يعني الا عزيز لدينا

Posted: الثلاثاء,10 يناير, 2012 by عزت in اخرى

وأنا كنت فاكر الجماعة المدونين الظريفين قد قطعوا رجلهم أو كما قال المغني (قدمي بمسكو علي) وما حأعتب على المدونة بتاتا… الآ وأن الظاهر دي فرية ساااكت فالشاهد أن قلوب الجميع مع الجميع وكذلك أقلامهم ولم نزل في قاعدة بيانات تلفونات البعض ولم تجدي جهود ناس (ريح بالك) والا (خدمة قرايب) في أن تزيل تلك الهواتف من الذواكر…. فتلقى العزيز خالد مدني العديد من المهاتفات وكذلك أنا سعدت ببعضها أيضا…..

كما أن المدونة قد تلقت العديد من المداخلات في الأيام السابقة بدليل تلك الأسماء التي تداخلت وواجبت أخونا (خالد مدني) في والدته رحمها الله والذين اتصلوا أو أبرقو والذين عصرو البرش….فالتحية لجميع المدونين الذين ظهروا وسعيدة هي المدونة ليس بفراق عزيز لأحدنا ولكن لزيارة الذين توقفوا عن زيارتها… طبعا توقفوا عن زيارتها دي ليس هو الذي حصل فأعتقد جازما أن العديد من مدونينا الأماجد قد اعتادوا (المتاوقة) ورؤية ما الجديد فيها…. لكين يا حباييب نعرف كيف كان ما الواحد شال ليهو (فحمة) وسجل حضوره….

التحية لناس الخليج والسعودية وقطر وناس أمريكا ذاتم والقابضين على الجمر فيما تبقى من وطننا والتحية موصولة للعزيز نيام وأبكرون في مساجلتهم الرائعة التي زينت المدونة من قبل ….

أبكرون: أنا العصر نايم بجرعة شوق عشان حاساهر ومفاتيح (كارنا ده) معاي الليله….
كلام عجبني شديد خلوه جرعه تنومكم ….
————————————————
كل الفصول..أدّت مجيك اسم الخريف
توّجت جيتك..مطر..
من وين مرقتَ؟؟
من ياتو..حِتّة ..بتشبهك؟؟
جَيّّتَك….نزول..من السما
لون..الشدر..
وعد..السحاب..طعم الفتر..
جيتك مواقيت الهطول
في ذات مواقيت..الخطر

 قام نيام قال ليه:

كل الفصول..أدّت مجيك اسم الخريف
توّجت جيتك..مطر..
من وين مرقتَ؟؟
من ياتو..حِتّة ..بتشبهك؟؟
جَيّّتَك….نزول..من السما
لون..الشدر..
وعد..السحاب..طعم الفتر..
جيتك مواقيت الهطول
في ذات مواقيت..الخطر
كل الفصول باديات باسمك و انتهن
من يوم مجيكي بقن بدون ميعاد يجن
لون السما وطعم المطر ماخدات علي لون الوجن
ياريت لقيتك من زمن
كانن افراحي ابتدن
في ذات مواقيت الخطر

 راح أبكرون قال لي نيام:

قوس قزح يوم شافك مارقه
اندسه جوه المراكب الواسعه
ديك .. عيونك ..
الغمام مرجيحة.. نبضك
يودي .. ويعدي ..
منك .. و ليك ..
وإنت شايله حنتك …
فوق كل الفصول..
من تراب الارض
اليباب ..
حافية في موية المطر
نسمة ودعاش ..
مدفورة من السماء
فرحة.. في الزمن العجاب..

 نيام قال تاني:

يا فرحة جاية بعد حزن
يا ضحكة فوق دمعات جرن
خفت البرق لمان شفاهك برقت
والشوق رسم فوق العيون الحرقت
فينا الهوي المليان اسف
ياطالعة من بطن الجرف
ياسمينة لونها المنختف
وقف قلوبنا و ما وقف
نسمة ودعاش ترطيبة لزمن السخف

 و قام نيام استعدل وقال:

وقع النغم في مشيتك
طعم الغنا في لهجتك
شالو الكلام من شفتيك صاغوه ليك
لو غني فنان في المساء يتغني بيك
كل الفصول و الامكنة دالات عليك
يا مبتدا و يا منتهي الرقة فيك
لمتين نغازل في العيون
و كل الشجون
منسابة زي هطل المطر
في ذات مواقيت الخطر

 لمان اواعدك و اشتهيك
دربك علي طولو بيقيف
تلقاني مرهف و منفضح زايد ضرب قلبي الشفيف
حتي الطيور في الروضة تسمعني الحفيف
تتشابي لشوفتك معاي و الضحكة كيف
يالون عيونك و المساء و صوت المطر
في ذات مواقيت الخطر

 و ختم أبكرون:

هلّة حروفك
لما بغمرني..النَشَاف
لما بيراودك..حزن..
نحنا بيصيبنا..الجفاف.
ولمّا تبحر في الفرح..
صدقني..بغرق..في الضفاف.

