الجمال والقبح وجهان لعملة واحده وأمران نسبيان فقد خلق الله الإنسان محبا للجمال ولكي لا يختل الميزان لم توضع قوانين محدده وكانت طاقه حواء من هذا الجانب هي الأكبر فحواء مثلت منذ الأزل وعلي مر العصور المدخل والإلهام للكتابة والشعر وحتى الأساطير ويمثل (الوجه الحسن) لصاحبه جواز سفر
يسري في جميع الأقطار وبالرغم من نسبيه الجمال فان الجميل جميل (لايختلف عليه اثنين) أما مقولة الجمال جمال الروح فلا اعتقد انه أصبح لها سوق رائج فمع زمن السرعة أصبحت الأس ا م اس بديلا عن الكلام المنمق وأصبحت المنتديات (علي قوله عمنا حبرا) اكبر مرجع لغوي وعلي قوله جيم كاري (أصبحت مقوله ترددها القبيحات) تفتح الأبواب للجمال وينال صاحبها الحظوة في المجتمع والكل يريد الاقتراب والتصوير منه
أما اسواء أنواع التمييز الشكلي فهي إعلانات الوظائف (مقبول الشكل حسن المظهر) ودع عنك شهاداتك خارجا ومرر لنا صورة من شكلك ويأتي علي حواء وبالا من خلال المثل (سعد الشينه)
سؤالي لماذا يحاكم الإنسان من خلال مظهر خارجي؟؟
سوداننا 
الفنجان سلام
من الأشياء التي تساعد الشخص في ولوج قلوب الناس جمال الشكل الخارجي ولكن إذا كان الجمال قشره فقط ستجدي أن نفس هؤلاء الناس قد إنفض سامرهم من الشخص الذي إجتمعوا حوله لجماله فقط فلا بد من جمال الروح إضافه للجمال الخارجي الذي وكما ذكرتي هو شئ نسبي .. يحضرني هنا تهافت أخواننا في سودانيزاونلاينز على كل بوست تضع صاحبته صوره جميله حتى ولو كانت مسروقه من إعلان فيلم هندي .
حباب فنجان :
اما سؤالك :
لماذا يحاكم – الانسان – من مظهره الخارجى ؟
فهو ثلاث اقسام :
* لماذا يحاكم : والسؤال هنا لماذا المحاكمه ؟ ومن يملك الحق فى الافرار بشان الناس فمن منحى دينى لم يكن الله ظلاما للعبيد فى توزيع الجمال وعليه لايمكن الحكم على الجمال من المظهر !! وعليه لاسلطة لاحد فى الحكم على اخر مخلوق مثله فى اى منحى .
* الانسان : وهو محور كل التقييمات وهو موصوف من رب العزه وليس بواصف حتى الذين اشتهروا بالوصف وطلب الوصف من قوم صف لنا ما هى ؟ وصف لنا ربك ؟ فقد باءوا بخسران مبين – والاصل فى الانسان انه موصوف من قبل رب الناس بان الله قد خلقه فى احسن تقويم ثم ردده اسفل سافلين بسلوكه اللاانسانى الذى ينتهجه .
* المظهر الخارجى وهو نوعان مظهر مادى ومظهر جوهرى فالمادى هو ما ترتدى او كيف تمشى او كيف تمارس حياتك وهى صفات اما مكتسبه من مجتمعك او موروثه من اسلافك وقد حددها الشرع بنوع المشية وطريقة التادب فى الكلام والممارسه – وجوهرى وهو ما يصدر من الانسان من حركات وسكنات تدل على شخصيته كالابتسامه واريحية التعامل وغيرها من المحسوسات – ولعمرى انها ما يمكن الحكم عبره على الناس !!
عموما نحن لاندرى من هو الشخص الديكتاتورى الذى فرض علينا ان البيضاء جميله والسمراء شينه والطويله جميله والقصيرى شينه ووووو لكننا بالطبع وانا شخصيا لا اكترث بمثل هذه الاوصاف مش عشان مصنف شين !! لكن لانها كلها زائله ويبقى جمال الروح . طبعا احيانا يقال ان هذه مبادئ الشينين كما القناعه مبادئ الفقرانين . ولولا اختلاق الاذواق لبارت السلع .
