عندما يكتب ياسر صادقا ..

Posted: الأربعاء,14 سبتمبر, 2011 by aflaiga in اخرى

واشنطون – لندن
مارس- ابريل
2011م
نضوب البحر
اي جواز سيحمل عبدالفضيل الماظ
الماظ(1) يشرب قهوته الاخيرة قبل الغروب
يلتقي امه من المورو مرة اخري واخيرة
يرسل أبتسامته العريضة

    ناصعة كالحقيقة
    في عينيه إيمان شيخ الطريقة
    ينظر مليأ لعبيد (2) وثابت(3)
    قبيل المساء
    صباح يوم الاستفتاء
    يتذكر ان اباه من النوير
    صباح الخير
    حياه ضابط الجوازات
    افاق علي السؤال عن الذات
    الي اي شعب ينتمي
    الي الجنوب ام الشمال
    الشمال ام الجنوب
    ام إليهما معاً
    الي الارض ام السماء
    الي الانسان ام الفضاء
    خيبة الامل ام شرفة الرجاء
    قد نسي الاجابة قبل يوم النهر
    قبل القادمين الي القصر
    لا انه لم ينسي الاجابة علي ذاك السؤال
    ولكن السؤال تغيير بعد ان اعطي الاجابة
    ينادي علي سيد فرح(4)
    الي اي جنسية كنا ننتمي يا سيد عصر يوم النهر
    يجيبه في ثبات
    ان لا حاجة للإجابة وسقم السؤال
    فقر المقال
    انقشاع الجمال
    يتذكر الماظ موعده مع المطبعجي(5)
    يتذكر ان الاجابة كانت في كتاب بتلودي(6)
    احترق الكتاب يوم النهر
    لم يصل الارض الرماد …. جمال البلاد
    وما يزال السؤال الي اي شعب ينتمي الماظ
    الي شعوب اليوم- الامس – عصر الفضاء
    الي مساء ذاك النهر ينتمي
    مصيره مثل النهر تقرره المياه
    فوق صحراء إلاجابة عن السؤال
    ماذا يقول لعمه بلال(7)
    ارسله للجندية فعشق الوطنية
    لكن الي اي شعب ينتمي
    الي اي وطن يهتدي
    ماذا يقول لروحه عند النهر
    هل يعتذر عن يوميات الامس
    بعد ان تغييرت الاجابة
    هل يبحث عن الاجابة عند اصدقائه
    في الفيس بوك ….. عند قوقل
    تذكر حسن فضل المولي(3)
    قبل إعدامات بري وغياب الاحبة ودفء المحبة
    يذكره ان يعيد تكوين اللواء
    من غباء السؤال وسجن الاجابة
    ان يجمع اللواء في تيوتر
    من إبتسامات الشباب
    ذكريات إمراه فقيرة
    من إعلام في مسيرة
    من ثنايا اغنيات الخليل (8)
    “عازه في هواك نحن الجبال
    وللبخوض صفاك عازة نحن النبال”
    هل يجييد الماظ اللغات الجديدة
    مساء النهر فهمت لغته كل البلاد
    اخرجوا انتم من بلادنا
    تلك كانت لغة اللواء
    أنطـوي اللواء ام نعيد اليه الحياة
    يوم النهر لم يسأله جنوده
    لأي القبائل كانت امه تنتمي
    عند القتال لم يسأله جنوده
    الي اي القبائل كان ابوه ينتمي
    الماظ مثل البلاد
    امتزاج العطور واختلاف الزهور
    من نهرين متحدين
    يجتمعان في صراع من مياه
    في نداء للحياه
    الماظ من روحه يصنع يومه
    والبلاد للنهر تعود
    عند صباح الغروب
    لعصر الشعوب
    يعود عبداللطيف
    الي ليما وميري(9)
    يمد جناحيه الي البحيرات
    لخاله ريحان(10) في قوقريال
    يعود اللواء
    إمتداد السماء
    لفرح البلاد بدلقو المحس
    يعود لعصر الحكايا الجميلة
    نعود لإي العصور
    لعصر بعانخي
    لتهراقا يحمي الخيول
    لحقول الرجاء
    بذور الوفاء
    جسور العطاء
    رياض الإخاء
    ام لمنع الحقن
    وحقن المحن
    هل ستعطي حقنة لجرحي النهر
    هل ستعطي حقنة للرضي جابر
    انه اخوك ولايزال
    هل ستسمح للعبادي(11) بالغناء
    “جعلي ودنقلاوي وشايقي ايه فايداني
    غير سوت خلاف خلت أخوي عاداني
    خلو نبأنا يسري علي البعيد والداني
    يكفي النيل ابونا والجنس سوداني”
    هل ستسمح لمكي المنا(12) ان يقود مظاهرة
    للرضي جابر (13)ان يحلق مرة اخري في الفضاء
    الرضي جابر جنوبي صحيح
    لكنه اخوك وما يزال
    انك اسود والرضي شديد السواد امتداد لإسم البلاد
    لكنه اخوك ولا يزال
    قلت له بالامس يا اخي
    اتنكره اليوم
    بعد ان اخذ الضمير اجازة ورحل
    قال لك كيف تنكرني يا اخي
    في هذا المساء وبالبيت الابيض امراة سوداء
    اليوم تعدد الصلات
    ان انكرتني ستجدني في رسالة هاتف
    في منبر جوال فانا اخوك وما ازال
    لماذا تحرمني الحياة
    بعد ان ادينا الصلاة
    لإله واحد
    دون حديث عن الالوان
    فقد صلينا معاً لذات الإله
    هل سيسأل الله عن الواننا بعد ان اعطاها لنا
    ان الارض فسيحة بقدر الحقيقة
    نحن عبدنا ذات الإله عند الصباح
    في رحلتي الاخيرة للفضاء لم اعد ولم تلتقطني
    ها انت تحرمني الاخوة
