احياء السنن لدرء الفتن …

Posted: الخميس,9 يونيو, 2011 by aflaiga in اخرى

طبعا طوالى ود الخلا حيقول ما شاء الله افليقا بقى يتكلم فى العقيده والشرع وحيجهز قلمو ويسننو عشان يجى ناطى بمزاااج – وطبعا بشاوى برضو لانو زول حديد حيفتكر انو افليقا مفوت سنه وداير يحيى سننو عشان تكون عربيتو ظابطه – وطبعا ابكرون طوالى حيقول افليقا ذاتو مفوت سنن وداير يحيها لكن وين ليو سمسمه صاحيه …
وعشان ما نخلى العقول تتشتت والناس تمشى بعيد :
السنه المقصوده هنا بكسر السين وليس فتحها ومقصود بها هنا الحاجات الماتت فى الناس من مشاعر ومبادئ وكده – اما درء الفتن فالمقصود به هنا عدم اللجوء لتكملة نقص السنن الفوتت بسنه جديده .
اها المودوء كده واده ليكم ومافى دائى ائيدو عليكم .
منذ فتره وانا افحص السنن بتاعتى لقيت فى كميه من السنن قوتت وكميه منها بردت وكميه منها وسعت وقليل منها فاضل زابط زى ما هو والقليل ده اكتشفت انو اساسى عشان كده الواحد صابر وواقف على الابر المسممه بالكلام وواقف براو والهم عصف ..
قمت فكرت يا ود يا افليقا اسى انتا الناقصك شنو الناقصك شنوووووووووووو ؟؟؟ لقيت انو ناقصنى ……
كدى اى واحد فيكم يورينا الناقصو شنو بعدين انا بوريكم انو انا لقيت الناقصنى شنو ؟؟

Advertisements
تعليقات
  1. AFLAIGA كتب:

    وعشان ندى الناس خيارات ميقوم زول يقول حاجات ما قاصدينها ويطلع ناقصو كل شيئ ولا زول يسوى لينا فيها ميه ميه وما ناقصو شيئ :
    راحة البال – المال – البنون – عدم الزوجه – وجود الزوجه – العلم – عدم العلم – الانقاذ تقعد – الانقاذ تمشى – هو يقعد – هو يمشى – القيامه تقوم اسى – القيامه ما تقوم قريب – الحج – وووووو كدى نشوف يا جماعه اى زول محتاج شديد لشنو وناقصو شنو ؟؟ وزى ما وريتكم لمن يعترف منكم زى تلاته انفار كده انا بعترف ..

  2. عزت كتب:

    ربما لا تفوت على فطنة القارئ أن أفليقا بمطالبته باحياء السنن بكسر السين لا يعني ولا يدعوا بأي حال من الأحوال الى أحياء (القعدات) التي يتبودل فيها (الرقعة البيضاء) و (جوني المشاي) وغيرها من الحاجات الصفرا

  3. AFLAIGA كتب:

    عزت : ههههههههههههههه مباااااالغه طبعا ما اقصد بالتاكيد مع انو الشباب القلتهم ديل انا ما عرفتهم ناس اخونا جون المشاى وهو ماشى من الزمن داك ما وصل لى اسى ؟؟؟ الله يجازى محنك يا عزت ..

  4. AFLAIGA كتب:

    صديقى س كان بينه وبين الصلاه بون شاسع وفى احد الايام قررالرجوع للصلاه بعد ان هداه الله وفى ذلك اليوم كنا انا وصديقى ص معه فذهب وتوضا وجاء يحمل المصلايه :
    س : يا افليقا عليك الله القبله على وين ؟؟\
    ص : بالنسبه لى منو يعنى ؟؟
    س : بالنسبه لى انا طبعا ..
    ص : بالنسبه ليك انت اى اتجاه ما مشكله المهم ترجع تصلى .

