شئون المخربين…..

Posted: السبت,14 مايو, 2011 by ياسين شمباتى in اخرى

الجهاز المسمى (شئون المغتربين) احرى بهم ان يسموه (شئون المخربين),والمخربين هنا عائدة الى العاملين فيه والقائمين علي امره..هو جهاز منذ انشائه عكف وعزم على اهانة المغتربين واذلالهم والتنكيل بهم,,هذا بكل صراحة وشفافية ووضوح,,واتحدى اى شخص يقول بغير هذا..

ولى معه قصص ومواقف قد تحزن الشجى وتضحك الخلى وتثير حفيظة المغبون وتفرج بعضا من كرب المكروب..

ساسرد آخر المواقف التى حدثت يوم الاثنين الفائت فى شكل نقاط تسهيلا للسرد وامعانا فى التدقيق :-

*وصلت المبنى المعنى فى تمام الساعة 7:30 صباحا وهو موعد بدء الدوام الرسمى,لكن لم يتواجد اى من الموظفين بمكانه,فقلنا _انا ومن بكّر معى_ لا باس علها زحمة المواصلات او تأخر الترحيل,لكن بعد قليل بدأت جموعهم تتوافد ويتجمعون فى شكل بؤر صغيرة لتبادل السلامات والقبلات التى تشى بان المتسالمين لم يتقابلا منذ اشهر,لكن تكررت العادة وكانهم كانوا فى اجازة سنوية,,المهم بعد التجمع يبدأ الجمع فى الانسحاب التكتيكى! حيث تخلو الصالة منهم بعد دقائق,وهكذا حتى اعلنت الساعة تمام ال8:30 صباحا ! بعد ذلك نما الى علمنا انهم مضربين عن العمل,طبعا انا انبسطت شديد قلت دى بداية ثورة لاسقاط النظام,,لكن يا فرحة ما تمت قالوا الاضراب عشان المكيفات عطلانة! طبعا الموقف بقى مستفز,,فما كان منى والا انفجرت فى احداهن_طبعا معظمهن نساء_ صائحا: انتى اسه عندك مكيف فى بيتك؟وفرضا انو عندك مكيف بتشغليهو من الساعة 7:30 صباحا؟ ولا دا عشان مال الدولة وسايب عايزة تقلى ادبك؟اسه انتى اضربتى لما زادوا العيش؟؟ طبعا يا جماعة الانفجار دا كان داخلى وكدة! آىييييييي..

* اها بعد دقائق جا واحد قالوا دا المدير وما اخد معاهن دقيقة ورجع تانى! ولسه مواصلين الاضراب,,المهم جوا ناس الامن واتكلموا معاهم واعتذروا مننا وبعض الموظفين والموظفات ابتدوا العمل,فى واحدة زعلااااااانة قالت :ديل اتخاذلوا ! طبعا هنا ما قدرت اسكت وانفجرت فيها: طيب وكت زادوا السكر انتى ما اتخاذلتى!؟؟ ووكت زادوا الرغيف انتى ما اتخاذلتى؟؟ووكت ووكت وعييييييييييييييييييييييييييييييييييك..بطنى بردت شوية..

*بعدين البغيظك انهم مصرين يحسسوك بانك مطالب ومديون ليهم! يعنى تقرا (الالتزامات المالية)! انا بس نفسى اعرف البقاها التزامات شنو! وتقرا فى ورقة البرنت( المتاخرات)! مع انك تكون دافع كاااااامل وما عليك اى شئ,ومفروض يكتبوا المبلغ المستحق او اى شئ..

* فى احد الشبابيك فى لوحة مكتوب عليها كابينة رقم(3),,قلت ليهو اسه دى كابينة ولا كابنيه؟؟

*وقفنا فى شباك السداد وجا واحد عندو مشكلة وقالوا ليهو ما بحلها ليك الا (موسى) فصاحبنا مشى وجا _الكلام دا الساعة 9 جات_ وقال موسى مافى وموبايلو مقفول,وليهو كم يوم على الحالة دى,,وقررررررب يبكى,,فما كان منى الا ان ترنمت (حليل موسى يا حليل موسى..حليل موسى اللرجال خوسة)..

