سفينه معيشة وامن شعبنا الذى غضب لخرق السفينه وخاف الغرق قد اطمان لحديث طه بان وراء شظف عيشنا حكمه الا تتناوشنا امريكا والغرب اللتين تاخذان كل شعب غصبا ؟؟؟
– ام ترى ان شعبنا حين شكى لطه وحزبه تشتت احزابنا الوطنيه قط اقتنع بتفسير حزب طه ان الله اراد ان يستبدلنا حزبا خيرا من اولئك الذين ارهقونا طغيانا وربما كفرا !؟؟
– ام ترى ان شعبنا حين سال عن ثرواته التى تحت جدار ارضه البكر قد اقتنع بان حزب طه قد اجل استخراج ثروات الشمال ليكون قيما عليها بعد ذهاب الجنوب برغم ان شعبنا بلغ من الرشد عتيا ؟؟؟
يا طه خذ المسئولية بقوة فقد اتاك الله الحكم واعلمنا بتاويل ما لم نستطع عليه صبرا فاجابات حزبك الحاكم لم تقنع شعبنا الذى يشترى صباح اليوم الموافق عيد استقلاله الرغيف اربعا بجنيه واللبن رطلا بجنيه وثلث .
شعبنا الذى ما كان كقوم موسى واكتفى بما تخرج الارض من فولها وليته وجد !!!

Advertisements
تعليقات
  1. نيام كتب:

    افليقا:
    اولا حمدلله بالسلامة و عودا حميدا…و الحكاية بعد كده (اهبطو مصرا)
    وجاييك

  2. ودالخلا كتب:

    سلام ياقبيلة،،
    صديقي الحبيب افليقا عاشق الوحدة المتيم وحبيب الوطن الواله المكلوم الذي لن ندعه يمضي أو يولي مع المساء في جوف الضباب!!
    هذه قصتنا الواقعية ياصديقي، وحياة شعبنا الأبية، والتي تمثل للعالم أنموذجا فريدا في درب التفرد علي كل شعوب الدنيا، والذي نتطلع إليه، ولكن ليس في عالم النائمين بلا أحلام ، والذين ربما احتاجوا لأن يناموا ساعات أطول .. طوال العام ، حتى يصنعوا مجدا” من الأوهام….. ولو في الأحلام!!!!
    ياسديقي العزيز أن أحلام الأمس حقائق اليوم ، ولا أريد أكثر من أن يجتهد كل منكم بتحقيق هدف مجيد لبناء مجتمع جديد، ووطن فريد، أتمنى أن تكون هذه المهددات هي المحرك الذي تحتاجه أمتتا ليوقظ قدراتنا النائمة ويحرك في أمتتا الساكنة خمولها وعدم اكتراثها، ويحفز في جيلنا المتهالك قدراته وينعش في شبابنا المخدر آماله وأحلامه وطموحاته،،،،،
    الناس هلكى إلا العالمون و العالمون هلكى إلا العاملون والعاملون هلكى إلا المخلصون والمخلصون في خطر عظيم..

  3. عزت كتب:

    أفليقا و الأحباب سلام

    وكل عام والجميع بخير… وانشاء الله ما يحصل فراق لقلوب بعد ما اتولفو…

    عارف يا أفليقا الحصل في نيفاشا نتيجته ببساطة لأننا نحن الشماليين أو بالأحرى الشماليين من أهل الانقاذ الذين كانوا يفاوضون وقتها لا بعرفوا يفاوضوا ولا حاجتين وعرف عن (طه) برغم ما يقال عن ذكاءه الا وانه معتد برأيه ولايقتنع بأن هناك من يفكر أحسن منه وللأسف جاراه المثقفاتية بتاعين الانقاذ في وقتها ولم يفاوضوا صاح…

    قول ليه:

    أول حاجة ما كان معاهم خبراء زي الجنوبيين الذين كانوا يشيرون في وقتها لكل نقطة ويقفوا عندها ويطلعوا برة قاعة المفاوضات ويجوا بي رؤية موحدة استنادا على معلومة واستراتيجية يعلمون سلفا الى أين ستقودهم..
    ناسنا بتاعين الشمال المقددنها ما كانوا بيشاوروا وما قاعدين يقروا كويس وما بيعرفوا انجليزي كويس وأول ما يطلعوا من قاعة المفاوضات استعدادا لليوم التالي ما بيعملوا استعدادات وما قاعدين يدخلوا بي رؤية موحدة…. فأول ما يمشوا أوضهم يسكنوا لزوجاتهم ويعملوها ونس وضحك وكلام فارغ لي تاني يوم…
    وطوالي هم متنازلين عندما يرتفع سقف مطلوبات الجنوبيين…
    بعدين عرف عن الشماليين الزهج والملل من نفس المنظر خاصة اذا تكرر كل يوم ونقة هم ما فهمين منها حاجة بالرغم من أن منتجع نيفاشا جميل جدا ولكن يمل الشمالي سريع خاستا اذا كان مرتو ما معاهو… وطبعن عرف عن جماعتنا حبهم للشنو ما بعرفو… فكان هناك تيار يود الرجوع وذلك التيار ما رسخ لحكاية….. ياخ نوقع بي أي شئ وبعدين الجنوبيين ديل نزيتهم كويس وصدقني مافي مشكلة كلو كلو …

    وقاموا وقعوا وفي بالهم ياخ دي خمسة سنين ما معروف يحصل شنو…

    كسرة:
    بكرة الجمعة وكل جمعة خطيب المسجد بتاع المقرن بيقول… لعن الله نيفاشا وأهلها……
    وأنا كل جمعة بقول معاهو آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآمين

  4. ياسين شمباتى كتب:

    افليقا..سلام..
    لقد ارهقتنا الانقاذ من امرنا عسرا..والاستاذ/ على عثمان ربما كان اكثرهم حكمة وتبصرا بالاوضاع الراهنة حينها,,وهو طبعا لم يضع فى باله موت قرنق ولا تولى سلفاكير ولا تهميشه ولا امكانية حدوث الانفصال..ومشهود له فى كثير من المحافل والتصريحات اختلافه مع مطبخ الحزب الحاكم..
    لو كان طه مكان فلان لما آل الحال الى ما آل اليه..اللهم سلمنا وبلادنا شرر الفتن ما ظهر منها وما بطن..

  5. ياسين شمباتى كتب:

    هذا ما كتبه الصديق عبدالناصر:

    البقرة امينة وحلابة

    للناس الفي بطن الصحراء

    للساكنين في نص الغابة

    وما بتتغابا

    البقرة امينة ومسكينة

    الضرع المليان بالبركة

    لا بترفس لا بتعمل حركة

    الناس التحلب في البقرة

    ايييك يا اخوانا كتااار كتره

    البردان ضارباهو المطرا

    الوكسان ويرز من الفترا

    رضعوها رضع

    رضعوها رضع

    والقالو شبع لسه مكنكش

    تسمع لسع

    يا زول لسع

    اصبر وارجع

    باكر ترضع

    قول يا الله

    البقره معاك في ها الحلة

    الشفقة تطير

    اوعا تكابس

    وشطورا ملانات البقرة

    مافيهن فد شطرن يابس

    الشفقة تطير مافيش داعي

    خليك انسان راقي وواعي

    المغسة بتنصحني وترضع

    انا مريووق انت آب تسمع

    انا مزنوق بي كووم شفع

    انا داير فد رضعه وانجع

    البقره آزول مش عندنا فيها؟

    انا بزعل بمشي بخليها

    يا بينا السيف بينا الدرقا

    تب ما معقول

    الضرعه حداك وانا حدي المرقه

    ما داير تدينا معاك فرقه

    امشي واخليك

    لا لي لا ليك

    هذي الشخته اوعا تعديها

    العجلي الوالداها البقره

    براي بربيها

    اوعاك تتحاوم تالاها

    ما عندي ملامة

    بزرعلك جمبها كجامة

    ما عندي ملامه انا حذرتك

    ما دام مسنود بي مقدرتك

    انا زاتي مخدر ضرعاتي

    وخسارة تفرقنا البقرة

    لا راضي امي ولا حتى ابويا

    الفيك اتعرفت يا اخويا

    البيني وبينك هذا شخيت

    اوعاك تتعدا

  6. نيام كتب:

    افليقا:
    جوبا مالك عليا يافلقة
    انا عارفك متيم بها لم تفت متبول….و لكن!!! http://www.ahewar.org/debat/show.art.asp?aid=198380

  7. ودالخلا كتب:

    سلام ياقبيلة،،،
    صديقي افليقا، ستُبدي لك الأيام ما كنت جاهلا ويأتيك بالأخبار مالم تزودِ،،
    لقد تحدثت مرارا” وتكرار” عن مفاجآت الوحدة ومآلات الأنفصال، وتوقعت عدم حدوثه علي أرض الواقع، ولو تم من الناحية السياسية، وهذا ما كنت أشير أليه بأن الوحدة باقية ولكنها بأسس جديدة غير التي نعرف، وأن الظروف والملابسات التي يمر بها الوضع بالجنوب في الوقت الحاضر لا تشجع علي حدوث الأنفصال بشكله المعروف، وما أردت بيانه هنا من تداعيات الأنفصال وظهور بعضه الآن بأن كل الدلائل تشير إلى عدم توافر عناصر الاستقرار في الجنوب حال الانفصال وهذا لأسباب قد يختلف بشأنها، وأهم هذه الأسباب التعدد العرقي في جنوب السودان الذي قد يدفع بوتيرة النعرات العرقية ويقوى من دعاوي أفضلية عرق على آخر مما قد تدفع بالجنوب إلى الاقتتال خاصة إذا نجح عرق بعينه من الاستئثار بالسلطة والثروة على حساب باقي الأعراق وهو أمر وارد وبدت ملامحه في الظهور في شكل قيام بعض القبائل المهشمة في حمل السلاح في مواجهة أبناء القبائل المسيطرة من (الدينكا و النوير و الشلك) ، وهي قبائل قيادات الحركة التي تستأثر بالسلطة باعتبارها طليعة النضال ضد مما يعتبر بأنه تسلط الشمال مما أوغر صدر القبائل الأخرى ضدها، كذلك فأن وجود قوى معارضة مناوئة على خطوط التماس مع الجنوب كجيش الرب الذي يحارب نظام موسيفيى في أوغندا فضلا عن بعض شراذم للمعارضة في شمال كينيا وشرق أفريقيا الوسطى بخلاف حالة الاستقرار الذي تشهده الكونغو وهذا يعني أن الدولة الوليدة ستكون في قلب صراعات لن تنتهي، كذلك تعاظم الفساد كونه مسشتر في بعض قيادات الحركة، كذلك نجد أن ضعف البني التحتية في الجنوب وعدم توافر رأس المال الاجتماعي ( المستشفيات ـ مدارس ـ طرق ـ شبكات مياه وصرف ـ خطوط كهربائية) وارتفاع تكلفة المبادلات الخارجية نظراً لأن دولة الجنوب ستكون من المناطق المقفولة التي لا تطل على موانىء بحرية يمكن من خلالها تصدير المنتجات خاصة البترول والمواد الأولية أو استيراد احتياجات الدولة من السلع والمواد الغذائية والمصنوعة والمعدات ووسائل النقل، وكذلك الافتقار إلى الكوادر الفنية اللازمة لمواجهة احتياجات بناء الدولة (مدرسون / أطباء / صيادلة الخ) وهل تستطيع الدولة الوليدة في حالة الانفصال توفير فرص العمل لابنائها العاملين في الشمال في ظل وجود بطالة بينهم حتى في مدن الجنوب، كما أن الصراع بين الدينكا وبين الشلك والنوير قد يؤدي تماما بالدولة الوليدة فى حالة نشوب نزاع عرقي في هذه الجماعات فضلاً عما يقال أن الجنوب يعاني من تصاعد دور الفصائل المسلحة ، ووفقا لتلك ا لتقديرات الغير رسمية فأن هناك أكثر من 40 فصيلاً مسلحاً بالجنوب تتفاوت درجات تسليحه ويشار إلى أنها جميعا”قد قامت على أساس إثني (عرقي)،،
    لكل تلك الأسباب وأسباب أخري نجد أستحالة وقوع الأنفصال علي أرض الواقع، ولربما يتم ترجيح الخيار الوحدوي بطريقة أو بأخري!!!!!
    (اللهم جنبنا وبلادنا شرور التشرذم وآثام التعنصر والأنفصال، وأجعل بلادنا واحدة موحدة، وأجعلنا ممن هدي وأستهدي، وأهدي قومي لجادة الحق فأنهم لا يعلمون)..

  8. وأقســـم نافــع (الغير نافع ) أن يسلمنا البلــد ما ناقــص شــبر وأنا خايف حيسلمونا جزيرة تــوتي بس
    آسف يسلموكم لأنني فــي بحـــري احتمال نكون أنفصلنا برضــو الزمن داك …2012 لو ما في وحدة جاذبة مع الخرطوم وامدرمان.

