يا مدونات يا مدونين

Posted: الأربعاء,9 نوفمبر, 2011 by عزت in اخرى

تقبل الله منا ومنكم صالح الأعمال وتعود الأيام والجميع بخير وانشاء خرووووف العيد يكون عجبكم وسر بالكم ولم يؤثر بقليل أو بكثير على ميزانياتكم…. وربنا يخلف ليكم باذن الله…. قادر يا كريم….. أها والعيد ما زال في منتصفه ونحنا خلاس كملنا اللحمة والشربوت والزيارات والأعراس كمان فما فضل الا…

لمة المدونين الحلوة وخدوا عندكم عندنا كم مناسبة ما التقينا فيها:

1) ذكرى ثورة أكتوبر المجيدة

2) حمدلة السلامة لي بت طارق من المروحة الوقعت جنبها

3) انتقالي من المقرن مترقيا الى الرياض

4) المليون الكم (ما شاء الله عيني باردة) لود الزبير

5) عيد الأضحى المبارك وما ضقنا جنس لحمة في بيت واحد من المدونين

6) وزيارة أبكرون (السرية) الى الخرطوم للعيد

7) واعتزام (قرن شطة) بمغادرة البلد نهائيا في نهاية هذا الشهر الجاري

ودي المهمة في الوقت الحالي

رايكم شنو….!! ما نقعد معاهو قبال ما يقوم والا كيف…..

كسرة:

قالوا زمان الشفع بيغنو في المناسبات التي يحل فيها الخروف فكانوا يقولون…
أجييي يا الخروف… يا الما عندك صوف
جابوك للعرس… أكلت البرش
جابوك للسماية.. أكلت الملاية
جابوك للطهور… أكلت الفطور
فنزيد عليها اليوم ان غنى الأطفال للخروف اليوم فقد يقولون
جابوك للضحية… كملت الماهية..!!

تعليقات
  1. ساتينتود قال:

    الحبان في كل مكان
    كل عام والجميع بخير وربنا يحقق الأماني
    والله يادوك دي تكون فرصة جميلة نلاقي فيها العقد الفريد

  2. عزت قال:

    وانت بخير والف صحة يا ساتنتود….. أها يا حبان زادت المناسبات وبقن تمانية كمان…
    البلد منورة يا ساتنتود وعقبال ما نشوفك

  3. smukhayer قال:

    الحبيب أبو عصمت
    نبدأ من ((انتقالك من المقرن مترقيا الى الرياض)) ألف ترليون مبروك لإكتمال البيت والإنتقال إليه والعقبى لنا جميعاً أن ننتقل من المهجر إلى أرض الوطن، وما فرقت وين إن شاء الله إلى بيت إيجار في الجخيس ولا غندهار أقصى شمال أمدرمان.

    ثانياً: مترقياً كيف، ده أنت بيتك من حيث الموقع كان ما أقل من السفارة المصرية ولا قاعة الصداقة لكن نقبل مفهوم الترقي إلى أنه إنتقال إلى دارك الذي شيدته من حُر مالك وحلالك بكد وجهد وعرق السنين، ما عدا ذلك يظل مقرن النيلين أهم موقع جغرافي في العاصمة المُثلثة تغنى به وله الشعراء والمنشدون، لكن سمعت ليك بأإنية إن شاء الله هابطة ذاتو في الرياض، اللهم إلا الرياض الفي بوستك بتاع جلسن حلاتن بتاعت غضن الرياض المايل وما شاكل….. وجاييك

  4. smukhayer قال:

    حأقفز إلى (6) زيارة أبكرون (السرية) الى الخرطوم للعيد، الخبير شخصياً في العاصمة، طالما سرياً معناتها واحد من ثلاثة:
    1) أنه مبتعث في مهمة سرية من سمو الشيخ حمد بن جاسم بن خليفة بن جبرآل ثاني وربما يحمل رسالة إلى د. التجاني سيسي.
    2) أنه سيادته ممتنع بسبب رطوبة الدوحة من إهدار طاقته في الحوامة وبالتالي محتاج يومين في شمس العاصمة إلى حين يكون مستعداً للقاء الأحباب الدانقوست.
    3) الثالثة ليست واقعة لكن لها علاقة بالنقطة رقم (4) في قائمة عزت أي أن الخبير بصدد البدء في تنفيذ مشروع مماثل لمشروع ود الزبير الذي إنتقل به من مديونير مغترب في الثغر إلى مليونير مستثمرفي العاصمة، وأنه يستعين على قضاء مشروعه بالكتمان.

