شئون المخربين…..

الجهاز المسمى (شئون المغتربين) احرى بهم ان يسموه (شئون المخربين),والمخربين هنا عائدة الى العاملين فيه والقائمين علي امره..هو جهاز منذ انشائه عكف وعزم على اهانة المغتربين واذلالهم والتنكيل بهم,,هذا بكل صراحة وشفافية ووضوح,,واتحدى اى شخص يقول بغير هذا..

ولى معه قصص ومواقف قد تحزن الشجى وتضحك الخلى وتثير حفيظة المغبون وتفرج بعضا من كرب المكروب..

ساسرد آخر المواقف التى حدثت يوم الاثنين الفائت فى شكل نقاط تسهيلا للسرد وامعانا فى التدقيق :-

*وصلت المبنى المعنى فى تمام الساعة 7:30 صباحا وهو موعد بدء الدوام الرسمى,لكن لم يتواجد اى من الموظفين بمكانه,فقلنا _انا ومن بكّر معى_ لا باس علها زحمة المواصلات او تأخر الترحيل,لكن بعد قليل بدأت جموعهم تتوافد ويتجمعون فى شكل بؤر صغيرة لتبادل السلامات والقبلات التى تشى بان المتسالمين لم يتقابلا منذ اشهر,لكن تكررت العادة وكانهم كانوا فى اجازة سنوية,,المهم بعد التجمع يبدأ الجمع فى الانسحاب التكتيكى! حيث تخلو الصالة منهم بعد دقائق,وهكذا حتى اعلنت الساعة تمام ال8:30 صباحا ! بعد ذلك نما الى علمنا انهم مضربين عن العمل,طبعا انا انبسطت شديد قلت دى بداية ثورة لاسقاط النظام,,لكن يا فرحة ما تمت قالوا الاضراب عشان المكيفات عطلانة! طبعا الموقف بقى مستفز,,فما كان منى والا انفجرت فى احداهن_طبعا معظمهن نساء_ صائحا: انتى اسه عندك مكيف فى بيتك؟وفرضا انو عندك مكيف بتشغليهو من الساعة 7:30 صباحا؟ ولا دا عشان مال الدولة وسايب عايزة تقلى ادبك؟اسه انتى اضربتى لما زادوا العيش؟؟ طبعا يا جماعة الانفجار دا كان داخلى وكدة! آىييييييي..

* اها بعد دقائق جا واحد قالوا دا المدير وما اخد معاهن دقيقة ورجع تانى! ولسه مواصلين الاضراب,,المهم جوا ناس الامن واتكلموا معاهم واعتذروا مننا وبعض الموظفين والموظفات ابتدوا العمل,فى واحدة زعلااااااانة قالت :ديل اتخاذلوا ! طبعا هنا ما قدرت اسكت وانفجرت فيها: طيب وكت زادوا السكر انتى ما اتخاذلتى!؟؟ ووكت زادوا الرغيف انتى ما اتخاذلتى؟؟ووكت ووكت وعييييييييييييييييييييييييييييييييييك..بطنى بردت شوية..

*بعدين البغيظك انهم مصرين يحسسوك بانك مطالب ومديون ليهم! يعنى تقرا (الالتزامات المالية)! انا بس نفسى اعرف البقاها التزامات شنو! وتقرا فى ورقة البرنت( المتاخرات)! مع انك تكون دافع كاااااامل وما عليك اى شئ,ومفروض يكتبوا المبلغ المستحق او اى شئ..

* فى احد الشبابيك فى لوحة مكتوب عليها كابينة رقم(3),,قلت ليهو اسه دى كابينة ولا كابنيه؟؟

*وقفنا فى شباك السداد وجا واحد عندو مشكلة وقالوا ليهو ما بحلها ليك الا (موسى) فصاحبنا مشى وجا _الكلام دا الساعة 9 جات_ وقال موسى مافى وموبايلو مقفول,وليهو كم يوم على الحالة دى,,وقررررررب يبكى,,فما كان منى الا ان ترنمت (حليل موسى يا حليل موسى..حليل موسى اللرجال خوسة)..

*طبعا الببوظ ليك اعصابى فى الضرائب موضوع الزكاة دا,,احيييييييييييييييييييييي انا,,مشيت للمدير وقلت ليهو ياخى الزكاة دى انا لى 8 شهور بس كيف ادفع زكاة!؟ قال لى دى زكاة بالشهر! اى والله بالشهر,, قلت ليهو زكاة الشهر دى من الدين الاسلامى؟؟قال ايوة,, قلت ليهو عندك فتوى؟قال لى :طبعا,,قلت ليهو : وينها؟ قا لى : ما عندى هنا..

زهجت قلت ليهو لو ما دفعت بتعملوا لى شنو؟قال لى: ما بنديك تاشيرة,,قلت ليهو مفروض تحاربونى حسب معطيات الدين الاسلامى,,قال لى: عدم التاشيرة دا ما حرب ! طبعا الجمت ولميت ضنبى ونزلت دفعت !
*وقفت قدام الضابط المسئول عن التاشيرة,وانا ورقى مستوفى ودافع وبطاقتى فى يدى ومبتسم,اكان باغتنى ليك: الخدمة الالزامية وينها ؟ فمددتها وانا مبتسم لسه,,قال لى: امشى صورها ! طبعا يادووووب البوغيتة صابتنى وانفجعت! لى سنين من زول يقول لى امشى صور,يا الموظف عندو ماكينة جنبو او بيرسل واحد من المستخدمين يصورها,,وهو ذااااااتو يصور ليها شنو!؟ما شافها وخلاص,وقرببببببت اسال الماكينة دى حقت منو لكن خفت !

* وانا طالع خلاص بعد استلمت تاشيرتى اشوف ليك صور كتيييييرة معلقة فى الحيط مكتوب عليها (فرحة العائدين لارض الوطن) قلت ديل اكيد ناس ليبيا الكانوا عالقين فى منفذ السلوم ولا المرقوهم من قصف الطائرات,المهم مشيت عليهم اكان القاهم ليك العائدين من متمردى دارفور ! لكن قلت ماهم برضو كانوا مغتربين فى تشاد ! كع..

-ولك ان تتخيل عزيزى القارئ بهذه الطريقة اين تذهب اموال المغتربين !!!!

                                                                                                                         ونلتقى….