فى عصر التقنية الحديثة التى عمت مشارق الأرض ومغاربها خلال السنوات القلائل الماضية .وأصبح العالم قرية صغيرة كما يقول أهل الفصاحة ( ولدنا أفليقا وإخوانه … ).. حظيت بلادنا الحبيبة بنصيب وافر من الطفرة فى عالم ما يسمى بالإتصالات …من كمبيوتر بأنواعه.. إنترنت .. بلوتوث..وما نحن بصدده اليوم … جهاز الموبايل …الذى إختلفت اسماؤه فى عالمنا العربى الذى إتفق أهله على شىء واحد ..وهو ألا يتفقوا حتى فى مسمى جهاز واحد يستعمله غالبية أهله…ففى بلاد امازونيا العظمى نطلق عليه الموبايل ..وفى دول الخليج يسمى الجوال ( ترجمة على الشريط …مش عرب ؟ )…وفى بلاد الشام يدعى الخليوى ..بس مافى حد فيكم ينط ويسألنى خليوى يعنى شنو …وما عارف فى أرض اليمن السعيد وبلاد ما بين الرافدين سموه شنو ..المهم والشاهد فى الأمر.. تعددت الأسماء والنغمات… والجهاز واحد..
وكما هو الحال مع كل إختراع جديد ( ودى واحدة من حسنات أولاد جون ) تختلف الآراء حوله …ومما لا يختلف عليه إثنان أن للموبايل فوائد كثيرة ومتعددة لا ينكرها إلا جاحد..وأكيد أى واحد فينا شعر بفائدة وأهمية هذا الجهاز الصغير فى حجمه.. الكبير فى منافعه فى حياتنا..وفر علينا الكثير من الوقت والجهد فى الوصول إلى الأهداف البعيدة التى ما كان يتسنى لنا أن نصلها إلا بشق الأنفس ..تستطيع أن تهاتف من تشاء حول العالم وأنت تتناول كأساً من الشاى (أو النسكافيه ..للمرطبين من القوم ).. ولكن ..وآه من كلمة لكن دى ..بعد أن اصبح الموبايل أمرا واقعاً ويستطيع كل من هب ودب أن بحصل عليه …هل سبب لنا أياً من المتاعب ؟ ..واجيب بالنيابة عنكم نعم ..فقد صار المفهوم السائد والعام هو مادام أنك تمتلك موبايل .. إذن أنا استطيع الوصول إليك أينما كنت وحيثما كنت وفى أى وقت كنت… دون مراعاة لأية خصوصية كالتى تحدثت عنها الأخت نور لايت فى بوست سابق .. بمعنى… حتى لو كنت قاعد تتونس وتحكى لعواطفك عن مشاعرك وأحاسيسك ( كسير تلج شديييييد… يا ابكرون ) برضو إنت مطالب بالرد على الموبايل ( إلا إذا كنت حصيف وعملتو صامت فى تلك اللحظات ) ..وهناك الكثير من سلبيات إستخدامه خاصة داخل المساجد حيث ينعدم الخشوع والإطمئنان مع مع نغمات نانسى عجرم .. وعجاج ..والصفوة.. ويصبح المسجد كأنه ديسكو رغماً عن مطالبة الإمام للمصلين بإغلاق الأجهزة قبل إقامة الصلاة …ولكن هيهات هيهات ..
ثم نعرج بعد ذلك على ظاهرة حيازة صغار السن من الأبناء والبنات لهذا الجهاز ..هل نترك لهم الحرية ونرقد قفا ؟ فقد نختلف حول هذا الأمر فهناك من يقول يجب توفر الثقة فى فلذات اكبادنا…هل حاول احدكم أن يتقصى مع من يتحدث إبنه أو تتحدث بنته ؟ ..هل سعى أحدنا لمعرفة نوعية الرسائل التى يتبادلونها فيما بينهم ..؟ وهل …….وهل ………وأسئلة كتيرة تطرح نفسها وتحتاج إلى إجابة شافية ..
لذا أترك المايكرفون لكافة السُمّار الأكارم ليحدثونا عن تجاربهم مع هذا الجهاز السحرى الصغير.. التى قلب حياتنا رأساُ على عقب .
