يا ناسينا …. وين افطار القمردينه ؟؟

Posted: الخميس,18 أغسطس, 2011 by aflaiga in اخرى

دعونا فى هذا البوست نتفاكر حول افطار القمردينه الذى تساءل عنه البروف بى غادى وتساءل عنه المعلقون ايضا .. على كل حال انا وسمسمه وحمودى وعبودى وسروية جاهزين وحاضرين اساسى قبل الكراسى بس حددو المواعيد والمكان ونتلاقى فى الرمله الدقاقه .. الغريبه امبارح سمسمه سالتنى قالت لى طولنا مالاقينا الناس السمحين ديل قلت ليها بكره بعمل بوست الافطار ونشوف – اها علمنا بوست الافطار عاوزين نشوف ….

تعليقات
  1. زووووووول قال:

    معااااااااااكم ….. وكمان (تعنى ايضا لغير الناطقين بها ) لو عملتوا لمه بعد العيد يكون لذيذ يا افلى

  2. ياسين شمباتى قال:

    قلبا وقالبا..
    واثنى اقتراح زووووول برحلة العيد ايضا,,اهو السلامى وود الفتيحاب يحضروا معاكم !

  3. حاج أحمد السلاوى قال:

    العزيز أفلى .. السلامى ؟ أوع تكون قاصدنى أنا ؟ غايتو لو قاصدنى أنا يبقا شيل شيلتك للمرة التالتة..وإن شاء الله تكون قاصدنى أنا ..
    واضف لمعلوماتك أنو ودالفيحاب موجود بين ظهرانينكم فى الفتيحاب وبصفة دائمة ..
    نؤيد إقتراح رحلة العيد ..

  4. شنو يا شباب يكلموكم عن الافطار تجروا لرحله العيد

  5. طارق أب أحمد قال:

    أفلى
    (أثلث) على المودووووووع

    بالنسبه للفطور علمت من سهيل إنو ود المدنى عمل كل الترتيبات على يوم الثلاثاء
    القادم بحدائق الرياض

  6. ياسين شمباتى قال:

    ههههههههههههههههههههههههه,,يا ود الزبير كل واحد عايز يضرب عشان يلحق! افهموها بقى..

  7. AFLAIGA قال:

    ود الزبير يعنى ممكن نقول :
    المكان وين ؟
    الزمان متين ؟
    الشير شنو ؟

  8. يس
    رمضان كريم
    تصدق اخوك ضرب ليهو خالد مدني قال لي الافطار يوم التلاتاء واسترايكر راح ينزل المودوووع اها جيت خاشي لقيت الشباب بيتونسوا عن رحله العيد
    المهم هسه نفتح ليكم بوست جديد ولا نواصل هنا ولا نجيب ليكم قون اتوبونج في القطن

  9. ود المهدي قال:

    انا برضو ضرب لي خالد مدني قال لي الافطار يوم التلاتاء وقترجت ليهو قضة
    البوست في سوداننا وانو نوزع المهام واشياء الفطور – عشان ما كلنا نجيب حلومب
    وقال لي اليوست راح ينزل لكن شايف الموضوع نط وصل لما بعد رمضان
    – كلو كويس ونحنا في انتظار اللمة الحلوة في زمضان او في العيد المهم
    نكون في صحبتكم. كل سنة وانتم طيبيين

  10. عزت قال:

    سلام يا أحباب

    متلومين والله لعدم التصدي للافطار واعلانه في بيت أسرة المدونيين في (المقرن) لظروف خارجة عن الارادة… الا وأننا نشارك الجميع في أي مكان يقع الاختيار عليه وننظم مع المنظمين شان ما يبقى كلو حلومر زي ما قال ود المهدي….

    يا ود المهدي أكيد ما حيكون كلو (حلومر) لأنو الحلومر قطع لليلة….!!

    تحياتي وكل عام وانتم بخير

  11. مشكور يا عزت وعارفينك ما بتقصر – ننتظر من الاخوة الاتفاق على اليوم المناسب وتجهيز كل ما يطلب من كل عضو – او يتبرع به – وما يكون كلو حلومر🙂

  12. ياسين شمباتى قال:

    ود الزبير..
    جيب قون القطن عليك الله,,كيتا فى ناس نيام ومن عام عومهم!

    قلتوا لى عشان ما يكون كلو حلومر!؟ آبرى كيف؟؟ وع.م.ج!

