المقامة السودانية…

Posted: السبت,19 فبراير, 2011 by قرن شطة in إجتماعية

حدثنا بشبش إبن البشاوى صاحب الطرف والحكاوى ، رجل الملفات والحوارات ومتقصى الشمار والشمارات قال: أطل علينا بالامس وخفية دون أن ندرى او نحس رجل تحيطه هالة من وقار وتحفه روائح السعد اينما سار  ، عليه ملابس بيضاء ولحية عطرة سوداء ، وكاننا به يريد أن يقول احاديثاً كثيرة ويدلى بالتصاريح المثيرة الخطيرة ـ فالتئمنا حوله التئمام الماء عند فم السد واحطناه إحاطة الخاتم باليد …قال الرجل بعد أن نزع اللثام وشكر الله بعد الثناء التام ، تعرفون آنى لكم صديق وجار ونحن حقيقية فى التعاسة سوية ونشرب من ذات المية ونأكل من نفس الإدام والذى لا هو علف ولا هو طعام! فرد أحدهم بموجز القول: انه بوش مخلخل بماء الفول ، فاللحوم الضانية والفواكة الدانية تباع الآن حصراً فى الصيدلية ، ذلك أننا كذا وأنت سيد العارفين ، اصبحنا فعل كرف يكرف مع الكارفين …ومرق يمرق مع المارقين ، وخرج إتخارج مع المتخارجين وصبر يصبر مع الصابرين وانقذنا يارحيم من الانقاذ و الإنقاذيين ..ونعمل شنو نان؟ فالفقر أدقع والله المستعان!

قال الرجل قدمت مسرعاً راكباً الاسفار حاملاً لكم أطاييب الشمار ، وقد لاتعلمون جيداً ماوراء الجسر وماذا تم فى المحروسة مصر! فقد إنتفضا إنتفاضة مضرية بجواركم هنا فى الديار المصرية ببعض من اسباب الفقر المزرية وتأثيرات الرياح التونسية ، ومبارك الله لا فيه بارك واتعسه من جار أن يكون جارك..وهو كما تعلمون رقم فى عالم السياسة وحنك مرموق فى دنيا الكياسة ومع ذلك بالضغط المركزى تنحى عن الرياسة ، وهو الان فى أسوء حالات الإكتئاب فى شرم للشيخ وراء باب من وراه باب ، أما سدنته ذوى الالباب فمنهم للمسائل قد جردا بعد أن أرخى السدول وتاقا الباب ومنهم من شردا تجنباً للعقاب ومنهم من أندمج فى الثورة بعد أن إستغفر وتاب ، فنحن فى الديار المصرية أصبحت ثورتنا امثولة وميدان التحرير شكل أجمل مقولة ، فتحرروا فقد آن آوان الخلاص وإنتو راجين شنو ياناس؟! فرد ذلك الدقن المدفونة ذو الكلمات المعطرة والمدهونة والدنانير المصبنة والمكنونة ، بان زماننا لم يآتى بعد ولازلنا فى مرحلة مروى والسد وأفلام اوكامبو والرد وحيرة وترا وغامبو…ثم لاتنسى اننا أصحاب ذاك الهناى العظيم والحضارى ، وأنت قد لاتدرى به وأنا ذاتى مادارى ، وحكومتنا حكومة الهنا والمنا شبعتنا مغصة وفول ونظريات واحاديث وقول…حكومة توافق فيها الاعراب والعجم والجعول ومشاركين فيها كل المواطنين وحتى ناس بنى شنقول ، ثم أنه وبعد إنفصال  الجنوب المعلول موعودون بطفرة كمية وشريعة افغانية وقفزة نوعية فى عمق المجهول ، خاصة انو البلد حست والبشرية ذاتها نقصت! ضحك المصرى المنتشى ورددنا نحن ياليته يمشى فالرجل اكيد ح يجيب لينا الهوا والهبوب ويفتح علينا منافذ وجيوب….قال ده كلام مانافع! قلنا بس الا نافع ده….يازول إتقى الله رب العباد باسط الارض ورافع الوهاد ، فالزول معجزة بروحه الساخرة ونحسبه ماجوراً كمان فى الآخرة…قال المصرى العارض اين ذاك الشيخ المعارض؟ رد أحدهم متفلت وفى ضل حيطة متلبت: الشيخ جوهو بى ليلو واخدوهو فى إجازة يا حليلو! ولسع الحنك ماكمل ولا المصران إتفشا داهمتو العسكر بالكشة ، وجا أمن الدولة والديشن واخدهو فى فيكيشن….أما الباقين من الديمقراطين والسندكالين والاشتراكين والانتحادين والمنتفعين والمندسين وناس الزيتون والتين والمرتاحين راحة السنين واصحاب الهروات والسيخ وشهداء المسيح ، ديل بقو حروف عطف وادوات للجر يعنى نظام حرت للبحر وفى البحر …قال المصرى المنهد بعد بعد أن تنهد : جاكم موضوع البحرين؟ والملك داك الماسمع بحكاية السبيل والنجدين! المصرى مُصر بالمثال يحرشنا فرددننا باهمال: يعمينا ويطرشنا…حكا راسو والافكار فى راسو لاسو ثم ردد: ولبيا واليمن وارض الجزائر والمحن…قلنا برى ما لنا ومال التعب والجرى…ثم نطا صاحب الدقن العجيبة متيقظاً لاى مصيبة: إنتو يا اولاد بمبة لينا معاكم تاريخ ومصايب وهسع الجماعة فتحوا كمان ملف حلايب ، وبعدين نحنا ناس ساكت مساكين ، ناس قضا وقدر وسبحة ودين ، ومع حكومتنا مادايرين نلعب جرى ونط ، بس هم شوية حقو يرخوا الضغط ، ينزلوا لينا الاسعار البقت مابتهبش بس نار…والوظائف وحرية الصحائف والكهربة والعقربة والفرنبة … وهم كان رخوا الحبل نحنا مابنشدو  ، وانسونا من حكاية شريعة قدو قدو …والثروة والسلطة إن شا الله تنفعكم وانتوا اصلاً ماخايفين ربكم…نحنا الشعب تعبان واقف ونايم وهمنا إنحصر فى العلف عليقة البهايم.. وكمان لو حليتو مسالة العرس والمهور تلقونا فى احسن نظام وابهى طابور  وانتو ذاتكم قلتو الدنيا مافيها خير أو سرور، حينها تلقوا بشرنا دافرين فى شكل أمواج وبحور ، تهتف كالنسور تعيش حكومتنا دهور ودهور…نحنا ياسيدى بقينا ناس داقسة ساكت وتدور وناس محايات وسحائب وبخور وراجين بس فى الجنة هناك الحسان الحور بنات الحور …راجين بس الحور بنات الحور …وتقول لى داير تثور! حل عن سماى وغور….