سوداننا 
الاخ حاج السلاوى/ مشتاقين ياراجل…أزعج واقلق إختراع بعد القنبلة الذرية هو الموبايل …ده موضوع مزعج خالص وانا حقيقة فكرت اخليهو خالص لكين ذى ماقال واحد من اخوانا معايشنا بقت فيهو ؟ وهو كذلك أيضاً ضرره أكثر من نفعه – على الاقل بالنسبة لى – اما بالنسبة لنا كسودانين أصلاً عندنا مهارة فى إختراق خصوصية الاخرين -عادى بالزبادى – بقينا نتصل فى اى وقت دون مراعاة لوقت الاتصال ومناسبته ام عدم ،وبدون إى شعور بالحرج فالموبايل علمنا أيضاً الكذب الغير مفيد فانت تسال الشخص الفى الطرف الاخير أنت وين هسع؟ فيجيبك بانه فى السوق العربى – وغالباً مايكون لابت على بعد خطوات منك؟؟ أما المحادثات التى تدور فى المواصلات العامة فحدث ولاحرج..عندما تنتهى محادثة شخص ما جوه الحافلة مع أحد أخصائه تعرف انت – بدون قصد – كل القصة والاهل والاقارب والشمارات والبكيايات والاعراس… ولمن تجى نازل تقرب تقول ليهو سلم على الجماعة -طبعاً بالاسم – لانو بجيك شعور إنو بقيت من العائلة ومتورط فى مشاكلها كمان…دى مصيبة شنو دى؟؟؟؟
حاج السلاوي و الأعزاء المدونين سلام
انت في جهاز الموبايل و تعدد أسمائه في الدول المختلفة و الا التميز الذي أضافه اليه مجتمعنا السوداني فصارت لها أسماء تبع الموديلات ابتداء من “حشرتين حشره” الى “أوباما” و التي تدرجت عبر “أصاله” “اريكسون طوبه” و “سلفاكير” فلم يتحرج ناس الجرائد عندنا من وصف واقعة اغتيال غرانفيل الأمريكي ليلة رأس السنة الفات بقولهم… بعد اطلاق الرصاص عليه يبدو أن سارقا غنم موبايله و هو من النوع الرخيص “سلفاكير” تخيل !!!!!
و كمان جابت ليها استبدال وسط الشباب فهم في سباق محموم لتبديل أجهزتهم تبع الموضة و الامكانات التي يتمتع بها كل جديد … و النمر المميزة و هكذا… بقى ما عندهم شغلة فتجد أرعة قاعدين مع بعض و هم ليس ما بعض اذ كل واحد تلقاهو قاعد يعبث في موبايلو….
لكن برضو جهاز مهم ان استخدم بمسئولية دون ازعاجا للآخرين…
حاج السلاوي كيف الحال والأحوال
والله فتحت ليك سيره . . .
ما كنت قاعد تضرب لينا في الموبايل وتسأل عن بشار ، مالك خليت الكلام في الجوال واللا المتحرك كمل قروشك؟
والله يا حاج فعلاً دي نعمه تجر من ورائها نغمه.
آخر مره كان السبب في شكله مع عواطفنا ليها علاله ، ضرب نص الليل وقمت من النوم مخلوع و “عواطف” كمان قامت مخلوعه. عاينت للنمره لقيتها من امريكا ، أكيد واحد من الأخوان ناسي فرق الزمن.
قفلته وختيته.
الصباح عواطف قالت لي:
دي مني دي الأبيت ترد عليها بالليل دي؟
والقيامي قامت.
واللا ما يدفعه رب الأسره لتجديد موديلات التلفون نفسه.
بنتك تقول ليك :
يا بابا عايز بتك البنات في الجامعه يضحكو عليها شايللا ليها3310 .
طبعاً ما في أب عايز بنتو تكون مضحكه في الجامعه.
إلاّ أننا لا ننكر يا السلاوي إنه سهل علينا كتير من الامور ، فأنت تستطيع الاطمئنان على أفراد أسرتك 24/7 كما تستطيع التواصل مع الآخرين وتزعجهم متى شئت.
كما تستطيع أن ترهق معنويات من يتدين منك وما يرد على تلفوناتك ، ده ممكن تقذفذ بيهو عديل كده. ولو كنت ( سادي ) تقول يارب ما يسدد الدين.
عشان أعمل ليهو إرهاب اتصالاتي يومي.
