من التيارات ابت تطلع من اليونميس طلع خازوق ..

Posted: الأربعاء,1 يونيو, 2011 by aflaiga in اخرى

قرات اليوم تحليلا او تقريرا اخباريا بصحيفة الانتباهه يتناول ازمة تيارات الانقاذ الثى تم تصنيفها ل 3 تيارات تتصارع او تتجاذب لفرض شكل حكم معين على البلاد بعد تكشف عدم نية البشير فى الترشح لولاية ثانيه . ملخص المقال او التقرير يقول :
التيار الاول تيار نيفاشا وهو تيار يرى فى اتفاقات السلام مع حركات الهامش مخرجا من ازمة البلاد ويقود هذا التيار نائب الرئيس الذى ربما لن يترشح ايضا خليفة للبشير .
التيار الثانى وهو تيار الانفتاح على المجتمع الدولى والغرب وهو تيار يرى ان ازمة البلاد فى مشاكستها للمجتمع الدولى والنفور من الغرب ويقود هذا التيار الفريق قوش الذى لا مانع لديه حسب تركيبة شخصيته من الترشح خليفة للبشير .
التيار الثالث وتم تسميته بتيار الصقور وهو تيار يرى ان الانقاذ يمكنها ان تحكم لعقدين اخرين اذا عادت للمربع الاول الذى قوامه الشمولية واتاحة الفرص للمشاركه حسب رؤية الانقاذ وهو تيار رافض لاتفاقات السلام والتقرب مع المجتمع الدولى ويقود هذا التيار نائب رئيس الحزب د . نافع الذى ليس لديه اى غضاضة فى حكم البلاد خلفا للبشير .

صديقى س عندما ناقشته حول هذا التقرير قال لى ببساطه وهو يدندن بكلمات ثورية قديمه :
من الحركات ابت تطلع ومن لاهاى ابت تطلع من الاحزاب ابت تطلع من تيارات ابت تطلع من المدفع طلع يونميس خوزايق البلد ذادت يظل حال البلد واقف نقع نحنا ونقيف دايسين على الابر المسممه بالجرجره …
قلت ليهو يا س انت لخبتت عركى مع ابو السيد مع حميد ده شنو ده ؟؟
قال لى : يعنى بس بقت على لخبتتى انا ؟؟
اعزائى الواقفين براكم والهم عصف ودايسين على الابر زى ما بقول صديقى س تتخيلو حتطلع من وين من اليونميس ولا التيارات ولا روحنا هى الحتطلع لحدى ما نشوف اخرتا ؟؟؟؟

Advertisements
تعليقات
  1. aflaiga كتب:

    شباب : صديقى ص الجالس بجوارى فى المكتب سالنى بصراحه انت عاوز تقول شنو من البوست ده ما تحدد سؤالك عديل ( دايرين قوش ولا نافع ) او كمان قول ليهم ( دايرين سودان بالجبنه ولا الدكوه ) لكن بينى وبينك انا ما مقتنع انو الديمقراطية داخل المؤتمر الوطنى سوف تفرز لنا تيارا عسوليا كده بدون مشاكل لانو اصلو لو فى ديمقراطية بالشكل العسولى ده كان شاركو الاحزاب معاهم وهم قاعدين كلهم مع بعضيهم !! لالا انا شايف انو دى وهمه فى شكل قلبه زى سيد البيت الانا مؤجرو مره يرسل لى ولدو يقول لى معليش ابوى متشدد شويه فى الايجار لكن انا مختلف تماما بديك لحدى يوم خمسه كويس معاك ؟؟ ومره يرسل لى اخوهو يجى يجوط قدام الجيران ويتوعد بتقطيع اوصال الكهرباء والمويه لو ما دفعت ليهو !!! ومره يجى هو ذاتو يقول لى لو لحست كوعك ما بخلى ليك الايجار !!! ومره يرسل لى الحجه مرتو لى الحجه مرتى تشتكى ليها من الظروف بمدخل عاطفى وتشيل الايجار وتمشى يعنى بكل السبل ايجارو قبل يوم خمسه بيصلو ؟؟ تعرف يا افليقا انا عملت شنو ؟؟ اها عملت شنو خليت ليهو البيت ؟؟ لالا بقيت ادفع يوم واحد .. ههههههههههههه
    اسى يا جماعة الخير تدفعو يوم واحد ولا تفضو البيت ولا نقطع اوصال الكهرباء ولا ننادى الجيران كقوات دوليه وندول الايجار ولا كيف يعنى ؟؟

  2. aflaiga كتب:

    بالمناسبة صديقى ص قال لى فى اثناء الحوار :
    سيد البيت ده عندو زى سبعه بيوت فى المربوع واحد شمالنا طوالى وده مسكن فيهو اهلو !! وما عندهم اى مشاكل معاهو الا مرات مرات وبيحلوها تحت تحت .
    وبيت جنوب بيتنا طوالى كان مكره اهلو حياتم فى النهاية اشترو البيت وفرزو عيشتم ومن يوم داك مافى زول دق ليهم الباب برغم انو مره مره بيتشاكلو فى العداد المشترك والمويه المشتركه لكن شكلهم اى زول حيفرز عدادو .
    وفى بيت شرقنا طوالى ده جابو ليهو ابو اب وشبابيك جديده وسيراميك من الكويت عشان يصينوهو لكن شكلو ولد سيد البيت عمل نايم بالمواد وتحت تحت كده فى نفه فى القصه دى من بتاع المغلق والمؤجرين .
    اها البيت الفى نص المربوع ده كان بيت سمح خلاس ومليان زراعه وشجر وزهور قبل ما سيد البيت يقفل المويه من المؤجرين والشجر ينشف ويضبلن اتخيل كانو بيزرعو فى الحوش كم حوض خدره على رجله ياكلو منها ويدو الجيران ويبيعو فى السوق عليك امان الله اسى نفاخ النار عدموهو .
    بالنسبه للبيت الغربنا طوالى فده قصتو غريبه جدا لا بوليس حلاها لا شيخ حله حلاها غايتو جرجره شديده خلاس وشكلهم لو استمر الحال كده حيعملو زى البيت الجنوبنا ويشترو القطعه .
    اها كان شفت البيت الصغيرونى الجنب الجنوبى فده مشكلتو كبيره جدا تعرف قالو لقو تحتو اثار وقروش مدفونه ما عارفا حقت ابو المؤجرين الاتوفى ولا حقت سيد البيت المهم فى نزاع كده زى حجوة ام ضبيبينه .
    غايتو يا افليقا انا مفكر اسيب الحله دى كلو كلو لانو لا سيد البيت عاوز يفهم ولا المؤجرين بعد ده بيقبلو بالمعامله دى رغم انو والله يا افليقا ملتزمين وبندفع ايجارنا فى وقتنا ونطفى الانوار من الساعه حداشر ونوطى صوت المسجل وندفع الكهرباء والنفايات واى شيئ لكن برضو متلوم معانا اها انت رايك شنو يا افليقا ؟؟
    افليقا : الراى راى المدوينن كدى نسالم !!

  3. ودالخلا كتب:

    سلام ياقبيلة،،
    صديقي أفليقا، الحكاية وما فيها أنها قصة قديمة مدورة، ولن تكون دي النهاية المحزنة، قصة عذاب يادوب أبتدأت، كيف تاني يرجعوا من جديد!!!
    أنت تدري ياصديقي أن حكاية نيفاشا دي وما جاورها من قري مثل مشياكوس وأبوجا الأولي والتانية ، وبالطبع لن تكون الدوحة آخرهم، هي مُخطط قديم يتجدد كل حين، ولو تذكر مرة أنك تحدثت عن نظرية المؤامرة علي وطننا السودان التي يقوم عليها الصهاينة بمساعدة مباشرة أو غير مباشرة من بعض المواطنين الرسميين والشعبيين بما يقدمونه من خدمة لتلك الأهداف والتي تصب في صالح الصهيونية مباشرة ، وما نظرية شد الأطراف لتقطيع أواصر البلاد ببعيدة عن الأذهان، هذا عن وطننا السودان ، ولو أجلت النظر حولك في البلدان العربية ستجد العجب العجاب للفوضي الضاربة بالأطناب ولن تعرف اين الخطأ من الصواب، والناس واقفة فراجة، بل ومن العجب أن بعضهم يتمناها لوطنه السودان ولا يبالي ولا يدري أنها السم قد دُس في الدسم!!!!
    والكلام ده بيرجعنا تاني لقضية الأنفصال أوتقرير المصير تلك القصة الوهمية التي أنطلت علي الكثيرين منا، وهم يحسبونها حقيقة، وما دروا بأن الأمر لا يعدو كونه خدعة كبري أنطلت علينا جميعا”!!!!
    وستبدي لك الأيام ماكنت جاهلا” ويأتيك بالأخبار مالم تزود

  4. حنين كتب:

    أبو الافالق سلامات ومساكم الله بالخير .
    يعنى كل الدلائل تشير الى الرئيس نافع يعنى بالطريقة دى البلد موعودة بى حليفة طلاق وحرام بالجملة وبعدين أمريكا روسيا قد دنا عزابها محمدانا .
    مخير الله علينا .

