سف سجاير – براءة اختراع رقم ( 1 ) لافليقا …

Posted: السبت,13 أغسطس, 2011 by aflaiga in اخرى

طبعا يا جماعة الخير الموضوع ده كان مفروض ينزل قبل رمضان عشان الناس تستفيد منو قبل الصيام لكن ولانو الموضوع تحت التجربه ولم يتم رفعه لجهات الاختصاص فقط قصدنا ان ننزله هنا لتثبيت الحق الادبى وبراءة الاختراع عشان ما يجى زول ناطى يسرق مشروعنا ولا اختراعنا ده وعلى كل حال الموضوع برمته سيتم اعادة مناقشته مع الدكتور قرن شطه الخبير فى المجال ومع بعض الخبراء ايضا فى المجال كمستهلكين متوقعين ومن ستتم عليهم التجارب لاثبات صحة النظرية واليكم ما توصلنا اليه :
برغم ان البلاد محتاجه الى اختراعات فى مجالات اخرى مفيده الا اننى لاحظت انو لحدى ما تجى حاجه مفيده تنفع الناس الناس حتموت من الاذى البيسببو التدخين والتمباك ولمن يجى الاختراع المفيد ما حيلقى زول يستفيد منو لانو حسب احصائياتى الخاصه بين كل 5 اشخاص 3 بيسفو او بيسجرو يعنى البلد 45 فى الميه منها بس الما بيسف او بيسجر ونص ال45 فى الميه ديل بيكونو اقلعو عن التدخين او التمباك بعد ما جربوهم الاتنين معا او واحد بس !!! ولانو النسبه بقت خطيره عكفت على دراسة الظاهره وده موضوع مقال تانى حنورى فيهو انو ليه الناس بتسف ( تمباك ) عشان نحدد لانو السف كتير واسبابو معروفه نسبه لارتفاع الايمانيات عند الناس !! وليه الناس بتدخن ( سجاير ) لانو فى ناس بتدخن وتجيب زيت بالعادم وبخرتا طويله خيت وراها – المهم نخش فى الموضوع طوالى :
بعد الدراسه وجدنا ان التمباك او العمارى يتكون من حركتين ( ميكانيكيه ) و ( كيمائية ) الميكتنيكية هى عملية اخراج الكيس بعد شرائه من محل معين وتصليح السفه ودردمتها ومن ثم وضعها فى الشفه السفلى للمعلمين والعليا للطلبه وفى نواحى الفم الاخرى للعربجية بمختلف انواعهم – اما الثانيه فهى عملية ذوبان مواد التمباك فى الدم وفى المسامات وتحقيق التخدير الموضعى الوقتى اللحظى – وللتخلص من هذا العملية قمنا باجراء كمية من التجارب بدءا بسف شاى الحب مرورا بسف الطحنيه ولكن نتائج التجارب اثبتت التغلب على الجزء الميكانيكى ولم نستطع التغلب على الجزء الكيمائى حتى تم اكتشاف الاختراع الاخير وهو سف السجائر فعن طريق سف السجائر نقوم باعطاء الجسم نسبة مخففه من النيكوتين ونمارس نفس طقوس السف للتمباك مع التخلص من السوائل الكتيره ومسيخه ومزعجه ومن حرج رمى السفه حيث بدلا من اخراج الكيس قدام الجكس والمجتمعات نقوم باخراج سيجارة دون اسعالها ومن ثم ناخد منها قرمه سغنتوته ونختها بحرفنه محل السفه وبيكون بين النيكوتين وبين الفم فى عازل يخفف من حدة النيكوتين وسخانة السجاير الناشف وبكده نكون حققنا عدة مكاسب بضربه واحده …
بالنسبه للسجائر ما عاوزين نفصل من اضرارو وعمنا جبرا افضل من يورينا انو السجاير بيودى سيدو وين وبرضو السجائر عندو حركتين ميكانيكية وكيمائية الاولى بنتجاوزا بى اخراج السيجاره من العلبه ورفعها للفم بدون اشعال وبعد داك ناخد قرمه من السيجاره ونختها فى محل السفه ..
من النتائج الايجابيه التانيه تلافى التدخين السلبى وهو انتقال دخان السجائر للاخرين لانو فى اختراعنا ده مافى دخان ولا نار ولا دخان يدون نار !!!
من النتائح برضو الخروج من حرج رمى السفه فرمى السجارة المسفوفه او السفه المسجره ممكن عادى فى اى حته لانو شكلها جميل ..
من النتائج ايضا هو توفير مال كثير فالسيجاره الواحده ممكن تسفف الزول 4 سفات يعنى 5 سيجارات بى عشرين سفه للناس السفافين ..
طبعا فى زول حيقول لى بدل ده كلو ما يخلو التدخين والتمباك وخلاس وباقول ليهم بكل صراحه انو الاختراع ده بيساعد على الاقلاع عن التدخين والسف بسهوله ليه لانو بيكون حقق للزول فوائد صحية عند نقصان نسبة النيكوتين فى الجسم عبر الصدر ونسبة سوائل التمباك فى الجسم وبيلقى الزول انو بقى كويس جدا وممكن يخليها كلو كلو …
عند اكتمال نتائج الابحاث واستلام براءة الاختراع ممكن حفل افتتاح المنتج الجديد يكون فى سوداننا ..
الحاجه التانيه المهمه انو شركات السجائر حتتفنن فى صنع انواع معينه للسف واخرى للتدخين ولمن تجى لبتاع السجاير تقول ليهو ادينى علبه يقول ليك سف ولا حريق ؟؟؟ وبكده المواطن بينشغل فى وهمه تانيه جديده تدى الانقاذ 20 سنه تانى لحدى ما يجى زمن ندخن تمباك !!!!!