    كنا معاً اتذكر احلام عودتنا لبلال وسلمان وصهيب
    هل تبددت الاخوة عند ناصية الرصيف
    اتت المواسم دون الخريف
    انكرت اخوتي عند الحريق
    نضبت مياه البحر اخذت شواطئه تضيق
    بهتت “معالم في الطريق(14)”
    ها نحن في عام الرمادة دون فاروق وبلال او صهيب
    الارض محل وصيف
    الشمس شارفت المغيب
    انت الجنوب وانا الشمال
    انا الجنوبي اخوك وما ازال
    والماظ يعود بالماء الزلال
    والسماء ملئ بالسحاب
    تغسل الوجدان امطار من حليب
    عشب وازهار وافراح لا تغيب
    نوزعها للعائدين الغائبين
    كل من ضل الطريق
    الحب فنار في شواطئ القلب
    نهديه للقادمين الي الحياة
    نسقه من مطر الحليب
    الشمس تشرق لاتغيب
    ياسر عرمان
    ابريل/2011م
    هوامش :-
    (1) عبدالفضيل الماظ سليمان عيسي : والده الماظ عيسي احد جنود الاورطة (12) التي كونت في القاهرة وعبدالفضيل التحق بنفس الاورطة لاحقاً وتخرج من المدرسة الحربية في مايو 1917م ونقل الي تلودي وظل بها حتي 1923م حيث عاد الي الخرطوم وقاد معركة النهر الثانية في 27- 28/ نوفمر 1924م يومي الخميس والجمعة وإستشهد فوق مدفعه المكسيم الذي قاد به المعركة منفردا “ضحوة” الجمعة وانذاك كان في الثامنة والعشرين من عمره والماظ لايزال ملهماً في معارك إعادة توحيد السودان وافريقيا علي اسس منصفة للجميع ووفق رغبة اهل السودان الطوعية .
    (2) القائد / عبيد حاج الامين : ثوري سوداني سابق لعصره متجاوز للتحيزات الاثنية التي عرقلت تقدم المجتمع السوداني واحد المؤسسين لحركة اللواء الابيض اولي حركات السودان الجديد وتاريخ القائد عبيد حاج الامين ونشاطه الثوري الذي انتهي بإستشهاده في سجن واو ولم يتجاوز (32)عاماً ووجود قبره في مدينة واو الان يحمل رسالة عميقة الدلالة للشمال وللجنوب معاً .
    (3) ثابت عبدالرحيم وحسن فضل المولي : قادة معركة النهر الكبار والشهداء الذين تم إعدامهم في بري والصانعيين العظام لملحمة معركة النهر الثانية تحت قيادة الزعيم عبدالفضل الماظ .
    (4) القائد / سيد فرح : ابن دلقو المحس في شمال السودان واحد قادة معركة النهر 27- 28/ نوفمبر/1924م والثوري الضالع في الهجرات والذي عبر نهر النيل الازرق سباحة من ضفة الخرطوم الي ضفة بحري بعد المعركة وانتهي مشاركاً في ثورة عمرالمختار واتي عشية خروج المستعمرين البريطانين الي السودان بعد رحلة ثورية طويلة نقل بعض ملامحها الاستاذ الكبير حسن نجيلة في سفره “ملامح من المجتمع السوداني “.
    (5) المطبعجي : احد قادة ثورة 1924 وحركة اللواء الابيض .
    (6) تلودي :مدينة وحامية تلودي بجنوب كردفان التي امضي فيها القائد عبدالفضيل الماظ سبع سنوات قبل نقله لحامية الخرطوم .
    (7) بلال سعيد : عم عبدالفضيل الماظ والذي ساهم في التحاقه بالاورطة (12) كما ذكر الاستاذ حسن نجيلة .
    (8) الخليل : خليل فرح الوطني والمبدع الكبير وصاحب الملحمة ذائعة الصيت “عازة في هواك ” .
    (9) ليما وميري : ليما هي المنطقة التي ارجعت اليها بعض الدرسات اصل القائد علي عبداللطيف قائد ثورة 1924م وحركة اللواء الابيض من ناحية الاب وشعب الميري احد شعوب جبال النوبة انجب القادة علي الميراوي ويوسف كوة مكي وعلي عبداللطيف.
    (10) ريحان : خال القائد علي عبداللطيف والذي ساعد في تعليمه وتزوج حفيدة ابنة علي عبداللطيف ينحدر من فرع دينكا اوان في قوقريال التي اتي منها القادة فرنسيس نقور وسلفاكير ميارديد .
    (11) العبادي : ابراهيم احمد بابكر العبادي الشاعر والمسرحي والفنان والمبدع متعدد المواهب والذي ساهم في نقل الاغنية السودانية ((من الوسط )) من الطنبور الي الرق ومراحل الحداثة وهو اديب ومفكر لم يجد ما يستحقه من إهتمام يليق بمساهماته الكبيرة وتنقل العبادي بين الجزيرة وغرب السودان والعاصمة وعاصر سلطان العاشقين يوسف حسب الله واثر العبادي بعمق في الحياة الابداعية عبر سنوات طويلة .
    (12) مكي المنا : قائد اضراب كلية غردون الشهير في الثلاثينات من القرن الماضي .
    (13) احمد الرضي جابر : عضو قيادي بالجبهة الاسلامية وكذلك في بدايات سنوات حكم الانقاذ وهو من دينكا شمال اعالي النيل من جنوب السودان وهو إسلامي برهن علي صدق انتمائه للحركة الاسلامية السودانية بأن خاض الحرب الي جانبهم .
    (14) معالم في الطريق : كتاب الاستاذ سيد قطب احد القادة الكبار لحركة الاخوان المسلمين .

تعليقات
  1. ياسين شمباتى قال:

    ياسر ابدع وبالغ !

