كسّير التلج الرسمي

Posted: الإثنين,24 يناير, 2011 by عزت in اخرى

يبدو أن المتحكمين في شئون العباد من الحكام قد شعروا بأهمية المسئول الأنثي فصاروا يدفعون بها في كل محفل ولم تخيب أملهم في مهامها الجديدة وما الانجازات الغير مسبوقة التى باتت تتحفهم بها كل انثي تقلدت منصبا حساسا قد يكون محفزا بأن يدفع بالمزيد من المسئولات ليزينوا كل المحافل بالوجه الحسن المقرون بالكياسة وحسن التصرف ويخلونا من ناس (أمين حسن عمر) وما تعاقب من شاكلته في مفاوضات الدوحة وأبوجا ونيفاشا وغيرها من طاولات ودهاليز المفاوضات (الماجابت ليها لليلي) اتفاقية عدلة ريحت العباد…. فمن هنا حقو ناسنا ديل يعتمدوا خط ناس (الناها) التي تميزت في العمل الدبلوماسي الرقيق والذي بهر وزراء خارجيات بل رؤساء معظم الدول الذين باتوا يتوقون لرحلة منها لبلدهم حتى يوقعون معها ما استعصى توقيعه مع رصيفها السابق (الراجل) وزير الخارجية…..

وعمك أوباما قد ادرك بحسه الأفريقي بأن الأفارقة والعرب لا يقولون لا لأمراة فكانت “مرت” كلينتون التي فاقت رصيفتها (رايس) بالحسن والضحكة الحلوة فما ذهبت لمكان حتى أضافت اليه السحر وطلعت لبلدها بي فايدة….

لكن الجديد أن يلحق الجماعة الاسرائيليين ويركبوا الموجه عندما فطنوا لذلك وعهدوا للحسناء (ليفني) وزيرة للخارجية ونائبة لرئيس الوزراء والتي اضفت جمالا على السياسة، حيث وصفها المراقبون بالجمال اليهودي والساحرة في الـحَدْسِ والظن والـحُكْمِ، التي خدرت بتعاويذها رجال اسرائيل فنالت ما ارادت، وتعدت بحسنها خارج حدودها  وحضرت ديمقراطية الدوحة وألقت محاضرات على الجمهور حول السلام و الديمقراطية. فضلا على اطلاقها هناك أيضا فكرة جريئة ..وأَسْبَقت القومُ إِلـى جبهة اعتدال تضم اسرائيل ودول الاعتدال….. لكن قصب السبْق في الدوحة، ان ايادي عربية امتدت بكل ثقة مصافحة الحسناء ليفني، وهو امر عدته ليفني غاية في الاهمية…. عندما حسبه العرب انه كرم عربي أصيل يتزامن مع حسن استقبال الضيوف فهناك من ضحك في وشها  مثل (عباس) وهناك من أضحكها مثل (قريع) حتى بانت نواجزها ونحن ما عارفين لليلي (قال ليها شنو)….

ولكن العارفينو ان هناك وثائقا سرية طلعت بعد الضحكة دي بأن السلطة الفلسطينية تنازلت عن المطالب بإزالة كل المستوطنات الإسرائيلية في القدس الشرقية باستثناء مستوطنة جبل أبوغنيم أو “هارحوما” بحسب التسمية الإسرائيلية، وأبدت استعدادها لتقديم تنازلات غير مسبوقة في الحرم الشريف وحييْ الأرمن والشيخ جراح.

والا المصري كمان بيلعب معاها….

يا بختهم ويا بختهم بالدبلوماسية الناعمة ويا حسرتنا ويا حسرتنا ويا لغبائنا لعدم استخدام ذلك السلاح (انشاء الله بي طاقم مذيعات النيل الأزرق) الذي ربما وربما كان جاب لينا حاجة أحسن من الانفصال أقلها (زيجة) بين الجنوب والشمال كانت لتعضد الوحدة…..

Advertisements
تعليقات
  1. عباس ركس كتب:

    ومعاهم نسرين سوركتي وسلمى سيد مية مية – ح نفوق العالم اجمع !!!

  2. ابكرون كتب:

    لكن يا عزت الثلاث الاخترتهن جلكانات ودفعة ناس هنا معانا وما بربشن ليهن زول …..لكن برضو احسن من قميئات المؤتمر ناس شنو كده حسن خليفه واثبت يا بطرس وساميه منو ما عارف

  3. قرن شطة كتب:

    د. عزت
    ياخى نسوانا مامنهم فايدة ، كان رسلناهم للخارج عشان يباصروا لينا مشكلة ح يجيبوا (عدة) لنفسهم وغالبا مايشتروا هدوم وكريمات!! المسالة مسالة وعى وثقاقة ومعرفة مش آى حاجة..وبعدين بنات النيل الازرق ديل لقوهم وين ومن اين آتوا ؟ بل من هم ؟ كما قال الطيب صالح…حكاية تطمم البطن والعياذ بالله…الواحده (بوتيك) لحالها…مكياجات وتياب وربما روائح والرأس فاضى (قرقاعوبة) تقول لى دبلوماسية نسوان!!

  4. aflaiga كتب:

    عزت :
    هو : ياخى شغلك ده عذبنا وجهجه حالنا .
    هى : هوووى انتا من اخدتنى عارفنى شغاله
    هو : شغاله ااى لكن زمان مشيه بالترحيل وجيه بالترحيل مافى تاخير
    هى : زمان انا كنت موظفه عاديه اسى انا مراه قياديه وعندى مسئوليات لازم تكيف وضعك مع القصه دى .
    وجاء يتابط تكييفه سغنتوتيه بعد شهر … والحنه فى ايديه ..
    هى : ده شنو العملتو ده ؟؟
    هو : ما كيفت وضعى عشان انتى قياديه وما فاضية جبت لى واحد قاعديه فاضية !!