    سقت هذه المقدمه لاحكى قصه لصديقى ع الذى هجر زوجته لانها مقصره معاها مع انو بشهادتا هى هو ما مقصر معاها وفجاة جات خاشه البيت شايلة معاها اكل فى عمود من ناس امها وسالته :
    عواطف ع : حبيبى اجيب ليك الغدا هنا ولا فى البرنده ؟؟
    ع : يعنى بقت على المكان الحمد لله البقى فى غدا ذاتو !!!!
    اها ممكن نقول انو صديقنا ع ناقصو مره – حتقولو لى طيب ما اهو دى مرتو بدت تنستر معاهو ليه عاوز مره تانى ؟؟
    يقول صديقى ع والعهده عليه : تتخيل يا افليقا كل ما تجى تعمل ليها حاجه سمحه اتذكر ايام الحاجات الكعبه وارفض تتخيل الليله الخميس ده مثلا ما حامشى البيت مع انو بتكون مجيهه الامور ميه ميه لكن لمن اتذكر خمايس قديمه عدت بطنى بتطم من المشيه .. يعنى حاجه كده زى لو الانقاذ اتصلحت مع الشعب برضو بطنو حتكون طامه منها .
    افليقا : اسى يا ع الجاب الانقاذ هنا شنو ؟؟
    ع : ما كلهن واحد يا افليقا …
    ههههههههه

  5. حنين كتب:

    أفليقا .
    سلامات .
    إنت شغال بى مقولة البكا بحرروه أهلو عشان كدة شايفك نفسك قايم تعكس وتجرى تكابس عشان تجيب قون .طول بالك شوية على الجماعه .
    بالنسبة لموضوع السنن (بكسر السين ) المتاكله وعاوزا ليها جلخ وتلميع هى موضوع اليوم القصير دة .
    الواحد مالاقى وكت عشان يحك راسو .
    الواحد بقى اليوم كلو فى الشغل ولمن يرجع البيت مع النقة والعوة مع الحكومة نامن ينوم بى غبينتو الصباح يصحى يديها قدوم (فى راسا) ويعتزر ليها ويمشى الشغل تانى .
    يعنى ناقصنا اليوم يكون فيهو ساعات إضافية لزيارة الاهل والاقارب والونسة مع ناس حمودى ونانى وزيارة الجيران والارحام .

  6. AFLAIGA كتب:

    حنين : بس حتة قدوم فى راسا دى انت قاصد القدوم ياتو لانو التانى ما بيدى الزول فرصه بيودى الاخره طوالى خاصه لو كان يدو حديد . ههههههههههه

  7. ودالخلا كتب:

    سلام ياقبيلة،،،
    صديقي أفليقا وبعد نوريك الناقصنا شنو بتقدر تتمو لينا ولا بتفكنا عكس الهوا!!!
    تعرف ياسديقي حكايتك بتاعت الأنقاذ مع الشعب والطمام بعد التصليحة زي حكاية صاحبك كاف مع الرقعة البيضاء أو مع مشوار جوني بتاعين دوك عزت ديلك، وبعد التصليحة برضو بتصبح بطنو طامة، وبرضو هو ما بخليها!!!
    طيب الجابركم شنو؟؟؟ ماتقول لي الأمرّ منو….
    ياحليلك يا أفليقا وياحليل أيامك،،،،،،

  8. AFLAIGA كتب:

    الشيخ ود الخلا : انت بس قول الناقصك شنو مع انو المع الله ما مفروض ينقصو شيئ لانو حوجاتو بتتما من السما دايركت ومازال عبدى يتقرب الى …ولا شنو ؟؟
    حليلك انتا وحليل ايامك الزاهيه وقعدة صالون الخير وحوش البركه والشاى الما خمج والبيت العامر .. اسى دى ما شحده لى عزومه عديل كده هههههههههههه

  9. مشاكل كتب:

    سلامز

    قصة حقيقة حضرتها عيانا بيانا

    و نحن واقفين في مدرسة عمر بن عبد العزيز في صف الدخول للدكتور .. و مقابلة الدكتور دي يا ودتك القمسيون الطبي و بي هناك تتصرف و تتخارج من المعسكر يا ودتك التوج
    المهم الشاب القدامي دا زول ظريف و نكته كدا .. اول ما وصل للدكتور .. سألوهو : اها انت عيان عندك شنو ؟
    الشاب : و الله يا دكتور مرضي دا ما بتقدر عليه انت
    الدكتور: كدي قول لي عيان بي شنو و بعد كدا بنتتصرف ليك
    الشاب : انا مفلس .. عندك لي قروش ؟؟
    الدكتور مضى في الاستمارة بتصنيف ( أ ) … معسكر راس

  10. مشاكل كتب:

    سلامز مربع

    اها يا أفليقا .. أنا مفلس .. بتقدر تحل لينا المشكلة دي ولا بتقلب علينا المواجع ؟؟

  11. ابكرون كتب:

    افليقا كدي انت اول….
    بعدين يا فلقه السنن بت فَوِت ما بت وسع ……….!
    انا سخسيا ناقصاني 3 حاجات من العيار التقيل و2 من الخفيف …..حاقول واحده لانها امنية السواد الاعظم من الامة السودانية وهي : اشوف فيهم يوم اسود من ايام بشار الابن وعلي صالح واهبل ليبيا ……الباقيات الصالحات لا علاقة لها باساس يسوس …….

  12. AFLAIGA كتب:

    الجبايب الحلوين المارين من هنا بامنياتكم الحلوه :
    مشاكل : مش عيب يا راجل تبقى عاوز فلوس وما تقوليش ؟؟ انا برضو عاوز فلوس طب ما نشوف واحد يدينا ههههه سلامة العوده الحلوه .
    ابكرون : اها عشان امنيتك الشينه دى شطبنا وما عاوزين امنيات ده شنو الشعب الما يدوهو فرصه ده ؟؟ ههه … اسى عليك الله يا ابكرون الانقاذ تمشى تانى منو البيدلعنا ويهشتكنا يا ريس ؟؟؟ اهااااا انا بس قاصد الامنيات التانيه دى ديييييييييك ذاتا ولا ما بقدر اصرح ما بقدر اقول ؟؟؟؟
    شباب : حقيقى بعد مرات تكون بتتمنى ليك حاجه وفجاتن تلقاها عند زول تانى ورااااقده وهو ما مخحتاج ليها واحتمال تكون الحاجه الهو بيتمناها شديييييييد قاعده عندك وانت ما عارف ؟؟ ايه رايكم نعمل مقايضات بالامانى يعنى مثلا :
    افليقا عندو 2 طن راحة بال وعاوز عروس ممكن يدفع فرق مع راحة البال 5 كيلو معلومات عن سواقة الامجاد
    مشاكل عندو 3 بينشات فى شارع النيل نواصى وعاوز قروش للايجار او البيع او الشراكه فى الضيوف !!هههههه
    ود الخلا عندو 3 طن تقوى ذايده وعاوز يبدلا بى 2 لساتك جنوطا مقاس 14
    عزت بقاريتش عندو 3 لساتك جنوطه مقاس 14 العاوزا ود الخلا وبيقول ليهو لم تقوتك عليك وبديك اللساتك !!!ههههههههه
    جبرا عندو مؤوونة عام من الود والشوق للمدونين وعاوز الناس تعمل ليها رحله
    بشاوى عندو صالون حلاقة وترزى ستاتى وعاوز دكان عجلاتى ناصية
    للبيع او الايجار بغرض السفر والهجره وطن كان مليون ميل مربع وشهادة بحث بها بعض الموانع …. احححىىىىىىىىىىا

  13. حاج أحمد السلاوى كتب:

    أفليقا … غايتو ..لاكين … جنس … غايتو ..

