وفجاة ملح – عرفة متين يا نادية ؟؟

Posted: الأربعاء,18 مايو, 2011 by aflaiga in اخرى

العبارتان التلان عنونت بهما مقالى هذا لهما قصتان ملخصهما :
فجاة ملح : يحكى ان احدى نسوان احدى الحارات تدعى سعدية كانت لقاطة كلام وتحب التعابير الجديده برغم جهلها واميتها وفى احد الايام التقطت كلمة ( فجاة ) واعجبت بها ايما اعجاب وارادت تجربتها عمليا على الفور فقامت كوركت لى جارتا :
سعدية : حليمه . حليمااااا – ياحليما هووووى .
حليمه : ايوا يا سعدية خير مالك ؟
سعدية : عليك الله يا حليمه ادينى شوية شطه لو عندك وفجاة ملح برضو !!!!

اما قصة العبارة التانيه : عرفة متين يا نادية ؟؟ فيحكى ان احداهن تدعى سميره قامت بتعريف صديقتها نادية على احد الزملاء يدعى افليقا فى صدفه عابره وفى اليوم التالى قابلت سميره ناديه صديقتها وكانت نادية مستعجله فى المشى فسالتها :
سميره : ماشة وين يا بت مستعجلة كده .
نادية : والله الليله ماااا عرس هناء اخت افليقا الصغيره .
سميره : افليقا بتاع امبارح العرفتك عليهو ؟؟ سجمى عرفة متين يا ناديه ؟؟؟؟!!!!
ومن دييك وعييك
– –
طبعا الشاهد فى الامر والاستدلال هو العرفه السريعه للشعوب للديمرقراطية النيو لوك القايمين عليها الايامات دى والدفعو فى عرسها الارواح يا ربى تكون دى هبة شعوب ولا تقدير ربانى بتوقيت ربانى ؟؟ لانو بالجد حركة مصر بعد تونس ياها عرفة متين يا نادية ؟؟؟

اما بالنسبه للحسبه فى فجاة ملح فدى ممكن نلقاها فى تعبير الشعوب عن الانتفاضات التى تبدا بعبارة :
الشعب يريد موية الشراب او شوية اصلاحات وفجاة الشعب يريد تغيير النظام .

بالله عليكم خلونا نناقش التغييرات المفاجئة على شعوبنا العربيه فى المنطقه التى كانت لا تحلم بتخفيض اسعار العيش وصارت تتدلع فى الاقرار بشان محاكمة مبارك او العفو عنه !!! مش غريبه شوية ؟؟ يا ربى شعبنا ده حيجى يوم يصل مرحلة يتدلع فى العفو عن الانقاذ ولا لا ؟؟؟ ولا نحنا حظنا حتى فى الثورات زى حظنا فى الفشفاش نلقى فيهو عضم ؟؟؟

Advertisements
تعليقات
  1. aflaiga كتب:

    طبعا ابكرون ( الما باركنا ليهو ) بيكون بيقول انتو افليقا ده يا ما يجى كلو كلو يا يجى يقدنا كده بمعدل 3 بوستات فى اليوم الزول ده ما تعرسو ليهو وتريحونا – طوالى طبعا بشاوى حيجى ناطى يقول انا حانزل فى اليوم سبعه بس عرسو لى !! ونيام حيقول ليهو يا بشاوى السبعه ديل وفرم لى حاجه تانى كان بتقدر – ههههههههههههههههههههه
    ابكرون مبروك واهو المناسبات الزى دى ما بتحتاج لى تاريخ ميلاد وتحديد موقع كواشف انحنا الحمد لله يادوب طهرنا حمودى . هههههههه

  2. ابكرون كتب:

    افليقا : سلااامات (اولا قوم فوق…بعد داك استرح وخلي بالك من الشرح)….التهنئة مقبولة رغم الزعلة في عدم الجية مع الاخوان والاخوات الحضروا او هاتفوا لكن ولا يهم……بعدين زواج الابناء ما مقياس عندنا دفعتنا (ت.أ) تزوج قبل عامين وابنته البكر لسه لم تحبو …هههههه
    مبروك طهور حماده ، الطهور كان سنه ولا pvc ؟ الاخير ده بعملوه ويباصروه باللحام البارد… !
    ا فليقا نحن حظنا في الثورات زي حظنا في الامبدات وعلي ذلك قس
    تحياتي للاسرة
    وغيب وتعال تلقانا نحن يانا نحن
    لا غيرتنا الظروف لا هدتنا محنه
    مش لو غيرو قوش
    وجابوا بدلو بوش
    ولو عكسوا جريان النيل من الشمال للجنوب

  3. aflaiga كتب:

    ابكرون : ههههههههههههه – باااالغت فوكا – اولا يا سعادتك انا كنت بره البلد ايام عرس البنيه ربنا يهنيها .
    ثانيا طهور حمودى فى مرحلة التجربه الاوليه لسه ما تم التنفيذ يعنى بروفات الايامات دى زى رقيص العروس وكده هههههههه
    ثالثا بى فى سى دى جديده اشرحا فى الميل لو امكن
    بعدين ياخى كشتاقين والله جد جد قمنا وقعدنا زى خرتمية مره وما تسترحنا وراجين الشرح باوطى قيام

