سفري السبب لي هناي!

Posted: الأحد,25 سبتمبر, 2011 by عبدالرحمن أحمد in اخرى

الأعزاء في سوداننا أو ساخر سبيل، أهل الدانقا
أزعم أني محظوظ جدا فقد أتاحت لي الغربة (فترة السنة والشهرين على قصر فترتها) العثور على كنوز والكنز الأكبر الأستاذ الفاتح جبرا الذي جعل كل هذا ممكنا والمدونين جميعا، رابطة تدل أن هذا الوطن ما زال بخير.
واكتمل الفرح باللقيا العينية البايانية فكنتم أعمق من كتاباتكم.
و الآن إخوتي وبعد ما رجعنا وقلنا نكون بي جاي على عصا الترحال جات واندرعت فوقنا. فنستودكم الله الذي لا تضيع ودائعه ميمما شطر الإمارات العربية المتحدة إمارة دبي في يوم الأربعاء القادم ٢٨ سبتمبر التاسعة والنصف مساءا، في بقعة جديدة لم أخبرها كثيرا فدعواتكم نرجوها .

كسرة:
لم يسعفنا الحظ بمشاهدة الآتية أسمائهم:-
استرايكر – خبير التقنية
أبكرون – أحرام على بلابله الدوح؟ حلال على الأطيار من كل جنس
عمنا نيام – لسه بيناتنا المسافة
سهيل – التدريب خليته أظهر ياخ
ودالخلا – حضرنا ولم نجدكم أسأل الزول، والله صحي
محمد حسن – صاحب المداخلات المشكلة، مغترب
سنكل – عمي علي خليك باين
بشار – صورة وصوت آوت أوف ديت
ابوحميد – خليك في الصدى النجدي ساكن في بوست البكا سكون
سوباجو – من كدايسو ديك ما سمعنا ليهوا خبر أيه الحكاية يا معاذ
صديق الفولاني – من ديك وعيك
عبدالمنعم الحسن – لو ما الفيس دا نقع البحر مثلا؟

الحرائر:-
مشاهدة – كتابي الثاني عقبال بقية المراجع يا ناس سكول
سمسمة – ورقة فاضية
سماسم – ورقة فاضية
نونو – ورقة فاضية
الزهراء – كتر خير التلفون
حكاية – وللا ماف اسم زي دا؟
مون آمي – صديقتي وانتخابات المحامين بس خلاص كدا؟
لمى هلول – وين الشخصية دي يا جماعة؟

خاتمة
يقول محمود الجيلي
أخبرني الليل أنه يمزح حين يدس الصباح وراء العباءة – ويدري الصباح بتلك الحقيقة لذا لا يكون الظلام إساءة

تحياتي وأشواقي الحارة عبدوز

تعليقات
  1. سماسم قال:

    السلام عليكم عبدوز
    نتمنى ليك التوفيق في دبي وابقى ظاهر وما تنقطع من الموقع

  2. اخونا عبدالرحمن
    سعدت بلقاءك وتمنياتي لك بالتوفيق والنجاح انشاء الله ولمن تصل دبي حاول اصل اعمامك بشار وسنكل

  3. قرن شطة قال:

    العزيز عبدالرحمن
    اتمنى ليك التوفيق وبعدين احسن تتخارج من الحفرة دى ، أما الاخوان فسوف تتواصل معهم وبلاشك…ليك التوفيق والنجاح واحيانا بجبرك على المر الذى امرا منه! ما تنقطع ياسيد..

  4. ود المهدي قال:

    الاخ عبدالرحمن – سعدنا بلقاك ولكن علي عجل وماقعدنا معاك برواقة – لكن انشاء الله الجايات اكتر – وفي الامارات تجد بعض قامتا المدونة ونتمني لك كل الترفيق ولبلدنا صلاح الحال ورجوع كل الطيور المهاجرة لتبني هذا البلد الخير
    سلام

  5. ياسين شمباتى قال:

    الحبيب عبدوز..سلامات..
    احمد الله الذى شرفنى بمعرفتك وصداقتك وخصنى باللقيا قبل الجميع,,وخصنى ب(المتعة) اللفظية والعينية والحسية ! والخوة العميقة رغما عن مداقرات (نادوس)…
    واحمده ان وفقك وهون عليك صبر البلاد ويسر لك الخروج الطيب الى بلد طيبة واناس تخبرهم جيدا..
    صديقى..وفقك الله وسدد خطاك واللقيا حتمية فى اى من الدارين..
    تحياتى واشواقى الحااااااااارة..

    وما تنسى تخلى لى الكتاب !

  6. moshahidah قال:

    السيد عبد الرحمن … الله يوفقك و يسعدك فى رحلتك و احسن انك ما تفكر فيها كغربه لانو البلد ديك بقت كشكول ما حقت زول . عش بها كريما و سعيدا مع اسرتك و لا تنشغل بهاجس العوده فدا منغص لا مبرر له متى ما كتبت لك عوده ستكون.

