سبابة فوق…!!

Posted: الخميس,26 أبريل, 2012 by عزت in اخرى

طبعا من العسير أن يقبضوك لو كنت تحكي عن تاريخ وأحداث مررت بها وأنت في معية مقدم البرنامج التلفزيوني ويكون شهودك المرحوم فلان والله يطرا بالخير فلان المغترب عن البلد وليهو سبعة وخمسين سنة والا رئيس البلاد الكان بيلعب معاك دافوري… فالموضوع سوف يمر عادي كالزبادي وتقبض الحافز اذا كان في احدى القنوات الخاصة (لأنو ناس العامة ديل بيقوا يحتسبو حقنا طوااالي شان كدا خلينا المقابلات) وتصير شخصية مرموقة يتصلون عليك بالهاتف لتقول مداخلاتك في أي موضوع مستقبلا….

سيان فالمتلقي وسط تلك الاحتفالات التي انتظمت البلاد بعد تحرير هجليج ورجوعها لي بيت ابوها بعد سلسلة من المعارك والحرائق التي قضت على الأخضر واليابس كان عندنا والا عندهم…. لا يستطيع باي حال من الأحوال أن يتهكم على المتحدث أو أن يصححه في أمر ما وسط السبابات التي ترتفع في كل مرة والتهليل بعد كل جملة… الله أكبر… فأكيد سوف ترفع سبابتك معهم وتصيح (الله أكبر)…. مش أحسن ما يقيموا عليك الحد وكدا….

فقد أسر الى صديقي بأنه دخل بالأمس الى حوش وزارة ما في مدينتنا الوادعة الخرطوم ووجد صيوانا مهيبا لا بد وقد دفع عليه الكثير ليضم منسوبي تلك الوزارة وقد تركوا الوراهم والقدامهم وجلسوا وسط الفول المدمس والبلح وهم يستمعون الى محدثهم… كان المتحدث يحمل رتبة عسكرية رفيعة ويلبس (لبس خمسة) ولديه عصاة صغيرة يهش بها على الموظفين الذين تراصوا أمامه وهم يستمعون ويهللون على الكرامات التي رافقت تحرير هجليج… فهل يا ترى ظنهم غنما لكي يقول ما يقول…

فقد أسهب في وصف جنود من الملائكة حاربوا الى صفهم وعزيمة قوية تحلى بها المقاتلين… ما أختلفنا فالمقاتل يكون شرسا جدا لأنه لو تقاعس فلا بد وأنه غرقان غرقان… لكين متل “أخونا المجاهد فلان مرت المجنزرة فوق جسده فقام اتنفض مهللا”  (واسعة شوية) والا “فلان لمن قرو ليهو بعض الآيات خرجت الرصاصة من صدره من تلقاء نفسها”…. (طيب فايدة قراية الطب والتخصص في الجراحة يا ترى).. والا (نيران البترول التي أضرمها الأعداء بعد هروبهم نزلت أمطارا وطفتها في التو واللحظة)…. وجنس المتاجرة بالشهداء وتحويل الصيوانات بتاعت العزاء الى ما يشبه الأعراس…. عاد من جديد  (وهسة نحنا من دربنا ماشين لي عرس شهيدكم في الوزارة) والذي أكرمه الله ونال الشهادة وهو يقاتل فئة كبيرة… وكم من فئة قليلة غلبت فئة كبيرة… وبعد يومين تلاتة طبعن مرت الشهيد سوف يتولاها ويعرسا أحد المجاهدين… بدل ما يفك ليهو بورة شابة…

