يا ناس ناها والناها ملاله

Posted: الأحد,9 يناير, 2011 by عزت in اخرى

الناس في شنو وناس الناها في شنو…. والله كتر خيرها الدبلوماسية الناعمة التي أفرزت شعراء من السودان يقولوا لي قيس بن الملوح انت شنو…. ويدفعون الى المحافل الدولية بفن جديد هو الغزل الدبلوماسي… والغريبة جاراهم شاعرا من موريتانيا فدمج أبياته مع ابيات السوداني وتكسروا فيها سوا….

حيّ الميامين من شنقيط والناها *** قم حيّها بحبور حين تلقاها
واحضن بها عبق التاريخ تحمله *** من أرض شنقيط فيّاضا وموّاها
وانثر لها الورد في الخرطوم إن لها *** ربعا وأهلا هنا تاقوا للقياها
وللورود هنا سفن وأشرعة *** بحبّكم كان مجراها ومرساها
بل أنثر الدرّ كي تنصف فيا أبتي *** إن الورود قطوف من محيّاها
الطير غرّد أشجانا وقافية *** كتبتها وأنا ، إنّا كتبناها
لما أتانا الأُلى إنّا نجلّهمو *** تراقص القلب تيها بعد إذ تاها
وفاض كالنيل بالأشواق مجلسنا *** ودثّر النفس باللقيا وزكّاها
وصفّق الموج بالنيلين مزدهيا *** وفاح عطر شذيّ إذ ذكرناها
أحبابنا الشوق للسودان يسبقنا *** شنقيط نحوكمو حثّت مطاياها
وللشناقيط في كل القلوب هوى *** شقائق الروح بل أسمى سجاياها
النبل والكرم السودان موطنه *** هنا حصون تصون العز والجاها
تفطرت كبدي من بينهم زمنا *** واليوم جاؤوا فيا سُعدي وبُشراها
جئناكمو نقتفي آثار من علموا *** أن المواطن أسماها ثريّاها
فلو درت إذ أتت ما يحملون لها *** بين الجوانح من حُبّ لأغناها
لم ننس حضنكم الرحب الفسيح لنا *** نُسقى به من عذاب الكرم أحلاها
إن أسدت الدنيا في أيامنا هبة *** فلا أرى غير أنّا قد عرفناها
يا قبلة المجد سودان البشير وهام العز من ولد العُليا وسمّاها
فإن عجبت فلا تعجب لما جمعت *** إن الأصالة مأوها ومرعاها
لو تطلبون مزيدا من قصائدنا *** في وصلكم لكتبناها وقلناها

ديوان الناها لم يعد مجرد قصيدة واحدة في وزارة الخارجية، فقد تحول على ما يبدو إلى ديوان شعر كتبه سفراء السودان … وذلك الغزل الدبلوماسي’’ بحسب رأي الكثيرين من دون شك لا تخدم قضايا التنمية والسلام في جنوب السودان ولا في شماله…. علة واحدين قالوا صدق السودانيين…. فهل فعلا صدق ناس قيس الجدد…

Advertisements
تعليقات
  1. أحمد الفاضل كتب:

    ألأخ عزت
    تابعت بشغف ديوان الناها الدبلوماسي
    وكتبت بوست في أكثر من موقع بعنوان بعيدا عن الأخلاق اندياح دبلوماسي جميل
    لأن سفرتءنا فعلا أبدعوا فيما جادت به مشاعرهم تجاه الناها وما قصرو معاها

    وإليك أحد الرابط
    http://sudaneseatline.com/vb/showthread.php?t=7224

  2. ولمن يود معرفة الشمار وسبب الحنك الفوق ده يقرا القصة التحت وبعد داك يمتع عيونو بالصور التحت خالص :

    أعاد سجال شعري “طريف” بين شعراء سوادنيين وموريتانيين، حول وزيرة خارجية موريتانيا الناها بنت مكناس؛ الجدل حول السيدة التي كانت أول امرأة تتولى وزراة الخارجية الموريتانية.

    فقد ارتفعت أصوات داخل موريتانيا للمطالبة بإقالة “رائدة الدبلوماسية الموريتانية الناعمة”، بعد أن دبج شعراء من السلك الدبلوماسي السوداني قصائد غزل في جمال الوزيرة التي بالكاد تتجاوز الأربعين.

    وبدأ الغزل السوداني بقصيدة لمسؤول رفيع المستوى في وزارة الخارجية السودانية، هو عبدالله الأزرق، الذي انبهر بجمال الوزيرة الممشوقة القوام فضلاً عن ابتسامتها الساحرة التي تكشف عن أسنان جميلة. ويعرف عن بعض المشارقة في موريتانيا حبهم للموريتانيات بثيابهن المحتشمة وأجسادهن الممتلئة.

    شعر الأزرق ألهب شعراء آخرين من السودان نسجوا قصائد شعرية في فن النسيب الدبلوماسي، من بينهم عمر الذهب، ومحمد الطيب قسم الله، وفضل الله الهادي.

    ويبدو أن كتابة الشعر شغلت هؤولاء الدبلوماسيين، ربما لبعض الوقت عن تعقيدات ملفات التعاون الثنائي والتبادل التجاري. إذ أمضى السفراء وقتهم خلال آخر زيارة للوزيرة الموريتانية في التعبير بلغة الشعر عن ترحيبهم بقدوم الوزيرة.

    وبما أن الشعر هو أكثر الأجناس الأدبية انتشاراً في موريتانيا، وجد شعراء السودان ضمن الوفد الموريتاني من يحسن قرض الشعر، باباه ولد سيدي عبدالله الناطق الرسمي باسم الخارجية الموريتانية والمرافق الدائم للوزيرة في مهامها الخارجية، حيث رد بأبيات ظريفة أشاد فيها بأهل السودان وأجمل فيها القول في الروابط التاريخية العريقة التي تجمع بين البلدين دون أن يبدي بلغة دبلوماسية محسوبة استياء من الغزل الرسمي السوداني الفاضح، كما وصفته صحف محافظة في العاصمة الموريتانية نواكشوط.