  4. التركي كتب:

    أفليقا و(فجعة) ظهرت انت وحركت المدونة …. ياخ امس كنا بناقش موضوع السودانين البغتربو سنتين تلاتة ويجو يدخلو ليك بين كل كلمة والتانية كلمة أجنبية …. نحن كسودانين مشهورين بسرعة التأقلم واتقان التقليد اللى احيانا بكون أعمى (دا رأئي مادراسة) قبل كم سنة اتصل علي زميل وقال لى افتح القناة السودانية بتلقى صحبك (النوباوي) قال مابعرف عربى وقاعدين يترجمو ليهو من الانجليزى للعربى … تصورو انو دا زملنا بس درس وعاش فى تركيا مدة تسعة سنوات لا أكثر والغريب انو عينوها (طبق الاتفاقية) سكرتير تالت فى الخارجية …. عجبى
    المتغيرات الحالية شئ مخيف اكتر من انه متفائل بالنسبة لى شخصيا …. أعتقد انو ممكن الوصول الى الهدف بخسائر أقل من كدة (عيب على السلطة) ومحاكمة الرؤساء بطريقة مشينة أرفضها جملة وتفصيلا مهما كان جحوف الدكتاتور … وحكاية أتنازل ليكم عن ثروتى (المسجلة فى اقرار الذمة) دى قصة استعباض لا غير …. ياافلى انت عايز تطبق دا فى الانقاذ عشان تنقذ الناس ههههههه ياخ طيب ايدك تقع تحت شويتين خليها الانقاض وعينهم ماتشوف الا النور

  5. AFLAIGA كتب:

    التركى : ابسلوتلى انت منور وان فورشنيتلى الواحد غاب عنكم فتره ريللى مشتاقين وباى زا ويى وين باقى الناس ديل ههههههه شفت اللخبته دى .
    طبعا الايامات دى اخوك سايق ليهو امجاد فى الشارع غايتو جنس غايتو موعودين بيوميات سائق امجاد فى القريب العاجل .
    مشهد من الامجاد :
    هى : يا انتا عليك الله ممكن تودينى لى وائل ؟؟
    افليقا : اوديك لوائل واجيب ليك وائل ذاتو هنا لو عاوزه انتى تامرى بس .
    هى : مرسى مرسى خاااالص ظاهر عليك زول ذوق وجنتل مان ( ده طبعا الكنيه بتاعة م.. ) !!
    افليقا ك ياستى ده من ذوقك بس والله اتفضلى اركبى لحظه افتح ليك الباب معليش بابنا ده عاصى ما بتقدرى عليهو .
    هى : يا سلاااام عليك اسى عاوزه اقول ليك كده لانو البيدكير بتاعى بيبوظ لو فتحت الاب براى .
    افليقا : سلامة بدكيرك اها نمشى على وين من هنا ؟؟
    هى : والله ما عرافه وائل قال حيستنانا جنب هابى تايم كدى ودينا هناك .
    افليقا : ( سجمى هابى تايم ود الزبير ما بيشوفنى وتبقى شمارايه )
    هى : اوع اكون مسببه ليك مشكله ود الزبير ده اخو المدام ؟؟
    افليقا : مدام ما دام الاسف يا ستى لالا ده واحد صاحبنا .
    هى : واااو واسمو ود الزبير عديييل كده ؟؟
    افليقا : طيب انتى لو شفتى بشاوى حتقولى شنو ؟؟
    المهم وصلنا هابى تايم والحمد لله ود الزبير ما شافنى كان حيكلم لى بشاوى ..
    هى : عاين يا انتا وائل ما جا لسه ممكن اقعد فى العربيه لحدى ما يجى ؟؟
    افليقا : تقعدى فى العربيه ؟؟ معقول ؟؟ العربيه هى البتستاذن تقعدى فيها لحدى ما وائل ما ما يجى ذاتو !!! جلسرين تقيل مش يا ابكرون ؟؟
    هى : ياااى انت زول جنتل والله انا حاكلم وائل عنك بعدين حاضر ؟؟
    افليقا : تحضرك البركه يا بتى الله يهنيكم انتى ووائل لحدى ما وائل يجى .
    نواصل …

  6. نيام كتب:

    AFLAIGA:
    هنالك ظرفاء من البشر يصنعون الفاظا يتبادلها العامة و احيانا الخاصة دونما ادراك او تفكير …فعندما يتحدث معك احدهم في موضوع ما ثم فجأة يقول لك “في الحتة دي انا قلت ليه كذا كذا ” فهو يعني وهنا اخبرته كذا و كذا بينما الحتة تعني ظرف مكان اي في هذا المكان قلت له كذا و كذا ولكن حيث لا امنيات تغيب ولا كائنات تمر…
    او يقول لك اخر وهو يشرح لك امرا ما “يلا نقوم نقول كذا كذا ” ف يلا معناها هيا نتحرك ونقوم معناها واضح والقول لا يحتاج ل يلا كما لا يحتاج لقيام و جلوس…
    والغريب ان كثير من (مسقفينا ) كما يقول الرئيس اليمني لا يتورعون عن مجاراة هذه اللغة…
    وهم يحسبون انهم يحسنون صنعا بحنكشتهم لغة المدينة فاخذوا في استخدام لغة ممعنة في الزقاقية (لغة الزنقة زنقة )مثل الشمار كتلو او شمارو تقيل وهم يعنون ان حب استطلاعه قد بلغ مداه…وكنت الي عهد قريب كلما سمعت هذه اللفظة اتذكر صحن الفول وعليه طبقة من زيت السمسم العصارات و كمية من الشمار ذو الرائحة الزكية تطفح علي سطحه و كومة من الرغيف البلدي المقمر علي اطراف الطاولة…ولكن هيهات فقد اصبح كل شئ ماسخ و ممجوج و كل من عليها ماجوج..فلا طبق الفول الشهي و لا الشمار الزاكي و لا زيت السمسم العصارات ولا حتي العصارات…
    اما الكلمات وارد الغربة فهذا امر ربما له ما يبرره بحكم ان الفرد قد عاش لفترة في مجتمع تحدث لغته فاثرت فيه و اثرته و لعله باخع نفسه علي اثارها و لربما تركها بعد حين…
    انا لا ادري لماذا اصبح الكون كله make up روج في روج و كريم بشملا ووجوه بيضاء بجلود داكنة البشرة كحيوانات الفضاء الخارجي…او كما تبدو في افلام الخيال العلمي…متي ياربي انتهي الصدق…
    كسرة:
    ابكرون:
    حرم ما سمعت بيكم الا بعد صديت..مبروك الف مبروك..

  7. AFLAIGA كتب:

    نيام : فى امجاد داماس ترخيص الجزيره نرسلا ليك ؟؟ لانو اخر وحده شالا بشاوى وشغال بيها حنان تقيل ..

  8. مُخير كتب:

    الحلوين سلام ومحبة واحترام

    أفليقا: بركة الجيت وبعودتك عاد للدانقا بعض من ألقها وروحها يا نبض الشارع إنت ههههه

    أبكرون: خجلانين واللوم بالكوم مبروك للبنية وعقبال البقية وسامحنا على التقصير …

    نيام: شاعرنا الهُمام … حاول أن تكون سيد قومك المتغابي، لأنو لو ما تخنت جلدك وعملت رايح حيطق ليك عرق أو ينفجر شريان، ولا نُريد أن للسودان الفضل أن يخسر شاعراً يساوى وزنه ماساً …

    التركي: فعلن مُخيف، لكن على قدر أهل العزم تأتي العزائم ولا يصح إلا الصحيح ولكل أول آخر

  9. AFLAIGA كتب:

    مخير : الاديب الاريب سلام وشوق وتحايا .
    الدانقا بالقها لا ينقصها شيئ ان غاب من غاب او حضر من حضر ده من ذوقك بس .
    فى انتظار تداعيات استشهاد بن لادن فى بلدكم فى بوست خاص منتظر فى القريب منك .

  10. AFLAIGA كتب:

    مشهد سغنتوتى :
    وقفنا كان فى لقتو بى حنتو ايام القمردينه :
    سلمت عليه مدت يدها سلم عليها من بعيد عرفها على المدام سلمت عليها وفى نفس كل منهما ( بالله دى اللقيتا – بالله دى الكنت معرسا ) ضحك من اعماقه فى سره وسار يتابط يد الجديده بينما تودعهما القديمه بنظرة فاحصه تتامل المقارنه بين مشيته معها ومشيته مع الجديده – سرح بخياله انه مشى مع القديمه كم كيلو وغير كم كتينه وزيت وقفل الطبلون كم مره قبل كده – لكزته الجديده بدلال سائلة : مشيت وين ؟؟ تذكر انه لم يمشى مع الجديده سوى الف كيلو وان غيار الزيت الاول قد حان موعده تحاشى الورشه القديمه التى كان يغير فيها الزيت والكتينه واختار نوع زيت جديد لم ينسى ان يغير المصفى كتب على زجاج حبهم الغاير القادم 24 يونيو 2011 م يعنى قبل عيد الثوره بى 6 يوم يا ربى الغيار الجاى حيكون فى عيد ثوره ؟؟؟ لكزته مره اخرى سائلة : انت دى منو السلمنا عليها ومن مشت وانت سرحان ؟؟؟ ضحك ولم يجب …….