 و الليل جن و سكتوا

 

تعليقات
  1. الكناني قال:

    الدكتور المرطب مخرج الروائع
    التحية ليك وانت بقلب كبير تتفقد وتعصر البرش وتشكر لمدونين وكمان تتحفنا بسجال قل ما يكرر مثله في الرقة الرائعة
    لك التحية كبيرنا وسيد عزنا واكثرنا ترطيب الدكتور عزت

  2. عزت قال:

    لك التحية العطرة أخونا الكناني يا أول من هاتفني معلنا لقاء المدونين بأباهم الذي جمعهم في القمردينة الصفراء من زمن ليس بقريب ولكنه كان البداية لتأسيس هذه الشلة الخيرة التي لا أتمنى أن ينفرط عقدها… فمنها خرجت هذه المدونة ومدونتي وتعلمنا منها التداخل….ومنها تعرفنا على خيار

    أدام الله المودة بين الجميع

  3. ابكرون قال:

    عتااااااب للجميلين (عسي ولعل):
    —————————————————————————————
    واريتم ما سكتوا يا عزت …السكوت بطر……….
    جيت اتاوق فوق رؤوس المعازيم …قت…. وين هااااا ناس ناسي ادوني… الخبر…
    منتظر طلة الحلوييييين …يكون ضهبوا…؟.راجي بشيرم راجي قفشاتم اليوم فرح …اليوم سمر
    راجي زغرودة بنوتنا وعرضة ناس ود الشيخ والكناني وجبرا….آناس ديل ناس حوش العمدة…لا…..فشر
    الليل بمر …والناس اشكال تمر وناسي ما بتمر ….وا اسفاي عليك يا حوش العمده…الديار غفر والطعم أ مر….
    وبعد كم يومين …شيخ السفر ….قال لي فوت …ها… زول سرًج براقك طير لديارك…وراك سكة سفر
    اتشتت الحبااان.هبااااب سااااااكت …والديار يباب…..وسيد اللمه وناس نونو..وشيخ الحارة في (الوش بوووك) الكل اتحكر
    يا حليل اطلال الديار.زي الوشم..ياحليل بشار وودالخلا وسنكل…والغبشه وافليقا والفنجان وفلان وفلانه المبروكين واسترايكر

  4. ياسين شمباتى قال:

    كع..
    الاحباب ..سلام وشوق ومحبة..
    قاعدييين وموجوديييين الا مدروشييين ومعصورين..
    واشياء اخريييييييي….

  5. عزت قال:

    والله النصيحة (الوش بوك) صار مهددا للحكومات المحلية والخارجية
    واحد قال لي مرتو تخيلي صاحبي داك عرس واحدة اتعرف عليها في الفيس بوك…..
    من اليوم داك صاحبنا ما شاف عافية …. المفتش اشتغل دي منو العملتا ليها آد دي وههههههههه دي لزوما شنو

  6. بت وراق قال:

    ابكرونا باركنا ليك ومارديت علينا هسع ما زكرتنا مع الناس ياربى نحن تبع ناس فلان وفلانه ولا عدم المعرفه

  7. ابكرون قال:

    بت ورق متاسف شديد والله مشكوره يا الزينه ولو ما هناي عقبالك ولو هناي عقبالنا ……بعدين ناس فلانه محمدنك (تلافيا للاحراج) ههههههههههههه تشكري بالكوم ….لكن يا بت وراق الناس ما ياها الناس الزمان

  8. بت وراق قال:

    ما الحاله اصلا من بعض
    كل انقلابات التساب
    الدنيا كلها حلتك
    تنضم مع الفي آخر البلد…من غير تفوتا محلتك
    تحكيلو قصة تقصها
    اءن نفسو فيها تحسها
    حتى الاحاسيس نفسها
    ما الحالة من بعض
    الا المساخيت الدقون…ختوها بين اهلك قرض
    بالدين وبالطين بالنسب …بالميكرفونات بالخطب
    بالبنطلونات بالرتب
    فرق تسد
    تاخد قناديلك تفوت…وانكتلو فى حزمة قصب

    شكرا للشاعر حميد وهو يرسم صوره عن تقير الناس واسبابها
    يعنى ياابكرون الناس القيره كتيييييييير

  9. عزت قال:

    بتتغير … بتتغير… بتتغير
    أقول ما احنا كمان بنتغير….

