استراق النظر ظاهرة منتشرة بين الناس نصادفها في الإمكان العامة لا سيما في الشوارع العامة أو الطرقات أو في الإحياء (الحلة) ..
هذا ما أريد إن أتناوله في هذه المساحة الظواهر السالبة في الإحياء من بينها الجلوس في الطرقات خصوصا من بعض كبار السن من الرجال فالبعض منهم يلعب الورق أو الضمنة البعض يرتاد حلقات الذكر هذه محمده ومنهم من يحرص علي الحوليات (يوم الخميس) هذه ظاهرة لم تندثر بعد. لكن تأتي الطامة الكبرى هؤلاء الذين يجلسون في الطرقات من (عصرا كبير) يعني نجد بعض الأعمام يحرص علي اخذ المقعد (الكرسي) لكي يتربع علي ناصية الشارع يستمتع بمراقبه الناس أو احد جيرانه في الذهاب والإياب ماذا يحمل في يده أو ماذا يلبس ؟!
ثم يتفرق لنساء الحي (النسوان) ديل الليلة كتلووو منو مشين وين…زوجة فلان ده التوب ده مابتلبسوا إلا في مشوار بعيد!!…الليلة بت فلان ده فاتها الترحيل عشان كده جات بي المواصلات إلي الخ…مما يضطر بعض بنات أو نساء الحلة تغير الشارع تقوم وحدي تقول ياجماعة نمشي بالشارع التاني لأنه راجل فلانة ده حا نلقاه قاعد لينا في الشارع ؟؟ من أسوا حالات استراق النظر هي من اتخذها program فنراهم يوما في نفس المكان والزمان يراقبون يسببون الإزعاج للناس…مما يتسبب في إحراج أزوجهم بناتهم وأولادهم..ياجماعة الظاهرة دي نعزيها لي شنو؟ أم نسميها حاله مرضيه أم ماذا…
—————-
تاجوج كسلاوية
سوداننا 
اولا ارحب بالاخت تاجوج كسلاويه في منتدي ساخر سبيل
اتمني لك اقامه طبيبه بين الزملاء
اشكرك للتطرق لهذه الظاهرة الغير حميده
نساالله ان يهدي عباده
مرحبتين يا تاجوج الكسلاوية و مبرووووك الباس ووورد
و شكرا لتعرضك لهذا الموضوع الحيوي الهام و الذي أحسب (حلوة موش) ان هذه الظاهرة ليست لدينا وحدنا في السودان بل تشترك معنا بعض الدول العربية لاحظي العربية لأنو عدم الشغلة يبدو انه منتشرا وسط دول العالم الثالث… حيث يستطيع البواب و ناس القهاوي بمعرفة اي شئ يدور في المنطقة… و اشترك معهم المعاشيين و بعض الصبية البيقعدوا في الأركان….
و كويس انو المعاشيين بما لديهم من وقت فاضي يرصدون ما يجري في الشارع و هم العين الثالثة و أفتكر ديل ما حيتوقفوا من طليع الكراسي من عصرا كبير لي المغربية.. لحد ما يتكلوا … غايتو خلي بنات الحي يصبروا سنة سنتين ثلاثة…
لكن المشكلة هي الصبية و المعاكسات… طبعن أعمامك المعاشيين ما ظنيت عنددهم interest بعد دا و تبقى المعاكسات التي يقوم بها الصبية و الرجال النص كم و قد قرأت قبل كم يوم مقالا لنادية عابد في مجلة صباح الخير المصرية الاسبوع الماضي تنقل صرخة من امرأة بأنها قد كرهت أنوثتها….قائلة:….
(لقد كرهت جسمى بسبب سخافات الرجال.. وأفضل الشتاء لأنى أدخل داخل البالطو أحتمى به. إن مقاييس جسمى يقال عنها مثالية وليست عندى مبالغات ولكن ـ كما تقول صديقاتى ـ هناك (أنوثة) يصل عطرها إلى أنوف الرجال التى لاتخطئ الرائحة. فهذه الوسامة البدنية نقمة وليست أبدا نعمة.. ولاتصدقوا أن المرأة الجميلة سعيدة بجمالها. ربما كان جمالها مفتاحاً لحل بعض أزمات الحياة، ولكن الجميلات تعيسات، فالرجال عيونهم ليست إلى فوق: إلى رأس المرأة وعقلها، ولكنهم ينظرون إلى ما تحت العنق أو تحت الركبة! هل الجميلات، فارغات الرأس؟! ثم هل أنوثة المرأة عيب فيها؟ )
هذا جزء من المقالة التي عنونتها (أشكوا الى الرجال الرجال من الرجال…..