عموماً عكس ” الخمر والميسر ” نفعه أكثر من ضرره.
حبيبنا حاج أحمد السلاوي
الحبان في كل مكان
سلام وصباحكم ندي
أؤمن على ما تفضل به الأخوان مصدر إزعاج مهول،،، والعجب لو ختيتو في الصامت تجابه بإحتجاجات: ضربت ليك يجي عشر مرات مالك ما بترد إن شاء الله المانع خير؟؟ يعني لازم تكون متوفر طوال الوقت للحبان في كل مكان !!!تعرف المخرج الوحيد تتخن جلدك وتعود الخلق على ذلك غير كدة حتتعذب، لكن برضو مُفيد، يعني يا حاج السلاوي كتر خير الله على قول الشوام ده لو ما الموبايل كيف كنا حنسعد بسماع صوتك وقفشاتك وجلجلة ضحكتك يوم الجمعة، لكن طبعاً بني وطني يعجبوك … أخرجوه من خانة آلة ووسيلة للإتصال إلى موضوع وغاية في حد ذاته، شكلو لونه موديلو ونغماتو …..الخ،،، زوجتي محتجة أنني غير مواكب ولا أحمل موبايلاً يليق بي، طبعاً يا ريت يكون عندي بلاك بيري حتى أرسل تعليقي على بوست السلاوي عبر الموبايل لكن وآآآخ من لكن في حاجات أهم عموماً أنا مرتاح لجهازي الحالي وعُشري لا يهون علي التغيير ما لم يتعطل أو يتسرق ولا يهمني سوى أن يؤدي مهمته الأساسية أما الأكسوسوريز الأخرى كاميرا وميموري كارد وإم بي بلاير واف ام الخ فبالنسبة لي ليس من الضروري أن تكون جزءً من الهاتف.
السلاوي:
كل التكنولوجيات ذات وجهين الموبايل الانترنت الفضائيات الخ….يعني اولادنا بقو في كف عفريت الا من رحم ربي ..والواحد الا يلعب معاهم قون و بك ..يعني ترسخ فيهم اجعص قيم و تشد حيلك و تعمل ليك 24 ساعة اضافية من عندك عشان اليوم يقضيك…وما ترسمه انت علي وجدانهم يغسله الشارع و التلفاز و الموبايل و قنوات العري و العهر الليلي ..اما الانترنت فحدث و لاحرج فبقدر ما يحتاح لها الطبيب و المهندس و المثقف فهي ايضا تولد جيل من الباحثين عن اللذة و المتعة اللحظية للبصبصة علي المواقع المشينة القبيحة التي ملاءت الويب..
علي سنكل:
اياك اعني و اسمعي يا جارة…بالله طمنا علي صحة الجماعة ديل ..تحياتنا للعزيز بشار.
حاج أحمد السلاوى /لك التحية والاخوة اصحاب المدونة
الموبايل من وسائل الاتصال السريع اصبح استخدامها للكبير الصغير في وقت واحد أصبحت أمر ا شائعا لدي الاطفال هل اعطاء الموبايل للطفل في عمر مبكر تدليل من الاباء ام تحفيز لهم في وقت الامتحانات اعني لو جبتة نسبة كذا حااشتري ليك موبايل ام هو تمـرد من الأطفـال بطلبـاتهم؟؟.. ام يراي بعض الاباء تهذيب سلوكه بعض الاباء لديهم شعور طيب كنوا ولدوا يمتلك موبايل بعض الاطفل عندما يرون أصدقاءه.. يحملون يلحون علي الطلب ؟
اعتقد ان من الخطأ اعطاء الطفل موبايل في وقت مبكر حتى لو تمرد على والديه لما به من سلبيات قد تضر بالطفل ؟
لا يهمني مواكبة التطور على حساب الابناء ؟
كسره/فالطفل في سن مبكرة يحتاج الي رقاااااااااااااابة مشددة
حاج السلاوى آآآلووووو
سلاااام عليكم
موضوعك لذيذ وعندى حاجتين كدا :
ــ واحد يشترى موبايل لولدو الصغير دا ما صاح خالس خالس(؟) وخصوصا اذا كان موبايل حديث . يعنى الواحد لو اتعصر خلاس ممكن يجيب ليهو تلاتين عشره ولو فى طريقه يكون ما فيهو خدمة ارسال واستقبال الرسائل يكون حلو اوى .