*طبعا الببوظ ليك اعصابى فى الضرائب موضوع الزكاة دا,,احيييييييييييييييييييييي انا,,مشيت للمدير وقلت ليهو ياخى الزكاة دى انا لى 8 شهور بس كيف ادفع زكاة!؟ قال لى دى زكاة بالشهر! اى والله بالشهر,, قلت ليهو زكاة الشهر دى من الدين الاسلامى؟؟قال ايوة,, قلت ليهو عندك فتوى؟قال لى :طبعا,,قلت ليهو : وينها؟ قا لى : ما عندى هنا..

زهجت قلت ليهو لو ما دفعت بتعملوا لى شنو؟قال لى: ما بنديك تاشيرة,,قلت ليهو مفروض تحاربونى حسب معطيات الدين الاسلامى,,قال لى: عدم التاشيرة دا ما حرب ! طبعا الجمت ولميت ضنبى ونزلت دفعت !
*وقفت قدام الضابط المسئول عن التاشيرة,وانا ورقى مستوفى ودافع وبطاقتى فى يدى ومبتسم,اكان باغتنى ليك: الخدمة الالزامية وينها ؟ فمددتها وانا مبتسم لسه,,قال لى: امشى صورها ! طبعا يادووووب البوغيتة صابتنى وانفجعت! لى سنين من زول يقول لى امشى صور,يا الموظف عندو ماكينة جنبو او بيرسل واحد من المستخدمين يصورها,,وهو ذااااااتو يصور ليها شنو!؟ما شافها وخلاص,وقرببببببت اسال الماكينة دى حقت منو لكن خفت !

* وانا طالع خلاص بعد استلمت تاشيرتى اشوف ليك صور كتيييييرة معلقة فى الحيط مكتوب عليها (فرحة العائدين لارض الوطن) قلت ديل اكيد ناس ليبيا الكانوا عالقين فى منفذ السلوم ولا المرقوهم من قصف الطائرات,المهم مشيت عليهم اكان القاهم ليك العائدين من متمردى دارفور ! لكن قلت ماهم برضو كانوا مغتربين فى تشاد ! كع..

-ولك ان تتخيل عزيزى القارئ بهذه الطريقة اين تذهب اموال المغتربين !!!!

                                                                                                                         ونلتقى….

Advertisements
تعليقات
  1. مشاكل كتب:

    مش مغترب ؟
    ضارب الترطيبة و الكنداشات و الريالات
    و ناسكم سمحين و حلوين
    و رئيسكم ملك

    ادفع ساي يا لزيز يا رايق

  2. ياسين شمباتى كتب:

    مشاكل..سلام..
    قت كدى آخوى؟؟يانى الدافع,,لكن بجيك راجع ! وبروااااااااااااقة يا حبيب..

  3. عزت كتب:

    سلام يا شمباتي وضيوفه

    انت ما عارف يا شمباتي انو موضوع تعطيل وتأخير وتزهيج وجرجرة المتعاملين مع (الجهاز) دي استراتيجية معمول بها منذ زمن وتهدف الاستراتيجية انو يوصلوك مرحلة تتمنى متى تنتهي وقريب الآخر كدا يقولوا ليك (عليك كدا من القروش) فتدفعها وانت مبسوط لأن مرحلة الجرجرة وطلعان الروح قربت تنتهي….

    نفس الاستراتيجية متبعة في الخدمة الوطنية والضرائب والزكاة وغيرها من منافذ الجباية….

    شوفت كيف….!!