  5. ساتينتود قال:

    تسلم يا دكتور والبلد منورة بيكم ووبالشلة الطيبة،، وباذن الله نشوفكم قبل ما الناس تزدحم بالشغل

  6. طارق أب أحمد قال:

    د. مبروك الرياض و عقبال دبى ذاتو
    يصادف تاريخ اليوم 11\11\2011 و دي مناسبه
    و كمان عيد ميلاد احمد واقع اليوم 11\11

    و الأهم طيعن زيارة أبكرون السريه
    و طيعن دة عايزه إجتماع سرى على جناج السرعه
    لتحديد بلان أى و بى

    شارع النيل جمب برج الإتصالات ألليله أو بكره و تلفونات
    بالمناسبه هو تبع ياتو وفد مقدمه

  7. smukhayer قال:

    نستأنف محادثاتنا يا دكتور:
    7) اعتزام (قرن شطة) مغادرة البلد نهائيا في نهاية هذا الشهر الجاري، ده كلام شنو يا دكتور قرنوف، المعاناة تولد الإبداع وقلنا في الصاج نطلع لينا منك بروايتين ومجموعتين قصص قصيرة في البلاوي المايلة والمصايب المتتالية تقوم تتخارج لا لا لا نحن ندعو إلى تشكيل لجنة حكماء برئاسة المُشير جبرا والفريق عزت واللواء أب أحمد واللواء ود المهدي واللواء (م) طيار ودالخلا (حلوة طيار دي مُش) ههههههه والعميد (م) سهيل، ميم ود الشيخ مهندس وحقت سهيل متقاعد بعد الزواج هههه والعميد أركان حرب أفليقا والرائد بحري عبدوش الدين لبحث الأمر وإقناعك بالعدول عن قرارك ريثما نعود، ياخي ما شايف جرسلينا وسامع نواحنا مع القماري الفوق نخل الفريق والشنو مابعرفو داك وتقول لينا مُشتت،

    أب أحمد: أبكرون تبع وفد مقدمة إبن تلبدون ههههههههههههههههههه

  8. عزت قال:

    وأنا قايلو مع (حركة نمور الضعين) هههههههههه
    لكين ما كان يكلمنا والله كان حركنا ليهو المياه الراكدة وسخنا المفاوضات

    تسلم يا مخير على شعورك الطيب والمقرن تظل مكان قطع (السرة) فلا بد لها راجعين ولكن في ثوب جديد اذ نعتزم اشراك آخرين معنا في تعمير الأرض لضمان مستقبل العيال…. وما الرياض الى لفترة ريث توفيق الأوضاع…

    عموما لقد تحدثت مع (قرن) وقال كان ما مرق اليوم قبل الغد حتمسكو حسكنة.. فالشاهد ان الانقاذيين ديل ما دايرين زول ينافسهم في البيعرفو والما بيعرفو… نتمنى له مستقبلا وراحة بال فيما يعتزم عمله….

  9. ياسين شمباتى قال:

    الحبيب عزت مقدم الاحباب الدانقوست..
    سلام وشوق ومحبة وكل عام وانتم بخير وصحة..

    مبارك الدار يا عزت وعقبال ما تفرح بى جديد وليداتك كوووووووولهم..

    مخير الامير…سلام…
    قلت لى رطوبة قطر ضربت ابكرون ؟؟اممممممممم,,,دى ضر توا من سنين يا حنين ! لقيتك متفائل خلاس!