Advertisements
تعليقات
  1. MUJAHID SHIGIELA كتب:

    والله ياشطة ده قرن دنقابا عدييييييييل كده, بس قبل فترة بسيطة سمعنا التصريحات الشيخية قلنا وحاتك بنخارج ابكجنكي قبل مبارك, بس علي رأي المثل يافرحة ماتمت خدها الغراب وطاااااااااااااااااااااااااااااااار

  2. monamie كتب:

    هاهاها والله لاتعليق بس حلوه

  3. monamie كتب:

    والله يا قرن انا اليوم شفت حلم بل رؤيه غريبه شفت اللهم اجعلو خير طائرتان سقطتا واحده حربيه والاخري مدنيه ففسرتها بان هناك نظامين ح يقعا واحد عسكرى والاخر غير عسكري والله ما اكذب الشينه وانا احلامي كثير ماتتحقق ومجربه

  4. قرن شطة كتب:

    الاخ / مجاهد
    سلام…
    انت عارف دايماً بعد الضيق بجىء الفرج! ونحنا ضيقنا ضيق ليس له مثيل واشرفنا على الموت عديل واكيد ح يطلع النهار بهد هذا الليل …تحياتى..

  5. قرن شطة كتب:

    مونامى
    سلام تعظيم..
    ربنا يحقق الرؤي والامانى ، وكان الموضوع تما ح نعينك (شيخنا) عديل كده وبطريقة رسمية…غايتو كان حلمك ده شوفتو فى السودان يبقى فى كلام ذلك ان طائراتنا كملت زمان! الله يكضب الشينة ..تحياتى

  6. نواعم كتب:

    حقيقة مقال رائع دكتور قرن…. ضحكت حتى دمعت عيناي…. اسلوبك الساخر في مثل هذه المواضيع لا ينافسك فيه احد …. ياريت تمتعنا دايما من غير الدخول في الجدل المحرم… ودمت

  7. ابكرون كتب:

    يا (قرشط) انت ..قهوتك ….ساده ولا ملبوكه……؟

  8. monamie كتب:

    والله ياقرن وماطالبني حليفه انا قبل كدي حلمت بموت الزبير ورويتها لشخص الصباح و الظهر حصل الحادث وربنا احقق الاماني انشاءالله

  9. ابكرون كتب:

    خصمتك بالله يا موني عليك الله ما تحلمي بي نحن اخوااااااات وورانا عياااال!

