والله خجلت ليك يا زين العابدين بن علي ….!

Posted: الجمعة,14 يناير, 2011 by ابكرون in سياسية

والله خجلت ليك يا زين العابدين بن علي …..!

كرسي السلطة مغناطيس رهيب والتشبث به مرتبط بتلك الموجات الكهرومغناطيسية  المنبعثة من (قلب هذا الكرسي) والمتمثلة في : الجاه والنعيم والقوة وملذات الحياة والمال والفساد بأنواعه والمنتفعين والعوالق (برازايتس وأميبيا السلطة) وقرادها…كل ذلك يشكل موجات كرسي السلطة الكهرومغناطيسية الجاذبة إليه بقوة….! وهي التي تجذب زين العبدين بن علي (ومن في شاكلته) لكرسي السلطة لفترات جاوزت ال23 عاما وأمثال  بن علي كثر من ديناصورات الحكم في مصر والسودان وليبيا ويوغندا وزامبيا واريتريا ودولا عربية أخري آسيوية ،… كل هؤلاء القادة أو معظمهم اعتلوا السلطة غصبا عن شعوبهم واخذوا يدبجون المسميات والدساتير لضمان بقاءهم ومن حولهم هؤلاء (العوالق) من حاشيتهم وأسرهم وأقرباءهم يمصون دم الشعوب …وخلال فترات حكمهم التي تمتد إلي عقود يضعفون الأحزاب ويشوهون سمعتها ويحلون النقابات المهنية والتنظيمات الشعبية والطلابية ويطلقون يد أجهزتهم الأمنية لسحل أي همهمة ويلغون الرأي الآخر وهكذا.. ناسين ان إرادة الشعوب لا تلغي ولا تقهر ولابد من صنعاء وان طال السفر….

ان هذا ما يحدث حاليا في تونس وقد (لاحت جبال صنعاء وبطاحها) للشعب التونسي وحانت ساعة خلاصه التي بدأت بقليل جدا من الزاد ، انطلقت رحلة الشعب التونسي بحالة (انتحار عاطل) عن العمل هذه الحالة التي مدت لسانها للأجهزة الأمنية التونسية المعروفة ببطشها ولكافة المحللين السياسيين وأساطين السياسة (خاصة في منطقتنا) ولكافة الذين دمروا الأحزاب والنقابات ويظنون ان الأمور قد دانت لهم وبدءوا (بعد أن استطعموا حلاوة العقدين الأولين) في الأعداد لتعديلات دساتيرهم لبقاء رؤساءهم وأنظمتهم لمدي الحياة والأمثلة كثيرة ….

حالة انتحار واحدة غيرت كل شئ في تونس الشقيقة  ، وجعلت فرعون تونس يخرج للملأ واهنا ليعلن قائمة من الإصلاحات والإغراءات في الوقت (بدل الضائع) وبعد ان خرج السهم من القوس ويقول لشعبه مستجديا :  انه ضلل سياسيا من قبل مستشاريه وانه سيكف يد السلطات الأمنية وانه لا يرغب في مغناطيسية كرسي السلطة (فقط) لعام 2014 ولا يرغب فيه لمدي الحياة ويهتف مرددا بصوت واهن (ذكرني بشاوسسكو) : ( نعم لدعم الديمقراطية وتفعيل التعددية ولا للحكم لمدي الحياة ) هذه الترهات الذي عادت لا تجدي وقد خرج المارد من القمقم ، والله لقد خجلت  للرجل الذي ما زال متشبثا بهذا الكرسي الممغنط ، أين كنت يا زين العابدين طوال عقدين ونيف توعد وتحس بنبض شعبك بعد خراب سوبا ؟؟؟ كان اشرف له ان يقدم استقالته ويمضي ليقضي بقية حياته في باريس بدلا عن إراقة مزيد من الدماء اكرر والله خجلت لك يا زين العابدين ..!

تابعت بالأمس برنامج (حتي تكتمل الصورة) للأستاذ الطاهر حسن التوم مع عدد من ضيوفه الصحفيين (الأساتذة فيصل محمد صالح والهندي عزالدين وضياء بلال) وقد لفت نظري إصرار الهندي علي القول ان لا أمل في انتفاضة شعبية بالسودان لضعف الأحزاب وعدم وجود نقابات تقودها الخ النقاش …! وأقول له ولمن يرددون مثل هذا القول ان الشعوب لا تحتاج حتي لأحزاب تقودها ولا نقابات وعندما ينفجر البركان لا احد يستطيع الوقوف أما (اللافا) المتدفقة من فوهته ولا واق يومها من حممه وشظاياه  وما علي اسود الأمس إلا الهروب والاختباء من هذا الطوفان وترك انهار (اللافا)  تتدفق لتبدأ حياة جديدة في منطقة البركان ، ان ما يحدث في تونس خير مثال لذلك يا عزيزي الهندي عزالدين فبركان شعبها لن يتوقف إلا برحيل جلاديه والإنعتاق من الظلم والاستبداد الذي جسم علي صدر الشعب التونسي لعقود ، وعلي الأنظمة التي تماثل نظام بن علي ان تبل رأسها .

