فلاش مليان ..

Posted: الخميس,10 فبراير, 2011 by aflaiga in اخرى

احتجت فى احد المرات الى شراء فلاش لمساعدتى فى ملفات العمل ونقل البيانات الخاصه فذهبت الى اقرب تجمع للتقنيات فى السوق العربى وسالت عن فلاش وهالتنى الاجابه ومن ثم اندهشت لتفاصيل الاجابه :
افليقا : ياخى لو سمحت عاوز لى فلاش .
هو : ( بعد ان نظر لى مليا ) يا ابو الشباب دايرو مليان كم قيقا ؟؟
افليقا : مليان كيف يعنى داير فلاش فاضى جديد شنو مليان كم قيقا ؟؟
هو : معليش يا ابو الشباب هاك ده فلاش جديد فاضى .
افليقا : شكرا ..
تعجبت من السؤال الاجابه واستشرت صديقى وجدى ماسوره الخبير فى شئون السوق :
افليقا : يا ابو الوجد الحصل كيد كيد كيد ده معناتو شنو ؟؟
ابو الوجد : يا مان انت مسكين ولا شنو ما فهمت قصد الزول ده ؟؟
افليقا : والله ما فهمت يعنى شنو ؟؟
ابو الوجد : تعرف يا مان الفلاشات انواع وحسب الماده والجوده بتاعتا ونوعا
يعنى مثلا عندك فى فلاش اغانى وفى فلاش ادعيه وفى فلاش مدائح وفى فلاش فلاشات وفى فلاش لا مؤاخذه ثقافى وفى فلاش برامج وفى فلاش حنك سنين . يعنى ببساطه حسب ذوقك الناس دى بتجتهد توفر ليك الماده فى فلاش بدل ما تتعب انت وتلمها من السوق والاجهزة وموبايلات الناس وفلاشاتا .
افليقا : طيب ما تشوف لينا فلاش …
ابو الوجد : طيب ما كان من الاول ..

حقيقة التقنية فى بلادنا وبعبقرية شعبنا السلبية والايجابية يتم توظيفها بشكل اشبه بقدر ظروفك فى الكريمات والعطور .
دعونا نناقش توظيف التقنية لدى شعب الامزون .
كسره جبراويه : كدى تحت كده فلاشاتكم مليانه ولا جديده ؟؟

Advertisements
تعليقات
  1. aflaiga كتب:

    صديقى س وبينما زوجته تقلب فى اللابتوب ( طبعا بعد خلصت تفتيش الموبايل وفتشت الجيوب وقرت الانطباعات الجا خاشى بيها من بره وشمت الريحه ومرقت عاينت للترحيل الجابو فيهو منو !!! ) لقت فى اللابتوب مواد ثقافية :
    هى : ده شنو ده يا س دى اخرتا تعاين بره طيب ما تعاين جوه اول شيئ !! ( يبدو ان صديقى س نظرو طويل !! )
    س : فى شنو ( مستنكرا بشده ) مالك ؟؟
    هى : تعال عاين ده ولا هو ذاتو مافى داعى تعاين تانى !! ده شنو الفى جهازك ده ؟؟
    س : فى سره الله ينعلك يا حسونه ( حسونه ده الجاب ليهو الفلاش الاخير ) !! فى شنو وبدا يراجع فى الجهاز .
    ااا تخيلى الليله شلت لى ملفات من صحبى افليقا خاصه بالشغل والغريبه عملت ليها مووف طوالى للدسك بتاعى بدون ما اشوف لو فيها حاجه خاصه معليش والله بدون قصد يعنى ؟
    هى : وافليقا صحبك ده البحضرو حاجات زى دى شنو وده جابو هو ليكم متين ده كمان ومعرس ولا لا ؟؟
    س : لا لا ده جديد معانا وزلو اصلو انا ما ارتحت ليهو لكن مضطر انقل منو تعرفى يا روحى ( طوالى قلب الكلام حنانات ) الدنيا دى غريبه جدا تعرفى اى زول انا ما برتاح ليهو بطلع كعب !! ( فى سره والله انا انتى ذاتك ما ارتحت ليكى ) ..
    هى : خلاص دى اخر مره فاهم ؟؟
    س : حاضر يا روحى خلاس يلا فكى الزعله دى ده موضوع هايف وانا افليقا ده بكره بوريهو ..
    كسره :
    افليقا لا علاقه ابدا بالفلاش ولا الدعاش ..

