عداد ،،، الجبهه الخبيثه

Posted: الجمعة,17 يونيو, 2011 by طارق أب أحمد in اخرى

فى سعيها الحثيث لحلب جيب المواطن حتى آخر آخر جغمه، بدأت الطغمه بتركيب عدادات الدفع المقدم للماء ما عرف بالجمره الخبيثه فى المناطق السكنيه فى الخرطوم – العمارات و الرياض تحديداً-
حكومتنا الرساليه لا أطال الله عمرها لا تنظر للمواطن إلا على أنه صحن ضلع يسيل له لعابها و تفكر كل ما تستطبح برؤيته (ثم ماذا بعد ان يؤكل هذا الكتف ؟)

حكومتنا الرساليه لا أطال الله عمرها ربما لم تسمع بأن الناس شركاء في الماء والكلأ والنار فبعد أن آنتفخت أوداجها و تكورت بطونها (وحتات تانيه) من فعل المكوث المفروضه على الكلأ و بعد ان أستطالت فى البنيان فى ماليزيا و دبى و السودان من ريع النار المستخرج من باطن الأرض و هو ملك حر لهذا الشعب الطيب . بعد كل هذا تتفتق عبقريتهم لإحتكار وظيفة السقا علها ترطب صحراء كروشهم الملتهبه من اثر السحت
الطريف فى الموضوع أن الماء فى عاصمة البلاد آسن و غير صالح للإستهلاك الآدمى بشهادة الرائحه المنبعثه منه غير الطعم و اللون و شهادات المختبرات و المنظمات الأجنبيه النى تهتم بصحة البنى آدم
سكان الخرطوم التى تتخللها ثلاثه من اكبر أنهار العالم موعودون بفاتوره جديده بعد أن مزق الرساليون فاتورة أخلاقهم من ضمن الفواتير التى وعدونا بتمزيقها عشية إنقلابهم المشئوم . عليه سيلتهم البند االجديد حوالى المائه جنيه شهريا لمنزل اسره عاديه تتكون من 6 إلى 7 أشخاص ولا تهتم كثيراً بالزهور أو غسل المنزل
أما لمن لديه نخله و ليمونه و بعض نيمات فى الشارع أقول :- يا لسعادة الفرن البلدى الذى سيلتهم ما لذ و طاب له من أطايب الحطب الذى ربما لم يعرفه منذ زمن الرغيفه بتعريفه
و أخيرا ما تنسى تذكر الحاجه، ساعة رشة الحوش العصريه ، قبل تقلى البن ،،،تراجع ،،، عداد الجبهه الخبيثه

Advertisements
تعليقات
  1. طارق أب أحمد كتب:

    ابكرون
    الموضوع مشى وين

    حااولت مع اللرابط هنا و فى الراكوبه لكن ما بفتح

    رابط الجزء الثالث والاخير ولمن يرغب وللمهتمين مراسلتي علي الايميل (داخل الرابط ) للحصول علي الاجزاء الاول والثاني مكتملة بالخرائط والصور

    https://acrobat.com/#d=PZ265gaNNRdaYVQPY-tLeA

    Connection closed by remote server
    Check that the address is spelled correctly, or try searching for the site.

  2. ياسين شمباتى كتب:

    الحبيب طارق..
    الله ينتقم منهم! الناس تطير ولا كيفن؟؟واين نضال الطبقات العاملة؟؟
    نستورد توانسة ولا شنو!؟؟
    تبا لهم,,بالنسخة الانجليزية طبعا !

  3. ابكرون كتب:

    منهم لله تتنشف عليهم شقيش ما يقبلوا والبحصل ليهم اسه ده في الجنوب ودارفور وجبال النوبة هو حق الغلابة وظلمهم لعباد الله ….اللهم زيد الحرامية المفسدين غلغلة وانتقم للصابرين آمييييين

    • طارق أب أحمد كتب:

      الشنباتى
      ((تبا لهم,,بالنسخة الانجليزية طبعا !))
      تلفزيوننا كوز مركب دقن 240 فولت بقوم بعمل سايلانت لامن يسمع تباً لك بالإنجليزى
      لكن الطبقه العامله خلها الكلام هسا عند الطبقه الما عامله

      أبكرون
      أللهم آااااااااااميييييييييين

      أفليقا
      ابو (حنفيه) بتاعنا مد كرعينه ،،، طيب خلى يصل الإحياء الشعبيه عشان يقطعوا ليهو الخرطوش فى ضهرو

  4. قرن شطة كتب:

    الاخ طارق اب احمد
    صباح الخير
    ماعارف اقول شنو؟ لكين عجبتنى (تباً لهم ) بتاعت اخونا ياسين شمباتى طبعا بالإنجليزية قال!!

