مدخل ما محلو :- منذ صغرى وانا بحب العمل الاذاعى بشقيه المرئى والمسموع وبقدرو جدا بل وشرعت فى التفكير جدية فى التقدم للعمل باحدى القنوات الفضائية فى زمن مضى , لكن ارجع واحمد ربى انى ما ارتكبت الحماقة دى لانو حتما كنت ح اتداوس وارقد وطا مع احد المسئولين بالحكومة السودانية ! ياخ ديل سلاقين وفقاعين بصورة ما طبيعية !
المدخل الجد جد :- فى برنامج (المحطة الوسطى) بقناة الشروق السودانية استضافت المذيعة الطيبانة وزير الاعلام السودانى الناطق الرسمى باسم الحكومة , طبعا كلمة (الرسمى) دى مهمة لانو فى ناطقين تانى غيرو بنمش ليهم فى محلهم ! اها اول سؤال وجهتو ليهو : انتو المخول رسميا بالتصريح منو فى الحكومة ؟ لانو الوالى طلع صرّح والوزير الفلانى طلع صرّح وعلانة الحنانة طلعت صرحت ّ! اجاب : احنا فى دولة منظمة ولها الحق فى اعطاء التصريح لمن شاءت ! خُد …
اها وقالت ليهو : انتو اتاخرتوا فى التصريح وتطمين الشعب , اجاب : ما اتاخرنا ولا شئ , فعلا طلعنا بتصريح رسمى بعد عشرة ساعات لكن اصلا الوالى طلع وصرح وطمّن الشعب ! بعدين الشعب ح يستفيد شنو لمن نطلع نصر الساعة واحدة صباحا ونقول ليهو انو فى طيارات ضربت !!؟ طبعا هنا انا ذهلت وشهقت لمن مثانتى طارت فى حلقى ! هى اسه قوووووول طبقوا لينا الكية بعد ساعتين ! تودى وشك وين يا المغسلو بى بو….. لا لا لا ختتتتتتتتتير يا بشكة ..
بعدين قدر ما قالت وصدحت بى انو الجيش تعبااان وما عندنا قوة حلف وقسم انو الجيش دا الاقوى منو ياتوة جيش فى العالم ! وقال اصلو العالم دا كوووووولو مافيهو زى جيشنا جيش الهنا ! وطبق الوسم وقال انو الضربة دى اثبتت انو السودان دولة قوية ودولة مواجهة عشان كدة اسرائيل ضربتنا ! ايووووووووى ايووووووى ايووووووووووى ..
اها لما جات فى حتة الرد بدت الطربقة : احنا نحتفظ بحق الرد فى الزمان والمكان المناسبين وعندنا المقدرات والشجاعة والرجالة الكافية اننا نرد ! انا لو محلها كنت قلت ليهو : احتفظوا بيهو وخللوهو واتمسحوا بيهو , الاحتفاظ دا حدو وين ؟ وقدر ما زنقتو وقالت ليهو انو الرد دا من سنة 2009م ما حصل لكن اصلو ابى يجيها فى الميس , وما فضل الا يقول ليها : ابيييييييييت , ما بنرد , ردى انتى !!
بعدين ذكرت المذيعة نقطة حيوية ومهمة : كيف مصنع تصنيع حربى يكون وسط منطقة سكنية تكتظ بالسكان ؟ اجاب : خلاص صدر قرار بنقله من مكانو , قالت ليهو : متى ؟؟ قال ليها : تاااانى جينا لى حتة متى دى !!؟ انتى عايزاهو بكرة مش ؟؟ هههههههههههههههههههههههه , والله خفت عليها يقوم يعضيها …
خاتمة : حقو يغيروا اسم المصنع دا لانو بيذكرنا بى موقعة اليرموك !!! اللى كان فيها الصحابى / خالد بن الوليد رضى الله عنه مش الصرمة خالد سعد …
ونلتقى …….
