صراع الحاج متولى (بكسر اللام ) والحاج متولى (بفتحها ) صراع قديم متجدد هو صراع حول امر شرعه ربنا جلا وعلا وهو تعدد الزوجات الثابت فى الكتاب وفى السنه وفى سنن خيرة خلق الله بعد نبيه ومع هذا اثير حوله كثير من اللغط من قبل العلمانيين والجاهلية المعاصره التى لا تجرؤ على انكار كثير من الانحرافات مثل زواج المثليين الذى صار قانونيا فى كثير من بلدان العالم .
تمت هذه المناظره فى احدى بلدان الشمال بين:ـ
أ/ الحاج متولى (بكسر اللام ) ويسمى فيما بعد لاغراض هذه المناظره بالطرف الاول
ب/ الحاج متولى (بفتح اللام ) ويسمى فيما بعد بالطرف الثانى
بما ان الطرف الاول متزوج بثلاث نسوه
وان الطرف الثانى متزوج بامراة واحده
1/يرى الطرف الاول ان الطرف الثانى يخشى باس زوجته وانه من اهل الرايه وقد ادى اليمين الدستوريه يوما ما لاداء جميع الاعمال المنزليه وطاعة زوجته طاعة عميا .فهو لا يتوانى فى غسل العده كما انه يشطف الاولاد يوديهم الروضه اضافة لاعمال المطبخ وكل ما تطلبه منه زوجته او والدتها سواء كان ذلك بالتحرك برا او بحرا او جوا حتى ولو ادى ذلك للمجازفه بحياته .
2/ بينما يرى الطرف الثانى ان الطرف الاول لا يراعى الا ولا ذمه لزوجته الاولى التى كافحت معه وناضلت وصبرت على شظف العيش وماسى الحياة . كما يرى ان خصمه ينطبق عليه المثل القائل (راجل المرتين ارنب بين كلبين ) وغير ذلك يرى ان ذهنه مشتت بين بيوته الثلاث .
المهم انا زووووووول بسبعة واوات المحامى حضر امامى طرفا المناظره الشعريه(الدارجه ) وحتى لا اطيل عليكم (التوثيق ) اترككم مع ما قالوا عن تعدد الزوجات وابدأ بالطرف الثانى وهو متزوج بواحده ولا ينوى التعدد مطلقا :
يقول فى قصيدته سلم تسلم ارفع رايه :ـــ
باب تسجيلنا فاتح نحن اهل الرايه
والقانون مبسط ما بدور كتاب وقرايه
واضحين كالشمس وعملنا لينا مرايه
لكن فى الاصل نمتاز بكل درايه
من اعمالنا شوف الطاعه اهم بدايه
نحضر للحطب وتفرض علينا الدايه
نرد المويه ايضا نحلب الغنمايه
ونؤمن بالمساعده لو غسل كبايه
نطبخ للاكل ونسكت البكايه
للكوفير نمش والزوجه نسمع رايا
ونحترم النسيبه وتكون لنا الهدايه
ما همانا قول الناس واى حكايه
فى قانونا اسرار يا زميل وخفايا
ما بنرضى الزواج ونراه فرض كفايه
نسلم من طلاق الركوه لينا فدايه
وبدا الحال نكون من البسط فى غايه
هاك منى النصيحه وهاك معاها وصايه
من ادم نسجل وانتبه بدرايه
القانون مبسط فيهو ليكا حمايه
بالبرايه قطع ورقة الضرايه
ومنك مانى دايرين يا زميلى هدايه
ناسك بالعدد ينحسبوا فى كفايه
والدفتر ملان شوف المعاك فى التايه
وعندنا رخصه اقرأ اخر الايه
من اهل الدقون واشناب جيوشنا سرايا
وفى غنى عن مشاكل بشتروها شرايه
ما بنتبع رغباتنا النفس شهايه
كيف انسى القبيل قاست مآسى معايا
عارف طبى وين يا اخو الفتح ودوايا
ما جنيت بعلق فى رقبتى جنايه
والناس المعاى ما تقول ضعاف وغبايا
حاره الضره للكانت اساس وبدايه
وكشف الحال كعب والعيطه واللالايه
وان قلتا المحاكم يا ما فيها قضايا
وفى الظاهر مشاكل واضحه مانى عمايه
وان قلت الدواخل يا ما فيها خفايا
فاشلين فى قسامكم ومن عداله عرايا
وراجيكم عذاب ما بتلقوا منو وقايه
ماسكين فى القناعه وباقيه لينا وقايه
وما همانه بيها نباهى ديمه الرايه
النسوان غيورات كم سمعنا روايه
وفى درب الدجل ستات امور وبلايا
وما شرط الوسيله وهمهن فى الغايه
والخوف يلحقنك بالبخور ومحايا
ما مرتاح اكيد همك كبير للغايه
والعقل المقسم ما بكون فى وعايه
عشان يرضن عليك وتلقى حب ورعايه
تتلون معاهن وتبقى كالحربايه
وبسال للاله عد ما خلق مولايا
وعد موجات بحارنا الماشه حتى الجايه
وما دبت على ضهر الارض دبايه
نشوف رايتك تهبب فوق فى اعلى بنايه
بينما يرد عليه الطرف الاول بقصيدته ارم وفز دونها تعز :ـــ
تسجيلك سجم ما لينا فيهو هوايه
ودفتركم كعب قطعنا بالبرايه
قانونكم عسير متعب شديد للغايه
كاتباهو المرا دافناهو فى كبايه
من غسل الصحون والحله والشوايه
وشيل الجاهله كل يوم جاتكم اللوايه
شايل الرايه هوى نصيحتى ليكا هدايه
ارميها الضحى خلى الضراع يتحايا
واعلن للتمرد وابرم الشنبايه
جيب ليها المساعده واحده طيبه كفايه
اسمع قول اخوك كم فى الليالى بلايا
بتجيك وتفتقد سكاتة البكايه
ان قلت انستر اقعد اعانى برايا
حاجات الزمان تغليك فى الغلايه
وان جبت الجديد وعذرك شديد للغايه
لطخوك بالكذب وقالوا العجوز ………
سلمان اللبيب دعواتى ليك ومنايه
ما برق البرق وكوركت دودايه
تطلق ها الدرب والخاتمه تبقا معايا
تعمل خلف دور وتسقط حمولة الرايه
تنقد الرهيفه الحله فيها حمايه
مدهش يا زمن فى يومك الف حكايه
قلاب الامور مشحون بكل روايه
كم فيك من محن كم خالطتك بلايا
شوف خبر الجماعه القالوا نمش حفايا
نغسل ليها نفرك ليها ارواحنا ليها فدايه
نكنس حوشنا كلو نعدمو القشايه
ناس الرايه ديمه اصلها نسايه
قالولنا ام شعير ضحت وهى الربايه
وقالوا الساتره لعوراتنا نحن عرايا
وقالوا المنه لستاتنا نحن نهايه
مظلوم يا ابو هناء مسلوب حقوق للغايه
ضبحت لك كديس ونامت على البخرايه
زى مثلا قبيل كلمة حكيما داويه
((خربانه الديار والميته جات التانيه ))
لكن بعترف حزبك امم متناميه
رافعه الرايه لكن فى البواطن ناويه
واحدين من جنا خايفين كتوف متساويه
وواحدين من رزق همو المعاو والتانيه
وفى سوح القضاء شافوا الحروب الحاميه
والعيط والعياط بين المكاتب عاويه
انصف يا صديق واذكر صباح الهاويه
ونظر الشهوه شين زجرتنا منو الايه
كم فى البيوت عفه وجمالا حاويه
تجرى وراء القطار للعفه ماها الغاويه
تنظر للبعيد دايره الامومه وهاويه
واب شنب الاسير قابضاو فلانه ولاويه
وين تلقى العسل قبل اللسع كبايه
ومين قال العلا دون السهر بترايا
اوصيك يا حبيب ما تغشك الحرمايه
يغشاك الندم وتاكلك قرضايه
وتحوم لك بناتها الصافيه والصفايه
والبت الكبيره الوالده فى الحلفايه
والاخرى المريضه الدايرا ليها رعايه
والولد البعيد الساكن ام سفايه
سلمان العجيب عفوا اطلت روايه
بسأل لك دوام رب الخلق مولايا
عدد الذاريات و الرخوه والحصبايه
تجدع بيرقك وتفارق اهل الرايه
كسره : العبارات الدارجه على مسؤلية قارئها
كسره : العنوان ملطوش من مقالات للدكتور عبد الرحيم عمر محى الدين بصحيفة اخر لحظه . الناس العندهم نيه !! يمكنهم مراجعتها على صفحة اخر لحظه على الانترنت
سوداننا 
الاخوه المدونون سلااااام
اشار على الاخ ود الخلا بنشر الموضوع على حلقات لكننى رايت ان انشره فى حلقة واحده لترابطه .
كسره :
دكتور عزت وافليقا وسترايكر تعالوا بجاى وادونا رايكم وعليكم الامان ما بتجيكم عوجه .
