طياره جاتنا تحوم

Posted: الخميس,7 أبريل, 2011 by طارق أب أحمد in اخرى

كتلت حمار كلتوم
دى كانت أول طياره أيام الحرب العالميه التانيه ثم طائره القذافى التى إستهدفت مبنى الأذاعه نهاية السبعينات أو بداية التمانينات أعقبها طائرة عبد الرحيم حسين عندما كان يصيح على الهواء مباشرتن لإذاعة البى بى سى ( أنا عارف ليك ياخ ما طيارات جات من السما و ضربتنا) يقصد الصواريخ التى ضربت مصنع الشفا
و قبل فتره ليست بالبعيده ضربت قافله شاحنات على ساحل البحر الأحمر و قبلها ضرب سنبوك صيد لأسره معروفه من بورتسودان و فى الحالتين الحكومه عملت اضان الحامل ….
و عملا بمبدأ من يهن يسهل الهوان عليه قامت طائرات أباتشى بشن غاره على بورتسودان أستهدفت أثنين من الأجانب كانا على الطريق المؤدى من المطار إلى بورتسودان ( منطقة كلاناييب) يعتقد مبدئيا أن الأجانب كانا يزمعون تهريب شحنه من الأسلحه الكيمائيه الواصله من ليبيا إلى إيران و من المؤكد أيضا أنه لا علاقه للحكومه بالموضوع تماما لأنو الفيها مكفيها
الغاره التى شنتها طائرات الأباتشى على بورتسودان قبل أيام تجعلنا نتسائل حول الكثير من الأسئله التى نحسبها مشروعه
* ما هى فائده هذه الجيوش من أجهزة الأمن و الأستخبارات و بقيه التسميات الكبيره مثل الإستراتيجى و العقائدى و المضاد
* هل وظيفة الأمن هى تأمين البلاد أم تأمين حكام البلاد
* أين الدفاعات الجويه و أجهزة الرادار علما بأننى كمواطن بورسودانى أشاهد الدفاعات الجويه و الرادار فوق الجبل منذ حرب يونيو 67 و القاعده الجويه فى مدخل المدينه على بعد مرمى نبله من مكان الحادث
*لماذا لم تتخذ الحكومه موقفا حازما تجاه الأنتهاكات المتكرره للأرض
* هل يمكن أن يكون مواطن عادى جدا أشطر من الحكومه بأن يجعل الحكومه الأمريكيه تدفع تعويض قدره مليار و 750 مليون دولار غير قيمة الأعتراف بالخطأ
* ألا يجعل هذا الإستخفاف بأمن حدود البلاد مدعاه لباقى العالم كيما يقول أن هذا البلد كبير علينا و أننا لا نستطيع تأمينه و عليه ينبغى تقسيمه
* هل خصخصة الأمن لصالح حوش بانقا تأثير يا أبكرون
* و وين دور الأتصالات التى يتميز بها السودان يا أفليقا

Advertisements
تعليقات
  1. طارق أب أحمد كتب:

    و الأتجاه المعاكس

    أليس هذا التصرف مقبولا منا كشعب ليس له قرار
    فأذا قررت أمريكا أو أسرائيل عدم السماح لكل بنى آوى العالم بتنفيذ عملياتهم عبر أرضنا فلم لا

  2. عزت كتب:

    طارق سلام…. أيوه جيب من الآخر ما كلنا عارفينو أمن النظام والحاجات التانية دي ما تبعهم…

    عارف أمبارح ناس العربية كانوا بيسألوا خبير عسكري مصري أظنو…
    لماذا برأيك لم تكتشف الطائرات؟
    هذا لآن وسائل الاكتشاف ضعيفة
    ولكن يا سيادة العقيد عندما ظهرت الطائرات لم لم تتصدى لها الدفاعات الأرضية؟
    ان دفاعات السودان الأرضية ضعيفة..
    طيب يا الخبير العسكري منو ما عارف لم برأيك لم تتصدى لها المقاتلات السودانية..
    ان مقدرات السودان الجوية ضعيفة….
    شكرا سيادة العقيد…..