    وأشاد الشاعر الموريتاني المعروف محمد فال ولد محمد حرمة بشاعرية الشعراء السودانيين واعتبر أنهم، عندما يتغنون بالوزيرة، فهم بذالك يتغنون بموريتانيا. وقال إن إرثاً حضارياً وثقافياً مشتركاً يجمع بين البلدين. ووجد في القصائد الغزلية فرصة للتواصل بين النخب السودانية والموريتانية وخاصة الأدبية منها والفكرية.

    ومع أن بعض القصائد السودانية خاطبت الوزيرة بأسلوب غزلي تقليدي كما هو شائع لدى شعراء العرب الكلاسيكيين، إلا أنها خاطبت أيضاً، عبر الوزيرة، موريتانيا وأهلها واستحضرت تاريخ العلاقات بين البلدين والتشابه في التقاليد والعادات، ولو بلغة غزلية هيمنت عليها تعابير الشوق والوجدان والحب والفراق والقرب.

    غيرة على الوزيرةفي المقابل، أثارت بعض المقاطع الشعرية حساسية شديدة لدى اتجاهات متزمتة من النخبة الموريتانية بعضها ذو ميول إسلامية. إذ يرى الشاعر الموريتاني محمد ولد عبدالله أن الشعراء الدبلوماسيين نسوا واجب التحفظ عندما بهرهم جمال بنت مكناس، ليسقطوا في غزل فاضح شبهوا فيه زيارة الوزيرة إلى الخرطوم بضوء الصبح.

    وانتقدت صحيفة “السراج” الموريتانية لسان حال التيار الإسلامي، دبج شعراء ينتمون للخارجية السودانية قصائد في التغزل بالوزيرة الشابة، ورأت في الغزل السوداني خروجاً على الأعراف الدبلوماسية، واعتبرته تصرفاً غير لائق ومهين، ورأت في المسألة رؤية دونية للمرأة التي جاءت تمثل بلدها.

    وطالب مدونون موريتانيون الرئيس محمد ولد عبدالعزيز بالغيرة على الوزيرة المتغزل فيها، وتجسيد ذالك بإعفائها من منصبها ومنعها من السفر خارج البلاد.

    وقال أحد المدونين غاضباً إن العرب “لا يرضون بتشبب أحد ببناتهم، وكانوا يمنعون من يعرفون أنه تشبب بهم من رؤيتهم”. وأضاف “على الرئيس ولد عبدالعزيز أن يمنع شعراء السودان من رؤيتها مستقبلاً بعد هذا الغزل الفاضح والمشين”، حسب تعبيره.

    لا تعليقورفضت بنت مكناس التعليق على السجال الشعري، وقالت إنها لا تريد التعليق على الموضوع عندما اتصلت بها “العربية.نت”، قبل منتصف ليل الجمعة إلى السبت عبر مساعدتها وشقيقتها أمينة بنت مكناس.

    وتنتمي الناها بنت مكناس إلى عائلة سياسية موريتانية عريقة، وقد درست علوم التسيير في فرنسا، وعملت موظفة في مصارف قبل أن تنخرط في العمل السياسي والدبلوماسي، لتصل إلى البرلمان والحكومة، وهي من منطقة الساحل الموريتاني التي تشتهر بجمال بناتها الصحراوي.

    والناها هي كريمة رائد الدبلوماسية الموريتانية الراحل حمدي ولد مكناس، الذي كان آخر وزيرخارجية لموريتانيا قبل أن يبدأ حكم العسكر والتداول على السلطة عبر الانقلابات في يوليو ١٩٧٨.

    ورثت زعامة حزب سياسي يحظى اليوم بتمثيل في البرلمان والمجالس المحلية بعد وفاة والدها، وعينت وزيرة للخارجية مكافئة لها على دور حزبها الاتحاد من أجل الديمقراطية والتقدم في دعم الانقلاب الذي أطاح بالرئيس السابق سيدي محمد ولد الشيخ عبدالله في ٦ أغسطس/ آب ٢٠٠٨، لتعود إلى الحكومة من نفس البوابة التي خرجت منها هي ووالدها.

    وفي يوليو/ تموز ١٩٧٨ فقد حمدي ولد مكناس منصبه وزيراً للخارجية إثر انقلاب أطاح بنظام أول رئيس للبلاد الرئيس الراحل المختار ولد داداه. وفي أغسطس/ آب ٢٠٠٥ فقدت الابنة هذه المرة منصبها وزيرة مستشارة في الرئاسة، بعد إطاحة الجيش بالرئيس الأسبق معاوية ولد الطائع اللاجئ حالياً في قطر.

    وفي يوليو/ تموز 2009، اختارها الرئيس الموريتاني محمد ولد عبدالعزيز لتولي وزارة الخارجية في أول حكومة أعقبت رئاسيات. أثار ذالك التعيين حينها جدلاً في المجتمع الموريتاني المحافظ وموجة انتقادات واسعة وصلت إلى منبر جامع نواكشوط الكبير، حيث لم يرق تكليف سيدة برئاسة الدبلوماسية الموريتانية لإمام الجامع ومفتي موريتانيا الشيخ أحمدو ولد لمرابط، الذي أفتى بحرمة سفر الوزيرة بدون محرم، منتقداً جولاتها المكوكية خارج البلاد وأسفارها الكثيرة.

    ولفتت وزيرة خارجية موريتانيا الانتباه إليها في المحافل الدولية بقامتها الفارعة وأناقتها المميزة رغم احتشامها وتدثرها دائماً في ملاحف تقليدية تختارها من فئة الألوان الزاهية انسجاماً مع موقعها المرموق الذي يفرض عليها الاعتناء قليلاً بشكلها.

  3. والصورة لمن يود الاستمتاع بالجمال الموريتانى

    الوزيرة

    وتانى

    وتالت

    ولناس كده

    ودى مخصوص لناس اصحابنا

  4. عزت كتب:

    شكرا يا احمد الفاضل على الرابط وشكرا يا استرايكر على المعلومات والصور التي كملت المقال…. والتي خفت من عرضها خوفا من اتهامي بتهمة عرض مواد ملتهبة…. !!