كسره : يمنع دخول المتزوجات والذين ادوا اليمين الدستوريه وزراء للداخليه
الاخ الزووووووول والمدوناتية الكرام
سلام
الليلة دخلتنا فى جخانيب كتيرة بنجيك راجعين.
زووووووول صباح الخير ……..ممكن اشترك في المسابقة ……. لأني أنا ما من
المستهدف بتاع هذا البوست كما اشرت
غايتو حاج متولي متعدد الزوجات داك كان ترف وليس ضرورة أصلوا لو الأولى ما
اقنعتك وعملت التانية برضو ما حا تقتنع حا تفكر في الثالثة والرابعة وما حا تجد من
بها كل الصفات التي تنشدها والكمال لله
زوول :
حباب زووولى الولوف غايب وليهو زمان
ويوم جابو الدرب بدع وجاب لو كلام
بيلوم مع عواطف وليس بالامكان
احسن من عواطف اصلو ما كان كان
——
لكن يا اللخو اسمع كلامى الجوه
محروف من عواطف وصار بيناتنا الخوه
جيب التانيه داير اصطبار ومروه
—–
كان حمودى سابك ساره ما بتسيبك
وكان شرع الله سابك عبودى بكره يعيبك
نقعد نجتهد نصلح عواطف وسيبك
من التانيه ولا الخير بجيبو حبيبك ؟؟
——-
عواطف ذاتا فى يوم كانت المعشوقه !!
صح صارت قصيرى بعد كانت ممشوقه
صح صارت نقيقه وعيشتا ممحوقه
علا كمان حرام تصبح بضر مدقوقه
——-
لكن يا الولوف قولى بس شن قولك
جبتها من بعيد لا قرابه لا بيبقولك
سابت دنيتا وصارت خلاص بس هولك
اجدعا بالرخيس والله ظالم قولك
——
ما ام العيال والشافت الما شافو
لا عدو لا حبيب والنصرتك يوم خافو
ما ست البنات كانت قبل تتصافو
——
اسمعى يا عواطف منى ليكى نصيحه
امسكى فى سعيدك بكره تبقى جريحه
بى قولة مطلقه ولا ضره نصيحه
—–
قولى الفات ده ما لين ولا يبقى مخافه
قولى الفات ده شان بس النفوس تتصافى
والما عندو القديم بجديدو ماهو قيافه
وجاييك يا زول ..
الزووووووول “أب سبعة” و لسة موضوع “أبو اثنين” دا ما عمل فيهو حاجة
سلام….
غايتو لو استمريت كدا طوالي احنا حنقدم توصية نحاول نشيل الستة واوات دي لتصير بواو واحدة…..
غايتو موضوع متولي و متولى دا كثير و تعج بلدنا بكثير من أمثالهم و في مفكرة اي منا الكثير من القصص المماثلة للزواج الثنائي و الثلاثي غايتو الرباعي دا يطرشنا الا في حاج متولي بس و أعتقد انه كان من باب التشويق في رمضان و الخروج بمسلسل في موضوع يهم الطرفين رجالا و نساء ينافس و يستقطب نسبة مشاهدة عالية…. و قل أن يوجد في حياتنا العادية (العادية حيث أن الأحسبون ليسو معنيين بهذه الحالة العادية)
فهم مرطبين و يستطيعوا فتح أكثر من جبهة و ادارتها باقتدار الكنادش في و الفلة في ….مافي مشكلة
زمان كان الأغنياء الجد في بلدنا يميلون للتعداد كنوع من مساعدة بعض الأسر و ليس ترفا أو مراهقة و لكن الحكاية جاطت الآن فلم يعد هناك أغنياء جد جد فغالبية الذين اغتنوا مؤخرا ليسوا بمثل هذه المثل… و معظم أسبابهم واهية تكاد تندرج في بند طيارة العين و تبديد قروش لم (يدق فيها حجر دغش)…
هسة جنس الموظف الحكومي الذي يطبق و الا يتلت ببنت في عمر بنته دا تقول عليهو شنو!!!
زووووووول لك التحية/ الموضع جميل الاجمل طريقة السرد
بس السؤاااااااال موجة توجية معنوي لسعيد شخصيا ام دعوة للحوار بيت سعيد وعواطف السبب الحماني الذي جعل ذلك السعيد ينفد بي جلدة من عواطف البحث عن عوووووووواطف اخري؟؟؟؟
حنين سلااام
قلتا ليا جخانيب يا حنين ؟ الظاهر عليك وزير داخليه . الله يكضب الشينه غايتو
سماسم : سلااام
تعالى ولا يهمك قولى كل الفى راسك وكمان الفى كراسك زاتو .
الحاج متولى القلتى عليهو دا مجرد ممثل بارع لكن رايك شنو فى قول (الشاعر ) :ـــ
كم فى البيوت عفه وجمالا حاويه
تجرى وراء القطار للعفه ماها الغاويه
تنظر للبعيد دايره الامومه وهاويه
واب شنب الاسير قابضاو فلانه ولاويه
ولا النساوين المتزوجات ديل شغالات بنظرية نفسى نفسى ؟
زووول جيييتك :
صح كترن بنات حوا وبدور الستره
علا كمان حسيبك الله يا ود جتره
شوف وينو الغلط وابداهو من الفتره
من صارت بيوت الناس عايبه وحياتم شتره
شوف مين السبب شال الكفاف والستره
شوف مين السبب نشف علينا المطره
——–
رجعو للعباد بس سترتا و ارزاقا
تانى محمد احمد ما بقوم يتشاقى
اصلو محمد احمد مافى طبعو شلاقه
بس جار الزمن توّر عليه اشراقه
قام مارق يكوس فى ساميه ولا علاقه
ولا يلف سجاره ويندفس بى باغه
——-
اصلو محمد احمد قبل تلك الفتره
كان زولا هميم بيعرف حقوق الاسره
بس لمن عجز والدنيا صارت حسره
صار ايد لى وار لا هيبه تب لا اسره
——-
وجاييك تانى ..
افليقا سلااام
د/ عزت سلااام
رائع بالجد فى قصيدتك التى لم (تخيب ) بها ظننا فيك يا كبير مستشارى دعزت (دا اصلا ما بتلحق ) فى الحته دى شوف الراجل دا داير يسحب منى سته واوات ضربه واحده .
لكن يا افليقا ليس بالضرورة ان تجدعا بالرخيس فليس التعدد يعنى جدع الاولانيه وابشرك بان التانيه برضو راح تسيب اهلها وتجيك وتبقا ام عيال وتعمل ليها سرويات وعبودات وكدا والخير ما معروف فى منو . بس يا افليقا وشيخه د عزت انظرا فى بلدتكما الى بعض ثمرات الزواج الثانى والثالث تجدون رجال ليهم شنه ورنه وزعماء اسر وشيوخ دين واصحاب اموال ولا كلامى دا مو عدل ؟
اما التعدد فلا يحتاج لاموال احسبونيه ولا يحتاج لشقق فندقيه يا دكتور وانا وانت وافليقا نعرف كثيرون لا يملكون من حطام الدنيا شئ ولهم مثنى وثلاث ورباع .
النونو سلااام
الموضوع مطروح للنقاش كل زول يقول العندوا وليس بالضرورة ان يكون التعدد نفاذا بجلد سعيد من اشواك عواطف وقد شرعه من خلق عواطف وخلق سعيد وهو الذى يعلم السر واخفى
يا سلالالالالالالالالالالالالالالالام يا أفليقا والله دي درر بس إنشاء الله كل السعديين يقروها
شاااااااااااايفة الموضوع دة بقي الشغل الشااااااااااااااااااااااااال لكم يااااااااااااااها السعدء؟؟
عمنا جبرا فتح باااااااااااااااااب التصدير للعرسان الاجانب او الصينين بالتحديد؟؟؟؟
سؤاااااااااااااااااااااااااااااااال مطرح لسعيد شخصياااا هل تفكر في نفسك عند
الاقدام علي هذا التعدد السكاني ؟؟؟؟؟؟؟؟؟؟؟؟
ام ماااااااااا هو عبد الداااااااااااااافع (عثمان)؟؟؟؟؟؟؟؟؟؟؟؟
زوووول : هو فى زول لاقى يكون مستشار عزت ؟؟
ما قلنا جيب التانيه يستوجب جدع الاولى لكن الطبيعى انو جيب التانيه بيقلل من مساحات الاولى واراضيها فى القلب والارض !!! هذه الحواء خلقها الله احتكاريه جدا تقوم بجردك قبل الاستلام وهى اشطر خلق الله فى ادارة المخازن كما وليس كيفا ..
نكمل ليك الجديع ما دام شاعر القبيله نيام مافى يلعب اب ضنب :
——
حقها ما جسيمك برضو ليها قليبك
غير قلب الحبيب سيد الخلق وحبيبك
ماف قلبا عدل قال للاله ده نصيبك
——
جاييك تانى ..
الزووووووول الغائب الحاضر ..وكل الأحبه سلام ..