ــ بعدين يا سلاوى اخوك زووووووول (مجازا يا شمباتى وعبدووش ) اكتر حاجه بتقرفوا : واحد يتصل عليك الوووووو معاى منو ؟
والمصيبه انو هو الضارب .
عمنا الشاب حاج السلاوى وسمارة .
علكم عافية .
أنا شخصيا مشكلتى مع الموبايل لمن أمشى البيت طوالى حكومتنا بتجر على الموبايل وتشوف الليلة الضرب منو وتراجع جميع المكالمات وبعد ما تطمن إنو مافى جنس لطيف إتصل حتى بعد داك تقول حمدالله على السلامة وبركة الجيت .
عندنا ظاهرة بايخة جدا وهو الواحد يكون عاوزك ويمسكل ليك ياخى إنت لمن دايرنى ما تضرب لى يعنى دايرنى أقضاليك غردك وأضرب ليك . أصلو شنو …
الاخ حاج السلاوي وكل الاحباب
الفين سلام
موضوع حيوي وشيق وممكن يتفرع ويتشعب .. ولحدما نجيك راجع :
ياالراقى شكلك يا النوعك انت فريد
يامواصلنى بالارحام وكل زول ليهو بيريد
ياكاتم اسرارى ولحفظها انت تجيد
مين الشالك وخلاك هسى انت بعيد ؟
مالقى غير يشيلك فى هذا الشهر بالتحديد
ياموبالى من يوم لقيتك انا ظنى فيك سديد
الف ومتين رقم جواك كل يوم ليها اعيد
اصحاب واهل واحباب يوماتى حفظ جديد
واربعمائة رسالة مابين عمل ، اهل وريد
كل البيشوفك يقول لى (موبايلك انت شديد)
يالشال موبايلى موبايلى كان صنديد
بيطمن الناس على بالصوت او ببريد
كان لمن تضلم يضوى لى البيت
شلت الموبايل فى الرمضان وعارف داخل العيد
انت حرامى ماعندك زوق انشاء الله حسى سعيد !!
لكين بدعو المولى يرزقنى موبايل جديد
وابدا تانى من اول القط فى النمر تلقيط
ياالشلت الموبايل برجوك رجائى شديد
رسل لى ارقامى وانا عافيه ليك اكيد
ابوى السلاوى..مساك سعيد..
وازيك من الاسماء(نقال_هاتف سيار)..وخليوى دى نسبة ل(خلاء),,دى موغلة فى الفصحى!!
غايتو انا لو موبايلى ما ضرب لى مدة ساعة,بقوم افقدو!! لانو حقيقة شكل وسيلة تواصل مع الاحباب اينما كانوا,,مع انو اضاف عبء مادى الا انو بيخدم انسانيتك وارتباطك الوجانى..بس المشكلة فى انو يكون عندك 3 او 4 تلفونات(ديل الا تجيب ليهم قفة)..
كدى النسألك :تدفع كم واسكت عن الحصل ليك مع الموبايل الممعن فى التكنولوجيا؟؟
زوووووول الحبيب..انت وين ياخ؟؟؟؟؟
كل السُمّار الأعزاء الكرام ..
المويايل ..هذا الجهاز السحرى وبكل مسمياته المحلية والعالمية التى وردت فى تعليقاتكم الجميلة أعلاه يمكن أن تُؤلف فيه كتب .. بل مجلدات..وحكاوى لا تحصى ولا تعد..
وقد كان هناك إجماع على أهمية الموبايل فى تسهيل حياتنا المعاصرة كما هو الحال مع بقيةأدوات التقنية الحديثة التى نستخدمها كووووولنا ..طبعن فى حال إستخدامها بالصورة التى صُممت من أجلها ..بالرغم مما صاحبه من سلبيات .
مرة أخرى لكم جميعاً كل الحب والتقدير لمروركم الجميل الرائع..وكل موبايل والجميع بألف خير .
السلاوي:
من مساؤي الجوال انو لمان ينسرق بتفقد كل ارقام احبابك و هذا ما حدث لي ..وفي اليومين الفاتو واحدة قريبتنا سرقوا موبايلها فلمان اتصلت دار هذا الحوار
– ياخي الموبايل دا حقي
– عارف
– طيب انا عندي فيهو ارقام و نمر عايزاها
– تعالوا شيلوهو
– اسلوبك سخيف ، وحرامي و كمان لميض
– اهو القدرنا عليهو
نيام..نهارك سعيد..
