مشاهد ..

Posted: الخميس,13 يناير, 2011 by aflaiga in اخرى

مشهد ( 1 ) : شهامه لمن عواه :
س : يا ابو الشباب لو عاوز امشى من الحوادث دى لوزارة الصحه الاتحاديه امشى بى وين ؟
ص : البعرفو انو الناس من وزارة الصحه بتمشى الحوادث ! هههه
س : معليش لو سمحت اذا عارف ورينى .
ص : طيب عشان تمشى عندك 3 خيارات ، يا تركب من هنا بحرى وتنزل النفق وتركب بشارع الجامعه العربى وتنزل الوزاره ، او تمشى كدارى لحدى كمبال وتركب بحرى تنزل قصاد الوزاره .
س : شكرا جزيلا كتر خيرك .
ص : اسمعنى غايتو لو لياقتك كويسه ممكن تشيلا موزه بى جوه الشوارع لمن تصل .
س : شكرا ليك ياخى شكرا .
ص : ولا اقول ليك شيئ لو مرطب ممكن تاخد تكسى من هنا كلها بى خمسه حبات بوديك لكن قول ليهو ودينى بالجامعه لانو شاعر عطبره بقى اتجاه واحد .
س : شكرا ليك ما قصرت انا بعد كده بصل .
ص : لكن ما قلت لى ماشى الوزاره تشتكى ولا عندك اجراء لانو انا عندى زول فى وزارة الصحه .
س : لالا ابدا انا ماشى لى اخوى هناك .
ص : اخوك ده منو لانو انا بعرف ناس كتار هناك .
وعيييييييييييييييييييييييييييييييييك للصباح ..

مشهد 2 :
س : يا شباب لو سمحتو دفره صغيره بس البطاريه الشفع شكلهم لعبو بالنور نزلت .
ص من الشباب : جدا يا محعلم ما عندك مشكله يلا يا شباب ارح معانا دفره ، عاين خت ليها اتنين عشان خفيفه وارفع كراعك سريع من الكلتش يعنى اهجما عشان تقوم .
س : جدا يا شاب تسلم .
ص : ايوه كده دورت طوالى شفت مش قلت ليك الحديد الكورى ده تهجمو سريع بيقوم لكن اقول ليك كدى افتح الكبوت لانو الصباعات دى بتكون كربنت . اسمع عندك زرديه ؟؟ جيب ليك مويه من المزيره ديك نغسل ليك الصباعات دى ، ديل اولادك ما شاء الله ازيك يا اموره بتقرى فى سنه كم ؟؟ دى المدام طبعا مش ؟؟؟؟!!! تعرف يا معلم طوالى الصباعات دى كل فتره فكها غسلا وشحما ، لا حولا السايفوان ده مالو وسخان كده انت شكلك ما قاعد تغير الزيت فى مكان سمح انا عندى ود اختى فى شاعر الستين معلم بيغير ليك الزيت وينفض العربيه دى يخليها ترقش ، تعرف فى دفاق زيت من الكرتيل انت محتاج تفكو تعمل ليهو وش جديد ( طبعا الزول نزل للكرتيل بعد كمل العربيه من فوق مراجعات ولو زولنا ما اتفك منو كان نزل المكنه !!! ) .

مشهد 3 :
تريزا : يا عمو محمد عليك الله نحنا راجعين الجنوب والتكاليف بتاعة السفر كلها عملناها باقى لينا ميتين الف تدينا ليها نمشى نرسلا ليك من هناك ؟؟
عمو محمد : يعنى انتى يا تريزا ميتين الف بس وترجعى بلدك ؟؟
تريزا : ايوه والله بس ميتين .
محمد : طيب لو اديناك كم تقعدى ما تسافرى ؟؟
تريزا : والله يا محمد لو ضامنين العيشه معاكم بعد الانفصال انا بديك العاوزو نحنا والله مسافرين وحته مننا بتتقطع .

مشهد 4 :
مايكل : يا حاج ( الطيب ) واله نحنا خلاص مسافرين وانت عندك باقى ايجار ميه الف من الشهر الفات لو تصبر لينا يومين نديك ليهو ؟؟
حاج الطيب : والله لو بقت على المية الف انا بديك ليها بس اقطع وشك !!!!!