التعدد وما أدراك ما التعدد..الكلمة البغيضة لعواطف والحبيبة إلى سمع سعيد ( أبو عين طايره ).. التعدد رخصة أباحها الله سبحانه وتعالى للرجل بشروط ومواصفات ولم تطلق جزافاً لكل من هب ودب كما يفعل بعضاً ممن جعلوا الدين وما به من رخص مطية لنزواتهم البهيمية ونزعاتهم التسلطية..فمتى ما توفرت دواعى واسباب التعدد ليس لنا إعتراض على ذلك .. ابى من أبى ورضى من رضا …وليس هناك ما يدعو لتحقير عواطف إن اراد سعيد أن يعدد وكان أهلاً لذلك من كافة النواحى مستوفياً كل الشروط والمسببات..وقد كرم الله المرأة وخصص لها سورة كاملة فى القرآن الكريم واسمها سورة النساء ولم ينل سعيد هذا الشرف الكبير ..
وفى رأييى المتواضع جدأ ً أرى أن التعدد خير من إتخاذ عشيقة أو خليلة فى الخفاء كما يحدث فى بلاد الغرب..ومن عاش فى تلك الديار يرى العجب العجاب .
ود الخلا سلااام
شكرا ونتمنى ظهور شيخ القبيله صالح والى حين ظهوره انبهك وكافة الاحباب الى ان الاصل فى الزواج التعدد وان الواحده مشروطه بالخوف (عياذا بالله ) وكمان لو الواحد خواف اكتر ممكن الواحده زاتا يعفوه منها ويعمل ليهو ما ملكت يمينه . شوفت كيف
نونو
دا امر شرعى وما داير ليهو عبد الدافع عثمان ولا اى حاجه بالشكل دا
حاج السلاوى سلااام يا عمنا ونشكرك على تحديد موقعك الجغرافى
((التعدد رخصة أباحها الله سبحانه وتعالى للرجل بشروط ومواصفات ولم تطلق جزافاً لكل من هب ودب كما يفعل بعضاً ممن جعلوا الدين وما به من رخص مطية لنزواتهم البهيمية ونزعاتهم التسلطية.)).
بكل اسف يا سلاوى شروط الزواج بالثانيه هى نفس شرط الزواج بالاولى مضافا اليها فقط شرط العدل فى المبيت والنفقه .
افليقا : بالنسبه للاندساسه فى الباغه ولف السجاره وشطارة حواء فى الجرد والتخزين دى والحق يقال قلبتا فيها الهوبا عديل كدا بس يا افليقا يا مستشار انا ما قايلك ملكى اكتر من سماسم .
بالنسبه للعدل هناك قلوب كثيرة عدلت فالصحابة اكثرهم من اهل التعدد ويروى عن الحسن ابن على انه كان مزواجا حتى ان والده الامام على لحق ببعض من تقدم ابنه لمصاهرتهم يرجوهم الا يزوجوه لكنهم اجابوه بقولهم ((كيف نمنع ابن بنت رسول الله صلى الله عليه وسلم والله لو عرفنا انه يتزوجها الغداة ثم يطلقها العشى لزوجناه … والله اعلم )
ينصر دينك جدو سلاوي ..
سلامات يا حلوين .. الزوووووول حمدلله على السلامه..
لكن يا أفليقا حيرتني.. خليها مستوره لمن يوم نسمع بيك في هوليود..
ياعمك براحه علينا شويه .. هسي الإنقاذ دي بقت هي سبب كل البلاوي ولا شنو .. طيب في دول اخرى حيث لا إنقاذ الجماعه شغالين دبل و تربل زي الترتيب .. يا فرده خف رجلك عن الأبنص شويه ..
نحن هسي خلونا .. عاوزين نعرف راي الحرائر في الموضوع دا …و كدي واحده كده تتشجع و توصف لينا شعورها كان حصل ليها الضرر ( دي من ضره بضم الضاد) .. وهل من الممكن إنها تساعد زوجها للحصول على زوجه ثانيه؟ يلا يا سماسم و نونو و بقيه الاخوات الجليلات ورونا ..
أباح الله لسعيد أن يتزوج أكثر من عواااااطف بشرط العدل في القسم والنفقة والمؤانسة وجميع ما تحتاجه عوااااااااطف ، ثم قال تعالى: (واتوا اليتامى اموالهم ولا تتبدلوا الخبيث بالطيب ولا تاكلوا اموالهم الى اموالكم انه كان حوبا كبيرا ، وان خفتم الا تقسطوا في اليتامى فانكحوا ما طاب لكم من النساء مثنى وثلاث ورباع فان خفتم الا تعدلوا فواحدة او ما ملكت ايمانكم ذلك ادنى الا تعولوا) سورة النساء الآيات (2-3)،ثم إن القصد من النكاح هو الإعفاف لسعيد وعوااااااااااطف والذرية الصالحة، فلا يجوز أن يكون القصد هو قضاء النهمة البهيمية ، فيكثر الزواج والطلاق فإن في ذلك ضررا على عواااااااااااطف إذا طلقت لأول نكاح وفيه إساءة الظن بها، وإذا تزوج سعيد اثنتين أو أكثر فعليه أن يسوي بين عووووووواطفة في جميع ما يقدر عليه ويحرم عليه التفريق بينهن، ففي الحديث: من كان له زوجتان فمال مع إحداهما جاء يوم القيامة وشقه ساقط، وهكذا عليه التسوية بين أولاده والعدل بينهم، قال صلى الله عليه وسلم: اتقوا الله واعدلوا بين أولادكم. فلا يجوز تفضيل عااااااااطف على عووووووووووووووواطف فكلهن عوااااااااااطف ، يعني ماااااااااااااااااااااتعمل نااااااااااااااااايم عند وعواااااااااااااااااااااااطف الجديدة وتنسي عوووووواطف القديمة؟؟
المثل بيقول المااااااااااااااااااااااعندة قديم مااااااااعندة جديد؟؟
فكيف بما فوق ذلك من الهبة والعطية والنفقة والكسوة والسُكنى والمُؤانسة ونحو ذلك!!!!!!!!!!!!!!!!!!.
******************************************************
تأخرسعيدعن عوااااااااااااطف من غير عاااااااااااادتة فأصابها مايصيب النساء من الهوس والقلق وبدأت تقرض اظافرها وهي غاضبة فقد تجاوز الساعة الحادية عشر والنصف ليلا ولم يأتي ابو الساااااااااااااااااا000
رفعت السماعة لتتصل بالمنسق وحلالة المشاكلة وهي والدتها 000
عوواطف: امي تأخر سعيد وأنا خااااااااايفة يكون عملة عرس عليّ
الأم : سجمي خشمي لحدددددددي هسع ماااااااجة ؟؟؟؟؟؟ظ…………….
عوااااااااااطف : تعتقدي اتزوجوا علينا
الأم : لا لا لاتفااااااااائلي خيرا انشاالله تكون ضربتواااا عربية !!!!!!!!!!!!!!!!
ود الخلا سلااام
هاك يامعلم
يقول دكتور عبد الفتاح إدريس أستاذ الشريعة والقانون بجامعة الأزهر “ التعدد في الزواج هو الأصل لمشروعية النكاح لقوله تعالى ( وإن خفتم ألا تقسطوا في اليتامى فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة أو ما ملكت أيمانكم ذلك أدنى ألا تعولوا ، وآتوا النساء صدقاتهن نحلة فإن طبن لكم عن شيء منه نفساً فكلوه هنيئاً مريئاً ) ، وعدم التعدد هو الاستثناء وذلك إذا انعدمت شروط التعدد التي منها :
1-الخوف من عدم العدل مع الزوجات اللاتي يدخلن في عصمته .
2-الخوف من عدم القدرة على الإنفاق سواء للزوجات أو الذرية
والخوف من عدم العدل في قوله ” وإن خفتم ألاتعدلوا فواحدة أو ما ملكت أيمانكم” المقصود به هو عدم العدل المادي أي في النفقة .
ومن ثم فإن الأصل هو شرعية التعدد ولا يصل إلى درجة الوجوب إلا إذا كانت الزوجة الأولى لاتحقق عفة الزوج أو إحصانه وخاف على نفسه العنت ، أوإن كانت مريضة أو بها عيب يمنع المعاشرة الزوجية، وخاف الزوج على نفسه من الوقوع في الفاحشة، فإنه يجب عليه في هذه الحالة أن يتزوج بأخرى، وذلك لأن الكف عن الزنا واجب وسبيله النكاح، فكل ما كان طريقا إلى واجب فهو واجب ويكون زواجه بأخرى أمر واجب .
سهيل سلااام
بركه الجيت بركه الجيت اشكرك واثنيك على ان الانقاذ لا علاقة لها من قريب ولا من بعيد بهذا الامر وهو من شريعة الله ومن وفقه الله من رجالها للتعدد فهذا طيب جدا كما اثنى فكرتك بخصوص راى الانسات بس الواحده تخلى الاحتكاريه القال عليها افليقا دى شويه .