    كسرة:
    هسة بالله جنس الاجابات دي دايرا ليها خبير عسكري….

  3. حنين كتب:

    أب أحمد .سلامات
    إنت وينك من يوم البرج ماشفناك؟
    والله موضوع ضربة إسرائيل دة مزعلانا خلاس وبنعتبرا حقارة عديل ومخليانا نعضعض فى أصابعينا .
    مفروض ناسنا ديل يكون عندهم موقف واضح و فعال إنشاالله يقوم مسؤول يقول على الملاء (ياإسرائيل إنعل أبوك) شوية بتفش لينا غبينتنا.

  4. طارق أب أحمد كتب:

    كتب محمد السمانى فى نفس الموضوع

    محمد السمانى يقول :
    الخميس,7 أبريل, 2011 عند 4:01 م (حرر)
    على كرتى صرح امس ان السودان سيحتفظ بحق الرد على اسرائيل لانها قصفت سيارة ماتو فيها اتنين سودانين بدون سبب نتيجة خطاء ولم يقل لنا ان اسرائيل كانت تلاحق الاشقر الفلسطينى الحايم فى بورتسودان ما عارف ببرتت شنو ووزير الدفاع مشغول فى بناء الابراج الزجاجية وجلب الاثاث الماليزى لتلك الابراج الدفاعية والمثل بقول البرجو من قزاز ما يطقع الناس بالحجارة ونحن وزارتنا الرشيدة من الزجاج لما فيها واحد من ناس خليل ابراهيم قدقدها كلها لا حاسبو ولا سمعنا انوقبضو ولو واحد من المواطنين الله قدرو وضرب لى عمود كهرباء ساى الله قال بقولوا فيا جماعة الخير فى عالم الفضائيات الخبر ما بندس والناس بتتجول فى الانترنت وعارفها وشايفا وانا اعتقد ان الحكومة حقو تغير الطاقم قبل ما يقوم الشعب بالتغيير و تقع الجرسة والتنازلات اتمنى ان تنتبه الحكومة الى تغيير مثل هكذا وزير بدل ان يترك يبرطع فى مال الدفاع عن الوطن عمال على بطال المفرض ان يقدم استقالته واذا ما قدمها يقيلوا تانى يوم فاموال الدفاع يجب ان توجه الى شراء منظومة راجمات صواريخ ورادرات وصواريخ بعيدة المدى وطائرات مقاتلة حتى يكون للسودان هيبة واعتبار ودينا بحثنا على ذلك ( واعدوا لهم ما استطعتم من قوة ورباط الخيل ) علموا اولادكم السباحة وركوب الخيل بدل الابراج ياربى يمكن يكون داير يبنى الابراج دى عشان يشوف بيها اسرائيل زى ما قال فرعون لهامان لعلى ابلغ الاسباب . يمكن

  5. قلنا اطلعه ثوروا على الفشل رفضت ايها الشعب ٫ قلنا هيا للتغيير رفضت أيها الشعب ، قلنا هلموا لنأخذ حقوقنا رفضت أيها الشعب ٫ قلنا دعونا كشباب نقاتل عنك رفضت أيها الشعب. ماذا يريد الشعب السوداني مزيد من الخوف ، مزيد من الغبن ، مزيد من الاعتداء ، مزيد من التفرقة؟
    لا يمكن أن نؤمن بحاكم لا يستطيع أن يحمي أهل داره ، لا يمكن ان نرضى بمزيد من الموتى بيننا في الاعتقالات ، في بيوتهم جوعى ، في مكاتبهم فقراء وفي دولتهم خاضعين .
    اقول كما قال الاديب اللبناني فليكس فارس (إن البلاد التي لا يتعذّب أبناؤها من أجلها لا يستحقّون أن تدعى لهم وطنا ) ، ( ويل لكل أمّة لا تملك عِنان نفسها).