  2. لا هي بالقصيده ولا هي بالنثر مجرد خربشه وشخبطه وتلتيق كلام يمكن لاي طالب ثانوي ان يكتب مثلها
    ياسر عرمان شيوعي علماني خائن لبني جلدته ولو ان هذا ليس مقامنا لو طلبنا من شاعرنا نايم ان يقيم لنا هذا النص الركيك فماذا تراه يقول محاوله لحشد شخصيات تاريخيه معروفه لاستجداء عطف المتلقي لا قافيه ولا وزن ولا عبارات مدهشه تدفعك للمتابعه احسب ان الرجل وبعد ان سكب في جوفه علبه بيره ساقطه جلس وكتب هذا الهراء

  3. ياسين شمباتى قال:

    هرااااااااااااااااااااااااااااااااااء….

  4. ود المهدي قال:

    ياسر عرمان – بعد ان عمل للانفصال بكل ما اوتي من قوة – جاي يفتش الماضي ولا شنو؟ قول ليه بعد كدا امشي مع اسيادك ديل امكن يدوك وزارة ولا سفارة – الماظ البيتكلم علية دا لو لاقاهو كان بداء بية واول طلقة من المكسيم كانت تكون في راسة. يلا بلا لمة
    الانفسال تم – وقول لية شوف ليك غراب جزو.

  5. هراااااااء ونص وخمسه هذا الرويبضه(عجباني جدا كلمه رويبضه) وشايف انها لايقها على العميل ده تماما نرجع لموضوع الشعر ولو انه لفظ شعر كتيره على هذا الغثاء شوف الهوامش المصاحبها للشرح تجد انها اكثر واطول من القصيده وده بيدل على الركاكه يعني الزول زي البيعاين لخريطه وبعد كده ينزل تحت عشان يشوف المفتاح
    تالله الزول لو كان بيفهم في بحور الشعر كان عذب الزول ده عذاب يعني انا العبد الفقير في فهم الشعر شايف الكلام ده هايف اها ناس الادب والشعراء بيكونوا شايفنه كيف
    قال شنو
    نحن عبدنا ذات الاله في الصباح
    ياخي طخ
    قوم لف كده يلفك قندران

  6. ود المهدي قال:

    افبيقيا : حقو تسحب كلمة صادقا دي وتخليها عندما يكتب عاسر- ولا شنو.؟

  7. ياسين شمباتى قال:

    هرااااااااااااااااااااااااااااااااااااااااااااء..

    بعدين يااا ود المهدى الانفصال دا ما جابتو حكومتك دى !!! ولا الشينة منكورة؟؟

  8. حنين قال:

    أفليقا الكتب وزاغ والاصدقاء السمار .
    سلامات .
    يعنى ياأفليقا عرمان دة بعد الشفتو منو دة كلو حتى لو بقى أرق شاعر وبيهبشك محل يوجعك بتصدقو ياخ دى( الحركة الجبانة ) البيعملا الزول الخبيث عشان يستجدى بيها ويستدر عطف الجماعه المساكين الدمعتم رقراقة ومناخيرم سيالة .
    بالله فكنا….

  9. قبحك الله يا عريان اينما كنت واخزاك وارانا فيك في الدنيا قبل الاخره

  10. ياسين شمباتى قال:

    آمين,,ولكل مرتزق وكوز مثلها,,جزيت خيرا يا ابن الزبير…

  11. AFLAIGA قال:

    الاحبة السمار :
    كتب قرنق من قبل عن السودان فلعنه المجاهدون – ولما صار نائبا تغزل فى فكره المتغزلون
    وكتب الحاج ادم عن نظام الوطنى فاصبح مطلوبا للعداله واليوم يتغزل فى فكره المتغزلون بعد ان صار نائبا
    واليوم كتب عرمان فلعنه اللاعنون فهل يتغزلون فى الغد حين يصبح عرمان ( اى حاجه ) انشاء الله وزير السياحه ويجى يفتتح سلسلة مطاعم ود الزبير فللنتظر قصيدة ود الزبير العصماء فى الوزير عرمان ..
    ود المهدى : انا واثق ان هناك من نجح فى تحويل رؤيتك التى نعرفها الى هذه الرؤية الفظه التى لا تشبهك .
    اخطأ عرمان واخطأ الحلو واخطأ عقار لكن يظلو سودانيون لا نلمك حق انتزاع جنسيتهم ولا نملك حق تكفيرهم ولانملك ان نشمئز من جميل كتابت ياسر لاننا نشمئز منه .
    اعتقد ان اى اختلاف فى غير الوهية الله ونبوة نبيه وحقيقة الايمان باركان اسلام او ايمان يظل اختلاف دنيا .

  12. لوووووووووووووووول

    لكن يا افلايقا تمام التمام – كيفقتنى فى حنانى

  13. ياسين شمباتى قال:

    انت اقعد للكيف دا !!

  14. يا ولدنا
    كتابات ولدنا بتكيفنى فى حنانى – وبتخلينا نمرق من سباتنا الشتوى.

  15. ياسين شمباتى قال:

    ما اطال النوم عمرا وما قصره طول سهاد !

  16. ياسين شمباتى قال:

    مواطن سودانى (مُخلَص) يغنى للهناية المرتقبة : والربيع اهو فات وانتى ما جيتى,,عمرت الساحات وانتى ما جيتى..
    حاشية :-
    الهناية= الهناية السودانية !!
    الربيع= ربيع الثورات العربية..
    الساحات= ساحات التغيير-ساحات التحرير-ساحات الفدااااااااء !!