فهل يا ترى أن كانت مثل تلك الكرامات تحدث في ساحة الوغى الحديثة التي تدور رحى الحرب فيها بآليات حديثة ورادارات وقاذفات بعيدة وقصيرة المدى وطيارات وأسلحة (ألي تاكل وواطي تاكل) لم لا تحدث عندنا هنا ما الحكام بتاعننا ديل هم هم ذاتم هنا وهناك فببركتهم أرجو أن يسهلو لينا المعيشة شوية… ويجيبوا لينا مثل تلك البركات… يعني تجي مارق من البيت وفرطاقة ما عندك (للذين لا يعرفون الفرطاقة هي ما قل من فئآت النقود) بتاع اللحمة يناديك ويشيلك كيلوين لحمة مشفية وبتاع الخدار أسكت (كب) وأولادنا القرو لمن عيونن اتقددت ونظرهم وجزمهم انهرن من الجري ورا التوظيف ويأجلوا البركات التي تأتي لهم ولأولادهم ومحاسيبهم شوية…. يعني ما ضروري أن يعرس الواحد فيهم تلات مرات… كفاية اتنين والعرسة التالتة دي فليهديها لواحد عازب قاعد يكون نفسو ليهو تلاتة وعشرين سنة… وليكتفي المعتمد بثلاث سيارات فالرابعة دي أستاذ الجامعة داك ما بستاهلا… وهكذا

بي كدا احنا حنقيف ونكورك معاهم …. وسباباتنا فوق..!!

تعليقات
  1. ياسين شمباتى قال:

    فوق فوق (عزت) فوق…
    تسلم يا حبيب فلقد لمست الجرح وابنت الغرغرينة !!!

    لكن ام رشاش وتوب مشجر دى لا تكون د / سناء !!؟

  2. المندهش قال:

    والله بالجد مشكلة خلينا سد مروي وبقت السياحه في هجليج بس في حاجة ما فاهما ناس شركة السكر ديل حكايتهم شنو … محل ماتمشي تلقاهم في ساحات الوغى وفي المستشفى لتفقد الجرحى وتوزيع الورق المطبوع بدون قيمة خلاص النيل الأبيض إشتغل ولا شنو ؟؟ طيب ما توزيعو ليهم باااااااسطة أفيد لهم

  3. بت وراق قال:

    اخى العزيز عزت
    الجمااااااااعه ديل من ناحية عندهم كرامات دى اصلا ما فيها شك قول لى كيييييف
    كل ما الناس خلاص تقرب تتوحد ضدهم وخزنة الدوله الببزخو منها تفضى تتسخر ليهم مصيبه تلم الشعب الفضل دا تانى معاهم
    وهاك ياتبرعات وقوافل والمصيبه يتبرعوا من مرتبنا بى تلاته ايام اجمالى ولا نقدر نقول بقم
    اه دى فى زمتك كرامااااات ولا لع

  4. بت وراق قال:

    شباتي
    دي ما سناء دي نثيبه
    ههههههههههههههههههههههههههههههههههههههههههه
    والتانيه دي اخته

  5. ياسين شمباتى قال:

    بت وراق…
    هههههههههههههههههههههههه,وانحنا ما اختنا ولا كيف!؟؟

    المندهش..
    مرحب بيك كتير ياخوى,,لكن انت المندهش ليها شنو !!؟ وى وى وى

    • المندهش قال:

      الأحبة الكرام والناس التمام … سؤالكم يا أخوي شمباتي ويا أخوي عزت من الإندهاشه .. إجابته في مشاركة اختنا بت وراق كل مانقول خلاص نضع عصا الترحال ونستقر في البلد تجي مصيبة تزيدهم قوة وتزيد الشعب الفضل ضعفا ووووووووووووالليل الليل مابنومو

  6. عزت قال:

    والله فعلا كرامات يا بت وراق….
    هسة أها الناس كوووولها وقفت معاهم واتبرعوا ليهم….. يا ترى حيقدموا لينا شنو؟

    غايتو يا المندهش… نحن الاندهاشة دي زمان حذفناها من مشاعرنا حتى لا يطق لينا عرق وما نلقى البداوينا

  7. ياسين شمباتى قال:

    ههههههههههههههههه,,ما رضيتها ليها والله !

