الناعق بالخراب….

Posted: الثلاثاء,22 مارس, 2011 by ياسين شمباتى in اخرى

الى وقت قريب جدا وبالتحديد قبيل اندلاع الثورة الليبية بثوان كنت اظن ان اعلامنا المرئى وتلفزيوننا من اقبح وافظع واشنع المحطات المرئية فى العالم,لكن وبفضل الله ثم بفضل هذه الثورة التى اسال الله لها النجاح عرفت اننا نمتلك جهازا كفؤا ومذيعين على درجة من المسئولية والمهنية !

فلاول مرة فى حياتى اتابع المحطات الليبية متابعة دقيقة لصيقة,,للمقارنة بين ما يتواتر الينا من انباء من محطات اخرى,,وللجماهيرية الليبية محطتان رئيسيتان هما (الجماهيرية والليبية) وقنوات اخرى مصاحبة مثل (الهداية- الشبابية…..),,الشاهد ان هذه المحطات حاكت التلفزيون المصر فى نقل الوقائع الكاذبة والاستشهاد بشهود الزور ومن حسبوا على الشعب الطيب,,لكن بعكس التلفزيون المصرى الذى كان يستضيف مثقفين ورجال فكر ومتحدثين لبقين كان هذا التلفزيون الليبيى يستضيف الجهلاء_بمعنى الكلمة_ والدهماء والرجرجة والسوقة,اى والله,,فكل من استمعت اليه وجدته اجهل من (فلان)! وكل برنامج هو نسخة من الآخر,,ورداءة فى التصوير وغباوة فى النقل وسخف فى المشاهد..

انقل اليكم هنا بعضا مما دعانى الى تسطير هذه الكلمات:-

*امس وفى برنامج يقدمه داعية وعضو فى مجمع الفقه الاسلامى اتصلت مواطنة ليبية اسمها (لمياء),وكان الخط متقطعا,فاذا بذلك المذيع يخاطبها : اطلعى فى مكان فيه تغطية يا لمياء!!

ولم اعرف هل الطلوع يقصد به الخروج ام الصعود الى حيث التغطية!؟ وهل لديها قرون استشعار لتعرف مكان التغطية ام ماذا !؟

*نفس المذيع قال: معنا على الخط الدكتور على صالح,,اتفضل يا دكتور.

الدكتور: السلام عليكم..

المذيع: وعليكم السلام,,مين معى !؟

اجى ياااااااا المعية !؟؟

*نفس المذيع: الشعب الليبيى لا يبرع فى شئ سوى القتال !

_قلت فى نفسى: ياربى الشعب الليبى دا هو الشعب اليمنى ام الفيتنامى ام الافغانى ام الفلسطينى حتى ! حرب شنو دى البيبرع فيها !؟ اممممممممممم..

*اليوم جمع التلفزيون مجموعة من الشباب بمنطقة ابوسليم فى شكل تظاهرة حاشدة موالية للقذافى,المهم انهم يظهرون فى المستشفى,ثم نفس الوجوه فى الحديقة,وهى ذاتها فى الشوارع! يعنى لا تغيير او تبديل,كدة بس!

*خبر عاجل: قس امريكى يؤكد تلقى اوباما لاوامر من العدو الاسرائيلى لضرب ليبيا جوا من اجل المد اليهودى من القدس الى المغرب ! بدون تعليق طبعا..

*خبر عاجل: القبائل ال(1000) التى تتكون منها افريقيا تهدد الغرب بمقاطعة مصالحه اذا لم يتوقف عن التدخل فى الشان الليبيى !

انتو افريقيا بتتكون من كم قبيلة !؟؟

*اتحاد العمال الافارقة بفرنسا يندد ويشجب العدوان على ليبيا ! يمة !!!

*الشعار الذى يصدح به الموالين للقذافى (الله ومعمر,,وليبيا وبس)!! ما عارف الواو تدى بتفيد العطف ام المعية ّ!! بعدين مافى ذكر لدين او رسول او شريعة او اى حاجة ممكن تخفف من وطأة الشعار دا…

واحيانا يصرخون: يا ملك الملوك,,نحنا بنحبوك! وملك الملوك هو الله ذو الجلال والاكرام,يكون قاصد شنو الراجل دا !؟؟ فتوى يا هيئة كبار العلماء…

_نسيت ان اذكر ان المذيعين هم 4 تتكرر وجوههم دائما,ولا ادرى لقلة العدد اصلا ام انهم الموالون ام الكفاءة دفعت بهم!

*وفى قمة القصف الجوى يعرض التلفزيون الرسمى صورا مباشرة لطرابلس وهى هااااادئة !