دكتور عزت سلاااام
انت وين يا راجل صدر فرمان بمنعك من التداخل ولا ايه يا مرطب
سهيل :
فى دوسة الابنص الليله داير اقول
شن غير الابنص ودر علينا عقول
ابوك وامك دحين قبل ما يجينا الزول
كانو بيفكرو فى تتنيه وقبول
—–
كترن فى البلد بنوت بدون رجاله
ما شان الرجال قلو حاشا كتاره
بس قل الرزق خلى الرجال تتضارى
والقادر بدبل بس يسكنن فى عماره
مش فى اوضه يحرم كل وحده مقالا
——-
فى سيرة الابنص مالك تراوغ فيها
ظاهره عدييل وما بتندس لو حاريها
من جونا اب دقون والحاله فيها الفيها
واصلا البلد كان فيها ما يكفيها
—-
وجاييك برواقه ..قبل شيطان النجر يكمل
زووووووول:
والله موضوعك سمح تب و داير اعلق عليهو علا ياخوي عندي شورة دحين ليوم الاحد انكان ما جيتك ارجاني ليوم الخميس يمكن يطلع لي اذن..
سهيل
وهل من الممكن إنها تساعد زوجها للحصول على زوجه ثانيه؟ يلا يا سماسم و نونو و بقيه الاخوات الجليلات ورونا ..
الاخ سهيل اولا
انا ضد التعددية؟؟؟؟
.نظرتي للتعدد ان الرجل هدفة الوحيد صلاح حاله؟؟؟
الواحد عندما يقدم علي هذة الدنيا من بااااااااااااااااااب اولة ان تكون خاااااااااالية من الشوائب؟؟؟؟؟
التعدد إن لم تدع إليه حاجة ظاهرة كما عبر الشافعية يكون فيه تقصير عن التحقق بكمال العشرة بالمعروف التي من فضائلها الإحسان والوفاء لعوااااااااااطف التي بينها وبين سعيد ميثاق غليظ تواثقا عليه بأمان الله، وكانت له السكن والمودة والرحمة ليكون لها كذلك، فلا يكدر قلبها بضرة تضارها في صفاء معيشتها، يقول الإمام ابن حجر في فتح الباري: “ومما كافأ النبي صلى الله عليه وسلم خديجة في الدنيا أنه لم يتزوج في حياتها غيرها..”.
ود الخلا سلااام
العدل يا اخى يكون فى النفقه (يعنى رطل سكر جاى ورطل سكر جاى ) مع مراعاة فوارق الاسره . وكذلك العدل يكون فى المبيت يعنى الاحد بى جاى والاتنين بى جاى وافتكر دى ماها صعبه الا تصعبوها براكم .
يعنى اى زول يعدل نفقه ومبيت بجى يوم القيامه سوى وقوى يا قبيله .
نيام نيام : سلااام
كنت متوقع قصايدك مطر لكن الصراحه راحه يا شاعرنا وان شاء الله تحصل على الاذن ولو القصه دى بتجيب ليكا هواء عاذرنك تب .
نونو سلااام
يقول الإمام ابن حجر في فتح الباري: “ومما كافأ النبي صلى الله عليه وسلم خديجة في الدنيا أنه لم يتزوج في حياتها غيرها..”.
لكنه تزوج على عائشه يا نونو
((انا ضد التعددية؟؟؟؟
.نظرتي للتعدد ان الرجل هدفة الوحيد صلاح حاله؟؟؟))
ايه الاحكام الجزافيه دى يا نونو وليس دائما هدف الرجل من التعدد صلاح حاله وهاك دى . اعرف رجل بلدياتنا متزوج وله مجموعه من الابناء والبنات . له اخ واحد والاخ متزوج كذلك .
شاءت ارادة الله ان يتوفى شقيقه
بعد فترة وجد هذا الرجل انه مكلف بكفالة ايتام اخيه
اصبح ياتى لهم باحتياجاتهم يوميا
ثم قرر ان يتزوج ارملة اخيه
اها زى دا داير مصالحه يا نونو
كسره : بعدين فى واحدين عندهم قدح مكسر وصليبو طالع ودايرين يغطوهو بعد ما اتزوجوا تفتكرى ديل دايرين مصالحهم .
ويا نونو اصلا الزواج يحقق مصالح للطرفين دا الزواج الاول فما هو المانع فى ان يتزوج الرجل تانى وتالت ورابع لتحقيق مصالح
الاخوه الاكارم مساكم الله بالخير
زووووووول
لك التحيه والتجله.
(لكنه تزوج على عائشه يا نونو)
والله يا الزووووووول لو كان الرجال بربع ما كان عليه الصحابه وبقدر قليل مما كان عليه رسولنا الكريم لما كان بالامر جدل ولا نقاش
ولو كانت نساءنا ببعض ما كانت عليه امهات المؤمنين والصحابيات من يقين وخلق ودين لما كان هنالك خوف من التعدد
لكن الزمن تغير والنفوس تغيرت والمتطلبات الحياتيه زادت .
نونو
مثلما للرجل مصلحه في التعدد وانت ترفضيه ايضا للمرأه مصلحه في عدم التعدد .
الامر في النهايه مسالة قناعه واراده ولو استوفي شرط العدل (النسوان الحبه ما بتجيهن) ولا شنو؟
الزهراء سلاام
مرحبا بك فى هذا الموضوع (الشائك) لكن يا الزهراء طالما الصحابه الاخيار عددوا على نسائهم الخيرات فما فى مانع نحن وانتن نتشبه .
فتشبهوا ان لم تكونوا مثلهم ……….. ان التشبه بالكرام فلاح
اما تغير الزمن والمتطلبات الحياتيه فذلك مما لا يمكنه الغاء حكم شرعى شرعه ديننا الاسلام الصالح لكل زمان ومكان ولا شك ان ربنا جلا وعلا يعلم بتغير الزمان والمطلبات لكنه شرعه باية النساء (فانكحوا ما طاب لكم من النساء مثنى وثلاث ورباع … الخ )) .
وكذلك شرعه رسولنا صلى الله عليه وسلم بقوله ((خير هذه الامة اكثرها نساء )) الحقنا يا شيخ صالح بتخريج هذا الحديث .
كسره : العدل هين بس البقنع (الديك ) منو يا الزهراء
الزهراء لك التحية /
القناعة بتجي لية وحداااااااااااااااااات يعني يكون (متقندل )حاااااااااااااااااايوفر ليها كل حاااااااااااااجة عربية شقة سفر حااااااااااااجات تانية حاميني……….
هو زاتوا يكون عمه كبير يقدر يفتح اربعة بيوت ماااااااااابيتين؟؟؟
يعني ياالزهرااااااااءياختي ماااااااااااااااااايجي حااااااااااااااااالتوا بالبلاء هااااااااااااااااااااااارب من عواااااااااااطف الاولي العيال المعيشة داااااااااااااااااير يسد دة بي طينة التانية بي عجينة اهاااااااااااا جينس دة يسوة بية شنوووووووووووووووا؟؟؟؟؟؟
والله دة العدل المساوة مااااااااااااابتنفع فيها؟؟؟؟!!!!!!!!!!!!!
نونو سلااام
احلال على بلابله الدوح ……….. حرام على الطير من كل جنس
((القناعة بتجي لية وحداااااااااااااااااات يعني يكون (متقندل )حاااااااااااااااااايوفر ليها كل حاااااااااااااجة عربية شقة سفر حااااااااااااجات تانية حاميني……….))
طيب يا نونو ما دى المصالح ال انكرتيها على الرجل زاتا ولا انا غلطان
نونو …وكل الأحبه..
أنتى ضد التعدد و هذا رأيك الذى نحترمه..لأنك عواطف… وكل العواطفات لا يرضين بالتعدد أو تشاركها عواطف أخرى فى سعيدها..وهذا شىء أعتبره طبيعى لكن لا رأى لنا فى أحكام الدين …فمثلاً لا يجوز لنا أن نقول كما يفعل بعض العامة فى اسئلتهم الدينية : ما هو رأى الدين ؟ وكان يجب علي السائل ان يقول : ما هو حكم الدين فى كذا وكذا ؟ولعواطف الحق فى الرفض ولكن ليس لها الإعتراض وهنالك فرق ما بين الرفض والإعتراض ..وكما هو معلوم فإن التعدد هو الأصل والخوف من عدم العدل هو العقبة التى على سعيد أن يتجاوزها ولكنه لن يستطيع لأن علام الغيوب قد جاء بها صريحة لا لبس فيها ولا غموض وقال فى الآية ” ولن تستطيعوا أن تعدلوا بين النساء ولو حرصتم.. فلا تميلوا كل الميل فتذروها كالمعلقة ..وإن تصلحوا وتتقوا فإن الله كان غفوراً رحيما ً )النساء 129…فالميل العاطفى من الصعب التحكم فيه إلا من رحم ربك..فالزوجة الثانية أو الثالثة غالباً ما تكون اصغر سناً و………….و……………وما عاوز اقول وما عاوز أصرح.. لأنو الناس ما بتريح.
قال الله تعالى : ” يَا أَيُّهَا الَّذِينَ آَمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُولِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآَخِرِ ذَلِكَ خَيْرٌ وَأَحْسَنُ تَأْوِيلًا ” الآية 59 من سورة النساء .