    بس المعادن النفيسة لا بتتغير ولا حاجتين…
    خلي جلدك تخين و لا تتأثر ما الحكاية بقت بالدين وبالطين بالنسب …بالميكرفونات بالخطب
    كما قالت بت وراق عن حميدة….

  10. ابكرون قال:

    عزت اخوي والعزيزة بت وراق وحياتكم انتو وانا (من كم سنه…ههههه) بنأذن في الفاتيكان ياخ الناس بقت حتي الدعوة ما بترد عليها وتعلق (طبعا هناك استثناء قليل لاعزاء لهم طرق تواصلهم لكن خارج اطار المدونة) ولا حتي الانتقاد بهز شعرة ….حتي المؤسسين الأوائل والبعدهم والجيل الثالث …وشلة سوداننا في الفيس بقت ما شاء الله انشط من سوداننا الاصل…….طبعا كل زول مخير فيما اختار ….لكن بس نحن بنبكي علي خولة التي لها اطلال في (برقة ثهمد) …والبكي دموعه بتجف سريع ونرفع الفراش وكل زول يقبل شقيش ما يقبل ……تسلمواحقيقي

  11. smukhayer قال:

    الأعزاء
    العميد أبو عصمت
    الخبير أبكرون
    العتيد الكناني
    الشفيف نيام
    واللفيف شمباتي
    والعفيفة بت وراق
    نقل فؤادك حيث شئت من الهوى … ما الحُب إلا للحبيب الأول، كم منزل في الأرض يألفه الفتى … وحنينه أبداً لأول منزل، كانت وما زالت وستظل أم الديار “الدانقا” القمردينة هي مسقط رأسنا الإسفيري، حيث نشأنا وترعرنا نتياً، وقصتنا معها زي قصتنا مع عازة الفراق بي طال، نلوص في أركان المعمورة ونجيها شايلين شوق الدنيا كووولو (على قول حبيبنا جبرا)، وصدقتم في قولكم الحال من بعضو، ما أصاب الحبان في كل مكان ينعكس على ساحتها، ولكنه ليس جفاء أو جحود لا سمح الله بس هو شوية فتور، ولمن الواحد يخزي الشيطان ويتشجع ويجيئها، يجدها زي الحمام في الشتاء، أول كشحة باردة وصعبة وبعد داك تحلف يمين ما تفارقها ههههههههههه
    عموماً شايف في نوبة شعر مدورة فنقوم نربط حمارنا مع حمير الشعر
    مساء الخير يا أمير ….
    يا عزت يا كبير ….
    يا داعي النفير ….
    تنادي في الدانقوست ….
    تعالوا بلا تأخير ….
    أبكرون الخبير …
    نمة ودوبيت مع نقدك الخطير
    وبيتين نظم نيام … من شعره الغرير …

    شكلها ما ظبتت الحكاية عموماً مشتاقين وأعفوا لينا الغيبة …

  12. عزت قال:

    ما ظبتت كيف يا المخير…

    تحياتي وأنتم تعطرون الدانقا بي كلماتكم الشجية المحوجة والمنعنعة

    يا بت خلي القهوة…!!

  13. سماسم قال:

    د. عزت السلام عليكم
    هو مش كويس الناس بتظهر في عزيز لدينا …. لما أُنشا الموقع وكانت عنده اهداف ومنها تكونت زاد المسير التي لم يكتب لها السير للأمام….. ومن أهم أهدافها مساعدة الفئات المحتاجة … البداية كانت بقوة لكن الحصل شنو تاني … الله أعلم … التحية للأخوان الذين قادوا تلك المبادرات ونتمنى ان تُفغل تلك المبادرة مرة اخرى

  14. AFLAIGA قال:

    العزيز خالد مدنى :
    يقول الاعراب المخلفون شغلتنا اموالنا واهلونا
    ويقول افليقا المتلوم شغلنا اهلونا
    فى البدء احسن الله العزاء
    وفى الختام لا نقول الا ما يرضى الله
    ولا نقول الا ان اللوم كبير والعشم فى السماح اكبر
    والعشم فى سماح الكل ايضا وليس خالد مدنى فقط
    رحم الله الوالده واسكنها فسيح الجنات .

  15. عزت قال:

    سماسم وأفليقا سلام
    فعلا يا سماسم عين وأصابت المدونيين…. اضافة لتعدد المشغوليات ولي (جري الوحوش) الذي ظللنا نمارسه فقلل ساعات صفانا…

    اللهم أرفع البلاء والغلاء من بلادنا….
    وأهم حاجة يا رب ان مذبلة التاريخ تحتاج لمثل هؤلاء الحكام….

