نصيب

Posted: الخميس,30 ديسمبر, 2010 by abushagrod2 in ادبية, سياسية, ساخر سبيل

بهذا أعلن وأنا بكامل قواي العقلية أنني وجبرا لخاطر رئيس البلاد المفدي أعلن التبرع بكامل حقي في بترول السودان للجنوبيين في سبيل الوحدة الجاذبة ويا منقو لا عاش من يفصلنا

صحيح أني تبرعت بكامل حقي من نصيبي في البترول حتى تاريخ 11ريناير 2011 ولكن نظرا لظروفي السيئة والصعبة ( صعبة خالس) لا أستطيع أن أتبرع من نصيبي بعد هذا التاريخ ( هذا إذا فضل شئ بعد الإنفصال لا قدر الله) لأن لدي برنامج حافل أريد تنفيذه في ما تبقى لى من عمر…أشياء  رأيت الأعراب رعاة الشاة الحفاة العراة حققوها بعد ما ظهر ليهم الذهب الأسود

اريد أولا مدرسة لأبني  يصلها مشيا في خمس دقائق وبالبص نصف ساعة ( أريد له أن يتفسح ويرى الدنيا بمنظور أوسع ) واريدها مدرسة مكتملة من الأساتذة المدربين المرتاحين الذين يقضون إجازاتهم في المنتجعات ( الأستاذ المرتاح بكون شبعان وعشان كدا بدي ولدك تعليم عينو ملانة والأستاذ المشلهت بكون جعان وعشان كدا ما بعيد تلقى ولدك واقف في الصينية بعد المدرسة ماسك ليهو مناديل ورق )

أريد مدرسة مكتملة الأثاث كل ولد عندو درج وكماد عندو خزانة خاصة مفتاحها في جيبو بخت فيها الكتب والكراسات والأدوات الدراسية البتصرفها ليه الدولة خصما على حقي في البترول ( الدهب لسع ما جينا ليهو)

أريدها مدرسة يكون فيها مشرفين وطبيب وصالة ألعاب رياضية وفيها أستاذ رياضة عشان يكون ولدي عندو إختيارات غير كرة القدم و( الطقاش وأبو جكة ) وما معروف يمكن بكرة نشوفو جاري مع ناس أبوبكر لأنو من هسع الأرنب جارية كب بمسكها ( وبفكها تاني صدقوني )

أريد ه ان ياخد دروسه بالكمبيوتر والمدر يرسل ليه إيميل الواجب وهو يحلو يرجعه ليهو في بريدو تحت إشراف أبوه وأمو طبعا ( أنا مشغول والله)

أريد لإبني إذا رجع البيت من المدرسة أن يسكن في بيت فيه وسائل أمان نسبية يعني ما يرجع البيت يلقى القطية طارت فيها شرارة ولحقت أمات طه

ويلقى موية صالحة للشرب زي الفي المدرسة ما موية جايبنها في جلود الحيوانات ( القرب ) ولا في البراميل الملحومة الجارينها بالحمير ( أو الحصين إذا وجدت)

أريده إذا مرض لا قدر الله أن ألحق بيه المستفي اللف البلد عشان  يتعالج بالطريقة الصحيحة البتعالجو بيها الناس في القرن الواحد وعشرين يعني يلقى تشخيص سليم لحالتو ويخاد الدوا المناسب تماما يعني مستشفي فيه سي تي سكان يعني تصوير مقطعي واشعة وتخطيط للمخ والقلب ( أهم حاجة ) وفيه كل العلاج مجانا برضو خصما على حسابي في البترول

صحيح العقيد القذافي لم يعلن شريعة ولا حاجة ولكن أدى كل زول حقو في البترول وآخر الشهر بمشي بلقاها نزلت في حسابو بالأضافة أنو أي زول بالضرورة حامل أسهم في الشركة الكبيرة حقت البترول بتاعة الناس كولها لكن أنا ما داير حقي يجيني كدا بس دايرها في شكل خدمات وكدا

كمان عايز الولد لمن يمرق بالعصر يلقى ليه طريقة يسوق بيها عجلتو لو داير يتفسح أو لو داير يمشي الحديقة الفي الحي المخضرة دايما وأبدا عشان أنحنا في بلد فيها أطول نهر في العالم وأكثر نسبة أمطار في العالم وأخصب أرض زراعية في العالم  ما دايرو يصاب بالسحاوى ولا يغرز في رملة يغلب الصاج الكند

واحد من كبار إداريي ومحاسبي شركة الصمغ العربي شالوا عشان نيفاشا وطبعا الشركاء العارفين من أين تؤكل الكتف قسمو الكعكة بيناتم  وقامو ضحوا بيه لآنو أصولو معروف مسقط راسها وهواها ليس شماليا في دولة الشمال المحتملة وليس جنوبيا وعشان كدا لم يجد من يبكي عليه فحكى في ساعة صفاء ان شركة الصمغ العربي وزعت أرباح 300% في سنة من السنوات , تذكرت في إجازتي الفاتت ذهب لقريتنا التي كنا لا نستطيع بعض المرات من الوصول إليها من ثلاثة إتجاهات من كثافة أشجار الصمغ ( وشوكه المعقوف الحاد مثل الكلاليب ) فوجئت من قلة كثافة أشجار الهشاب وخاصة في الجزء الذي يخص والدتنا الله يرحمها فكان الرد كالعادة أن العائد من الصمغ لا يساوي ثمن الفأس الذي يحصد به ( لا يوجد ماء والماء إن توفر فبأسعار خرافية وأجور العمال عالية ولا توجد طرق واللواري التي تجازف في تلك الرمال تزيد بل تبالغ في أسعار النقل بالإضافة بان سياسة الشركة هي السرقة من المزارعين  حيث تشتري من المزارع بحدود ثلاثين وتصدر بخمشمائة وأكثر )