  17. AFLAIGA قال:

    شباب : يعتقد البعض ان كتابة موضوع ما عن شان ما هو راى الكاتب الشخصى والعكس اننا اعتدنا هنا فى سوداننا ان نكتب الموضوع ليتداول الناس حوله كل من وجهة نظره التى يراها وكنا فى وقت مضى ايام كانت سوداننا سوداننا !! يكتب الكاتب ونوضح وجهات النظر ومن ثم نلخص الرسالة التى من اجلها انشئ الموقع ولكن بعد ان اصبحت الكثير من مواضيعنا طق حنك وبوبار احيانا انا اكتب اذن انا موجود صرنا نتذمر من اراء بعضنا البعض بعد ان كنا على ايام الكنانى نمتدح اختلافنا فيكون اجمل اختلاف مع اننا كنا اقرب الى بعضنا جدا من حيث الافكار والرؤى .ز ولكن للاسف ..
    اذا كتبنا عن عرمان فلسنا نمدحه بل نمدح ما كتب عن شعور اصيل بالسودان الموحد وان اختلفنا مع شخصه او فكره
    كتب عرمان هذه الابيات وهو يرى نفسه وطنيا
    انتقدها البعض وهو يرى نفسه اكثر وطنية من عرمان فقط لانه يكره عرمان
    اخى ود الزبير ارجع واقرا الابيات مره اخرى وتخيل ان كاتبها هو جبرا او خالد مدنى واعطنا رايك دون تحيز
    بل هل تستطيع انت شخصيا ان تكتب مثلها ؟؟
    الرجل حاول مستخدما احساسه بالوطن كما يرى هو الوطن وليس كما ترى انت عرمان .
    يعنى لو حصل اختلفنا انا وانت وانا كنت كاتب لى حاجه سمحه حتقول دى كتابه فارغه ؟؟؟
    ود الزبير : لاننا نحبك نربا بك ان تخلط الامور وتظل انت حبيبنا ود الزبير بتاع زماااااااان قبل جية الخرطوم لعن الله الخرطوم انتو اى زول بيجى الخرطوم بيهناى ؟؟
    مع كامل ودى واحترامى وتقديرى للاكرم ود الزبير ..

  18. وكانني اتيت الخرطوم في بص بصل من يقرا لافليقا العباره الموجه لي ولا يعرفني يعتقد انني جيت الخرطوم اول امبارح
    المهم نرجع لموضوع عرمان وراي فيهو من خلال شعره
    في اول مداخله قلت ده ما شعر ولا نثر وكلام فاضي اما مقوله هل ممكن اكتب انا مثله فارد ان ده شخصنه للموضوع ويا افليقا لا تنهه عن خلق وتاتي مثله
    اما كفر ياسر عرمان فلا يختلف عليه شخصان يكفي انه مجاهر بعلمانيته ويدعو لفصل الدين عن الدوله
    هناك كاتب باحد الصحف السودانيه قدم نقد ادبي ممتاز لهذا الشئ المسمى مجازا شعر
    لم يترك لياسر صفحه يتقلب عليها الله يقدرني واجد وقت وافتش هذه المقالات
    ليري القارئ راي المختصين في هذا الغثاء
    هنا لم اتعرض لياسر عميل الحركه الشعبيه ولعلمك يا افليقا قرنق في نظري هالك وليس شهيد ولم نتغنى بحمده يوما ولن نفعل ولن نطبل لفرد سواء في النظام الذي نتمنى ان يوسع قاعده المشاركه فقط ويستمر في الحكم الا ان يقضي الله امرا كان مفعولا

  19. خليني اجيكم من الاخر انتو الزول عشان يقعد معاكم المفروض يكون معارض وكاره للنظام على طول الخط يعني يبدا كلامه بان اخوان البشير سرقوا البلد ومرته وداد بابكر بتخونه مع جمال الوالي وكرتي عينت مرته سفيره بايطاليا الا كده والا الزول بقي مرتشي ومن ناس المؤتمر الوطني
    ما ممكن قناعات الزول بعد تفكير تتغير وينظر للصراع بشكل جهوي مثلا
    من دخول خليل لامدرمان الزول بقي يعيد تفكيره في حاجات كتيره والصراع القادم بين الهامش والمركز ليس صراع سياسي لكنه حرب قبليه سيتم القتل فيها على اساس السحنه
    فلا تدفنوا رؤؤسكم في الرمال
    لو تم اجتياح الخرطوم من قبل المغول الجدد فلن يسالونكم عن بطاقاتكم الحزبيه يرحمكم الله
    قبل الختام
    للنظام سلبياته مافي ذلك شك
    لكن برضو عنده ايجابياته
    ولعل حسنته الكبرى تتمثل في تخلصنا من ترله الجنوب

  20. ياسين شمباتى قال:

    كدة كدة يا الترلة,,قاطرها قندرانى….

  21. الاخوة المتداخلين:
    لعن الله السياسة وسنينها – لو بتخليكم بتكلمو فى حق بعض بالطريقة دى او بالنفس الحار ده – وده ابلغ مثال انو انحنا ما بنقدر نتقبل الراى والراى الاخر.

  22. استرايكر
    الا ترى اننا تحملنا اتهامات الارتزاق كثيرا
    والاهم هل هذه المدونه محصوره على المعارضين
    وهل لتكتب هنا يجب ان تسبح بحمد عرمان وباقان وعقار والحلو ولبنى وصفيه اسحاق وهلمجرا
    لو تم اعلان رسمي ان سوداننا بوق من ابواق المعارضه والشيوعيين والعلمانيين فده طرفنا منها

  23. ود الزبير

    ابدا ما كانت سوداننا يوما بوقا لاحد , يكتب فيها كل من يشاء وبحسب رؤيته للقضية او الموضوع المثار.
    لكن لا يوجد شخصنة او استهداف لاى شخص او عضو.
    ممكن تكتب الليلة وتنزل كل مواضيع الانتباهة ومنبر السلام العادل زى ما انتا بتحب – وغيرك ينزل ويورى انو مع جبهة الشرق ولا الصادق ولا عقار ولا خلافو .
    ما يميز هذا المنتدى – عدم الشخصنة وعدم الهجوم وبالمناقشة بالتى هى احسن – وفى النهاية بنقفل الموقع بكليك وبينتهى اليوم.

