الشعب يريد إحراج النظام

Posted: الخميس,10 مارس, 2011 by طارق أب أحمد in اخرى

حتى زمن قريب كانت إذا تعثرت غنمايه فى الشيشان خرجت المسيرات فى السودان (تندد بسوء الشوارع قى الشيشان طبعاً)
كانت حكومنتا البشيـــ (أووبس) الرشيده لا تفوت فرصه إلا و دعت لمسيره مليونيه
يخاطبها بخطاب مرتجل كيفما إتفق يبدأه ب يااخواننا نحنا محتسبين وناس دين ثم يلعن سنسفيل الشيوعييين و الأمريكان و العلمانيين و أخيراً الإسلاميين ذاتم مرورا بعبارات من قبيل لحس الكوع و ما حنسلم كديسه و انا حصل كضبت عليكم و أحيانا يزيد المحلبيه بعلى الطلاق و قبل النهايه يهتف
في سبيل الله قمنا نبتغي رفع اللواء لا لدنيا قد عملنا نحن للدين فداء فليدم للدين عزه او ترق فيه الدماء
ثم يختمها بالنار ولعت
ويهتف الهتيفه
بالكيماوى ياصدام
خيبر خيبر يا يهود
الرد السد

نلاحظ ان اللقاءات الجماهيريه أنحصرت على الأقاليم فى الفتره الأخيره بخلاف لقاءه مع القوات النظاميه لم تشهد الخرطوم البشير منذ إنقضاء الإنتخابات و لعل السبب فى ذلك أن الخطاب المستفز الذى يفتقر الحصافه
عينة سنعلن الشريعه الإسلاميه و كأنها بعبع مسلط على رقاب العباد و سنعلنها دوله عربيه و كأننا عايشين فى بوركينافاسو نوع هذه الخطابات الحماسيه ما عادت تنجلى على فطنة الإنسان البسيط الذى يتعجب من أن الرئيس يتعجب من وجود فساد بالبلاد و كانه يعيش فى حوش بانقا ريفى شندى

أضف إلى ذلك انه لايوجد ما يقوله للمواطن الغلبان من وعود وهميه الآن فالبترول الذى كان يتشدق بإستخراجه (ببح) و ليس له الآن سوى أن يغنى بأحلام من قبيل انه سيعيد لمشروع الجزيره سيرته
ولعله ليست زيارته للقاهره من قبيل المجامله فربما يحاول المطالبه بما تنازل عنه لمبارك مقابل طى ملف محاولة إغتياله من تنازل عن حلايب و الحريات الأربعه و مشروع الجزيره إلخ
يذهب لمصر رغم أن الله لم يفتح عليه بكلمه واحده فى حق الشعب المصرى المنتفض و رغم أنه يمنع المسيرات التى تريد أن تخرج لتعبر عن تأييدنا و تضامننا مع شعبى مصر و تونس و كاننا فى بلد غير بلد المسيرات هذا
وحتى يطالعنا بطلعته البهيه


نقول له

الشعب يريد العَيْش بإحترام
الشعب يريد لحمه و حمام
الشعب يريد الدوا بإنتظام
الشعب يريد تمشوا و السلام
الشعب ما عايز كُتر الكلام

Advertisements
تعليقات
  1. طارق أب أحمد كتب:

    قبل ما يجينى واحد متلب و يقول لى نقد ذهب لأبو جنزير و لما لم يجد المتظاهرين إلتقط كرتونه من الأرض و كتب عليها (حضرنا و لم نجدكم)

    أقول
    نقد إلتقطته سيارة الأمن كما إعتقلت الذين سبقوه!!!
    و أتساءل
    أين عمر
    و ما هى آخر إبداعاته

  2. ابكرون كتب:

    اب احمد اخوي عمر البتسال عنو ده :
    كان نايم تحت شجره في (بكه) ..سمع في بغله عترت في العراق ….مشي يشوفا…..لكن ظنيتو مات قبل 1500 سنه….!