  10. إسترايكر قال:

    كل عام والجميع بالف خير ومشتاقون لكم شديد.
    مبارك الدار يا دكترة وتشوف جديد الاولاد باذن الله

  11. نيام قال:

    عزت المرطب:
    يعني المقرن و قلنا عزت المرطب اها هسع نقول عزت المرطب ذاتي وتقرأ د.ع.م.ذ وبغرض الاختصار تقرأ دعمذ
    قرن شطة:
    كدي اترحمن و خت الكورة واطة الجماعة ديل قالو بعد العيد ياهم علي ما ليزيا يا الشعب الفضل علي ما قبله…
    ابكرون:
    مفاوضات الدوحة 2 بدت في الخرطوم ؟
    اها الجماعة قالو حيمشو ماليزيا و لا جدة توالي
    استرايكر:
    يا خ بالغ غ غ غ غ غ ت و انا لسه وااااااقف منتظر المشية ظاطا و قدلتو
    افليقا:
    حج ام ضبيبينة دا كلنا حجيناهو اظهر و بان عليك الامان…
    سحروك و بشتنو حجتك
    والشامتين في رجعتك
    كان يعاينو لعرستك
    و الحج نوايا يا فطين

  12. ابكرون قال:

    سلام للجميع وكل عام وانتم بخير
    الزيارة لا سرية لاشئ اعلنتها في الفيس بوك ومضاف عندي في الفيس كل من عزت ونيام واسترايكر والسلاوي واسترايكر ونونو وشمباتي وسالي ومخير والغبشة وووووووو كتااااار ما شاء الله وشله سوداننا كلها القروب وتم ذلك في اول يوم من نوفمبر ولا في زول اشتغل بي ههههههههههههههههههههههههههههههههههههههههههه ما تلوموا ساكت وقاعد معاكم في الخرطوم ان شاء الله حتي نهاية ديسمبر وسيكون زواج البنية الصغيره في 21 ديسمبر وستوجه الدعوات للجميع في موعدها ان شاءالمولي …..شكرا للجميع
    ——————————
    وده اعلان الفيس بوك كما ظهر ……والدليل آلولو
    Back 2 home on Friday ,bye to the monotonous
    أعجبني · · 01 نوفمبر، الساعة 02:30 صباحاً‏
    Rsan Sudan‏ معجب بهذ

  13. طفشانة قال:

    حمد الله على السلامة يا ابكرون سرية يعنى سرية لانو انا كمان برضو ما سمعت خالص ….. انا ما مضافة اذن ما تلوم الا روحك….. على كل حال حمد الله على السلامة والبلد نورت بيكم

  14. حنين قال:

    عزت والحبان السمار .
    كل سنة وإنتو طيبين ومضحيين وحاجين .
    أولا مبروك المنزل الجديد يادكتور . شكلك ضبحت كرامة الرحول مع الضحية بكبشين أملحين أقرنين . ماشاءالله عليك .
    أب أحمد عيد ميلاد سعيد لى أحمد وعقبال ال100 شمعه .
    أخونا قرنوف دة قنع طب ولا راجى الحكومة تتغير . غايتو هو إشتغل بى راى أخونا ود الخلاء وأخدا من قاصرا وعززل . برضو يعتبر(يغيرو ا مابأنفسهم .)
    إنشاالله كل سنة تامين ولامين .

  15. ياسين شمباتى قال:

    ابكرون قائد الاسطول…سلام..
    وحمدالله الف على السلامة,انحنا باقى كنا مدروشييييين فى الحج وما عندنا الخبر,,علا بركة الرجعة ومبارك للبنية وعقبالك كدة ! وى وى وى …

  16. ابكرون قال:

    تسلموا جميعا ومشكور يا شمبته وحجا مبرورا وسعيا مشكورا
    طفشااانه شكرا ويبدو انك نسيتي كلمتك وش وش وش وش في اضانك …ومن بكره مضافة في الوش بوووك ومضافة اليه كماااان

  17. الكناني قال:

    العزيز عزت
    لك الود والتقدير وانت سباق الي فعل الخير ( والله نفتقد الا الشربوووووت)
    الدار يرحب بيك وربنا يديكم خيره ويكفيكم شره وعتبة مباركة باذن الله
    ابكرون :
    يا حبيبنا يا رائع ربنا يكرمك وتتم الي البنية بالخير واليسر ويجعل لها زواج ميمون مبارك فيه من النعم والنعيم الكثير المثير الخطر
    المدونون
    كل علم وانت بالف خير
    ودمتم

  18. smukhayer قال:

    الحبان في مكان

    سلام ومحبة واحترام

    الخبير أبكرون: ربنا يتتم بالخيرويجمع بين بنتنا وزوجها المرتقب بالخير ويبارك لهما وفيهما ويرزقهما السعادة والذرية الصالحة .