  6. Dakeen كتب:

    سلام عليكم وجمعة مباركة .
    لا يخفى على احد الحال الذي وصل اليه امننا الوطني فمنذ ان تمكن الانقاذيون وظلوا يعملون على الاحلال والابدال وبمنطق المحسوبية والقبلية والولاء دون النظر الى عامل الكفاءات والخبرة والغيرة على الوطن . هذه ليست شماتة ولكن نتيجة متوقعة لما دار ويدور في اروقة جهاز الامن الوطني ،،،، فصار المنتمين لهذا الجهاز الحساس لا يفقهون معنى الامن الوطني ، مع غياب كامل للاحساس بالوطنية ، الا من رحم ربي ،،،
    هناك كمية كبيرة من الضباط ذوي الخبرة العالية والمؤهلات التي حصلوا عليها باجتهادهم لحماية البلد وراحت مناصبهم ادراج الرياح وظل علمهم وخبرتهم حبيس في عقولهم ولم يفكروا في حماية مناصبهم كما يحصل الان مع كثير امن المسئولين
    هذه الخبرات ولمدة عشرون عاما مضت لم يستفد منها ولا توجد رغبة في الاستفادة منها بالرغم من الحوجة الماسة لها ،، فمنهم من وافته المنية ومنهم من هرم واخرون سئموا وغيرهم من الذين تبخر ما في عقولهم نتيجة ما الم بهم من مصاب التشريد والتهميش .
    لقد اسس الرئيس السابق نميري عليه رحمة الله البنية التحتية لهذا الجهاز من كوادر ومعدات وتدريب داخل وخارج البلاد ،،، في شتى المجالات التخطيط والتكنولوجيا وغيرها ولكن للاسف ضاعت هباءا .
    اليوم وفي وسط الخرطوم ،، يظل افراد الامن ينشغلون عن القضايا الاساسية بالقضايا الهامشية . فلان معارضة وفلان يعتقل وفلان يعذب واخرى تغتصب لانها قالت لا للفساد .
    هل يتوقع من جهاز كهذا ا لانتباه الى ما يحيط بالوطن من مؤامرات ،،، فالاجانب في وسط الخرطوم وداخل القصر الجمهوري ولقيادة العامة ولا رقيب عليهم . كم منهم جاسوس او عميل وهل يتحقق جهازنا الامين القوى من شخصيات الاجانب سواء كانو زائرين او مستثمرين او سواج قبل ختم جوازاتهم بالدخول وما فائدة ضباط الجوازات في المواني والمطارات والحدود ان يقوموا بواجبهم الوطتي ،، هل همهم معاكسة ابناء الوطن وفرض سلطاتهم على بني جلدتهم الذين تغربوا من اجل لقمة حلال وقصم ظهورهم بالمسميات الرنانة ،،، جمارك وامن اقتصادي خدمة وطنية ومكافحة تهريب … الخ …….
    كان الاحلال والابدال في الاجهزة الاخري ،، وفرض مؤهلات جامعية على المهن . الان يوجد حوالي نصف مليون خريج بلا عمل ،، ورغم ذلك نجد ان الاجهزة الامنية تضم في قواتها جهلة واميين وعديمي الفائدة للوطن وعديمي الاحساس المسئولية تجاه انفسهم بغض النظر عن المواطن والوطن ….
    فليبدأ الاحلال الحقيقي للمستقبل ،، وعمل نظافة عامة لكل الاجهزة الحكومية وتشغيل الخريجين الجامعين الذين قضوا مالا يقل عن اربع سنوت في انتظار تخرجهم وتوظيفهم والدخول الى مرحلة الانتاج . ولكن نجد ان البعض حتى وهو طالب تم تعيينه في منصب قيادي — وقبله تخرج الالف واحق منه بهت

  7. نيام كتب:

    تيارة يدرب يفوت امن ما يقول بقم
    زوول تقول بقم امن يدرب يفوت
    هيتة قسيرة

  8. ابكرون كتب:

    اب احمد : عارف سنحتفظ بحق الرد دي زي : قرية الشكينيبة شمال تحذر وتنذر امريكا للمرة الاخيرة

  9. طارق أب أحمد كتب:

    الخارجية : تم اغتيال المواطنين عيسى أحمد هداب وسائقه الشخصي أحمد جبريل ..«حماس» تؤكد نجاة مسؤول كبير وقيادي في الذراع العسكرية للحركة استهدفته الغارة الإسرائيلية في السودان
    أعلنت السلطات السودانية أن الشخصين اللذين قتلا بقصف إسرائيل سيارة في مدينة بورتسودان على ساحل البحر الأحمر في شرق السودان فجر الثلثاء هما السودانيان عيسى أحمد هداب وأحمد جبريل، ونفت أن يكون يكون مسؤول التسليح في حركة «حماس» عبد اللطيف الأشقر موجود في البلاد وإنه نجا من القصف.

    وكان النائب عن «حماس» إسماعيل الأشقر أعلن في غزة الخميس أن الغارة الجوية كانت تستهدف القيادي في الذراع العسكرية للحركة ابن شقيقه عبد اللطيف الأشقر لكنه نجا منها، واتهم إسرائيل بالوقوف وراء العملية.

    وأعلنت لجنة برلمانية أنها بصدد فتح تحقيق حول حادثة قصف السيارة داخل بورتسودان واستدعاء وزيري الدفاع والداخلية وجهاز الأمن، ووجه عدد من النواب انتقادات لاذعة للأجهزة المختصة بسبب تعاملها مع الهجوم الإسرائيلي وطالبوا بمحاسبة المقصرين.

    وأمر مجلس الوزراء السوداني أمس بمراجعة التأمينات الجوية وتطويرها لتتمكن من تأمين الأراضي والأجواء السودانية بخاصة بعد الغارة الإسرائيلية على شرق البلاد، كما قرر المجلس ملاحقة المتعدين وفقاً للقوانين الدولية والوطنية، معلناً أن الاعتداء تم بواسطة طائرة كانت تحمل ذخائر حارقة وخارقة.

    ونفت الخارجية السودانية أن يكون القيادي في حركة «حماس» عبد اللطيف الأشقر موجود في السودان واعتبر حديث إسرائيل عن استهداف الأشقر تضليلاً، وقال لـ «الحياة» إن إسرائيل تريد ربط بلاده بمزاعم الإرهاب، ولم يستبعد أن تكون لإسرائيل شبكات عملاء وجواسيس من السودانيين الذين تسللوا إليها من مصر وأقاموا هناك قبل أن يعودوا إلى وطنهم.

    وذكرت تقارير أن إسرائيل «جندت العشرات من السودانيين الذين يعيشون فيها للحصول على معلومات وافية عن مسارات التهريب والعصابات والقوى الفاعلة في السودان».

    وأكد المتحدث باسم الخارجية خالد موسي أنه لا يوجد أي عنصر أجنبي في السيارة المستهدفة كاشفاً النقاب عن هوية المواطنين السودانيين اللذين تم اغتيالهما بواسطة إسرائيل وهما عيسى أحمد هداب وسائقه الشخصي أحمد جبريل .

