جمهورية السودان الجنوبي وليست جمهورية جنوب السودان

Posted: الجمعة,8 يوليو, 2011 by ابكرون in اخرى

جمهورية السودان الجنوبي وليست جمهورية جنوب السودان

  خطأ كبير وقع فيه الجميع قبل اعلان الدولة الوليدة خاصة من قبل الرسميين في الشمال والجنوب وكذلك كافة وسائل الاعلام المحلية والاقليمية والدولية وهو تسمية الدولة الجديدة بجمهورية جنوب السودان ، المؤسف له حتي اعتراف حكومة السودان بالجمهورية الوليدة الذي تلاه القصر الجمهوري ذكر اعترافه بجمهورية جنوب السودان ، وهناك فرق كبير بين التسميتين فجنوب السودان اعتبارا من التاسع من يوليو 2011 هو : الشريط الحدودي لجنوب ولايات النيل الازرق والنيل الابيض وكردفان ودارفور ، وهذا الشريط هو جنوب جمهورية السودان بعد التاسع من يوليو ، و يفترض ان يحدد شمال السودان اسمه فهل هو جمهورية السودان ام جمهورية السودان الشمالي ؟ وعموما لا يمكن جغرافيا تسمية دولة الجنوب بجمهورية جنوب السودان ، فالجنوب ما دام اختار اسم السودان لدولته فهو جغرافيا السودان الجنوبي ، اتمني ان يلتفت الجانبان لهذا الخلط والخطأ البين وتصحيحه .

Advertisements
تعليقات
  1. ياسين شمباتى كتب:

    الحبيب ابكرون..سلام..
    اعجبتنى لفتتك البارعة منذ الامس,ولقد حاولت مليا ان اجد لهم مخرجا لكنى بؤت بالفشل,,واكيد ما راح يلتفتوا وحيتموها موية بس!

  2. ودالخلا كتب:

    صديقي أسد الخلا الورو ما قلنا ليكم زمان ماصدقتونا ووصمتونا بأننا حالمون واهمون، وأهو جالكم كلامي لحدت عندكم فلا يوجد هنا خطأ تاريخي ولا يحزنون وأنما هو حكم كونفدرالي (روح واحدة في جسدين)، فالسودان بلد واحد بجمهوريتين واحدة جمهورية شمال السودان والأخري هي جمهورية جنوب السودان والجمهوريتان تشكلان وطنا” واحد أسمه السودان فيه أقتسام لموارد ومصائر مشتركة ، وشوف بكرة بقية القصة العجيبة ويا خبر بفلوس بكرة ببلاش!!!!!

  3. ابكرون كتب:

    حبيبنا اناكوندا الخلا : القصد جغرافيا لا يمكن التسمية دي فجنوب السودان الشمالي الولايات التي ذكرت وهي جنوبنا الجديد …وياعزيزي السودان اعترف بالدولة الجديدة وخلاص بح ومن اليوم حتستلما امريكا واسرائيل وما ذهبنا اليه من قواعد عسكريه وووووووو كلو اصبح متاحا بفضل رعونتنا وتقسم السودان الي دولتين (وسام انجاز للمؤتمر الوطني) ولمن كنا متحدين لم نكن روح واحده في جسدين يا صديقي فكيف نكون وقد اختاروا طرقهم بعيدا عنا …فقد كنا نعوق تطورهم كما نعوق حاليا تطور انفسنا….فلنتركهم في حالهم ونتمنى لهم حياة افضل بعيدا عن المندكرو والجلابة ! ونلتفت للجنوب الجديد الذي بدأ نفس السيناريو يتشكل فيه…..وستبدي لك الايام بان قومنا واهمون………!

  4. ابكرون كتب:

    Southern Sudan not South of Sudan

  5. حاج أحمد السلاوى كتب:

    اخونا بن الفلاة ..المقدام ..أى حكم كونفيدرالى تتحدث عنه يا سديقى العزيز ..هذه دولة جديدة رقم 193 وستنضم إلى الأمم المتحدة بهذا الرقم قريباً جدن ..ويا سوداننا الشمالى جاك بلا من الدولة الوليدة ..وربنا يجازى الكان سبب بالرغم من إنى أرى أن لهم الحق بالإنفصال والإستقلال عن الجزء الشمالى مقارنة بمعاملتنا لهم أبان توحدنا معهم ..ولنكن صريحين مع أنفسنا وندع العاطفة جانباً ونوزن الأمور بميزان العقل والتعقل ..واوجه السؤال لكل سودانى شمالى كيف كانت معاملتك لأخيك من جنوب السودان من جميع النواحى ؟
    وخلونا النشوف آخرتا …!!

