المقامة السودانية 2 (“شقى الزمان المُجنانى”)

Posted: الإثنين,14 مارس, 2011 by قرن شطة in اخرى

حدثنا ولدنا أفليقا الشهير بعبدالودود ، راجل الحارة وسداد السدود ، ذو الاحاديث الشجية والسيريالية وفايتة الحدود قال: جاء بالامس رجل لا تطرف له عين وذكر بانه قادم من وراء بحرين ، وتاليه آخر ذو لحية مهيبة وبلقاء ويقال انه جاء زاحف من هناك من ارض الفداء ونواحى صنعاء ، راحل من بعيد وطاوى أراضى اليمن السعيد…وفى الوسط شاب للشعر جازى ، عليه ملامح متحرر وغازى ، ذلك أنه محارب من بنغازى وقد أُرسل للتواصل بدون مجاملات او كلمات تعازى…جلسنا مع الاحبة الكرام وجلبنا ماتيسر من الطعام ، فول وعليقة وكيكه وسمسم وويكه…بعد السلام وإزالة الملام ، والكلام بجيب الكلام ، قلنا : إننا فى الحقيقة مذهولين وفاتحين للفوموم ، وذات الفكرة تراودنا ضمن الهموم…بطنا طمت خلاس والجتة عافت الهدوم واللباس …القهر والفقر سببو لينا إلتباس ، والنوم ذاتو بسيط وخزاز ، غمضة الديك فوق الحبل دون إجساس ، ومع ذلك مزازينا فى الحلم وساس! طيب وكيف الخلاص؟ قال الغازى زول بنغازى ، دايرين تاكلوا كسرة وملاح إذن لابد من السلاح! طنشنا منو ذلك إنو جنو يبدو عظيم لصغر سنو…نحنا دايرين الامور تمشى إسموز وبى بشيش نقلع الزير ومعاهو الكوز ، موضوع القصف الجوى بالطائرات والهيلوكوبترات والحوامات وشىء صواريخ وراجمات ، ده “نحسبه” صعيب علينا وقد ثبت لدينا أن الليبى جنو جنا مبينا…نطا زى المهبوش التقول ملبوش وبى حجاب فقير مرشوش أو ادوهو عين زول البحرين ، وحلف بالمغلظ واليمين إنو ثورتهم صامدة سلك وعما قريب سوف يتخارج الملك ، وعلى كل هم فى دوار اللؤلؤة صامدين حتى يتبين الحق من الباطل ويستبين ، نحنا طنشنا تانى وعملنا رايحين! ذلك أن الصمود داير أفكار وحكومتنا روحها مكركرة بى ستين كركار وغالبها تتصرف بعقلانية تب وبس دايرة فينا سبب واكيد كمان مبيتة سوء النية لاى حلم يطل من خيال وليد كان أو بنية… أخونا بتاع الكُرب والمحن ، الزول الجاينا من اليمن قال: انتو ماعندكم ميادين للإحتجاج ليش؟ رد ذلك الدقن المدفون ومحلوق بمنطق عقل وطايوق…حديثك ياشيخ بيش ومافى طريقة مع ناس الامن والديش! وبعدين إنتو عندكم سلاح ونحنا ياحبيبنا فاقدين رغيف وملاح ، وماتقول رغباتنا إنتكست وآمالنا إنطوت وإتلحست..بس يا لاعب الزمن والله غالب.. فى تلك الليلة العجيبة القمراء ، عند النيل حيث تروى أحاديث السراء والضراء…قلنا للزوار الاحباب نحنا ناس مفتحين بس متاقين الباب…قال ذلك الشاب الاملس ومهول وكمان داقى سستم وبنطلونو منصول قال بصوت محبب ومعذب وكتف حنين ومجبجب ونظر مصقول ومكهرب ، من بعد إستخارة وإستشارة وسجدة الليلة انا عازمكم قعدة ، اصلو يا أخوانا نحنا بقينا فعل ماضى دمنا فاير وكيسنا فاضى…ومع ذلك نكرمكم أحسن إكرام مانحنا ما اولاد المهدى الإمام ونجيب ليكم من (أمواج) اطايب الطعام والذ أنواع الشراب والبيبسى شايلنو الطف وانضف أنواع الجكسى ، مع إبداعات فنانين أو طارات مداحين…الجماعة زعلو وعضو اليد عض ، إتخمخمو وإتخارجوا مع بعض…قلت يا أفليقا طفح الكيل وقد كمل العُمر! قال ياقرن سوى الصبر…بكرة تجى السعادة تتمطا والمصيبة تلقاك ياقرن طقيت ثم رفعتا…والمصيبة تلقاك جنيت ياقرن شطة ثم رفعتا…