    عموما طبعن أخوانا الدبلوماسيين ديل لمن شافوها بالتوب والقوام الشرقي وكمان بتاع موريتانيا دا عندو زوائد حبتين فتذكروا حاجات تانية حامياني… وطبعن هي لو كانت سودانية ما كان في مشكلة اذا يعرف الانقاذيون كيف تضم الى اسطولهم.. كان بقت فتاة والا عذبة وحتى كان بقت متزوجة… ا بعيد يودوا راجلا في متحرك يجيبوا خبرو… بس لأنها بعيدة المنال فاقمت طلعت الكوامن الشعرية المتدفقة… وما براهو الشاعر الأول فقد تلاه شعراء آخرون…. نعرض لهم بعدين..

  5. عزت كتب:

    والشاعر التاني قال:

    وأخبر القوم أن السُقم أوهنني *** وليس يبرئني إلا أن القاها
    وردتُ من فرط عشقي موردا خطرا *** وزيرة من وزير، كيف نُجزاها؟
    هي المواجع قد ثارت مهيّجة *** من لي بصبر فأسلوها وأنساها
    قد كان لي العيد عيدا زاهيا نضرا *** حتى أصبت برشق من محيّاها
    فعادني الهمّ أضعافا مضاعفة *** صريع فاتنة تلهو بصرعاها
    أهداني البين ليلا حالكا ضجرا *** يحار في لجّه النجم الذي تاها
    فليس يعقبه صبح أضيء به *** وجه المودة جزلى ليس إلاّها
    يؤرّق الطرف من شنقيط متشح *** بالزهر طيف أتانا من صحاراها
    مرحى ومرحى به من زائر عجل *** يهفو له النيل صخّابا وأوّاها
    إن كانت السين والصاد قد وحّدن موقفنا *** فإننا من قبيل مُتلد جاها
    مضمّخ في تراث خالد عبق *** كل المكارم صُنّاها وحُزناها

  6. ودالخلا كتب:

    سلام ياقبيلة،،،
    دوك عزت واسترايكر،بالله عليكم الصورة (side view) الأخيرة دي براها مش تستاهل ليها مُعَلّقة، ،،

  7. ودالخلا كتب:

    دوك عزت أليس هؤلاء الشعراء الدبلوماسيين هم أبناء ذلك الفذ الشاعر الفطحل محمد أحمد المحجوب الذي قال في الأندلس المفقود ما لم يقله غيره من شعراء العربية، وألم يقل في قصيدته الغزلية الشهيرة (فلسفة القُبل) ما لم يقله المنخل اليشكري في محبوبته، تقول لي كلام الأزرق والدندر والرهد مالو؟؟؟

  8. aflaiga كتب:

    عزت : الله يجزيك مرقتنا من ساس يسوس لساس يسوس اكثر نعومه .
    دى حالتا وزيرة الخارجية طيب الداخليه كيف ؟؟

  9. عزت كتب:

    عارفين يا أحباب بالرغم من أن بعض الأبيات خاطبت الوزيرة بأسلوب غزلي تقليدي كما هو شائع لدى شعراء العرب الكلاسيكيين، إلا أنها خاطبت أيضاً، عبر الوزيرة، موريتانيا وأهلها واستحضرت تاريخ العلاقات بين البلدين والتشابه في التقاليد والعادات، ولو بلغة غزلية هيمنت عليها تعابير الشوق والوجدان والحب والفراق والقرب.

    لكن ذلك لم يعجب بعض الموريتانيين وطالبوا ولد عبد العزيز رئيسهم ان يغير عليها ويقيلها وبلاش حكايات السفر بدون محرم….

    وواحدين قالوا المرأة الأربعينية دي عجبت السودانيين في شنو….. الظاهر الما عارف يقول عدس…..

    شوف العارف الثالت دا قال شنو :

    ناهٍ نهاك من الدنيا عن (الناها) *** يا ابن القوافي أن تشقى بذكراها
    لم يفتأ (الأزرق) الخنذيذ يذكرها *** حتى حسبت جميع الناس أسراها
    فهي الجمال فلا شمسا ولا قمرا *** وهي الجلال فلا قصرا ولا شاها
    إن الليالي ضاءت عند طلعتها *** ضوء اللآلئ يبدو من ثناياها
    العين تسبقها والأذن تلحقها *** واللُبّ يعشقها والقلب يهواها
    أمّا اللسان فيسمو حين ينطقها *** أمّا الجَنانِ فيصفو حين يلقاها
    تواضعت شرفا في عرش سلطتها *** فالعُرف يأمرها والعز ينهاها
    راحيل شنقيط أم تاجوجها اكتملت *** فيها المحاسن معناها ومبناها
    الجن تحسد أهل الإنس قاطبة *** أن صاغ من نسلهم إلهنا( الناها)
    وأقسم الحُسن في معراج سدرته *** أن المحاسن في شنقيط مسراها
    والعلم والحلم والإيمان مجتمعا *** والشعر والفكر والسلطان والجاها
    لعل شعري من السودان يبلغكم *** أهلي الشناقيط حيّاكم وحيّاها
    يحيا به الودّ آلافا مؤلفة *** في الدولتين وحيّا الخير( باباها)

  10. ودالخلا كتب:

    دوك عزت قلت الما عارف بيقول عدس، والعارف بيقول شنو؟؟
    آه ياشفاه كلها ضحك وهمس وأبتسام
    آه لصمتٍ حواكِ فحوي كل الكلام
    …………..
    حُمرة بالخد آذاها العبير تتظلم
    قصة في العين والصمت المثير تكلم
    ……………
    سوف أروي نار قلبي أنه قسم عليّ
    يا نادامي أملئوا الكأس وأديروها عليّ
    ان خمري في شفاها وأن كأسي شفتيّ
    ……………

  11. ابكرون كتب:

    ههههههههههههههه
    لكن يا عزت واسترايكر وودالخلا لقيتكم (مؤنهين) شدييييد في الناها……
    هههههه ياخ اسمها ساي يرمي ويسوى آهة
    لكن عندها الشنقيطية صور اخري تقول للسايد فيو بتاعة ود الخلا (انا يا هون ديه)
    ود الخلا : (سلام ياقبيلة،،،
    دوك عزت واسترايكر،بالله عليكم الصورة (side view) الأخيرة دي براها مش تستاهل ليها مُعَلّقة، ،،)
    هو كسير الضلع ده كيف….؟

  12. زووووووول كتب:

    دعزت وحيرانه سلاااام
    ماشاء الله طلعتوا كلكم دبلوماسيين ويا بخت وزارة الخارجيه بكم .
    بعدين بالمناسبه دى دايرين نعرف اكتر عن اخوانا الشناقيط ديل هههههههه .بالله اى زول عندو معلومه عن موريتانيا او عن عادات شعبها وتقاليده وطريقة السفر الى هناك (دا انا طلعت سكرتير خامس عديل كدا ) يدينا ليها على وجه السرعه .