مرحباً ..jj555
أولن نزيدك ترحيب فوق تراحيب أخونا عزت ..وهو طبعن ما بيقصر .. يقصر الملح ..
وأهبن بيك إضافة جديدة لأخواتنا وبناتنا فى المدونة ونأمل ان يطيب بك المقام وتواصلى المشوار ..
وما حنسالك الأسئلة التعسفية البتسل الروح حسب قول أحد الكواشف.. ونخليها للمرة الجاية ..
نرجع للبوست ونقول إنها حالة مرضية دون شك وتتنافى مع ديننا الإسلامى الحنيف المنادى بإعطاء الطريق حقها ومنها غض البص زكف الأذى..فالجماعة ديل أكيد إرتكبوا إثمين عظيمين فى حق إخوانهم المسلمين .. ويتوجب عليهم التوبة النصوح ..
بس أنا أتساءل وين جماعة النظام العام من مثل هذه الخروقات ؟.ولا بس فالحين فى اللابسة بنطلون والغير محتشمة وما يقوم به هؤلاء يدخل فى أى باب يا ترى ؟ ديوان المراقبة العامة ؟
وأنا أعتبرها قلة شغلة ساكت القعاد فى الضللة وتحت الحيطان ( إن شاء الله الحيطة دى تقع عليهم يوم ) وقيل من قديم .. من من راقب الناس مات هماً .مرة أخرى مرحباً بيك أيتها الكسلاوية ومرحب بالجابك ووصلك لحد منتدانا.. وهو عارف روحه كويس .. موش ؟
سلام ياقبيلة،،
الأستاذة تاجوج مبروك الباسوورد وأن شاء الله تزيدي بيهو أجروعلم وعافية،،
موضوع الجلوس في الطرقات منهي عنه جملة وتفصيلا” في ديننا الحنيف، ولكننا نتمسك بالقشور ونترك اللب، وهذه السلوكيات مردها للتربية الناقصة والخاطئة دينا” وأخلاقا”، وللطريق حقه وآدابه وتعلمناها في المراحل الأولية فقد جاء في الحديث النبوي (إياكم والجلوس في الطرقات، قالوا: يا رسول الله! ما لنا بد من مجالسنا نتحدث فيها، قال: فأما إذا أبيتم فأعطوا الطريق حقه، قالوا: وما حق الطريق يا رسول الله؟ قال: غض البصر، وكف الأذى، ورد السلام، والأمر بالمعروف والنهي عن المنكر)، فهل أمتثل الناس لشيئ من هذه الأوامر؟؟
سديقي دوك عزت هذه النادية عابد والتي أظنها شخصية (خيالية) والتي تشطح وتنطح بترهات وكلام لا يسمن ولا يغني من جوع منذ سنين عددا ونحن منذ أن وعينا وعرفنا قراءة الصحف والمجلات وخصوصا”صباح الخير هذه وجدت هذه الشخصية تكتب فيما لا طائل تحته، وهذا الذي أوردته عن شكواها من الرجال يبين أنها ليست من صنف النساء كما أخبر بذلك كثير من الناس، ولنأتي لموضوعها هذا: لماذا تشتكي الرجال وهي قد دعتهم لنفسها قبل كل ذلك بتبرجها وتعطرها ومشيها في الشارع علي حل شعرها، كيف تسير هكذا وتريد من الناس أن يغمضوا أعينهم، انها لم تغض الطرف بل سعت لأجتذاب النظر نحو جسدها الذي تعلن عنه بهذه الصورة الفجة السافرة، فهذه ليست أنثي ولا تمتلك مقومات الأنوثة، فأول مقومات الأنوثة الحقة الستر والخفية والحيـــــــــــــــــــــــــــــــــاء ياصديقي وأمرأة بلا حياء هي صخرة من الحجر بلا حيـــــــــــــــــاة!!
مرحبن بتاجوج
ده بسموهو الشمشرة وطولة الرقبة وحب الاستطلاع الكتل الماشكة…وحاحكي ليكم قصة صديقنا ابودجانة القرم الثعلب اضانه…..بس مااسه….