  10. طارق أب أحمد كتب:

    قرنوف

    رسالتك وصلت ودا أول الغيث
    عمر البشير يبكي عند ما علم بالفساد في دولته
    عقب صلاة الجمعه بمسجد النور صرح سعادة/ المشير قائد ثورة الشريعه والبرنامج الحضاري عمر البشير انه لاول مرة يعلم ان هنالك فسدا في حكومته وتوعد الناس بالتحقيق لاجتثاث المفسدين وذكر ان مستشاريه كانوا دائماً يؤكدون له بعدم وجود أي مخالفات او إنتهاكات للمال العام، و بعدها اجهش في حالة بكاء هيستيري ….

  11. نيام كتب:

    قرنوف:
    بكاك ما بفيدك
    العملتو كان بايدك
    http://www.islamweb.net/newlibrary/display_book.php?flag=1&bk_no=56&ID=3209

  12. البشاوى كتب:

    صغيرتى روان كانت تتابع معى احداث ثورة مصر وبعد تنحى مبارك قالت الحمدلله الله فكانا من الشعب يريد اسقاط النظام دى كدى النشوف افلام الكرتون حقتنا طولنا منها — فرد اخاها حسن بعد مصر حنفتح الجزيرة هشان نشوف الشعب يريد اسقاط النظام فى السودان فردت ببراءة ( واظنها براءة كل السودان ) قالت ليه ماتبالغ ياحسن —

  13. البشاوى كتب:

    قرنوف ———
    من اكل الفول متعه الله بفصيح القول (- قيل حتى وان كان بوشا يوشك ان يكون شمومة فول -) انت اديب اريب تجلس على البترينة مرتاحا ولا تكسر الاوانى بل ترتبها وتنفض عنها الغبار بحرفية عالية فنراها نحن فى كامل الاناقة واللطف –
    ارجوكم لاتحلموا بغد مختلف – فقط اقعدو فراجة – حتى يكمل خليفة المسلمين بكاءه —

  14. عزت كتب:

    (وراجين بس فى الجنة هناك الحسان الحور بنات الحور)

    قنعتو يا قرن…!!
    ناس اب جاغومه وأبو العفين وموظفي ورؤساء المحليات وشنو مابعرفوا عدمو البلد من جنس بنات حور…. انشاء الله ما ينفعوهم….

    مافي واحد يا طارق “قال ليهو بكاءك ما بفيدك (كبرا) وكبرا بتشديد وكسرة الباء هي لفظة شبابية ربما جاءت من كبر الخطوة أي فحط أو شتت او الذهاب من غير عودة… والله أعلم

  15. عقب صلاة الجمعه بمسجد النور صرح سعادة/ المشير قائد ثورة الشريعه والبرنامج الحضاري عمر البشير انه لاول مرة يعلم ان هنالك فسدا في حكومته وتوعد الناس بالتحقيق لاجتثاث المفسدين وذكر ان مستشاريه كانوا دائماً يؤكدون له بعدم وجود أي مخالفات او إنتهاكات للمال العام، و بعدها اجهش في حالة بكاء هيستيري ….

    رد

    يا طارق أب أحمد

    زمااان كانت امى الله يرحمها لامن تدقنى واقعد ابكى تقول : ابكى يبكوا عليك وطبعاً بتقولها من بره قلبها .. دحين فى المصلين ديل مافى واحد قال ليهو من جوه قلبو وايدو مرفوعة لرب السماوات والأراضين ابكى يبكوا عليك ؟

  16. ياسين شمباتى كتب:

    يبكى !؟؟؟؟؟؟؟؟؟؟
    اجى ياااااااا البكا والنخجى الما برفعوا منو دا !!!

    الحبيب قرن..سلام..
    معليش دخلت لفت لكن الكلام وجعنى وطمم بطنى…
    والله ما فضل فيها مقامة,بس فضلت الملامة !

  17. ودالزبير كتب:

    يقوم النظام الآن بمراجعه شامله للأوضاع وبإذن الله البلد موعوده بخير كتير عقب إنفصال الجنوب الكامل في يوليو والشعب يثق في قياده السيد المشير عمر حسن أحمد البشير حفظه الله ورعاه

  18. قرن شطة كتب:

    السادة الاحباب الاشاوس …زكلكم
    إعتذر عن عدم المتابعة فى الايامات الفاتت ، وذاتو ماكان عندى نت…
    مرات الضحك على الشىء أو من الشىء بريح شوية وانا كان قصدى اضحك انا اولاً واخليكم تفشوا المغصة الكامنة فيكم شوية بالإنابة او حتى بالاصالى….
    تحياتى ودمتم ايها الاحباب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s