  14. حنين كتب:

    أفليقا .
    إنت من أم بارح عامل البوست دة عشان عاوز ليك عروس وبستعرض فى عضلاتك بالامجاد دى .أها أنا عندى ليك عروس (بت عمنا )خريجة إعلام ومالاقية شغل وعملت تريننق فى تلفزيون النيل الازرق (نققاقه).بتطير ليك راحة بالك دى .لكن كمان عندى أمنية غريبة شوية
    .ركز معاى .أنا داير مرت سيد البيت المأجرين منو تموت…

  15. AFLAIGA كتب:

    السلاوى : بدل غايتو جنس غايتو دى خليك شجاع وخش قول عاوز شنو طبعا انت حجيت وعمرت وعرست وولدت بعد ده بتكون طلباتك بسيطه ومتواضعه يعنى زى عرس تانى وكده !! هههههههههه
    حنين : لاكين لقيييييتك خترى عليك الله عرفت كيف ؟؟؟ مبااالغه لاكين انت شغال فى البتاع ولا شنو ؟؟
    اما بالنسبه لعرضك الراقى المبهر الذى ينم عن رجاله فايته الحد لى هنووووك فاقول لك :
    اولا الواحد يمشى يعرس زميلتو فى الجامعه ويقول ليك بديك بت عمى !!!
    ثانيا نقناقه عديل كده ؟؟؟ ده نظام وداوها بالتى كانت ولا شنو ؟؟؟
    ثالثا يعنى انا شغال وما لاقى اعلام وهى ما شغاله وقاريه اعلام ممكن نكمل بعض موش ؟؟
    رابعا وده الاهم اوعك تتمنى كده والله مرتو تموت الا ياجر ليكم ايجار المثل على اساس انو البيت فى الصافيه !! الرجال النسوانم بيموتو ديل اى نعم بيكونو قنوعين من الدنيا لانو كل المصايب المفروض يشوفوها بيكونو شافوها مع المرحومه هههه لكن برضو بيصيبم من الطمع المفاجئ وده بيكون طمع عرضى لانو الواحد بيكون طول ما مسك قروش فى يدو ولا شاف طعم الخمسمية الف فالنوع ده التلاته شهور الاولى بيكون مفزوع ماديا لانو كان مقشطنو ومستمتعين بخيراتو زى الحكومه ما مستمتعه بخيرات الشرق والجنوب والماء فوق ظهرونا محمول – لكن اديهو شهر تانى بيجيهو احساس انو الدنيا دى بعد انجلاء المصيبه الكبيره مافيها شيئ واحتمال كمان يسجل ليكم البيت ولا يعملو وقف لله تعالى على روحا بشرط تانى ما تقوم من قبرا !!ههههههههههههه

  16. البشاوى كتب:

    افليقا المفوت صامولة صامولة كاملة — قال سنة قال — وحياتك كل سنة مفوتة بى سنة (عام ) ( حول ) من الانقاذ تجى الناقصو شئ يقولو ؟
    هو فضل فينا طريقة نقول ؟

  17. AFLAIGA كتب:

    البشاوى : كدى خلينا من سنه وصاموله بتجرد وشهامه ورجاله وصراحه كده ورى الناس ديل انت كنت وين ؟؟ وغبت ليه ؟؟ وايه حكاية عسل الملكه ولا حتفتح بيهو بوست براهو ؟؟ والبت اليومتا ردت على دى منو ؟؟ وليه ظللت العربيه دوكو ؟؟ وبقيت ترجع البيت بدرى ليه ؟؟؟ بعد داك نتكمل فى الصواميل والسنن .. هههههههههه

  18. البشاوى كتب:

    اولا يابتاع المشاكل انا لارحت لاجيت كانت عندى صامولة حتت فى الشارع وكنت بلقط فى الباقى منها — ثانيا انا على نافع عشان اظلل دوكو بامفترى — ثالثا من عرفتك لحدى اليوم وانا برجع بدرى خوفا من (الفتنة) والبت الردت عليك دى كانت عينة للناس اللى عاوزة تعمل رفرش للعلاقة مع الطرف الاخر — كفاك ولا اخلى سلاوى يتمو ليك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s