  16. الكناني قال:

    الدكتور الرائع ابو عصمت
    اجمل ما قيل حتي الآن هو ختامك أعلاه ( وأهم حاجة يا رب ان مذبلة التاريخ تحتاج لمثل هؤلاء الحكام…. )
    لله درك حتي المذبله لاتحتاجهم….. ودا اكيد
    كسرة :
    مخير :
    ما كنت قايلك مبدع قدر كدا
    ابكرون :
    اكيد ناس هناي

  17. نيام قال:

    الدانقوست:
    الي كل الاحبة اعتذاري ..لكم خاص ودي و عظيم فرحي لهذه العودة المأمولة لهذا الشمل الرائع…
    والحقيقة يا عزت تاوقت كتير و لما لم اجد احد في البيت المهجور ذهبت الي بيوت اخر ثم عدت فجأة لاجد ان بيتي المهجور قد اوقدت شموعه و فرشت بطائنه و استوقد الدانقو المسارج
    افرحي افرحي افرحي
    لفوك في ضو الصباح
    وكت الفتر غادر و شاح
    وكت الكجر اطلق صراح
    الكلمة في ميثاقنا عنوة
    و كل غنوة
    تهاتي تلحق فرجتك
    عشان تصادف مرقتك
    وتمتع الصبر الحزين بفرحتك
    يادانقا شاربة من الولاد حر الكلام
    كل الولاد البشبهوك اجهزوا جهاز تمام
    شان بكرة في العصرية تعصري الصبر اللذيذ
    وتقدمي الواجب المعتق زي نبيذ
    من باترا او رودوس اجيب ليك الكسا
    يفهم كلامك كل زول قام احتسا
    صدق الحديث عند المسا
    وشاف روعتك يوم كنا في الزمن العسا
    لمتين نراجي و ننتظر
    كمل الصبر
    ما تطلعي

  18. AFLAIGA قال:

    نيام العزيز : طولنا ما طارحناك مع انك دوما تطرحنا ارضا شعر :
    يوم قال نيام يا دانقا قومى وافرحي
    ما عرفنا فرحت شان نيام
    ولا الفرح يوماتى دانقا بتشتهى
    ضو الصباح اتلف بيك
    لما الفتر غادر وشيك
    ما بنرجى تانى وننتظرما شوقنا ليك
    بتق وقت كمل الصبر
    وطلعتى زى ما بنشبهك
    لو تانى غبنا من الحضور لا نحنا اولاد الفجر لا بنشبهك

  19. نيام قال:

    العزيز افلي…اشراقات صباحك فيها طعم الدانقا و انفاس الدانقو …عمت صباحا صاحب الابداعات الجمة…و التحية موصولة لكل الدانقوست و علي رأسهم خالد مدني…

  20. حنين قال:

    العزير عزت والمدوناتية الاكارم .
    سلام .
    الواحد لمن يتاوق ويلقى الاحباب كلهم موجودين بيحس بى فرحة ناعمه وبيتلزز بقرائة مايخطون ويستحى أن يشاطرهم الحديث حفظا للمقامات …
    ماشاءالله عليكم .
    دمتم سعداء…

  21. عزت قال:

    ودمتمت كووووولكم سعداء وغريري العين
    فعلا يا حنين الدانقاء بحروف المدونين تزداد ألقا…. وأهو نعرف الناس لسا عندها وقت مستقطع لها
    التحية برضو لي (خالد مدني)
    وللعقد الفريد الذي لا زال يذكرنا بالخير
    دمتم

  22. AFLAIGA قال:

    حاج نيام : لمن تقول لى عمت صباحا بتذكر طوالى عادل امام فى ( سمعت ان البعض من قومنا اتبعو الدين الجديد ) ههههههه
    الاحبه الدانقوست : كلما نعود بعد انقطاع فذاك استفتاء جاهز على انه لا بد من الدانقا ولو طال السفر … دمتم

    • عزت قال:

      بمناسبة عمت سماء دي يا أفليقا قالوا دخل (أبو جهل) إلي بني قينقاع كوفي شوب وقال: عمتم مساءً أيها العرب !
      فقال احدهم : عمتم ولا سبحتم !
      ففرط الجميع من الضحك وعزم أبو جهل الجميع شاي بحليب وفي رواية اخرى “شاي عدني”
      وعمت الفرحة أرجاء الكوفي شوب
      —–
      من نكات من الجاهلية

  23. smukhayer قال:

    الحلوين عيال القمردين
    كميات مهولة من السلامات والأشواق
    تُشكر جدن يا أبوعصمت ‘لى إعادتنا إلى عهد الإبداع القمرديني والإندياح الوجداني النيامي والإمتاع الأفليقي وعم يبالغ نيام في قوله
    الكلمة في ميثاقنا عنوة
    و كل غنوة
    تهاتي تلحق فرجتك
    وما أروع قول أفلي:
    وطلعتى زى ما بنشبهك
    لو تانى غبنا من الحضور
    لا نحنا اولاد الفجر لا بنشبهك
    بالله عليكم ولو من حين إلى حين كبوا لينا من القمردين المعتق ده ، وعلى قول حنين بيفرحنا وما أحوجنا إلى الفرح في زمان الكرب هذا
    ودمتم سالمين وهانئين وكتابتكم لذيذة بطعم القمردين

  24. abushagrod قال:

    وطلعتى زى ما بنشبهك
    لو تانى غبنا من الحضور
    لا نحنا اولاد الفجر لا بنشبهك
    السادة عشاق القمردينة
    ( تغيبو نشتاق ليكم
    يجو دموعنا تقيف شهود )
    ما اروع الكلام الفوق دا
    علا الناس عندها اعذار
    وانا بالذات وبعد كام وعشرين سنة من الشلهتة والودار
    قررت ابدا من الأول
    وداير مساعدتكم
    وخصوصا دكتور عزت المرطب والموضوع بسيط جدا
    شوفو لي عنوان روضة الحنان
    ان خلاس قررت ابدا من الأول
    وباقي عمرنا دا كان وصلنا لنص المسافة اكون ما قصرنا تب
    في انتظاركم وفتكم بعافية

  25. عزت قال:

    غايتو دار الحنان دي يا أبو شقرود الا تسعل منها مساعد البشير (وليد الميرغني) باقي متخرج منها وجات في السي في بتاعتو…
    عموما انت خليك قريب كان تاوقت كل مرة ولقيت الاستاذ نيام متجلي…. شوف أكان ما جيت الأول

  26. عزت قال:

    بالمناسبة خالد مدني الجاب الموضوع دا قدر وقرر انو يتخارج بجلدو من هذه البلد (الحلوين أهلها الا مظلومين) مغتربا مرة أخرى…… غايتو بقدر ما حنحزن لفراق الأخ خالد مدني… حنسعد لأنو يبدو لي أنو الوكت برات البلد على الأقل حقك ومافي كلاكلة باللفة والا عقد في السامراب…. فنرجو بعدما يتوفر ليهو الوكت يقوم يدينا منو شوية ويتداخل في القمردينة…

    نرجو له التوفيق…

    على فكرة يا ناس جوة عاوزين نقعد معاهو مش عشان نقنعوا ولكن أهو نقدم السبت… عشان بعدين لو قلنا ليهو جيب لينا حبوب الضغط ما يتأخر….

    الاقتراح الذي تمخض من مهاتفة ود الزبير لي وابلاغه بموضوع (خالد) انو عصر السبت نتعدي سويا في مكان عام….. فمن أراد أن يؤازرنا فله التحية…. وأهو (أكلة شهية وجلسة ندية بوجودكم أيها الأحباب)

  27. عزت قال:

    حدد ود الزبير مكان اللقاء في مطعم (الكرنك) بالرياض جوار أبراج مكة… الرابعة عصر السبت
    تعال ومعك آخرون

  28. smukhayer قال:

    أبو عصمت والحبان في كل مكان
    سلام ومحبة واحترام
    والله إذا عزم فليتوكل، وبتقييم عطاء خالد في فترة المهجر مقارنة بشارع العودة ستترجح كفة الخلاء (ما أبو ود الخلاء هههه)
    ثانين: مافي داعي لحيث أن وكذلك حأقوم أركب مكنة نيام وأسكب قريض:
    يا عزت ما أحلاكم وما أحلى الغداء معاكم
    طبعن روعة للدين ورب الزيتون والتين
    كلام مُجرب العشاء في المغرب مع القمردينين
    يا أبوعصمت لقيتني كيف؟؟ أوعى تقول لي شغال وكدة لأنو حأضرس ليك الخلق دي وأعمل إدريس جماع هههههههههه

  29. smukhayer قال:

    بمناسبة القريض عجبتني قصيدة لولدن لينا أو أخونا الصغير كريم أحمد الذي فوجئت بشاعريته وأدهشتني القصيدة بعذوبتها وعفويتها وصدق محتواها :
    سين سؤال
    عايز جوابك يابلد
    جاوبني ياخ؛ بس فد سؤال
    يمكن سؤالين بالعدد
    وريني ايه حاصل عليك؟
    وريني ليه حسك سكت؟
    وينو صوتك في العذاب
    تنده تقول احد .. احد
    وين باقي رسمك وزرقتك؟
    وين زعلتك وين حرقتك؟
    كم ماتو فيك من الولد؟

    بس فد سؤال
    يمكن سؤالين بالعدد..