Advertisements
تعليقات
  1. الدكتور الاديب القامة السلام والتحية والاكرام لك واخوتك المدونجية الكرام . ذكرني مقالك الرائع هذا بذاك الرجل التونسي الذي يظهر غلى شاشة الجزيرة ويردد وهو يمسح على شعر راسه الذي اشتعل شيبا وهو يقول ” لقد هرمنا ، لقد هرمنا ” ويظل صدى صوته يتردد ونظرات عينيه المليئة بالحزن والخيبة والعمر الذي ضاع سدى مابين مبارك وبن علي والقذافي و . . . . . . ؟نتمنى لك عمرا مديدا سعيدا غنيا ثرا بابداعاتكم المدهشةفي زمن ديمقراطي جميل ودعونا نتمسك بالامل وكما يقول الخواجات ” اجمل الاطفال اولئك الذين لم يولدوا بعد ” ودعونا نحلم بان اجمل الايام قادم في الطريق الينا ولا انسى ان ادعو بمثل ذلك لولدكم افليقا ولكل الشعب السوداني الكريم.دمت ودام قلمك الجميل نابض بالابداع .

  2. نيام كتب:

    الحبيب الظريف قرنوف ، الصنديد الجدع المعروف لا بلين و لا بعرف الخوف ..اولن نقول للاخ الغازي القادم الينا من بنغاري و هو يدرك تماما كل المخازي التي سربلتنا في هذا العهد النازي قول ليهو نحنا صحي ماعندنا كلاشات و لا رشاشات و كمان ما عندنا لنشات لكن ساعت نقوم كلكم تعرفونا و نحنا ثورتنا حتكون مجنونة يا بعنا الجمل و الجمال وجيناكم شادين الرحال يا جبنا البقر من قرونو صحيحو و مجنونو… اما زولنا زول اليمن قول ليهو سيب المحن انتو متين خليتو الكناتين وغزل الحرير و فتحتو صدوركم في ميدان التغيير كدي اول حاجة ان شاء الله مافي عوجة او باس كل واحد فيكم يلب… ليهو لبا… تعال لينا نديك كنتين و خلي علي صالح لرب العالمين ..اما الود بتاع البحرين قول ليهو ياريال انتو متين خليتو الايس و التين و مشيتو الدوار نحنا بصراحة شايفنكم كأنكم هظار في هظار…
    احم احم نحنا الجبل الطود الاشم …لمان عملنا الصورات لا في ميدان تحرير و لا عمارات نحنا اولاد اب مركوب و كان زعلنا بنعرف الدروب بس بالنا ساكت طويل و للمهلة دائما نميل…

  3. قرن شطة كتب:

    د. أم العيال
    صباح الخير
    …نحنا كنا خايفين من قصة “نحنا هرمنا” ولمس الراس ، ولكن حالياً وقع الفاس فى الراس ، ومع ذلك البشر آمال ومن غير ذلك ما فى حاجة! لا زلنا نامل بغد جميل ومشرق ، غد دايمقراطى وصحى نستطيع أن نشارك فى بناء قدرات بلدنا ونعطيه خلاصة تجارب وخبرات…ذلك أن الوضع الحالى ليس فيه للمشاركة مجال او للابداع طريقة ، اللهم يسر الامور على السودانين فقد تعبوا ، ونامل ان يجى اليوم الذى نقول فيه كما ذلك التونسى “بنفلان هرب…بن فلان هرب” تحياتى لك وللاسرة…

  4. قرن شطة كتب:

    العزيز / نيام
    صباح الخير
    اتبعت المقال بالقول الجمال والحسن والمقامات الطوال والبديعة ، ومع ذلك فقد أثبت الذين ذكرت من ليبين وبحرانين ويمانين بانهم اشد منا باساً وإدراكاً لواقعهم واكثر مطالبة بحقوقهم ، فناس البحرين وسلطنة عمان لم يحتجوا عشان (جعانين) فانت تعرف بانهم اكثر الناس روقة وترطيبة ولكنهم يطالبون بحقوقهم والحرية الجميلة والحتمية ، واللبين كذلك ، نحن نحيهم ونخلع الطواقى إحتراماً وتبجيلاً…اما نحن صانعوا شنو كده مابعرف ، واول ناس عملنا شنو ؟ ده موضوع بقيت أشك فيهو شكاً عظيما ، فالناس لايصح ان يكونوا على دين ملكوهم أو جريدهم وانما الصحيح ان يكونوا على دين علمائهم وديل اصبحوا مافيشين أو بره بفتشوا فى ارازقهم ومعايشهم ، وصرنا نحنا كماترى..تحياتى واتمنى ان يجىء الفرج عما قريب وان يشمل الله برحمته الناس كل الناس…تحياتى ياقريبى…

  5. نيام كتب:

    قرن شطة:
    الحبيب قرن شطة ليس المقصود التباهي او الاذعان لدين الملوك بقدر ما المقصود عدم الاستسلام للامر الواقع و الاكتفاء بجلد الذات حتي ادميناها وكسرناها وهذا لعمري يخدم الملك ويفت عضد الرعية ويقنعها بالاستسلام…الرجوع الي التاريخ الهدف منه رفع الهمة وليس ابراء الذمة…

  6. Dakeen كتب:

    د. قرن والمتداخلون ،، انتم السابقون ونحن الخائفون ،، فلا ناب لنا ولا سنون ،، فان تجمعت القوات في ميدان ابوجنزير ،، هرولنا خوفا تحت ظل الجرجير ،، نلعق الصبر والفقر المرير ،، اما اهل الترطيبة والحركات العجيبة ، فهولاء ذوي نفوذ وصيبة ،، لا تهمهم المقالات العجيبة في الاقتصاد والسكان والتركيبة ، والزراعة والاجراءات الرتيبة ، همهم كان المسواة ، وهمنا الخروج من تحت المكواة، ووبعد الحروق نتسول الدواء ،، ورعاة الشجرة الظليلة ،، وواعوانهم من حصوات البليلة ، يتآنسون تحت الخميلة ، وفي الجيوش عاسوا تبديلا ، وارهقوا العسكر وعدموه في البرد الفنيلة ، فصار منصاعا ذليلا ، يهش في النفوس النبيلة ، ويرعى المناصب العليلة ،،، فاعذروني ان سرقت السجع فهذا حالنا نحن وقد غلب الطبع ، نحاكي من تقدم وياكله الضبع ،،، ولا نحسب حساب السنون السبع ،، فزالت نعمة الارض السوداء ،، وهدفنا دولارات المغترب الخضراء ، لا زراعة القطن والذرة والصفراء ،، فهذه زرعها الامراء ، في ارضنا المعطاه ، وقبض ثمنها النبلاء ، تحت الشجرة الغبشاء

  7. نيام كتب:

    Dakeen
    يبدو لي انك سجاع ماهر قد قلبت كل الدفاتر و سقت بحس الرجل الصابر كل مراراتنا العواصر من امر العسكر واهل الميري في قصة توم اند جيري…
    وان كنا تجيرنا حينا من الزمن و قد كثرت علينا المحن و الفتن الا ان ما يحدث في الوطن لهو امر عفن من حيث المكر و الخديعة في شتي امور الحياة الجاد منها و اللاه…
    بيد ان الموازين قد انقلبت و المنطقة حولنا قد اشتعلت بما لا يدع مجالا للشك للاجتهاد و العك بان القادم جلل لنا و لكم و للاهل…اما دفن الرأس في الرمال فلو انه يعدل الحال لما هرول اولئك الرجال الي جدة و شرم الشيخ ليقضو بقية اعمارهم معصورين كالفسيخ….
    والامر في البدء و منتهاه هو بيد الله سبحانه و تعالي العزيز المنعام الذي خص نفسه بالملك التام و وحده له الدوام…