  9. ابكرون كتب:

    ود الخلا : يا اخي لا توجد وحده باسس جديده وانفصال ناقص….الانفصال هو الانفصال يعني دوله برئيسها واسمها الجديد وعلمها ونشيدها ولو بدت من تحت الصفر….. كلامك بخصوص المفاجأة وكذلك تحليل العزيز افليقا قبل شهور لم يكن كذلك كنتم متيقنين من حدوث الوحده وان لا انفصال ولا قاعده امريكيةمستقبليه في الجنوب وممكن ترجع للبوستات وهي ما بعيده……
    يا صديقي الانفصال واقع وحتمي مش لو مشي البشير جوبا يوم 4 يناير …! لو خيم وجلس هناك يوم الاستفتاء وكان في كل المراكز في آن واحد برضو الموضوع رااااح خلاص ، وما لم يفعل له منذ 6 سنوات لا يمكن في 6 ايام…..لو نفذ اتفاق ماشاكوس كما مكتوب وما نص عليه ووقع عليه وفيه اشاره واضحة للديمقراطية المعروفة ونزاهة القضاء الخ استحقاقات مشاكوس لو تم ده كانت الوحدة حتكون جاذبة …. ولو كان بخاطب الامة السودانية كما خاطبها امس في احتفائية الاستقلال لما حدث ما حدث لكنه في الهواء الطلق بقول كلام محسوب عليه وعلي السودان….واقول ليك شي لو لحس كوعو يمكن تحصل وحده……!

  10. ودالخلا كتب:

    صدقني لا زلنا ياصديقي العزيز نأمل في حدوث معجزة!!!!
    وأوافقك الرأي بأن مايفعله الرئيس الآن هو لعب في الثواني الأخيرة من عمر المباراة، وماني عشمان كتير !!

  11. نيام كتب:

    الاحبة سمار الدانقا
    في هذه الايام الخانقة
    مبروك عيد الاستقلال و ان كان قد جاء و الوطن دمه يسيل في جنوبه المقتطع و غربه الما جمع…
    مباراة الدقائق الاخيرة تذكرني في الشباب و الايام الخوالي كان هنالك مدرب معتوه يعتقد انه موهوب و متمرس قام بتدريب باك لفت علي تقريش الكرة عندما كانت الكرة تقرش عند الحارس اذا حصلت زنقة وقد كان ذلك علي ايامنا ….فلما انزنق الباك اراد كما اوصاه المدرب ان يقرش الكره للحارس و المدرب متابع علي الخط و قد رأي الفراودة انفردو بالباك فاخذ يصيح القون لا فدلف الباك ناحية الكورنة فصاح المدرب الكورنة لا فرجع للحارس مرة اخري و هو مزانق فصاح الكوتش القون لا فارتبك الباك و ضفر الكورة فاستقرت في التمانية فصاح المدرب دا شنو دا العملتو دا فقال الباك المسكين اعمل شنو يعني ابلعها… الكورنة قلت لا القون قلت لا بعد دا الا ابلعها…
    الان و قد دخلت المباراة في زمنها الاخير فما بقي لنا من المفاجآت الا التمانيات وربك يستر..

  12. حنين كتب:

    أفليقا والسمار كيف إنكم ومشتاقين . وبالاكتر .
    أفليقا إنت فتحت الفراش والجنازة لسة مامرقت من البحر . يعنى أسى نلقاك فى البحر ولا وين …
    بعد رجوع غازى صلاح الدين من مباحثات الدوحه بخفى حنين وهو يشكى للسيد الرئيس ونائبة تمترس فصائل دارفور المتمردة وعن رغبتهم فى الحصول على إتفاق يشابة إتفاق نيفاشا ليقاسمو فية الحكومة مابقى من السلطة والثروة مع الاحتفاظ بحق تقرير المصير لولاية دارفور العظمى . رمق الرئيس نائبة بنظرة ذات مدلولات عميقة وبعد لحظات من الصمت قال لة (طه . هل وقعت نيفاشا لنشقى ..أها …أكل العستو ده …)

  13. البشاوى كتب:

    كل عام وانتم بخير – والقابلة السودان ناقص الجنوب بس —- عزيزى افليقا — المشكلة على ما اعتقد كما قال عزت فى الذى يفاوض وبيده توقيع الاتفاق – وهم ناس الانقاذ وفهمهم بان الكاش يقلل النقاش وهذا مافعلوه حتى مع معارضى الشمال – ليست لهم رؤية تقبل الآخر بل مايهمهم كيف يحكمون — وراجع تعنتهم مع كل من يعارضهم ولك فى تعبيرات( الحس كوعك ) و (حلم الجيعان عيش ) تفسير لمآلات الحال الواقع والآتى – والخوف كما قال جبرا لو استمر الحال بالصورةدى ان يصبح السودان كل شعب فى اوضة وبرندة —

