شاااركونا يا جماعه الله يفتح علييييكم يا جماااعه .

Posted: الخميس,17 نوفمبر, 2011 by aflaiga in اخرى

فى الفكر الشمولى للحكومات يتعاظم مفهوم حشد اكبر عدد من الشخصيات الوطنيه الفلوتر وبعض سواقط الاحزاب الاخرى لاعطاء ملمح ديمقراطى او تشاركى لشكل الحكومه الشمولية وفى الانقاذ ظل هذا المفهوم يتعاظم كلما ارادت الانقاذ ان تجمل وجهها او تقول فى ادب ديمقراطى خجول ( اهو نحنا حكومتنا وطنيه وفيها كل الوان الطيف السياسى ) فى الايام الفائته نشطت الانقاذ فى مد قرعة المشاركة للحزبين الكبيرين وبعض الاحزاب ( الفكه ) المستنسخه من الاحزاب الكبيرة او حزاب الزعلانين من احزابهم وقياداتها فطفت تارة تردد المهدى سيشارك المهد ربما يشارك مشاركة المهدى ستكون نوعية الميرغنى ربما يشارك المرغنى سيشارك المهدى سيشارك نوعيا وصار التشكيل الوزراى يتاخر يوما بعد يوم وكانما هذا التشكيل هو الحل الاساسى لمشاكل السودان وهم وغيرهم لا يعلمون ان الشعب لم ولن تحل مشاكله لا بمشاركة هذا او ذاك ولا بعدم مشاركته ولا بحكم الانقاذ كاملا ولا بذهابها !! دى غريبه مش ايوا ولا بذهابها ليه لانو الانقاذ دى ذاتا لمن جات جات تنقذنا ما جات توكسنا حسب قولا وبرضو اى زول حيجى حيى ينقذنا حسب قولو يعنى فى الحالتين الشعب المسكين ضايع من هذا المنطلق وقبل شحذ توقعاتكم عن التشكيل القادم دعونا نشخص مشكلتنا الحقيقية وهل التشكيل الجديد سيحلها ام لا وكيف ترى ملامح التشكيل القادم وهل سيشارك الكبيران فى هذه السلطه بالدكوه ام سيكونو هم الدكوه ام السلطه ذاتا ؟؟؟

تعليقات
  1. aflaiga قال:

    افليقا : التشكيلة حسب توقعاتى :
    السنقه فى الرنقه لسيد الزنقه
    الكمده بالرمده لى ابو سنده
    العملية فى النمليه لفردة السنقه فى الرنقه لابو الدفاع
    بندورا وكشفنا دورا لود الحبيب والحكمدارية فى المستشاريه
    فى الشاطى يا حبان ساهرتو بينا فى البرلمان
    ود سيدى بيه انعم الله عليه
    كل سته فى حته فى الخارجية
    كل جركانه فى مكانا فى الداخليه
    الحردان كلمو يقع الخزان وزرو
    فكى ابو لمبه فى الشئون الانسانيه بالردميه
    الكسرة بالستره والشوق والريد والامينه فى السمينه
    جاى تعتذر وترجع ايامنا الزمان من وين اجيب ليك الوزارة فى العماره
    ده بالنسبه للوزارات المهمه الباقى زى ما تجى تجى يعنى لاقاكم وزير غابات قلبا ؟؟
    اما بالنسبه للحل الحللا بله :
    فنحنا ناس محمد احمد وعبد الله راجين الله
    لانو ناس دينق ومجوك شتتو واطلبو الله

  2. عباس ركس قال:

    افلي داير اعمل like
    لكن قابلنا وزير غابات قلبا .. قلبا .. قلبا
    وماذا عن البطاطس الفي الدمعة غاتس ؟؟؟ والسؤال عن الاخ مورلي وكذلك ابن عمه صابون اين موقعهما من الاعراب ؟؟؟
    هل في طريقة للسؤال عن الأخوين شنطح وبنطح ؟؟؟ وعمهما سيد الجمال ؟؟؟؟؟
    مجرد اسئلة !!!!!!!!!!!!

  3. aflaiga قال:

    ركس يا متابع :
    وزير غاباتك القلبا ده قلبا كيف قلبا كده ولا قلبا جد جد ؟؟ههه
    بالنسبه للحسبه بتاعة البطاطس الفى اللحمه غاتس فاظنو بقى ما بختشى وقاعد يتحشى محشى
    اما بالنسبه للاخ مورلى وابن عمه صابون فاعتقد انو حيكونو فى مستاشريات المعجون لانهم بقو يستخدمو سنسوداين من كترة السوس
    اما الاخوين شنطح ومنطح فشنطح فاغلب الظن حيخشو السوق او المنشيه لانو الخواجه الفى هاواى قال اللسته لسه فيها هناى وهناى
    بالنسبة للعم الاكرم سيد الجمال فسمعنا انو فى ود سغنتوتى من اولادو السغار وربك طبعا ( غفار ) حيسوق بدلو الدفار والود ده قالو سواق جنس سواقه تخليك السواقه تشتاقا .
    شايفك ما سالت عن عمو على بياع الزيت الساق مرتو وداها البيت ؟؟ عشان اطمنك قالو العسكر واقف طابور والهون ضرب التلفون يا الشيخ يا بنقع نتفنقل والجبه الواقعه فى البير يوم طلعت جابو ليها خبير بس نقعد تحت الحيطه شان نسمع حبة زيطه .
    اها لو عندك اى زول تانى بتسال عنو انشاء الله ما تفقد عزيز وزى ما قال المثل اليدو فى النار خير من اليد السفلى . مش ؟؟

  4. aflaiga قال:

    يا جماعه كلام ركس ده ده ما تهتمو للايام ظروف بتعدى عاوزين اسامى ومواقع ركس ده لو باريتوهو لا بتلمو فى حكومه ولا معارضه اصلو زول عميق اكتر من اللازم لمن عمو اللازم ذاتو خلى عموقيتو من عماقة ركس دى .
    تعرفو يا شباب صرف الشعب للنظر عن الحكومه ومن فيها وما فيها ده ان دل انما يدل على انو شعبنا بقى يفكر صاح لانو الدراسات اثبتت انو نسبة الضغط والسكرى الكانت بتتسجل مع كل كوره هلال مريخ او اعلان طورئ وحاكم مكلف او انعقاد جلسة برلمان لبحث الاسعار او حتى اعلان حكومه جديده او انعقاد مكتب قيادى للحزب الما عادى !! النسبه دى بقت تنخفض بصورة مستمره وده بيعنى ارتفاع مؤشر الوعى الشعبى بانو شهرا ما لينا فيو نفقه ما نرفع سكرينا بيهو . لكن موضوعنا بتاع الليله ده منبثق ( حلوه منبثق دى مش ) من انو شعبنا بقى فاهم النظرية وممكن يخت ليك الحكومه البعد الجايه حتكون كيف وده راجع لانو الخطه بتاعة 4 – 3 – 2 بقت مكشوفه للشعب حيث انو اربعه وطنى بس واتينن وطنى بالدكوه وتلاته وطنى بالطوه !!!

  5. زووووووول قال:

    افليقا وركس سلام عليكم
    التشكيل الانحادى القادم لن يكون احسن حالا من نظيره الولائى الذى اتى باكبر المستثمرين فى قطاع الصحه والتعليم الصحى وزيرا للصحه فى بلد انهك العلاج اهله وماتت من تكلفتة حيتانها اقصد مرضاها .
    قل لى بربك اخى افليقا اى منطق يضع البروف حميده وزيرا للصحه وهو المالك لمجموعة مستشفيات ابرزها الزيتونه التى وقعت فى جملة من الاخطاء الاداريه والطبيه حسب التقرير الذى نشرته صحيفة الوطن قبل يومين . وكيف يوفق البروف بين اعباء مهمته الجديده مع ادارة مستشفيات يستبشرون والزيتونه والاكاديمى وجامعة العلوم الطبيه واشياء اخرى مفيده ؟؟
    بل لماذا تغولت الولايه على المستشفيات الحكوميه قبل تولى الرجل لمسئولياته بايام ؟؟ وهل يستطيع فقراء بلادى دفع تذكرة الدخول لاى مستشفى حكومى خلال تولى حميده لمسؤلياته ناهيك عن دفع قيمة العلاج ومقابلة الاطباء ؟؟ وهل تنو حكومة الخرطوم من اسناد الحقيبه للرجل استخراج قرش قرشين حلوين من مواطنى بلادى ؟؟؟ اسئله كثيرة تفرض نفسها وسننتظر الاجابات حال استتباب الامور لوزير الصحه الولائى الجديد ………
    كسره : عيييييين هووووووو … تشكيل مفتووووووح ماااااااااااااااارش … تشكيل منضم مررررررررش

  6. abushagrod قال:

    أفليقا وركس
    الله يجازي محنكم
    يعني الواحد ألا يقفل عليه الباب حتان يقرا بوستيكم دا ولا شنو
    اما عن التشكيل الجديد وبوصفي قد خرجت من السودان قبال 22 سنة قبال الجماعة ديل ما يجو فأنا متفائل خاصة بعدما سمعت الإغنية والتي كأني أسمعها لأول مرة : أحبه وأحب نوناتو … نوناتو الفي وجناتو
    أحيييييييييييييييييييييييييييييييييييييييييييييييي لو عارفين أنو الحكاية حتفك كدا مع جنس اللوز الشايفنو يجبجب ويحت زي النبق
    خليكم إيجابيين وأنظروا للجانب المضئ وللنصف المليان ويمكن الحفلات يمدوها لينا للصباح زي أيام زمان
    بعدين الخرتوم دي ما زمان قالوا ليكم الما قادر عليها يفلها (يمشي منها )
    والناس ديل على وشك خلق المدينة الفاضلة ( الأفلاطونية ) فالأخوة الإفلاقوركسيين يمتنعوا من البوست دا
    أيامات ظهر بترول أبو جابرة زمن نميري أهلي المسيرية قالوا ( البترول بترولنا إنشالله نمسح بيهو بارنا ( بقرنا)
    والتشكيل الوزاري الجاي دا شكلو حيتبع نفس المنطق

  7. عباس ركس قال:

    اقتراح صغيروني ( على قول السلاوي ) :
    بما انو حكومتنا السنية حكومة ديموقراطية وكدة ومكملة الشفافية لي حدها تقوم تدينا خيارات في التشكيل الوزاري بتاعها من عينة :
    وزارة الثقافة : 1 / سعدية جكس 2 / حنان مس كول 3 / عوضية دكوة
    وزارة الهنايات : 1 / حسن تمساح 2 / عبد المنتقم شديد 3 / عوض كشات
    وهلمجرا
    ويجيبوهم في التلفزيون في ( حتة ) : لو عجبكم شغلي دا صوتوا لي على الرقم 3 , ما تنسوا الرقم 3
    وتاني ما في واحد يفتح خشمو – دا ما اختياركم !!!!!!!!!!!!!

  8. بت وراق قال:

    ياجماعة الخير سلامات
    اول حاجه هى الاحزاب كلها ماااااااااااااااا نافعه وهم عارفين انو ح يريسوهم ويتيسوهم
    وتانى حاجه التشكيل الوزارى دى ح يكون زى قلم الرصاص المبري بالجهتين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s