  8. قرن شطة كتب:

    الاخ / Dakeen

    مساء الخير

    انا كنت متاكد ان لدينا مبدعون من امثالكم فى المدونة، بس المسغربنى لابتين ليه؟ اعجبنى ما كتبت والهدف منه واضح وياريت كل ما كتبنا يلقى نوع من الصدى (ويجيب شىء) إى شىء…لك تحياتى يامبدع

  9. قرن شطة كتب:

    العزيز / نيام
    مساء الخير
    انت عارف ما المقصود من كل مانكتب وتكتبون ايضا ، اتمنى وارجوا وادعوا ان يعاد لهذا البلد هيبته وطيبته لنعيش فى امن وآمان ونخلف للقادمين وطن يفتخروا به ويعتزوا به كمان…
    لك تحياتى

  10. Dakeen كتب:

    الاخوة قرن ونيام والقراء الكرام ،،،
    العين لا تعلو على الحاجب ،، والهاوي يحاول ان يجاري الكاتب ،،
    اما ما كان من خبر ،، وقد ذاع وانتشر ،، وحشدت ثورات ومات بشر ،، ورفعت الاعلام حمر وبيض وخضر ، اشتعلت المنطقة حولنا ، وتبدلت الرؤوس ،، واشتعلت الشوارع وثارت النفوس ،، فما الذي يقينا كيد بني صهيون والمجوس ،، فالاسلام هو المخرج ،،، والايمان مفتاج الفرج ،، والجهاد شرف وحد ،، فان ما بالشعوب من داء ،، من اهمالهم للصلاة ،، وعدم ايمانهم بالقضاء ،، ففتحوا المسارح للعُراء واحاطوا المساجد بنجاسات النساء ،، امتلأءت البنوك بالرباء ،، واثرى السفراء والوزراء ،، من خزائن الطاغوت والبغضاء ،، وزاغت اعين الرؤساء ،، عن امانة حملها لهم البؤساء . فما لنا الا ان نرفع أيدينا بالدعاء ،، اللهم ثبتنا على ايماننا ،، وانصرنا على السفهاء ،،

  11. عباس ركس كتب:

    سلام مبدعنا قرن وزواره :
    نحن بيننا وبين السجع ما بين السموات والارضين السبع – عشان كدا ح نجيب من الآخر :
    بإختصار ثوراتنا زي كورتنا ( نحن ناس اكتوبر وابريل واحرزنا كأس افريقيا 1970 ولعبنا في ميونخ ) – وانتهى البيان .
    هذا زمان ولى – الآن زمن التحديات والتحديث وهي لعمري امور بالشباب اليق لا بالكهول !!!!!

  12. لمى هلول كتب:

    اعزائى الكرام
    سالتنى جارتنا العربية فى غربتنا التى ستصبح ازلية
    السودان ياسودانية مابدا يقوم بثورة اسقاطية
    قلت لها …نحنا مازى ناس بنغازى البتجيهم المونة من بيغادى
    وانحنا ما زى ناس عمنا ناس مدينة الاعلامى السينمائى
    والمنطق الفلسفائى
    ولا انحنا زى ناس البحرين شبر فى شبرين انحنا بلدين مفصولين
    ولا انحنا زى ناس اليمن عندهم عنب وناقصم التمر
    قلت ليها باعتبار انى من الشرق وبعد مرور اسبوع واحد فقط على تبلبل الاحداث
    سيعلن بان كل الشرق قد مات موتا جماعيا مؤسفا بلا طلقة واحدة
    بورتسودان حصدت بالحمى النزفية والعطش وعدم وجود كهرباء ابدا
    كسلا من المجاعة والجوع وتحرش القاش بارضيها
    القضارف ………………………………………………….الخ
    لذا ….الله يستر
    تحياتى لكم جميعا
    وتحية خاصة لكاتب المقال

  13. قرن الشطه اكعب من خلافنا على حكومتنا كويسه ولا كعبه خلافاتنا البينا الحاميانا نتفق نمرق لثورة واعجب من كدة انه إحنا مختلفين على ريدة البلد ذااااتها رغم انه في ناس كتارات همومها بتشبه بعض بس بيحتقره حتى الظروف الشابهتم ببعض .. معقوله بس دي أمة يترفع ليها علم