*ولقد عرض فى خبر عاجل :عودة وزير الداخلية اللواء/ عبدالفتاح يونس بعد ان كان مغررا به,وتم عرض صور تجمعه بالقذافى مصافحا,,ليخرج بعدها اللواء المذكور فى الجزيرة مكذبا الحدث بل وافاد ان هناك رجلا فى الصورة المعروضة قد توفى منذ زمن ! مما يعنى انها من الارشيف وكدة!

_خاتمة: ياربى تلفزيون ناس (فلان) لو وقعت الواقعة بيحرجنا كدة!!!؟؟ مجرد تساءل غير برئ…

ونلتقى…

Advertisements
تعليقات
  1. يس شكرا ليك
    يا زول ابعد من التلفزيون الليبي ده ، شكله لحدي ما احداث ليبيا تنتهي انت حيجيك تخلف عقلي
    ناسنا ديل بنتمنى قريبا جدا ان يبدأ الاعتصام والوقوف مع التغيير من داخل حوش الاذاعة والتلفزيون لانه الشعب السوداني لماح لن ينسى لهم تخاذلهم اصلا دعك من اخطائهم

  2. ياسين شمباتى كتب:

    ملاذ..سلام..
    والله جبتيها قوية حكاية التخلف العقلى دى !ههههههههههههههههههه.
    لكن ياربى ناس الاذاعة بقيفوا مع الشعب؟ماااااااااااا ظنيت,لكن يبقى الامل برضو..
    ومرحب بيك كتييييير وخليك قريبة..

  3. عباس ركس كتب:

    شمباتي سلام : وما تنسى حكاية ( تبني مجلس الامن لقرار الجامعة العربية بفرض حصار جوي على ليبيا ) —— حرام !!!!!! لأن التبني في الاسلام محرم ؟؟؟ شفت ليك محن جنس دي ؟ ما تذكرت بلاي تفعيل احد قوانين حركة المرور لمحاكمة صحفي ؟؟؟ الجماعة ديل بقرو من كتاب واحد ؟؟؟؟ اها داك اخضر حقنا دا لونو شنو ؟ تركوازي اظنو !!!

  4. عزت كتب:

    لكين ما غلتان… شنو البيوديك عندهم…. بتاع تونس زاتو ايام المحنة كان لا يختلف عن الليبي… يبدو أن التخلف مرتبط مع ضغط الشعوب… كويس انو التلفزيون اليمني ما عندي…..

    لكين ما بعيد يا شمباتي يوم تقوم عندنا… تفتح تلفزيونا تلقاهم بغنوا….. متعووودة دايمن

    أنا ما عارف الحفلات والغنا دي طواااااالي ليه، النيل الأزرق تلقى واحدة ملونة قاعدة وواحد قاعد يغني ليها، تروح على القومية تلقى كمية من العازفين العجايز بيجضموا في الكمنجات وواحد ماسك المايك يغني، تمشي على zoal تلقى هيمانوت…. غايتو تقيف شوية عشان خاطر البت مسكينة وأجنبية، تقلب على هارموني، المديح والشروق تلقى (القلع)… والحكاية بمناسبة على طووووووووووول وخاصتا وكت المواضيع الهامة التي تجري….

    عجبي…!!

  5. عزت كتب:

    والا شنو يا أبكرون….؟

  6. ياسين شمباتى كتب:

    ركس..وعليكم السلام والرحمة يا حبيب..
    اى واللهّ دى لقيتها امس ورفعتها من اليوتيوب على الفيسبوك,,عليك الله ديل ما يستاهلوا الحد والتشنيع!؟؟ بعدين الحرم التبنى منو!؟؟ الله..
    اما عن لون كتابنا فهو بلمسجى والله اعلم..

    الحبيب عزت..سلام..
    مقصووووووووودة ومتعمد’والقصد الهاء الشعب وخسوسا الشباب عما يجرى بالتكثير من الاغانى والبنات السمحات ومعجنات..بعدين القلع دا عجيب جدا ياخى ! خليهو براهو ليهو يوم..
    لكن بالجد ناسنا من الاحداث سادين دى بى طينة ودى بى عجينة واستلفوا اضان الحامل ! امانة ماليكم يوم يا ولاد الذين..
    وعلييييك الله اعصر معانا على حبيبنا ابكرون دا نثبتو ونهدى سرو..آييييييييييي.

  7. مجاهد شقيلة كتب:

    شمباتي سلاااااام, والله عافي منك تب سخنت السوق, عارف جماعة الخير ديل بعدين بسووها أوكد ليك

  8. ياسين شمباتى كتب:

    مجاهد..وعليكم السلام ورحمة الله..
    السوق براااهو مولع وبعد دا بيطرشق!
    قلت لى ناس فلان ديل بفضحونا ؟؟الله يقطع طاريهم ويزيلهم من الزايلة دى..
    وخليك قريب..