زووووووول ابو سبعة ووووووووات ؟؟؟؟
انتي فعلتهااااااااااااااااااااااااااا يارجل ؟؟؟
ام ستفعلهاااااااااااا؟؟؟؟
ماااااااااااااااكل هذا الحمااااااااااااااااااس في موضوع التعدد؟؟
قلتة بتجي لية وحداااااااااااااااااات دايراااااااااااااااات يفكن هذة المااااااااااااااتسماااااااااااش؟؟؟؟؟
عواااااااااااطف بطبيعتها غيورة على سعيد لا ترضى أي عوااااطف أخرى تشاركها ذلك السعيد فذاك أمر طبيعي وفطري لايمكن سلامة النفوس منه !!!!!!!!!!!!!!!!اذا تجرا ذلك السعيد وفعلهااااااااا لقامة القيامة طبعا القيامة دة موضوع تاني (دي مااااااانانية لكين شي في نفس يعقوب)
سلام
زووول والمتداخلين
———————
انا ما عارف الجرسه في شنو…سوا من الرافضين/ (ضات) او المعترضين / (ضات)علي التعدد او حتي مجرد النقاش في الامر….لم يامر الشرع كل الرجال بالتعدد يعني ما قال تزوجوا (يا كل الرجال) مثني او ثلاث او اربعة…..لكن رب العالمين يعلم ان هناك (حاجة…needs ) لبعض الرجال وحالات إجتماعية ملحة ستحدث في الأمة الاسلامية كأن يزيد عدد النساء وتكثر العنوووووسة ومشاكل طبية وعدم الإنجاب ….الخ من الأشياء التي علم بها خالق الرجال والنساء…..لذا اباح للذي لديه مثل هذه الظروف ان يعدد….وحتي من نراه نحن انه (والله ما عنده سبب ليه يعمل كده ما السرة بتاعته هدية ورضية وجميلة ؟)..يمكن الحاجة بتاعته للجانب الجنسي كبيره وسرتين ما بكفوه…ولا يعلم احد طبيعة البشر واسرارهم ….ولا ما يدور في غرف النوم .. قد تكون زوجته غير مستطيعة لارضاءه نسبة لشبقه الزائد (خلقة الله)…. او مهملة لنفسها او بها شئ يسوءه الخ…لذا من يعلم بشئون خلقه اباح ذلك لكي لا يكون هناااااك حرج..فالتي ترضي او لا ترضي من العواتك التعدد لزوجها…..لا تستطيع شرعا وقف اباحة الخالق….الذي بجانب الاباحه حدد ان يعدل الشخص المباح له ذلك في النفقة والمبيت …لكن هوي القلب (الحب يعني والميل ) ليس بيده….
الحبان في كل مكان سلام
الزووووووول هههههههيع سلامات
الموضوع سلس وسوقه حار، شخصياً أرى أن مثل هذا الحوار صحي وضروري لإجلاء الغبش، فرأي الشرع بشأن التعدد لا مجال للجدال حوله، غير أن هناك مسائل كثيرة من صميم الشرع الحنيف والهدي النبوي الشريف يصهين منها بعض الناس ولا يراعونها ويأتوا فقط للتشدق بالله قال والرسول قال فيما يخدم مصالحهم وحتى لا يتختلط الحق بالباطل وجب تناول الأمر بالبحث، ومن المظاهر السالبة التي لابد من الحديث عنها، وهي التعامل مع الفعل كـ:
1) نوع من الرفاهية من قبل الأثرياء الجدد حيث تأتي المرأة الثانية الحسناء صغيرة السن شأنها شأن السيارة الفارهة والفيلا الجديدة…الخ.
2) نوع من الشطارة أو الفهلوة تلقى الواحد الحالة واقفة معاهو وما مُلبي الحد الأدني من الضروريات لعواطف وعيالها يقوم يأخذ من السنة قصة الراجل الذي شكى ضيق العيش ونصحه المصطفى عليه أفضل الصلاة والسلام بالزواج فيقوم بالسعي لمد قرعته حيثما وجدت مرطبة بصرف النظر عن بقية ما دعا إليه النبي الكريم من دين وخُلق وأصل …الخ.
3) نوع من الكيد والغيظ لعواطف أو بعض أقاربها في سياق حُمرة العين وإستخدام سلاح الأخرى.
4) نوع من الصبينة ومحاولة بائسة لإسترداد الشباب الغابر بعد الترطيب بغية إثبات قدرات فعل عامل السن بها فعله الطبيعي .
وإذا إنتفت الضرورة الطبيعية فمثل الدوافع أعلاه مرفوضة لكل ذي عقل سليم وربما أجمل وصف قرأته لمسألة التعدد هو ما ذكرته الأستاذة صافيناز كاظم في مناظرة مع دكتور مصري علماني رافض لمبدأ التعدد كان أستاذ في جامعة الكويت نسيت أسمه غير أنها قالت له بأن التعدد أشبه ما يكون بمخرج الطوارئ في الطائرة لا يحدث اللجوء إليه إلا إضطرراً.
هذا دلوي يا الزووووووول ولا يخفى عليكم أن في سودان الإنقاذ مئات الآلاف من الشباب الذكور الأصحاء الذين يرغبون في إكمال نصف دينهم لكنهم وللأسف الشديد لا يستطيعون إقامة أودهم أو ملء بطونهم وبالتالي يبقى الحديث عن الزواج بالنسبة لهم ترف سابق لآوانه فالمنطقي أن يكون التركيز على تيسير زواج الواحدة للراغبين وعاجزين قبل الحديث عن الدبل والتربل يا سهيل.
إضافة:
الحبيب أبكرون حمداً لله على سلامة ظهورك وباسم كل المعلقين والمعلقات وجمهور سوداننا نشكركم جزيل الشكر على إنهاء القطيعة ونعرب لكم عن بالغ سعادتنا بعودة رأيكم الذي له دوماً نكهة وطابع ومذاق خاص، فلا أسكت الله لك حساً ولا حرمنا من مرئياتكم. سلام
ابكرون وود الخلاوحاج السلاوى سلاااااام
والله ما عارف اقول شنو لكن بصراحه تعليقاتكم الجميله ذكرتنى المثل الشدر الكبار فيهو الكعكول . (معليش ما تزعلوا انتوا اكبر من كدا ) .
لكن بصراحه يا ود الخلا الزوووووول صاحبك صحيح فى الحته دى بتاع جعجعه وما اندوا اى هاجه يعنى زيو وزى التانين عندوا عواطف واحده ويتهمه البعض بانه ادى اليمين الدستوريه ومن اهل الرايه لكن بصراحه كدا تعليق ابكرون دا اجمل تعليق والراجل ابدع فيهو ايما ابداع واتكلم عن التعدد بعيدا عن العواطف وتحاشى ما وقع فيه الجميع الذين فهموا اننى ادعوهم بشخصياتهم لكننى تطرقت لامر شرعى والمفروض اى زول ما عندوا (استطاعه ) يقول والله دا الحق لكن الله يهدينا موش تقولوا ارفض بشده وانا ضد التعدد وانا اكره التعدد
كعكوله اولى :نونو …وكل الأحبه..
أنتى ضد التعدد و هذا رأيك الذى نحترمه..لأنك عواطف… وكل العواطفات لا يرضين بالتعدد أو تشاركها عواطف أخرى فى سعيدها..وهذا شىء أعتبره طبيعى لكن لا رأى لنا فى أحكام الدين …)) حاج السلاوى
كعكوله تانيه :
….وحتي من نراه نحن انه (والله ما عنده سبب ليه يعمل كده ما السرة بتاعته هدية ورضية وجميلة ؟)..يمكن الحاجة بتاعته للجانب الجنسي كبيره وسرتين ما بكفوه…ولا يعلم احد طبيعة البشر واسرارهم ….ولا ما يدور في غرف النوم .. قد تكون زوجته غير مستطيعة لارضاءه نسبة لشبقه الزائد (خلقة الله)…. او مهملة لنفسها او بها شئ يسوءه الخ…لذا من يعلم بشئون خلقه اباح ذلك لكي لا يكون هناااااك حرج..فالتي ترضي او لا ترضي من العواتك التعدد لزوجها…..لا تستطيع شرعا وقف اباحة الخالق…)) ابكرون
كعكوله تانيه :
وخيار الزواج يا صديقي معروف هو خيار خاضع في اغلبه لهذه النفوس البشرية التي تختلف من شخص لآخر وايضا من وقت لآخر ، ومن ظرف لآخر . وقد يختار الزوج ويفرح بخياره اول الامر ثم تبدو في حياته ظروف لا يعلمها الا الله وحده
، فاذا هو في صراع نفسي وصدام داخلي بين اختيار هو واقعه المعاش
وبين امر آخر تميل اليه نفسه او يفضله في داخله الشعوري ، فاذا هو
يريد ان يقبل على الزواج مرة اخرى ، والزواج الثاني في الاسلام
خيار لم يحرم ، ولم يشجبه الاسلام او يعتبره نقيصه او ذريعة للإزدراء.