نونو بس تظهري في بوست صاحبتك وبقية البوستات طناش …بخاف الباقين (الا سلولو طبعن) يعاملوك كده برضو ويطبقوا عليك مبدأصديقنا الكان بكتب من امريكا :(الما بعصر فراشنا ما بنعصر فراشو ههههههه)
الجميع في ساخر سبيل
انا في قمه السعادة بالاضمام لهذه الكوكبه
اسره الاستاذ الفاتح جبرا
الشكر الجزيل للاخت نونو اتنمي ان اكون عند حسن الظن
اشكر الاعمام
الاعمام ده انشالله تكون في محلها للمرور
انشاالله اتناول معاكم كل ظاهره انا مزعجه
انا جاهزه الأسئلة التعسفية ؟ ياعم السلاوي
السلام عليكم
بالنيابه عن اصدقاء تاجوج (الفيس بيك)
نبارك للاخت تاجوج كسلاويه
حانكون علي اتصال…بيكم
مرحب تاجوج … ويا عزت ود الخلا طلع مذاكر كويس وناديه عابد دي يا ربي ديناصورة وللا شنو … ياخي دي الليلة تكون اكبر من امال عباس ذاتها .
اكتر حاجة كان بتعجبني في صباح الخير شعار : المشاركة هي ما نحتاج اليه لنشعر بانسانيتنا .
jj55 …
فى رواية أخرى تاجوج الكسلاوية ( تعرفى لو شلتى حرف الكاف تبقا من إندينا ..تاجوج السلاوية …وموتوا بغيظكم أيها الحاسدون والراصدون ..)
الأسئلة التعسفية حنخليها لقدام شوية .. بس تاخدى نفسك من طلوع السلم …والأسئلة زاااتها ما صعبة ..وممكن تستعينى بكل الوسائل من أصدقاء أو جمهور.. وخلى نونو تغششك لأنها عارفاها لأنها مرت بيها قبال دا ..
إتفقنا ؟؟
الابنة تاجوج..سلامات..
ومرحب بيك كتير والحمدلله البقيتى فى نص اللمة..وما ح ادقق فى موضوع الدعاك منو لانو بالنسبة لينا_نحن المخبرين العلنيين_ عارفييين وناقشييين وصحن البلح مر من عندنا !!
فعلا هى ظاهرة غريبة,,لكن بالنسبة لكبار السن الى حد ما ليس فيها ما يعيب كثيرا,,فهى تكثر وسط ارباب المعاشات وغير اولى الاربة من الرجال,,وغالبا ما تكون للونسة والضحك بس..
اما حقوق الطريق وآدابه فلابد منها..
سلولو الحبيب..
قلت لى حرف شنو!!؟؟ بكلم ليك والكلام دا بتاباهو تب..
سلام : ترحيب بي ناس كسلا كلهم , بس المحيرني ( الأبنة تاجوج ) !!! – شنو الحكاية يا شمباتي ؟ طيب سلولو يقول شنو ؟
دبل جي تريبل فايف.
مرحب ب/ جيل جديد في فضاء فكري فسيح ،،،
الجلسات العصرية بواسطة الكواشف عادة قديمة اشتهر بها المعاشين خصوصا والمزارعين في غير المواسم ، وهي ليست ظاهرة حين كانت جلساتهم انس لهم فيما بينهم لم يكن فيها استرقاق النظر فالكل مشغول امت بي تخطيط الواطة وشرح المواضيع كروكيا او الانتباه الى حجار السيجة او نط الكلب في بعض الاحياء اهل ،،، اما الضمنة والورق فدا لغياب النوادي الاجتماعية التي ترعى هؤلاء المعاشين او الاسترخاء بعد العمل او الهروب من طلبات عواطف والاولاد ولا كان البيت زحمة غرفتين وساكنين فيه سبعتاشر فرد او السبب الارجح تكون الكهرباء كاطعة.
اما مسترقي النظر وكاشفي الحال والمتربصين في النواصي في انتظار مرور الحسناوات فهؤلاء قد يكونون والله اعلم في مهمة رسمية لقناة من القنوات الفضائية وعرض موضة الثياب الاكثر رواجا.
اشكر كل الذين رحبوا بي الذين اضافه للموضوع
خالد مدني ___دكين _______العم ياسين شمباتى_ عباس ركس
الاخ الصديق ضربو ليه هسع
عمنا السلاوي
من النهارد ده انا تاجوج السلاويه
ليه عظيم الشرف ….