  5. AFLAIGA كتب:

    اب احمد : وهو غير لمن ضمنو انو ثوره مافى الخلاهم ييفكرو شنو فى الحاجات دى ؟؟ الشعب طلع نفاخ فمد ابو حنيفتهم رجليه بعد ان جمعهما تخوفا من عظمة الشعب .. نحنا حقو يركبو لينا شنو اقول ليك !! احىىىىىىىى مننا نحنا ديل ..

  6. AFLAIGA كتب:

    شمباتى :
    خت التشكيل براك على الحروف محل بيريحك :
    فكهم كان فكهم بيفكنا
    ما منهم بس مننا قول فكنا
    ماف زول تعب من ذلنا ومن سكنا
    كلما نقول نحن الزماااان نلقانا بس لكننا
    يمكن يكون ما منهم بس مننا
    يمكن كون بس منهم ما مننا
    ما مشكله لو منهم قوم فكهم
    لو مننا قول فكنا

  7. عزت كتب:

    أمبارح امامنا بتاع الجمعة الكان متعود يلعن ناس نيفاشا وأهلها…. قال
    نحن لا نستطيع بعد دا نقول للناس اطلعوا مظاهرات واحتجاجات (Too late دي من عندي طبعا) بل نسأل الله الكريم
    أن يأخد الظلمة بتاعين الحكومة والانقاذ واحد واحد أخذ عزيز مقتدر

    آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآمين

    كسرة:
    بيت بستاني للبيع

  8. ياسين شمباتى كتب:

    افليقا..سلام..
    والله ابدعت ووفيت,,بس التشكيل دا فى الحتة دى صعب شوية..

    قرن شطة..سلام..
    يعجبك السمح آخوى,,فلنجعلها شعار المرحلة القادمة…

    عزت..سلام..
    بقوا واحد واحد,,قول ليهو من زمااان كنت وين؟؟عالم ما تجى الا بالضغط الزى دا,هيييييع

  9. AFLAIGA كتب:

    عزت : بيت بستانى للبيع – ياء النسب فى بستانى راجعه للبستان ولا لى صاحبو ؟؟؟ يعنى بيت بتاع واحد بستانى ولا بيت بستانى بتاع واحد ؟؟؟ده كلو ما مشكله المهم الغرض من البيع الهجره ولا القنع ولا ليبيا فتحت ؟؟؟

  10. moshahidah كتب:

    سبحان الله توارد خواطر غريب كنت عايزة اعمل تدوينه عن الجمرة الخبيثة لكن الاصلية مش الجاية علينا دى كمان ..هو احنا قادرين على التهديد الكهربائي لما يبقى علينا مويه بحساب … عارف انا مركبه فريون فى غرفتى لما افتحه ساعات طويله بحس بالذنب … اسي الزول لو طول فى الحمام و غسل هدوم كتيرة و اى حاجة فيها مويه يحس بالذنب برضو و لا كيف ؟ ترشيد ترشيد تانى يعنى تتسوك و الماسورة مقفوله … حبذا لو تقتصد فى الوضوء … كمان نحاول نشوف لينا تاجر شاطر تابع للمجموعه الفاضله يجيب لينا المواسير الفيها سنسر البتفتح بس لما تمرر يدك تحتها و نسميها المواسير الاقتصادية زى اللمبات الاقتصادية …

  11. حاج أحمد السلاوى كتب:

    اب احمد ..
    انتو ناس لا تقدروا النعمة الإنتو فيها .. الله رسل ليكم الناس ديل عشان يرشدوكم إلى الطريق القويم والمستقيم وتتبعوا سنة نبيكم محمد عليه الصلاة والسلام .. وتتبعوا هديه ..الم يأتكم فى القرآن إن المبذرين كانوا إخوان الشيطانين..انتو لازم تتعلموا ترشيد كل الموارد من كهباء وموية وجاييكم ترشيد الأوكسجين كمان .. صبراً آل السودان ..انتو فاكرنها سايبة ساكت وعاوزين تلهطوا اى حاجة مجانن ؟
    وانا بخت اللوم كوووولو على البروف ابو ناجى لأنو الأفكار دى أخدوها من مقالاته وبدوا يطبقوها على الشعب الفضل .
    وخلونا النشوف آخرتا شنو ..