    كيفن وليداتك غراب؟
    لي شن مسففن التراب؟
    والجوع يقطع في البطون
    والذله مقبض كل باب؟
    كيفن عينيك تقدر تنوم
    تتغطى بي تحت السحاب
    والشمس مابان ليها نور
    والنيل صبح متل السراب؟

    ماهن كتير بس فد سؤال
    يمكن سؤالين بالعدد

    الضحكه وين؟
    البسمه وين؟
    وين العيوينات والأضين؟
    وين عم حسين
    الراجل اب باب ضلفتين
    يحكي ايامو الزمان
    يحلف يقول
    انو البلد مافيهو شين
    انو البلد كان حر وزين
    والرادي فيو غنيتين

    (القال ليك بلدنا جعان كذب اكبر اكذوبه؛ والقال ليك بلدنا خراب اداك صوره مقلوبه)

    (جدودنا زمان جدودنا زمان وصونا على الوطن؛على التراب الغالي الماليو تمن)

    بس فد سؤال يمكن سؤالين بالعدد

    هو شنو التراب وشنو الوطن؟
    وشنو المحطات والمدن؟
    وايه الغنى؟ وايه الشجن؟
    ولمتين نجرجر في الي كان
    ونداعي ايامنا المضن؟

    جاوبني ياخ بس فد سؤال
    هم بس سؤالين بالعدد

    اظني كترتهم عليك
    سين سؤال في سين سؤال
    احترت شايفها في عينيك
    والدمعه نازله مع الخريف
    راجي الربيع يخضر اديك
    مكسور تلتق في الجروح
    بتندب الحال العليك

    وانا بس بقول
    (حقك تحرسو ومايجيك
    حقك تقاوي وتقلعو)
    قوم من سباتك اقلعو
    قوم من حدادك اقلعو
    و ااه يابلد

    كريم احمد

  30. عزت قال:

    التحية لكل من تعامل مع القريض وفي نفسه شئ من حتى بس الحكاية دي لو استمرت بالطريقة دي جوع وجري وحوش ورزق ما بحوش الناس ح تركز مع القريض التاني لسد رمقهم ورمق أولادهم…

  31. smukhayer قال:

    أبو عصمت والحبان الكرام
    سلام ومودة واحترام
    صباح جمعة الأمل، طبعاً جمعاتنا زي دمعاتنا، ما فيهن غير الصبر والأمل، الله يجعل جمعاتنا الجايات زي جمعات جيرانا وأبناء عمومتنا العرب، طبعن هسة في ناس يقرأوا جنس الكلام ده يقولوا يا فتاح يا عليم، ناس برة المرطبين مالم بيدعونا ويدعوا علينا بدل يدعوا لينا، طيب الله يفتح عليكم أبواب رحمته الواسعة وأورزاقه اللامحدودة عشان الحال ما يصل المرحلة الخايف منها الدكتور بتاعت القريض بدلاً عن القروض، يا ربي ناس مشاكل والأجيال الصاعدة بعرفوا القروض و(الحكاية دي لو استمرت بالطريقة دي جوع وجري وحوش ورزق ما بحوش الناس ح تركز مع القريض التاني لسد رمقهم ورمق أولادهم…) ولناس قروب (ج) و(د) القروض الحار كان البديل الذي نلجأ إليه في حال قرصت معاك والوجبة الجماعية ستتأخر شوية والحزم المنزلي يمنع التجاوزات الفردية فتقوم وأنت المرسال إلى الفرن أو الطابونة على قول ناس أم درمان والعاصمة بوجه عام.

    ذكرى حارة بطعم القروض:
    قبل مرحلة مشوار الفرن عشنا زمان نسمع فيه صوت بوق عجلة “إسماعيل” بتاع مخبر الحدربي على الباب الصغير (باب النسوان) يحمل في سلتها الأمامية الخبز بأنواعه من مُشمس (عليها برادة زي نشارة الخشب) للناس الكُبار بتاعين الدايت والسُكري، والخبز الطوستة الفاخر للجمهور (بحجميه الكببر والصغير لسندويتشات المدرسة)، وفي المغربية تأتي عربة البيطري يجرها الحصان وتحضر الحليب الطازج والمبستر على زجاجات شفافة مغطاة بالقصدير ويُحاسب شهرياً بالدفتر، وفي الخريف يأتن ستات دري (نساء البقارة) فيبعن الحليب بالجردل ومعه الفُرصة (الزبد البلدي) والسمن، فضلاً عن القراقير التي كُنا نلهو بها ونصقع بعضنا البعض حتى تدمي الأيادي، والآن في زمان الإنقاذ صار الصغار يتصقعون بالسموم بدلاً من قواقع ومحار الخريف وعلى قول الأخ الصغير كريم آه آه يا بلد ……

  32. Dakeen قال:

    السلام عليكم صغار وكبار
    دون عذر بدون اعتذار.

