== سوداننا = = جريدة اسبوعية سياسية شاملة مستقله .

Posted: الخميس,2 يونيو, 2011 by aflaiga in اخرى

ولانو الموضوع مهم جدا جدا قصدت افتح ليهو بوست خاص ولانو نقص القادرين عن التمام معيب جدا جدا قصدت اذكركم بانو انتو ما عارفين قيمة نفسكم ولانو الشعب ما بيغفر لى زول كان عندو امكانيه يساهم فى تطوير وعيو وما ساهم قصدت افتح الموضوع ولانو ولانو ولانو ولانو فتحت الموضوع . كدى اتخيلو معاى ( والخيال تيراب الواقع ) انو اتلمينا كده كلنا فى الاجتماع الاول فى بيت جبرا وكوننا هيئة تحرير برئاسة جبرا ونيابة ود المهدى وسكرتاريا افليقا ومدير تحرير عزت ومدير اعلانات ود الزبير ورئيس قسم سياسى ابكرون ورئيس قسم اجتماعى اب احمد ورئيس قسم فنى ستريكر ورئيس قسم ثقافى مخير على سبيل المثال لا الحصر وقمنا كده مشينا طلبنا تصديق للجريده وصدقوها لينا وبقينا نطبعا فى اى مطبعه خارج السودان لحدى ما نلقى مطبعه داخل السودان وقمنا كده اصدرنا عددنا الاول التجريبى بكتاب اعمده :
د. صالح – ابكرون – سنكل – بشار – نيام – ركس – مخير – كنانى – ود المهدى – عزت – بشاوى – قرن شطه – اب احمد – تركى – التلب – ابو محمد الامارات – ود الخلا – زوول – سهيل – ود الزبير – افليقا – ستريكر – السعيد – خالد مدنى – عبدوش – بروسيسر دوم – حنين – ساره – معجبه – فنجان – الزهراء – الغبشه – بت بحرى – سماسم – سمسمه – وحمودى ذاتو .
عليكم الله فى جريده بتلحقكم .
وكدى اتخيلو معاى لمن تقوم مع الجريده مؤسسه خيريه تربويه توعويه وننشط فكرة زمان بتاعة الروضه والمدرسه والمعهد والاكاديميه البتربى اجيال بتشبهكم طبق الاصل وما نحتاج لى دعم للمايقوما من بره وود الزبير يجيب الاعلانات مطر مطر .
كدى غمضو عيونكم واسرحو معاى كده فى الحلم الجميل ده وانتو مجربين الاحلام قبل كده لانو سوداننا القدامكم دى كانت حلم برضو وبقت حقيقه واقع لا يمكن تجاهله .
اتمنى قبل ان ينتهى هذا العام ان تكون سوداننا زينة المكتبات السودانيه وتبقى يوميه سياسية شامله تتبع لحزب الشعب الفضل …
قولو امين وما ذلك على الله ببعيد انه نعم المولى ونعم المصير اللهم لا سهل الا ما جعلته سهلا ……

Advertisements
تعليقات
  1. طفشانة كتب:

    السلام عليكم

    بالرغم من انك بالغت فى نسيانى انا الا انها فكرة رائعة وجمييلة جدا وتدل على وعى وفهم وادراك المفكر

  2. مُخير كتب:

    الحبيب أبو حمودي
    الحبان في كل مكان
    سلام ومحبة وإحترام
    ياخي بالرغم من غيوم الإحباط التي تلف سوداننا الوطن أجدني أغبطك على حماسك وتفاؤلك ورغبتك في التغيير، وبالتالي لا يمكن إلا أن أشيد وأبارك وأثمن إقتراحك، لأني إن لم أفعل، سأكون جانياً مُخرباً لفكرة جميلة، كل الإنجازات العظيمة في التاريخ البشري بدأت بحلم، فليكن مقترحك “الحلم السوداني”، وأنا أقر بأنني قزماً إلى جوار كبار كُتاب وخبراء الدانقا الأفذاذ إلا أنني أتشرف أن أساند الفكرة وأسعد بدعم كل ما من شأنه أن يبقي على جذوة الخير هذه أن تبقى متقدة علها تُبدد دياجير الخيبة واليأس والإستسلام للواقع الكئيب.
    صحيح أن لديكم أرشيف حافل ورصيد هائل من الكتابات الرائعة الجديرة بالنشر على أعلى مستوى، غير أن الواقعية تقتضي أن تكون المرحلة الأولية إليكترونية، فالساحة الإسفيرية حُرة ولا تتطلب أذناً من أية جهة، بل الكتابة على النت أسهل وأجدى وأكثر إقتصادية وفي مرحلة لاحقة بعد أن يقوى عودها وتتبلور ملامحها وشخصيتها يمكن إصدارها في صيغة مطبوعة. والله يوفقكم ويحفظكم ويرعاكم ويسدد على دروب الخير خطاكم.

  3. ودالخلا كتب:

    سلام ياقبيلة،،
    للحقيقة شمس لا تغيب مهما تلبدت الغيوم وأنتشرت الأعاصير والعواصف فلابد لها من أن تسطع شمسها وتشرق بنور الحق والعدل مهما أمتدت سنوات الظلام وطال غياب العدالة أو مال ميزانها… وهذه الفكرة الفريدة يمكن أن تكون واقعا” جميلا” نحن في اشد الحاجة له ، وأوافق صديقيّ أفليقا وفردته المخير علي فكرتهم النيّرة وتفكيرهم الثاقب بجعل الصحيفة أولا” أليكترونية تغطي الفضاء الأسفيري نشرا” للفضيلة والوفاء وبث الأمانة وحب الوطن والفداء في النفوس الظامئة لهذه المعاني الجميلة التي غابت عن حياتنا ،وكيف تُبني الأوطان من العدم…
    معكم بأذن الله تعالي لنشر الأخلاق الفاضلة العظيمة والسمو بالأوطان لمصاف الدول العظيمة،،،،،
    فما نيل الأماني بالتمني ولكن تؤخذ الدنيا غلابا،،
    فهيا نتحد يدا” واحدة غايتنا نشر الفضيلة وتنوير الناس بالحقيقة ورفع الهمم وشحذ النفوس وشحنها بالأيمان والخير والأثرة وحب الآخر!!!!

  4. AFLAIGA كتب:

    طفشانه : والله بالرغم انو ما عرفتك لكن اسف انو نسيتك واقول يمكن انا الما جيت . حباب مرورك الراقى وده من ذوقك انتى والله . شوفى ناس سوداننا ديل انا بعرفم كويس احلى ناس واعسل ناس وافهم ناس مشكلتم ما عارفين حاجتين مهمات ( الاولى انهم افهم واحلى ناس والثانيه انو شعبهم محتاج ليهم شديد للوعى والتنوير ) تانى حبابك و حباب الجابك .
    الامير الحبيب مخير : شاكر على مرورك الراقى – قول نبداها الكترونيه مافى اى مشكله ناس سودانيز اون لاين بدوها الكترونيه برضو نبداها الكترونيه لحدى ما تزين المكتبات تعرف يا حبيب انا بتخيل سوداننا تتوزع فى قطاطى ابييى وكرانك الخرسانه وكرفانات قلسة واللفه وعواض وبرندات دنقلا وعبرى وحفير وبيتشات بورتسودان وبيوت كسلا والقضارف وماكو دنيا والفاو وعريشات الجزيره والمناقل وقطاطى الكرمك والانقسنا وبرندات السوق العربى والافرنجى ورواكيب سوق الناقه وقندهار وحلايب وسوق سته واللفه تعرف ليه لانها حقت الناس ديل منهم وليهم باذن الله ..يلا شدو حيلكم ..
    ود الخلا : عليك الله عاوزين نسخه من اسلام ما شافو شعبنا قبل كده النسخه الاصليه ما التى تم تحريفها وفق اهواء ومصالح البعض وده دورك الاساسى الانا عارف انك بتصحى وتنوم بيهو مع انك بعد مرات قاعد تهبش فى الادب والسياسة هبيشات تخوف منك وبرضو نابعه من دين نضيف طولنا ما شفناهو حفظك الله ويسر الله كل صعب .
    الاحباء الباقين : مستنين اراءكم عشان نقوم هيلا هوبا كده نعمل الاجتماع الاول ..