Advertisements
تعليقات
  1. الصادق ود البركة كتب:

    السلام عليكم
    كدي أولاً الحمد لله على الظهور و عودة الكتابات المتألقة
    ثانياً ديل نحنا السودانيين وده طبعنا وما حا نقدر نخليهو بنعرف كل شيئ عن كل شيئ
    ثالثاً أخدنا البرنجي ودمتم

  2. ياسين شمباتى كتب:

    افلى..سلام..
    حليييل اللساقة والفياقة! اسه تسال اى واحد بكل بساطة يقول ليك والله ما عارف..العندو صبر لى جنس دا منو؟؟

    ودالبركة..سلام..
    بركة بالطلة ومبروك عليك البرنجية..وابقى ظاهر.

  3. عزت كتب:

    مشهد صغير من الصباح:
    – أنا: عرفت يا معلم عايز شنو مواد عشان نمشي نجيبهم
    – أيوا يا معلم…. أكتب عندك
    ثلاثة نبل، أربعة جلبة، أربعة جلبة منبلة، ماسورتين بي في سي، لزاق بارد أوع من السخن… اثنين شريط موية وصفيحة منشار وبلف وثلاث أكواع، و حنفية ثلات اربع… و
    – مشى جابهم
    – انتهينا ونص الحاجات دي قاعدة
    – ما بتنفع يا معلم بعدين…!!

    هل تعديل ماسورة من مكان لمكان يبعد عنها ثلاث أمتار يحتاج كل هذا….
    ما ظنيت نحتاج نحن الى تعديل في التأهيل والتدريب… ونحتاج الى رخص…. من يحق له أن يخت مفتاحين انجليزي ويعمل سباك…

  4. التركــــى كتب:

    الغالى أفليقا والأخوة الأعزاء سلام الله عليكم
    ياخوانا طيبتنا دى مع انها بتدى مرات كتيرة نتيجة عكسية لكنها مقبولة ياخ الواحد مستعد يدفر معاك عربيتك من بيتك لمحطة البنزين ومايطلب منك حتى ترجعه الحلة ….. كمان هسع جابت ليها سمسرة ووساطة ههههههههههه
    ياافلى ياخ نحن جهزنا نفسنا من خمس سنين عشان كده العبرة مانزلت من عينينا بس عندنا باقى ايجار اليدفعوهو وماتعتر ليهم قشة …. وما بنمشى لناس مابيجونا وللقلعة رجعو يعذبونا …. وبرضو بنقول الله يجازى الكان السبب

  5. MUJAHID SHIGIELA كتب:

    الطيب دا اكييييد الطيب مصطفي, اكثر مايؤلمني فيك يا انقاذ ان بفضلك صار لدي نصف وطن

  6. مُخير كتب:

    الحبيب أفليقا

    الحلوين وينما كانو
    خسوسن الليهم مدة ما بانو

    سلام ومحبة وإحترام

    يا أبوحمودي روعة وجُرعة من جنس دة بترجعنا أمازونيا وتشيل فارق الُبعاد في ثواني، بالله زدنا !!

    التركي مشتاقين قلتي لي (وللقلعة رجعو يعذبونا) هو نان جنس عذاب! بس ربك يكضب الشينة.

    البارحة شاهدت بالصدفة برنامج حواري في قناة (برس تي في) الفضائية الإيرانية سألت مقدمته وأظنها بريطانية مسعول من حكومة جنوب السودان كان ضيفها مع كل من د. خالد المبارك من سفارتنا في لندن وثالث إعلامي غربي مُحايد ربما أصوله إفريقية، بـ (أن كعكة النفط هي التي عجلت بالإنفصال وأنها سوف تفتح الأبواب للفساد وما نيجيريا إلا خير مثال)، فرد الجنوبي بـ (أن التكهنات السلبية والتشكيك في قدرتهم على إدارة مواردهم أحد أسباب الإنفصال لكن أهمها فرض الدين من قبل الدولة)، لا أدري عن أي دين كان يتحدث وأية دولة (؟؟؟) بينما قال ود المبارك ما معناه بـ (أن سياسات الفصل التي أجراها المستعمر سنة 1922 تؤتي ثمارها الآن وأعرب عن أمله في حدوث توجهات وحدوية في ظل جوار آمن)، وتعليقي ما ظنيت كان الوطني والشعبية تحت سقف واحد ما إتعايشوا لمن يبقى كل زول ببيتو تاني الحيلمهم شنو (؟؟؟) لكن أعجبني قول الغربي الذي أكد بـ(أن قلبه يتفطر لإنقسام السودان لأنه يتم نتيجة لرغبة أمريكية وأنها مسألة أشهر قليلة وتتنزل الشركات الأمريكية والمتعددة الجنسية لتعيس في الجنوب فساداً، وأن دول إفريقية أخرى موعودة بسناريو السودان).

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s