  11. AFLAIGA كتب:

    مشهد سغنتوى 2 :
    التقته بعد ان انفصلا بفتره كانت جميله تلك المراه وهى تسير الى جواره مطمئنة ربما لم يحن موعد الغدر بها بعد !! سلمت عليه بانفه وكبرياء رد عليها بذات السلوك دون ان تلمس يده الوالغه فى اذاها من قبل يديها – قالت فى سرها الحمد لله الذى عفاانا من الاذى واذهبه منا – قال فى سره نفس العباره – سالته ما عرفتنا بى الاخت فقد كان يتحاشى تعريفها على الناس بدعوى انها لا تشبهه – اجاب بثقه متغطرسه – المدام – سار فى حال سبيله وهو يجتر شريط من الذكريات الاليمه وهى كذلك – لم تكن قد تزوجت بعد فقد كرهت الرجال بعده وكره النساء بعدها الا انه لا يطيق العيش دونهن ولا يحب الحرام – تذكرت مقولته تلك بانهها كرهته فى الحلال والحرام – ضحكت وهى تتمتم ومستعجل مالك – جال بخاطره انها تسال نفس السؤال وضحك لانها توقعت ان يعيش بعد الصدمه على الاقل لسنه كامله فى نقاهه – استغفر ربه وهى كذلك لم يلتقيا بعد برغم ان تنافسا محموما للظهور بمظهر الناجح الذى رحمه الله من حياة تعيسه كان همهما ودافعهما للحياة الجديده .

  12. نيام كتب:

    فلقة انتا سمسمة بطلت تخش الدانقا و لا شنو شايفك منشرح وتقدل في مشيك…الحق ابوك يا حمودي بروفات الطهور طايرات…دا بابا بعمل في بروفة خترية…

  13. نيام كتب:

    مخير:
    عودة افليقا دي يا مخير ما اعتيادية دي جس نبض للاحبة عايز يشوف مقاس الدانقا في الازدواجية اصلو بعد الترقية فكر في الثانية…

  14. AFLAIGA كتب:

    نيام ك انتو الواحد ما يكتب قصه من الشارع الا تجرو تكوركو سمسمه وين ؟؟ اسى الجاب سمسمه هنا شنو ؟؟ لو اى زول بيكتب عن سمسمتو لجفت الاقلام ورفعت الصحف .
    بعدين انت حمودى ده الدخلو شنو هنا ؟؟ حمودى يلتزم الحياد وسياسة ضبط النفس وزمام المبادره والرد فى المكان والزمان المناسبين يعنى زى جيشنا فى ابييى كده .
    ولا المواضيع دى بتجيب ليكم الهوا وما قادرين تقروهاقلتو تحرشو سمسمه ههههههههههههه

  15. مُخير كتب:

    الحلوين سلام

    أفلي: ياخي إفتقدنا سيناريوهاتك لكن برضو قوم، إنت مكسر في الحديد، وسمسمة خلقها الله ذو البأس الشديد لأنه جل في علاه يعلم أنه لا يفل الحديد إلا الحديد، وعليه وحيث أنني أعلم إنو كل ذوات الدفع الرباعي بتكسر ضلعك غير أنني أسأل الله أن يزرقك شبحاً 500 سي عشان تنزل البلد كل خميس طبعاً مع محطة وقود ووفرة في الرزق إن شاء الله هو ولي كل شيء وقادر عليه.

  16. AFLAIGA كتب:

    مخير : اراك تترجم احلامك فى السرد عن الشبح ال500 سى سى – افليقا عاوز سى سى من الوريد الرئيسى وبس ..

  17. ودالخلا كتب:

    سلام أهل الدانقا سلام، سلام يا أهل البيت العالي سلام،،،
    السمار الكرام بنو الأكرمين شيوخ القبيلة وشبابها صغارها وكُبارها نساءها وفتياتها، كلكم السلام عليكم جميعا”….
    فعلا” أفليقا أعادنا لكتابات (نادية) يا نيام وعارفك حاتكون نقشتها من تكون؟؟؟ ولأفليقا نكهة (الفلور دامور)، بينما لك ياسديقي العزيز نيام عبق الجبل الأخضر بنكهة اللافندر وتوسكن بتلك اللمسة ذات الحنان الساحرة يا ليمارا…
    لكم وحشة ولكم طعم خاص عند اللقاء وما أحلي ساعات اللقاء في الدانقا عند الملتقي والسؤال أين بقية عقدكم الفريد بيشاوي وعزت وأب أحمد وهلم جرا..
    تحياتي ياقبيلة الأبداع…

  18. AFLAIGA كتب:

    ود الخلا : والله ياقبيله مشتاقين جد جد ولعن الله ما فرقنا ان كان الشيطان ويسر الله ما فرقنا ان كان السعى فى طلب الرزق ورحم الله وحفظ من جمعنا ان كانت الاوطان .
    اشك انك والغ حتى النخاع فى ادبنا الشعبى القديم بمحظوره ومتاحه ذاك الادب الذى لا يشبه باى حال راجل المار حلو حلا ولا وراورا الايامات دى !!
    استحلفك بالله ان تكتب لنا عن تلكم الايام بنظرة سودانيه شعبيه تاصيلية بعيدا عن ساس يسوس واعتبار اعمال الاولين جهالات بمقياس الاخرين طبعا فاهمنى موش ؟؟
    لا حرمنا الله منكم ودمتم .