  13. السادة الكرام … سلام وتحية
    بعد اتصال مع البروف جبرا يوم الخميس الماضي تواضعنا علي ان يكون الافطار القمرديني يوم الثلاثاء في منتزه الرياض العائلي … بناء عليه اتصلت بالاخ استرايكر وطلبت منه انزال بوست بالدعوة العامة وتوضيح الزمان والمكان واتصلت بعدها بعدد من الاخوة المدونين … ولكن عندما دخلت المدونة يوم السبت لم اجد ما اتفقت عليه مع استرايكر فاتصلت عليه فقال انه قد رأي واعتقد ان بوست افليقا كافي وسيقوم المدونين بالتداخل ونبني علي ذلك .
    سادتي … لم يعجبني الوضع وليست هذه بالتداخلات التي ستجعل الافطار بالتصور الذي وضعته في ذهني ممكنا لذلك اعتذر لكل من اتصلت به واتنصل تماما من كل اتفاقاتي معكم ومع اطراف خارجية بخصوص موضوع الفطور الرمضاني وربما بخصوصات اخري … مع تمنياتي للجميع بالصحة والعافية .

  14. ود المهدي قال:

    ياود مدني وحات عينيك ما تزعل والوضع ما بيحتاج والله فاقدين اللمة
    ومقدريين مجهودك واتصالاتك لكن ما معا في تنصلاتك وما عهدناك متنصلا
    بل زول حارة وجمل شيل – ونحنا معاك بكل ما عندنا
    سلام

  15. شكلو الصيام دخل العضم فعلن
    الموضوع وببساطة وبعد اتصالك يا خالد – افلايقا نزل البوست بتاعو قبل ما يعرف اصلن الحاصل شنو – فبقى هو البوست الاساسى للموضوع – وعليه اى مواعيد تحدد يكون عن طريق البوست مع اقتراحات الشير يكون كيف وبتفاصيلو لكل الذين سوف يتم تاكيد حضورهم للافطار

  16. عزت قال:

    سلام يا أحباب
    عارف يا استرايكر… الصيام بيدخل العضم من ما يثبتوا الشهر في الاذاعة…

    لكين الحاصل يبدو دخول آخر قريب من الملل والطناش الذي صار ملازما وبكل أسف الشلة والتي وأكاد أجزم وأن عين كبيرة أكبر من ألت (أبكرون بتاعت صورة البروفايل) فشتت المدونين وطفشت ببعضيهم الى الفيس وواحدين للأقمار وواحدين منتظرين….

    أحي جهود خالد مدني ومن قبله أفليقا وود المهدي الذين ذكرونا بما نسينا وتحديد اليوم الثلاثاء 23 رمضان الموافق برضو 23 أغسطس قلت لي الساعة كم يا خالد؟ موعدا لأفطار المدونين….

    فها نحن نشد من أزر المجموعة ونسأل الله العلي القدير أن يكون تجمعنا هذا وتعارفنا هذا وتواصلنا هذا سببا لدخولنا الجنة معا إن شاء الله تعالى….

    وبعد

    التجمع كما أشار الأخ خالد مدني في منتزه الرياض الجزء الشرقي بالقرب من المرجيحة الكبيرة (الساقية)… يفضل الوصول الى البوابة الشرقية قبال (ستة ونصف والا ما حتقدر تخش بي سيارتك اذ يفاجئ وقت الافطار الجميع)… حسب التكليف الذي قبلته… سيكون عدد من البلح يكفي لثلاثون شخص بلحة بلحة.. وكمية من الكب كب وشاي وقهوة (انت يا خالد الباقين حيجيبو شنو؟…..)
    الرجاء من المدونين الكرام أن يتداخلو (ولو بنصف تعليق) يبينون موقفهم من الافطار الجماعي واستعدادهم للمشاركة فيه اليوم ولكم مني أعزائي كل الود والتقدير,,,,,,,,,

  17. ود المهدي قال:

    نحنا ناس التحلية – اها في زول حلو تاني يشارك = وبتفضلوا البسبوسة
    ولا بلح الشام ولا الكنافة بالمكسرات = هل من مثني
    وانا ما عارف لية المكسرات دي مؤنث يعني لو كانت الكنافة بامكسرين
    كان تكون احلي ولا شنو يا سهيل؟
    انشاء الله نجي بدري عشان نقضي زمن مع بعض – بعد الفطور التراويح
    بتجي سريع ولا نصلي مع بعض – عاوزين امام اكسبرس
    يا حليل ود البركة –
    سلام