ما بتتذكر موبايلى(العزيز) لما اتسرق قبل اسافر بى شهر؟؟والله جهجهنى جهجهة شديدة خلاص,,ومن غرائب الصدف انى دخلت المدونة الساعة 11 ليلا وكتبت فيها انى فقدت موبايلى والارقام كلها طشت,وقلت اى واحد يتصل او يرسل رقمو فى الايميل او الشريحة الكنت استبدلتها بعد نصف ساعة فقط من السرقة_عشان صاحبى شغال فى زين طبعا_وكان اول المتصلين بعد 10 دقايق فقط من الاعلان هو الوالد السلاوى_صاحب البوست_!!!
وبرضو لا انسى تلك القصيدة العصماء التى سطرتها احتفاءا بالمناسبة ومواساة فى فقيدى الغالى,,هل تذكر منها شئ؟؟؟ انا طبعتها بس نسيت الورقة فى السودان..عليك الله لو متذكر منها شئ اتحفنا بيهو..
تحياتى…..
– ولدنا العزيز ..شمباتى ..
طبعن فاكر جداً موبايلك لامن دقست والجماعة شالوه منك على عينك يا تاجر ..شافوك مسكين الغنماية تاكل عشاك ( وانت قاعد تعاين ليها ) وشلحوك موبايلك العزيز .. بس القصيدة العصماء دى يطرشنى ما سمعت بيها ..ممكن تكون وزعتها داخلياً فقط ..لكين نحنا البرة ديل يعمينا ما شفناها ..
– أخونا الكاشف نيام .. فعلاً أكبر مشكلة هى لامن يشلحوك الموبايل ويكون عندك فيهو مئات الأسماء والأرقام من الهواتف .. وحِلك لامن تقدر تلملم الأرقام دى من جديد .. غايتو كل واحد يخلى باله من لغاليغه .. اقصد موبايله …
– أخونا بكرى ود موسى ..القصيدة جميلة ورائعة روعة اللقاء بعد الفراق ..نحنا قبيل شن قلنا ..مش قلنا إنك بقيت تبعنا خلاص ..قروب الشنو ما بعرفوا داااااااك ..آآآآآآآآآآآآآى قروب ناس ابكرون وصحبه الكرام .
– المدونون الكرام .. ابشركم وأطمئنكم أن الأخ الفاضل بشار بن البرد بخير وعلى مايرام ويتماثل للشفاء يوما بعد يوم وهو الآن خارج أسوار المستشفى ويرتاح حالياف بداره العامرة .. ويغريكم جميعاً تحياته واشواقه وسوف يهاتفكم جميعاً فرداً فرداً .. بش أدوها صنّة وحتلاقوه يعافر معاكم بيجاى …والجميع فى إنتظارك يا … بن البرد
الوالد السلاوى..كتر خيرك,,مسحت بى البلاط!!! بس عليك الله استر على طريقة السرقة(الفنية)..القصيدة كتبها الاديب نيام,,واسمح لى استخدم بوستك عشان انزل فيهو القصيدة(لميت فيها بعد تعب) من ارشيف المدونة ومعاها بعض التعليقات..
السمار الاعزاء..مساكم زين..
(( انا لله وانا اليه راجعون))..فى حوالى الساعة 51 :9 مساءا تمت سرقة جوالى بطريقة اقل ما توصف بانها عبقرية,,مما ترتب عليه ضياع جميع ارقام الاحبة المدونجية,,لذا نرجو امدادنا بارقامكم بالطرق التالية :
1) اتصال مباشر على جوالى وتعريفى بالرقم
2)رسالة نصية على جوالى مع ذكر اسم المرسل
3)ارسال بطاقة اعمال تحوى الاسم
4)ارسال رقمك على الايميل الخاص بى ..سوف اتقبل التعازى ابتداءا من الساعة العاشرة صباح غد الاثنين 28 يوليو وحتى ساعات متأخرة من مساء نفس اليوم,,و ما تنسوا تجوا شايلين البارد _خصوصا استرايكر_ والحلويات والشوكلاتات والمواجبة والغمتة الفااااهمة!!!!!