    أكيد لمن أدوك التأشيرة شعرت بفرحة عارمة…… موووووووش

  4. نيام كتب:

    دوك شمباتي :
    انتو البوديكم تغتربو شنو ما تشوفو كباريكم وين …
    يا شمباتي يا حبيب المودوع و مافيهو انو انتا بمجرد ما ركبت التيارة و سافرت تحولت من مواطن مسلوب الي مواطن محلوب يعني بتتحلب كل كمين شهر فتمشي تتعلف كويس و تجي تحلب زيك و زي الحوالب الاخرين و الحوالب دي ما جمع حالب ولا جمع محلب و ما تمشي بعيد دي صفة لموصوف ديلو مقصوف ..وهي علي وزن خوالف …اما ميكانزم الدفع فهو يبدأ من الضريبة بانواعها ضريبة الدخل ضريبة الزهج ضريبة الاعصاب ضريبة النرفزة ضريبة الطابور ضريبة معلق علي الشباك كم ساعة بحجة الفطور مرة و بحجة الصلاة مرة و بدون حجة كم مرة …ثم الزكاة وهي تدفع كلما وقفت بشباك التزاكي يعني لو دفعت هسع دي و مشيت شربت ليك شاي و جيت تاني تدفع..وما تقول ليه موش حال عليها الحول ما انتا مشيت و جيت اذن حال و اية حال عدت ياعيد بما مضي ام بامر فيهو تجديد…ثم نجي للعصا الغليظة و هي عصا الخدمة و الولاء و الطاعة انتا خوالف و لا سوالف..ما اذا كنت خوالف قبل ما تخش الطب هسع بقيت سوالف و ما يخالف ..عموما كلو بحقو في واحد اسمو حسن راكوبة تلقاهو في الراكوبة حقت ست الشاي الاسمها زينب بركية قول ليهو انتا حسن راكوبة يقول ليك عايز تأجيل كم سنة.. و كل سنة يا سوسنة كلك سنا …
    وبالاخضر الليموني
    يا ليتهم رموني
    بس انتو افهموني
    وفجاتن تلقا نفسك بدل خوالف اصبحت معاق لا سمح الله…سلامتك…

  5. التركي كتب:

    قلت لى زكاة شهرية وبفتوتها كمان ههههههه والله ضحكتنى ضحك فى دى غايتو بالغتو ياناس فلان …. دحين زولك دا هسع بعرف (ماهى الزكاة) وبعدين ناسك المضربين ديل ياشمباتى مابختشو بعد ساعة ونص يقولو ليك ماشين الصلاة وهم ماكلين حق المسكين وصارفين رواتب مابستحقوها لأنهم ماأدو واجبهم اللى بصرفو على حسه الراتب …. أشوف فيكم يوم ياشجر الدوم

  6. ابكرون كتب:

    شمباتي : انا كان اندحته (يعني شنو اندجته) في الموضوع ده بطلع من طوري ….بس يا يس ما لفتت نظرك الملازم اول العيونا زي عيون البروفايل ده ؟ الضريب الاضربم كلهم الا من سكن هذا الشباااااك……

  7. ياسين شمباتى كتب:

    عزت…سلام..
    والله شكلو الحكاية مقصودة فعلا,مع انك بتكون مهيئ نفسك لجرجرة ولماضة واحتجاجات لكن اول ما تجى وتلقى الصفوف تقول متييين اخلص وتدفع وانت فعلا مبسوط! حسبى الله عليهم..

    نيام..سلام..
    لكن ما اتلومتا ! ما عصرت على عدييييل كدة وبقيت حالبة ومحلوبة ! والله صدقت هى سلب ونهب وحلب وغصب,كان بى رضاك او غصبا عنك,المهم تدفع الكنجال وتبقى مارق..
    خلاص النرجع لى كبارينا ومارومينا !

  8. ياسين شمباتى كتب:

    التركى..سلام..
    وكمان المرة الفاتت لقيت حرمة مسئولة عن الزكاة لما حاجتتها قالت لى خلاص المرة دى عفيناك ! بى قلبى قلت ليها انتى حق الله بتعفى؟؟لكن سكتا ايثارا للعفو عند المقدرة..آيييييي..

    ابكرون..سلام..
    ههههههههههههه,,دى ما لاقتنى والا كان دفعت وجيت كتبت مسودة شكر وعرفان للعيون السود وعموم اهل السودان ! آ]ييييييي..شكيت محنك يا محنك انتا..