  13. ابكرون كتب:

    بعدين يال زوووووول قالوا بريدن السودانيين شديد خالص
    وبحبن يشترن التياب من الخرتوووووم بالذات التياب الزي بتاعة مذيعات البلو نايل
    ويقال والعهده علي الراوي بزورن شاطي ابرووووف ماعارف ليه يمكن عشان يشوفن علايل ابروف

  14. عزت كتب:

    عارف يا الزووووول عشان تمشي نواكشوط لازم تطلع لا فوق حتين تنزل فتصور في 2005 دعتنا الأمم المتحدة لورشة عمل في عاصمتهم فاحترنا لطريقة أضانك وين وذلك عندما بدأت رحلتنا الى القاهرة ومن ثم الى روما لنستغل منها الطائرة الفرنسية الى موريتانيا فقد وصلنا ليلا الى روما وبعد “شمطة” أنزلونا في فندق بروما لنغادر منها صباح اليوم التالي الى موريتانيا….

    بقدر ما كانت المطارات التي مرينا بها عامرة بالحديث المثير الخطر بقدر ما كان مطار نواكشوط خاليا من تلك المظاهر فهو مطار عادي جدا لا يختلف عن مطار بورتسودان لدينا…. لكين ما حنينين وزي كانوا متأكدين اننا فترانين فصحونا باستقبال مهيب شالت مننا واحدة مرسلة من ناس الورشة (باسبورتاتنا) تقول (للناها) شنو….. تمشي كما يمشي الوجي الوحل ومن حتة لي حتة في المطار ونحن وراها تطق الحنك بالفرنساوي مع موظفي المطار وتعاين لينا وتقلبوا عربي… قربنا نقول ليها انت أمشي ورانا وشاوري لينا نمشي يمين شمال….. بس مافي فايدة المطار كلو (ناهات)…. أنقر ما صحينا وفتحنا عيونا زي الريال…. لمن مرقتنا برة وركبتنا سيارة للفندق….

    يشبهون السودانيين جدا في لبسهم عل توبهم منفوش شوية فضلا على التشابه الكبير لمنازلهم بمنازل ترب هدل وو سط بورتسودان و نفس الجو المتصحر … لكن مدينتهم و محلاتهم التجارية صورة مكررة لتلك التي في باريس رغم انني لم أزر الا مطار شارل ديجول في باريس عند العودة من نواكشوط فتخيل كان طريق العودة من نواكشوط الى باريس- دمشق و من ثم الى الخرطوم.

    أريتا رحلة السرور

  15. عزت كتب:

    بالله بمشن علايل اب روف

    عشان كدا العارف الرابع قال:

    ما كنت أعرف كيف الشعر لولاها *** حتى تبدّت ولاحت لي ثناياها
    فقلت برق بدا أم أنّ بي سنة *** أم أنّ ما كنت قد أبصرته فاها
    أم أنه النيل قد فاض الحنين به *** لمّا تهادت فماد النيل تيّاها
    يا بنت شنقيط حُزت المجد من قدم *** أهلوك كانوا لنا أهلا وأشباها
    أرم العداة بسهم اللحظ إن بعُدوا *** ( لطالما أبعدت عيناك مرماها)
    أهلوك قد قصدوا السودان من زمن*** فأخرجت أرضنا ماء ومرعاها
    سُقيا لعهد مضى والودّ يجمعنا*** والقصد شنقيط ما أحببت إلاّها
    من يُبلغ الأهل في شنقيط عن شغفي *** أو يُبلغ الناها أنّا قد ذكرناها
    أسائل الناس عن قلبي وأحسبه *** قد ذاب في حُسنها أو عند يُمناها
    وأسأل الله أن يرعى مودّتنا *** وهل يخيب عُبيد يسأل الله ؟
    لئن جرى النيل في سوداننا غردا *** سيذكر النيل شنقيطا وتقواها
    ويذكر النيل أهليها وكيف له *** أن ينكر الودّ أو ينسى مُحيّاها

  16. ياسين شمباتى كتب:

    غايتو جنس غايتو !!
    صديقى وليد يحيى كتب الاتى على جدار الفيسبوك:
    المزيعة:انا أفتكر إنو شوربة العدس مفيدة أكتر من تتعمل فتة.
    الضيف:حقيقة طبعآ لكن الفتة مع إضافة البصل الابيض ألذ وأطعم.. إنتهى…

    عليكم جنس حركات لكن يا عزت!!
    ودالخلا: سلام..والله الصورة دى فعلا جننتنى جن وما عرفت اقبل وين..اقبل وين آ ناس؟

  17. عزت كتب:

    ما براك الظاهر يا شنباتي الجننتك الصورة شايف سفيرنا من البعد (السنغال) لقط الصورة وأبي الا أن يشارك بقصيدة ليكمل الديوان الدبلوماسي قال فيها:

    يا أعينَ الخيلِِ قلبي اليومَ مُستلبٌ *** من سهم عينَيْ مهاةٍ كم تمنّاها
    فلا تُطِعْ فيهما قولَ الوشاةِ ودعْ *** ناهٍ نهاك عن التشبيبِ والنــــّاها
    سليلة المجد من شنقيط إنّ لها *** في شاطئ النيل روضاً بات يهواها
    أما ترى (الأزرقَ) الدفّاقَ كيف هفا *** وكيف صفّق نشواناً للقيــــــــاها
    وغرّد الطيرُ جذلاناً لمقدمها *** وعربدَ الشـــــــطُّ أزهاراً وأمواها
    وصاغ كلُّ أديبٍ في الهوى دُرراً *** تُسبي العقولَ فما العقّادُ أو طه
    تبعتُ شأنهمو في كلِّ ناحيةٍ *** كما (تتبّعَ عبدَ اللهِ) (بـــــــــــاباها)
    يا أهلَ شنقيط أنتم بيننا أبداً *** في حبّةِ القلب لم تخمُدْ حُميـــّاها
    فأنتمُ العلمُ والآدابُ قد جمُعتْ *** وأنتمُ الجودُ والأخلاقُ أسمــــاها
    وأنتم الدين قد شدتمْ دعائمَهُ *** فصار ثَمّ عزيزاً يحْـــــمد اللهَ
    واهدي السلامَ إلى الدلاّلِ ثمّ إلى*** عَدّودَ والدّدو والنّحْويَ والــدَّاها

  18. زووووووول كتب:

    ابكرون
    قلتا شنو آآآآآآآ عمك بريدن منوووووووووووو ؟؟
    د.عزت :
    لقيتك خترى للباطوس … بس شكلك صعبتها علينا خالس خالس لكن ممكن نقدم ليك تنازلات كدى شوف لينا لو فى طريقه نمشى ليها بالبر الجو دا ما بتهبش خسوسا مع زيادة اسعار وقود الطائرات

  19. يا ناس الزولة دى كل ملوك ورؤساء العرب مكسرين فيها وبحسب عملها كوزيرة خارجية فقد قابلت معظم الرؤساء ووزراء الخارجية :

    مع بتاع السعودية

    وزير الخارجية السعودي سعود الفيصل، قال خلال لقائه بوزيرة الخارجية الموريتانية، إن المملكة العربية السعودية ملتزمة بدعم موريتانيا في كافة المحافل، “وخاصة في اجتماع شركاء موريتانيا في التنمية”، مضيفا القول أن: “الزيارة تعتبر فرصة ثمينة لتطوير العلاقات الأخوية الموريتانية- السعودية، وتركيز النظر حول أفضل السبل للعمل في هذا الإطار”. مؤكدا أن “بإمكان موريتانيا التعويل على دعم ومساندة المملكة العربية السعودية”، وأن “الخير قادم بإذن الله، بما فيه مصلحة البلدين والشعبين الشقيقين”، فيما عبرت وزيرة الخارجية الناها بنت مكناس عن تقديرها “للدور الكبير الذي لعبته المملكة العربية السعودية الشقيقة في تنمية موريتانيا، وعن تطلع بلادنا إلى فتح صفحة جديدة في علاقات البلدين”. معلنة أن: “الأولوية في عهد الرئيس محمد ولد عبد العزيز ممنوحة لتحسين الظروف المعيشية للمواطن الموريتاني، وتمكينه من الإستفادة من خيرات بلده”، مضيفة أن “تحديات الفقر والجهل والإرهاب التي تواجهها بلادنا تتطلب مساندة ودعم الأشقاء في المملكة العربية السعودية”. مستعرضة أمام الوزير السعودي: “الفرص الاقتصادية الكبيرة المتاحة في موريتانيا أمام المستثمرين ورجال الأعمال السعوديين”، داعية المستثمرين إلى “اغتنام هذه الفرص والمساهمة في تقوية العلاقات الموريتانية-السعودية”.

    ومع بتاع سوريا

    وفى مقابلة مع تلفزيون روسيا

  20. اما الصور الاخيرة ودى مهداة خصوصا لناس ابكرونا – زوووووووووول – شنباتى – عزت – ود الخلا – افلايقا .

    وباقى الناس التاوقت ورقدت رز وماقدرت تقول شئ.

    الناها

    الوزيرة

  21. وفى الرابط ادناه سيرة زاتية وتتبع لمسيرة الناها فى السياسة الموريتانية ( لمن يريد )

    http://www.aawsat.com/details.asp?section=45&issueno=11497&article=570408

    الزولة دى بالمناسبة من مواليد 1965 احسيو عمرها كم اسا – واستلمت قيادة الحزب فى سنة 2000 . احسبوها بالله دى كم

  22. حنين كتب:

    والله يا إسترايكر الناس التاوقت وماقدرت تقول شى ديل نحن ظاتو …
    لكن داير أسألك سؤال فنى …لوداير أشيل لى صورة side view ,وأكوبيها فى حنانى وأعمل نايم ….أها كييييف ؟

  23. زووووووول كتب:

    احسن تعمل نايم يا حنين .
    ويا سترايكر هديتك مقبوله وان شاء الله نهدى ليك فى السمح آآآ بوى .
    بث (بلاثاء ) دايرين مزيد من الهدايا وبالله خلينا من كلام عزت بتاع باريس دا ورينا طريقة السفر كيف والتكلفه كم وبعد داك خليها علينا هههههههه

  24. نيام كتب:

    محول لشارع الشنقيطي لاجراء الاستعارة اللازمة قف. يعامل بالسعر القديم.

  25. زووووووول كتب:

    هههههههههه شنو يا نيام ما تعمل لينا بيت بيتين ونشوف ليك طريقه فى الدبلوماسيه السودانيه

  26. علي سنكل كتب:

    يا الزووووووول ما شي لي شنو؟ هم ظااااتم و لا سمحين و لا حاجه. حسه مكناس دي سمحه؟
    بعدين يا أبكرون بشار قال شاطئ اب روف دا ببيعو فيهو الطلح والسباغ !

  27. يا حنين يا حنين انتا اعمل كليك يمبن والماوس جوا الصورة واعمل سيف از – وبعد كده لصقا فى الحتة الدايرا.
    سنكلونى السباغ ده ماادونا ليهو لكن التانى بنعرفو ( البوست ده ح يمشى الخور بطريقتو دى ).
    اشرح وورينا – ولو صعبا رسلا فى الخاص. لووووووووووووووووووول

    زووول ماتعصر على نيام شديد – عمك ده قليبو تعبان ويادوب بعمل فى ريهبتشين من تسليك – كده بتردمو تااااااانى.