  19. AFLAIGA كتب:

    مشهد سغنتوتى :
    افليقا الكبير ومنزل الايجار :
    افليقا : يا منصور السمسارى عليك الله انا فصلت البيت ده للايجار وعاوزك تجيب لى مؤجر محترم حامل قران بيخاف الله .
    منصور السمسارى : جدا يا عم افليقا طلبك عندى والله شيخ عمر ده راجل ما افضلو عليك وبكره تشوف منو كل خير وبالمناسبه هو امام مسجد الملجه وحيصلى بيكم يشهيكم الصلاه .
    واستاجر شيخ عمر المنزل وبعد سنه تم اخلاءه بالبوليس لعدم دفع الايجار وبعد فتره :
    افليقا : يا منصور عليك بالنسبه لموضوع البيت مع انو الواحد مفروض ما يكلمك تانى لكن عليك الله المره دى شوف لينا مؤجر يكون كنسى يهودى بوذى اى حاجه لانو حامل القران بتاع المره الفاتت شهانا الامانه وحمل معاهو ايجارنا بتاع سته شهور !!!
    وبعد اسبوع كانت حجه عواطف تسكن منزل افليقا والعربات ما تديك الدرب ورجال خاشين ورجال مارقين واخر سكسكه وضحك وقرقره …
    افليقا : يا منصور يا اخوى انت قصتك شنو ما للدرجه دى كمان ما تبالغ ……
    منصور : اقول ليك شيئ يا حاج افليقا اكسر حيطة النص دى وعرس لى ولدك افليقا فى البيت ده وانسى موضوع الايجار …
    وليته لم يفعل هههههههههههههههههههههههههههههههههه

  20. AFLAIGA كتب:

    لجميع الاحبه الحلوين المشتاقين ليهم الجوه وبره والقراب والبعاد نهديكم :

  21. لمى هلول كتب:

    اهلى الطيبين البحبهم
    بصراحة مشيت كدا ورجعت كدى لقيت ليك نفسى ضايعة من البوست كان التغييرات على شعوبنا وضحكت على النكته بتاعت فجاة واستعملتها كمان طوالى من شدة م اعجبتنى انا كمان وفجاة لقيت ليك التعليقات بره من الشعوب والمنطقة والمشاهد السغنتوتيه كانت مسخنة بجد..
    وقلت مالو انا غايته بعلق على الشعوب فى المنطقة …
    عتقد اننا الان لانحتاج الى تقييم لان الزلزال لم يتوقف بعد …
    ولكننا كالعادة نخشى عدم الثبات ونتخوف من التغيير …وما بين هذا وذاك على كل لاغبار على الثورات ولا مجال لتفنيدها لاننا بحوجة لالغاء ماعدهناه لنواكب ما تمنيناه..فقط الخوف كل الخوف من تبنى سياسة العنف والتعنيف والقتل والدمار والحروب الاهلية والاحقاد النفسية ….وظهور الارماديلو وياجوج وماجوج والناس التى براسها افكار منافية للطبيعة …
    على كل الديمقراطية مفهوم كبير نحن كشرق اوسط كما يصرونا ويلمونا ويسمونا لم نفقه منه الا بضع امتار …نحن قوم لانريد ديموقراطية بقدر ما سنتخاصم على الدينية …الحرب القادمة هى حرب الاديان والتى كانت الديمقراطية الباب الذى مكنها من الخروج…
    ونقول يا ساتر ويا لطيف

  22. ابكرون كتب:

    نيام : لا تخاف علي افليقا ، سمسمة بتكون في الصين والنت في الصين مقطوع……او احتمال يكونوا موقعين اتفاقية ملخصها لا ضرر ولا ضرار …… اهم بنودها : قول واكتب واحكي ولكن اياك اياك ان تبتل بالماء
    سنكل : تتذكر الولد الدقة باب بيت صاديقه وطلعت ليهو اخته السمحة وقعد يتمتم تتذكر قال شنو ؟ دي من حكاوي افليقا …….بالله يا سنكل هل من عودة تاني ؟؟؟؟؟؟؟يااااخ بالغته فوكا

  23. aflaiga كتب:

    مشهد صباح الاربعاء :
    بعنوان : الله يسترك يا امير ..
    قد يستغرب البعض بعد ان يفشل فى البحث عن مطابقة لاسم امير مع الامورين الكتار البيعرفهم ( الامورين جمع امارير ) وده جمع تكسير – لانو امير المقصود هنا مش هو امير بتاع اى واحد فيكم ( بتاع اى واحد ما معناتا بتاعو بتاعو لكن بتاعو يعنى البيعرفو عشان مافى زول يجى ناطى يقول لنا بتاعين امير برضو ؟؟ ) ..لن اطيل فى التقديم لامير امير الذى اقصده هنا هو امير ابو صباع امير اللى لو اتوفى حيقولو المرحوم والد صباع وابن الحسن بتاع امير الحسن يا رايع حبيبى ) اها كده عرفتو امير الانا قاصدو يعنى عمو امير ابو ولدنا صباع امير .
    والدعوه ما موجهه – الدعوه هنا التى قصدت بها ان يستجيب الله لدعائى ويستر امير اللى سترنا بى ولدو صباع ..
    كنت فى الحقيقه عاوز اكتب موضوع منفصل عن عمنا امير ابو صاحبنا صباع لكن قلت يا ود يا عبدو الايامات دى الناس كايسه الوحده ما تنفصل ليك بى موصوع براك وتجهجه الناس اكتر مما هى مجهجهه .
    اها لمن قلنا ( ثورة مايو ) لمن قلنا الله يستر امير ما قلنا كده من فراغ ابدا قلنا كده لانو امير والله سترنا وستر اىزول انكسر ليهو شيئ لمن قام لصقو بولدنا صباع ود عمنا امير .
    الموضوع ده بالله مهم جدا واى زول مفروض يورينا انكسر ليهو شنو واسهم ولدنا صباع فى لصيقو ولو الناس عاوزه تعرف ولدنا صباع ده بيلصق شنو عشان يمكن لصقو بيهو وهم ما عارفين او عاوزين يلصقو بيهو لانهم لصقو بى حاجات تانيه حاميانى وما نفع ممكن نوريهم كلهم وللاصدقاء فى الربع العوامره وما يطلبه المستمعون ك
    يعنى فى زول برستيجو انكسر بيلصقو بامير وامير ده اسم الدلع بتاع صباع امير
    يعنى فى زول كرامتو انجرحت قام لصق جزء منها بى امير
    يعنى فى زول فرت معاهو قام رقعا بى رقعه ولصق الرقعه بى صباع امير .
    وللتذكير صباع امير ليس مخلوق مادى ممكن يكون معنوى برضو يعنى مثلا فى زول بيرب من مصيرو بى صباع امير مثلا يضرب حاجه ينضرب بى حاجه غايتو الموضوع ذو شجون ونتمنى انو تتفاعلو معانا فيهو .. ونختم مره اخرى بالدعاء لعمنا امير انو ربنا يستره زى ما سترنا ..

  24. نيام كتب:

    فلقة:
    اولن نشكرك و نشكر الاخ امير علي ولدو صباع و نتنمني من الله ان يحفظ له ولدو صباع من الضياع و ان يرزقه بزوجة صبّاعة طباعة حتي يطبعوا العلاقات مع ابيي و نبني دولة الاصبعة الحمراء…كما نسال الله سبحانه و تعالي ان يرزقهم بصباعين تؤامين حتي نستطيع ان نلزق كل طائر مرتحل عبر البلد حملتو اشواقي الدفيقة من قبيلة الصبعان و للفقيد الرحمة….اما فرع قبيلة الصبعان بغرب ليبيا فنسأل الله ان ينجيها و يحميها دا هلكنا 42 سنة وهو مقعمز علي الكرسي…

  25. AFLAIGA كتب:

    عزيزى نيام : اول شيئ نشكرك على شعورك الجميل تجاه عمو امير والاجمل تجاه ولدنا صباع .
    بعدين نحنا قلنا تفاعلكم معانا يعنى ما حكيت عن حاجاتك اللصقتها بى صباع امير ولا كلو فى السليم ؟؟
    ابكرون : سمسمه فعلا فى الصين لكين ما الجغرافيه .

  26. AFLAIGA كتب:

    مشهد الاربعاء رقم 2 :
    فكس مشاعر :
    طبعا برضو الناس حتمشى لى فكس بمعناها الانجليزى مثلا لمن نقول فكس الشيئ افكاسا اى اصلحه اصلاحا – او ان نقول هى فكسد زا بروبلم اى انه حل المشكله – لكن الفكس المقصود هنا هو ذلك المستحضر الذى كانت الصينيات الاستخباريات السوقيات يقمن ببيعه فى شوارع الخرطوم وهن يقمن بعمليه امنيه استخباريه خاصه تتعلق بدراسة سلوك الشعب السودانى بدءا من المشى مرورا بالسلوك التسويقى وليس انتهاء بما يحب ويكره والموضات .
    الفكس هذا مستحضر عشبى معالج كيمائيا لازالة الكثير من العلل البدنيه ( طبعا فى علل نفسيه لا فكس لا جن احمر بيزيلا ) – صديقى س جرب هذاالمستحضر فى تفكيس المشاعر واعطاءها جرعه تخديرية فكان كلما يعانى من مشكله مع عواطفو يمسح فكس فى مشاعرو عشان ورم الاذيه ينزل شويه ويتفشى او التهاب الغدد الانسانيه يقل شويه او دوالى الكرامه تتقلص شويه او حتى معالجة الاثار الجانبيه للعمليات الجراحيه الكان بتطرا على حياتو الزوجيه او النزيف بعد الولاده الخاص بالريحه والسمايه ولوازم المولود من تطعيم لحدى تنعيم وصنفره ودهب ولاده وعفش ولاده ..
    المهم صديقى س من مجربى فكس المشاعر وده مستحضر بيتاخد جنبا الى جنب مع صباع امير المشاعر والاتنين مضادات بيتفاعلو مع فرط حساسية عواطف لتقلي الاثار الجانبيه من التعايش معاها ..
    اها حصل زول فيكم مسح فكس فى حنان مشاعرو ؟؟؟

