حكاوى ضيق العيد زقاقات الخرطوم ..

Posted: الأحد,13 نوفمبر, 2011 by aflaiga in اخرى

ما ان يضيق الوقت حين ياتى العيد فجاتن حتى تحفل زقاقات السوق العربى بالمثير الخطير دعونا فى هذه الاستراحه نتلمس بعض حكاوى وبلاوى السوق العربى ( القوس البرعى ) كما يحلو لمحبيه من العالم التحتانى تسميته :
فى القهوه ورا السفاره :
نقاش : يا مان القصه قطت وشكلو العيد مخستك صحبك سمعه ده قال عندو 4 مهندس ( 4 جرادل بوهية المهندس ) جازم من عمارة المنشية بتاعة اب دقن الحرامى الاشتغلنا ليهو الطابق الرابع بتاع مرتو الرابعه !! ( يظهر صاحبنا اب دقن كل طابق بى مره هلا هلا الله يدى والقادر بيسوى ) .. اها رايك شنو قال بيكسرم فى تلاتيناية نخش بيهم المغالق نمرق منهن مصرفة عيدنا ؟؟
نقاش 2 : هوووى يا زول سمعه ده بتاع كفاوى اسى يكون قاطرينو يخمشونا معاهو ساى . خلينا فى انتظارنا ده واللهم اكفنا بحلالك عن حرامك .
نقاش : انت خليك منتظر انا بشوف سمعه براى اصلك فقر من زمان انا بقول اللهم اغننا بحلالك او حرامك اى حاجه الدنيا عيد يا مان وربك غفور !!!
بنهاية يوم الوقفه كان نقاش 2 يبحث عن ضمانه لنقاش 1 وسمعه وخت ليهم مصاريفم فى الربط ( الحراسه ) بعد ان من الله عليه برزق حلال من شغل فى المنشية فى عمارة ( اب دقن ) الطابق الخامس !!!!

عمارة المحامين :
استاذ 1 : اها يا بقه الدنيا عيد نمشيها عشرينايه ؟؟
البقه : عشريناية شنو انا قلت ليك خمسيناية وخلاس ما تاخرنا ياخى الدنيا عيد .
استاذ 1 : ما تباركيها بالعشرينايه يا هناية ؟
استاذ 2 يهمس لاستاذ 1 : يا راجل الدنيا قبايل عيد الله يهديك مشى البت دى وقوم شوف لعيالك عيدم عامل كيف ؟؟
استاذ 1 : يا فقرى انتا خلينا نتمتع بى عيدنا ونخم رمادنا بطل معاكسة .
بنهاية يوم الوقفه اكتشف استاذ 1 فقدان الموبايل وختم التوثيق وقروش الخروف بينما هو نايم فى كنبة المكتب والبقه شتتت بالسمينه ..

سوق نيفاشا :
مان 1 : صرف صرف صرف يااستاذ .
الاستاذ : صرف مافى لكن عندى قروش قديمه عاوز ابدلا فى قرقة ؟؟
مان 1 : شفت الكفتريا ديك استنانى فيها بجيك اسى نتفاهم .
مان 2 : تبديل شنو يا مان انت عندك فرقة تبديل ؟؟
مان 1 : تبديل شنو بزبط ليك زولك تمام التمام .
بنهاية يوم الوقفه كان الجميع بمبانى الامن الاقتصادى والاستاذ يحمل الجنيهات القديمه .ومان 1 و 2 مبسوطين بحافز بنك السودان .

