الجاتك في خطك سامحتك

Posted: الخميس,30 يونيو, 2011 by عزت in اخرى

كتب الأستاذ (الفاتح جبرا) بالأمس موضوعا تسائل فيه عن (الخط بتاع هيثرو- الخرطوم) الاتسرق من ناس الخطوط الجوية السودانية وصار ملكا لأحدى الشركات البريطانية على خلفية (الهوجة) التي فعلها السيد وزير النقل والمواصلات عندنا وأثار الموضوع في البرلمان السوداني مطالبا بمعاقبة من تسببوا في عملية البيع (دا طبعا ان تعرف عليهم)…

وكعادته في تناول الموضوع واقتراح الحلول أشار الى أن على السادة القائمين بالتحقيق في (الخط الاتسرق) أن يفتحوا بلاغ في (القسم الجنوبي البريطاني)  ويختو (الخط معروضات)…

ما أجملها من حكاية وفعلا (شر البلية ما يضحك) هذا ان عرفت عزيزي القارئ أن هذا الخط اثير الموضوع حوله قبل ثلاث سنوات عندما توقفت الخطوط السودانية من السفر الى (هيثرو) أو الى اي حتة مماثلة في أوروبا وذلك بعد أقعدتها الحالة المايلة التي لازمتها وعمليات البيع الماشة ديك ومحاولة انقاذ (الناقل الوطني) والخروج به الى أفاق أرحب عبر بيع الخطوط الجوية ذاتا لشركة كويتية بتراب القروش كما تردد وبيع بيت السودان في لندن ومقر الخطوط في لندن والتنازل من حاجات كتيرة لصالح تلك الشركة والتي لم ندري الى الآن (لسواد عيون منو فيهم) تمت تلك الصفقة المشبوهة والتي يتردد الآن أن الحكومة (تعبانة جنس تعب) في محاولتها لارجاع الناقل الوطني الى حظيرة الوطن بعد (خراب سوبا) و(حيدفعوا دم قلبهم) لذلك… فهل تسائل أحدكم ولم كل هذا التعب….

أما الحكاية المحيرة أكثر أعتزام وزارة النقل تكوين لجنة وتحري في الموضوع بتاع الخط مع انو الموضوع كما أشاروا في غاية البساطة في ظل  (هو فى كم زول) فى السودان ممكن يبيعوا ليهم (خط طيران)؟ وكم زول ممكن يكون عندو أوراق ومستندات (تقنع المشترى)  بإنو هو  الشخص المخول ليهو (ببيع الخط)؟ كما تسائل (الأستاذ جبرا) وبعدين المشكلة وين؟ فالحكومة (إتنشلت) ووجدت الحاجه النشلوها منها (قاشر بيها زول تانى)  ما خلاس فلتخاطب الزول التانى ده  بصورة رسمية وقانونية وتطلب منو إنو يوريها (الخط المسروق) ده جابو ليهو ياتو حرامى…!!

قد تبدو المشكلة كبيرة ولكن حلها في غاية البساطة الذي سوف يفضي الى التعرف على الجناة وتقديمهم الى المحاكمة ولكن هيهات…. فلقد صرح السيد وزير النقل بأنه سوف يكلف متحري (انجليزي) عديل كدا للتحري في الموضوع وسيتكلف مهما تكلف لكشف ملابسات القضية من لجان وسفر ونثريات ….

فتخيلت الموضوع الشائك الذي سوف يدخل فيهو ذلك المسئول في ظل السلحفائية في الاجراءات وتعقيداتها…..

أولا حيمشي المسئول يفتح بلاغ وسيتعب تعبا شديدا الى أن يعرف (وين) يفتح البلاغ اذ أن من المعروف أن تفتح البلاغ في أقرب قسم لمحيط (السرقة)… وهنا المسروق (خط) سيضحك (الشاويش النبطشي) لأن الموضوع جديد عليه اذ أن الخط يبدأ من الخرطوم ويستمر الى هيثرو فكيف سيحدد (القسم المعني بالموضوع) وفرضنا أزعن وبدأ في تقييد اجراءات البلاغ فسيطلب (ورق فلسكاب) و(سيارة) لمعاينة الخط وهنا بيت القصيد…

بعد ذلك سيطلب أوراق المبايعة للتأكد من اسماء البائع والمشتري وختم المحامي الذي وثق المبايعة وكيف تم (قبض) المبلغ هل بشيك أم (كاش) ومن الذي قبض وهل استلم المشتري (الخط) بحالته الراهنة…

في هذا الأثناء سيقوم المسئول بتكوين لجنة وسيكون أحد أعضائها (بريطاني) كما أشار المسئول لكي يتابع الموضوع في لندن وفي الغالب سيكتب (اسم البريطاني) غلط في قرار تكوين اللجنة وحيتعب البريطاني (جنس تعب) مع سفارتنا في لندن عشان ياخد التأشيرة للسودان اذ أن عدم تطابق الدعوة مع الاسم في الباسبورت قد يدفع (البريطاني) الى الذهاب للجنة الشعبية بتاعتم في (مانشستر) ليؤكد بأن الاسمين المكتوب في الباسبورت وفي الدعوة هما اسمان لشخص واحد… ولمن يقربوا يدوهوا التأشيرة سيتفاجأ بأنه لازم يرجع للجنة الشعبية عشان يختم الخطاب…. وغيرها من التعقيدات التي سوف يجدها عندما يبحث عن البائع الذي قبض الثمن بتاع الخط والذي في الغالب سوف يكون (مجرد) اسم لا سند قانوني له ولا يمكن تتبع القروش لأنو بيكون قبضا (كاش)…

وحتوسع القضية وتتشعب وتأخذ من حر مال الشعب الغلبان الكثير وستكون هناك سفريات وبدل سفريات وأمر قبض لأشخاص وهميين وفي نهاية القضية قد (يامن) الخواجة فقد قالوا أن قبطيا مر بموقف مشابه عندما قام بدردته سوداني دردرة شديدة قبض في نهايتها السراب في وجود مشاوير وتعب شديدين كان في آخرها أن قال القبطي عند تواجهه بموقف عصيب الا وقال (أشهد أن لا الله الا الله) ….