سلام فنجان سلام
حقيقة الجمال جمال الروح لان الانسان بيتعود علي اي حاجة وبتبقي ليهو عادية زي البطول من الفول الحار بزيت السمسم والشمار والجبنه ويقعد يقول والله لكن !!! والمعاهو مستغربين من كلامو لانو الفول كل يوم معاهم وما قادرين يقولو ليهو … لكن جمال الروح لا يعوض ولا يمل وكم من جميلة تصير قبيحة بعد المعاشرة وتخطي مرحلة الانبهار … بالمناسبة جريدة المشاهير صباح اليوم جايبة صورة لسيدة سودانية قالو شاركت في مسابقة ملكة جمال العرب وكانت التعليقات بالضبط تعكس الطرح اعلاه … رايكم شنو في هذه المشاركة ؟
أفليقا
عراف ذكرتني قصه الزول لمن تسأله من زول عرس قريب ويكون السؤال : أها مرته سمحه ؟ يقوم يقول ليك والله أخلاقها حلوه خلاص ! أها هنا إنت طوالي مخك يمشي إنو المسئوله عنها مش حلوه ولو مامصدقنا أسأل العنبه الراميها فوق بيتنا
خالد مدني بالله إنت بجايه وأنا قاعد أفتش ليك بهناك .. بالله شفت ناس المشاهير ديل بيعملوا في شنو أخوك أداهن في حنانهم غايتو عشنا وشفنا قال مسابقه جمال قال
ود الزبير : هو بالله قاعدين يسالو كده يقولو اها مرتو سمحه ؟ وهم مالم ومالا سمحه ولا شينه !! لو بعدداك بيلموا ليهو شيرنق نظام بدل اعانه على المصاب الجلل ممكن نسمح ليهم يسالوا لكن لا مساعده وشيل حال ما كويس ولا شنو ؟ شيئ مؤسف ارتباط جمال الاخلاق بشناة الخلقه !! وكمان يبرروا ليك بانو ربنا ما بدى الاتنين سوا !! قصه غريبه ذكرتنى الزول البعرس مره شينه عشان ما تعاين لى زول تانى ويخش بيها الجنه .. اتخيل الفهم ده واصل وين – والقصه كلها مرجعا انو لا المراه مقدره حق قدرها ولا الرجل مقدر حق قدره وده اسفل السافلين القالو ربنا ذاتو !!
شباب : سميحه بت البوشى بتاعين العماره الفى حلتنا بقدر ما حباها الله من الروقه والترطيبه الا نها تعانى من عاهه فى الرجل الشمال تجعلها مصنفه بانها عرجا رغم ان مراحا مراح ترطيب وعلى قدر متوسط من الجمال قووول شينه عديل شنو يعنى مش مرطبه – يوميا يكطرق بابهم مجموعه من الشباب طالبين يدها واعينهم على دكاكين الاسبيرات والشاحنات البتسافر الغرب وتاتى محمله والقروش الفى البنوك وكلهم يتعللون بان الجمال جمال الروح والاعاقه دافع قوى للنجاح فى الحياه ويكون معظمهم لم يروا سميحه اصلا وبعضهم اكتفى بسماع جزء من قصتها وخاصة الجزء المتعلق بالمال والترطيبه – سببت هذه الظروف نفسيات لسميحه حيث انها تصطدم كل يوم باصرار اخوتها على ان يزوجوها زول يكون عاوزا عشان جمال روحا لمن روحا طلعت وما لقو زول فى النهايه تقدم ذلك الشاب المرطب من اسرة حسن مطاحن وختف البنيه من الشباب وزيادة الخير خيرين والقروش بتجيب قروش – بعد فتره عادت سميحه من المانيا تمشى الهوينى كما يمشى الوجى الوحل مستقيمة الساقين وبجمال باهر – على شمارات كان دوما ما يضحك على شباب الحله مخاطبا اياهم شفتو القروش لمن تتلمى مع القروش بتسوى شنو ؟ اسى والله كان عرسا واحد منكم كان كراعا التانيه ذاتا بطلت قومو لفو فقرانين انتو احسن حاجه تكوسو ليكم عريس مش عروس قال جمال الروح هاك جمال الروح ده !!
لا أعتقد أن جمال الروح فقط كافيا لتنجح المرأة و تصعد كالصاروخ في سلم الشهرة و المجد ان كانت قد ولجت عالم الموضة و السينما و الشهرة او حتى الظفر بعريس لقطة فاختيارها الأول غالبا ما يكون بناء على تقاطيع وجهها و شكلها العام ثم يأتي بعد ذلك جمال الروح ليؤكد علي الاختيار و يكون ضروريا لاستمرارها و لبقائها و نجاحها في ذلك المضمار
وفي ذلك يستوى الجنسان فمرات وسامة الرجل و جمال المرأة يكون سببا في نجاحهم خد ليك شريحة بتاعت بنات و أخرى بتاعت رجال و انظر الي من يذهبون لانجاز عملهم في كاونتر به عدة موظفين .. دائما الوسيم ما تقصده البنات و الرجال تجذبهم الجميلة و ان كان الصف طويلا
اختي فنجان قهوة
الجمال جمال الروح حتي لو الزول بقي شين روحو الحلوة بتغطي ليهو وبكون جميل في نظر الناس والناس في نظري كلهم حلوين لكن الجمال دا شي نسبي بختلف من زول لي زول
عندنا في الحله بت سبحان الخالق فيما خلق جميله ومهتمه بي روحا شديد لكن مع الاسف دمها تقيل وبومه ما بتعرف تتكلم ولا بتتكلم مع زول وعاجباها ليك روحا شديد
اها احسن دي ولا واحدة تكون روحا حلوة
بالمناسبه الجمال لازم يكون في شويه ما كتير لانو علي قول واحد قريبي انا لمن اصحا الصباح من النوم بشوف اخلاقا وروحا الحلوة ولا بشوف وشا
من الصعوبة بمكان تحديد بالضبط وعلي وجه الدقة العلاقة بين جمال الروح وجمال الوجه لكن غالب الامر ان جمال المظهر مفيد لصاحبه في بعض بقاع العالم . انا اظن ان جمال المظهر و رصانته اي ان يكون الشخص نظيف ومرتب ومهتم بالعناية الجسدية والنظافة الشخصية اكثر انواع الجمال جمالاً لانه هذا ما يمكن لنا ان نحسنه و نقننه اما الخلق “او الخِلقة” فهو ليس من شأننا وعلينا فيه فقط بالقبول.