  9. الغبشة كتب:

    المحلوبين فى شنو وابكرون فى شنو؟؟؟؟؟؟؟؟؟؟؟؟؟؟؟؟

  10. ابكرون كتب:

    غبوشه : ابكرون كبير المحلوبين حتي جف ضرعه وعجف ….! علا بهوي الرسوم السودا

  11. نيام كتب:

    ابكرون:
    اندحته تعني انسبت في الشئ حتي نسيت نفسك…والاندياح هو الانسياب في الشئ حتي تصبح جزء منه فمثلا الاندياح في المحبوب هو ان تهيم به حتي لا تستطيع ان تفرق بين ذاتك و ذات المحبوب..اما اندياحك في الكم الضريبي فهو ان تغدق مالك علي شئون المغتربين حتي يتعذر التفريق بين مالك و بين مال السيد مدير المخربين…اما اندياحك في الشكوي منهم فاسعلني انا …
    شمباتي:
    غضبك جميل زي بسمتك…انتا هسع زعلان من جهاز المخربين لما رايت من سؤ معاملة تعرف انتا حيجيك سكري لمان تقارن بينك و بين المغترب المصري و تشوف المغترب المصري ال advantages بتاعتو كيف…وتشوف المعاملة كيف…اوع تسأل ليك دكتور مصري بس للحفاظ علي دغتك…

  12. ياسين شمباتى كتب:

    الغبشة..سلام..
    صدقتى واجدتى !

    ابكرون..سلام..
    يا جاف انت! ومنو ما بهوى العيون قصدى الرشوم هى قصدى الرسوم السودا واحب سمار فى خدودها !

  13. ياسين شمباتى كتب:

    نيام…سلام..
    بركة النبهتنى للحتة دى,لطن برضو جايينى الخبر انهم بحافظوا على وظيفتهم لقاء مبلغ زهيد من المال يدفع سنويا الى ماشاءالله ! هنا تقدم استقالتك ولو عندك واسطة بتاخد اجازة بدون مرتب او بمرتب الى ما شاءالله برضو! محن..

  14. AFLAIGA كتب:

    شمباتى ود الناس الكلو احساس وبيغفر للناسين الزينا : اوع تقول لى سجم خشمك مافى غفران وقطع ناشف !!
    يعنى يا شمباتى عاوزين تغتربو وضريبة الحقد الحكومى انكم ما مشاركين معانا فى الذله هنا فى البلد ما تدفعوها طيب يذلوكم كيف يعنى ؟؟ شوف اى مواطن فى البلد دى او بره عندو طريقة اذلال خاصه بيهو يعنى يخلصوها من جسمو من فكرو من جيبو المهم لا زم يدفع لا زم يدفع . اسى انتو تحمدو الله انو بيخلسوها منكم قروش مش زى مذلولى الداخل قروش وجسوم وفهوم والله حاسدينكم . اسى لو حددو لى اى مواطن انو يعتقوهو بى كم بندفع طوالى بدون تردد ولا شنو يا مذلولى الداخل ؟؟
    تحياتى يا اب قلبا كبير – برضو قول لى سجم خشمك ؟؟

  15. ياسين شمباتى كتب:

    افليقا…سلام..
    والله ياها المذلة والمهانة فى بلد المحنة والاصالة,لا الجوة مرتاح ولا البرة مرتاح,لكن تامينها تكييف وتفاح! آييييي..
    وكلو بمضى يا رفيق..

  16. سلام بالدفار للناس الكتار
    ده كله كوم وكرت السفر ده كوم براهو … والحكاية اول ماتقدم للتأشيرة ويعاينوا للعمر … وأنا لى اكتر من ثلاثة سنوات بطلع كرت سفر مرتين وتلاتة فى السنة وكل مرة يقولوا لى دى آخر مرة لأنك من مواليد 1959 وطبعاً مافى أى فايدة وكل ما أمشى واجيهم راجع أدفع و بدون محاسب وأنا علشان ماعايز عطلة والا يقولوا لى لو ماقادر تدفع مافى داعى للغربة زى ماقالوها قبل كده لى واحد صاحبى خلوه قطع جوازه وقميصه وقلع منطلونه فى حوشهم و و و و قام سدارى .