  18. زووووووول قال:

    اخوتى الاكارم سلام عليكم
    ابارك اللمه وارجو ان يتقبل الله الصيام والقيام وان يحفظكم ويجمعنا واياكم فى دار كرامته … اخوتى بكل اسف اتقدم باعتذارى عن مشاركتكم بسبب التزامات مسبقه واتمنى ان نلتقى قريبا ولكم العتبى حتى ترضوا

  19. AFLAIGA قال:

    الحلوين ازيكم علكم طيبين فى حيكم :
    بالامس فى منتزه الرياض عيدنا دخل قبل الاعياد اتجمع شملنا فى الميعاد
    واكتشفت حاجه تانيه غير انو انتو ناس سمحين :
    مهما طال الزمن انتو ياكم انتو بنفس الالق والطيبه – جبرا ياهو جبرا وكفى – وود المهدى بنفس الروقه وعزت رائع كده كالعاده وخالد مدنى اصيل سودانى – وتركى واهلو زينة اللمه – كمان بشاوى بنفس الصوره – وعبدوش اصبح زول مسئول اكتر من اول – وعبد الرحمن المننا طول – وسمسمه كانت زينة اللمه – وقرن شطه منور دايما – وحتى كمان الما زارونا كانو معانا زى الحضرونا …
    ياخى انتو سمحين والله يديم عليكم سماحتكم ويديم الخوه البيننا ..
    عزت الحقنا بالصور …

  20. ودالخلا قال:

    سلام ياقبيلة،،،
    الصديق أفليقا وبقية العقد الفريد النضيد، كم تمنيت لقاكم بين أفياء الظلال ومنثور الزهور، وكم شغل القلب هواكم وأنتم لا تدرون الهوي، وتمنيت لقاكم ولكن…. تمناني النوي، فعذرا” والجايات أكتر من الرايحات!!!
    تقبل الله منا ومنكم الصيام والقيام..

  21. smukhayer قال:

    الحبان داخل الميدان
    سلام ومحبة واحترام
    صمتم وفطرتم على خير ومحبة ووئام، والله يديم المودة خالصة لوجهه الكريم، خالد مدني يديك العافية لو ما حركت جلكسات كان القصة نفست، عموماً وحيث أن قلوبنا على مجتمعنا الدولي القمرديني، فإنني وبأسم قمرديني الخارج أشكر الأحباب جميعاً على إنجاح حفل الإفطار القمرديني وللمشاركة رغم إحتمالية الإرتباطات العديدة والشكر موصل إلى الحيب أبو ناجي على حضوره الكريم وللحاضر أبداً أبو عصمت على البلح وكل سمح، وللأخوان خالد ود. قرنوف وود الزبير والبشاوي والتركي وأفلي وودالمهدي وأسرتيهما وعبدوش وعبد الرحمن والجميع دون فرز، ورغم الإعتذار لا يفوتنا أن نشكر حبيبنا الزووووول على الإهتمام وشيخنا ود الخلا والجايات أكثر من الرايحات وفي إنتظار توضيح صريح قبل التراويح عن غياب إسترايكر وأبكرون والسلاوي ؟؟؟؟؟؟

  22. عزت قال:

    طبعن أمبارح البلد كوووولها طافية الا من نور المدونيين في منتزه الرياض…. اخراج جميل للافطار للمايسترو خالد مدني بمعاونة صديقه أحمد وحضور مبكر لأفليقا، شخصي، التركي، عبد الرحمن وعبدوش والبيشاوي وابنه أحمد وودالمهدي كما شرفنا من الحرائر مدام التركي وأخته، فضلا على سمسمة التي التحقت بنا بعد الافطار ومع (المدفع) جاء ود الزبير والفاتح جبرا وقرن شطة… وهاتفنا من البعد حاج السلاوي…. نسأل الله العلي القدير أن يكون تجمعنا هذا وتعارفنا هذا وتواصلنا هذا سببا لدخولنا الجنة معا إن شاء الله تعالى….

    كسرة:
    سجل شباب بحري غياب تام… أنتو الكبري كان قافل….!!

