خصخصه، جغمسه أم خلبصه

Posted: الجمعة,1 أبريل, 2011 by طارق أب أحمد in اخرى

وافق الرئيس على تصفية أو خصخصة 22 شركه حكوميه ثم ألحقها بخمسه أخر و لاننا تعيش فى إمارة كوزستان كمواطنين من الدرجه العاشره شمال الصفر فإننا لم نك نعلم أن هذه الأسماء التى قرأناها هى لشركات حكوميه (قصر الؤلؤ و صالة متاسبات سندباد كمثال)
لو ربطنا هذا الخبر مع أحداث مصاحبه قد تقودنا القرائن إلى نتائج منطقيه ينبغى أن نعيها

أولاً مجريات الأحداث فى الدول من حولنا و يقظة الشعوب و المطالبه بالتحقيق فى جرائم الفساد
ثانياً فضح و تجميد الدول الغربيه لجرائم الفساد لحكام و سدنة بل و اسر من هم على سدة الحكم حتى قبل وصولهم لمزبلة التاريخ
ثالثاً بكاء الرئيس و تصريحه بأنه سيحارب الفساد
رابعاً تقرير المراجع العام حول عدم تمكنه من مراجعة حسابات شركات حكوميه بل و عدم تمكينه من دخولها

إذن ما هو الحل
الحل هو الخصخصه و من خلال الخصخصه تتم الدغمسه لوثائق الفساد حتى لا يأتى كائن من كان فى يوم من الأيام و يقول يا أيها المفسدون ها هى الو ثائق تؤكد ما ذهبنا إليه
ثم الخلبصه و الخلبصه من خلبوص و الواد الخلبوص هو الفتك و مفتح و يعرف كيف يفتح ملبن عشان ياكل مخك، ببساطه يشترى الشركات بتراب الفلوس و يعدم الوثائق و يمسك كام تعاقد حكومى و ياكل ملبن
المشكله الأكبر أن هذه الشركات ليست 27 بل هى عدة مئات بدليل تقرير المراجع العام عن الشركات التى لم يستطع دخولها و هذه الشركات ال 27 ليست سوى الصيد الصغير و مما لا شك فيه أن هذه العصابه مشغوله الآن بوضع العقود و الأطر القانونيه بالإضافه لعمل ميزانيات مضروبه لتقييم الشركات بأسعار متدنيه وتحضير القيمه من خلال تمويلات بنكيه من ذات القبيل

كى لا ننسى ،
عندما جاءت الأنقاذ قامت ببيع مؤسسات منتجه بل و أعيد تاهيلها بقروض من البنك الدولى وجهات تمويل اخرى ، صفت وزارات مؤسسات و هيئات للتتحول إلى شركات خاصه برأسمال حكومى أو الغى دورها ليمنح لشركات خاصه ، وزارة الأشغال، النقل الميكانيكى، الطرق و الجسور ،مصاتع الأسمنت ، سك العمله، المطبعه الحكوميه، المسبك و مدبغة الخرطوم و القائمه تطول

خصخصه

Advertisements
تعليقات
  1. ابكرون كتب:

    ولسه يا اب احمد ياما تحت السواهي دواهي….وفي اشياء ما بهبشوها زي شركات : اخوان الصفا …وكمان خِلان الوفا……………

  2. حنين كتب:

    أب أحمد كيف حالك .
    والله اليومين دى قضية الفساد دى الشغل الشاغل فى الجرايد وأى زول بعرف ليهو شمار فساد يمشى الجرايد وأى زول رفدوة من شغلو ولا عنو مشكلة مع رئيسو يجرى الجرايد عشان يفتو لكن الشغلة ماها بالبساطة دى الشغلة دى خلى بالك غميسة ومدغمسة غايتو الله يستر .
    الحكومة عشان تبرى زمتا دايرة تحارب الفساد وتعمل ليهو محاكم والناس المع الحكومة والفى يدهم القلم مابقعو بالساهل .

  3. عزت كتب:

    بالله الناس كشفوا المسعلة…. غايتو بقيتو مفتحين خالس خالس يا أ ب أحمد… يعني الجماعة اجتهدوا قالوا الله وأكبر على الفساد وقالوا ونبدأ بالشركات أتاريهم حيزيدوا الفساد… انت ما بتذكر حكاية رفع المعاناة عن الشعب…. ما الرفع دا ولا مؤاخذة هو زيادة المعاناه

  4. ياسين شمباتى كتب:

    اب احمد..سلام..
    اما انكم شعب حقار! رفعوها ما نفع نزلوها ما نفع,,غسلوها ما نفع,,جففوها ما نفع,خصصوها ما نفع,,دغمسوها ما نفع ! ياربى بعد دا بقت جنازة بحر ولا شنو الحصل؟؟
    انا بس نفسى اعرف هن وصلن 27 كيف!؟؟ وييين اجهزة الرقابة والمسجل التجارى والغرفة التجارية وديوان الحسبة العامة وشنو ما بعرف داك!

    عزت..سلام..
    ما هم رفعوها على كاهل الشعب ! فى اختلاط فى احرف الجر (عن وعلى)…آييييييي!!!

  5. مُخير كتب:

    الأخ الثائر أب أحمد

    الحبان في كل مكان

    سلام ومحبة واحترام

    الشغلانة شكلها قربت وقبل المخارجة الجماعة قالوا يضايرو البيضاير، لكن شعبنا ده بالجد يحير، مُش الغنماية تآكل فطوره وغداه وعشاه وبس وتقُش يدها في وشو وتكفتو وما يقول بغم.