  8. بت وراق قال:

    الاخ العزيز عزت
    اوريك ح يقدموا لينا شنو …. فى الاخبار قالوا ح يرفعوا سعر الكهرباء لدعم القوات المسلحه
    نستتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتاهل
    انا داير اسال انت موش وزارة الدفاع دى عندها ميزانيه اكبر من ميزانية التعليم والصحه ؟
    واساسا الدفاع عن البلد شغل وزارة الدفاع وبياخده عليهوا مرتبات وحوافز ورتب ؟
    والله البشوف التبرعات والقروش والخصومات للجيش يجيك احساس بانو جيشنا دا قاعد جنب الجامع الكبيييير!!!!!!
    نستتتتاهل

  9. ياسين شمباتى قال:

    بت وراق..
    عبجنى ليكم وسر بالى !!

  10. بت وراق قال:

    شمباتى
    انت معانا ولا بره مننا

  11. ياسين شمباتى قال:

    انا مع التانيييين !!

  12. بت وراق قال:

    شمباتي
    طييييييب ماااااااا ديل نحن ذاتو

  13. ياسين شمباتى قال:

    اصلو لا !؟
    كان كدى الواطا فى خشمنا !

  14. عزت قال:

    سلام يا أحبة

    أسمح لينا يال المندهش نندهش شوية ونستغرب كمان
    انتو تعالوا ناس بشة ضحو بالبنية أم توبا مشجر مالم… يعني مشكلة سغيرة كدا بتاعت مليونين تلاتة بالجديد وشويت لعب ضفاري في (الوزارة) ما بين الأحبة يقوموا يودوهم الشارع….
    تستاهلي انت يا (سنوية) تمشي هجليج وتقعدي مع وزير اعلام الجنوب في قناة الجزيرة و(تفتي) معاهو لمن يآآآآمن وبعد دا كولوو يضحو بيك….
    انشاء الله تكون ليك استراحة محارب ويرجعوا الطلقة في مسماها ويدوكي رضوة كمان……!!

    كسرة:
    بركاتك يا شيخ شمباتي تعمل لينا كمان شغل في القصر لمن تفرتقوا كوولوو

  15. ياسين شمباتى قال:

    البشاوى….
    برييييييييييييييييي,,,,جنس التانين بتاعين افليقا ديل ما بنفعوا معانا !!

    عزت….
    هههههههههههههههههههه,,,,انتظر لى ليهم بس,,امانة ما بخليك تنبسط بسطة ! بس بياضى بررررررررا

  16. بت وراق قال:

    اخي عزت والعقد الفريد
    انت لسه سياسة الحكومه دي ما وقعت ليك ولا شنو هى الظبط كده زي سياسة اولاد الشلاليه فى التجاره اها قول لى كيييف
    طبعا اولاد الشلاليه عندهم بوكسي بتاع بضاعه مشكله يتفقوا مسبقا مع مجموعه من الناس يمثلوا انهم بيشتروا وملمومين في البضاعه ولو تابعتهم تلقاهم بشيلوها من هنا ويرجعوها بي هنا زي الحكومه تمام المقصود مسار وليس ثنويه عملوا موضوع الخلاف دا عشان يبقى حديث الصحافه والناس عشان يقولوا فى مشكله ويشلعوا (مسار الما سار ) وبي وراء تانى يرجعوا ست الحسن والجمال ام توب مشجر وتبقى الشجره براها
    بالله اها لقيتني كيييييييييييف

  17. المندهش قال:

    أنثى وتوب مشجر وكلاش أحلى خلطة بس ناقصة الدلوكة عشان نحت النبق كووووولنا … والما معانا يزح بعيد

  18. قرن شطة قال:

    والله يادكتور عزت الكلام قلتو والعليك سويتو …الباقى يعلموا ربو! عجبنى الوضوع (وهاسة) وخاصة موضوع العربية للاستاذ الجامعى!…معقول ي اخى درداقة ماقدرين نتصرف معاها!
    تحياتى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s