  2. aflaiga كتب:

    طبعا انا عراف انو البوست ده بيجيب مشاكل : اسى ابكرون يعنى ممكن يقول عاوز فلاش مليان نانسى ولا البشاوى يقول عاوز فلاش مليان انتى فيروسات – ولا ولدنا يقول عاوز فلاش مليان خلفيات اسلاميه ؟؟ غايتو الما بقدر يقول ما بقدر يصرح يقرا ساى ..
    حكى لى احدهم ان مسئول كبير جاء يحمل فلاش فيه عرض لخطة مؤسسته للعام الجديد ومن يومها فى المصلحه الناس ينبادولون مواد فلاش المسئول بالدس …

  3. قرن شطة كتب:

    اخونا / افليقا
    كنت داير اكتب ليك تعليق فى موضوع الفلاشات ده بالمهلة لكين مستعجل شديد (نظام المعايش جبارة يافردة) على كل بمشى أحنك البشرية المنتظره وبجيك بعدين…موضوع مثير للدهشة وغريب الاطوار ولو أنو بقى مافى شىء غريب فى كاراكوبيا الإنتحادية…تحياتى ياحصيف ياحريف…..

  4. البشاوى كتب:

    اصلو افليقا دة بلا الكتاحة بيجيب شنو – الكلام ليك يااسترايكر مالك منطط عيونك كدة ؟
    اصلا مباحث امن الدولة ( القطاع الخاص) بتدخل الزول فى اضافرو عديل — يعنى حملات التفتيش التعسفية التى تتم فجاتن للجيب والموبايل واللابتوب دى مسألة تحتاج للاحتجاج لمنظمات الايه كدة التابعة لمنظمة للامم التناطحة – مع وقفة اعتصامية عنيدة لحدى ما المجلس الاعلى للجيش يطلع بيان -بعد عبنا ماطلعت – اقترح على الرجال الفضلو عمل حجبات للموبايل ومحاية للابتوب ووضع عقارب فى الجيوب-

  5. مشاكل كتب:

    سلامز

    يعني أنا ما براي … كلنا في الهوا سوا

    أحمدك يا رب

    حاج السلاوي و أبكرونا .. عبرووونا و أفيدووونا

  6. البشاوى كتب:

    يادوب بوست افليقا القنبلة دة حيلقى رواج بعد سهر مبارك السهرنا ليهو دة – اها يافلقة تانى بتساهر قدام التلفزيون راجى منو تانى يتخارج ؟ شيل شيلتك تانى سهرك محدد بإتجاه معين –

  7. حنين كتب:

    أبو الافالق والجماعة
    كيف أخباركم
    والله موضوع الزرزره دة برنامج يومى وهو بعد ما تجى :
    أها الليلة الجا معاك فى العربية منو (.دة طبعا بعد مايركبو جمبك فى العربية ويشمشمو ) ولاقتك وين وقالت ليك شنو وهى ماتركب المواصلات تركبا الشعتانة .
    الرقم الضرب ليك الساعه5:12 دة منو ومالو داير شنو .
    الرسالة دى الرسلا ليك منو وعندو عندك شنو .
    الريحة دى لقيتا وين .
    أحلف ؟
    شكلو كدة الواحد يوم القيامة بقولوليهو الاسئلة الجاوبت عليها فى الدنيا نجحتك وبعد كدة الجنة طوالى ….

  8. البشاوى كتب:

    العزيز حنين — انت الجماعة البيسألو ديل ماركة واحدة ولا شنو؟ تعرف انا اى زول بعرفو بيتلقى نفس الاسئلة – اظن المنشور الاتوزع ليهم مافيهو اى تعديل – مش مفروض يجددو شوية مع تغير الانظمة والشعارات والايدولوجيات وثورة الاتصالات البقت تقلب الحكومات دى – ياخى ديل مايقلبو حبة كدة – وللعلم انا الان فى طور الاعداد الفنى لجعل هتاف اولاد التحرير ( الشعب يريد اسقاط النظام ) نغمة للموبايل تخصص فقط للمدام -والعاوز يشترك عليه الاتصال بأفليقا لتحميل النغمة —

  9. aflaiga كتب:

    بشاوى : افليقا جاخز ونزل النغمه فى الجهاز والوصلات والتنزيل من عندى مجانا دعما للثوره المباركه
    وكمان فى نغمة اضافية ( الشعب يريد محاكمة الرئيس ) – ( ارحل بقى عاوز اتجوز ) !!!

  10. ودالخلا كتب:

    سلام ياقبيلة،،
    الهتافات المضادة (أبقي راجل وتعال قابلني)، (أبقوا رجال وقدر الكلمة)، والحكومة تريد قهر العشر القام ليهو شوك،،،،
    وأنتو عارفين طبعا” الكلمة المقصودة،،،
    وكلمة منك حلوة ترررم ،،، كنت مستنيها،،، الفؤاد طاويها واللسان خافيها، لم يوم قلتوهاااااااااا…
    ترمرم تررررم تررررررررلم..
    قال هتافات ونغمات موبايلات، هو غير تعملوها نغمات موبايل فيكم واحد ينظق بيها قدام الحاكم العام العسكري،
    والله يا هو ده الفضل كمان، وشوووووووووووووف بالله ديل كمااااااااان، والله رجالة آخر زمن!!