  14. aflaiga كتب:

    حنين : اخشى ان تكون واقعا تحت تاثير اللاقوال التى تشير الى ان طه هو من وقع نيفاشا دون مشورة حزبه !!! حين سالنا هنا باسم طه لان الاتفاقية مرتبطه باسمه فقط وهذا لا يعفى اى مسئولية للحزب – حتى الا ن لم يرد علينا طه او احد من طرفه !!!

  15. عباس ركس كتب:

    الحبيب افلي : سلامات
    بلاي انت كنت منتظر طه ولا واحد من طرفه يرد عليكم ؟؟؟

  16. حنين كتب:

    أفليقا .ما لقيتك جاااااادى…

  17. aflaiga كتب:

    نيام الحبيب :
    مشيت الاراضى اطلع شهاده
    لوطنى الحبيب بغرض التاكد
    وكترة موانع وكترة تشدد
    لقيت الجنوبى بيقطع فى حقو
    بدون ناس مساحه يقطع يشرط يلتق يقدد
    موظف قديم قاعد يبكى ويندد
    لحدت قريب كنتا واحد موحد
    لقيت عمك ادم شايل عريضه
    وداير يقسم قسمه جديده
    لقيت عمو تيه بنفس الملامح قصيرا مفتل
    وشايل خريطه يقالع ينتل
    لقيت حجه حوا واعلانا شرعى
    بحق الوراثه وحقوق غنما ترعى
    لقيت ليك خواجا يقرقر و يضحك
    على حال بلدنا …
    سالت الموظف كم المساحه
    دنقر وشخبت وغلبو اليحدد
    يمتر يمدد يدنقر يصنقر وغلبو اليحدد
    فى زولا بحدد ؟؟
    لقيت فى النهايه شهاده غريبه
    بتاسس لانو بلادنا الحبيبه
    بقت دون شهاده لحدى الجديده
    اظن بكره تنزل باعلان جريده
    الى كل من لا يهمه الاكيده
    هنا كان وطن هنا كان وطن …

  18. aflaiga كتب:

    ركس الحنين ( يعنى الاتنين سوا ) ما تمشى بعيد يا ركس :
    والله انا كنت راجى زاحد من طرف طه ولا طه ذاتو المهم لسه راجين ..
    حنين جادى شنو فى شى جادى الايامات دى ؟؟
    نيام : بالله نقح دى ونزلا بطريقه نياميه ..

  19. نيام كتب:

    لقيت فى النهايه شهاده غريبه
    بتاسس لانو بلادنا الحبيبه
    بقت دون شهاده لحدى الجديده
    رائع يا فلقة رائع .. الظاهر جوبا اثارت كوامنك

    • نيام كتب:

      البشاوي:
      اوضة و برندة يا نزهي القصة ماشة لي دُردُر بدون بنبر… انتا ناس الانقاذ ديل كانو قايلين الخمسة سنة دي ما بتجي …قال ليك المتغتي بالايام عريان…خمسة سنين عاشن الحب الليلة عيد تقسيمو يا رب تحياتي للاستاذ محمد الامين

  20. ياسين شمباتى كتب:

    افليقا..
    انا انفع !؟

    ركس يا ركس..يا حرف الاكس..
    والله ليك وحشة يا قلب,,وابقى واصل..

  21. aflaiga كتب:

    شمباتى : اتكفرون ببعض الكتاب وتؤمنون ببعض ؟؟؟ يعنى تاها براهو و ده براهو ؟؟ لقيتك لكن شيشو للنهايه !!! تنفع ساى وهو غيرك ينفع منو ؟؟
    نيام : مشكور على التقييم جوبا مالك عليا انا ..
    هل تقدر تقول لمجوك يا مجوك يلا لى بلدك وسوق معاك معاك ولدك ؟؟؟
    هل تقدر تقول لى ميرى احرار احرار فى بلاد حره والشعب اختار يا دخيل بره ؟؟؟
    هل تقدر تقول لى بس على اى اساس فكيت مجوك عكس الهواء ؟؟؟
    كان للزرقه الزرقه كتار وكان للدين الدين خّيار
    ا لا يكون بس ساهى مزاج !!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s