    هسع أنا لى سنة مامشيت وماعارف لجنتهم الشكلوها لتعديل العمر بخصوص كرت السفر اجتمعت وانفضت كم مرة وطبعاً فطورهم وغداهم وحق السجاير والبارد والساخن من ريالاتنا نحن الريالتنا كابة ديل ,

  17. ياسين شمباتى كتب:

    سامر…سلام..
    براحة ما يطق ليك عرق! انت لكن ما اديت دين الوطن لييييييه!؟؟ مش وللاوطان فى دم كل حر شنو كدة ما عارف؟؟الغريبة حكاية الدفع والسفر دى! ما يا تمسكنى اقضى ليك الخدمة زى المصريين يا خلاص سامحنى او امهلنى,لكن القروش هى مربط الفرس! فرس يا سامر,فاهمنى طبعا…

  18. Dakeen كتب:

    دكتور شمباي سلام وحمد الله على السلامة
    كان بقت على التاشيرة والحلب والجرجرة هينة ،،، المشكلة في المغفلين والمغفلات القاعدين يخدموا المغتربين (المعقبات ذوات البدل الكحلية والنظرة السحرية للريالات المخفية) فما تشوفك واحدة زهجان من الاجراءات والا بكل ادب وذوب وغنج تجيك :
    س :مالك زعلان ياود العم
    م : يا اختي انا لي تلاتة يوم جاري وراهم عشان التاشيرة وتعبت من الجري
    س : خلاص ما عندك مشكلة كدي اديني ورقك ده
    تاخذ سين الاوراق وتفحصها وترتبها ترتيب معين ثم تخرج دباسة من شنطتها وتدبسها ليك وتقول ليك.
    س : ياخ ورقك ده ناقص ورقة واحدة بس انا حا اعملها ليك واقدم ليك ورقك واسلمك جوازك مأشر في ساعتين
    م : قلتي كيفن يا بتي ،، ساعتين بس ؟؟؟!!!!
    س: زي ما بقول ليك ساعتين بس ،،، تمش المطعم اكل ليك حاجة واشرب ليك قهوة تعال بعد ساعتين ،،
    م : اها يا بتي يتعلميها كيف
    س: انت ادفع 250جنيه وخلي الباقي علينا ،،، ده شغلنا
    امسكي يا بتي ،،، بس خلصيني من البرنامج ده :
    تسلم س المبلغ وتضعه في شنطتها تم تراجع الورق مرة اخرى ،،، يلا اديني حق رسوم الفورم ورسوم التاشيرة ورسوم المساهمة ورسوم الخدمة الالزامية ورسوووووووووووووووومم ………. كله 750جنيه و50 جنيه عشان الزول البسهل لينا الموضوع ده …
    م: طيب يابتي المبلغ ده ما كبير
    س: ياحاج ما كتير ولا حاجة ،، انت ليك 3 يوم ما عملت حاجة ،، انا بخلصك في ساعتين بس :
    يتذكر م المرمطة الذلة والهوان الذي عاناه خلال الثلاثة ايام السابقة ويقارن بينها وبين المبلغ المذكور 1050 جنيه وحا ينفك من شر ثلاثة يوم مرمطة تانية
    بكل حماسة وعنجهية يطلع المبلغ ويسلمه لي س ويذهب للمطعم لتناول القهوة وفي سره يقول :
    انعل ابوها القروش احسن نهين قرشنا ولا نهين نفسنا خربانة ام بناياً قش .
    وبعد ساعتين يستلم صاحبنا جوازه مختوما بالتاشيرة ولا توجد اي ايصالات للمدفوعات اعلاه ؟؟؟؟؟؟؟؟!
    يا ربي الايصالات دي مشت ويييييييييييييييين ؟؟؟؟
    جاوب يا دكتور شمباتي على السعال الصعب ده .

  19. التركي كتب:

    الأخ دكين انت ماسمعت بصاحبنا البنى عمارة بنص الكبرى وحكى لصاحبة فقام صاحبه بنى عمارة بالكبرى كله أها ايصالاتك دى لحقت الكبرى … بس برضو نقول ديل غلابة ما أنى أشك فى انهم متفاهمين كوييييييس مع الناس الجوه …. وربنا على المفترى والكان السبب

  20. الكناني كتب:

    تاني ما تقول لي بتاع وبتاع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s