  24. AFLAIGA قال:

    ود الزبير :
    على رثلك :
    اما مشاغلة جيتك الخرطوم فانا قاعد اقولا ليك قدامك وهى من باب الهزار وانت عارف .
    اما قصة انك الا تبقى معارضه عشان تكتب فدى راجعا شوية وارجع لمقالاتنا السابقة
    ما صنفناك وطنى عشان تصنفنا معارضة
    لسنا بالمعارضة ولسنا من مطبلى الانقاذ ونصرة الانقاذ ما الا بالتطبيل ولا تنس ان انصر اخاك ظالما ومظلوما
    منو السبح بحمد منو ؟؟ يا زول قول بسم الله انت ما ود الزبير ولا شنو ؟؟
    لو فى زول بيكتب باسمك ورينا .
    اسى عليك الله يوم واحد سوداننا دى اتهاترت للمستوى بتاع اخوان منو ومرة منو ؟؟
    اطالب ستريكر بسحب المداخلى الفيها اتهامات واعراض فورا بعد داك نتفاهم ..

  25. AFLAIGA قال:

    ود الزبير وعشان نكون موضوعيين وما نطلع بره النص انت قلت :
    لا هي بالقصيده ولا هي بالنثر مجرد خربشه وشخبطه وتلتيق كلام يمكن لاي طالب ثانوي ان يكتب مثلها =====
    اها انت جامعى ما تكتب مثلها !!

    لو طلبنا من شاعرنا نيام ان يقيم لنا هذا النص الركيك فماذا تراه يقول ====
    اها نطلب من نيام التقييم يلا يا نيام

    قال شنو
    نحن عبدنا ذات الاله في الصباح
    ياخي طخ
    قوم لف كده يلفك قندران ======
    طيب لو قال نحنا عبدنا اله تانى كنت حتقول شنو ؟؟
    اتذكر قول النجاشى حين قال له اصحاب الرسول فى مريم ما سره قال والله ان ما بيننا وبينكم الا هذا الخط !!

    ود الزبير خليك منطقى نحن بنتكلم عن زول مشترك معانا فى حب البلد ولو من وجهة نظره يعنى اسى البلم عبد الحى يوسف مع الشيخ المكاشفى شنو غير وحدة القبله ؟؟؟
    عزيزى ما انتشر الدين بلفظ الاخر بل بقبوله وما تكون السودان ذات نفسه الا بقبول الاخر وتقليل الانا تجاه الاخر
    ولا انت عندك تضخم فى غدة الانا ؟؟؟
    عشان كده قلت ليك ده ما ود الزبير بتاع زمان
    اعاد الله لنا مصطفانا ولحدى هنا كفانا ..

  26. افليقا
    اما عن التهاتر فارجع لراس مداخلتك التي تتحدث عن طق الحنك والبوبار وعن اعتقاد البعض بشخصنه المواضيع كنت اتمنى فيك الشجاعه وتسميه الاشياء باسمائها من هم هؤلاء البعض ومن الذي يمارس طق الحنك والبوبار الاسفيري
    من ناحيه تقييم النص ففد طلبت منذ البدء راي نيام
    وفيما يختص بهتك اعراض الناس والطلب من استرايكر حذف تلك المداخله
    اتساءل لماذا لم يري احد سوء في قول شمباتي في بوست د عبدالهادي ان نساء وبنات المسئولين من زبائن ذلك الدكتور
    الم تكن تلك اعراض ناس برضو
    ختاما
    لا للشخصنه نعم للحوار وليت قومي يعلمون حقيقه الصراع القادم من ما يسمى باهل الهامش

  27. ياسين شمباتى قال:

    قلتو وقلتو وبقولو !
    \ودا كلامو هو قبل ما يسجنوهو,ياخوى انا متابع القصة دى من بدايتها,وحاشاى ان اهتك اعرض او اقذف محصنىة….

  28. شمباتي
    يعني لو هو صرح بكده يبقي عادي ممكن نتناقل اخبار الافك ونساعد في نشرها ونحتفي بها كمان
    المهم يا دوك
    الكراهيه المنبعثه من هذه المدونه تجاه النظام اصبحت لا تطاق والواضح ان ايامي هنا اصبحت معدوده حفاظا على ما تبقي من اواصر صداقه فالتستمعوا فقط بسماع صدى اصواتكم والسلام

  29. AFLAIGA قال:

    ود الزبير :
    بمناسبة طق الحنك ادينى موضوع قريب فى المدونه الناس مرقت منو بفايده لقد اصبحنا نكتب لبعضنا وفى بعضنا وكانه منتدى شات والراى ده راى ناس كتار .
    اما كلام شمباتى عن بنات مسئولين فانا لم اقراه ولو قراته على الاقل ما جاب اسماء زى ما انت جبت .
    بعدين كراهية نظام شنو البقت سمة المدونه طيب ما جبرا كل يوم بيكتب منتقد النظام والناس بتعلق بانتقاد اكبر من كلامو ليه ما قلت الكلام ده بى هناك ولا عشان ده جبرا ؟؟
    ود الزبير عليك الله الغضبة حقتك خليها فى الله مش ناس النظام بيقولو كده برضو ؟؟
    تعرف اعتى كبار النظام لى يسيئ لياسر او الحلو او عقار كما اسات انت لهم حديثك لا يشبه النظام الذى تدافع عنه ولست اعلم منا بخطاب الانقاذ الاعلامى انت مستثار فقط بمنبر الخراب الشامل وما يروجه لانو ده ما كان رايك زمان اما الدفاع عن الوطن كوطن وليس حزب فدا حديث ليه مقام تانى وفى ناس ادو الوطن ده من جسمم وزمنم واهلم وبرضو رايم زى راينا لانو ما يصح الا الصحيح .
    فى بعض الاحيان احس انك تكتب ليقرا شخص معين ما تكتب ( ان بعد الظن اثم ) كراهية النظام ليس مكانها هذا المنبر هذا المنبر لكراهية الظلم والفساد والظواهر السالبه .