  23. ودالخلا قال:

    سلام ياقبيلة،،،
    دوك عزت سيّد القبيلة ومتفقد بطونها وأفخاذها لله درك، لقد أعجبني أستذكارك لبحري وشيبها وشبابها ولماذا تخلفوا ، فالكبري ياصديقي لم يكن قافل ولكنه كان معرِّجا” بي (جوكرين)، ولا أعلم ظروف أصدقائي أب أحمد وسهيل فهم الأقدر علي تبيانها والزووووووول قد اعتذر، ولكنني وآه من لكن هذه فقد علمت بالتوقيت والمكان في نفس اليوم المحدد من الأبن الشعلة عبدوش بالتلفون، وعندما دخلت للموقع وجدتكم قد تبادلتم التلفونات قبل وقت كافي، يعني من يوم الخميس لحدت ما جابت ليها زعلة من ودمدني حسب المداخلات أعلاه، فلا يُعقل ياصديقي أن يُرتب الأحباب أحوالهم ونُخطر نحن في الثواني الأخيرة كالضيوف فيلفح الواحد عمته ويحضر كالطيور السابحات في الأثير!!
    طبعا” نحتاج لترتيب الأمور وأعادة الألتزامات والمواعيد لتتكيف مع موعدكم المحضو !!
    ولا موهييك ياشباب بحري؟؟؟
    عموما” كما قلنا سابقا” حصل خير والجايات أكتر من الرايحات أن شاء الله..

  24. ود المهدي قال:

    والله شباب بحري بالغوا معانا لا جو ولا قالوا السبب الحماهم باستثناء
    شيخ القبيلة – والجايات بالطريقة دي ح يكونوا اقل من الرايحات-
    لكن يا د.عزت انت الصورة دي واحدة بس ولا شنو -لا انت ولا جبر ولا ود الزبير
    ولا اي زول من الناس من قروب ا – حتي خالد مدني ما ظاهر – بالله يا شباب
    لو في زول صور يرسل لينا الصور- والله يا اب احمد ما عطشتنا وكمان ما
    صورتنا –
    سلام

  25. AFLAIGA قال:

    ودالمهدى :
    ناس بحرى اصلا كده بيتقلو عشان يتحبو ورغم كده بيتحبو – مع انو سهيل ود الديم لكن عندوعلاقه خسوسى مع ديم بحرى ما عارف ليه عشان الديوم كلها نجوم ولا عشان الحنان مافى الخرطوم ؟؟
    اما اب احمد فيمكن عشان زعلان من افليقا ما جا مع انو افليقا ذاتو جا بى سمسمتو وحموديهو وعبوديهو وسوريتو اها تانى فى شنو ؟؟ لا اب احمد يزعل لا ام احمد تزعل ..
    اما بخصوص القبيله وبقية الناس الاتضررت من سوءالفهم حقيقة الحاصل باختصار هو :
    1 – ود مدنى مشكور ابدع وبادر ورتب كل الامور باحسن النوايا كما هو دوما
    2 – افليقا لانو مشتاق ليكم نزل البوست قبل ما يعرف ترتيب ود مدنى
    3 – بقية المدونين لانهم حاسين بانو الهم واحد ومفروض يشاركو اتحسسو شوية من انفراد ودمدنى بالترتيبات ونسو انو كلنا واحد ولا تحقرن من المعروف شيئا .
    كل ما سبق صنع سوء فهم كاد يعصف بالافطار لولا انو عبدوش شال الشيله وراصر انو يقوم فى ميعادو وضرب للناس القدر يصل لى تلفوناتم يعنى باختصار مافى زول عارف قبل فتره وزول عارف فى نفس اليوم حتى الشفيف قرن شطه كلمناهو قبل الافطار بساعه وحضر مشكورا …
    يا ناس يا حلوين عليكم الله خلوها بساط احمدى وتاكدوا انو مافى زول عندو شى شخصى مع اى زول غير المحبه والاحترام والكل فى ميزان جبرا وسوداننا بيتتقل بالدهب ونفس الجرام والعيار ..
    يلا صافيه لبن ؟؟
    حليب يا قشطه ..
    شوفو لينا رحلة العيد يلا ..

  26. ابكرون قال:

    ود المخير : لو كلموني قبل الفطور بساعة كان جيت
    بس كنا حنلاوذ ود الخلا قال فيها تفقد بطون وافخااااذ ههههههههههههههههه
    اسه في زول وصل الخرطوم امس حيقول لي : تالله يا لبكرون انك في ضلالك القديم

  27. ياسين شمباتى قال:

    بالانابة عنو واصالة عن نفسى: تالله انك لفى ضلالك القديم..هههههههههههههههههههههه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s