Advertisements
تعليقات
  1. علي سنكل كتب:

    أبكرون إزيك:
    مشكور على الموضوع وفتح السيره الما بدوروها ناس أحسبو أن.
    نظام بن علي وما يشابهه من الأنظمة الشموليه متل نظامنا الديكتاتوري مصيرها مزبلة التاريخ. اليوم تونس وغدا السودان. الثمن غالي صحيح ، والمهر دماء وشهداء ولكن دائماً الحريه مهرها غالي.
    و ذي ما الشعب التونسي دفع المهر الشعب الأمازوني مستعد للدفع.
    ويا ما حنشوف فيكم يوم يا تجار الدين.
    إذا الشعب يوماً أراد الحياة فلابد أن يستجيب القدر

  2. الصادق ود البركة كتب:

    السلام عليكم
    بركة الطلة ( كما يقول شمباتي ) يا الفكي القطري وإن كان من باب ساس يسوس
    الغريبة أنو الزول ده (بن علي) أول ما قلب نظام بورقيبة سلمياً وبالقانون كمان قال أنو حدد مدة التجديد للرئيس مرتان فقط ( 14 سنة ) وبعد شوية عيييييييك عدل الدستور وأصبح رئيس مدى الحياة ……عجبي
    الآن بشوف في الجزيرة مباشر كيف أزال المتظاهرون صورة بن علي كانت معلقة فإذا تحتها صورة أخرى قاموا شالوها إذا تحتها صورة ………….عجبي
    الشعب الفضل إذا خرجوا وتمت إزالة النظام ما البديل المؤهل لحكمنا ؟؟؟؟؟؟؟ سؤال برئ جداً ودمتم

  3. ياسين شمباتى كتب:

    الحبيب ابكرون..سلام..
    هو بن على برااااااااهو البتخجل ليهو !!؟ دا ما خلاص عدل الدستور وانتهى,لكن شوف على عبدالله صالح اللى عايز يعمل تعديل عشان يقعد فوقو مدى الحياة ..
    وعلى النقيض رئيس جمهورية كازاخستان الذى رفض تعديل الدستور لتمديد فترة ولايته,مع العلم بان الاغلبية فى البرلمان من حزبه ! عليك الله شوف رؤساء كيف ورؤساء كيف !!
    بن على خلاص شارفت ايامه على النهاية,,وكمان ما تنسوا ثورة الجياع فى الجزائر,,والحمدلله فى تظاهرات فى الجزيرة والحصاحيصا لارتفاع الاسعار…ربنا يعدل الحال ويصلح البلاد..

    الحبيب ود البركة..سلام..
    عليكم الله سيبونا من الاسطوانة المشروخة بتاعت البديل دى..انا متبرع ابقى رئيس,,فى كلام تانى ؟؟

  4. عزت كتب:

    بنلقى لينا زول بس هم الانكشحوا….. اللهم شتتهم بددا ولا تبقي فيهم أحدا

  5. monamie كتب:

    الفكي ابكرون تحياتي لك والله انا بقرت من شعب تونس لكن الشعب السوداني هذه الثوره التونسيه لم تهز فيه شعره ياخي ارتفاع الاسعار والبطاله دي ما محتاجه لاحزاب او نقابات عشان تلكز الشعب للخروج لكن شعبنا فقد الاحساس واصبح متبلد ولو ذادوا له الاسعار مئات الاضعاف

  6. ابكرون كتب:

    فعلا يا سنكلوني الشابي يحرك بقصيدته الشارع التونسي فهم اهله ويحرك كل الشعوب التي يجثم الظلم والفساد علي صدورها ونحن منها:
    —————–
    إذا الشـــعبُ يومًــا أراد الحيــاة فــلا بــدّ أن يســتجيب القــدرْ
    ولا بــــدَّ لليـــل أن ينجـــلي ولا بــــدّ للقيـــد أن ينكســـرْ
    ومــن لــم يعانقْـه شـوْقُ الحيـاة تبخَّـــرَ فــي جوِّهــا واندثــرْ
    فــويل لمــن لــم تَشُــقهُ الحيـا ة مــن صفْعــة العــدَم المنتصـرْ
    كـــذلك قــالت لــيَ الكائنــاتُ وحـــدثني روحُهـــا المســـتترْ
    *****
    ودمــدمتِ الــرِّيحُ بيــن الفِجـاج وفــوق الجبــال وتحـت الشـجرْ:
    إذا مـــا طمحــتُ إلــى غايــةٍ ركــبتُ المُنــى, ونسِـيت الحـذرْ
    ولــم أتجــنَّب وعــورَ الشِّـعاب ولا كُبَّـــةَ اللّهَـــب المســـتعرْ
    ومن يتهيب صعود الجبال يعش أبَــدَ الدهــر بيــن الحــفرْ
    ——————————-

  7. ابكرون كتب:

    يسن شمباتي : الخجل من استجداءه ان يمكث ثلاث سنوات (بس) قرب يبكي ..ومن قراراته التي كانت قبل شهر ضربا من المستحيلات ….لكن كل ذلك لن يجدي (خلاص صفرجت)….
    ود البركة :ياخ حواء والده من خنوعنا وعدم ثقتنا في انفسنا صرنا حتي لا نقدر علي تقييم قدراتنا ….اخي بلادنا حبلي بالسياسين والتكنوقراط ، والشرفاء ، والأمناء ..وزي ما قال ليك د. عزت ما بنضهب بنلقي الآلاف
    مون آمي : شعبنا عامر بالخير وكل شئ بمواعيده ولك ولنا كلنا ان نبغر من الشعب التونسي الأبي

  8. عزت كتب:

    المشكلة يا أبكرون طلع ليهم (سوار الدهب) وأجهض ليهم الانتفاضة لكين باقي لي هم عازمون أن يوصلوها حدها… لأن الغنوشي دا امتداد لمصالح (بن علي)

  9. monamie كتب:

    ,والله التوانسه اعطوا الشعوب الاخري كيفية الانتفاضة وعدم الخنوع والاستلام للظلم كما اعطوا دروس للحكام الظلمه المتكبرين بان مهما بلغت قوتهم وسطوتهم وامنهم فان ارادت الشعب هي التي تنتصر عليهم في النهايه وسوف يتم كنسهم ولفظهم كالقذاره وطردهم كالمجرمين

  10. monamie كتب:

    ومن يتهيب صعود الجبال يعش أبَــدَ الدهــر بيــن الحــفرْ
    والله اخي ابكرون هذا البيت جميل جدا فيجب علي شعبنا ان يخرج من حفرت الخوف التي رماه فيها هذا النظام وينتفض حتي يخرج هؤلاء الاوغاد من قصورهم وتعليقهم في مشانق جماعيه في اكبر دار رياضه حتي يشهد عذابهم كل السودانيين

  11. ودالخلا كتب:

    سلام ياقبيلة،،
    مبروك للشعب التونسي لحصوله علي مبتغاه برحيل بن علي، ولكن ما حدث بعد رحيل الحاكم التونسي أنفراط لعقد الأمن في عدة محافظات بعد أنسحاب قوات الأمن وأصبحت الفوضي والنهب والأنفلات الأمني هو الذي يسود، وتوجه المواطنين بالمناشدة لعودة الأمن ووأستتبابه ، والخوف والرعب والأعتداء علي الممتلكات الخاصة هو الذي ساد فهل هذا هو الخلاص المطلوب،،،،
    هل الأولي الحفاظ علي الأمن وأستتبابه ومنع الفوضي، أم رحيل الرئيس الذي كان يحافظ علي الأقل علي أمن الناس….
    السؤال البرئ لود البركة ينتظر الأجابة في ترتيب الأولويات من سيحكم بعد الرحيل يا سادة أم تريدونها فوضي تقضي علي الأخضر واليابس كما هو قد حدث بتونس!!! 
    أيها الناس مالكم كيف تحكمون؟؟؟؟؟

  12. نيام كتب:

    ودالخلا:
    حمدلله بالسلامة…وشرفتونا بالزيارة انت و الرهط الرائع…
    ياخي خلهم اليطيرو البلد ما بتجيها عوجتا اكتر من الجاتا..
    شمباتي:
    عافي منك ادها و ادود…بس خايف لك حتي مالطة تاباك…
    الصادق و دالبركة:
    عليك الله باقي لك التوانسة ديل ما رجال…دحين فيهم واحد وقف سأل قال البديل منو..

  13. monamie كتب:

    سلام ودالخلا
    مبروك للشعب التونسي وعقبالنا بس بخصوص البمسك بعد زين العابدين حوه والده بس بعد ده البجي بكون اخد درس وما بقدر اعمل العمايل لان مصيره ح اكون مثل مصير بن علي

  14. hachemi كتب:

    على كل حال تونس تبدا مرحلة جديدة انشاء الله ونتمناو ليهم حيات سعيدة ونشاء الله رايح نزور تونس لاول مرة لكن بنية صافية

  15. ابكرون كتب:

    وهرب بن علي مذعورا كالفأر تجوب طائرته السماوات بعد رفض فرنسا هبوط طائرته…الى ان سمحت له المملكة بالهبوط……!!!!! وهكذا حال الطغاة ومصيرهم…..والقي القبض علي اسرة الطرابلسي اهل زوجته وهم بالمطار بعد ان رفض كابتن الطائرة الإقلاع بهم محملين بملاين الدولارات ..ولن تهدأ تونس الي ان يعلن عن اقالة بن علي نهائيا وكذلك رئيس حكومته الغنوشي وحل اجهزته الامنية ومليشياته…..
    ود الخلا :/ عمليات السلب والنهب والفوضي تقوم بها مليشيات النظام المسلحون …ومعروف ان الشعب التونسي اعزل …وهؤلاء الجرزان ايضا سيختفوا كرئيسهم …وكما تقول في نظرية نصف الكوب ….لماذا لا تنظر للجانب الايجابي ومركزين علي الفوضي ولا يوجد مهر شئ غالي بدون عنت ….التحية للشعب التونسي الذي دفع مهرا غاليا لحريته مضمخا بالدماء …والحريات تستاهل النفس والنفيس…..دائما يا ود الخلا ترددون من البديل ؟ كاننا نحكم الآن بالملائكة……صدقني ما اسهل البديل ، واي بديل مهما كان أفضل ….!

  16. عزت كتب:

    أمبارح يا ودالخلا اتفرجت على فيلم أمريكي اسمو بالعربي يوميات أمرأة سوداء مجنونة… غدر بالمرأة زوجها بعد 18 سنة زواج كان خلالها قد كتبها اقرار بعدم احقينها في ماله الخرافي وظل يسومها العذاب ودخل أمها دار المسنين وطردها بعد ماجاب واحدة تانية في البيت… فلجأت لخالتها …

    حال أن عرفت خالتها ركبتا في عربيتا واقتحموا المنزل ودخلوا الى غرفة بالقصر كان بها فساتين جديدة بالمئات للمرأة الجديدة فأشارت اليها خالتها أن تبدأ في تمزيق الفساتين…

    استغربت الزوجة لماذا….
    قالت لها ان ذلك سوف يشعرك بالراحة…
    فعلا ارتاحت بشكل عندما صارت تمزق في الثياب وترمي بالأحذية
    وتمت الناقصة بأن وجدوا منشارا يدويا وصاروا يقطعون اي شئ الى نصفين… اذ لها النصف حسب قانونهم…
    فبالرغم ان ما يقطعونه الى النصف هو في الآخر نصيبها ولكن خرابه أفرحها وفش غبينتها وانتقمت لمنظرها وهي مطرودة من المنزل أمام غريمتها….

    فالشاهد انه وبالرغم من الخراب الذي استمر قليلا في تونس الا أنه مهر الحرية كما أشار أبكرون…. خليهم اليكسروا ليرتاحوا….
    وعقبال ما نكسر نحن كمان ونفتك بالطردونا من القصر واستأثروا هم وحسبة قليلة بمواردنا….