ان الزواج الثاني هو احد مظاهر الرحمة الالهية الكبيرة بهذه النفوس
المسلمة ، من مظاهر رحمته تعالى بالزوجين الرجل والمرأة ـ وبالمرأتين)) ود الخلا .
كسره : ارجو من جميع القراء تامل كعكولاتالسلاوى و ود الخلا وابكرون ففيهما المختصر المفيد وكلماتهما تسطر بماء الذهب .والله كلماتهما تكوى فوق الجرح .ارجوكم اقرأوها بتأمل .
كسره : تعليقات ابكرون وود الخلاوالسلاوى مهداه للاخت نونو بالخرطوم وللاخ افليقا بالشقيلاب وللدكتور عزت بقاريتش بالخرطوم غرب وللاخت الزهراء وللاخت سماسم ولجميع الرافضين/ (ضات) و المعترضين / (ضات)وكذلك مهداه لود الخلا فى نسخته بتاعة امس ما بتاعة اليوم
صديقى مخير سلااام
مرحب بالطله البهيه .
لكن لقيتك كدا .
اولا بالتبادى وبالنسبه للزواج الاول هناك الكثير من المنظمات التى تساعد الشباب على اكمال نصف دينهم وكل من يريد ان يتزوج زواجا مبسطا يمكنه ذلك سواء فى سودان الانقاذ او فى صومال شيخ شريف او فى تشاد دبى لكن المشكله فى مظاهر الترف التى غزت مناسباتنا والمشكله فى الرايه الادوها ست الدار يعنى يا مخير تلقا الواحد داير يزوج بنته وممكن يشترى ليها الملابس والاثاثات تجى تلقا المرا دايرا الراجل يجيب لبتها خمسه كيلو دهب وشيله دستتين دستتين . دى الحاجات المفروض الناس تحاربها لكن الانقاذ دى سيك سيك معلقه فيك والناس ما ممكن تخلي ليها احتياجتها سواء كانت ماكلا او مشربا او منكحا . واظنك تعرف قصة سيدنا على بن ابى طالب الذى تزوج سيدة نساء العالمين ولم يجد ولا خاتما من حديد ليمهرها اياه وهى حالة من العوذ والفقر لا توجد فى بلادنا والحمد لله رب العالمين .
كسره : لا اعتقد ان هناك مانعا فى التمتع بنعم الحياة الدنيا ومنها الزواج ولا اعتقد بان هناك مشكله فى ان يتزوج الرجل على زوجته من باب العين الحمراء واعلم احدهم وكان يشستكى من سؤ تعامل زوجته واهانتها لوالديه فما كان منه الا ان يتزوج عليها . انقر يا مخير زوجته الاولى ما اتصلحت وجات كبت الجلسرين لكن بعد خراب مالطا .
وجاييك تانى
ويييييييييييييييييييييييييييييييين يا سترايكر
قول حاجه .
ان شاء الله تشجب وتدين وتستنكر ما قلنا
الاكارم سلاااام
اليكم بعض اراء الشيخ صالح فى الموضوع :ــ
الاخ الفاضل زووووووول
السلام عليكم ورحمة الله
في صحيح البخاري وغيره عن سعيد بن جبير قال: قال لي ابن عباس: هل تزوجت قلت لا، قال فتزوج فإن خير هذه الأمة أكثرها نساء
الحديث المذكور منسوب لابن عباس رضى الله عنهما ولكن احاديث كثيرة تشير الى معاني قريبة …
بعدين انت يا الزووووووول تفتح لك في ابواب اقل شئ ان تكون مستعدا لها بمعنى ان تكون معددا او في طريقك للتعدد يعني البيان بالعمل اما ان كنت من الموحدين(جعلني الله واياك ممن يوحدونه حق توحيده) قلبا وقِبْلة فروِّق المنقة.
هن هسي اخواتنا المعترضات ديل ماقادرات يفهمن خطورة الوضع ” مستقبلا” إذا اصررن على رأيهن.. يا بنات العم ” الغير متزوجات” قد يأتي زمان يفكر فيه الناس بمراجعة بعض احكام الشريعه لتوسيع دائرة المشاركه لرفع عدد الزوجات لأكثر من اربعه ( فقه الضروره) لضمان حصولكم على فرص .. لذلك من الأجدى عدم المجاهره بالإعتراض لضمان مستقبل ولو ( مشترك) …
بعدين الضره ليست دائمآ سيئه .. قد تجد إحداكن إنسجامآ مع ضرتها و تكونوا تيم جيد والناس بالناس و للناس.. والقفه العندها إضنين بيشيلوها إتنين و العندها اربعه برضو بيشيلوها اربعه و العندها اكتر من اربعه فالأمر متروك لإجتهاد العلماء و العارفين .. و كفايه كده ماتوديناش في داهيه
“هن هسي اخواتنا المعترضات ديل ماقادرات يفهمن خطورة الوضع ” مستقبلا” إذا اصررن على رأيهن.. يا بنات العم ” الغير متزوجات” قد يأتي زمان يفكر فيه الناس بمراجعة بعض احكام الشريعه لتوسيع دائرة المشاركه لرفع عدد الزوجات لأكثر من اربعه ( فقه الضروره) لضمان حصولكم على فرص .. لذلك من الأجدى عدم المجاهره بالإعتراض لضمان مستقبل ولو ( مشترك) …
بعدين الضره ليست دائمآ سيئه .. قد تجد إحداكن إنسجامآ مع ضرتها و تكونوا تيم جيد والناس بالناس و للناس.. والقفه العندها إضنين بيشيلوها إتنين و العندها اربعه برضو بيشيلوها اربعه و العندها اكتر من اربعه فالأمر متروك لإجتهاد العلماء و العارفين .. و كفايه كده ماتوديناش في داهيه”
نأسف للخطاء في الإرسال.. هذه المداخله من بنات كلماتي” الغير متزوجات” لكن لأن السيرفر الخاص بشركتنا ” مشترك” قد يحدث ان تجد تعليقي معنون بحنين أو طارق اب احمد .. فخليك عادي زي سيرفرنا
سهيل سلااام
كدى خليك من سيرفركم نحن عاديين والحمد لله لكن كدى ورينا منو الكتب التعليق فيكم انت ولا حنين ولا اب احمد بالمناسبه اوعا الايميلات برضو تكون مختلته (؟) .
كسره : كلام ميه ميه قد تجد ضرات متعاونات وقد تجد ضره يحججها اولاد ضرتها وجايييكم
الأكارم كوووووووووولهم بدون فرز .. سلام .
قال أحد المعددين( لديه أكثر من عواطف ) ولديه تجربة ثرة فى هذا المجال ..أفضل حاجة أن يكونن تلاته لأنو أتنين ممكن يتفقن مع بعض عليك ..لاكين تلاته عواطفات صعب يتفقن عليك وأكيد فى واحده منهن حتكون واقفة معاك فى صفك ..شفتو كيف ناس عواطف ديل صعبين ؟
غايتو .. يا ناس عواطف … جنس غايتو !!!
الزووووووول
قمت على جن اهلك الجعليييييييين مالك البلد رايقة داير تدخلنا فى قزازة انسولين مالك الله يهديك ياشقى
اج السلاوى سلااام
وكمان يا عمنا قالوا الاولى بتكون مبسوطه جدا من التالته لانها فوق التانيه والتانيه بتكون مبسوطه من الرابعه لانها كوت التالته شوفت كييف
بشاوى سلاااام
الله لا جاب قزازة الانسولين يا معلم بس خليك صريح زى اخوك نيام حالتو قلنا الراجل شاعر يقوم يجدع ليهو جدعه جدعتين لكن طلع زوول رايه وداير ليهو اذن فشان يتداخل معانا .
الزوووووول وضيوفه الكرام
قلنا نسلم عليكم ونشوفكم كيف
الزووووووول
ناس المعارضة سلام
ناس أبكرون مثنى وثلاث سلام
الجمهور الكريم سلامات
استرايكر: طلعت ممتنع عن التصويت… يعني راقد رز … الله يخلي أم إبراهيم، أتاري عندنا ادمنستيراترين، طيب ما تقعد حدا نيام واعمل زي فردتك أبو الأفلاق عدد محاسن الزيجة الواحدة عشان ناس سهيل يتلحلحوا، وما يفتكروا المسألة ورطة، وناس زوووول لسان حالهم كان غلبك سدها وسع قدها…..
مخير : اخى وفردتى ستريكر ده برغم الشافو فينى برضو عرس عشان كده سهيل برغم الشافو فينا برضو حيعرس !! شفت الهنا ده كيف ؟؟
انا شخصيا مع توفير الجهود لاصلاح حال الاولى حتى اخر لحظة !! واخر لحظة دى طبعا ما يوم القيامه !!! ومع انو الواحد لو خلاص وصل لطريق مسدود مع العواطف الاولى مسموح ليهو بفكر فى التانيه – واذا ما احس بان عواطفو بتوصلو لحدى اخر لحظه وفجاتن ترجعو محل ما انقذتو !! برضو يوقف عملية المقايضه دى ويبدا هو فى عملية عكسيه !!!
