ما بين عضارة المحلية وتفتيحة بلة ود عشة

Posted: الثلاثاء,4 أكتوبر, 2011 by عزت in اخرى

يوصم الزول بالعضارة عندما يكون لديه عيب خلقي أو نفسي أو اجتماعي ينتقص من قدراته التي حبى الله بها أعظم مخلوقاته الا وهو الانسان… فبالطبع الشخص (العضير) له مكانته في المجتمع وكم من (عضير) عوض عن النقص الذي عنده وقويت باقي احاسيسه أو قدراته وصار عبقريا في نواحي أخرى وما (طه حسين) الا مثالا للرجل فاقد البصر والذي عمل ما لم يقدر عليه الكثير من المفتحين و(مفنجلين عيونهم).. ما أختلفنا…. ألا أن كلمة (عضير) دائما ما تثير انتباهي فهي من نوع الكلمات التي تعبر وبصورة كبيرة عن معناها فهي بليغة جدا… فما تسمعها الا ويأتيك معناها واضحا بغير لبس وتظل دالة على الشخص الناقص أو الفعل النص كم… وقد بت أسمعها كثيرا وبتحوير ليس ببعيد من معناها وبالذات في شلة (الكتشينة) فهي تطلق على من (عرّج) بدون أي داعي أو من سمى الجوكر في غير مكانه أو غيرها من الأفعال التي ترتد على الشخص وبالا كأن تخرجه من المنافسة مبكرا أو (يجرووهو خمسين) فبتنا نسمع (بالله شوف العضير دا عمل شنو؟)…

 فلتعذرني شلة الكتشينة… ياخي (عضيركم) دا العمل ليهو حاجة مما ذكر فوق وطلع من المنافسة أصلو ما مشكلة…. فقد ترتد عليه (عضارته) لوحده أو على زميله أن كانوا زملانا… فسوف يتعلم مستقبلا حيث يمكنه اصلاح أفعاله مستقبلا و(تديهو الكتشينة) لأنه أحسن لعبها…. لكن ما بالكم فيمن يعمل فعلا (عضيرا) يكون وبالا على الكافة….. ويكتوي بهذا الفعل العديد من الناس وقد يصعب جدا اصلاح غلطته وتظل تلك الغلطة أو الفعل الشائن وما يترتب عليه شاهدا على سؤ فعلته لأجيال قادمة….

 وهنا طبعا عندنا أمثلة بالكوم ووووووين…. ما أكيد من (العضرا المسئولين بتاعين الحكومة)…..غايتو صبركم علي ففي كل مرة سنتعرض على فكرا أو فعلا (عضيرا) نكد علينا عيشتنا وزاد الطين بله…

مررت بمحلية الخرطوم يوم الجمعة الماضي فتحسرت على كمية الركشات التي كانت تقف داخل السور الخارجي للمحلية وعلى أسيادها البيكونو سفو التراب نتجة لمصادرة (ركشاتهم) ووضعها كمعروضات داخل حوش المحلية توطئة لمحاكمتهم… هم قايلين الحكاية سايبة أي واحد لمان ما يلقي شغل يقوم يدخل صندوق ويشتري ركشة…. ويركب ليها ساوندسيستم وام بي ثري وهاك يا غنا وزوغان من بوليس الحركة شان ما يقبضوا ويغرموا ويركّب في البنات السمحات واحدات جنبو وواحدات ورا وكمان جابت ليها غنا ليهو…

فقد جاء في الأثر أن (بلّة ود عشة) لما ما لقى طريقة يشتغل بيها بعد أن تخرج في احدى (جامعات الفكّة) اشترت له (عشة) والدته ركشة عشان يطلّع مصاريفه ومصاريف البيت لمّن ألله يفرجا… ولما كان (بلّة) ولد قياااافه وشايف روحه أكيد برضو البنات شافنّو وقعدو يغنّو ليهو….

بله يا بلّه وينو بلّه

بله ود عشة

سايق الركشة

وينو بلّه

واستمروا في مشاغلتهم دي بكلمات الغزل والتشجيع والتي أكيد حتكبر راسو ويقوم ينسى حكاية التوظيف دي ويستمر (سايق الركشة)…… وينو (بلّه)….

لم أستمر في خواطري كثيرا قبل أن ينبهني (أخي) الذي كان يركب بالقرب مني عند المرور بالقرب من المحلية…

(ياخي انت ما شايف الركشات دي كاتبين فيها شنو؟)

فلما دققت النظر وجدت خطا خجولا بالجنبة كدا كاتبين (تحصيل)…!!

يعني المحلية قامت شاركت ناس (بلّة) واشترت ركشات شان تطارد بيها فلول التجار وستات الشاي والفرّاشة… أمانه ما تفتيحة ناس المحلية ديل …. يعني بواسطة هذه الركشات يستطيع موظف الجبايات مطاردة هذه الفلول حارة حارة وزنقة زنقة….

وتزيد المحلية أرتال السيارات والركشات الماشة في الشوارع وتعرض موظف الجباية لي خطر المهاجمة… يعني ح يقفل القروش وين مع الركشة المفتحة دي….

بالله ما عُضرا ناس المحلية ديل…!!

