السيسى مناوى 2 ام سلفا 2 ام عقار 2 ؟؟

Posted: الإثنين,19 سبتمبر, 2011 by aflaiga in اخرى

قبل ان تطا قدما الدكتور التجانى السيسي ارض الوطن دعونا نقرا :
الخبر من موقع العدل والمساواخ :
نيالا – صدى الاحداث : هاجمت مجموعة مسلحة تابعة لحركة التحرير والعدالة جناح الدوحة بزعامة الدكتور التجاني سيسي معسكر كلمة للنازحين في نيالا ولاية جنوب دارفور , واطلقت وابل من النار على مربع (3) وذلك في الساعة الواحدة فجر الاحد ، وادى اطلاق النار لفرار بعض النازحين من منازلهم واثارة الرعب والخوف لدى سكان المربع.
وقال شهود ان المجموعة المسلحة تتبع لمجموعة الدوحة بقيادة الدكتور السيسي , وان هذا الهجوم يعتبر مقدمة لتهديدات تلقاها بعض النازحين الذين يرفضون الاتفاق الذي وقع بالدوحة،واضاف نازح من معسكر كلمة ل(صدى الاحداث) ان مخطط الهجوم على معسكر كلمة هو مخطط جديد قديم ونحن كنازحين لم نفاجأ به لأن هذه المجموعة بدأت ترسل تهديداتها لنا بأن ننخرط في الحركة كجنود والا سيتصرفون معنا ونعتقد ان التصرف الذي عنوه هو استهداف الابرياء.
ويجيء هذا التطور الخطير بعد ايام من تقارير اشارت الى ان مجموعة السيسي تجند النازحين قسرا لتكمل عملية الترتيبات الامنية مع الحكومة واشارت الاخيرة في برقية مسربة ان حركة التحرير والعدالة ليست لها اي جيش في الارض وهي الان تجند النازحين ولا بد من وقف هذا العمل.

اها يا جماعة الخير الدكتور مستقبلو حيكون مناوى 2 ولا سلفا 2 ولا عقار 2 ولا عرمان 2 ولا شنو ؟؟
سمعت من ملمين بملف دارفور ان الدكتور شخص متفق عليه ومن الحكمه بمكان ليخرج دارفور من ازمتها .
اها انتو شايفين شنو ؟؟

تعليقات
  1. عبدالرحمن أحمد قال:

    أفليقا نهارك سعيد
    وثيقة الدوحة ولدت ميتة وبالمقارنة بين أبوجا والدوحة نجد أن الأخيرة إعادة إنتاج للأولى بسيناريو أسوأ
    أما موضوع الحكمة دا فقد انتفى بمجرد التوقيع على الوثيقة المبتورة. فمصير الدكتور سيكون كسلفه أو يقبل التدجين.
    المهم.. المتضرر الأول والأخير هم النازحين واللاجئين ومواطني الإقليم وخزينة الدولة وعليه الشعب عامة

  2. AFLAIGA قال:

    الاكرم عبد الرحمن :
    شاكر لمرورك الراقى .
    وزى ما قلت الخاسر هو شعب الاقليم وشعب السودان وشعبى فى المعسكرات ( كما يحلو لعبد الواحد القول ) ..
    لكن الا ترى ان قطر بكل حنكتها وتجاربها لن تتدخل نفسها فى ولادة اتفاقية ميته فى رحم الام ؟؟؟

  3. زووووووول قال:

    افليقا وعبدوز سلام
    وثيقة الدوحه ولدت ميته وقبلها ولدت وثيقة ابوجا فى شهرها الثامن فلم تقو على الحياة…. مشكلة دارفور لن تحل الا بالتوقيع والمصالحه مع اللاعبين الاساسيين واعنى تحديدا الدكتور خليل ابراهيم وعبد الواحد محمد نور لو امكن ذلك والا فان الاتفاق مع خليل وهو اقرب من عبد الواحد ـــــ نظرا لخلفية الرجل الاسلاميه.ــــــ كفيل ببسط الامن والطمأنينه فى تلك الربوع العزيزه جدا من وطننا الذى تبقى بعد كارثة نيفاشا .
    الاتفاق مع منى والسيسى يشابه تماما ان يقوم فريق يعتمد على شراء الذمم ومساعادات الحكام!!!! بشراء لاعب او اثنين يجلسان على دكة بدلاء الفريق المنافس .
    وفى حالة تعذر الاتفاق مع المتمردين المذكورين اعلاه يمكن للحكومه ان تبسط هيبة الدوله بتبنى خيار التنميه فى ذلك الاقليم وطرد المنظمات الكنسيه والغربيه العامله هناك وبسط يد الجيش ان دعى الداعى حتى لا نبك على دارفور المسلمه كما بكينا على الاستوائيه وبحر الغزال واعالى النيل ولان دارفورهى الاقرب من الجنوب بحكم عوامل الدين واللغه والادب والفن وحتى العادات والتقاليد وقد عشت اياما فى مدينة الجنينه حاضرة غرب دارفور كنت احس فيهاو كاننى فى الخرطوم او مدنى او عطبره ….
    اللهم احفظ بلادنا … اللهم امنا من الخوف واطعمنا من الجوع

  4. AFLAIGA قال:

    زوول : لا فضفوك اوجزت فابنت .شكرا على المرور .