    دار الحياة

  10. سهيل كتب:

    اصحو يا جماعه – إنتو دايرين شنو ؟ جهاز الامن و المخابرات الوطني دي ماواضحه ليكم ولا شنو .. يعني إلا يقولوا ليكم ( جهاز الامن و المخابرات – المؤتمر الوطني)

    الجوف محروق – ميزانيات الدوله المفروض انها مخصصه لحمايه البلاد تم تحويلها لحماية بعض العباد … والمامصدق – ينظر حوله

  11. التركي كتب:

    العزيز أب أحمد والسمار الكرام السلام عليكم
    بعدما سمعت التصريحات المتناقضة والغير مسؤلة دى صدقونى مابستغرب لو طلع الأمر لعبة من اياهم وبلاش اسرائيل وبلاش تجار سلاح ……. ياخوانا طولما حكامنا بعتبرو البلد بلدهم لازم الأمن كمان يكون أمنهم مش أمن الدولة …. ان شاء الله تمون فاتحة خير ويستقيل المسئولين عن المهزلة دى مش يعلقوها على شماعة عملاء سودانين لاسرائيل ومال انتو عارفين انهم عملاء وساكتين ليهم للآن ليييييه …. أقترح أن نلقى بند ميزانية الدفاع الجوى وتحويلها للصحة والتعليم … يمكن فى المستقبل يكون عندنا شباب متعلم وأصحاء يقدرو يطورو ويحمو البلد

  12. قرن شطة كتب:

    الاخوة الكرام
    اقروا كلام الاخت ملاذ اعلاه….وبعدبن انتو مستغربين ليه وراجين شنو؟ نستحق ده واكتر..ماعندى ليكم حاجة واصلاً لمواضيع الامن والدفاعات مافاهم حاجة ، ومافى زول فى السودان قاعد يستقيل من منصبه هو لقاهو بى هين ..إنقلابات ومجازفات وتزويرات تقول لى إستقيل!! بطونا طمت خلاسسسسسسسسسسسس

  13. سهيل كتب:

    يا اخواني قرن شطه و ملاذ – ركزو شويه .. السودان من 89 ما شاف و لا عايش مظاهرات بالمعنى اليخلي الشباب الموجود في الساحه هسي يعرف متى و كيف يتظاهر اللهم إلا في الفيسبوك .. غايتو البركه في قناة الجزيره و ناس زنقه زنقه .. يمكن يطوروا الفهم لدي الجيل الجديد ..

    كسره : يالجيل الجديد – ما بلومكم

  14. التركي كتب:

    سهيل : الجيل الجديد يعنى تقصد القروب (ب) غير المشفر ؟

  15. نيام كتب:

    سهيل:
    والله انتا بعد العرس بقيت كده…(واشار بابهامه الي اعلي)…
    قرن شطة:
    والله ما لاقينها بهين ناس انصاص الليالي ضحت و ركبت دبابات الشعب شدة و ساهرت في الكباري و انتو مساهرين لي في الكتب اها البستاهل منو…وكمان قالو سيد الاسم شايل ليهو جك بوش و واقف معا سيد البوش لي نص الليل لمان ضربو ليهو قالو ليهو ارح ابقا مارق الموضوع نجض حتي قال آهـ…وواحدين قالو رقص بجك البوش وقال لسيد البوش هاك الجك دا هدية و وداعا يا صديقي و الرقصة الياها…

  16. سهيل كتب:

    انتو قايلين بورتسودان براها المستباحه ؟؟؟ – الترابه في خشمنا .. بس الخواجات مسخوها بيغادي و عملوها ظاااااهره بالحيل زي كأنهم بيحرجو في ناس عمر .

  17. ياسين شمباتى كتب:

    الحبيب طارق..سلام..
    انتو الحيكومة (الحامل) ام اضانا طرشا دى لسه ما ولدت !؟؟؟ اصلها حاملة شنو !؟؟ امممممممم…
    واتوقع المزيد والمزيد من الضربات والانتهاكات..وربنا ينتقم منهم فردا فردا..

  18. التركي كتب:

    ياخوانا تكون الحكومة مدخرة السلاح دا لليوم الأسود (يوم ميدان ابوجنزير) عشان كده ماعايزة تخسره فى التصدى للغارات دى …. بس خلو
    مشكلة القذافى وعلى عبدالله ترسى على بر

  19. سهيل كتب:

    التركي يا تفتيحه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s