تعليقات
  1. طارق أب أحمد قال:

    لكن دى عبد المنتقم ما بالغ فوكا

  2. ود المهدي قال:

    يا دوك ناس الانقاذ ديل قاريين التاريخ كويس ومستفيديين منو للاخر وبالذات قانون الغاية تبرر الوسيلة – والماعجبو يخبط راسو في الحيط او يدخل الغابة وبرضو ح يوصلو ليه ويعملو معاهو حوار في الدوحة (هي مفروض تكون اسمها الدوخة بالخاء لانها دوختنا وفي الاخر ما فهمنا حاجة) ويدفعوا لية شوية كدة ولمن يكملو تاني يمشي الغابة –
    هسة ود الزبير يقول لي – شن دخل الحب في اللحمة.

  3. ابكرون قال:

    وبعدين يا كرام …يا السرة وإمام …ويا حليل مرطبات كزام…… عضير دي اصلا (عذير) وهو السخس المعذور تحولت الذاي الي ضاااد وادغمت العذرة في العضره وصارت غضير في محل نقص في التفكير او (البودنق وفي رواية اخري الشاسيه ) …….!
    قووووية والوانها ثابته ……!

  4. ودالمهدي
    حاشا ان اقول ذلك ده نقد بناء وهادف ومفيد لكن تقولوا لي الهلال اتغلب عشان الانقاذ كعبه بتبالغوا ياخي

    دوك عزت
    بالله اغش معاك العضير الجر الساعه وشتت خلانا مفارقين التوقيت العالمي والعضير الفكر في الرقم الوطني والعضير الفكر في نيفاشا زاتو

  5. عزت قال:

    الأحباب سلام
    غايتو يا أبكرون الكلمة عاجباني بلحيل وه في محل مسمى ووصف في محلو للجماعة العضرا بتاعين الحكومة الذين لا يشاورون:
    خد عندك مثلا هسة الشارع الماشي جوه النيل دا لازمتو شنو في بلد محتاجين لكل قرش لردم الهوة التي خلفتها نيفاشا وناسا العضرا ديل…. وبعدين ياخ أرخص تقوم تعمل شارع في البر والا في الموية وتتكلف حق علب وشفط موية وخفر سواحل عشان يلقطوا الناس البيقعو من جراء حوادث السير من النيل في هذا الشارع وكمان حتقوم بي كدا تعمل تداخل في ادارة الشارع هل يدير الشارع ناس المرور والا ناس النقل النهري وفي رواية أخرى ناس البيئة ما الشارع فيهو موية وخضرة ووجه حسن…

  6. عزت قال:

    هو لكين يا ود الزبير ما جرا الساعة عشان قاصد يخليكم مع السعودية لزم…. KSA ما لزوم البركة وكدا فضلا على أن الرقم الوطني حيسهل ليهم الجبايات ومتابعة المواطنين بالرادارات….

  7. ياسين شمباتى قال:

    الحبيب عزت…سلام..
    البوست دا اعجبنى وبشدة,,فلتسمح بالنقل والتتابع ولك الاجر باذن الله !!
    لكن انت قاصد بالعضير دى ؟؟ يعنى قصدك لو ادوهو (مشير عضير) ممكن يبقى رئيس!؟؟ وااااااااااااااى..

    بالنسبة للشارع الجوة البحر دا ,دا مقصود بيهو هدم وتهجير اهالى توتى ! اى والله,والكلام دا من مصدر موثووووووووووووووق…

  8. سكارنو قال:

    ود شمباتى , لك وللاخوة 2000 سلام
    بخصوص ( العضير ) الاول ، إنتصب الكل اجلالا له ، مصدقين عزيمته فى جلب انتصار (يبرد حشانا ) و (يفش غبيتنا ) ولكن ……. حشانا لم يبرد وتضاعفت غبينتنا ، وياشمباتى نقول شنو غير (خدعونا بقولهم حسناء ) …. لهم ولنا الله .
    بخصوص (العضير الثانى ) فهؤلاء تنطبق عليهم تماما (عضير) حقتك قبل تصويب الاخ ابكرون لها ، اللهى يبتليهم فردا فردا …… وتنطبق عذيرين على اصحاب الركشات بعد مصابهم بالمصادره (القلع حمرة عين ) .

  9. neiam قال:

    العضارة خشم بيوت
    ناس نيفاشا و ناس رقوش و ناس يخوت
    ودعشة ما تجري و تكابس غير رزيقك ما بتفوت
    يلعن اليوم اللي جابكم وقبل مشيكم ما نموت

  10. قرن شطة قال:

    نحنا يادكتور ماعندنا ايو كلام بس بنعاين واللنشوف آخرتا شنو؟
    تحياتى يا ملاحظ شديد

  11. ياسين شمباتى قال:

    سكارنو…وعليك 2000 سلام وتحية..
    العضير الاول طلع كيسو فاضى وجسمو مرضرض !
    والعضير الثانى ايام كان اول ما كان دا حالو ! لكن مغسوهو وجهجهوهو وخلوهو يسل سيفو على المتطاولين امثال ناس هناى !
    لعنة الله تغشى الظلم والظالمين..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s