    كسرة:
    قصتكم قصة لا حكت لا بقت، الكلاب تآكل والجمال تنبح ….

  6. قرن شطة كتب:

    اب احمد
    سلام ياصديقى
    غايتو ماعارف القصة دى ماشة لى وين؟ بس نقول متضرعين وخايفين وراجين وماملين نقول : اللهم خارجنا من هذه المحنة وارفع عنا البلاء إنك قادر يارب العالمين آمين ..مافى أكتر من كده

  7. elturkey كتب:

    أب أحمد : ياربى يكون دا عدد الشركات القدرو يلمو فيها باقى لى بعض الشركات مسجلين فرار من راس السنة …. بالله الناس دى تخلى الشركات الكبيرة وتخصص قاعة المناسبات … الله فى

  8. سهيل كتب:

    فساد شديد يا عمك .. والله الواحد بقى ماعارف الحلال من الحرام .. عيني مطششه .. الواحد خايف صلاتو في الجامع منذ مجيء الإنقاذ تكون ما قايمه من محلها .. الله يستر . كضبهم علينا هين .. ديل بكضبو علي رب العالمين

  9. aflaiga كتب:

    اب احمد : اسمع القصه الشغنتوتيه دى :
    ام احمد لقت اب احمد بيحابى احمد اكتر من محمد وده فساد اسرى قامت ودت احمد ناس خالتو بقى اب احمد يرسل ىل احمد حق المحاباه عند ناس خالتو !!! فهمت حاجه ؟؟ ولا انا — وتيب – نتلاقى المغربيه فى ظل الجهنميه …

  10. محمد السمانى كتب:

    على كرتى صرح امس ان السودان سيحتفظ بحق الرد على اسرائيل لانها قصفت سيارة ماتو فيها اتنين سودانين بدون سبب نتيجة خطاء ولم يقل لنا ان اسرائيل كانت تلاحق الاشقر الفلسطينى الحايم فى بورتسودان ما عارف ببرتت شنو ووزير الدفاع مشغول فى بناء الابراج الزجاجية وجلب الاثاث الماليزى لتلك الابراج الدفاعية والمثل بقول البرجو من قزاز ما يطقع الناس بالحجارة ونحن وزارتنا الرشيدة من الزجاج لما فيها واحد من ناس خليل ابراهيم قدقدها كلها لا حاسبو ولا سمعنا انوقبضو ولو واحد من المواطنين الله قدرو وضرب لى عمود كهرباء ساى الله قال بقولوا فيا جماعة الخير فى عالم الفضائيات الخبر ما بندس والناس بتتجول فى الانترنت وعارفها وشايفا وانا اعتقد ان الحكومة حقو تغير الطاقم قبل ما يقوم الشعب بالتغيير و تقع الجرسة والتنازلات اتمنى ان تنتبه الحكومة الى تغيير مثل هكذا وزير بدل ان يترك يبرطع فى مال الدفاع عن الوطن عمال على بطال المفرض ان يقدم استقالته واذا ما قدمها يقيلوا تانى يوم فاموال الدفاع يجب ان توجه الى شراء منظومة راجمات صواريخ ورادرات وصواريخ بعيدة المدى وطائرات مقاتلة حتى يكون للسودان هيبة واعتبار ودينا بحثنا على ذلك ( واعدوا لهم ما استطعتم من قوة ورباط الخيل ) علموا اولادكم السباحة وركوب الخيل بدل الابراج ياربى يمكن يكون داير يبنى الابراج دى عشان يشوف بيها اسرائيل زى ما قال فرعون لهامان لعلى ابلغ الاسباب . يمكن

  11. طارق أب أحمد كتب:

    محمد السمانى
    مرحباً بك و أتمنى أن تديم التواصل
    أسمح لى نقلت التعليق دا لى بوست طياره جاتنا تحوم الأكثر ملاءمه
    أما عن رأيك بأن تزود البلاد بمنظومة راجمات صواريخ ورادرات وصواريخ بعيدة المدى وطائرات مقاتلة حتى يكون للسودان هيبه ف دا لب الموضوع و تأكد أنو حيعملوا بيهوا الليله و حيرصدوا ليها مجغميه تريح وزير الأبراج من متاعب البنيان

  12. ياسين شمباتى كتب:

    ههههههههههههههههه,,مجغمية دى حلوة جد…هههههههههههههههههههههههه

  13. نيام كتب:

    بمناسبة مرور عام علي تاسيس المجغعمية العامة لمجغميات الجغمسة فقد اجتمعت امس مجغمية الدفاع مع مجغمية الفساد و الافساد للتشاور في شان انشاء مجغمية متخصصة في الشئون المجغمية تحت ادارة المجغمية العامة برئاسة جغمان حسن جاغوم و ذلك للتحري في موضوع جغمصة المجاغم التي حدثت ابان جغمسة مجغميات ميزانية الجغمي العامة للعام جغمين و هداشر…هذا وقد حضر الاجتماع التمهيدي كل من السيد:
    1 – جاغوم حسن جغمان
    2 – جغمان المجغمي
    3 – جغيمة علي الريق
    4 – جغماس حبيب الناس
    5 – جغموسة المدسوسة
    6 – جاغم آل جغماس
    7 – مجيمغ الدغري
    وقد اقر المجتمعون انشاء تلك المجغمية علي ان تكون رئاستها تحت جغموسة المدسوسة و هذا لامكانياتها البارعة في دس الجغمصة…

  14. ياسين شمباتى كتب:

    هههههههههههههههههه,الله يبارك فيك يا نيام,جغمستهم جغمسة جد,الباقى على الدغمسة ..هههههههههههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s