    هههههههههههههه

    ونختم بالجميل دايمن

    وتانى

    وانت عدتم عدنا

  28. علي سنكل كتب:

    ما تقول يا استرايكر قال ليك بعد دا يا داب حيتم تطبيق شرع الله في السودان.
    لكن شيل شيلتك لو بدت حتبدأ بالخارجيه ، بعدين ناس عزت و إنت و أبكرون والزووووووول ، ودالخلا حيجيبوهو شاهد ملك.

  29. ياسين شمباتى كتب:

    الحبيب استرايكر..سلام..
    هديتك مقبولة,,لكن ناس موريتانيا ديل طلعوا شفتين خلاس,اسه دى تمشى اى محل ما بكسروا ليها كلمة..
    بعدين السباغ ما ادوك ليهو!؟ انت لازم تعيد الحصة دى تااااانى ! امممممممممممممممم..

  30. نيام كتب:

    زوووووول:
    ودي تتكتب ازاي دي يا مرسي…
    كنس اللوا بين الدحول فحومل
    مشتاقة تسعي الي مشتاق
    عزت:
    والله الموريتانيين ديل كانو دايرين ليهم واحد سلفا يوريهم الادب …هسع التوب دا ابوقجيجة و لا الخرتوم بالليل..شكلو كدا زي امسك نفسك…

  31. زووووووول كتب:

    الصوره شكلها ما ظاهرا ليكم لكنها للسيده الناها مع وزير الخارجيه الاسبانى صاحب السبعين خريفا والذى تجاوز مرحلة الشيب والكرمشه تماما ولم تعد فى راسه سبيبه سوداء ولا حتى بيضا وتقولى شنو تقولى منو .
    وان عدتم عدنا ههههههههههههههههههههههه

  32. حنين كتب:

    عمنا نيام .والله كلامك صاح أسى دى أجمل هى ولا وداد .

  33. ودالخلا كتب:

    أبكرون ياصديقي يا عاشق النجيمات البعييييدة زي الناها وما الناها لمن يتمناها!!!
    عليك الله شوف مسحة الشجن الأليم علي هذا الوجه الصبوح، وكيف أنه وقد كساه الحُزن الدفين، حاجة تفطر القلب مش كده؟؟ يا ربي ده يكون من شنو ؟؟ كدي يا شمباتي يا عاشق الأوتار أفتينا، غايتو انا بوديه لجحيم (الوحدة) ومفارقة الشمال أقصد الأحباب!!!!!!!!!

  34. مشاكل كتب:

    سلامز
    غايتو يا دوك عزت عرفت تطلع الناس ديل و تنكتهم من وين ما عارف
    اتاريهو كل الناس ( قبل 1965 ) مدشدشين و صليبهم طالع
    انتو يا جماعة ما وراكم عواطفات ولا شنو ؟؟
    الغريبة حاج السلاوي لي اسي ما ظهر
    يكون بكتب في قصيدة ولا شنو ؟؟

    شمباتي .. الزولة دي اصغر منك بي خمس سنين بس .. فكفك نفسك يا حبوب و ألحق روحك

  35. مُخير كتب:

    أبو عصمت والحبان سلام
    ديشكم يعني كان ممكن تفوتنا عجاجة الناها، لكن الجرسلين ما عندكم يا بني وطني، ليهم حق الجنوبيين كان فرزوا عيشتهم منكم، هسة ده كلو عشان الحاءين (حلا وحمار) طيب والكاكاو مالو ؟
    يعلم بعضكم أن لي صلة رحم مع الموريتانيين، ولدي عيال خالة شناقيط أقحاح، وقُدر لي زيارة نواكشوط بعد أبكرون، في رحلة عمل رسمية في إبريل 2007م، وحدثت لي حينها واقعة طريفة جديرة بالسرد، فبعد إستقبالنا عبر قاعة كبار الزوار وإستضافتنا في الفلل الرئاسية، إكتشفت في اليوم الثاني أنه لم يتم وضع ختم الدخول في جواز سفري، وهرعت إلى أحد المسئولين لافتاً نظره إلى المشكلة، فإذ به يرد بإبتسامة عريضة أن البلد بلدي وما يحتاج!!، وطبعن أسقط في يدي بل هي مصيبة بالنسبة لي (لمن يعرفون مكان إقامتي)، فأنا مطالب بتوضيح أماكن سفري أين ذهبت ومتى عدت والدليل فقط الأختام الرسمية، على كل حال حفيت إلى أن تم الإقتناع بتلبية طلبي وإرجاع تاريخ الختم إلى موعد وضولي، غير أن الشهادة لله الموريتانيون أهل كرم وسخاء وحفاوة حقيقية، ومما لاحظته خلال زيارتي أنهم استوعبوا الدرس وأتاحوا الفرصة كاملة للمواطنين من أصول أفريقية في تبوء مناصب هامة ومنحهم ما يستحقونه من اهتمام احترام الأمر الذي من شأنه أن يُقلل ويزيل مع مرور الزمن أي بقايا إستعلاء عرقي سابق، كما لفت نظري أن النساء عندهم لا يصافحن الرجال، وأنهن يتمتعن بقوة شخصية وإستقلالية تفرض إحترامهن.

  36. نيام كتب:

    مخير:
    الشعب الموريتاني شعب مثقف و اديب و رائع و هو يشبه الشعب السوداني في كثير من مناحي الحياة و في العادات ايضا..

  37. ودالخلا كتب:

    الأمير مخُير لك التحية،،
    يعني هسي خلاصة كلامك ده كلو أنهن لا يصافحن!! طيب شن فايدت القصائد وأنهار الشعر المجدولة التي أنسكبت ينابيعها دفاقة غمرت الصحاري والقفار اليباب، والناس كانت تؤمل في شئ من حتي، ولا حتي…..
    أها يا دوك عزت دي الكنت راجيها من زمان راحت في منتهاها ويا حليل زمن الجهل، وهل من عودة هل؟؟؟

  38. مُخير كتب:

    شاعرنا الفحل نيام يبدو لي أن ما سطرته من إعزاز للشعب الموريتاني يبرر عدم كتابة قصيدة في مزاياهم أو حتى رسولتهم، وبذكائك تدرك أن موريتانيا بلد المليون شاعر ولن تبيع ماءً في حارة السقايين ههههه

    القبيلة ود الخلا ماهو ذاتو البجنن بوبي، الحشمة وعدم المصافحة والجدية بتولع نيران البكايين، ما هناك عشرات المئات من الحسان والغواني السافرات المتبرجات الكاسيات العاريات ولم يكتب أحد فيهن سطرا، الدُر المكنون هو البيشعل نار الجنون، ولو ود الملوح أخذ وجهة نظر وكثير كيس عزة لغابت دُرر الغزل من ديوان الشعر العربي.