  5. حنين كتب:

    الاخ أفليقا .والجماعه الطيبين .
    سلامات .
    والله فكرة جميلة جدا وكلام أخونا مخير دة والله عجبنى شديد وخلانى أفتخر بأن أكون مع هكذا ناس (مالك ياخ)
    الى الامام سوداننا ووفقكم الله فى مساعيكم وسدد خطاكم وإنما الاعمال بالنيات وإنما لكل إمرئى مانوى .

  6. ودالخلا كتب:

    سلام ياقبيلة،،
    حُق لك أن تفتخر (وتجعر) كمان ياحنين بأنك واحد من هذه الكوكبة النيرة المؤمنة بربها أولا” والعاشقة لأرضها ووطنها بما عليه، ونحسبهم كذلك من الصادقين الأوفياء،،،
    نسأل الله جلت قدرته وعظمت قوته أن يمكن لهذه الكوكبة في هذه الأرض الطيبة وأن يعطيهم بقدر نواياهم صدقا” وعدلا” وقديما” قيل ( نية المرء خير من عمله)
    وبالتوفيق أن شاء الله..

  7. طفشانة كتب:

    تسلم يا AFLAIGA على الرد الجميل الذى يدل على الرقى والاصالة فعلا انا ما معروفة لانى جامدة شوية وما متفاعلة شديييد بسبب كترة مشاكل الوطن الحبيب …. مشاكل كتيييييييييييرة تحير الزول وتخليهو اشجع واوافق على اى بادرة تلوح فى الافق بادنى حلول حتى ولو احلام عليه ارجو الموافقة لى بانشا عمود فى مجلتكم المقترحة يحمل اسم مشاااااااااااااااكل نرجو حلها…….ز مع حالص شكرى وتقديرى

  8. AFLAIGA كتب:

    حنين : منهم شنو انت منهم وزيهم واحد اركانهم بس شد حيلك شويه وكشكش القلم عشان يطلع الروائع
    طفشانه : عمودك محجوز من اسى واله يحل مشاكلنا كلنا . حبابك وابقى قريبه
    ود الخلا : تعرف يا قبيله فى مشكله سغنتوته جدا وهى ان الالفاظ الجميله التى تتحدث بها مثل نحسب ونعتقد ولا نزكى على الله قد استغلها البعض بشكل شوه صورتها عبر ما يصدرون من افعال تنافى الاقوال وهو ليس بمعيار ان يغتال البعض اى كلمات حميده فتجبر الاخرين على الابتعاد عنها فقد اغتال البعضص القران معنويا ولم يذد ذلك الا حبا للقران ونحن نعلم صدقك وحسن سريرتك وتسامحك وصفاء قلبك برغم استخدامك لهذه العبارات التى هى لله جد جد ولا تمت لاى وكيل فرعى بصله . حفظك الله اخا صادقا صدوف الوعد .