  17. ابكرون كتب:

    عزت : قراءاتنا كلها طلعت صااااح اسه في نشرة عشرة ثبت ان المجموعات التي تخرب وتطلق النار وتنهب مجموعات تابعة للأمن الخاص تقود سيارات بدون لوحات وتحاول ارهاب المواطنين وتدخل في انفسهم ان الوضع سابقا كان آمنا وان البلد دخلت في فوضي ….شفت كيف نفس افكار ناس (سديقي ) هههههههه
    والله لكن محمد بوعزيزي (خريج الجامعة الفارش بضاعه في الارض ليعيش……والذي ضربه شرطي البلدية كف فما كان منه الا وان اشعل النار في جسده)……وكان شرارة الثورة ….والنار من مستصغر الشرر….!
    وكان الشابي يقرأ مستقبل شعبه حين قال :
    ————
    ألا أيها الظَّالمُ المستبدُ
    ألا أيها الظَّالمُ المستبدُ … حَبيبُ الظَّلامِ عَدوُّ الحياهْ
    سَخَرْتَ بأنّاتِ شَعْبٍ ضَعيفٍ … وكفُّكَ مخضوبة من دِماهُ
    وَسِرْتَ تُشَوِّه سِحْرَ الوجودِ … وتبذرُ شوكَ الأسى في رُباهُ
    رُوَيدَكَ! لا يخدعنْك الربيعُ … وصحوُ الفَضاءِ وضوءُ الصباحْ
    ففي الأفُق الرحب هولُ الظلام … وقصفُ الرُّعودِ وعَصْفُ الرِّياحْ
    حذارِ! فتحت الرّمادِ اللهيبُ … ومَن يَبْذُرِ الشَّوكَ يَجْنِ الجراحْ
    تأملْ! هنالِكَ أنّى حَصَدْتَ … رؤوسَ الورى وزهورَ الأمَلْ
    ورَوَيت بالدَّم قَلْبَ التُّرابِ … وأشْربتَه الدَّمعَ حتَّى ثَمِلْ
    سيجرفُكَ السيلُ سيلُ الدماء … ويأكلُك العاصفُ المشتعِلْ

  18. monamie كتب:

    والله محمد بوعزيزه ده هو بطل الثوره ومفجر الثوره ووهب حياته لشعبه بس نفسي اشوف اليوم رئيسنا وعصابته والخوف والرهبه باعينهم وهم يشاهدون السفاح المخلوع وهو حايم بطائرته ويدق جميع ابواب البلاد ولا تفتح له فاليوم ده راجيهم وانشاءالله ما تفتح لهم إلا ابواب لاهاي

  19. نيام كتب:

    ابكرون:
    هاك دي اشرب بيها القهوة…و الله التوانسة لكين هع …

    وتبسط آمنك بسطا ثقيلا و تزعم انك ظل الإله
    و تفسد في الأرض طاغ لئيم و تقتل فينا دون انتباه
    ورهطك فينا يكيل الهوان و آمنك فينا قضي ما قضاه
    و تحسب انك في الخالدين و تزعم عدلك في منتهاه
    فلا أنت للدين من العارفين و لا انت للعلم الا غباه
    وجهلك جهل الاولين و بطشك ويحك هول صداه

    كسرة:
    د.صالح ، عافليقا ، زووووووول , ولد الخلا , سهيل
    يوم جيتو فرح بابنا
    عشان زارونا احبابنا
    جيتو تقدلو في الفة
    شارعنا عمل زفة

  20. aflaiga كتب:

    ابكرون : طبعا الاحسبون بيكونو رسلو ناس عشان يدرسو التجربه التونسيه وكيفية الاستفاده منها لقمع اى حركه فى شكل قلبه . هههههه
    مبروك للتوانسه الكاس . وعقبال ناس ..

  21. monamie كتب:

    لقد اضحكني تعليق بالراكوبه واحد قال والله عاوزين التوانسه اجونا في السودان اسبوع عشان عاوزنهم في موضع مهم

  22. عباس ركس كتب:

    monamie ;
    آي والله مغرودين فيهم شديد !!!!!

  23. الصادق ود البركة كتب:

    السلام عليكم ورحمة الله وبركاته
    كلكم تتذكرون ما حدث بعد الانتفاضة كيف أن العسكر استلموا الانتفاضة ودخلونا في الفترة الانتقالية التي جابت الصادق وزمرته الذين باءوا بالفشل الذي جعل الجبهجية ينطوا في الكرسي وعييييك وهسع بندور نتخلص منهم ……………..
    التوانسة ما في عسكري قال بتولى الحكم ولا فترة انتقالية ولا يحزنون الزول شرد والوزير الأول حاول لي عنق الحقيقة ووقفوهو في حده ونغذوا القانون وإن كان أعوج وجابوا رئيس مجلس النواب رئيس مؤقت والانتخابات في ستة شهور (((((((((((((ده بيحصل عندنا ؟؟؟؟؟؟؟؟؟؟؟؟؟))))))))))

  24. ابكرون كتب:

    جيشهم يا ود البركة جيش الهنا
    لكن لوعندهم زي سوار الذهب ما بطال
    وبرضو رئيس مجلس النواب بالنسبه ليهم غير مقنع وهو ورئيس الوزراء من واجهات النظام مفروض يكونوا في السجن والدستو ذاتو مفصل علي زين العابدين يعني مفروض تتكون حكومه جديده بعد كنس كل بقايا بن علي…وما اظن الشعب التونسي حيرضي بالواجهة الجديده دي لجماعة بن علي ولسه حتجوط شويه واحتمال يظهر سوار ذهب لفترة محدده

  25. abushagrod2 كتب:

    صدقت أخي أبكرون , الشعوب لا تحتاج لقيادات لكي تعبر عن إرادتها
    كنت هناك في قلب الأحداث في مارس/ ابريل 1985
    يوم خرجت الخرطوم عن بكرة أبيها
    ويوم خرج الإنقاذيون أيضا جنبا إلى جنب غصبا عنهم مع الشعب السودان
    هؤلاء الذين أخرجوا ما يسمى بالمسيرات المليونية دعما لنظام نميري المتهالك ولقوانين سبتمبر التي أصبحت ك (الخيار والفقوس) يؤخذ منها ما يصلح للقمع والضرب وتكريس السلطة ويترك منها ما يدعو للعدل وما يعمل لرفاهية الشعب.
    كنت هناك عندما إضطر هؤلاء للخروج مع الآخرين بعد أن رمى النميري زعاماتهم في السجن وذهب إلى أمريكا وأستفز الشعب بانه ذاهب ليفعل كذا وكذا وراجع لكي يفعل كذا وكذا بالشعب وبكل من تسول له نفسه بالخروج
    في يوم ستة أبريل بعد ان إضطر سوارالذهب للإنحياز لرغبة الجماهير وقفت فاطمة عبالمحمود على أسوار القيادة العامة وقالت بالحرف الواحد ( الناس ديل حيسرقوا ثورتكم , يجب ان لا توقفوا الثورةة حتى يتم تسليم زمام الأمور لحكومة شعبية تقوم بمحاكمة المفسدين وإسترجاع حقوق الوطن والتمهيد لإنتخابات حرة نزيهة
    يومها سخر منها من سخر وتجاهلها من جهل ( وكنت منهم ) وجاءت حكومة الجزولي وبدأت كما يبدأ كل شئ في السودان بكل جدية وأنتهت كما ينتهى كل شئ في السودان عند عقبة المجاملة والمحسوبية ثم الطيبة ثم العوارة ثم الذاكرة التي تشبه ذاكرة السمك فسرب السمك معلوم أنه يمر من أمام مخبأ الحنكليز الذي يقضم منها نصف سمكة وقبل أن يلتهم النصف الثاني أو تجف دماؤه يمر نفس السرب من امام المخبأ من جديد لأنه يكون قد نسي
    وهكذا نسى شعبنا إكتوبر ونسي مارس/ أبريل وأخاف ان ينسى التوانسة الأبطال 14 يناير ويجدوا أنفسهم في المربع الأول من جديد ( مربع 30 يونيو آخر يأتي بنفس رموز الدكتاتوريات السابقة ) وليس ببعيد ان يتم إستقبال بن علي مرة أخري بتونس كما أستقبل النميري وأن يعتبر بطلا من الأبطال

  26. التركــــى كتب:

    الحبيب ابكرونا والزملاء الغالين السلام عليكم
    بالأمس اتصل على صديقى تركى من أنقره واستهزأ بى قائلا … ماقلت لى السودانين ناس ثوريين اتاريك كنت بتقصد التوانسة …. حرقتنى الجملة بس قلت يافتاح ياعليم يارزاق ياكريم اليوم عطلة والعن الشيطان …… ياخوانا نحن مابنثور عشان التوانسة خلعوا زينهم ولا عشان فلان عمل يلا نحن اقل منهم فى شنو …. نحن لو مااقتنعنا باننا ما بنقدر نطيق الوضع وانو فعلا الناس دى اجحفت فى حقنا مابنثور والا فالجموع راح تتفرق من اول طلقة او اول مصاب …. وأبو القاسم الشابى زى ماكتبوا اخوانا ماقصر ….
    ودالخلا : فى مثل تركى بقول ( الضرر محل مااتلافيته الباقى ربح ) …. عشان كده اعتقد اننا حاليا متمادين فى الخسارة ومحل ما نقيف الباقى بكون لينا ربح مهما كان الثمن …. حوا والده

  27. مشاكل كتب:

    سلامز

    أختلف معك يا حبيبنا أبكرون في جزئية بسيطة
    انو الثورة الشعبية محتاجة لقادة احزاب أو نقابات لتحتويها و توجهها بالاتجاه الصحيح
    و مع غياب التوجيه ستنقلب الثورة إلى فوضى عارمة .. و لها تبعات خطيرة

    أما في حالة السودان .. فلا يمكن ان تقوم فيه ثورة شعبية ببساطة لأن المجتمع حاليا خاضع للتنويم المغنطيسي من السلطة .. فالنقابات خاضعة تماما للحزب الحاكم و أحزاب المعارضة متفرقة و هزيلة
    ولا توجد قيادات مؤهلة للقيام بواجب الثورة و الانتفاضة

    من يهن يسهل الهوان عليه
    ما لجرح بميت إيلام

  28. مشاكل كتب:

    سلامز مربع

    الآن .. الكل يسأل و يطلب محمد بوعزيزي
    ولكن لا أحد يقول : سأكون أنا محمد بوعزيزي

    كما سألنا عن صلاح الدين .. ولا أحد يقول : سأكون انا صلاح الدين

    سيدي الرئيس عمر البشير … نوم قفا

  29. aflaiga كتب:

    التركى : لا فضفوك .
    الثوره منظومه متكامله من المعطيات والاهداف والاسباب والمبررات والقدوه والمثل .
    امنيا :
    الثورات نشاط يهدم الاوضاع القائمه .
    ومن اهم مقومات هذا النشاط :
    وجود وضع سياسى واجتماعى وعقدى محرض على التغيير .
    وجود قاده ينادون بما يحس به الشعب وجاهزون لتولى المسئوليه .
    ومن قبل كل ذلك وجود نظام حكم وصل لمرحله لن يستطيع معها صد الثوره .
    ولتحليل هذه المعطيات لتبيان ان كان هناك ثوره ام لا :
    1 – الشعب فى مرحله من الاحتقان السياسى لم تصل لمرحلة الثوره بيد انها مرحله من التذمر السياسى الذى يمكن تجاوزه بمجموعة اصلاحات سياسية تستوعب القوى السياسية المعارضه .
    2 – برغم قنوط الشعب من القاده المعارضين الا انهم يمكن ان يكونو مساهمين فى حركة تغيير عبر المشاركه مع النظام وليس قاده لنظام جديد .
    3 – بالنسبه للنظام الى سخر كل ميزانياته للامن والدفاع فى شكلها الداخلى ( الامن الداخلى ) فعدم قدرة النظام على صد الثورات والخروج للشارع فيها حديث .
    من كل ما سبق اتوقع ان يقوم الشعب بتعبير عن الرفض بشكل لا يرقى لمستوى ثوره لكنه يلفت نظر النظام لضرورة اشراك القوى السياسية واتخاذ اجراءات فى صالح الشارع .
    اما الثوره لقلع النظام فهى مرحله لا اعتقد ان شعبنا قد وصلها بعد 20 عاما من التدجين والدوران فى ساقية اكل شراب علاج تعليم .
    والله اعلم فربما يفعلها اولاد ال لذين …. الشعب ده زى الثعلب ممكن يبيض وممكن يولد هههههههه