وكذلك أخبرني لماذا تحولت الشركة إلى المهرب الرئيس للصمغ العربي لدول الجوار لدرجة أصبحت هذه الدول من المصدرين الرئيسيين لهذه السلعة

ليهم حق بوزعوا 300%

أريد لولي ولكل أولاد السودان أن يكونوا وبالتساوي وبالحق حاملي أسهم في كل الشركات المنتجة القومية وليذهب المتمشدقين سارقي قوت الشعب الحرامية العاملين الذين نصبوا أنفسهم أسيادا للبلد بحق قدومهم مع كتشنر أو ونجت أو الملك فاروق المصابين بالوسواس القهري المسمى ب( فوبيا المتمة) فليذهب أؤلئك إلى حيث ينتمون ) سقط متاع.

Advertisements
تعليقات
  1. ياسين شمباتى كتب:

    الحبيب ابوشقرود..سلام..
    عليك الله شيل نصيبك وريحنا بس!! لكن ما بالغت معاهم!
    يعنى هم وكت يسووا دا كلوووووو الانفصال تانى فى شنو؟؟ياخى فوبيتهم دى مزمنة ولا علاج لها عند اهل اطب والمداواة,وانما الموت هو الافضل لهم والانفع لنا..اسال الله ا نيبيدهم ويهلكهم كما اهلك عادا وثموا فما ابقى..

  2. ياسين شمباتى كتب:

    هذا ما كتبه الاخ الصديق/ عبدالناصر :

    البقرة امينة وحلابة

    للناس الفي بطن الصحراء

    للساكنين في نص الغابة

    وما بتتغابا

    البقرة امينة ومسكينة

    الضرع المليان بالبركة

    لا بترفس لا بتعمل حركة

    الناس التحلب في البقرة

    ايييك يا اخوانا كتااار كتره

    البردان ضارباهو المطرا

    الوكسان ويرز من الفترا

    رضعوها رضع

    رضعوها رضع

    والقالو شبع لسه مكنكش

    تسمع لسع

    يا زول لسع

    اصبر وارجع

    باكر ترضع

    قول يا الله

    البقره معاك في ها الحلة

    الشفقة تطير

    اوعا تكابس

    وشطورا ملانات البقرة

    مافيهن فد شطرن يابس

    الشفقة تطير مافيش داعي

    خليك انسان راقي وواعي

    المغسة بتنصحني وترضع

    انا مريووق انت آب تسمع

    انا مزنوق بي كووم شفع

    انا داير فد رضعه وانجع

    البقره آزول مش عندنا فيها؟

    انا بزعل بمشي بخليها

    يا بينا السيف بينا الدرقا

    تب ما معقول

    الضرعه حداك وانا حدي المرقه

    ما داير تدينا معاك فرقه

    امشي واخليك

    لا لي لا ليك

    هذي الشخته اوعا تعديها

    العجلي الوالداها البقره

    براي بربيها

    اوعاك تتحاوم تالاها

    ما عندي ملامة

    بزرعلك جمبها كجامة

    ما عندي ملامه انا حذرتك

    ما دام مسنود بي مقدرتك

    انا زاتي مخدر ضرعاتي

    وخسارة تفرقنا البقرة

    لا راضي امي ولا حتى ابويا

    الفيك اتعرفت يا اخويا

    البيني وبينك هذا شخيت

    اوعاك تتعدا

  3. أبو شقرود كتب:

    الأخ شمباتي
    قال ابوشقرود
    : وإتعدي الخط وقال عيييييك
    وجفن ضرعات البقرة
    البقرة آزول تعبت
    أوعاك تخلبها تفطس
    والحقها آزووول بالسكين وشيلها بالدين للناس الزارعين
    والما زارعين
    أمسك أقطع
    أمسك أقطع
    والفاس نازل طالع
    طالع نازل
    والباقي كوارع
    وواحد
    في عضم المقرشة بصارع مدا لأخوه
    قشة ينضف ما بين سنين
    ودا كل الباقي من زكري البقرة

  4. ياسين شمباتى كتب:

    ابوشقرود..
    والله انتهيتوا من البقرة تب!!
    حسبى الله على من ظلم البقرة واكلها وافترى على مولودها المسكين…..

    لكن عليك الله كتر لينا من الزى دى..وخليك قريب يا حبيب..

  5. التركــــى كتب:

    الأخ أبو شقرود
    وانا اضم صوتى لصوتك محتاج لنصيبى من البترول ومافوضت حد بالتنازل عنه أبدا … ياخويا يكون الناس دى ماعايزه دمغة السودانين كسالى تثبت علينا عشان كده ماعايزين يعملو مدارس ومستشفيات قريبة من مناطق السكن …. لكن حكاية القذافى دى بالغت فيها يعنى عايز الناس دى يقعدو زيو اكتر من اربع عقود عشان يقسمو لينا نصيبنا من الدهب الأسود …. والصمغ دا ياخوى حتى اسمه عايزين نغيرو من الصمغ العربى للصمغ السودانى عشان يلحق الفول … لك التحايا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s