    اتمنى تجى البلد المره الجاية تلقاها بوضع افضل .

    تسلم على تذكرك لينا فرد فرد … و المراجع دى نخليها لناس سكول الكبار العباقره لو راقوا شوية .. لكن اوعدك لو كبر مخى و توسع فهمى الكتب العلمية فى الخطة موجودة🙂

  7. عبدالرحمن أحمد قال:

    الأحباب .. جايييكم برواقة قبال السفر، لو سير المرفئيب(المرفعين) الرابطنوا لي في كراعي دي خلاني

  8. ابكرون قال:

    عُبد : خلاص انتهت ….يا حليلك وكمان مربط بسيور
    …ياخ الجماعة ديل مقدرين خليك ارعي بسيرك ورد ليهم لمن ترجع لارض الوحدة والتذكر ……..نحن في الهم شرق والدوحة لاتطاق الايام دي وهروبا منها صحبي في الضحية الي حضن امدر عسي ولعل ان اجدها كما تركتها في شهر مايو ……تسلم وما تتجرس….اصلو الصقر كان وقع كترة البتابت عيب………والمقدور نحملو وما بنفع الجقليب

  9. كولمبس قال:

    تمشى وتجينا وتلقانا انشاء الله احسن من كده ياصديقى معليش دى تانى مره لى هنا عندكم وخلالها سعدت بكتاباتكم وتعليقاتكم وعرفت قلبكم على الوطن الذى اصبح حاله لايسر حتى اعداناء اذا كان عندنا اعداء اساساً ………والله يهون عموماً ترجع بالسلامه

  10. عزت قال:

    الأخ عبد الرحمن … سلام وربنا يعينكم في غربتكم…
    نحن بنكون مبسوطين خالس خالس لمن يجونا ناس من برات البلد لأنها فرصة نبرمج بيهم….
    … لقد تشرفت بمعرفتك
    تحية والى الأمام

  11. ياسين شمباتى قال:

    الاخ كولومبس..سلام..
    نرحب بك عضوا فاعلا واخا وصديقا,,فخليك قريب يا الحبيب…

  12. سماسم .. كدة نعتبر كتبنا في الورقة الفاضية وربنا ما يجيب إنقطاع إن شاء الله، وأول أمس كان لي الشرف بزيارة الأخت نونو في سنتر الخرطوم.

    ودالزبير.. والله أنا الأسعد (ما بتاع الحديد) ويارب دايما -يور تايم هابي- بس وصفوا لينا أعمامنا ديل نلم فيهم كيف وتلفوناتهم.

    أرن الشطة -دكتور أسامة- غمرتنا بتواضعك الجم وأخجلت أي حاجة ذاتو … وربنا يصلح حال بلدنا يخلي الناس تجينا مش احنا نمشي للناس كتابك أعجني بشدة وشمباتي مداقرني فيهو جايب لي سيرتو في أي مكان وين الكتاب؟ … وين الكتاب؟

  13. الأستاذ العزيزود المهدي
    إن شاء الله الجاي أحلى وأجمل وأنضر.

    شمباتي
    أفحمتني ذاتو .. وكتاب (قرن شطة) العملتوا لي زي مسمار جحا دا ما برجعوا أها أعلنتها واضحة عندك رأي؟؟؟

    الأخت مشاهدة..
    تخيلي لما تعليقك دا جاء (via mobile web)كنت أنا في سكول بزور صديقي حمزة القاعد يحضر ماستر فلو لم أخف اللوم كان دخلت اللاب وبدأت بالرد ورسلت ليك التحايا من سكول اوف ماث أجدع ناس … وبما إنه موضوع الكتب العلمية دا في الخاطر فأنا عندي أشواق لموضوع تحكم العمليات الصناعية ودا ليهو علاقة وطيدة بالكمبيوتر بروقرامنج فممكن نعمل إتحاد ختري جدا.

    العزيز جدا أبكرون
    بلابل الدوح ناحن على الأغصان طرب وسرور .. تجي بالسلامة يا سعادة وتلقى أم در أجمل وأحسن وزي ما قال قرن شطة الجبر على المر الأمر عشان كده الجرس وأي بتعمل جرس ندخلها في ديب فريزر ونعمل منها نايمين.

