البخور والدلكه خلنا عقلي لكه

Posted: السبت,5 مارس, 2011 by ودالزبير in إجتماعية, اخرى

والفنان يغني آذي الليله وبكاي الليله حرق بنار الكمائن ديلي

والعزابي الوهم لا يعرف معني البيت إلا بعد إن يتزوج

والبخور والدلكه والكبريت ودي مش عود الثقاب لكنها شئ يعرفه السودانيون وحدهم

هذه أشياء سودانيه خالصه لا تجدها إلا هنا

كل ذلك معروف

لكن الجديد إقامه معرض للعطور السودانيه التقليديه

بواسطه مركز تطوير سيدات الأعمال السودانيات لصاحبته ساميه شبو

وتحت رعايه كريمه من حرم الرئيس

الغريبه كنت أحسبها وداد بابكر لكنها طلعت فاطمه خالد

نعود للمعرض والمقام بفندق كورال ( الهيلتون سابقاً )

في الفتره من 1ـــــــ 8 من الشهري الجاري

إن لم أكن مخطئاً فهي المره الأولى لإقامه هكذا معرض

وهي فرصه للإطلاع على أحدث ما وصلت إليه عبقريه حواء السودانيه

خلوني أزور المعرض وآجي أوريكم الحاصل شنو

لناس الداخل هلموا للمعرض

Advertisements
تعليقات
  1. ياسين شمباتى كتب:

    ود الزبير..سلام..
    والله بخلن العقل لكة ! وانا ياناس الله لى الليلة..
    بعدين مالك مستغرش من رعاية السيدة الاولى ؟؟فهى الاقدم والاعتق والانسب ! اممممممممم

  2. البشاوى كتب:

    اولا عزيزى ود الزبير العطر النسائى دة (وقود نووى ) وممكن يكون اختبار قدرات ليس هذا مكانها — الناس تنادى هلم الى التغيير وانت تنادى هلم لمعرض السجم دة
    كسرة
    كنت اليوم فى احتفال نهاية العام الدراسى لانجالى الصغار وكان مقاما بقاعة الصداقة – مللت من البرنامج الطويل للاحتفال وخرجت ابحث عن ست قهوة فوجدتها عند مرسى معدية توتى الله يطراه بالخير – فجلست ارشف القهوة فسألتنى ماهذه الزيطة والعساكر امام القاعة (فقلت لها ان هذا مؤتمر القدس الثامن ويقام تحت رعاية الريس -) فبادرتنى ست القهوة البسيطة — مالنا على القدس مايسوو لينا مؤتمر يرخص الاسعار – واردفت غايتو ( الفاضى يتعلم المشاط ) وطبعا معروف صعوبة المشاط وصعوبة الصبر على تعلمه – غايتو اسهل منو عمل الدلكة —

  3. حنين كتب:

    ود الزبير والجماعة .
    سلامات
    الحاجات العاملين ليها المعرض دى مسجلة صورة وصوت ولا على الهواء مباشرة يعنى لو الله هون لينا مانمشى بى جلاليب؟ .ياود الزبير وداد بابكر دى الواحد لوشافا صورة بس ….ولاخلاس …
    البشاوى دى زى ماقتا فيها شرك بتاع إمتحان قدرات

  4. ودالزبير كتب:

    البيشاوي

    كتبت
    (وجدتها عند مرسى معدية توتى الله يطراه بالخير)

    كيف يعني يطري المعديه بالخير … وكأني بك كنت تود إن تقول إن الإنقاذ خربت معديه توتي … ثم وجدت الكلام لا يستقيم ففضلت إن تقول ربنا يطراها بالخير … لماذا لم تأتي على ذكر جسر توتي .. لكن نقول شنو ؟؟ في العين التي لا تري إلا النص الفارغ..
    الخرطوم آمنه مطمئنه والناس تذهب للمعارض والمسرحيات والحفلات ولمعرض السجم ده …

    لن تتحول الخرطونم بإذن واحد أحد لقاهره أو تونس أو طرابلس آخري..

    بس إنت ساعدونا بالبعد عن عريان وأذنابه ( لافرق كبير بين عرمان وعريان )

  5. ودالزبير كتب:

    حنين كتبت (ياود الزبير وداد بابكر دى الواحد لوشافا صورة بس ….ولاخلاس …)

    ما تتكلم في السياسه

    ههههههههههههههههههه

  6. البشاوى كتب:

    عزيزى ود الزبير — عندما اكتب شيئا فإننى اعلم تمام العلم الذى يستقيم والذى لايستقيم – هذا بداية ثم
    ذكرى لمرسى توتى ليس غفلة عن رؤية انجازات انقاذك المجيدة أدامها الله لك لتنعم بالخير الوفير — ولكن جاء ذكر مرسى توتى لأنه يمثل لى ولغيرى عبق تاريخ وذكريات كانت فى الزمن الجمبل — ومامعنى قولك أن الخرطوم آمنة ومستقرة وأنا لم اتكلم عن عدم أمن — وإن كان مقياسك للأمن والاستقرار بالذهاب لمعارض البخور والدلكة فذلك لعينى قمة البؤس والشقاء — وأعتذر لك عن عدم فهمى — ولك عزيزى أن تقيس الثقافة والفكر بقراءة الدار وفنون وصحف التابلويد وحضور حفلات الحوت وبلوبلو — كانت مداخلتى لأن ست الشاى عند مرسى توتى كانت تحس بوجع بلد – ولم تهتم بمعرض البخور رغم إنه يهمها – أما بعدى عن عرمان وغيره – فهو شأن خاص رغم إننى لم ألتقيه ولا أعرفه ولكننى أعتقد أنه لم يذهب لمعرض السجم والرماد — ونصف الكوب الفارغ الذى تتكلم عنه– بالنسبة لى فالكوب فارغ كله – ومشقوق كمان –
    – وأرجو أن لايصيبك وسواس ناس المؤتمر بأن الخرطوم ستثور مثل القاهرة وتونس – إطمئن عزيزى فالخرطوم تذهب فقط لمعارض البخور وليس لمعارض الكتاب – ومدينة كهذه لن تصحو من نومها أبدا
    مع تحيات واحترامى