اذكر جيداً ان اخواتي الشباب كانوا يعولون كثيراً علي جمال الوجه وينفرون بشدة من القبح وحتي ما دون الوسط من الجميلات والحسان ولهم في ذلك مواقف مضحكة كثيرة …اذكر منها ان اخي الاكبر كنت مرة احاوره واكدت اغلبه…فاستعنت ببيت الشعر الذي يبدأ ب “ليس الجمال بأثواب تزيننا” و ينتهي ب “انما الجمال جمال العلم والادب”…قال لي..وبعد ان نظر اليّ نظرة طويلة تغيرت فيها ملامحه الي ما يشبه الغيظ ثم تمتم بيأس…”خلاص حفظتي بيت الشعر البيحفظوه البنات القبيحات دا؟”
وأخي الآخر كنت اكلمه عن جارتنا تحاول اقناعي بالحجاب …فقال لي بكل جدية..”كلميها وفهميها ..قولي ليها اخوي بيقول ليك انتي ذاتك ما عليكي حجاب” بمعني انه البنت قبيحة ولا تمثل فتنة لاحد. يعني باختصار نحنا بالذات في السودان ورغم تدني مستوي الجمال الا اننا نقوم بجلد من لم يمن الله عليها بالجمال او لم تقم هي نفسها بتحصيله كاللائي صبرن وقمن في آخر المطاف يسعين اليه وقد وصلن بحمد الله الي ما سعين في طلبه…واصبحت الواحدة تتجمل وتدعي الجمال حتي تُعرف بانها فلانة الجميلة..والله اعلم…
الجمال جمال الروح صدقوني صحيح لكن ربك قادر يجمع الاتنين في شخص واحد اما اذا اتوفر الجمال الخارجي بس وطلعت مره نقناقه تكره اليوم الماك فيها ولو طلعت اخلاقه طيبه ودوده تخليك تشوف كل النسون وهم وهي بس ستهم .
كل الكلام القلتو من قبلك وهم
رجف القلب سكت القلم
وجده داخلي احساس غريب بين السعادة والالم
وعرفته انو الحب ضرب وتر الؤاد العمرو ما كمل حلم
الحب اغمي بخليك تشوف البعجبك والبتميل ليهو روحك بس وبتتقاضئ عن كل شئ تاني
بعد التحية والسلام
الجمال اكيد جمال الروح…
لو ما كده ما كان فى نسب مختلفة للجمال. مثلا الاجانب عندهم النحافة جمال وعندنا احنا العرب المليانة احلا ,وهم بيشوفوا العين الزرقاء جمال واحنا بنحب العيون السودا ,وهم عندهم الشعر القصير الاشقر جمال واحنا الشعر الطويل والاسود احلا,
عشان كده الجمال جمال الروح, هو البعكس الابتسامة عشان تنور الوجة, والزول لمن تكون روحه حلوه بكون عنده فن التعامل وبعرف يجدب الناس ليه ولبق فى الكلام
اما انه ليه عند التقديم لوظيفة الشكل مهم ,لانه التعامل مع الجمهور بكون فى ثانية ولازم الموظف يكون مقنع للزبون.و بالمناسبة الشكل الخارجى كتير بتاثر فيه الروح الهندمه وجمال اللبس ممكن معناه الزول رايق وفرحان واختيار الالوان بعكس شخصية الزول وروحه واهم من ده كله الابتسامةوالتخاطب وده برضهلو الزول روحه ما حلوة ما بقدر عليها
سلام .
اكيد الجمال جمال الروح بس الناس بتتكلم عن الحمال اللى بيلفت نظرك من اول نظره زى مابيقولو . بس النظره دى ممكن تتغير عااااااااااااادى