  5. دكتور التجاني السيسي وجماعته هم من صنعوا ازمه دارفور وكانوا الرحم الطي فرخ كل تلك الحركات فعليه الاتفاق معه ربما يسهم في حل المشكله ولو اني كنت اتمنى منحه منصب نائب الرئيس بدلا عن الحاج ادم وذلك لمد حبل الثقه

  6. AFLAIGA قال:

    ود الزبير : مشكور على المرور الراقى يا راقى .
    التقييم للاشخاص فى المعادلة السياسية السودانية اصبح ينبنى على عدة مقومات :
    الوزن القبلى
    القوات فى الميدان ومدى تاثيرها على الامن فى الاقليم
    العلاقات الخارجية مع الجهات الضاغطة على النظام
    الوزن السياسى
    دكتور السيسى لا يملك سوى واحدة ونصف من هذه المقومات وناسك ديل بيحكمو بالمقومات الاهم اولا ثم بعد داك المقومات التانية .
    انا ايضا كنت اتمنى منحه منصب النائب لنرى كيف سيحل مشكلة دارفور
    مع انو اى زول ادوهو نائب حل مشكلة نفسو بس هههههههههه

  7. زووووووول قال:

    التجانى السيسى لم نسمع به قبل التوقيع على وثيقة الدوحه ولا نجزم بانه فرخ الحركات ولا نعتقد بانه قادر على مثل هذه الاشياء فالرجل ان لم تخنى ذاكرتى كان ينتمى لحزب الامه وعندما طمع فى الوزارة سلك طريقها لكن كرته اصتدمت بعارضة تعيين الحاج ادم نائبا للرئيس وهو الاجدر والاحق بالمنصب سواء كان التعيين على اساس جهوى او على اساس الكفاءه والخبره او على اى اساس لكن عزاء السيسى انه سيظفر بموقع مرموق فى القصر ويستفيد من هبات وعطايا وعربات وبيوت الدوله وسيهرب طال الزمن او قصر باموال السلطه الانتقاليه كما فعل كبير مساعدى الرئيس …. هؤلاء هم اس المشكله واساسها يا صديقى ود الزبير من يوقعون اتفاقيات مع الحكومه لتولى بعض المناصب بعد قتل بضعة او مئات الاشخاص الذين يروح دمهم هدرا بعد دخول المتمرد الى القصر الجمهورى والا قل لى كبف فلت منى من العقاب وهو من عاث فسادا فى دارفور وكيف ستروح ارواح اخوتنا الذى قضوا فى احداث ام درمان لو توصلت الحكومه لاتفاق مع خليل ابراهيم؟؟ … المشكله ان الشعب مغيب تماما عن مثل هذه الاتفاقيات وهو المعنى بها اولا واخيرا …….. وربك يسهل علينا

  8. AFLAIGA قال:

    زووول : والله انت راجل كلس والشعب هاميك اكتر من قفة ملاح العيال . الرجل ربما يصبح مساعد للرئيس ويبدو يتشاكسو هو والحاج ادم كل زول عاوز يحكم دارفور بفهمو فى النهاية حيلقو مافى فايده واى زول حيشوف مخصصاتو وين وعرباتو وين زى ما قلت ويمكن برضو يلحق مناوى وتانى تانى تانى تانى رجعنا تانى .
    وشعبى فى المعسكرات هو المتضرر ..
    انت صحى ضحايا معركة امدرمان ديل حيخلوهم بندنق كده لحدى ما يجى خليل زى قضية الاقرع مع عرمان . اتفقنا اقفل القضية اختلفنا نشط القضية ؟؟؟ مسكين شعبى حتى دماؤك دخلت السوق !!

  9. زووووووول قال:

    افليقا سلااام
    الله يجعلنا كلسين يا اخ
    لكن بصراحه انا موجعانى الحركه … ال بعملوها ناس منى مع الحكومه وتعوضنا ليهم بالسيسى وبعد السيسى يفك بيرقو ويعمل ليهو قرش قرشين حلوين يجى ناطى لينا واحد تانى ..
    وموجعنى المؤتمر …. ال عملوهو ناس قطر فى الدوحه وكلفوا خزينتنا مخصصات ووظائف للسيسى
    وموجعنى العدل ………. ال كل من هب ودب شال ليهو كلاشين ودخل بيهم الصحراء وكتل ليهو شوية ناس يجى يتلصق فيهو واحدين لموهو مع المساواه وواحدين ختوهو مع الحريه
    كسره : موش دى حاجات بتوجع يا افليقا ؟؟؟ معليش يا اخينا بريناك

  10. AFLAIGA قال:

    زووول : انتى تبرا من الالم ..ههه شفت التورية دى كيف ؟؟
    والله البيوجع كتير ومسيخ لكن الوجع الاساسى لو زال ما بيكون فى وجع تانى عارفينو شنو ؟؟؟ اوعكم تمشو بعيد ما الانقاذ بل هو درب الله الفكيناهو ..