    حبيبنا د. قرن شطة: يسر الله لك الخير حيثما كان ووفقك في تحقيق كل ما تنشده مهنياً وشخصياً وعلى كافة الأصعدة.

    عُمدتنا أبوعصمت: بارك الله لك في ديارك جديدها وقديمها وعمرها بالتقوى والمحبة والسعادة ومتعك بالصحة والعافية.

    الحلوين: العفو والعافية إذ بدر منا ما كدر صفو أحد وربنا العالم بمقدار ما نكنه لكم جميعاً من مودة ومحبة واحترام،

    ودمتم طيبون

  19. سهيل قال:

    الكترااااااابه ..

    دا كلو حصل و انا نايم وين ؟؟؟

    مبروك يا ابكرون للبنيه و حمدلله على السلامه ..
    يس مبروك الحجه ..
    اب احمد : عقبال دشليار شمعه ..
    قرنوف : ياراااااااجل .. قول كلام غير دا .. ولا شوف لينا معاك صرفه
    عزت : وانت طيب .. وبركه المشيت ور المطار .. كنت خايف ليك من قندهار

  20. الزهراء قال:

    كل عام وانتم بالف خير وعافيه احبتي ومتعكم الله بالصحة والرضا –
    ابكرون: الف حمد الله على السلامه وانا اقوول البلد مالا جوها اتصلح ونورت كده – اتاريييك شرفتها!!- (تلجه وكده).
    والبنية ربنا يتم ليها على خير ان شاء الله
    والله يعميني ما شفت البوست ده – مع اني طوالي في الفيس بوك – لامن يوم يرفدوني
    ان شاء الله نتواصل عاك ولازم نلاقيك بأي طريقه- كفاية المره الفاتت وعمو السلاوي كمان ما اتمكنت وقابلتو.
    د. عزت: اتاري الرياض جوها بقى مرطب نحن شغالين من غير مكيفات الايام دي ربنا ريح الاسبليت بي جيتك فيها
    ان شاء الله الدار ترحب بيكم – وربنا يجعله منزل مليء بالخير والبركة
    شمباتي: حجا مبرورا إن شاء الله- وكل عام وانت بخير

  21. ابكرون قال:

    الامير الكناني والمخير وبتنا الزهرا وسهيل والبظهروا في الفيس شكرا علي كلماتكم الطيبات واكيد سنلتقي جميعا وشكرا علي التلجة البارده يا الزهراء البلد منوره بناسا الجميلين

  22. ود المهدي قال:

    ابكرون كل عام وانتم بالف خير وصحه جيدة وحمدا لله علي السلامة ومبروك للبنية وعقبال البكاري
    واقترح يا عزت الناس ال ح يبقوا جدود ديل يتعمل ليهم قرووب جديد يكون ااا –
    مبروك الرحول يا عزت – وخلاص بقينا جيران – انا برضو رحلت شرق شارع الستين سابقا بشير النفيدي حاليا –
    يلا خلونا نتلم بمناسبة العيد وابكرون وعمر خليل الما ابكرون جاهز
    كناني – بالغت فوكا
    سلام

  23. حاج أحمد السلاوى قال:

    ابكرونا . أولاً …. سفرتك لأمازونيا العظمى دى لا علم لبها ..ولم تعلنها لا فى كتاب الوش ..ولا فى مدونة سوداننا .. بطِل حركات
    الجيش بتاعتك دى ..
    تانياً .. مبارك .. مبارك .. مبارك للبنية الصغيرة وعقبال تبقا حبوبة كبيييرة سنونة مكسرة ببركة سيدى ..
    تالتاً .. دى إجازة شنو القدر دا .. قاعد لحد ما بعد زواج البنية ..؟

  24. ياسين شمباتى قال:

    بطل حسادة يا انتا !!

  25. الكناني قال:

    المدونون :
    السلام عليكم ورحمة الله
    ود المهدي: لك الود والله ماعرفين نتلم ولا نتلاقا لايلقانا لا نتلم نحن اصبحنا من قوم افترقوا ( افرنقعوا بتاعت الشاويش علي )
    حاج احمد السلاوي : السلام عليكم ابكرون ما رد عليك في موضوع ( .. قاعد لحد ما بعد زواج البنية ..؟
    عشان بس نفهم

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s