  12. AFLAIGA كتب:

    حاج السلاوى : عليك الله مش ببالغو ناس اب احمد ديل يعنى لقو ليهم حكومه عاوزه تنظمم عفوا عاوزه تنظم ليهم حياتم ومابين مش وش نعمه

  13. طارق أب أحمد كتب:

    الشنباتى
    ((تبا لهم,,بالنسخة الانجليزية طبعا !))
    تلفزيوننا كوز مركب دقن 240 فولت بقوم بعمل سايلانت لامن يسمع تباً لك بالإنجليزى
    لكن الطبقه العامله خلها الكلام هسا عند الطبقه الما عامله

    أبكرون
    أللهم آااااااااااميييييييييين

    أفليقا
    ابو (حنفيه) بتاعنا مد كرعينه ،،، طيب خلى يصل الإحياء الشعبيه عشان يقطعوا ليهو الخرطوش فى ضهرو

  14. طارق أب أحمد كتب:

    عزت
    دى ما ياها حلات البيت البستانى بس سوى ليك متره و تبيع المويه

    السلاوى و أفليقا
    أشبكونا إتنظمو إتنظموا لامن نتنظم تنظيم زى تنظيم القاعده

    مشاهده
    راجين البوست

  15. التركي كتب:

    أب أحمد والأخوة الكرام
    الكلام دا معناه يبيعوا لينا الموية مقدما ويقطعوها مننا مش ؟ … يكونو بشغلو قروشنا دى وبشترو بفوائدها موية ونور … غايتو بعد كدة لو سمعت انو المستشفيات بقت تلاتة يوم فى الاسبوع برضو بصدق يعنى ماتمرض ساى

  16. طارق أب أحمد كتب:

    أعلن والى الخرطوم أول أمس عن وقف تركيب عداد الحبهه الخبيثه فى القطاع السكنى

    صحى عالم تخاف ما تختشيش

  17. عصام فرص كتب:

    طيب العدادات الاشتروها دي راح يودوها وين ، واشتروها من حساب منو ، تبا لكل دراسة فيها جشع (بالانجليزي طبعا) .

  18. طارق أب أحمد كتب:


    هكذا بدت لنا المويه اليوم و ما زالت ،،،، و واضح الفرق بين موية الماسوره و مويه XXXXX
    رغم شحها و رغم اننا ندفع قيمة الكهرباء لسحبها إلا أن الإداره ما زالت علي صلفها من أجل تركيب العداد ذو الدفع الرباعي المسبق

  19. ودالخلا كتب:

    سلام ياقبيلة،،

    أب أحمد موية ماسورة شنو ياااخ، قول لينا ده عصير قمردين ولا شربوت مر، قول لينا دي اي حاجة تانية ألا أنها لن تكون ماء ماسورة (H2O ) ،،،،
    يا أخي ده منتهي الفوضي والأستهتار بارواح الناس….

  20. طارق أب أحمد كتب:

    سديقى الخلوى
    و يطلع ليك المسئول فى التلفزيون و المنتدى بتاع الجمعه فى الراديو و يقول ليك بالفم الملان نحنا عملنا ليها تحاليل و هى صالحه للإستهلاك الحيوانسانى و ما بعيد يشرب ليك منها عبار كمان

  21. البشاوى كتب:

    اعتذرت هيئة المياه عن وصول نسبة العكورة الى 37 الف وحدة عكارة ضوئية وان طاقة محطات الخرطوم تستوعب 8الف وحدة عكارة ضوئية واعلن النا طق باسم الهيئة ان هذه النسبة تفوق المعدل المتعارف عليه ( علميا ولا اخلاقيا ) بصراحة لم يحدد
    واعلن عن اجراءات للحد من العكورة من بينها تقليل الكمية المنتجة من المياه وزيادة المادة المروقة — دة عشان صحة المواطن — حسب قول المهندس — ياجماعة جيبوها لينا عكرانة ولا سكرانة انشاء الله تكتلنا بدل مانموت عطش —
    مغسة —
    قبل اسبوع واحد فقط لاغير دفعت ( 1000 جنيه بالجديد ) تسهيلات لتوصيل خط موية جديد لانو القديم بقى جارى هوا – وتمتعت لمدة 5 ايام بالخط الجديد (وياقول جبرا الجاتك فى خطك سامحتك ) بحساب موية اليوم (200جنيه) التقول جارين الخط من زمزم —- شكيتم لى الله – ومن ثم تبا لهم حقت اخونا شمباتى ——- والموية قاطعة عنو معانا — نقطة نقطة الليل نعدو

    • ودالخلا كتب:

      البيشاوي قلت لي نسبة العكارة الضوئية كم؟؟؟ يعني 450% ضعف دي مبالغة عدييل كدا، يعني بحر أزرق ده قام خرت الطين خرت، وجاب ليكم الموية برجوب، عفيت منو أبزرد، ماكلهم خارتين أشمعني هو يعني؟؟

  22. ياسين شمباتى كتب:

    البشاوى ياخوى,,المبالغ دى ما قادر اقراها كويس! قولها لى بالقديم عشان استوعب معاك..
    لكن عموما تبا لهم للمرة المليون !

  23. طارق أب أحمد كتب:

    هاك دى
    بعد إنقطاع المويه أمس علمت من أم أحمد أن متحصل المويه زارهم صباحا و هدد بقطع الماء ما لم ندفع المتأخرات 400 جنيه و أبرز الفاتوره مبررا الأن المبلغ المسدد من قبل إتلحس بواسطة المتحصل السابق و عليه أما أن نبرز فواتير السداد أو يشيلوا العده
    الحمد لله أم أحمد حاجه حريصه و عندها كل الفواتير و طلع عشم أبليس فى المجغميه فشوش

    الغريبه الناس ديل ما بختشوا المويه قاطعه و لو جات ملانه طين ،، و برضو عايزين المجغميه
    فرصه إستثمار جاذبه
    أزرعوا رز فى حوض المكيف

  24. ياسين شمباتى كتب:

    يعنى هى حافظت ليك على حقك وبتقول حاجة حريصة! جنس حقارة لكن ! كان تخليك تدفع ال400 الف دى عشان تعرف الحرص سمح…كاااااااااااااااااك

  25. حاج أحمد السلاوى كتب:

    الشى الملاحظ فى أحاديث بعضاً من السادة المسئولين فى وسائل الإعلام المختلفة المقرؤة والمرئية والمسموعة (واقول بعضاً درأً للملاحقة القانونية لمن تسول له نفسه الأمارة بالسؤ ) تجدهم يدلون ببيانات إعلامية كاذبة دون أن ترمش لهم عين أو جفن وهم يعلمون تمام العلم أنهم يقولون غير الحقيقة التى يعرفها القاصى والدانى والطفل الصغير قبل الرجل البالغ المكلف ولا ندرى هل هو إستغفال لعقول الشعب السودانى الفضل ؟؟؟ام هى شطارة وأن الكلام والإدلاء بالتصريحات ببلاش ولا يكلف دراهم ؟؟وبصراحة ربنا صرنا لا نعرف الكاذب من الصادق والصاح من الغلط واختلط الحابل بالنابل وما نا عارفين نحنا ماشين لحد وين …لو فى حد عارف يقول لينا .. بعد حلف اليمين القانونية عشان نصدقه .
    وبرضو منتظرين نشوف آخرتا متين ..وشنو ؟

  26. ودالخلا كتب:

    سلام ياقبيلة،،
    عمدتنا حاج أحمد السلاوي، أنت لي هسع ما عرفت نحن ماشين لي وين؟؟؟
    قاع تبالغ عدييييييييل كدا!!!!
    كدي أسأل عذاري الحي أن كُن قد رأينا حبيبا” قد تواري!!
    ذلك الجميل الذي لم يقل حتي وداعا” في الرحيل

  27. حاج أحمد السلاوى كتب:

    أخونا بن الفلاة ..
    يعنى إنت عارف وما عاوز تقول لينا ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s