  5. عزت كتب:

    لكين يا قرن الحكاية دي يحلوها كيف….

    جميع من اعتلى منصات التفاوض من الرجال ما جابوا لينا نتيجة…. “شيخ علي” قدم الجنوب في نيفاشا على طبق من ذهب للحركة الشعبية، وناس ابوجا ومن لف لفهم ما قدروا يفهموا ناس غرب السودان ولم يقدروا عليهم بل هم ما زالوا سائرون في غيهم ومعهم ناس الدوحة كل يوم جايبين لينا هوا من حتة…. وربنا يستر علينا تقوم تجي رياح من منطقة جنوب النيل الأزرق حسب ما رشح مؤخرا… يقوما يرسلو بتاع “الانتباهة” يفاوضهم يقوم يجيب (ضقلها يتلولح)….

    ناسنا يا قرن وأبكرون وركس ما بيقروا قبل الاجتماعات وما بيعملو (رهيرسل)….. عاملين فيها تفتيحة … وهم ولا تفتيحة ولا حاجتين… ومقدمات البرامج زاتم عندنا ما بيقروا عن الموضوع بس فالحات يتلبسن ويجو يأشروا لي الضيف بالأصابع المقمعة بالحنة….

    هسة نحن شيتا ممغسننا ومطلع عينا في الاجتماعات شنو… الواحد ترسل ليهو الورق قبال اسبوع… يجيك الاجتماع كان ما نسى الورق الجاي يجتمع به… يقوم يقراهو أثناء الاجتماع ويضيع لينا وقتنا ويكون فكرة عن الموضوع عن طريق مداخلات الناس وفي الغالب تكون انطباعية ولاتخدم لا الاجتماع ولا مهمته ولا الهدف الجايين من أجلو….

  6. عزت كتب:

    مش بالله أخير ليهو يا “أفلي” يكيف وضعوا ويتكيف…

  7. طارق أب أحمد كتب:

    يا عزت بناسبة الورق فى الأجتماعات
    أعتاد العضو المنتدب بتاعنا أن يجلس بجوار مهندس كبير فى أحد أكبر المشروعات الحكوميه فى إجتماعات المشروع و كان دائما بلاحظ أن المهندس يقرأ من مذكره فاضيه و يتحدث بلغة الأرقام و المعلومات الفنيه الدقيقه من راسو و هو ينظر للمفكره الفاضيه
    أخيرا سأل العضو المنتدب المهندس عن مغزى أن يستعمل المفكره الفاضيه أثناء الحديث عن التفاصيل فأجاب :- الناس ديل لو ما شافونى بقرا فى شى بقولوا أنا كضاب

    نجى لى موضوع الدبلوماسيه الناعمه

    ياخى المرا الفرنسيه بتاعت الخارجيه دى شترا شتاره موبالغه ,,, تصدق قبل زين العابدين بن على ما يشتت بى كم يوم طلعت بيان معاهو ضد الشعب الهمجى دا ,,,,, و قبل كام يوم زارت غزه و صرخت بأنو الجندى الأسير يجب أن يعامل معاملة أسرىالخرب و لم تتطرق لمئات القتلى و المغتالين و المصفيين و المعتقلين و المشردين شفت ليك شتاره زى دى

  8. طارق أب أحمد كتب:

    علا كلينتونايه دى سمحه و كمان عزاله ما سدقت الود كلينتون بصبص ليها قامت أنشبكت فيهو تدينى أسمك و عنوانك و من ديك و عيييك

  9. نيام كتب:

    هسع يا عزت سيبي ليفني دي بتضحك كدي اصلو قريع دا قال ليها بعرسك و بجيب ليك طقم ملايات

  10. عزت كتب:

    والا يا نيام يكون قال ليها بعرسك وبعدين بوريك الويل وسهر الليل….!!

  11. قرن شطة كتب:

    دزعزت …سلام
    يعنى القصة مامنها فايدة منتظرة! شيخ على وشيخ منو كده ماعارف ماعملوا حاجة بس جابوا لينا هوا وشديد، طيب موضوع النسوان ده خليهو خالص ، واهو اب احمد قال ليك حتى الفرنسية طلعت شترا وماعندها حس بالمشاكل والصعوبات التى يعانيها الفلسطنيين! اما السودانيات فديل بعيدين زى خمسين عام ضوئى من الاروبيات ولايمكن الركون اليهن، امورهم تامرية واحيانا عويرة وبايخة..على كل حال نحنا اصلا مقصيين من آى حاجة ومنتظرين ماتاتى به الرياح أو (الهبوب) ومااظنو يكون خير لاعلينا لاعلى البلد التى لاوجيع لها…

  12. نيام كتب:

    عليك الله يا عزت شوف السودانيين ديل مسكنتم دي و خجلم دا ياهو العاملها فيهم شوف عباس حاضن الكلنتوناية كيف شوف قريع بضحك في بت ناس ليفني كيف سمح شوفو ابواللقيط دا بلعب مع البنية لعبة هاي لوفلي …وكبيرنا قاعد يطقطق في اصابعينو مع بت الناها…عليك الله يا ابكرون ماياهو داير ليهو نجيلة يخرتها….

  13. مُخير كتب:

    الحلوين سلام
    وخميسكم مبارك
    هههه الله يجازي محنك يا نيام ويجازي قبلك أبكرون الجاب البلاوي،
    طبعن يا شاعرنا الكتابيات ديل طالعات ليها، عشان كدة ما بيرجفوا زول، لكن زولك راجل المرتين ده الثبتو التوب وطقطيق الأصابع ده بيفضح عشمو يا ربي يكون داير التالتة لكن ملاوز لأنو عارف التالتة واقعة ….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s