  30. AFLAIGA قال:

    ود الزبير ثرو كل الشباب :
    وعشان تعرف انو السودان بدت تظهر فيهو مبادئ ما حقتنا تؤكد ان بعض هؤلاء ( لا حظ بعض دى ) ينطبق عليهم قول ( من اين اتى هؤلاء ) اقرا المقال لضياء الدين : وقس على ذلك ان ياسر او غيره لا يمنعهم كرهك لهم من سودانيتهم وحقوقهم فى السودان كمواطنين على الاقل ان لم يكن سياسيين :
    أذكر ذلك جيداً بعد أيام من هجوم دكتور/خليل إبراهيم على أم درمان عرفت على وجه الصدفة أن أسرته بكل أفرادها تقيم بالخرطوم بمنطقة (عد حسين)،زوجته وبناته وبعض أهله الأقربين.
    وقتها وجهت الزميلة العزيزة أميرة الحبر- المقيمة حالياً ببريطانيا- بتسجيل زيارة لهذه الأسرة. ورغم توجس أسرة خليل من إجراء المقابلة والظهور أمام أجهزة الإعلام وخوفها من أن يكون وراء العمل الصحفي أجندة أمنية لكن الأسرة وافقت أخيراً، وتم عمل التحقيق الصحفي.. الذي وردت فيه معلومات عن أسرة خليل.. عن ابنته التي تدرس بالجامعة وزوجته التي لها علاقات واسعة مع نساء الحي.
    بكل تأكيد، المشهد كان مثيراً لدهشة غير السودانيين، رجل يقود عمل مسلح ويهاجم المدينة التي بها أسرته التي لا يخشى عليها من انتقام الحاكمين أو المتعاطفين معهم أو المتضررين من الهجوم. والأسرة آمنة في سربها لا تخشى على نفسها وهي تحتمي بمجتمع لا يؤخذ فيه شخص بجريرة آخر… هذه قيمة تسامحية لا تجدها إلا في السودان.
    الذين يحملون السلاح ضد دولهم لا يطلقون الرصاصة الاولى إلا بعد خروج آخر قريب لهم من تحت ظل الحكومة التي يستهدفون إسقاطها.

    قبل أيام قمت بتكليف الزميلة المبدعة / رفيدة يس بمقابلة ابنة عقار الموجودة بالخرطوم والتي تعمل بشرطة السودان وتحرص على مواصلة عملها باعتبارها شخصاً مستقلاً عن والدها ولا تجد في نفسها حرجاً من الاستمرار في وضعها الوظيفي والإقامة بالخرطوم بغض النظر عما يحدث بالكرمك وقيسان وما ينطلق من نيران صديقة أو معادية.
    ولكن كانت المفاجأة بالنسبة لي أن رفيدة جاءت بخبر يقول إن الجهات المختصة وضعت يدها على ممتلكات “لينا مالك عقار” ابنة والي النيل الازرق المقال.. الممتلكات المتمثلة في منزل بأركويت وقاعة بأحد الأبراج الشهيرة وسيارة همر.
    وأضاف الخبر أن ابنة عقار التي تعمل بإدارة جوازات الاجانب بالشرطة برتبة ملازم أول ربما تحال إلى التقاعد بسبب تمرد والدها!!
    بصحة الخبر وعدم نفيه من الجهات المختصة، لا أعتقد أن هناك ما يبرر هذه الخطوات وهي تسجل سابقة غير حميدة في تاريخ الممارسة السياسية في السودان.
    قيمة أخلاقية ودينية رفيعة أن تحمي الدولة أسر من يحملون في وجهها السلاح، وتصون أرواحهم وأموالهم وأعراضهم ولا تؤاخذهم بفعل آبائهم .
    الحرب مساحتها ميدان القتال ويجب ألا تتسلل حوائط الاسر .على مالك وجنوده دفع فواتير خياراتهم العسكرية، وعلى الجيش السوداني أن يحمي الوطن بكل مالديه من قوة، كل شخص لم يحمل السلاح في وجه الدولة ولم يجلس لها على مراصد الكيد يجب أن يكون آمناً على نفسه وماله وعرضه، بغض النظر عن علاقاته الأسرية بالآخرين بمالك عقار اير أو بحيي بن أخطب سيد قريظة والنضير!!
    فتذكر السيرة النبوية كيف تعامل الرسول صلى الله عليه وسلم مع صفية بنت حيي بن أخطب زعيم يهود قريظة بعد معركة خيبر حيث أكرمها وأعتقها من الأسر وأكرمها بالزواج.
    وفي الأعراف السودانية تتناقل حكاوي التسامح في مناطق الدينكا والمسيرية كيف أن أبناء بابو نمر الذين في عهدة دينق مجوك وأبناء دينق مجوك الذين في كنف بأبو نمر لم يكن يلحق بهم ضرر في حالات اندلاع القتال بين الدينكا والمسيرية.
    أتمنى أن يكون خبر مصادرة ممتلكات ابنة عقار غير صحيح وأن تصدر الجهات المختصة ما ينفي الخبر أو يوضح ما حدث. وإن كانت هناك جهة اتخذت هذه الخطوة المتنافية مع الدين القويم والعرف السليم، فعلى قيادة الدولة ممثلة في السيد رئيس الجمهورية المشير عمر البشير أن يصدر قراراً بإعادة ممتلكات ابنة عقار وأن يضمن لها الاستمرار في الخدمة طالما أنها راغبة في ذلك،الأوطان تحمى بالعدل قبل أجهزة الأمن.