  6. ودالخلا كتب:

    سلام ياصديقي أبكرون،،،
    أنا فقط أكايدك بقولي (روح واحدة في جسدين)، فكلنا نعلم بأنه لم تكن هنالك ألفة وتآلف بينا وبينهم وبأن العطار قد دق بيننا عطر منشم في أطول حرب في التاريخ الحديث وربما القديم أيضا” أن لم أكن مخُطئا” في ذلك التعميم، وأظنها قد فاقت حرب داحس والغبراء والتي زادت عن الأربعين عاما” وحرب الجنوب هذه كما تعلم ياصديقي تجاوزت ال 50عاما” فعليا” وبعد الأتفاقية كنا مشدودين وفي تناوش مستمر ومتقطع هنا وهناك وأحيانا” وصلت المعارك للشمال لأول مرة منذ أندلاع شرارة التمرد الأولي في أغسطس1955 عندما هوجمت نقاط الشرطة في سوبا ودورياتها في جبل الأولياء..
    كنت أظن وبعض الظن أثم أننا يمكن تلافي وتدارك وتصحيح بعض الأخطاء التي ساهم فيها ساستنا الغافلون والمجمتع المتخلف الذي تربي علي الأستغفال والأستهبال والخداع بان كل من يقوم بأكل أموال الأخرين وخصوصا” الدولة فهو شطارة وفهلوة وتفتيحة وتم كل ذلك والعقلاء من أمتي يتحسرون ويعضون بنان الندم ولكن لات ساعة مندم…
    سأهديك يا صديقي كتاب لأحد المثقفين من الجنوب عبر الميل لتري بوضوح بيّن وجليّ وجهة نظر النخبة الجنوبية في مواطن السودان الشمالي وهل كان من الممكن فعلا” تغيير مسار التاريخ؟؟؟
    لك تحياتي مجددا”

  7. سهيل كتب:

    اخواني الأعزاء – كل واحد يخلي بالو في ورقو – الجنوب شتت – وورقو بقى في يد اهلو – العبوها صاح – اوعا من السيك

  8. ابكرون كتب:

    ود الخلا الكتاب ثر ومفيد وبديت فيه حقو تنزل رابطه للاخوان او من يرغب بالايميل

    سهيل : صفرجت ….انا خايف اولادنا الاطباء والمهندسين تاني حيكون اغترابهم جنوبا …ونحن محلك سر او الي الخلف زي جنيهنا وزي حالنا المايل …….

  9. ودالخلا كتب:

    فعلا” كتاب ممتع ومفيد ولن تدعه أو تمله حتي تقضي عليه واخص بالذكر الفصل الخامس الذي يتحدث عن التحديات المستقبلية في الجنوب والشمال بعد الأنفصال، وللأسف ليس لدي رابط له ولكن يمكن تداوله أيميليا” لمن يرغب من أهل المدونة فهو فعلا” يكتسب هذه الأهمية الخاصة حول مستقبل الدولتين الوليدتين!!

  10. ابكرون كتب:

    (مرت الأشجار)

    الشاعر / محجوب شريف
    ـــــــــــــــــ

    مرت الأشجار

    كالخيال أحلام

    ناس لطاف وظراف

    مابين غزال وزراف

    مابين ظلال وغمام

    مرت الأشجار

    طابق طبق طابقين

    في ضلهن كرتون

    حر والسقط أولاد

    تحت المطر ياجون

    لاعندكم عداد

    ولابوهيتك كم لون

    ما احتجت لي حداد

    يوما ولا نجار

    وكنت ألطف جار

    ومرت الاشجار

    الباقي تحت العين

    حيث الرماد أحجار

    من يوما داك فاقداك

    كل الدروب فوق راي

    ياخيت وهيت ياكيت

    حس المقص بكاي

    سكسك سنون براق

    نار الفراق جواي

    أمونه ست الشاي

    صمت الكبابي عويل

    برادا ساكت ساي

    ياحليل تريزا قريب

    كانونا كان بي جاي

    ياحليل جناها جناي

    هم يسألون وعيون

    تحزن تقول باي باي

    يامنتهي الأشواق

    اتمحن الكنتين

    والنيمه ذات الساق

    القدره كم تشتاق

    كم كمشه مويه فول

    سمسم عمل زقزاق

    وين الملامح ديك

    يازحمه البصات واللفه والدقداق

    ليل القهاوي حزين

    عدد الكراسي فراق

    جفت عروق السوق

    ريق الطريق العام

    واتحتت الأوراق

    ———

    وين ياسواد العين

    مشهد علي صعبان

    شبان وهم حبان

    تحت النجوم الفوق

    في عتمة الميدان

    الشوق بلا بيبان

    من وين ذهاب واياب

    وكلاهما تعبان

    ابنوسة اللاوو

    ياحليلا غصن البان

    جمر الحصي الوقاد

    علا الكتف أركان

    ميري الفراق بي طال

    وسال سيل الدمع هطال

    لكنو مهما كان

    لو بالوسم سكان

    لو بالرسم جيران

    متين بقيت يانيل

    عددا من الخيران

    نتدفي بس أو قول

    نعزم بعض يوم داك

    بنولع النيران

  11. سهيل كتب:

    يا اسد الخلا الورور – رسل لي الكتاب

    يا حليل محجوب شريف

  12. ودالخلا كتب:

    سهيل يانجما” بعييد ضواي،
    DONE

  13. عزت كتب:

    الحكاية ما فيها غلط… ما هم متحسبين للقادم من تقسيم الدويلات كدولة جنوب جنوب السودان و دولة غرب جنوب جنوب السودان و دولة جنوب شمال شرق غرب السودان ودولة الشمال الشمالي للجنوب الغربي للسودان ودولة ………!!!!!!!!