تعليقات
  1. طارق أب أحمد قال:

    أها عشان نوع كلامكم دا حجار قام باع مصنع البرنجي لي شركه يابانيه بمبلغ 450 مليون دولار
    و الشركه اليابانيه حتنتج سجاير برنجي و بنسون و أبوجمل

    شوف ليك نظام الناس تدخن تمباك

  2. قرن شطة قال:

    والله ياولدنا أفليقا الظاهر موضوع العرس ده عمل معاك عمايل غريبة شوية! شوف ياسيد الصعوط والسجاير مبدئياً بينهما برزخ لا يلتقيان عديل كده من حيث الميكانزمات والتاثيرات ثم تجىء قصة طبقات إجتماعية وعلم إجتماع وجايز أنثربولوجى بخصوص الاصناف البشرية …الخ وحقو تراجع موضوع الكلفة الإقتصادية كويس يا أستاذ أفليقا ، لانو الخلق دخولها ضعيفة او غير موجودة تقريباً…بعدين موضوع الجكس والسف ده براهو داير ليهو بوست لانو ولمعلوميتك الجكس بقا يسف جهاراً نهاراً!؟ واخيراً وليس أخيراً انتا يا استاذ أفليقا بقيت ذى السيد الصادق المهدى تقريبا جيت بى نظرية يمكن تطويرها بس الزمان غلط والمكان ما ياهو …المستوى عالى والقواعد تعبانة ..اخيراً النظرية كويسة مبدئياً بس بتحتاج الى صقل واعادة تفكير فى بعض الجوانب وبتحتاج الى اموال طائلة للترويج وتاليف الكتب بالخصوص واعمال الترجمة وتسجيل البراءات ومسجل تجارى وصناعى وفلكى و و و و دمغة جريح أو سافى وجريح وطيران مدنى ودفاع شعبى ونفايات وعتب وضريبة شنو كده ماعارف…الله معاك…الراى أنو الناس حالياً تسف لامن ربنا يسهل.والظاهر انت بقيت تبع الجماعة لانو نظريتك بتصب فى مصلحتهم بالواضح وكده يقعدوا مليون سنة ونحنا نكون بقينا بترول مش صعوط …بترول عديل…
    تحياتى يامبدع ولنا عودة…

  3. ياسين شمباتى قال:

    افلى….سلام..
    وسف الهناى كيف !؟؟

  4. افليقا قال:

    نحيي المخترع العظيم افليقا الغريبة على وزن انشتاين ، اريد ان انبه الاخ العظيم صاحب الرد الجميل ، الاخ قرن شطه ، حبيب طبعاً في سجاير بي 1جنيه اذا قلنا انو العلبه فيها عشرة سجارات يعني نسلم جدلاً بانو نظرية افليقا صح يبقي 10 × 4 سفات = 40 سفه ممتازة اظنها يا قرن شطه وبعدين منو القال ليك انو الانقاذ حتقعد 20 سنه تاني مع براءة هذا الاختراع ، عزيزي زي ما قال قرن شطه انحنا خنبقي بترول لانو هم ما محتاجين صعود وسجاير ، بعدين في حاجات تانية عارفينها منتشرة شديد الايام دي بين الشباب والشابات ( بنقو + حبوب + شمة ……. الخ ) .

  5. قرن شطة قال:

    برضو الناحية الاقتصادية فيها ضعف ، يعنى عشرة سيجارات بى عشرة جنيه طيب عشرة جنيه بتجيب ليك عشرين كيس من صنف جيد وممتاز! يمشيك على الاقل 15 يوم ولا موكده…الاقتصاد مهم يا افليقا لاننا تعبانين جداً….بعدين الحاجات التانية انتا عارفها بى كم؟ بما فيها البنقو اللى هو ارخص الامور تقريبا…قبلى فترة لقيت شاب قال لى كان فى جلسة تخزين قات يمانى وكده! تقول لى على عبدالله صالح…نحنا شعب متفرد جداً ومنفتح خالص على الامم الاخرى! وانا خايف نظريتك دى آخر النهاية تبقى نظرية عديل ومدرسة ذى مدرسة الغابة والصحراء..
    تحياتى.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s