  9. ودالخلا كتب:

    سلام ياقبيلة،،
    سديقي أفليقا لو مشينا نتخلي عن هذه الأشياء بحجة أن هنالك من يسئ أستخدامها أو يستخدمها في غير محلها أيا كانت نيته فلن نجد طيبا” نتعاطاه، لأن السيئيين وهم كُثر قد سبقونا أليه،فماذا ترانا نفعل ياصديقي؟؟
    هذه هي المهمة الصعبة التي أنيطت بسوداننا لتنفيذها، وهي أعادت الأمور لنصابها، وهي مهمة عصية وصعيبة في ظل الظروف والمعطيات الآنية، ولكن أذا كانت النفوس كبارا” تعبت في مرادها الأجسام، فعلينا أن نتوكل علي الواحد الأحد، ونُصدق النوايا ونتجرد من الأنانية وحب الذات ونهب زواتنا وكل مانملك ونبدأ التطبيق الفعلي بأنفسنا( وهذا هو الأهم) لأجل تنفيذ هذه الفكرة والتي هي (GRAET MISSION) تنادينا لأجلها لأعادة بناء الشخصية الوطنية علي أساس من التقوي وخلق رسولنا العظيم عليه أفضل الصلاة وأذكي التسليم، وشوف لو تاني حد من العالم حصلنا، فحتما” سنقود العالم كما قاده المصطفي صلوات الله وسلامه عليه في بضع وعشرين عام..
    صلي الله عليه وسلم..

  10. حاج أحمد السلاوى كتب:

    ولدنا افليقا ..مشروعك مش حيتم لأنو انا ما مشارك فيهو ..ويبدو إننا مش قد المقام..

  11. AFLAIGA كتب:

    بشاوى : بالله كدى ورى عمك السلاوى ده قدرو عندنا قدر كيف ياخى عمك ده ما عراف انو مكانتو عندنا قدر قيمتو عندنا والاتنين قدر اكتر مما هو يتخيل – اما النسيان فهو سمة الانسان بعدين انت يا عمك طولت لمن بقيت تتنسى – الناس الما ذكرناهم كلهم الواحد يرسل طلب انظظمام للجرديه مرفق معه طابع اعتذار عن الطوله بقيمة مؤونه عام من الود .
    السلاوى : عليك الله شوف بشاوى ده قال هو ما عارف اكتر منك قدرك عندنا بالله وريهو الظاهر الزول ده ما عارف ..
    السلاوى تانى : جرسه شديده وكسير تلج كتير اما الجرسه فهو تشبهنا حين نتزنق واما كسير التلج فهو اقل ما مقامكم السامى .
    اها اول عمود ناصية سنقل يفتح على عمودين واعلان حقك تانى قصرنا ولا اعتذارنا مقبول ؟؟

  12. حاج أحمد السلاوى كتب:

    ولدنا أفليقا ..إعتذارك ما بيعيدك ..وجرستك ما بتفيدك..والعملتو كان بإيدك أنا مالى ذنب فيه .
    وعندى سؤال سغيرووووونى كدا .. أخونا فى الله البشاوى زااااتو وين ؟ مسجل غياب شديد ..
    وعشان انت زول حبوب ومهضوم ( زى ما بيقولوا ناس نانسى عجرم ) قبلنا إعتذارك..
    بس العمود الفاتح على ناصيتين فيهو كم سطر ..
    وصافية لبن .. ابو حمودى..

    هبشة سغيرووونة ..لقيت حنكك سنين … يا أبو الأفاليق.

  13. طفشانة كتب:

    السلام عليكم
    افليقا والله اعتذرت ليهو كتيييييير شديد وبعد دا كلو رضى بعد تعب وبعدين هو زاتو غاتس ذى غتستى دى ولسانو طويل بفرض على عقاب طوالى وهسى بقبل على حقو تعاقبوهو اول حاجة والعمود الفاتح ناصيتين تدونى ليهو انا لانو عمكم دا ما مضمون بظهر يوم وبغيب سنة

  14. حاج أحمد السلاوى كتب:

    والله يا طفشفش .. تفتحى تانى خشمك إلا اطفشك من الدنيا زااااته ..
    وانتى مش حيدوك حتى نص عمود .. وانا بظهر يوم وبغيب سنة … بس إنتى ما بتظهرى خالس ..
    غايتو .. جنس … غايتو .