  14. قرن شطة كتب:

    الاخ / دكين
    سلام..
    ياصديقى لافى عين ولا حاجب وكلنا فى الهم شرق..اعجبنى ما كتبت وهو الحقيقة بعينها ، نظام العين بصيرة والايد قصيرة ولله الامر من قبل ومن بعد..إستمر فى الكتابة…

  15. قرن شطة كتب:

    الصديق / عباس ركس
    سلام ..
    هى اصلاً التغيرات الجذرية فى المجتمعات يقوم بها الشباب عادة لإنهم يتصدون للمهام الصعبة دائماً ، ولكن السوأل المهم هل نحنا عندنا شباب مهتم بما يدور وينسج حوله؟ ام إهتماته إنحصرت فى موبايلات وأفلام شنو كده ماعارف؟ وأمور لاصلة لها بالامور المجتمعية..أظن ان شبابنا قد جٌهل وهُمش عن قصد وسابق إصرار…على كل واضح إننا أمة قد إنبطحت لحد كبير ولا حول ولاقوة الا بالله العلى العظيم…

  16. قرن شطة كتب:

    الاخت / لمى هلول
    صبح الخير…
    قال الشاعر : لاتنكىء الجرح القديم فإننى قد ودعت ليلاً مظلماً وثقيلا…أصبحنا نفتش للاعذار على عجزنا !! نحنا مابنعمل كده عشان كده…والمشكلة أنو ريدة البلد ذاتها بقت هى المشكلة! ورينى حل للمشكلة! والقاش لو شرد ما مشكلة والجنوب لو إنفصل مامشكلة والشعب لو فقر وحرن ما مشكلة ولو رحلوا الخرطوم مكان كرن ما مشكلة ، ولو أملنا إنسجن ما مشكلة ..بس المشكلة إنو قربنا نجن…..
    تحياتى

  17. قرن شطة كتب:

    الاخت / ملاذ حسين خوجلى
    التحايا ومرحب بيك…
    هى دى مشكلة مفتعلة بل إنها مقصودة وهى إثارة الكراهية والبغضاء بين أبناء الوطن الواحد ، ونحنا ما جايبن خبر وماشين فى وعلى نفس الخط الذى رُسم لنا بليل مظلم وبخطى حثيثة وعجيبة…حقيقة ما عارف أقول شنو؟
    تحياتى

  18. احم احم نحنا الجبل الطود الاشم …لمان عملنا الصورات لا في ميدان تحرير و لا عمارات نحنا اولاد اب مركوب و كان زعلنا بنعرف الدروب بس بالنا ساكت طويل و للمهلة دائما نميل

    فعلاً نحن فعل ماضى منصوب عليه ومجرور الى المجارى ومرفوع ومعلق فى الهوا ,,, كنا وكنا وكنا ,,, ولامتين حنكون فى موضع كنا ده ؟

  19. ياسين شمباتى كتب:

    سلام الحبيب قرنوف..
    قلتوا اخير كدى؟ والله متعة,,خصوصا وانك قدرت تمرق بيها نيام ودكين وخليتهم يمرقوا المستخبى,,لكن شايف ركس عامل ساتر ! اظهر وبان عليك الامان..

  20. قرن شطة كتب:

    الاخ / سامر المدنى
    سلام…
    تانى جينا لى قصة نحنا ونحنا!! يا زول سوى الصبر ، الكربة فى يوم ما ح تنفك ونفك نحنا معاها ، كيف ماعارف؟ لكين لاشىء يدوم ياعزيزى..
    تحياتى

  21. قرن شطة كتب:

    اخونا / شمباتى
    كبف الحال؟
    لازلنا نحاول وبرضى ما قادر انسى وانسيك ، زى ماقال احد الحساسين الذين رحلوا عننا …وشايف الجماعة مرقوا من وراء حائط الصمت وقد كتبوا احسن الكلام والقصد أولاً واخيراً متعة القراءة مع (الاخوان) ما ديلك!
    تحياتى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s