  31. افليقا
    هسه بالله الموضوع القيم بتاع ابكرون حق الجزر السودانيه طلع طق حنك ساكت والمواضيع الفلسفيه بتاعت قرن شطه برضو طلعت طق حنك واجتهادات د عزت لابقاء الجزوه مشتعله طلعت ونسه وشات ساكت
    اها كان كده المفروض تاني الحاجات ما تنشر مباشره ولازم نكون لجنه لمراجعه المواضيع وبعد كده تنشر
    مالك يا افليقا صعبتها كده
    من زمن القمردينه ياهو ده الحال موضوع ثم يتشعب النقاش نبدا بحمد ونطلع بخوجلي شنو شابكني مافي فايده والمدونه بقت شات وطق حنك والمواضيع مافيها فايده
    كويس الزول ليهو زمن ما كتب حاجه والا كان صنفته من اسباب تدهور الموقع
    خلينا نحصر النقاش في اصرار البعض العزف على وتر اصبح ممل ومكرر الحكومه كعبه الحكومه كعبه
    خلاص عرفناها كعبه وليها كم وعشرين سنه كعبه
    نرجع لموضوعنا وهو عقار والحلو وعرمان
    في اكثر من موضع وضحت ليك شكل الصراع القادم
    وشايفك عامل رايح
    وما داير تناقش جزئيه الاثنيات وصراع الهامش والمركز
    لن نمكن عرمان وزمرته من رقابنا
    والجيش بحمد الله يتقدم في محاور النيل الازرق وجنوب كردفان وقريبا لن يكون لهؤلاء الخونه ملجا الا دوله الجنوب حيث ينتمون

    اعتذر لابكرون وقرن شطه ود عزت لاقحام اسمائهم هنا لكن كان لا بد من ضرب امثله لايصال الفكره

  32. افليقا
    ياخي انت بقيت ما متابع نهائي
    لينا مالك عقار ناس ضياء الدين عملو معاها لقاء صحفي وقالت مافي زول اتعرض ليها وانها موصله شغلها في شرطه الجمارك ومقيمه في منزل الاسره باركويت وناس الامن شالوا ورق ببت تاني يملكه عقار وشالوها من وكيل البيت ما منها وعربيتها عندها ولم تصادر والعربه المحجوزه وهي همر بالمناسبه حقت ابوها ولحدي الليله مافي زول اعتقلها او اساء اليها بشئ
    وطبعا ده شئ طبيعي حيث لا ذنب لها فيما يفعله ابوها حتى يثبت العكس

  33. AFLAIGA قال:

    ود الزبير : المواضيع الانت ذكرتها دى شوف تواريخا متين ؟؟ حتى لو كانت قريبه فراجع بعض الموضوعات الاخرى اما مواضيع قرن شطه فدى انت ولا قاعد تعلق فيها وانا شخصيا معجب بيها جدا وبينى وبين قرن شطه الكثير من التعليقات اما ابكرون ومواضيعو بتاعة الجزر فانا اول من دعا ابكرون ذاتو لافتتاح موقع عن الاستراتيجيات وهو رفض وما ذلك الا للاعجابى وليس تقييمى فلست انا من اقيم ابكرون وقد اوضحت ان كثير من مواضيع ابكرون كانت اجندة لاجتماعات سيادية فى مجال الامن والدفاع بعدين ما شايف انك حشدت كميه من الاسماء زى ياسر برضو ؟؟ !!
    لو مريت على د عزت وغيرو حاكون برد على ردك سطر سطر ز
    بعدين القال ليك الانقاذ كعبه بالنص منو ؟؟ نحنا بننتقد سياسيات وتصرفات ناس فيها
    انا قلت اكثر من مره هنا فى هذا الموقع :
    الفساد ليس سياسة انقاذية
    المحسوبية ليست سياسة انقاذية
    هناك من تسلق ظهر الانقاذ ( كما هناك من يحاول التسلق بعد فوات الاوان !! )

  34. ساحاول تجاوز التلميح السخيف الاخير الموجود بين الاقواس كما تجاوزت تلميح اسخف في نفس هذا البوست
    طيب يا افليقا طالما ابكرون وقرن شطه وعزت ما من ناس طق الحنك حقو تفصل لينا شويه في الحته وبالمره ادينا تاريخ هبوط المدونه وكيفيه رفع مستواها حتى تتناسب مع مقامكم
    ولو كمان حددوا لينا نكتب شنو يكون تمام
    يعني السبت ثقافه الاحد كوره الجمعه دين الخميس فن الثلاثاء طب وهكذا

  35. ياسين شمباتى قال:

    ود الزبير..
    ومالو كان بقى لكره النظام او الحزب !؟؟ ما هداااك منبر السلام العادل موجه لكل ما هو قبيح فى حق الوطن وعاجبكم وسارى بالكم!
    يا عزيزى كلنا سودانيون واخوة والبينا لا يفسده اختلاف الراى…فعليك الله اقعد فى الواطا دى واتحمل الشوى دا ! آيييييي

  36. AFLAIGA قال:

    ود الزبير : طبعا لو افتكرت انو التلميح الاخير البين القوسين ده ليك اول شيئ بتكون اكدتو وبقيت تحسب كل صيحة عليك مع انو حاشاك ذلك وتانى شيئ انا اكثر الناس معرفة بان الانقاذ جاءتك على طبق من ذهب حين كانت تاتى الناس ولا انت نسيت ؟؟ بعدين قصة نكتب شنو دى ما بتشبهنا لانو السياسة هنا كانت زمان لو بتتذكر ايام الوصفه السحرية للعم سنكل التجاهل فقط .. عشان كده قلنا ليك قول للزمتان ارجع يا زمان ولو عاوز نجيب ليك بوستات وتعليقات زمان نجيبا ليك من الموجود حتى المشى الخور لو بتتذكر الخور ؟؟؟
    صديقى ود الزبير ما زلت اعتقد ان شيطانا مثل شيطان التفاصيل بتاع الهالك قرنق !!! خش بيننا ولو قاصد تنعشو حبابك ولو قاصد تنعلو حبابك .. اتمنى انو ده يكون اخر رد لى لو بقى اخر رد ليك مع ملخص قوامه :
    لم نصنفك
    لم نشن حملة على الانقاذ فلسنا من معارضيها
    لم نتهم شخصك الكريم ولا يسعنا ذلك فانت ممن نحب
    لو كده ما كفاك ورينا انت قاعد وين نجى نبوس راسك ..اها تانى فى كلام