  30. زووووووول كتب:

    ولد علي عبدالله صالح في 21 مارس 1942 في قرية بيت الأحمر، منطقة سنحان، محافظة صنعاء، لأسرة فقيرة، وعانى من مشقة العيش بعد طلاق والديه في سن مبكرة. عمل راعياً للأغنام، وتلقى تعليمه الأولي في “معلامة” (كتاب) القرية، ثم ترك القرية عام 1958 ليلتحق بالجيش في سن السادسة عشرة.
    يقول هو أنه “كان جندياً منذ يفاعته، وكذلك إخوته كانوا جنوداً. كان الجيش مهرباً من الفقر وسوء المعاملة”. التحق بمدرسة صف ضباط القوات المسلحة في 1960وشارك في أحداث ثورة 26 سبتمبر. في 1963 رقي إلى رتبة ملازم ثان، وشارك مع الثوار في الدفاع عن الثورة أثناء حصار السبعين، بعدها التحق بمدرسة المدرعات في 1964 ليتخصص في حرب المدرعات، ويتولى بعدها مهمات قيادية في مجال القتال بالمدرعات
    انتخبه مجلس الرئاسة بالإجماع ليكون الرئيس والقائد الأعلى للقوات المسلحة اليمنية في 17 يوليو1978م.
    كسره : تقول لى زين العابدين بن على

  31. monamie كتب:

    شنو ياخوانا قصة الحريق دى امس الجزائري واليوم واحد مصري واحد مورتاني عجبي

  32. ابكرون كتب:

    سلااااام
    معلوم يا سادة ان الحزب الحاكم المسيطر في اي نظام شمولي خلال فترة تشبثه بالسلطة (بالأضراس) يعمل علي اضعاف الاحزاب التي يخشاها ويحلله ويفتتها وينهي العمل النقابي ..وامامكم تجارب ماثله في السودان وسوريا والجزائر ومصر وتونس ووووو….وعندما اشتعلت ثورة اكتوبر 64 اشعلها الشارع (الشباب بالتحديد) وكان انطلاقها من جامعة الخرطوم وثورة ابريل 85 كان وقودها الشباب ايضا ولم تجد احزابا لان نميري فعل بها فعلته …..تندلع الثورات ويقودها التكنوقراط (وهم المثقفون المتعلمون ذوي التخصصات المهنية والعلمية)….(الخلاصة ان الثورات وقودها الشباب والامثلة اكتوبر وابريل وتونس وغيرهم) فان وجدت احزاب تزيدها زخما وكذلك نقابات العمل واتحادات الطلاب …..في ثورة ابريل الفترة الانتقالية كانت برئاسة المجلس العسكري (رغم انه بقايا مايو) اعطي فرصة عام للاحزاب لتستعد للانتخابات وتستلم السلطة من المجلس العسكري ……لا مستحيل يا ود الشيخ وعندما يقول الشعب كلمته لا عاصم يومئذ من امر الله الا من رحم ………..!
    مون امي : دي الطريقة البوعزيزية الجديده

  33. aflaiga كتب:

    حاول شاب سودانى ان يقوم بحرق نفسه فمشى الطلمبه لقى البنزين بى تمنيه ونص قال نجرب الجاز لقاه بى سته ونص عمل نايم – وتم ارسال تعميم لكل الطلمبات اى زول ما يكبو ليهو بنزين الا فى العربيه جالون لا واذا عاوز فى جالون تملا بيانات فى استماره وتقدم طلبك لجالون ويدوك ليهو بعد 24 ساعه بعد ما يراجعو الفيش – هههههههه
    تعرف لو فى زول عملا فى بلدنا دى الناس حتقول ليهو عليك الله كان عندك حق الجالون حارق رزك مالك ؟؟؟

  34. ابكرون كتب:

    افليقا ده لو ما قالوا ليه بالله اسه مكلف اهلك كفن ومصاريف فراش ووووو

  35. طارق أب أحمد كتب:

    قبل أيام كان فى مسلسل لقاءات مع القيادى فى تنظيم الجبهه القوميه كابتن طيار الفاتح عبدون كان بحكى فيه بكل اريحيه عن كيف أنهم سرقوا الأنتفاضه بواسطة عناصرهم فى المجلس و الحكومه الإنتقاليه بعد أن كانو خارج الدائره تماماً

    بالمناسيه ناس جيلنا من الديناصورات فى واحد بتذكر إعلانات حفلات كابتن الفاتح عابدون ليالى الكرسماس و رأس السنه فى أندية الخرطوم

  36. طارق أب أحمد كتب:

    أها ياجماعه عمركم كلو تقولوا البديل شنو
    أدناه تجدون تصور لجكومه بديله,,,, ورونى عيبا شنو
    و راحيكم خاصتن ود البركه و ود الخلا و نافع ذاتو
    ____________________________________

    نيام رئيسا للجمهوريه
    د. صالح رئيسا للوزراء
    بروف عزت وزيراً للتعليم العالى و البحث العلمى
    بروف الفاتح جبرا , الثقافه و الأعلام
    أبكرون , الأمن و المخابرات
    التركى , الخارجيه
    قرانوف , الداخليه
    الغبشه, وزيرة الماليه
    السلاوى , الشئون الهندسيه
    أفليقا , التخطيط الأستراتيجى
    ود الخلا , الشئون الدينيه و الأوقاف
    سهيل , الصناعه
    أب أحمد , التجاره
    ود المهدى , مفوضاً للعون الأنسانى
    سترايكر الأتصالات
    ود البركه التربيه و التعليم
    سنكل , شئون العامليت بالخارج
    ود المدنى , والى الجزيره
    البشاوى , المراجع العام
    شمباتى , الصحه
    ود الزبير , السياحه و المطاعم الفندقيه
    monamie رئيستن للمحكمه الدستوريه
    عبدوش مسئول عن إعاشة الطلاب بدرجة وزير دوله

    بافى المقاعد و البنابر يعلن عنها بعد رحلة المجلس الأولى !!!!!!!!!!