  39. نيام كتب:

    مخير:
    انا اعلم ان اهلها اساطين شعر و لكن لعلك ترضي بالقليل
    هيفاء ناعمة مصقولة العود
    تمشي منمقة مشي الاناشيد
    في حبها هام آل مسعود
    ضنينة كانت اصيلة الجود

  40. ودالخلا كتب:

    تعرف ياصديقي مخير، أكثر ما يثير الشجون ويهيج المتون ويجعلهم نشوي الجمال المسحور وصرعي العيون الحور هي حشمتهن وعفافهن وحياءهن، وهذه الأشياء التي لا تُشتري بالمال، هي التي تثير الشعور وتبعث الشِعر حيا، أما التبرج والتبذل والسفور فهو الذي يجعلهن محتقرات مهما ظنت الواحدة أنها محط الأنظار فهي عكس ذلك تماما”!!!

  41. ابكرون كتب:

    اها الشعب الموريتاني زعل وطالب البرلمان باقالتها لانها اعطت السودانيين فرصة يتغزلوا فيها وما بعيد زوجها يطلقا …. (طالعوا النت والاخبار) غايتو عالم بكايه بشكل ……!

  42. ابكرون كتب:

    كتبت الاتحاد الأماراتية :
    —————————

    وانتقدت صحيفة “السراج” الموريتانية لسان حال التيار الاسلامي، قصيدة في التغزل بالوزيرة الشابة ورأت في الغزل السوداني خروجا على الأعراف الدبلوماسية واعتبرته تصرفا غير لائق ومهين ورأت في المسالة رؤية دونية للمرأة التي جاءت تمثل بلدها.

    وطالب مدونون موريتانيون الرئيس محمد ولد عبد العزيز بالغيرة على الوزيرة المتغزل عليها وتجسيد ذالك بإعفاءها من منصبها ومنعها من السفر خارج البلاد.

    وقال احد المدونين غاضبا ان العرب “لا يرضون بتشبب احد ببناتهم، وكان يمنعون من يعرفون انه تشبب بهم من رؤيتهم”، وأضاف “على الرئيس ولد عبد العزيز ان يمنع شعراء السودان من رؤيتها مستقبلا بعد هذا الغزل الفاضح والمشين” حسب تعبيره .

    واثارت بعض المقاطع الشعرية حساسية شديدة لدى اتجاهات من النخبة الموريتانية بعضها ذو ميول اسلامية. إذ يرى الشاعر الموريتاني محمد ولد عبد الله ان الشعراء الدبلوماسيين نسوا واجب التحفظ عندما بهرهم جمال بنت مكناس، ليسقطوا في غزل فاضح شبهوا فيه زيارة الوزيرة الى الخرطوم بضوء الصبح.

    ورفضت بنت مكناس التعليق على السجال الشعري، وقالت انها لاتريد التعليق على الموضوع عندما اتصلت بها “العربية.نت”، قبل منتصف ليل الجمعة الى السبت عبر مساعدتها وشقيقتها أمينة بنت مكناس.
    ———————————–
    كسيرة : يا ربي أمينة بنت المكناس كيف ؟؟؟؟؟؟؟

    اقرأ المزيد : مطالبات بإقالة وزيرة موريتانية تغزل بها مسؤول سوداني – جريدة الاتحاد http://www.alittihad.ae/details.php?id=2606&y=2011#ixzz1AubKkeH7

  43. عباس ركس كتب:

    يا ربي القصة دي ممكن تصل لي اوكامبو ؟؟؟؟؟؟؟؟؟

  44. ياسين شمباتى كتب:

    مشاكل..
    اجيك ؟؟؟

    مخير..
    والله الجمتنى طباعهم وما حكيت عنهم,هل هم بشر مثلنا !!؟؟

    ابكرون وود الخلا..
    والله خجلنا فعلا,,يعنى المرة فى صمة خشمها راح يقيلوها ؟؟

    ركس..
    امممممممممممممم

  45. ودالخلا كتب:

    شمباتي يقيلوها ونحن قاعدين نسوي شنو، كدي خليهم اليقلوها علي النعمة نجيبها ليك رئيس وزراء عديييييل كدة مش وزير خارجية،،،
    قال دايرين يقيلوها قال..
    هييييع أخوك ياالسُرة وكت الخيول أدبكن!!!!!!!!!!!!!!

  46. ياسين شمباتى كتب:

    ود الخلا..
    عليييك الله جيب لى رئيس جمهورية! وى..
    غايتو جنس غايتو !

  47. التركــــى كتب:

    وأنا بقول التجانى كرموه فى القصر ليه ليلة راس السنة ؟؟؟؟ …. ياخوانا دى شفافية الدبلوماسية السودانية ….. الفى قلوبهم على لسانهم عشان كده زياراتنا بتكون نتائجها معروفة قبل وصول الوفد حتى …. هسع فى ذمتكم بنات مساء جديد مايقولن ليها اقعدى بهنا …. جنس حب تملك غايتو

  48. سهيل كتب:

    كشششششششششششششش .. دشدشه لمن بهناك يا عمك ..

    معليش يا اخواننا باين علي كنت نايم .. لكن كان بوستاتكم فيها زي دا حنلصق ليكم في حنان حنانكم و حنان حنين ظاتو معاكم ..

    جرجر التوب وفارق الزمن يلا يا اخوانا نادو لي فلان .. تعبان انا .. نادو لي فلان .. عيان انا .. نادو لي فلان ..

    بالمناسبه ياعمك .. وين ناس نونو وناس لالا و ناس كوكي .. نادوهن لي و قولو ليهن ناس ناها جن.