  3. طارق أب أحمد كتب:

    أبكرون
    زولنا دا لو سمع بى البغله دى كان عمل مفوضيه البغال وعلى رأسها بغل من البغول على رأس جيش من المغول و بالتأكيد سيقوم البغل بإصدار مرسوم لمكوث البقول و منو الحيقدر يقول البغله عترت فى الطريق

  4. عمر مصطفي حاج الطيب كتب:

    ماشاء الله يا أبكرونا

  5. monamie كتب:

    اب احمد سلام لك التحايا
    ميدان ابو جرجير اقصد جنزير ده المفترض المعارضه تدق فيه الصيوانات من بدري يعني قبل يوم من الهجه واعسكروا عشان ما اعطوا عساكر القمع فرصة للتطويق

  6. monamie كتب:

    انا بفتكر المصريين والتوانسه بعد رفع فراشهم امدونا بخيامهم لانها فيها البركه

  7. عزت كتب:

    والا كمان حقات البحرين…. باقي مكيفة

    طبعن ناس المؤتمر الوطني بيفتكروا انو الشارع ما زال معاهم وما عاوز يطلع شان مقتنع بالبسو فيهو.. ودائما ما يروجون (البديل منو..؟)

    أمبارح خطيب الجمعة في مسجد المقرن قال انتو ناس الانقاذ ديل (افتروا واتغروا) لبقائهم في السلطة زمنا طويلا وبعدين هم ينهون عن فعل ويأتون بمثلة….. ألم يقولوا سن المعاش في الحكومة 60 سنة… ما كولهم فاتوا الستين….. وبعدين شنو يعني مجموعة وجوه معينة تتداول في الكراسي…… فلتفتح الدولة أبوابها وتدخل وجوها جديدة من كل أطياف السياسيين ما هي برضو بلدهم برضو… وذكرهم بالآية التي ترسخ لمبدأ التدوال في السلطة ايتاء الملك ونزعه بيده سبحانه وتعالى…. قبل أن يهب الشعب عليهم… فالظلم ظلمات…

    تقول شنو يا مولانا….
    أي واحد في الجلاكين بتاعنهم فات الستين سنة…. يا ربي محافظ البنك الجديد دا جايبنوا (مشاهرة)….

  8. عزت كتب:

    بعدين يا اب أحمد (لحمه و حمام) حتة واحدة…؟
    الغريبة ناس البحرين لاقين اللحمة والحمام وبرضو ما عاجبهم..!!

  9. البشاوى كتب:

    طارق اب احمد – والسمار الاحرار — العسكر كانوا بايتين فى ابوجنزير – هو فى ناس عاوزة تغير النظام بيعملو اعلان – — ديل عواجيز المعارضة يستعرضو فى العضلات ساكت – الناس يمرقو من سكات ولا بلاش —
    ياعزت ناس البحرين دوار اللؤلؤة زى التقول فى باريس شفتو سمح كيف ؟ مش زى ابوجنزير كلو كيمان تراب حمرا – وانقاض – وبعد موقف عربات – الحكومة حتبيعو لى مستثمر عشان يتسور بالزنك وانشاء الله يبنى بعد سنة مامشكلة – بس تانى ماحيخلو لينا ميدان فى وسط البلد

  10. حنين كتب:

    أب أحمد .
    ماحرام عليك تثبت صورة الراجل وهو بتدشا…

  11. طارق أب أحمد كتب:

    حنين
    ما هو دايمن بتدشا إت قايلو هوين دا لاغف 9 مريار ياخى
    عموما كان لقيت لىك صوره أسمح حأختها ليك فى البروفايل بتاعى

  12. طارق أب أحمد كتب:

    البشاوى
    بللاى العساكر كانو بايتين فى أب جنزير ما هو ذاتو ( سهر الجداد ولا نومو )

    لكن ياباش الناس ديل لو باعو ميدان (التحرير) ابوجنزير ما إلا يغيروا إسم ميدان جاكسون للبشير

  13. طارق أب أحمد كتب:

    عزت
    ما شاء الله الخطيب الممكون بتاعكم لسا ما شالوهو

    كلامو خلانى أفكر فى فى ياتو الأفضل ،،،،،،،،المسئول يكون كبير عشان يمكن يكون بخاف الله و لا يكون سغير عشان ما يكون لسه حاى بى أخلاقو الفطيره و روح الوطنبه بتاعت ايام الجامعه ،،عموما الكلام دا لا ينطبق على الكيزان لأنهم مخلوقات جايه من كوكب تانى