  37. مُخير كتب:

    الحلوين سلام وشوق
    التوانسة عملوها علماً بأن حالهم أقل سوءً من الشعب الفضل، هييع عفيت منكم يا الصابرين، يا ربي يكونوا راجين شنو ؟؟ على قول عاطف خيري راجين ريح تقول:
    شوف الناس قنديل ..
    لو ما نور يحرق كوخ …
    وباقي الحلة تنور ..
    أو جبة جوخ أو ينزل بوخ …
    يقول للنسمة الزايفة أقيفي ..
    لو تتفرد ريح …
    تتشرد ريح …
    ريح الخوف …
    لو تتفرد ريح
    تبدأ تفرتق ضفائر المدن الكاذبة … تعيد تسريحتك ..

    غايتو بصبركم ده حيرتوا الحيرة ذاتها …

  38. ابكرون كتب:

    ابوحمد والله حكومتك رشيده تب …بس بنبر الدفاااع لبشار ……انا ما داير الامن والاستخباثات …بقوم اعمل ليكم بيوت أفراح للاعتقالات…….خليني اللاغف العام

  39. monamie كتب:

    خلاص لو الجاز والبنزين (المحروقات) اسعارها غاليه اجربو الكهربا ودي بتوديهم طوالي احمد شرفي او الصبغه وبكده بكونوا ابتكروا طريقه اخرى للانتحار الاحتجاجي غير الشواء الاحتجاجي السائد الان في الدول العربيه

  40. monamie كتب:

    الحكومه الكويتيه قررت صرف لكل مواطن مش موظف بل اي مواطن مبلغ من المال كما يتم تقديم السلع الضروريه الاستهلاكيه مجانا لمدة 5 اشهر الله يرحمك ياعزيزى ادبت الحكومات

  41. aflaiga كتب:

    الحلوين الحالمين بغد سعيد ولو كان خلف قيصرنا ملاك جديد او قيصر جديد :
    اب احمد : التخطيط الاستراتيجى ده فيهو مخصصات ولا حنك ساى ؟؟؟ وهى لله ؟؟ هههه اسى عليك الله زول عاقل كده يدى البشاوى المراجعه العامه ؟؟ يعنى يوم الخميس يحضر اجتماع مجلس الوزراء ولا رئاسة الحكومه ؟؟ هههه ابكرون : خايف من الاستخباثات مالك اسى لاقاك يوم ضابط استخباثات قلبا ؟؟ ولا شارك فيها ؟؟ لكن حقت ود الخلاء للشئون الدينيه دى قويه يعنى من اسى نتوب الى الله ونعود اليه ولا كيف ؟؟
    سالت صديقى س عن اثار ما يجرى فى تونس على جماعة الخرطوم فقال :
    شوف الناس الطلعو فى المظاهرات ديل ادميين عندهم حوق بدليل انو اشكالم مرطبين ولابسين جينز وفاطرين كويس وشاربين شاى بالكيك بالينسون ونحنا يا صديقى محتاجين لمظاهرات اولا لاثبات الادميه وبعد داك نشوف المطالب والذيادات !!!!!!!!!!!!

  42. ابكرون كتب:

    ودور الشعب التونسي تاني ولابد من اقتلاع (بقايا مايو )وسدنة بن علي. وحزبه…..! تخيلوا رئيس الوزراء الغنوشي بتصل هاتفيا ببن علي في السعودية ويطلعه علي الموقف هههههههههه…..!

  43. ياسين شمباتى كتب:

    نيام..
    تسلم يا حبيب,,اها انا قلت متبرع احكم,عايز ود الخلا وود البركة يدونى رايهم فى حكمى دا !
    بعدين اها تونس والامن عاد ليها,,واى انتفاضة او ثورة او حركة تصحيح لابد من وجود ضحايا,,ومبارك لى تونس وعقبااااااااالنا..
    غايتو يا نيام كان طردتونى بمشى رفاعة ! كع..

    مشاكل..
    اسه تونس دى القادها منو!؟؟ وهل انتفاضة ابريل كان وراها حزب او نقابة؟؟ هؤلاء يسرقون الثورات فقط..

    ابكرون..
    دا عشان تعرف انو بن على ما كان ساهل ابدا ولسه عندو نية الرجعة ! وحقو يغنوا ليهو (فراق الزين)..هههههههههههههههههههههههااو..

  44. ( أصدرت الأمانة العامة لهيئة علماء السودان فتوي شرعية حرّمت فيها قتل النفس حرقا للتعبير عن الرأي ووصفت الامر بأنه دليل علي ضعف الإيمان ويؤدي إلي الخسران المبين في الدنيا والآخرة.

    واشارت هيئة علماء السودان الي وجود العديد من السبل التي يستطيع الإنسان أن يعبر بها عن رأيه بما يوافق الشرع وان صحة المقاصد يلزم فيها صحة الوسائل فالغاية النبيلة في الإسلام لاتبرر الوسيلة الحرام. واوضحت الهيئة أن الفتوي جاءت ردا علي اسئلة عدد من المواطنين حول شرعية الإحتجاج باحراق النفس التي بدأت في تونس ثم انتقلت إلي بعض البلدان العربية في الأسبوع الماضي بدعوي ان إحراق النفس القصد منه التعبير عن السخط علي الحكام و الرفض للأحوال الاقتصادية والسياسية

    وهنأت هيئة علماء السودان في بيانها الشعب التونسي بثورته المباركة ووصفتها بأنها درس للشعوب المغلوب علي أمورها وللحكام الذين يعادون قناعة الشعوب بعقيدتها , وأكدت ادانتها لكل محاولة لإفراغ ثورة الشعب التونسي من مضمونها الإسلامي الثوري النبيل. )

    اها جاكم بيان من العلماء

  45. زووووووول كتب:

    طارق اب احمد سلام
    بالنظر الى تشكيلكم جكومه (بالجاء ) عاليه والى تخطى الاختيار لشخصنا القوى الامين فاننى ومن هذا المنبر اعلن معارضتى للحكومه المذكوره وساقوم بتكوين حركه (مسلحه طبعا ) للدفاع عن حقوق المهمشين وساقوم بالاتصال بالحكومه الاسرائيليه (الما موقره ) .
    بقية المعلومات تجيكم وراء بعض فكونو معانا (بالبلدى كدا)

  46. aflaiga كتب:

    يا جماعه اغرب حاجه سمعتها اسى دى انو تونس المنتفضه دى العلاج والتعليم فيها كانو مجانن والمويه مجانن ( مجانن بدون تنوين ) والكهرباء شبه مجانن – وبعد ده برضو انتفضو اطرف تعليق واحد قال عليكم الله ناس السعوديه ديل ما بيدونا بن على شده خمسه سنه ههههههههه

  47. aflaiga كتب:

    اعلان عن رئيس سابق يرغب فى حكم اى دوله تحتاجه :
    يعلن السيد الرئيس السابق بن على ( حاكم تونس السابق راجع تاريخ تونس ) عن رغبته فى طرح خدماته الرئاسية على البلدان التى وضعها الان اسوا من وضع تونس عند الانقلاب عليه وخلعه – على ان تكون مدة العطاء اربع سنوات يتم فيها كتابة تعهد من الشعب بعدم عمل اى هركات نيرانيه او بنزينه لحين تنفيذ برنامجه وهو ايصال هذا البلد لوضع تونس قبل الانتفاضه عليه – بغض النظر عن مسائل الحريات واللازى منو والمضايقات الامنيه وما شابهها من كفوف البواليس !! على اى دوله ترى فى نفسها اقل حالامن تونس قبل الثوره وترغب فى الوصول الى حالة تونس الاتصال وتقديم طلب مشفوع بدمغه قانونيه ..
    يا جماعه لاول مره فى تونس يرفع النداء للاذان ويتم وقف البث لحين سماع الاذان …………

  48. monamie كتب:

    اها يا جماعه عدوة الحريق ( الشواء) وصلت السودان قالوا طالب جامعي باحدى الجامعات السودانيه حرق ملابسه بعد ان تم اقناعه بان لا يحرق نفسه ساكت لان بضيع شمار في شوربة ماجي ومافي انتفاضه ح تحدث فقام حرق ملابسه كبروفه

  49. عزت كتب:

    مونامي سلام…. انتي عارفة ناس حكومتنا يسمعوا بالحاجة دي يقوموا يزيدوا لينا سعر البنزين تاني..!!

  50. ياسين شمباتى كتب:

    استرايكر..سلام..
    تحب الشعللة زى عيونك !!
    والله يا حبيب انا امس لما قريت الفتوى دى فى التلفزيون لما اشمأزيت ! ياخ الانتحار انحنا عارفنو حراااااام,وما اعترضنا على حكم ربنا,والمنتحر دا عند ربو يحاسبو ويوديهو محل ما يوديهو..
    لكن الهيئة دى ما عرفت انو الحلفلات مدوها ساعة كااااااملة؟؟ما عرفت انو الدولة بتدى تراخيض لبيع الخمر والمسكرات فى الفنادق ذت النجمات الخمس؟؟ما عرفت انو الدولة فرطت فى ارض مسلمين؟؟ما عرفت انو التصاريح تمنح ععععادى لمحلات الشيشة والتمباك؟ما عرفت انو الحكومة ساكتة عن تعاطى البنات للشيشة وسائر المحرمات؟
    معقولة بس الهيئة ما عندها شغلة غير (تحريم سفر الرئيس والاستفتاء والاحتجاج والخروج على الحاكم)!؟؟ ما بصدق لكن…

  51. ياسين شمباتى كتب:

    ابكرون…سلام..
    انت حقار بس! يعنى فلاحتك فى زين العابدين وما شايف باغبو دا !
    ياخ دا كيفنى للباطوس_على قول زووووول_ انتخابات مرتيين ما فاز,والشعب طلع مسيرات احتجاج والنار ولعت,حلف ستين يمين ما يفك الكرسى..هيييييييي مقدرة..كرسى السلطة دا حلو حلا …
    والظريفة انو قال للرئيس المنتخب (الحسن بن وترة) انو مستعد يقاسمو السلطة !
    والله رجالة وحمرة عين جد جد..

    زووووووول..سلام..
    عرفتك بتقلبها ! عفيت منك.

  52. ابكرون كتب:

    يعني الببزغ ده والغنوشي مكنكشين جنس كنكشة
    سيدهم وولي نعمتهم ما كنكش كده ومظاهرات يومين بس قام جاري ديل مش بالغوا 8 يوم مظاهرات ولابدين ، لكن يبدو ان هناك قوي اقليمية جاره وواخري جاره للجارة قالوا ليهم ما تحلوا الحزب وما ترضخوا ……والنشوف آخرتهم شنو شايف الجيش اعلن اليوم حمايته للثورة …!

  53. ياسين شمباتى كتب:

    هاك الاحمر الوهاج دا !

  54. aflaiga كتب:

    شمباتى : غايتو جنس غايتو الواحد تقول عندو عمى الوان اسى الاحمر وين هنا – مصطفى ووردى وغيرهم ملك للشعب السودانى اختطفهم الحزب الذكى واضافهم لرصيده .

  55. ياسين شمباتى كتب:

    الفى الحبيب..
    اسه انتا مالك تبنت راسك!!؟؟ انا قصدى الكرافتات وكدة!!
    بالمناسبة الاغنية دى انا خاتيها فى صفحتى على الفيسبوك ومعجب بيها جدا جدا..
    غايتو جنس تخلع !

  56. ابكرون كتب:

    ( وشرفي الماركسي) مكشنهم …شديييييد ….. اخير الجبهجية
    بالله امال النور سيوعيه انا قايلا من ود رعيه ……!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s