  49. زووووووول كتب:

    تاااااااااااااااااااااااااااااااااااااااااااااااااااانى
    ——————————————————————————–

    ( منقول )
    قام الرئيس الموريتانى محمد ولد عبد العزيز باقالة وزيرة خارجيته الناها بنت مكناس لتاييدها للقذافى

    الاسبوع الماضى قرأت خبراً من موريتانيا فحواه ان الرئيس محمد ولد عبد العزيز اصدر قراراً بعزل وزيرة الخارجية الناها بنت مكناس من منصبها، وتعيين وزير الدفاع حمادى ولد حمادى خلفاً لها. اول ما خطر ببالى هو ان يكون القرار نتاجاً لتداعيات القصائد الغزلية السودانية. ولكن اخباراً رشحت من هنا وهناك أفادت بأن الرئيس ولد عبد العزيز أقالها بسبب تعاطفها وموالاتها للعقيد القذافى، وتورطها فى تصريحات ومواقف أظهرت موريتانيا وكأنها تعاضد القذافى وتقف بجانبه فى محنته الراهنة، وهو الامر الذى رأى الرئيس انه لا يتفق مع مصالح بلاده العليا.
    وقد تناهت الىّ على الفور أنباء من الخرطوم تفيد بأن أقالة الوزيرة أصاب عدداً من السفراء والدبلوماسيين المولهين فى مقتل، وان حالة من الغضب والحزن الشديد قد ضربت وزارة الخارجية السودانية. وتداولت بعض الاوساط سراً قصائد جديدة كتبها بعض هؤلاء فى التعبير عن الغضب والحزن الشديد والحنق على الرئيس محمد ولد عبد العزيز، ووزير خارجيته الجديد حمادى ولد حمادى. جاء فى احدى القصائد: (عبد العزيزُ لحاك الله من رجلٍ فظ تقصّد غادتنا فأرداها / أردى فأردى قلوباً في الهوى ولهتْ بلحظها وببرقٍ من ثناياها / يا زهرةً قُطفت من بعد ما ينعتْ، واحر قلبٌ عشوقٍ بات يهواها / روعتَ جؤذرةً تلهو بمسرحها آواه مما صنعتَ اليوم آواها / أما وجدت سوى حمّاد يخلفها ما كان حمادُ إلا من سباياها / يا ابن العزيز لحاك الله من رجلٍ يُبقى القِباح ويُقصي الوردةَ “الناها / جزى الله من في البدء قد نسبوا في حسنها وتغنوا في مزاياها).
    الى جانب قصائد السفراء والدبلوماسيين فقد اطلعت على قصيدة حلمنتيشية كتبها صحافى سودانى كبير، شاطر بها اصدقائه الدبلوماسيين نكبتهم، يلمّح فيها من طرف خفى الى العلاقة المزعومة للوزيرة بالعقيد القذافى، وقد جاء فى مقدمتها: (ألا يا وردةً عبقتْ سريعاً ثمّ شالوها / من البستان قد قُطفتْ و” للزنقات” ودّوها)!

  50. زووووووول كتب:

    الكلمات اعلاه للكاتب الرائع جدا مصطفى عبد العزيز البطل فى صفحته الاسبوعيه بصحيفة الاحداث

  51. ابكرون كتب:

    الزووووووول : الفقر ده ابو سبعه ووات مالك علينا يااااخ ما نسينا المودوووووع ده……
    غايتو انا ما (شاعر) لكن ابوصلاح تقول شاف الآها…الواها ….الهانا……هي اسما شنو ؟
    —————-
    وسهمك صاب احشاي قلالا
    اسباب الغي و العلالا
    ضمرتها والخصر العلالا
    نور في نور ياذا الجلالا
    علمتي الغصن الرتالا
    شوفتك كم عاشق اتالا
    يانسام اوصف جمالا
    والقامة السيرك امالا
    اوصف لي اسباب كمالا
    وقول لي (شالوها) مالا
    النسام شال الرسالة
    وفي التوضيح روق رسالا
    ذكرني الرطب العسالا
    وهاج الشوق والدمعة سالا

  52. زووووووول كتب:

    ابكرون سلاام
    انت من الان مرشح تكون سكرتير اول فى الوزاره لاجادتك للغزل الدبلوماسى وكب الجرسلين وكدا لكن
    انا هين يا عمك ترانى بنقل حروف بس لكن على الحلف يجيك سترايكر يشهيك العافيه زاتوووو يعنى انت ارجل من وزارة الخارجيه ولا دى هركات منك .

  53. سهيل كتب:

    الناها ؟ ياخ رئيس موريتانيا دا ذاتو حقو يقومو عليهو يلحقوهو امات طه .. ياخ دا انا زعلتا ليها بالحيل و لناس خارجيتنا الرقدو رز و ما خلو وراهم خط رجعه ديل .. معقوله يا ريس .. زي القشطه دي بشيلوها ؟؟؟ نان فضل شنو في موريتانيا ..

    امووووت انا في الزنقه

  54. ياسين شمباتى كتب:

    سهيل..
    زنقة شنو ياااااااا دا !؟
    انت الليلة ما عندك زنقة ولا شنو؟؟حمدالله على السلامة يا حبيب…

  55. ابكرون كتب:

    سهيل : يا عريس الله ؟ اثبت…..نحن كلامك ده ما قلناهو الا بعد سنه عاشره إعتباط اقصد إرتباط……(بعد عشرين سمستر يعني)…….لكن ما معقول في اول السمستر الاول ههههههههه……….يا راجل امش ذاكر قدامك امتحانات

  56. ياسين شمباتى كتب:

    ساااااااااااااقط

  57. التركي كتب:

    ياعريس ياخ كدة بتشرد الناس الفى الصف أثبت ياعم لسه الوقت بدرى …. شمباتى : يعنى ينتظر الملاحق ؟

  58. سهيل كتب:

    ياعمك امتحانات شنو … انت نسيت الإسبوتنق ولا شنو .. بعدين يا فرده نحن خشينا إختبارات بعمر شمباتي .. جاي تقول لي الناها و زنقاتها ..

    التركي : صف بتاع مين يا عمك .. دا الواد شمباتي لسه سغير و محيرني و متحير

    شمباتي : الليله وين يا فرده .. وراك زنقه زنقه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s