اما القلب فانا ضد انه يسع واحده فقط يعنى ممكن تكون حبيت الاولى وعرستها وفى حاجات ناقصاك عندها فجاتن يدق باب قلبك حنان تانى !!
واااه من الحنان التانى حيث يطرق الحنان التانى بعنف هادئ !! شغاف الحتات الطلعت عواطف زيتا عندك !! فتبدا فى الميول للحنان التانى وفى النهايه واحد من تلاته :
يا لحقتك عواطف فى اخر لفه وكبحت جماح التوسع الحنانى بتاعك .
ولا الحنان التانى ذاتو ما شجعك وقعد يشبكك عواطفك وما عواطفك .
ولا انت براك قمت قلت وهل استجير من الرمضاء بالجمر ؟؟
غايتو يا شباب الاولى والاصل هو البحث عن كل ما ينقص عواطف عند عواطف نفسها وما تعملو لينا مشاكل نحنا ناس رحول الايامات دى !! خلونا نستقر كده ونرجع نوريكم راينا بعد الرحول ..ما نقوم نتهور كمان العفش يتكسر فى الدفار !!
أيوه يا أفليقا أظهر وبان عليك الأمان بعد ما منّ الله عليك ببيت قمت ظهرت علي حقيقتك زمان الكلام داك كولو كان كلام خوف عشان ما تلقى نفسك إنتو وعيالك في الشارع يا دوب شعرة جلدك انطلقت وبقيت تطلع في المستخبي
الليلة عووووووووك . العوة ضربت .
ياناس ود الخلاء وياالاجاويد وماتجو تلحقونا …
سماسم : ابدا والله انا موحد ولو سكنت فى بيت ناس جيران خالة سمسمه !! بعدين انتى قايله سكنى مع سمسمه ده شنو ؟؟ ده سكن برانى ساكت – انا وسمسمه ساكنين جوه بعض حيطه بالحيطه ..
شفتو كسير التلج ده كيف الدنيا رحول انسترو معانا الله يستركم ..
إنت يا أفليقا.. دفاركم دا لساتكو مربعه ؟ شن العفش .. اليتكسر .. هو حيطه جيران ناس خالة سمسمه جالوص و كمان عاوز تعملها طوابق ..قاااادر الله
سلام للزووووووول وبقية المدونين جيت متاخره لكن لقيت لى فرقة صغيرة كده غايتو مابتدخلنى لكن لوكوركت منها يمكن تسمعوا صوتي………..
لا يمكن لعواطف او اى مخلوق الاعتراض على امر الله،وكغيرى من العواطفات الاتى لايحبذن التعدد لا اقول انى اعترض على امر الله ،ولكن يا سعيد هذا حق لك وليس فرض،والتخلى عن الحقوق ليس بسيئة ولا خطيئة ولا شنو؟
ترى عواطف فى سعيد كل دنيتها هو عماد حياتها وبالعديل كده نفسها الطالع ونازل وايكد ما حتب شريك وان كانت متضايقه من سعيد وعيشتها معه, قد اختار له شريكه لى فيه ولكن تحت ظرف واحد لا غير اذا كنت لا استطيع ان انجب لها ,سوى ذلك تاكد ياسعيد اذا فعلتها ما حاعمل زى العواطفات البسبن بيوتن ويجهجهن اولادهم ويزيدوا الحمل على اسرهن,حاكون فى بيتى النيتو معاك والم اولادى وانت مش طوبه وقعت من حيطه حياتى انت حيطه كامله واتهدمت وبستغنى عنها ببرش او ملايه او ستاره ما بتضارينى لكن بتمشى الحال،وما حتكون اكتر من منفذ لتصريف امور معيشتى,اما بالنسبة لاولادنا لازم تكمل رسالتك اتجاهم ولو بكسر رقبتك صرف وتربية ومسؤوليه اها اخير تكون نعجه بين ذئبتين ولا اسد ملك غاااااااااااااااااااااابه بكل ما تحتويه الغابه.
والى لقاااااااااءءءءءءءءءءء
بنتنا الغبشة:
لكن لقيتك مصعباها شدييييييد
ليست الاسباب التي تتيح او تجعل الشريك يعدد هي عدم النجاب فقط…هناك سبب مهم ولا تتحدث عنه الناس وهم الغالب ل90% من اسباب التعدد او اكثر ولا يذكره الرجل لشريكته او اهلها احتراما لزوجته ولعشرته معها…هذا السبب ينحصر في : (التغيرات التي يحدثها الزمن في جسد شريكته بسبب كثرة الولادات او الترهل والتقدم في السن او بسبب اهمالها في قوامها مما يسبب فتورا في العلاقة الزوجية الخ..)هذا التغير (الذب لا يحبه كل الرجال ولا اقول بعض لانه اكيد) يجعله يسعي نحو التجديد بالحلال بدلا عن السقوط في براثن الحرااام المتاح بكثرة…صدقيني بنيتي اذا وصل الرجل لهذه القناعة لا شي يثنيه عن التعدد…يعني الموضوع ما مجرد تنازل عن الحقوق….والمرأة الحصيفة تلك التي تبدو في نظر زوجها حتي بعد 20 سنه زواج كانها العروس التي تزوجها في اسبوعها الاول واحة ورارفة يستظل بها وتستظل به واذا نظر اليها سرته….والحصيفة اكثر تلك التي اذا وقع قدر الله ان تحافظ علي حوائط بيتها (بدون شتيت طوب وبروش وستاير ) بل تسعي نحو تمديد الجسور …وما صعبة..
تصحيح :
هذا التغير (الذي لا يحبه كل الرجال ولا اقول بعض لانه اكيد)
الحلوين سلام
أبكرون كلام في التنك يا باشا واضح وما فاضح، لكن يا سيدنا الأخ سعيد الحظ أو أبونا آدم ده ما شريك ومساهم في التحولات الحاصلة دي، يعني عندو دور ومهم في لفت النظر والتحفيز على المحافظة وتوفير لوازمها وما إلى ذلك طالما قصة الترهل والما شاكل ما شغال معاهو، يعني تآخذها من أهلها جدية وبعد نصف دستة شفع تجيبها ليهم راجعة بقرة وتقول ليهم بضاعتكم ما شغالة ؟؟ ده أسمو كلام يا راجل، ما وددت قوله الشراكة الحقيقة تقتضي النضال المشترك دي عوامل الزمن والبيئة والطبيعة، خاصة وأن العبء الأكبر من مراجعة الدروس مع الشحارير مسئولية عواطف، إدارة شئون المنزل من عضة ونضافة وغيرها برضو من واجبات المنكوبة عواطف التي تؤديها بدون من ولا تذمر أو أذي وفي ظل هكذا ظروف يكون إتباع برامج رياضية أو إرتياد جيم رفاهيات بعيدة المنال ما لم يتفضل الفاضل سعيد بتوفير وتهيئة ما يلزم، إلى ذلك الحين يكيلو تراب ولا يمشي يعرس في ستين داهية وبرضو عواطفو الجديدة بعد فترة حتكون سكند هاند، كلامي ده صاح ولا ما غلط يا الغبشة.
قصدت النضال المشترك ” ضد ” عوامل الزمن والبيئة والطبيعة، وليس دي
صباحكم خير……………….
ودالخلا:سلام ومرحب.(خليها طوبة واحدة الوقعت دي، وخلي بالقي الحيطة واقف زي ماهو، يمكن ربنايرجع الطوبة في محلتها .)هسى انت كان واقف فى الشمس مش بكون ضلك فى الارض وكان انت مشيت ضلك بكون فى ولا ببراك؟ وضلك بالتالى برجع لما ترجع انت وخلى بالك مش تجى راجع وشايل لى معاك بقجه فى راسك كده الضل بكون انت ببقجه وانا لما اخدتنى كنت انت بلا بقجه.
ابكرون:سلام ومرحب برضو ليك انت, انا عارفه انو ماهو السبب الوحيد البخلى الراجل يعدد ولكن قلت هذا هو السبب الوحيد الممكن اوافق بيه وبرضو على مضض،ومخير ما قصر بكلامه وما خلى لى فرقه.عاوز عواطف تكون بعد عشرين سنه زواج ياه العرس فى اول يوم ياراجل حرام عليك وحق عواطف فى سعيد وين ما اخدتو وهوفى ريعان شبباه ماكبر ما اتغير شكله ايوة المراه تكبر الرجل بيولوجياً ولن معنوياً ما بنكون سوا ؟
مخير:سلامين ومرحبتين يسلم كى بوردك ومشكور على كلامك,وقصة النضال المشترك دى هى عصب الحياة الزوجية ولا شنو يا جماعه؟
ربنا يديم المحبه …………..