قهوة طلمبة المريديان :
جلس عم حسن سارحا فى ملكوت الله يحمل عصاته يشخبت فى الارض طيييب البنات كل وحده عشرايه وامهم عشرايه كده سبعين نشيل ليهم كم كيلو لحمه كده بقت ميه وسبعين انا بحاول دوا السكرى الشهر ده اجليهو ونمشيها حرجل طيب بتاع البيت نديهو من وين عاوز ميتين الايجار الجديد وعندو متاخر خمسين من الشهر الفات طيب لو ادينا بتاع البيت – تحرك وهو يحسب فى الخمسين الاخيره .
بنهاية يوم الوقفه كان عم حسن ممدا فى حوادث الخرطوم ويقف امامه شيخ وقور ( كفارة يا عم حسن انا سيد العربيه الضربتك ) ما تشيل هم جات بسيطه والحمد لله انت راجل مبروك خروفك على وايجارك الكنت بتهضرب بيهو على ومصاريف البنات وامهم على بس انت قوم لينا بالسلامه
بعد ان غادر الشيخ الوقور العنبر
الرميض جار عم حسن فى العنبر : يا عمك الزول المشى ده بيجى ماشى بى ياتو شارع تعرف انا لو لقيت لى كل عيد دقشه زى بتاعتك دى ميه ميه هههههه
كل عام وانتم بخير والقابله لامين تامين سالمين غانمين .

تعليقات
  1. السعييييييييد قال:

    عليك الله يا افليقا لو عرفت عمك دا بيجى بى ياتو شارع ورينا برضو , فترنا خلاااااااااااااااااااااااس
    كل سنة وانتو طيبين شديييييد

  2. الكناني قال:

    ولدنا افليقيا
    لك التحية وكل الود (كل سنة وانت والاسرة الكريمة بخير)
    جفت السخرية من كتاباتك لا ادري هل السبب تراكم السنين ولا القرعة ولا شنو؟ المهم المتأمل للحال في المجتمع يجد ان الحل في واحد من اربع حالات ذكرتهم بذكاء في استراحتك
    اولاً: الصبر وانتظار الفرج من الله مويقنين بالاجابة ( حالة النقاش )
    ثانياً : الاحتيال مع الحرام ( حالة الاستاذ 1)
    ثالثاً: المداهنة الي الحكام واكل الاموال بالباطل ( حالة مان 1 ومان 2)
    رابعاً: ان يقضي الله عنك الدين ويرفع عنك برحمته
    طيب يا حبيبنا ، علمنا وجزاك الله خير ان هذه هي خياراتنا فاين حكامنا من انتخبنا لتسيير امور الحياة والحكم بيننا بالحق ، اين الضرائب ، اين الزكاة اين مال الجريح اين الجريح زاااته، ان جل ما فعلوا واثمروا فيه هو المصالح الشخصية أصبحت فوق كل اعتبار و فوق الصدق و الوفاء و العدل تحولت القيم و المبادئ السامية إلى أشباح أو بقايا سراب يتلاشى كل يوم
    مع ضيق العيش وصعوبة التحمل ، اصبح الصدق و الأمانة سجناءا بين ايدي اللئام غابت الصراحة و انعدمت الاخلاق وتفشت المحسوبية ، يا ولدنا اين ذاك البريق من الصدق اين الصدق اين التوادد والتراحم اين اخواننا في الله اين هم ……. ؟
    ضاع الاحترام و غاب السلام و ساد الظلام
    ودمتم

  3. smukhayer قال:

    الشليق الصديق أفليقا

    السلام عليكم وكل عام وأنت وجميع الدانقوست الحلوين بألف خير

    إن شاء الله كل مرة تلقى فرقة وتتحفنا يإبداعاتك الخفيفة ولفيفة وما ننتظر العيد الجايي…

    وإن شاء الله العيد الجايي راجع من الحج وبوست مُشبع بالروحانيات ومقتبس من أجواء جبل الرحمة وصعيد عرفات الطيب،

    وإن شاء الله ربك رب الخير يُفرجها على النماذج المتضايقة أعلاه قبل العيد الجايي من غير مجازفات ودقيش وحوادث هو ولي كل شيء وقادر على رفع الشدة من كاهل الشعب الفضل

    كسرة بالدفرة:
    وإن شاء الله برضو قبل العيد الجايي الشنباتي عريساً وأن يدخل القفص كل أحرار وحرائر الدانقا العُزاب، لكن مافي دبُل كبين للزووول وباقي الدايرين وقارين و/أو متمجمجين ههههههههههههههههههههه

  4. سهيل قال:

    ابو الافلاق سلامات .. خلي بالك المحلب جاب فايده و بقيت ( حااااالم)

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s