  15. نيام كتب:

    افليقا:
    الفكرة جميلة و رائعة و كثير من الاعمال كانت خيال كما قلت…
    سلولو:
    ياخ عمودك الناصية دا زي بنا المغتربين الواحد يبدا العمارة مع تعيينو و ينتهي منها في المعاش…

  16. soobi12 كتب:

    بسم الله
    يا جماااااااعة الزول بنتمى لمنو ؟؟؟؟ظ
    والله يا حاج ما دام فيها طفيش من الدنيا سكت تب …… لكن حكاية العمود انت ما عندك شغلة فيها حا ادونى عمود وحا اكتب عن المشاكل وكيف ممكن نحلها ولو اتكلمت كتير بكتبك انت زاتك مشكلة وكيف نحلها

  17. حاج أحمد السلاوى كتب:

    عاد اسوى ليك شنو ؟ ما دام دخلتى فينى شمال .. وعاوزة تالبى ابو الأفايق عليا ..
    ولو بقت المشاكل زيى انا تبقا ما فى مشاكل اصلاً .. وشوفى ليك مشاكل تانية حلحليها ..ولو بقيت أنا المشكلة ح احلها ليكم دون تدخل خارجى واريحكم..
    ابو الأفاليق .. ابو حمودى .. نطالبكم بعمل حظر صحفى على المدعوة سوبى رقم 12 ( 12 دى ما عرفتها شنو ..بالضبط ) ..ولو عاوز ممكن نجمع توقيعات 100 عضو ..

  18. soobi12 كتب:

    صباح الخيرات

    انا متاكدة انو التوقيعات المية حا تكون فى صالحى ………. احسن ليك ما نجازف صدقنى بتتبهدل انت
    بس عندى ليك خبر حلو …… وبينى وبينك بس والله انا لحدى هسى ما بعرف اكتب كيف فى المدونة ولو عايزة اكتب موضوع ما بعرف اعمل شنو قمت مشيت سجلت فى word press وادونى اسم مستخدم سوبى 12 …. طيب هسى حسب العلاقة الطيبة بينى وبينك مفروض تانى اعمل شنو واوعدك انى ما حا اكتب عن مشاكلك ….. بس بكسر ليك تلج (بكسر ليك تلج دى موقعا صاح) … مع كل الشكر والتقدير

  19. التركي كتب:

    سسسسسسسسسسسسسسلام ليكم وحشة ياأحباب
    أفلي الفكرة جميلة والأخوان زادوها رونقا وجمالا … نبدأ باذنه تعالى الكترونيا ولا ننتهى حتى تصير مرجعا …. وسير سير يا

  20. حاج أحمد السلاوى كتب:

    سوبى رقم 12 .. كدا إنتفقنا ..
    عشان تكنبى موضوع لازم ترجعى لعمك أسترايكر مدير الموقع .. عشان يوريك تعملى شنو ..
    وعشان تكسرى لى تلج لازمك مصنع تلج كاااامل .. هو كسير التلج دا قايلاهو ساها كدا ؟

  21. طفشانة كتب:

    ههههههههههههههههههههههههه
    جمعة مباركة للكل
    طيب انا كيف ارجع للعم استرايكر
    ما فى مشكلة بالنسبة للتلج بس الايام دى فى السودان صيف ذى الصيف التلاجات مسوحة تلج مافى وحر شديييييييييد خلى الشتا اجى بس وتشوف التلج

  22. AFLAIGA كتب:

    سوبى 12 : اسى بعدين حتكتبى لينا بى ياتو سوبى ولا طفشانه ولا منو ؟؟ بعدين العم ستريكر دى كتيره شويه اخوى ستريكر ده ود سغيرونى وجاهل لسه ما شاف شيئ طبعا العم دى بتريح عواطفو شديد لانها فاير وول ميه ميه ههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s