  27. AFLAIGA كتب:

    اخونا شمباتى : بالله بصفتك نطاسى بارع مع انو الصيدلة والسموم ما تخصصك لكن الدكاتره ديل بيعرفو اى شيئ ( طبعا ما حصل خشيت لى دكتور قال ما بعرف ) بالله ورينا كدى موقف ادارة الصيدله والسموم الاتحاديه ( الاتحاديه دى ضمير راجع للوزاره ما للسموم – لانو السموم فى بلدنا ولائية اى ولائية ما شاء الله بى سموما !!! ) ورينا راى الادارة فى المستحضر بتاع فكس المشاعر وهل هو مطابق للمواصفات الصيدلانيه ( هو فى شيئ مطابق فى البلد دى ) ..

  28. مُخير كتب:

    الحبان في كل مكان

    سلام ومحبة واحترام

    أبو حمودي قلت لي ” تراني اترجم احلامي فى السرد عن الشبح ال500 سى سى” أنا يا عزيزي سقد يتجافى جنبي والمضاجع وبالتالي النوم بجلالة قدرو ليس وارد في قاموسي دعك عن الأحلام لكنني أستعيض عنه بالدقيس ولهذا أجد ضالتي في أبيات نيام وما شاكلها وربما هذا ما يبقيني على قيد الحياة حتى كتابة هذه السطور، ومع ذلك لله أضرع أن يفك ساجورك ويسقيك ما تشتهيه من سى سى ومن الوريد الرئيسى ههههههههههههه. أما عن طيب الذكر أمير وإبنه صباع فهما لم ولن يقدما خدمة تُذكر للضمير ولا شافي لـ و/أو من الكسور والبواقي المعنوية والمادية إلا الله المنعم الذي قد يمُن ببعض من نعمتيه النسيان أو الغفران.

    لمى هلول: حلوة شديد أعجبتني جزئية (ظهور الارماديلو وياجوج وماجوج والناس التى براسها افكار منافية للطبيعة).

    أفلي مرة تانية: أوعك تقيف وواصل إتحافنا بروائعك وخرمجاتك المُدهشة فأنت حُبيت بملكة أو موهبة كانت لتُطعمك شهداً لو كنت في مكان غير الذي تعشقه بسجمه ورماده تحياتي

  29. AFLAIGA كتب:

    الامير مخير : والله الواحد زى الكان مقطوع من اهله ورجع ليهم مشكور على المرور الراقى .
    بالنسبه للحسبه بتاعة امير وولدو صباع فاسال الكثيرين ممن لا ينامون الليل يسهرون وبجانبهم صباع امير بعدين الدين ذاتو صباع امير للزول المتدين بيلصق بيهو سوءات اعماله وشرور انفسه .
    بالنسبه للحسبه بتاعة الهمر الفور درايف ربنا احينا فقراء وامتنا فقراء واحشرنا فى زمرة الفقراء .
    اما بالنسبه للحسبه الثالثه ودى الاهم فواله وما طالبنى حليفه ما جبرنا على استحمال السجم والرماد الا الاسجم منو والارمد منو لكن ابشرك خلاس بدات تلوح فى الافق بوادر الضوء يعنى ممكن تسمع بعد فتره المدونين فى شيكاغو يحتفلون بقدوم افليقا للبلاد ونجى ناكل شهد زى ما قلت اشناء بى تاكسى لانو اخوك بيحب شغل الامجادات والتكاسى لانها بتكسر الزمن وممتعه للقاص والكاتب .
    يسمع منك الله ونعدى البحر حقيقة لاول مره افليقا يفكر فى الهجره يلا شدو حيلكم معانا عشان ما نتسجم ونترمد اكتر من كده …

  30. AFLAIGA كتب:

    مشهد الخميس الصباحى : صديقى س زول بتاع مشاكل وحاجاتو كلها غريبه وما بتشبه الناس حدث خلاف بينه وبين زوجته عواطف وانفصلا فقام بتوزيع كروت الدعوه التاليه :
    بسم الله الرحمن الرحيم
    فامساك بمعروف او تسريح باحسان
    صدق الله العظيم
    الليله جيت شايل الفرح يا حليلو
    شيل ده من ده يرتاح ده عن ده
    آل ( س ) وآل ( عواطف )
    يتشرفون بدعوتكم لحضور مراسم طلاق ابن الاول ( س ) من ابنة الثانى ( عواطف ) وذلك بكل من :
    منزل اسرة عواطف – بيتش برى لال س
    كما تنتقل الافراح الى صالة لو انتهت العلاقه يا حبايبى وين تدوم بيننا الصداقه يا حبايبى وين
    لحضور حفل توقيع اتفاق تقسيم السلطه والثروه والموارد البشرية من شفع وشغاله وخلافه
    كما تنتقل الافراح مباشرة للمركز السودانى للخدمات الصحفيه الشماريه لحضور المؤتمر الصحفى المشترك للطليقين لتوضيح نقاط الاتفاق والرؤية تجاه القضايا العالقه التى من بينها الجنسيه والشفع والحدود .
    والعاقبه لكل مكروب معصور مزنوق
    للاعتذار هاتف 01233456987 للنساء – 013654789 للرجال .
    توجد مناديل ورق بعد الاحتفال مباشرة .
    بالله لاقاكم جنا زى جن س ده