    مفاتيح كارنا راحت وكل النوتات والمفكرات ودليل الهاتف في الكار والمشكلة الكار مدورة كمان لو ما اديتونا المفاتيح بتكمل بنزينا وبتبطل . ونركب كرعينا ونجيكم والمشكلة نركب راسنا يودينا لي بلدا طيرا عجم .
    تحية للجميع وقلوبنا هناك واشواقنا هنا والحروف متلهفة للتبرج و الخروج الى حديقة القمردينة لتجد من ينظر اليها ويغازلها.

  33. عزت قال:

    والله فعلا آه يا بلد يا الصادق أخوي….. وألف حمدا لله أن جاء مولدنا قبال كمين سنة (ما تعدش) لكي يكون عندنا ذكريات حلوة كتلك التي تفضلت بها وتفيض مذكراتنا بمثلها وفي كل صوب بدأ من القروض الى منصات الفواكه في سوق الخرطوم…

    ومرحب بيك يا دكين ونعتذر بالنيابة عن سيسم القمردينة… باقي طولت ويكون ما اتعرف عليك…
    أهو بعد شوت طوالي انشاء الله ضفاري…. أنحنا لاقين

  34. عزت قال:

    أرسل الي (خالد مدني) صباح اليوم رسالة (فاضية) فقلت لزوجتي فقالت (يمكن غلبو التعبير)….. فعلا يكون غلبو التعبير فالمسافر عن بلدو دائما يكون متخوفا من الجديد الآتي… والظاهر فراق أهلو وصحابو صعب عليهو….

    ثم أتبعها برسالة بعد حين شاكرا دعوتنا له باللقاء عصر اليوم ومعتذرا عن لقاء الأحباب في المطعم لظروف اسرية…

    نتمنى للعزيز خالد مدني كل التوفيق في مشروعة القادم…. وتمشي وتجي بالسلامة غانم باذن الله

  35. ودالزبير قال:

    الاخوه والاخوات لعل ما دفعني للعوده للكتابه هنا هو توجيه لوم وعتاب لاخوه كنا نحسبهم اقرب الينا من حبل الوريد لكنهم غابو في واجب العزاء هذا فسافر اخونا خالد لمهجره الجديد وفي حلقه غصه نعلم ان للناس ظروف لكن في عصر ثوره الاتصالات كان يكفي ان يرفعوا سماعه الموبايل لتقديم واجب العزاء كما وانني استغربت من ان الكثيرين لم ياتوا لوداع هذا الرجل الاصيل خالد مدني قد يبتسم البعض الان في نفسه ويقول واين انت من المدونه والمدونيين والرد حاضر لقد ابتعد لاحفاظ على علاقتي الانسانيه مع الجميع لكني لم اقم من اي واجب او تجمع للمدونيين لا فرح او كره واحيانا اتصالاتي التلفونيه او رسالئي لم تنقطع ابدا لكن لان الوضع هنا اصبح ام ان تكون معارض دائم او تنسحب فقد فضلت الانسحاب
    عليه اكرر لومي وعتبي على هؤلاء الاصدقاء الاعزاء واتمنى ان تكون هفوه غير مقصوده

  36. AFLAIGA قال:

    العزيز ود الزبير :
    طبعا غير مقصوده بتاتا .
    العزاء تعذر الحضور وكتبنا موضحين العذر
    الوداع اوضحت للاخ بشاوى اننى كنت برفقة الابن عبودى بفراش المرض .
    الاتصال للاعتذار دى متلومين فيها ومحقوقين لخالد .
    وبما ان اللوم عشم وسع الله العشم وضيق اللوم .

  37. عزت قال:

    شكرا يا ود الزبير على كلماتك الطيبة في حق خالد مدني وعتابك الظريف…. كويس انك اعترفت برضو بتقصيرك عن المدونة…

    خلاس سمحنا ليك وهسة أنا كان ما جيت كان تعليقك يكون لسة في انتظار الموافقة….

    فالأخ استرايكر مشغول وفي عمل جديد أتاح لي مزيدا من الحريات في ادخال تعليقات المدونين والنشر لهم أن ود أحدهم ذلك..

    فللأخ خالد مدني كل التحايا والأماني الطيبة….