  11. حاج أحمد السلاوى قال:

    أبو الأفاليق .. سلالالالالالالالالالالالام..
    كل الإتفاقيات كانت للإستهلاك المحلى ن جانب أمنا الحكومة وتخدير لكل الأطراف .. وعينهم للفيل يطعنوا فى ضلو ..
    لا التيجانى سيىسى ولا أم سيسى ولا مناوى عندهم أثر عشان يحلو مشكلة دارفور ..
    وتعيين المطلوب أمنياً ( سابقاً) الدكتور الحاج آدم لحد حسه ما فى زول فاهم المقصود منو شنو رغم التبريرات والتوضيحات الصادرة من رئاسة الجمهورية ..
    سؤال سغيروووووونى كدا ( زى كل مرة ) إنتو البلد دى ما فيها زول بيفهم وبيعرف سياسة غير الجماعة ديل ؟؟؟؟

  12. ود المهدي قال:

    ياحاج احمد البلد مليانا فهم لكن الولاء قبل الفهم – اذا فهمت غير المطلوب فانت مشطوب واذا رضيت بالموجود فانت فاهم واذا فهمت غير الموجود فانت ما فاهم وممكن تتشال برا في رمشة عين – بعدين يا حاج القصة ما دايرا فهم – الناس ديل يفكو اللعب شوية ويدونا معاهم من الكيكة قطعة – يعني التقسيم يكون بالعدل وكل زول ياخد حقو من البترول والدهب والحاجات التانية ودا ممكن يحل كل المشاكل ونعيش في سبات ونبات ونخلف بنين وبنات

  13. عبدالرحمن أحمد قال:

    /لكن الا ترى ان قطر بكل حنكتها وتجاربها لن تتدخل نفسها فى ولادة اتفاقية ميته فى رحم الام ؟؟؟/

    أفليقا
    ياهو دا المحير بوبي شخصيا … شفت كيف؟

    الجماعة قال ليك قاعدين في قطر شهورا عددا واستقدموا العواطفات وسكنوا اجنحة الفنادق حتى إذا انجبن كانت اسماء المواليد من شاكلة (موزة) (حمد) والعائلة المالكة في دوحة القطريين
    دحين يا خوي أي زول (بواو واحدة طبعن) في الجماعة ديل زي بعض كان هلال او مريخ شايتين الكورة فووووووق وما يهمهم التهديف لصالح الوطن .الله يولي البفهم

  14. AFLAIGA قال:

    عبد الرحمن :
    امبارح شاهدت احتاء وفد المقدمه فى ( دارالوطنى بدارفور ) وسمعت كلام احمد عبد الشافع وكان كلام مليان وبيبشر بى حل قريب للازمة وما كان شكل الزولانو بيتكلم كلام اكبر من امكاناتو ولا خلاس اتعلم كلام السياسة وبقى يوعد بى قلب قوى واليد قصيره ؟؟؟
    بعدين برضو الحركات المتمرده التانيه ( خليل – شعب واحد ) رايا انو الحركة الموقعه ما عندها اى قوة فى دارفور لا سياسية ولا عسكرية .
    يعنى عبد الواحد يقول شعبى فى المعسكرات
    وعبد الشافع يقول شعبى فى المعسكرات
    وخليل يقول شعبنا فى المعسكرات
    غايتو يا اما الناس الفى المعسكرات ديل شعب الناس ديل كلهم ولا كمان الناس ديل ما عندهم اى شعب كدى افتينا يا عبد الرحمن فى القصه دى :
    شعب المعسكرات عاوز منو ؟؟
    هل اصبح الانتماء من داخل المعسكرات للقبيله ام الحركه ام الاقليم ؟؟
    وكل اتفاق يوقع ما تاثيره على شعب المعسكرات ؟؟
    والى متى يكون الشعب فى المعسكرات ؟؟
    والقصه دى حدها وين ؟؟

  15. عبدالرحمن أحمد قال:

    تعرف يا الحبيب، شعب المعسكرات كفر بكل هؤلاء .. داير يرجع أراضيه ويعيش زي زمان يزرع زراعته ويرعى غنيماته لا أكتر ولا أقل .. لكن البقنع الديك منو؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s