  37. افليقا
    جمله الهالك قرنق ده بتوري اننا متفقين في العموميات
    الباقي هين
    لكن قفل باب النقاش ما حبابه
    عايزين نناقش الحرب القادمه والتي اصر انها حرب على اساس السحنه والجهه واحسب ان دعوه الشماليين لحمل السلاح واجب على كل شخص حتى لا نفاجا باثنين اسود جديد

  38. AFLAIGA قال:

    شمباتى : بالله مش ياسر ده هو فى البوست السغنتوتى ده بدا يفرقنا طيب فى السودان حيسوى شنو ؟؟ هههه ياسر سرو باتع !!
    خش ليهو بوست واحد دور حرب كلامية شكيتك لى الله يا ياسر يا ود عرمان دى ما كانت قصيده دى !! اها القصيده شينه شناة دواخل ياسر وركيكة ركاكة فهم ياسر وعربيها تعبان تعب عربى ياسر وعلمانية علمانية ياسر افول ليك دى ما قصيده ذاتو هههههههههههههههههه
    ود الزبير : شئت ام ابيت وبغض النظر عن الكاتب :
    الابيات او النثر اعلاه يعبر بصدق شديد عن سودانوية كاتبها وان كان يهوديا يحمل الجنسية السودانية .
    اللهم اذا دخل فى قوله تعالى فيما معناه :
    وان يقولو تسمع لقولهم – ويعجبك قولهم – وهم خشب مسنده

  39. AFLAIGA قال:

    ود الزبير : الحرب على السحنات دى بتستوجب حاجات كتيره اهمها تعريف المركز والهامش وتعريف الهوية السودانية وعدد من الاسئلة اهمها :
    هل الانقاذ هى النظام الامثل لاعادة تكوين السودان ؟
    هل الانقاذ هى ثابت ام متحول فى مواجهة تكوين الدوله ؟
    ما هو معيار الامن القومى السودانى وعليه ما هو معيار الخيانه الوطنيه ؟؟
    هل حرب الهامش هى حرب سحنات ام حرب سياسية يستخدم فيها الهامش السحنات كمعادل موضوعى للنضال ؟
    علام يرتكز المركز فى حربه على الهامش المتمرد ؟
    هل كل الهامش متمرد ؟؟
    معركة امدرمان هل كانت ستجر الى تطهير عرقى ضد العرب ؟؟
    الاثنين الاسود هل كان موجها ضد سلطة الانقاذ ام الجنس العربى ؟
    ما هو تعريف الجنس العربى ؟؟
    ما هو نظام الحكم الامثل للسودان ؟؟
    هل يجب ان ننفصل لنتحد ؟؟
    لماذا تمرد الهامش هل من اجل الحقوق ام لانتفاء اساس التعايش مع المركز ؟؟
    هل لجوء الهامش فى حربه ضد المركز لاعداء مثل اسرائيل بسبب الحوجه ام انتفاء الوطنيه ام الرغبه فى العوده للممالك القديمه المسيحى والوثنى منها والمرتبط باليهود ؟؟
    بعد داك ممكن نعرف من عدونا منو ونجهز ليهو ولا تنس مقولة اعرف عدوك ؟؟

  40. ياسين شمباتى قال:

    افلى ..
    ما براحة ياخ !!

  41. افليقا
    اسئله فيصل القاسم الكتيره دي ما عندي معاها شغله
    لكن لو لحدي هسه ما عارف الاتنين الاسود كان موجه ضد منو؟ تبقي مصيبه!

  42. ود المهدي قال:

    يا افليقيا : الانقاذ نظام ظالم وليس موهل ان يقود السودان وهو السبب في فصل الجنوب وح يكون السبب في تقطيع باقي الاطراف الي ان يصبح السودان من الخرطوم الي شندي بس – كما ن قرنق وياسر وكل من لف لفهم شاركو في ذلك ومنهم من قضي-هلك- ومنهم من هو علي الدرب – وليس فيهم حسن ولا مستقبل لهذا البلد وربنا يكفينا شرهم ويجعل كيدهم في نحرهم وبرمي الظالميين بالظالميين ويخرجنا منهم سالميين-
    ياسر سوداني ومن حقو يكتب في حب الوطن لكن لازم الكتابة تكون بتشبه العمل والا تكون نفاق او زر الرماد في العيون
    وكذلك اي زول ممكن يكتب اي كلام ويسمية قصيدة او شعر او اي كلام واي زول ممكن ينتقد هذا الكلام حسب وجهة نظرو وحسب رؤيتو – وهذا لا يفسد القصيدة اذا كانت هي قصيدة ولكن يوضح الفكرة ووجهات النظر المختلفة لاتيفسد ما بيننا من ود وعلاقة –

  43. alfath قال:

    السلام عليكم.. والله لحم الراس ده حيرنا عديل كده ده يقول ليك صراع بين مركز وهامش وده يقول ليك صراع بين عرب وافارقه وده يقول ليك اسلامي وعلماني؟كلهم سياسين حراميه .والله الشعب ده غفلان ساي ماكلين حقو /اماقصيدة عرمان تفيد شنو؟السياسين ديل الواحد يجري يمين وشمال من الثانوية بي بنطلونو الواحد ويكضب للناس نحن كده ونحن كده ده كلو عشان كبار الحرامية في المؤسسة الاسمها (حزب) يرقوهو .اها بعد فتر ه يبقي مسؤل كبير راكب عربية بي نصف مليار وحرس وخدم وحاشية ومطبلين وابواق.تنفخ في الفارقة مركز وهامش واسلامي وعلماني ..بالله فكونا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s