  7. ودالزبير كتب:

    البيشاوي

    بس كده تمام من الجيد إن تظل الخرطوم في سباتها العميق بعيداً عن القتل والخراب الدائر في الدول المجاوره……

    بالخرطوم اليوم يالبيشاوي معارض للكتاب بعفراء ومعارض للزهور بالحديقه النباتيه ومسرحيات بقاعه الصداقه والمسرح القومي وحفلات للحوت بنادي التنس ولودالمين بنادي الضباط وكلامنا ده عشان نوري كميه الأمن والأمان التي تنعم بها بلادنا تحت قيادتنا الرشيده

    مع كامل الإحترام لك ولكل المعارضين الذين ستطول مده إنتظارهم لسقوط النظام

  8. Dakeen كتب:

    هو النظام ده كان سقط ما بتكسر لانه مصنوع من المطاط ويمكن يتشكل حسب المناسبة والخرطوم آمنة من امن شعبها وليس من امانة نظامها فلا تزر وازرة وزر اخرى ،، آلام الاصبع المجروح تنسيك مصيبة السرطان مؤقتاً) عافانا الله واياكم .

  9. نيام كتب:

    Dakeen:
    ما احكمك …فعلا الام الاصبع المجروح تنسيك مصيبة السرطان مؤقتا…
    البشاوي:
    انتا ست الشاي دي كان ادوها مريار و قالو ليها سوي لناس القدس المؤتمرين ديل شاي و جبنة كانت جابت سيرت المشاط…

  10. زووووووول كتب:

    سلام يا ناس ود الزبير وغريمه التقليدى البشاوى
    اولا استمتع حد الثماله بمبارة القمه التى تدور رحاها بينكما الا ن (هههههههههههههههههه) .
    ولكن وبما اننى اشجع اللعبه الحلوه فدعونى اتفق مع البيشاوى فى حديثه عن معرض البخور فهو عندى يمثل المقوله الشعبيه الناس فى شنو … لكن وحتى لا يفهمنى بشه خطأ اقول اننى اتفق مع ود الزبير فى جزئية التغيير وبقاء الانقاذ وادعو من بيده الملك ان يحفظ هذه البلده من كل مكروه تحيكه الحركه الشعبيه ومن شايعها وعرمان وباقان ومن اقتفى اثرهما وان يبعد عنا ثورات الفيس المشبوهه وان يكافينا شر مجلس الامن والامم المتحده وان يهدى ولاة امورنا لما فيه الخير وان يحفظ خرطومنا ويمتع اهلها بحفلات الحوت !! ومسرحيات الاصدقاء ومباريات مريخ البدرى والحضرى .

  11. التركــــى كتب:

    يااخوانا دا كله شئ وشمباتى ياخد البرنجية فى موضوع زى دا شئ تانى خاااااااااااااالص …. ياود الزبير يكون المعرض دا عشان الناس ماتطلع بالليل ويكون الأمن مستتب زى ماقلت ولا عشان خلاص ارتحنا على الآخر وعايزين نشوف الكماليات … معرض الكتاب موجود بس صدقنى تمن أصغر كتاب يجيب ليك تموينك الشهري من المعرض ….. نعم ربنا يحفظ بلدنا من ثورات المبتدئين ونحن كسباقين فى المجال دا لما نقوم بنقوم قومة افضل من سابقاتها …. مع التقدير

  12. ودالزبير كتب:

    أمبارح مشيت اليوم الختامي للمعرض وطبعا دي كانت زيارتي الأولى والخطأ الإستراتيجي العملته إني سقت معايا المدام……………… أما الكلام عن المعرض فإنتظرونا لمن نصيغه ونكتبه ليكم في الإميلات

    هههههههههههههههههههه

  13. عباس ركس كتب:

    سلام :
    بقينا محتارين , ناس المؤتمر الوطني ديل اللي بتدعو ليهم بطول البقاء ياهم ذاتهم اللي بيحرجوا الزول مع نسابتو ؟؟؟؟؟ ولا ديلك مؤتمر وطني تاني ولا القصة شنو ؟؟؟؟؟

  14. والفنان يغني آذي الليله وبكاي الليله حرق بنار الكمائن ديلي

    والعزابي الوهم لا يعرف معني البيت إلا بعد إن يتزوج

    ياود الزبير يا اخوى العزابى الوهم البتتكلم عنه ده بيعرف فى المواضيع دى اكتر من المتزوجين الوهم ,, وبيوت العزابة بتشهد على ذلك ,,

  15. عباس ركس كتب:

    اخونا سامر المدني : اكان جديد معانا مرحب بيك , ولو ليك مدة معانا برضو مرحب بيك .
    بعدين مالك زعلان – ما قلنا كتيييير التعميم مرفوض – يعني في بعض العزابة وهم وكذلك بعض المتزوجون مع انو البوست كله ما جايب راس مالو !!!!
    استشهادك جانبه التوفيق – في رأيي –

  16. ياسين شمباتى كتب:

    عباس ركس..سلام..
    انت مالك محرج كدة!؟؟ يخسى عليك يا سغيل..

    التركى..سلام..
    قلنا نبرنج فى اى شئ ولو كان مو شئ! تحياتى واشتياقاتى..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s