خاص ب ابو المنذر..رقم الحساب عندك (ما تعمل رايح)..
الوالد السلاوى..كتر خيرك كتييييييييييييييييير.
الوالد السلاوى كان اول المتصلين والمعزيين..تسلم يا ابونا..والمواجبة خليها لما اصلك هناك!!
نيام نيام:
28 يوليو 2008 في الساعة 11:34 ص
د.يس شمباتي:
قلنا ليكم سافروا مرة في السفر سبع فوائد
انت بتلم في الدنانير غير ما تدفع في العوائد
ويبقي موبايلك معاك موش خبر كان في الجرائد
ولا قلع من الحيكومة و لا ختف من زول مكايد
ولا فلس تضاري منو ولا صكيك مرتد و عائد
والضمير مرتاح منعنش انت شغال و انت راقد
ايه اللي جابرك يا صديقي كل يوم زهجان و ناكد
شوف جوازك وين و اكسح قبل ما تبلغ بفاقد
د.شمباتي:
شفت كيف يا دوك يعني لو ما لحقت نفسك و سافرت كان هسع حايس ورا جواز السفر كمان ..ابقا عشرة علي جوازك لما ترجع ..و موبايلك خليهو قبلو ..بس جيب معاك حشرتين حشرة تقضي بيهو الاجازة افراج مؤقت..
نيام العزيز..والله من داك ما شلت لى موبايل فخم_طبعا قاصد اوريكم انو كان فخم_ولى يوم الليلة حازى فى نفسى سرقتو..بس ما تنسوا المواجبة فى السنوية..بذكركم ليها..
حاج السلاوي
رضينابالانضمام لقروبكم ..والتوقيع معكم..لكن الانضمام ده ساااااي ؟؟ حشرتين حشره راضين ..
اخونا نيام :
زماااان يا نيام بعض الحراميه الظرااف(اولاد الحلال) لما يسرقوا الجزلان (المحفظة) كانوا يشيلوا القروش ويخلوا ليك اوراقك ومستنداتك المهمه
ياريت حرامية الموبايلات يكونوا اولاد حلال (شويه) على الاقل يرجعوا للزول ارقاموا المهمه و(الحميميه ) ..
د.يس شمباتي
كفارة ليك (باثر رجعي ) بعد كده الا تعمل ليك سلسل لجوالك تعلقوا في رقبتك ..بالمناسبه خطف الجوالات في مناطقكم (ذي ما عندنا ) منتشرة بطريقه رهيبه ..احذر من ناس المواتر (الموتسيكلات ) ديل خطرين..
انا غايتو بعد تحانيس خلوني اشتري موبايل انا مسميه (حمار شغل) لانو ليهو خمسه سنين شايف شغلوا تمام .
الحبيب بكرى..كفارة(سليقة) كدة؟؟؟ ما عندك حساب فى الراجحى؟؟؟
والله صاحبى فى الرياض كل يوم والتانى سارقين موبايلو..ربك يسترنا ويستر حاجات تانية..
bakriMusa:
اي حاجة يابكري يا خوي بقت يا حليل زمان يا حليل زمان حتي في الحرامية..
د.شمباتي:
المواجبة مدتها انتهت نحن مواجبتنا برفع العزاء..داير ليك مواجبة سنة للحول..زكاة هي..
العزيز نيام..فى زول بيابى المواجبة!!؟؟ غايتو انت واجبك وصل بالقصيدة وبى جبنتك السمحة البتجيبها من قهوة الصائم ولا قهوة العمال ديك….
ذكرتنى بى مواجبة الحول دى قصة عن الرشوة..قالوا فى واحد عندو معاملة وما قادر يمشيها,وما عارف يمسح شنب الزول المسئول كيف..الجماعة قالوا ليهو :الزول دا ابوهو ميت,اغمت ليهو حاجبة وقول ليهو معليش ما حضرنا الكشف..زولنا ما كضب الخبر ومشى شال معاهو الفاتحة وغمت ليهو الفيهو النصيب..لما رجع لى اصحابو بعد انتهاء معاملتو سألهم: الزول دا ابوهو مات متين؟؟ قالوا ليهو: قبل 3 سنة!!!
اها مواجبتى تمت سنة؟؟؟