  31. نيام كتب:

    افليقا:
    بعد مراجعة جهاز اسكنة المباهج في الزول الزاهج وضح بما لا يدع مجال للشك بانك قرفان لام ضوبان فعليك بالسمسمية بالطعمية في صحن بوش بالجبن المدشوش..ولابأس من بعض المعازيم الكرام و علي رأسهم نيام..وفي خلال ثلاثة ايام اذا ما زال الطمام فالسفر الي الخارج هو احد المخارج و لا مندوحة ان تهبطو مصر ففيها من الثوم و البقول ما يظبط الفول و يحسن القول فعليك بالتبكير و مخاطبة المدير…واحذر المسير في ميدان التحرير فالعدوي منتشرة بفيروس الثورة..
    اما صديقك س المجنون فقد هرته الظنون و قد اصابه من الاحسبون من اللبس ما يبلد الحس و يعقد النفس فانصحه بالتقليل من سهر الليل… الا في القيام و الدعاء التام…فكثير من الانفار قد فاتهم القطار …و منهم من ركب الظلط بالكلام الغلط…فنسأل الله السلامة قد اقتربت القيامة..والامر يتداعي لقيام الساعة …فنسأله حسن الختام و الموت علي الاسلام…

  32. aflaiga كتب:

    نيام :
    بعد مراجعة جهاز تدجين المصاير في هداية الزول الحاير وضح بما لا يدع مجال للزاير الجايى غاير بانك ما عارف الفى الضماير فعليك بجلسة فى القماير برفقة الحرايرونشوة العصاير .ولابأس من بعض الشمات والعوازل اصحاب القتاوى وعلى راسهم حبيبك بشاوى – وفي خلال اسبوع اذا ما زال انهمار الدموع فالسفر الي الخارج هو احد ممنوع و لا مانع ان تخلع نعليك بالواد المقدس طوى وتنصح من غوى …وانصحك بالمسير في ميدان التحرير فهو سبيل الجماهير للتغير …
    اما صديقى س العاقل فقد ترك الظنون و مباراة وانا انصحه بالسينات الثلاثه ( سهر و … و … ) والسينات يا حلااااتن . اما بخصوص الموضوع فهو ليس من نوع الممنوع وهو موضوع عادى كاختلاط البكتريا باللبن ليصبح ذبادى .
    ومشكور على المرور ….

  33. التركي كتب:

    هههههههههههه ربنا مايحرمنا منكم ومن ابداعاتكم …..

  34. AFLAIGA كتب:

    التركى : شفت نيام لبد كيف هو فى الشعر طبعا مافى زول بيجاريهو لكن فى الشفتنه اخوك قدييييييييييم و البشاوى يشهد بذلك . بعدين يا تركى انت نيام ده كل ما س صحبى يدق جرس مع عواطف هو يتجرس انت س ده عديل نيام ولا شنو ؟؟

  35. التركي كتب:

    لو صح التعبير زولك دا يام يام الشعر ذاتو بس انت كمان استحقيت أمير الشفتنة مادام شهد ليك بشبش … الايام دى مدنى جوها جميل جدا وعمك ضارب الهمبريب أسألنى انا كنت مارى بهناك وسحرنى الجو الخلاب قلت بس يكون عمك بحل فى معضلة صحبه س وباقى لى س شفت (خلاس) بس ربنا يدى الفى مرداه

  36. AFLAIGA كتب:

    التركى : منور البلد وحمد الله على السلامه – بالله الجو فى مدنى كده ؟؟ عشان كده عمك لابد وعامل رايح ؟؟ طبعا نيمو كير ده حلو لى مشكلة س انو يتصالحو وينسى القرارات الثوريه وذلك لتلافى اثار انعكاساتها على القضية الفلسطينيه وخاصة بعد فتح معبر رفح من جانب الحكومه المصريه وتعليق لافتة ( رفح عجيب يودى ما يجيب ) على الجانب المصرى من المعبر وتخوفات نيمو كير من رصد الجانب ( الاسرائيلى ) لفتح المعبر من جانب س يودى ما يجيب واحتمالات اتخاذ الجانب الاسرائيلى لاجراءات وترتيبات تضغط على شعب غزه المحاصر اساسا فى جنبة وزه ولمستمتعين بزرتو بجنس لزه ههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s