والى لقاااااااااااءءءءءءءءءءءء
ياجماعة الموضوع دة بيكتل ليهو زوول
الغبشه سلاااام
لا يمكن لعواطف او اى مخلوق الاعتراض على امر الله،وكغيرى من العواطفات الاتى لايحبذن التعدد لا اقول انى اعترض على امر الله ،ولكن يا سعيد هذا حق لك وليس فرض،والتخلى عن الحقوق ليس بسيئة ولا خطيئة ولا شنو؟))
كلام جميل لا تعليق .
((الحال،وما حتكون اكتر من منفذ لتصريف امور معيشتى,اما بالنسبة لاولادنا لازم تكمل رسالتك اتجاهم ولو بكسر رقبتك صرف وتربية ومسؤوليه اها اخير تكون نعجه بين ذئبتين ولا اسد ملك غاااااااااااااااااااااابه بكل ما تحتويه الغابه.
)).
منو القاليك يا غبشه انو سعيد راح يهمل اولادو ويرمى مسعوليتو . سعيد سيتكفل بتربية ابنائه والصرف عليهم لانو ما مشحود عليهم ولو القصه بقت منفذ صرف بكسر رقبه وكدا احسن ليكى تتفكفكى وتشوفى اهلك وين وترجعى ليهم زى ما طلعتى منهم راس واحد فقط وتتركى الاولاد لابوهم وتتجهى لاقرب محكمه لتثبيت حقوقك طرف المنفذ .
مخير سلااااام
يعني تآخذها من أهلها جدية وبعد نصف دستة شفع تجيبها ليهم راجعة بقرة وتقول ليهم بضاعتكم ما شغالة ؟؟
حتى انت يا مخير ؟
اول حاجه نحن (والله نحن منو ما عارف ) زوول يدبل ويرجع المرا الاولانيه لاهلها ويقول ليهم هذه بضاعتكم ردت اليكم دا زاتو ما من ناسنا(حلوه ) الزوول ال بدبل دا لازم يواصل احسانه لزوجته الاولى ويواصل تربية ابناءه ولو لقا المرا الاولى بتستاهل ممكن يعمل ليها رضوه صغيرونه كدا زى حجه ولا دهيبات ولا اجازه فى اوروبا ولا افريقيا دا لو بتستااااهل .
ود الخلا سلاااام
والله يا معلم قصة التعدد دى ما عندها اى علاقه بزحف عوامل التعريه على عواطف انما يجوز التعدد حتى على تلك التى لم يمض على زواجها اكثر من عامان او عام ولو كنت زوول نذل كدا ممكن تعملا بعد سته شهور من الزواج الاول .
ابكرون سلااااام يا حصيف
كلامك لا يحتمل التعقيب والمزيد لكن دعنى اخلع قبعتى وانحنى احتراما واجلالا لما يسطره كى بوردك .تسلم يداك ويسلك كى بوردك وماوسك زاتوووووووووو
كسره :
هاج اهمد بلدياتنا وهو من اند ناس افليقا
تزوج على زوجته بعد خمسة عشر عاما من العشرة معها . لكنه ركنها ومال مع زوجته الثانيه واصبح لا يزور بيته الاول الا لحظات متقطعه .
ــ شكته زوجته لامام المسجد الذى راح يحدثه عن العدل بين الزوجات وان ظلم زوجته يجعله ياتى يوم القيامة وشقه مائل . لكن هاج اهمد رد علي الامام بقوله :
يا شيهنا الاولانيه دا اشنا مآآهو خمس تاشر سنه خلينا نكمل خمس تاشر سنه مع التانيه دا بأدين تآآل قول الختبه بتآئك دا .
زووووووول قال :
(ابكرون سلااااام يا حصيف
كلامك لا يحتمل التعقيب والمزيد لكن دعنى اخلع قبعتى وانحنى احتراما واجلالا لما يسطره كى بوردك .تسلم يداك ويسلك كى بوردك وماوسك زاتوووووووووو)
———————————————————————
ياخ بالغته فوكا ما للدرجة دي …اقول ليك شي الموضوع القريتو ده مرتيط بايميل رسلتو لي (مخير وودالخلا)…فيه تعليل للتعليل..ههههه ما بنشرح علي المباشر…تسلم يا عزيز
ابكرون سلاام بالله الايميل سررريعا
الزووووووول : الا تثبت انك +38 فما فوق يعني XXXX LARGE
ابكرون سلااااام
ما طالبنى حليفه اخوك 38 ماينص شويه كدا يعنى ثرى فور اكس ال الا شويه
كسره :
بلدياتنا بتاع شربه لمواخذه . تم القبض عليه متلبسا وعندما ادخلوه الى قسم الشرطه .
ــــ يا زول انت سكران ؟
ـــ ابدا
ــ طيب قول كه
ــ كه لكن شارب شششويه يا جنابو
وفشان كدا يا ابكرون كه لكن ناقص شويه من 38 سنه .
السادة آل سعيد وآل عواطف …كووووولهم ..سلام بعد غيبة قصيرة .
أها حسه إتفقتو على شنو ؟ تعدد ولاّ ما تعدد؟ منتظرين النتيجة … الحكاية ما تبقى كلام سااااكت وونسه ..عاوزين الأقوال يتبعها أفعال ..يا اسود .. يا ابيض !! العُزاب ..والمتزوجون حديثاً .. يمتنعون !!
غايتو يا الرجال ..والكواشف خصوصاً عليكم جنس غايتو ..اصلو ما معقول.
زووول ثرو المتناقشين : الموضوع بقى زى الوحده والانفصال ما شاء الله ..
تعرف يا زول انا شخصيا شغال بنظرية اورنيك 8 الجنائى ( الحاله مستقره ما لم تحدث مضاعفات اخرى ) فانا موحد ما لم تحدث تطورات اخرى !! صديقى س فوجئ ذات صباح بزوجته توقظه وتشر لموضوع هام يجب نقاش :
س : خير انشاء الله ؟؟
مدام س : لالا خير وخير كتير انشاء الله .. شوف والله انا وصلت الحد فى التعامل معاك وافتكر انو عطائى لحدى هنا ووقف وما بقدر اذيد اكتر من كده وما بوعدك بتغيير عشان كده انت من حقك تشوف زوله تانى تبدا معاك بروح قتالية وعقيده زوجيه جديده وانا عافيه ليك لله والرسول ..
س : عافيه لى ؟؟ ده حنك جديد ولا شنو ؟؟ انتى يا مره نويتى تلحسينى ولا شنو ؟؟
مدام س : لالا والله حاشا كفايه لحس انا نويت اخليك بى راحتك وعاوزه مصلحتك وراحتك بس ..
اتخيلو س عمل شنو ؟؟؟
ما معروف عمل شنو لانو لى الليله مافى زول لامى فيهو !!!! ولا عارف محلو وين ؟؟؟
وجاييكم ..
شباب : كدى نمسكا من الكوبرى وحده وحده …
شنو البيخلى الوحده جاذبه وشنو البخلى التعدد جاذب ؟؟؟؟
شنو البيخلى الوحده منفره وشنو البيخلى التعدد منفر ؟؟؟
شنو البيخلينا نفتش لى التمسك بالدين فى التعدد والتخلى عنه فى العدل ومراعاة شعور الاولى وحقوقها ؟؟؟
هل ستر البنات غير المتزوجات مهمة الدوله ام مهمة الفرد ؟؟
اذا كان لا بد من التعدد لستر الاعراض لماذا لا يتم البدء باللاتى فاتهن القطار والارامل والمطلقات ومن ثم القرمبوز ؟؟؟
اذا كان التعدد ضرورة دينيه لدرء المفاسد ودفع الضرر الذى هو اهم من جلب المصالح فاين مصلحة الاسره الاولى فى التمتع بحقوقها ( زوج دائم كامل الدسم واب دائم كامل الواجبات ) ؟؟؟
مقارنة بنماذج التعدد هل جميعها ناجحه فى ناحية العدل والاستقرار ؟؟؟
لماذا تقبل المراه ان تكون ضره ولا تقبل ان تاتى ضره فوقها ؟؟
وجاييكم ..
يا الزوووووول و زواره سلام
فعلا السواي ما حداث و بالعكس
ما شايفين عمكم دا كتب شنو
(عاوزين الأقوال يتبعها أفعال )
يلا يا الزوووووول أبدأ لينا مش انت صاحب البوست فلازم تكون قدوة ….هسة وصلنا كم و ستين تعليق و ما وريتونا هل هو ترف أم ضرورة؟ و لا عزمتونا لعقد….. و الا العرس التاني ما بعزموا ليهو……………..
عزت : فى زول بيعزم على الدبل فى النت ؟؟؟ انت ما سنعت بالغفير بتاع الفندق القال زهج من البلاغات الكاذبه ؟؟ يومى جارى لى غرفه وماشاف ليهو يوم جنازه مارقه ؟؟؟ برغم ان احصائيات الذين قالو ماتو اكبر من قتلى دارفور والجنوب !!!!!!!!!!! اسى زى ما قلت لى يوم الليله ما سمعنا ذغروده ولا صرخة فجع ووجع ولا سمعنا بالرفاء والبنين ولا ما رضانا ؟؟!!!!
مش قلت ليك ؟؟؟