سوداننا 
سلامت مثانتك يا دكتور … والله تباري تصريحات الجماعة ديل تموت من الغيظ .. ما سمعت وزير الدفاع آآآى الدفاع قال شنو لمن سألوهو فى برنامج حتى تكتمل الصورة (بتاع قناة النيل الازرق ) ليه الرادارات يا سعادتك ما إلتقطت الطيارات الاسرائيلية ؟؟؟ عارف يا دكتور وزير الدفاع وحامى حمى السودان قال شنو ؟ قال بالحرف الواحد : الطيارات جات بالليل وكانت طافية الأنوار حقتا . آآآى يعنى نعمل شنو نحن ؟
ههههههههههههههههههههههههه , الله يسلمك يا امارز ,,,
ومرحب بيك كتييير ,,,
ياخ دا دلدول وطرووووورة ..
فقع مرارة وتوارة ضغط! خم وصر تاني تجي المحطة الأوسطى
ههههههههههههههههههههههه,,التوووووووبة,والله بالصدفة جيت يا حبيب ,,
استغفر الله بس
بالله فاتتنا الحلقة والله كان في سؤال مهم خالس خالس كان الواحد عاوز ليهو اجابة
بينما كان مجمع اليرموك يتفجر كانت فضائياتنا جميعها في حالة طرب وغناء و(هجيج) ثم بعد أن نسب والينا الإنفجارات تلك إلى (ماكينة لحام) واصلت فضائياتنا فواصلها الغنائية…. ثم بعد أن أعلنت الحكومة – رسمياً – عن تسبب مقاتلات إسرائيلية في الإنفجارات المذكورة لم تر فضائياتنا هذه ما يستدعي وقف برامج الطرب فجاءت أيام العيد فجُنت فضائياتنا؛ رقصاً وغناءً وطرباً (الحمد لله يا شمباتي انك كنت في الحج وما شفت)
يعني الفضائيات مبسوطة 24 قيراط وكذلك الشعب فيما يبدو………….
انت الناس ديل المفرحم شنو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مشهد اول:
حقيقي النور كان طافي
وحقيقي كهربا كانت مافي
حقيقي الناس كانت بين نايم و نعسان
وانا كنت قدام الدكان
مشهد ثاني:
شوية جات طيارات
النور الكان مافي بقا يشلع
الضو ساطع ولع
انا قلت الكهربا جنت يارب
مشهد ثالث:
صوت قال بمب
المدفعجي الزي البمب
جدع المدفع و اسرع
كان بين نايم و نعسان
آهو ما برضو انسان
شخط فيا يا ملكي اعمل ساتر
انا رددت معاهو زي البومة
ونحنا بنعرف اكثر م الحيكومة
قول يا ساتر
مشهد ناعس:
بتثآب وقف السير
ارثر كونان دول
وكشف المستور م الاول
البمب دي حداد ولعلو سجارة
دي اشاعات ما فيش غارة
وعدا المسعول ع الحمام
ورجع مبسوط نام
بس الواد المفعوص الممسوخ
حكالنا علي كام صاروخ
مشهد بعد طلوع شمس اليوم التاني:
تلفون هتَف من مصر
يا هوي يا بتوع القصر
انتو يا ولاد النيل
عملتو ايه مع اسرائيل
انتو بخير !!!
بيان ختامي:
صارم و صوارمي
احنا حكومتنا قديرة
خلاص فضوها سيرة
السد السد
الرد الرد
وراح نتمسك بحق الرد
عزت….
ههههههههههههههههه,,,رقصا وغناءا وطربا دى ذكرتنى (وعدا وتمنى) بتاعت اكتوبر الاخضر !
ياخ ديل ناس تعبانين ودايخين كمان ..
نيام..
اووووووو ,, مشاهدك تلخم , والله ما خليت ليهم جنبة يرقدوا عليها .. عفيت منك يا حبيب…