  9. لمى هلول كتب:

    ههههههههههههههههههههه
    والله نفس الافكار الفى راسى
    ما دى زاتها المخوفانا المية عام من العزلة دى
    تجيك كاشفة الشر بره وبعيد تقوم تنكشف مرة واحدة…
    سؤال برىء هو حصل شنو لاحتلالات هيئة الاذاعة والتلفزيون مش
    كان ااول شىء بيحتلوها بعدين يقولوا انقلاب
    حصل فى دى كمان تغيير ..؟؟؟؟؟؟؟؟؟؟؟؟؟؟؟؟
    يازوول اسكت ساى عايزين سيناريست شاطر يكتب ..

  10. العزيز شمباتي شر البلية مايضحك واحنا حياتنا كلها بقت بلاوي في بلاوي عشان كدة الضحك شرطنا. مشكلتنا كدول عربية لا نملك الولاء لرسالة ولا نعرف الانتماء لدين والشريعة مايهمنا الاشخاص والرموز بغض النظر على ماوصلوا له ويريت يسترجعوا موقف ابوبكر الصديق لمن توفى الرسول (ص) قال لهم من كان يعبد محمد محمد قد مات ومن كان يعبد الله الله باقي . حتى الدول التي ثارت بعد تونس صدقني هي عبارة عن حمى الثورات وموضة ولا تمثل فهم وادراك حقيقي للاوضاع الراهنة والله يكضب الشينة . بالرجوع لتلفزوني الليبي قبل كم سنة كنت مع الوالدة والوالد في احدى الفاندق في احدى الدول العربية ولسوء الحظ كانت القنوات الشغالة قنوات اجنبية بجانب بعض القنوات العربية الخليعة فطلبنا من ادراة الفندق بعض القنوات المحترمة ليتسنى للعائلة متاعبة الاخبار اثناء تناول العشاء فماقصرو جابوا لينا السودان واليمن وليبيا وام بي سي وشالوا بقية القنوات وعينك ماتشوف الا النور قمة المهازل اتخيل انو المذيع بتاع النشر الجوية دخل ايدو ف يجيبوا وطلع ورقة صغيرة مطبقة قعد يقرا منها احوال الطقس ….

  11. التلب كتب:

    انتو افريقيا بتتكون من كم قبيلة !؟؟
    شنو الاسئلة التعسفية دي!! التلفزيون الليبي قال ليك 1000 يعني 1000
    بعدين الراجل مصر على حكاية ملك ملوك افريقيا دي بينما زولكم قال كلمة ملك دي ما داير يسمعها هه هه هه …

  12. ياسين شمباتى كتب:

    لمى هلول..سلام..
    والله فعلا صدقتى ! زمان البيان حتى الناس تعرف الانقلاب,,لكن طبعا دى ثورة شعبية والمصادمات دى جات بعد ما الراجل دا بدا يقصف فيهم..كمان عملوا اذاعة ليبيا الحرة اغتال رئيسها ! تانى فى زول بيظهر؟حسبى الله عليه..شفتى المقطع بتاع المذيعة البتتكلم عن التبنى؟؟شئ غريب والله..

    العزيزة مهاد..سلام..
    ومرحب بيك كتير..
    طبعا متوقع فى بلدان زى دى يكون مستوى المذيعين كدة..لكن اختلف معك فى حتة موضىة الثورات دى,,لانو الشعوب دى كلها كانت مكبوتة بس عايزة اليحركها,,خدى السودان مثل,,تلقى انو اقل مدة حكم فى الشعوب الاربعة دى,,يعنى الموضوع ممكن يكون ماشى تنازلى !! الليلة واليلة انا مالى !
    اما عن الولائء فنحن نميل الى العاطفة والكلمة الطيبة,,بس,,عشان كدة عرفوا يسوسونا ويسوقونا..
    وخليك قريبة..

  13. ياسين شمباتى كتب:

    الحبيب التلب..سلام..
    بركة بالطلة والتطمينة..اها قووووول خلينا العدد بتاع القبايل دا,,انت رايك شنو فى ملوكيتو دى!؟؟ زولنا الزيو منو ! فى طولة العمر والبال..ههههههههههههههههه..
    وبقيت على شنو؟؟

    • mahod كتب:

      العزيز ياسو للحكاية وجهان الوجه الاول ان نضحك ونبكي على ماوصلنا اليه من سذاجة واتباع لسساة من دون ادارك لمايحدث حتى خلطو الحابل بالنابل واصبح الحكم وفقا لمصالح شخصية وليست على تعاليم الدين والعقيدة والدليل الشعارت والهتافات التي ذكرتها (الشعار الذى يصدح به الموالين للقذافى (الله ومعمر,,وليبيا وبس)!! لو وقفنا قليل واسترجعنا ماقاله سيدنا ابوبكر عندما مات الرسول (ص) من كان يعبد محمد فمحمد قد مات ومن كان يعبد الله فالله حي باقي وهذا الكلام في خير الانام حبيبنا المصطفى الاولى باتبريكات والتبجيل فمابلك بحكمنا الجرب مشكلتنا كدول عربية نسينا الرسالة الاساسية وتمسكنا برموز لذلك نابنا منهم منابنا من ظلم وافترى حتى باتو يعتقدون ان الشعب ملك لهم واننا لسنا سوى قطيع من الغنم والعبيد . بالرجوع لهمجية الليبين وبساطتهم لي قصة في هذه النقطة وذلك في احدى زيارت لإحدى الدول العربية مكثت بفندق ولم يكن في الغرفةسوى قنوات اجنبية وبعض القنوات العربية المبتزلة فطلب والدي من الادارة تزويدنا بفضائية السودان وmbc ,والفضائية الليبية وذلك بناء على طلب اختيى الصغر حيث كانوا يعرضو مسلسل كرتوني للاطفال اسمه مروكو الصغيرة وعينك ماتشوف الا النور لمن المذيع دخل ايدو في جيب القميص عشان يطلع منها ورقة مطبقة يقراء منها النشرة الجوية !!!!!

  14. mahod كتب:

    اسمعوني يبشوات عندي مشكلة في الجهاز كل ما اكتب رد بيجي خطاء ف الصفحة عشان كدة كتبت الرد اكتر من مرة فاعذرونا وشكرا

  15. ياسين شمباتى كتب:

    مهاد..سلام…
    انتى مسجلة مرتين او حاجة كدة!؟؟ عموما اذا جاك خطأ فى الصفحة لا تكررى الارسال بل انتظرى واعملى ريفريش ح تلقى التعليق وصل..
    وشكرا للاهتمام والمتابعة..

  16. طارق أب أحمد كتب:

    د. شمياتى

    المذيع الليبى قدم النشره و هو يحمل الكلاشنكوف و يقول شفتوا زعيم يسلح شعبوا
    و لسان حالنا يقول شايفين غبى بدل الكاميرا بالكلاش

    أحيانا نشاهد أخبار عاجله مكتوبه بالإنجليزيه (عينة إنجليزى دا يا مرسى )
    و من اقوالهم أيضاً
    الحرب الصليبييه التى تقودها دول الأستكبار على شعب ليبيا الذى يحارب تنظيم القاعده

  17. مُخير كتب:

    الحبيب ياسين
    سلام
    يعرف المنتفعين من النظام أن النهاية قد أزفت وما يحدث الآن فرفرة المذبوح، بس المُحير عدم إستيعاب الدرس، يعني لماذا كل هذه الخسائر في أرواح وممتلكات الشعب؟؟،

    يا عزت العقيد لو داخل على أعلى سكور كان حرك في 31 لكن بعد 42 ما داير يقوم أهة إلا الناتو والباتو يقلبوا أبو التربيزة ههههه.

    ما يحدث في اليمن وما سيحدث في سوريا منتهى الغباء، وما يخصنا سودان بليدنا، إن شاء الله الكيزان يصحوا للون وما يخلو الشغلانة تتكونجت وبعد خراب مصراطة ما بتفيد “لقد فهمتكم”.

  18. ياسين شمباتى كتب:

    مهاد..
    هههههههههههههههههه,,ما المعنى لكن النصيحة دى مى حااااارة..وخليك قريبة برضو..

    طارق..
    عليك الله ركز لى مع مذيعة قناة ليبيا الثانية اللى بتقدم برنامج (ليبيا اليوم) كم ساعة من الهرج والمرج والغباء والسخق,,لا اعداد لا شاشاة لا ورق,,هرطقة بس,,ياخ ديل عالم لذيذ جدا جدا..

  19. ياسين شمباتى كتب:

    الحبيب مخير..وعليكم السلام..
    آخر تصريح للقذافى: انا لست مسلسلا مصريا من 30 حلقة,,انا مسلسل مكسيكى لا نهاية له ! وى..
    ناسنا ديل كمان حقهم بكون شيييين,,لا صليح ولا وجيع,,الا كان عصام شرف وعرفة من متيييين يا زبيدة ديل! حسبى الله عليهم…

    • طيب الزول ده مامثقف لو عارف انو في مسلسل مصري ومكسيكي يربي ماسمع بالتركي ولا هو مامع ناس مهند ونور . سعال قالوا لي قعد تترجم الكتاب الأخضر لعربي عربي صحي الكلام ده

  20. ياسين شمباتى كتب:

    هههههههههههههه,,الاداك الخبر دا منو؟؟ والله الدنيا دى ما فيها شئ يندسا,,لكن ح اسميهو (الكتاب البلمسجى)..ايون..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s