    عموما نحتاج أن نجرجر المدونين ديل شوية ونخرجهم من غياهب الحياة الصعبة دي بالتنفيث عن نفسهم في مدونتهم هذه ولكن الحكاية دايرة صبر…. أهو شوية شوية لقينا لينا كم تعليق في هذا البوست
    نرجو أن يساهم الكل بالكتابة والتعليق… على الأقل نعرف الناس دي لسة بتعرف تكتب في الكي بورد والا الموبايلات سحبتهم عليها…
    كووووولنا مقصرين وأهو البركة في (عزيز لدينا) فالناس ما زالت تغشى بوست الاجتماعيات وتهنئ وتعزي

    كسرة:
    في احدى نكت الجاهلية التي تعج بها النت
    وفي وفاة (جهل) سمع أبو جهل أحدهم يقول للآخر
    – عزيت أبو جهل
    فرد عزيت و لا ع الفحم
    فضحك الجميع وخرج جهل من القبر من شده الضحك وقلب العزا مسخره

  38. ودالزبير قال:

    افليقا سي سي عزت
    ما في حاجه اصعب من فقد الام وما بقدر استلف لسان خالد اتكلم بيهو لكني حسيت الم عميق في نبرات صوته وهو يلوم اخوه اعزاء والمثل بيقول اللامك دارك .. بالنسبه للكتابه يا دوك حقو تخصصو صفحه فوق زي الافراح والاتراح اسمها الموالون او او المناصرون او المنتفعون ودي خصصوها للناس العندهم عشم في الوضع الراهن او مناصري مذكره الالف اخ وشكرن

  39. ياسين شمباتى قال:

    هوووووى يا ود\ الزبير,منتفيعن لا !
    معارضون آآآآه !
    وعن الم خالد وغصتو فالحال من بعضو,,لكنا سمونا فوق ذلك..
    ولك منى كل الود والتحية وانت تصل ما انقطع وتود من اراد المودة..

  40. smukhayer قال:

    الحبان في كل مكان

    سلام ومحبة واحترام

    بداية جزيل الثناء وعميق الإمتنان للأخ أبوعصمت على ما يبذله من جهد مُقدر رغم تعدد مسئولياته (وكفاحه في عدة جبهات) من أجل الإبقاء على شمعة قمردينتنا والعة، وسبق للخبير أبكرون أن نحى نفس المنحى وهكذا دوماً العشم في كبار الدانقا (والكُبر هنا لإعتبار المقام المستمد من الإهتمام والعطاء).

    ثانين إلى الحبيب ود الزبير: بخصوص زعل خالد مافي شيء يتقال غير معاك الحق شئنا أم أبينا احن أضحينا في مقام الأهل، وعتب الواحد بيكون بقدر عشمه ومعزة الناس في قلبه، خاصة وأن الحبان الدانقوست بادروا بالدعاء وربما البعض بالزيارة أثناء مرض المغفور لها بإذن الله الفقيدة الغالية والدته فما بالك برحيلها، لكن على الحبان الذين أبدوا إعتذارهم وقالها عزت كلنا مقصرون مع تفاوت درجات التقصير لذا الأجدر والأنسب مهاتفته في مهجره الجديد بالدوحة وتطييب خاطره لإرجاعه كما كان في سالف الأوان.

    ثالثن: الاحترام والمحبة بيننا هما القدمان اللذان عليهما تقف أخوتنا وبهما تسير ولا علاقة لهما بالتوجهات، فلك أن تعشم ما شئت في الوضع الراهن ولك علي أن لا نزعل منك، لكن لا يمكن تفسير قولك (الدوك حقو يخصص صفحه فوق زي الافراح والاتراح اسمها الموالون او او المناصرون او المنتفعون) قد جافى الحق، على الأقل حق أخوتنا فمن حقك بل وواجبنا تجاهك إحترام أنك لا تنافق ولا تخفي تعاطفك مع النظام الراهن أياً كانت أسبابك، بس لا تضيق ذرعاً بنقدنا له وليس هنا سوى رأي ورأي آخر ولك أن تدافع عن مواقفك، لكن أقدر أن الأمر مرهق، لا سيما وأن الأكثرية ساخطة على النظام لكن تعال في الرياضة وكل ما لا سياسة فيه ولك علينا أن نقف معك فنحن بيناتنا الهلال والأمنيات والمعزات في الحياة🙂.

    كسرة أخيرة مدردقة:
    مع كل ما يقال عن تردي الرياضة وضعف مستوى فرقنا لا ينكر إلا مكابر ما تحقق من إنجاز لفريقنا القومي، فمع كل خيباتنا في مختلف الساحات أصبح لنا شأن كروي رفيع ويتردد أسم الوطن مع علمه في إعلام الدنيا المرئي والمسموع لذا نتمنى ونأمل وندعو أن يتمكن صقور الجديان من تحقيق المزيد من التقدم في البطولة الإفريقية وأن نسمع “نحن جند اله” في النهائي ولا يهم حتى وإن خسرناها فما فعله هؤلاء الفتية عزت عدة أجيال من تحقيق نصفه ،
    ودمتم حلوين وسالمين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s