  5. AFLAIGA كتب:

    ود الخلا ثرو حنين : مرحب بالمرور الراقى الذى زين البوست .
    حنين : كل الدلائل تشير الى نافع – ياخى معقول من الصباح كده ؟؟ طيب خليها تمسى شويه عشان نقدر نهضم هههههه يا عزيزى اخشى ان شعبنا لم يعد يهمه من يحكم بقدر ما يهمه السكر ما يذيد والعيش ما ينقص حجمو ولو ذاد .
    تحكى الطرفه ان الشهيد الزبير فى زيارة لحلفا وعد الناس هناك بوعود كثيره لم تعجب الحلفاويين فما كان منهم الا ان سالوه مباشرة : وحتعمل لنا ايه فى رمضااان ؟؟؟ نخشى ان شعبنا اصبح يهمه رمضاان فقط !!!
    ود الخلا : برغم اختلافى معك فى كنه نيفاشا التى اعتبرها من اعظم الاتفاقات التى تم توقيعها فى التاريخ القريب بعد وهى مضمونا تحفظ لكل صاحب حق حقه ولكننا فرطنا فى الاجراءات وليس الترتيبات يعنى لو جيشنا من اول يوم توقيع اتمسك باجراءات تنفيذ الترتيبات بدون هواده ما كان احتاج يخش ابيى بعد كم سنه من الاتفاقية .. نظرية المؤامره تقول ان نيفاشا تم اغتصابها وتحويلها من بكر الى ثيب وفى طريقها لتكون ثيبا مومس .. حفظها اله من شر المغتصبين . نحتاج لنيفاشا فى الشرق والغرب والشمال والوسط لكن نيفاشا زى ما الله قال لا تهنو وتدعو الى السلم وانتم الاعلون وان جنحو للسلم فاجنح لها وتوكل ..
    وجاييكم برواقه تانى ….

  6. عزت كتب:

    سلام أفليقا وزواره
    ليكم وحشة واشتقنا والله للنقاشات الهادفة اذ هجرنا الكثيرون وذهبوا (للفيس بوك الما بودي ولا بجيب).. وشكرا ليك عزيزي لفتح موضوع الشرق والغرب وجميع الاتجاهات واسقاطك اللذيذ على بلدنا القربت (تفيص) دي… وتقول لي نيفاشا… غايتو كانت سمعك الامام بتاع حلتنا كان نعلك معاهم اذ ظل يقول في نهاية كل صلاة (لعن الله نيفاشا وأهل نيفاشا) وبالطبع المعنييه هم الذي وقعوا وما شاوروا بقية السكان وكان في بالهم (ياخ خمسة سنين امكن الحمار يموت) فالشاهد ان الحمار لا مات لا باعوهوا ولا قدروا يرشوا الجماعة كما كانوا متصورين ان بشويت تزييت سوف يخلو لهم الأمر مع الجنوبيين …
    أهو خلو بيهم وفرضوا شروطهم ولن يفاوضوا في تصفية زيتهم في دكاننا ولن يدفعوا (نكلة) في ذلك ولن يرسموا الحدود بسهولة اذ أنهم في موقف قوة لذا لن يحدث أي جنس تنازل منهم….

    عموما الحكاية شايكة وكمان لو جاء عليها (نافع) أخير نرحل من البلد الظالم أهلها ديل……….!!

  7. ودالخلا كتب:

    سلام ياقبيلة،،،
    سديقي افليقا أنت أدري الناس بمن سرق الفأس، فقد تم أخذ كل ملفات السلطة، وسُرِق مصباح علاء الدين، ومعه الضوء الأخضر، ومفاتيح التنظيم، ولهذا خُذها مني ياسديقي فلا تحفل بهكذا سيناريو،فذاك طريق غير طريقنا، وحارة غير حارتنا!! ففي التاريخ القديم ياسديقي ركب إبن العلقم دبابة (هولاكو) عند سقوط بغداد، ومعنا من يركب دبابة يوناميس ولا حرج!!!
    وما نيفاشا الا المركب التي ستبحر بما تبقي فهل أنت معي؟؟

  8. AFLAIGA كتب:

    ود الخلا : وكانى بك تقول يا بنى اركب معنا ولا تكن من الظالمين – تعرف يا قبيله اصعب حاجه فى زمننا ده هو تمييز الظالمين وان كانت لهم علامات ظاهره على اخرهم هههههه انا معاك بس اوع تكون انت مع التانيين لانو نحنا التانيين !!
    عزت : اسى عليك الله من الصباح تصحى كده تلقى زولك القلتو ده بقى رئيس الجمهورية حتشرب الشاى ؟؟ تعرف يا دوك الرياسه دى قبول و ايجاب زى العرس تماما لكن كان ابو العروس مصر ما مشكله يبقى زواج جبر ونهايتو معروفه الشعب حيخون العريس .. هههههه

  9. مُخير كتب:

    الحبان في الميدان
    سلام ومحبة واحترام
    غايتو على قول حاج السلاوي يطرشني كان فهمت حاجة، لكن يخيل لي برضو أحسن نواصل تسطيح على طول مش الخووايج بيقولوا “danger foreseen is half avoided” يعني على الأقل مافي شيء حيخلعنا إلا لمن الفأس تقع في الرأس، ووقتها لن نشعر بألم السلخ بعد الذبح، والظاهر أنه من جراء ذنوبنا سلط الله علينا هؤلاء الحُكام غير الحُكماء، ومن خيبتنا وقلة حيلتنا لم نفلح طيلة عقدين غير أن نندب في حظنا العاثر ونعلق عجزنا في شماعة سوء طالع، وخُلاصة الأمر لا سوء طالع ولا خير نازل،
    نسأل الله اللطف والعافية والمعافاة التامة في الدنيا والآخرة.

  10. AFLAIGA كتب:

    مخير : مالى اراك صرت قدريا راكنا للظروف غير مبال بما يحدث دى نظرية التطنيش عشان الشعب يعيش بتاعة جبرا ولا كيف ؟؟؟ يا زول انت كنت زول مبادر مكر مفر مقبل مدبر معا كجلمود صخر حطه السيل من عل مالك بقيت مخندق مستسلم مفر ؟؟

  11. الكناني كتب:

    العزيز افليقا :
    اسمح لي ان انقل جزء مما كتتب محمد أبو اليزيد من منبر محامين بلا حدود:
    …………………………….ززززززززز
    ليست الحياة تراب وطين ، ولا هي أهرامات وقبور ، الحياة هي أثمن وأقدس من هذا وذاك – وإن قدسناه – إنها الإنسان هذا الكائن الآدمي الذي كرمه الخالق عز شأنه على العالمين ، وهي بالنسبة للإنسان – أي الحياة – هي الراحة والسعادة.

    وسعادة الإنسان لن تجلبها حروبا تأخذ أجمل ما فينا ولا تعطينا غير أسوأ ما فيها ، بل يجلبها التعليم والمسكن والمأكل والملبس والحب والأطفال والحلم الجميل ، فإن تحقق كل هذا ، تحققت للإنسان حرية إرادته ، وهذا هو بيت القصيد ، وهذه هي حرية الإنسان بمعناها الحقيقي ، لا حرية التراب الوطني ، فما ضاقت الأرض بما رحبت.

    وانظر حولك زميلي وصديقي العزيز فهذه جمهورية السودان ذات المليوني متر مربع من الأراضي الصالحة للحياة في محيطنا العربي وتلك هي سويسرا التي تقل في مساحتها عن النصف مليون كيلو متر مربع في القلب الأوربي ، أنظر سيدي وقارن كيف فعلت الأرض بالسودانيين وكيف فعل السويسريون بالأرض.
    …………………………………………………………
    تقول القاعدة الفقهية (( درء المفاسد مقدم على جلب المنافع)) يعني لا نافع ولا قوش التطهير من المفاسد وكل فاسد
    ودمتم

  12. AFLAIGA كتب:

    الله اكبر والله لا ندرى بايهما نفرح بقتح خيبر ام بقدوم جعفر صدق رسول الله ( ص )
    ونحن كذلك لا ندرى بايهما نفرح بقدوم الكنانى ام بعودة الامانى العذبه تانى
    كنانى : والله اسعدتنا ايما سعاده بالعوده وزينت بقولك البوست عليك الله ما تنقطع وخليك قريب .
    شعبنا عزيزى كنانى وصل لمرحلة سيئة من الركون والاستسلام فاذا اصدر السلطان صباح الغد قرار بجلد الشعب سيسهر الشعب مفكرا حتى الصباح فى الاتى :
    النسوان حينجلدو برضو ولا الرجال بس ؟؟
    ناس السكرى الجلد بياثر معاهم ولا لا ؟؟
    المغتربين الجايين فى اجازه خاشين فى القرار ولا فى استثناءات ؟؟
    بالنسبه للناس الشغلاه بالصباح حيدوها اذن تمشى ميدان الجلد ولا حيوفقو ليها اوضاعا كيف ؟؟
    بالنسبه لذوى الحاجات الخاصه المعامله حتكون كيف ؟؟
    بالنسبه لعدد الجلدات القرار ما كان واضح بشكل كافى !!!
    عشان كده يا زميل اتخيل عادى انو الناس تقبل بقوش او بوش المهم الناس تصحى الصباح تلقى مواصلات عشان تمشى الطاحونه هههههه
    تحياتى واكرر سعادتى بمرورك الراقى ..

  13. الكناني كتب:

    لك الود ابننا دوماً ومعاك الي آخر المقال

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s