    كولمبوس
    مرحبا بك أخا وصديقا ومدونا وموجوعا على الوطن .. ربنا يسمع منك ….آمييييييين
    تقبل تحياتي

  14. دكتور عزت
    الشرف لينا يا دكتور .. لقد كنتم أعمق وأندى ربنا يديم الود والتواصل

  15. neiam قال:

    الاحبيب عبدالرحمن احمد صدق من قال خير الاسماء ما عبد و حمد …
    عزيزنا عبدوز نار الغربة ليست في البعد و لكنها في التحوصل الداخلي في الذات..وانت بيننا و فينا كل صباح دانقا لا اخالك متحوصلا البتة…
    لك و للحبيب عبدوش ذلك الولد الذي ، ولكل من عبد و حمد احب الانسام من جروف النيل الخالد و معها من مزامير حافظ بعض ازة… علها تريح اعصابك و تبرد جوفك و تعطر صباحك…حتي نلتقي لو شاء الله لك كل المودة…

  16. ودالخلا قال:

    سلام ياقبيلة،،
    عبدالرحمن أحمد، ده أنت طلعت أقدع منهم كووولهم، وأتمني لك التوفيق والسعادة في مسعاك داخل البلاد وخارجها، وماتسمع كلامهم وماتصدق وشاية، وبلدنا حلوة ومن أحسن البلاد كمان، والحفرة والضيق البيقولوا ليك عليهو الناس ديل هو معشعش في عقولهم وخيالهم، وهم يريدون التغيير ولم يعملوا له ما يستوجبه، وفي ذلك يقول أحدهم لعمرك ماضاقت بلاد بأهلها ولكن أخلاق الرجال تضيق، وصدقني يا صديقي لكل بداية نهاية ولكل أجل كتاب ولكن الناس ملولة وصبرها قليل، وهمن يريدون التغيير والسلامة ولم يسلكوا له مسلكا” كما قال آخر ترجو السلامة ولم تسلك مسالكها ان السفين لا تجري علي اليبس….
    وقبل كل ذلك وبعده يقول الحق جلا وعلا (ان الله لا يُغير ما بقوم حتي يغيروا ما بأنفسهم)
    وما بالنفوس من أشياء نريد لها التغيير لأشياء فظيعة، والتغيير قادم لا محالة فتلك سنة الحياة، وسيتم ذلك علي أيدي أناس قادمون لهم من الطُهر والعفة والآمانة ما يندر وجوده بيننا الآن!!!!

  17. حاج أحمد السلاوى قال:

    ولدنا عبدوز .. رغم قِصر المدة الشفناك فيها لاكين سعدنا بملاقاتك ايما سعادة .. كنت ضهبان ..ولا مشغول ؟
    بس أنا لحد حسه ما قدرت أعرف هناى دا شنو السببو ليك سفرك .. يا ربى شنباتى بيكون عارف ؟
    مع أمنياتنا لك بالتوفيق ويجعل ليك فى كل خطوة سلامة ..ودى أكيدة ما دام بقيت بعيد من زولى دااااااااك …أوله شين وآخره ياء ..

  18. ياسين شمباتى قال:

    هههههههههههههههههههههههههاااى,,آييي عارف الحصل شنو,واولها حاء وآخرها هاء!
    وانت يا سلاوى عشان عمايلك دى ربنا بلاك بالبلاك بيهو ! اممممممممم..

    عبدوز يا قدع..كتابى كتابى ! بلقاك بيهو يوم القيامة ! وى

  19. عبدالرحمن أحمد قال:

    عم نيام
    من نبعكم نرتوي
    ونقول للتحوصل أن ارعوي
    سلمت يداك أستاذي

    ود الخلا
    سلامي وتحياتى سعدت أيما سعادة بكلماتك الراقية والواقعية فهيا لنغير ما بأنفسنا ليغير الله ما بنا.
    أبوالحجاج وابنه
    قالوا الولد خال .. لكن يابوالحجاج الداهي شكله خلخال عامل جلبة في أينما مكان هو في الحفرة عامل جلبة أها بعد انجم دا أمسكوا الخشب ساااي

  20. لمى هلول قال:

    اهلى الطيبين المكان الذى حاز فى نفسى على المكان السحرى ..اغيب بفعل الظروف ولكن اتى هنا واجدكم معبقة بان اركم جميعا على خير وتامين ولامين..احيانا احسد نفسى بنفسى لانى بينكم …
    الفاضل عبد الرحمن كلنا جئنا على عجل فى الوطن وغادرنا وعدنا وكاننا تركنا ارواحنا هناك لنعيش بالسبعة ارواح الاخرى التى باتت لن امنذ ان وطئت اقدامنا الغربة لاادرى كيف لكن حتما نحن بسبعة ارواح وفى الوطن بروحنا الاولى والاخيرة التى خلقنا بها..

    عودا حميدا لك وعافية تدوم وتدوم وباب رزق وصحبة خيرة وتوفيق يصحبك
    اسعدنى انه لم يسقط خيالى من وجدانكم الصافى
    وكما قلت انتم بوابتى السحرية
    عدنا ولعل العود احمد يناسب مقاماتكم السامقة

  21. kinanay قال:

    اجمل من موضوع عبدوز ، ردود الاخوة الصادق تعبيرهم انيرت سماء الاخاء بلوحة هي من اجمل لوحات التواصل ، تقول لي احسب انه واخونا في الله ان شاء الله
    ودمتم

  22. اليشاوى قال:

    الله يكتب سلامتك والحمد الله انك مارق من الدوامة دى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s