  14. زووووووول كتب:

    عزيزى ابكرون وضيوفه الكرام سلااام
    اعتقد ان المسأله مقصوده ومتعمده واخشى ان تكون خطوه تكتيكيه يعود بعدها القوم اكثر قوة واشد ضراوة لتحرير بقية السودان فحزبهم الحاكم لا يزال يحتفظ باسمه القديم الحركه الشعبيه لتحرير السودان …. كل السودان …

  15. ودالخلا كتب:

    فعلا” يا أيها الزووووووول فقد نقشتها فهل سيتبين القوم النُصح الا ضُحي الغد؟؟؟

  16. سهيل كتب:

    هوي ياود الخلا و الزوووووول – إنتو دايشين ولا شنو ؟؟؟ دا كلام تم بحضور ممثلين من كل العلم .. إنتو قايلين الحكايه هزار .. و لا لعب ؟؟؟

  17. زووووووول كتب:

    سهيل يقول :دا كلام تم بحضور ممثلين من كل العلم .. إنتو قايلين الحكايه هزار .. و لا لعب ؟؟؟

    ممثلين ؟؟؟ يا سهيل انا خايفك تستبين النصح ضحى الغفد … ممثلين منو يا عمك ؟؟ ناس سوزان رايس ولا غيرهم ؟؟ انت تتخيل يا ولد يا سهيل لو ناس باقان ديل عملوا سلاح طيران قوى وقاموا ضربوا الخرطوم تتخيل الممثلين ديل بقولوا بغم ؟؟ … ولو دخلت قواتهم حدودنا العالم بقول ليهم سيك ولا ميك ؟؟ يا سهيل ارجوك لا تراهن على جواد خاسر واعنى جواد الممثلين والمجتمع الدولى المزعوم وقول يا لطيييف

  18. التركي كتب:

    العزيز ابكرونا والاخوة الكرام
    ياخوانا ليه مانتفائل ونعتبر انهم بقولو كدة على أساس أنو الفى قلوبهم مازى البقولوهو بلسانهم … يعنى هم لسه جنوب السودان بس الظروف خلتهم يبقو جمهورية منفصلة بالمناسبة لاحظتو انهم بتكلمو عن استقلال وليس انفصال طيلة الاحتفال يكونو قاصدين شمال السودان كان مستعمر جنوبه وهسع الجنوب استقل لكن لايزال جنوب السودان (دا تفاؤل ولا عدم بصيرة ياربى)

  19. ابكرون كتب:

    زووول : هو فعلا المحتاج لتحرير شمال السودان ……!
    التركي : يا مورين هو استقلال فعلي وكان في البرنامج فقرة لتسليم العلم مباشرة من سلفا للبشير ، لكن تلافيا لهذا الاحراج ذو الصبغة الاستعمارية طوي العلم واطلقت مقولة الاحتفاظ به للذكري والتأريخ في اخر لحظة حفظا لبعض ماء الوجه للمستعمر الشمالي ……!

  20. ابكرون كتب:

    الناس تلف وتدور وعينا في الفيل وتطعن في ضل الفار…..ما تسمي بالانقاذ هي المسئولة عن تقطيع اوصال الوطن ، واسالوا نيفاشا ومهندسها علي عثمان وسيد الخطيب ويحي حسين وادريس عبد القادر ومحمد المختار اسالوا هؤلاء الرهط وعن ما دار في كواليس فندق سمبا لودج عام 2005 بنيفاشا ….!!!!!!!!!!!!!!!!!!!!!!!!!!!!!!!!

  21. ابكرون كتب:

    يا سادة :هل تذكرون مناكفاتنا حول التخطيط الاسرائيلي والامريكي لفصل الجنوب وسعيهم نحو ذلك وبعض الاخوة لم يصدق هذه التحليلات ولم يبلعها وهاهي اسرائيل تحيط بنا احاطة السوار للمعصم وبعد شهور حتسمعوا بالقواعد الامريكية ويا دارفور وجنوب كردفان الدور عليكم

    ————————————–
    http://www.alrakoba.net/news-action-show-id-24887.htm

  22. ياسين شمباتى كتب:

    وكمان البحصل فى جنوب كردفان دا يا ابكرون بالضبط الكان بكتب عنو (عبدالله سيداحمد) فى جريدة السودان قبل 5 ا و6 سنوات,,بس اسمو بالضبط رايح لى..
    لكن هل يستبين قوى النصح الا ضحى الغد !؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s