  11. ابكرون كتب:

    سلام
    بشبش : وبعدين مفروض يراعن عاااامل السن مووووش…لكنهن عااارفات كلما زادت السن زاد الجن
    سلامز : انا بره زووووولك عندو ملفات +45 لمن القي الرقم ده يا طلعته السطوح يا مسحتو ههههههه
    —————–
    قصه حقيقيه من بلاوي الحكومات المحلية في اجازة العام السابق الجوال يرن وزميلة تدوين تريد حمدلة السلامة :
    ترررررررررن ترررررررن :
    حتشبسوتنا : ايووووه منو ؟
    شلااااقه : اتربشت آآ …هو اصلو….بسال ع ع ابكر… ابكرون …في…؟
    حتشبسوت : منوووووو ؟كمان جابت ليها فلات…….؟
    ——————————–
    كسيرة: شكيتكم لي الله مالكم علينا عايزين بوست اساغه يدور تاني

  12. نيام كتب:

    افليقا ، بشاوي ، حنين:
    بالله انتو لسه في اولي البيوت تانية الفصول !!!نحنا بقولو لينا و من وين عرفتو جميلة بوحريد و بن قنة دا عندو كم بت غير جمانة نمور ..و البيب بيب البي الليل دي رسالة و لا البطارية نزلت و بس…

    ودالخلا:
    ضي القبيلة الحادي
    كيفن الخبر كان جاي و كان بي غادي
    جمال مبارك قبيل ثورة 25 يناير بايام سأله احد الصحفيين
    – حتردو علي الولاد دول بتوع الفيس بووك دول ياسي قمال؟؟
    – جمال – (يضحك بسخرية ) رد عليه يا حسين !!! (وانا لا ادري من هو حسين ) و لكنها كانت اخر كلمات جمال مبارك في اخر اجتماع مجلس شعب قبل ان يركب طائرته الي الاراضي الهولندية في رحلة one way ticket
    – و ترم تررم ترم ….(اطن العشر بقوم ليهو شوك سريع الزمن دا)…

  13. ابكرون كتب:

    نيام ههههههههههههه
    حسين ده حسين عبد الغني مدير مكتب الجزيرة السابق بالقاهرة ولو ركزت في الفديو جالس قدام شفت الوله جمال استهزا كيف بشباب الفيس….يضع الله سره في اضعف خلقه ….باعوضة فما فوقها

  14. مُخير كتب:

    الشليق أبو الأفاليق

    الحلوين الما عواليق

    سلام صادق ومحبة دافقة وإحترامات وأشواق وإنفعالات ضعف ما لدى المتظاهرين في ميدان التحرير وبقية أرجاء أرض الكنانة.

    أبو البش: إنت راجل قدوة ونحن لن نتردد في ترشيحك للجنة الحكماء الشاحدة الإمام من الريس، أصلو الولد أفليقا ده عيارو فالت وبايع وجنابو أبكرون برضو كلاهما لا بعرفا حياء أو خوف وبناء عليه نلتمس منكم عدم التجرجر إلى أية مواقف هزيلة، نحن رجال السودان شيباً وشباباً أبنمشوا (كردفانية حلوة مش!؟) جنب الحيطة وما أبنعملوا زيطة، بدليل المتجدعين فينا خرطومية سنة ديل وراجين عيسى يجي يفكنا لأن أوكاومبو طلع فشنك وعنده مشاكل شخصية وشنو وشنو، وناس كولوني وكيري ما ضاربين في نمرتنا.

    د. قرنوف: ما قال بجيء مالوا ما جاء؟، خليك زينا أقرأ ساكت ولا أكتب مقالاتك الصُكر على حد تعبير حنين الذي حظي بإعتماد وتثنية من شاعر العصر نيام نيام ليدخل ضمن مفردات قاموس الدانقا.

    ضي القبيلة أسد الخلا: قلت لي “الحكومة تريد قهر العشر القام ليهو شوك،،،” ما يحتاج، سيوف العُشر دُفنت مع المهدي البطل، ماك سامع الحجج والبكاء بين يدي الدانقا، صدق المتنفذ حين قال وأبشر بطول سلامة يا مربع…محكومين مؤبد في البيت والشارع والمسرح ههههههههههههه

  15. aflaiga كتب:

    الحبيب الامير مخير :
    ولقد سمعتك والدموع غزيرة ( بالغاء ) وبكيت حال الشعب فى حالى ..
    عليك الله فلاشك مرئى للعيان ولا ملفاتو مخفية .

  16. مُخير كتب:

    حبيبنا البشوش الودود عبد الودود أفليقا

    الحلوين أينما وكيفما كانوا سلام

    نحن يا حبة مواقفنا مكشوفة وفلاشاتنا مرئية وأوراقنا مفروشة لكن بلا فائدة، عشان كدة العشم في ناس حمودي وعبودي وسروية بعدما رمينا طوبة جيلنا وجيلك وما سبقهما من أجيال وراجين أولادنا السُمر يصنعوا باكر الأحلى ويبقوا أفراحنا بالنمسح بيها أحزان الزمن على قول مصطفى سيد أحمد.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s