اها شنوو ليك يانونو انا بتك ياالسلاوووي
مرحبتين حبابك تاجوج كسلا … قعاد الشارع وقدام البيت دا غايتو مجربه وكان عندنا مسطبة كاربة يوم مايشوفونا فيها يدقو باب اى واحد من الشلة ويقولو ليهو مالكم الليلة … بس أعتقد اننا كنا بندى الشارع حقة … ولما أغتربت عرفت انها ظاهرة دول العالم فى طور النمو …. فى منطقة سياحية بتركيا اسمها (أزمير) وفى حي يكثر فيه الغجر يسهر الناس اما ابوابهم الى ساعات الصباح الأولى وهم فى سمر باصوات مرتفعة وأحيانا كثيرة غناء صاخب مما اضطرنى الى الرحول الى مكان آخر لأنى أكتشفت بأن سهرهم لم يكن مرتبطا بشهور الصيف وموسم السياحة بل انها عادة عندهم …. فى رايئ أن الموضوع لا يخص الشرطة بقدرما يستوجب توعية ولا غبار على حدوثة خاصة مع قطع التيار الكهربائى المستمر وضيف الحيشان ناهيك عن تطاول البنيان … لكم تحياتى وتقديرى
الاخت تاجوج السلاوية
اولا البيت بيتك اخدي راحتك لكين ماعلي الاخر؟؟
اشكرك علي الترحيب بالاخت تاجو ياههااااااااا المحريه فيكم مابتقصروا
_________________________________
عمنا الفكفك؟؟؟
نونو بس تظهري في بوست صاحبتك وبقية البوستات طناش؟؟
انا بتاعه طنااااااااااااااااااااااااش والله بتاعه طشااااااااااااااااااااااااش؟؟
هسسسسسع في زمتك يافكفك من المحاربين القدامي في منوووو؟؟
البركة في ناس اواصر وحكاية……!!!
كسرة/
ياحليل نااااس كرومه وسرور؟؟؟
ركس..سلام..
ما هو دا مربط الفرس!!! لقيتك حامض جنس حموضية….ههههههههههههه..
نونو..سلام..
مالك حارمة البنية الاندياح؟؟ ويا حليل كرومة وسرور..
jj55 حبابك بيناتنا مع انو الاسم اشبه ب hk11 ولا شنو يا ابكرون ؟؟
فى زمن سابق كتبت :
شلة لستك ناس عبد الله
وقعدة ضمنة ناس فتح الله
مساخ الحله بكتر الطله
ناس فارشين فى تحت النيمه
وناس تتكى مظله مظله
وناس الفوله دى ما بتتبل
وناس فى خلق الرب تتبلى
عمو ياسين نسوي شنو
نركز في الدرس ونطلع….
aflaiga اشكرك علي الترحيب والقصيده شكلك كده شاعر المدونه
شويه شويه نتعرف بيكم كلكم….
اها يانونو اخدنا بالتعليمات …
لا اسميها ظاهرة – هى غريزة متاصلة فى البشر وهى الفضول – باعتقادى تاخذ اشكال متعددة – زى ما شايفين فى السودان القعاد على الكراسى فى الشارع — بعدين اعمامنا بتقاسموا المشاهد الشافوها فى الشارع مع عماتنا فى البيت – يعنى حلقة معلوماتية متكاملة — ممكن يحكى ليها شكلة حصلت فى الشارع وحاجات ممتعة كتير بالشكل ده – يعنى زوجات المعاشيين ليهم مصلحة فى قعدة الكراسى دى — اتذكر انا صبى احد الكبار قال لى — انا يا ابنى وقت اكون قاعد فى الشارع بعرف المارة من اهل الحلة بدون ما اعاين ليهم — بعرفهم من جزمهم –
وفعلا العادة دى بشكل من الاشكال موجودة فى اوربا — فى البلد الانا عايش فيها دى — بس الفرق انو البقعدو يتونسوا امام ابواب العمارات هن حبوبات معاشيات — يعرفوا كل صغيرة وكبيرة منو الطلع ومنو النزل وكل صغيرة وكبيرة — يعنى فضول انسانى سيبقى الى ابد الابدين — شكرا لاختنا تاجوج وتحية وكذلك لكل المشرفين ورواد هذا الموقع الجمييييييل
النظرات انواع وخشم بيوت قسمها رواد الاعمدة والكورنات الى ثلاث اقسام هي :
-استراق النظر
-اختلاس النظر
النظرة ام نوراً طويل وهذه اخطرهم على الاطلاق وبتودي التوج اجارنا الله منها
مرحباً بك اختي تاجوج .
سوباجو ..وكل الناظرين والمتناظرين ..سلام
طولت الغيبة ..
النظرة أم نور طويل دى الجماعة إستندوا فيها مقولة إن النظرة الأولى ليك والثانية عليك فيقوم الواحد يعمل نور طويييييل دون أن يرمش له جفن بحجة أن النظرة الأولى لا تزال سارية المفعول حتى إشعار آخر .
حمانا الله وإياكم من التحايل والنظرات الطويلة والقصيرة.
الفكى ابكرونا .. أفتينا فى أمرنا أيها الشيخ الجليل !!