    أما بالنسبه لمطلب اللحمه و الحمام ،،،،،،،،،، فا بنرفع سقف المطالب عشان يدونا جداد بس 🙂

  14. طارق أب أحمد كتب:

    monamie
    ((ميدان ابو جرجير اقصد جنزير ده المفترض المعارضه تدق فيه الصيوانات من بدري ))

    يا مون كان أعتقلوا الناس البدقوا الصيوان حيفضل منو للمظاهره 🙂
    عموماً ربنا لامن يقول ليها كونى حبكون و أوسع من رحمة ربنا مافى

    عمر مصطفي حاج الطيب
    مرحبابك و إن شاء الله يطيب لك المقام

  15. monamie كتب:

    اباحمد سلام
    ياخوي الناس خايفه من راس لانوف والزاويه وصرماتا والبريقه والعقيله وطيارات ودبابات ومنصات وحاجات تانيه حامياني عشان كده لااااااابدين وعارفين الاخ اعلاه في الصوره بكون استفاد من اخفاقات زملاءه السابقين واستفاد من بعض الوسائل القمعيه الناجحه التي سيستعملها لضرب الثوار مثل الجمال والحصين والدبابات والمدفعيات والطيارات

  16. يا طارق يا اخوى انت الصادق ده مش قال جاى ميدان ابوجرحجير ده , ماله ماجاء ؟

    عليكم الله الصادق ده وين الانصار بتاعنه الكانوا بسدوا فوهات المدافع بى رييسيينهم؟ أظنهم بقوا مابيسمعوا كلامه والا بقوا يفطوا سطر

  17. ياسين شمباتى كتب:

    الحبيب طارق..سلام..
    واهو النظام باق الى يوم القيام!
    طبعا زيارة مصر دى كانت فضيحة كبيرة جدا,,وما عندها اى معنى غير التحكحك ومحاولة التقرب الى من يظن انهم سيتسلمون دفة الحكم,واكيد فاهمنى!
    اما عن ازالة النظام فكله بيهو يوم..

    والمزعلنى موقفهم الاول من فرض حظر جوى على ليبيا ! دا من باب باكر بجيك شايل مساحات الرجم ولا شنو!!؟
    حسبى الله عليهم..

  18. طارق أب أحمد كتب:

    سامر المدنى
    زمان كان إمام الأنصار لامن ينادى الأنصار بسدوا عين الشمس
    دا إمتحان للصادق لو هو أمام فعلاً و عندو أنصار نقول ليهو جيب ناسك بس خلى باقى الشعب

    شمباتى
    كيف يعنى السودان يقيف مع الحظر الجوى و هو كل يوم بيضرب دارفور بالمروحيات و المقاتلات

  19. ياسين شمباتى كتب:

    طارق الحبيب..
    صدقت والله,,غلطان انا !

  20. طارق أب أحمد كتب:

    البحرين شعرت بالإحراج الذى سببه لها نصب ال GCC تصب مؤتمر مجلس التعاون الذى تم إنشاؤه قبل 30 سه تخليدا لإشاء المجلس و يتكون من 6 أعمده تحمل لؤلؤه تعبر عن دول المجلس

    تخيلوا البديل ممكن يكون شنو

    أما إحراج صالح فكان مبالغه ،، بعد أن إغتال القتاصه أكثر من 45 شهيدا ظهر أبو يمن فى التلفزيون و قال ياخى ديل الجيران إتضايقوا من الخلق الكتيره دى

  21. الصبر يا أهل السودان العيب عمره ما كان في رأس النظام هو راجل تمام وجاهد بجد كمان لكن الكلام في باقي الكيزان الما ماشين تمام وأنا واحده منهم لكن شهادة حق أمام الرحمن البشير تمام وكان مشى السودان بيفقد الأمان ويصير أسوأ من العراق وافغانستان واحسن تصبروا شوية كمان يمكن ربنا يفتكر المخربين علي راس النظام ويعم السلام ويقود البشير السودان بسلام وكلكم تدخلوا دائرة الإطئنان وترضوا عن راس النظام .

  22. عزت كتب:

    ما قلنا حاجة علة (طوّل)…. بعدين يا بتول الليلي كان أدا الناس البسرقوا العين الحمرا ونكل بيهم كان نقول حاول….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s