وأرى ان ما تنبأ به (الأساذ الفاتح جبرا) سوف يكون حقيقيا عندما يكتبوا في آخر التقرير….

الجاتك فى خطك سامحتك…!!

Advertisements
تعليقات
  1. wdelzper كتب:

    عزت الليله ٣٠ يونيو

  2. عزت كتب:

    اتخيل يا ود الزبير
    أمبارح كنا متوقعين يأجزوا لينا على الأقل اليوم بمناسبة هذه الذكرى المجيدة الا أننا تفاجئنا (بفراغ دستوري في البلد) فرؤساءنا الثلاثة (زايعين) في الخارج فالشاهد ان كبيرهم في الصين والاتنين السغار في (ملابو) العاصمة الغينية… وباقي الوزراء موزعين على الدوحة واثيوبيا …….

    منو الح يمضي الاجازة؟

  3. قرن شطة كتب:

    د. عزت
    صباح الخير
    من الواضح أن المسالة كلها نابعة من فساد قديم والى فساد جديد تصير ، وده موضوع ميت…المهم الان أن هؤلاء البشر بقطعوا وشهم مننا ، خلاص تعبنا وداير نفس بس..تقول ناقل وطنى ! فى هو ناقل وطنى اكتر منهم؟ بس ناقلين شنو؟
    تحياتى

  4. wdelzper كتب:

    قرن شطه البركه بالشوفه

  5. طارق أب أحمد كتب:

    هاك الخطوط دى
    الخطوط البحريه السودانيه سودانلاينز ودى أسألوا منها أبكرون (من أكفأ شركات النقل البحرى فى العالم من حيث الدقه فى المواعيد و الإلتزام ) الآن تملك الباخره الجودى المحجوز عليهامن القضاء للإيفاء بحقوق العاملين بعد أن كانت تملك عشرات السفن
    سكك حديد السودان (الدوله تملك الخط الحديدى بينما الشركات تملك الخطوط الناقله)
    موبيتل خطوط و شرايح بيعت لزين و ما تبقى لسوداتل بيع أيضا بيعه مدغمسه

  6. AFLAIGA كتب:

    شباب : الناس ديل البلد بلدم يبيعو العاوزين يبيعوهو وياجرو العوزين ياجروهو بعدين عادى يعنى لمن يجى زمنكم اعملو زى السادات ولا عبد الناصر :
    تاميم سوداتل – تاميم الخطوط الجويه – تاميم قناة السويس .. بعد كم سنه حتقعدو تبيعو برضو بس الفرق فى الاتى :
    باع الاسلاميون البلد للاسلاميين
    سيبيع اليساريون البلد لليساريين
    سيبيع الديمقراطيون البلد للديمقراطيين
    زول حيرجع البلد للشعب مافى
    ده لو مافى زول باع الشعب ذاتو
    لا تحلمو بعالم سعيد فخلف كل قيصر يموت قيصر جديد

  7. البشاوى كتب:

    د\ عزت
    الشعب الطيب دة الجاتو فى خطو سامجتو ——-
    اها الجات للبشير فى خطه من ايران للصين سامحتو ؟

  8. neiam كتب:

    عزت المرطب:
    نحنا بعنا مشروع الجزيرة ما قلتو حاجة قمنا فرتكنا سكا هديد ماقلتو حاجة اتوكلنا و طفشنا هدمة مدنية ماقلتو هاجة زدنا بعنا الناقل اوتني و ما قلتو حاجة اها يازول قمنا بعنا الخط عشان تاني ما تسافرو زاتو …وبعدين عايز اقوليك انتو الخط دا تعملوا بيهو شنو عايزنو لصبق الحمير..
    قرن شطة:
    يعني انتا جيت تسافر ما لقيت تيارة… مدريد دي ما ترا دي كان بعجلة سداري قمت بدري بتفطر في الكشك حق سانتياغو برنابيو…
    البشاوي:
    وبعدين معاكم … تكترو تقللو حنبيع بق بن ظاتو…

  9. AFLAIGA كتب:

    نيام :
    تعرف يا نيمو اى شيئ ولا بق بين !! شفت الزول الودوهو ورا الجبل وملصوهو وجا راجع لابس الساعه بس اها لمن سالوهو الحصل شنو قال شنو ؟؟
    تعرفو الناس الختفونى ديل كانو عاوزين يقلعو منى الساعه دى لكين وييييين انا الكلس البفرط فى ساعتو كانو فرط فى طاقيتو هييييع انا الكلس اب ساعه …
    اها بيق بين دى يا نيام اى شيئ ولا التفريط فيها لانها بيق وبين فى نفس الوقت تعرف لو كان بيق بس كان ممكن نفرط او بين بس كان ممكن نفرط لكن بيق بن والله لا نفرط فيها وفينا عرق ينبض بدم هيييع ..

  10. neiam كتب:

    عافليقا:
    وساااا كم هسع يا كلس؟

  11. AFLAIGA كتب:

    نيام : اسااااااااااع سااااااااع اربحه ونس علا همسا ( همسة شوق ؟؟ ) ….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s