واضح تماما الفرق الكبير في الإمكانيات بين المرشحين لمقعد الرئاسة .. مثلا يوجد مرشح إسمه الدكتور كامل إدريس لم يسمع به أحد حتى الآن الا في المنتديات الخاصة و بعض الاعلانات في الصحف او الانترنت .. لكن السواد الأعظم من السودانيين لن يتمكنوا من معرفته عيانا بيانا .. مع ذلك نجد أن ( صور ) السيد الرئيس عمر البشير لم تترك مكانا الا و حشرت نفسها فيه .. حتى القنوات الرسمية و غير الرسمية لا حديث لها غير إنجازات الرئيس و مشاريعه القادمة بعد الفوز .. و أيضا نرى صور المرشح ( عرمان ) بدأت تتسلل للطرق و المعابر حديثا .. إضافة الى وجودها في مناطق تواجد الجنويين مثل السوق العربي او محطات المواصلات .
صرف كبير بذخي قد صرف في الدعاية الإنتاخبية من ( حر مال ) المؤتمر الوطني – لو في زول معترض يقول – أكاد أجزم انه صرف من لا يخشى الفقر و لكنه يخشى السقوط من عل … فها هم قادة المؤتمر الوطني ( ليلهم كلو خشوع و ضراعة ) يسألون المولى عز و جل :
اللهم ثبتنا على كراسينا !
وبارك لنا فيها !
واجعلها الوارث منا !
واجعل ثأرنا على شعبنا !
وانصرنا على من عارضنا !
ولا تجعل مصيبتنا في حُكمنا!
ولا تجعل راحة الشعب أكبر همنا ولا مبلغ عِلمنا !
ولا الانقلاب العسكري مصيرنا!
واجعل القصر الرئاسي هو دارنا ومستقرنا !
بالإضافة الا الصور و حملات التلفزيون نلاحظ وجود بعض العربات ذات الأشكال الغريبة مخصصة لتدوير صورة الرئيس مع وجود مكبرات صوتية لا تكل و لا تمل من إصدار الأصوات ( الجميلة )
بييييشوووو … جربتوووو
بيييشوووو … انا ضقتوووو
عجبني برنامجو .. اول ما شفتو
لي بيشو يلا .. قومو صوتو
في إشارة واضحة و صريحة انو السيد البشير زول ( مجرب ) و عارفين الفيه و العليه .. تقومو تاني تجيبو واحد تقعدوا عشرين سنة عشان تفهمو ( السيستم ) بتاعو ( ناصل ) كم بوصة .. و بياخد حقن ولا لأ ؟؟؟؟ !!!!!
دا الوضع حاليا قبل الإنتخابات
اما بعد
فاز الرئيس عمر البشير … الصادق المهدي يشكك في نزاهة الإنتخابات … جاء خليل إبراهيم للخرطوم … إنحسار الأضواء عن عرمان … وفاة فاطمة و نقد – يا الله يا الله قادرين يتحركو لمن يرشحو نفسهم للرئاسة !!!! – الترابي يجدع ليه فتوى تحير العالم العربي و الإسلامي و اليهودي زاتو
و برضو ناس المؤتمر الوطني ( ليلهم كلو خشوع و ضراعة ) و يقولو
اللهم ثبتني على الكرسي تثبيتا !
و شتت المعارضة تشتيتا !
من كان منهم اتحاديا او شيوعيا !
ومن غيرهم من الامة او بعثيا
ولا تبق فينا شيطاناً او عفريتا !
و تظهر الإعلانات مرة اخرى و لكن على شاكلة
كابتن بيييشو … كابتن بيييشو
عاد إليكم من جديد
سجل أهدافا لا تيأس لا تخشى المرمى
كن حسن الخلق مع الخصم فاهدافك أسمى
كابتن بيييشو .. كابتن بيييشو
سوداننا 
مشاكل سلامات
الأوضاع فعلا غريبة
نواب الأطباء مضربين عشان ما أدوهم مستحقاتهم
المعلمون ما صرفوا مرتباتهم
البلد مليانة شحادين
الصحة زيرو
التعليم زيرو
الفساد 100%
الناس دي بتصرف في الانتخابات لييييييه
ما يخلوا انجازاتهم تتحدث
سواء البشير او الصادق او بتاع طاقية الاخفاء
الصرف البصرفوا دا احسن يصروفوا في حاجة تنفع الشعب الغلبان المسكين
اللهم لا نسألك رد القضاء ولكن اللطف فيه
المعارضة ترفض الحصول على أذونات مسبقة لدعايتها الانتخابية….
المعارضة تهاجم المفوضية وتتجه لاستئجار قناة فضائية
الأخبار – الأخبار المحلية
الأحد, 28 فبراير 2010
الخرطوم : احمد دقش
قررت القوى السياسية المعارضة تحدي منشور المفوضية القومية للانتخابات الذي يشترط على الاحزاب الحصول على تصاديق مسبقة
لتنظيم انشطتها الدعائية حتى داخل دورها، وقالت انها ستبتدر حملاتها دون (استئذان النظام). وفيما تتجه المعارضة لاستئجار قناة فضائية
لبث برامجها الانتخابية اعلن الحزب الاتحادى (الأصل) تدشين حملته الانتخابية بعد غد الثلاثاء بمشاركة رئيس الحزب محمد عثمان الميرغنى
الذى يسبقه غدا وفد مقدمة مؤلف من (300) عربة دون اخطار فى اول رد عملي على المنشور، على ان تعقب ذلك ندوة مشتركة الاسبوع القادم.
وحمل التحالف الذى يضم (23) حزبا بشدة على مفوضية الانتخابات ووصفها بـ(الوجه الآخر للمؤتمر الوطني) بحسب القيادي بالتحالف محمد سيد أحمد
الذى اوضح رفض رئيس المفوضية ابيل الير، تسلم مذكرة دفع بها التحالف الخميس الماضي وقال انهم اضطروا لاقتحام مكتبه، ودمغ سيد أحمد فى
مؤتمر صحفى أمس 90% من أعضاء المفوضية بالانتماء للمؤتمر الوطنى، واكد انهم سيعتبرون المنشور (كأن لم يصدر)، وجدد المطالبة بتشكيل
حكومة قومية واسعة التمثيل لادارة الانتخابات.
وكشف القيادى بتحالف المعارضة، محمد ضياء الدين عن اعتقالات واسعة طالت قيادات القوى السياسية بجانب منع وضع ملصقات دعائية بزعم
عدم الحصول على تصديق. واقتربت قوى المعارضة من استئجار قناة فضائية لبث برامجها الانتخابية، فى خطوة احتجاجية على ما قالت انه سيطرة
المؤتمر الوطنى على وسائل الاعلام المملوكة للدولة.
وعدد القيادى بتحالف المعارضة محمد سيد أحمد تجاوزات لمرشح المؤتمر الوطنى، عمر البشير، منها الظهور باستخدام صور وشعارات الدولة ومثل
لذلك بصور سد مروي التي صممت الى جوار صورة المرشح، وتابع (سد مروى ليس ملكا له) وعد ذلك سلوكا انتخابيا فاسدا وفقا لقانون الانتخابات وقواعدها العامة.
الأخ مشااااااااااااااااااااااااااكل(ميشو)
إذا كان حال سادتنا وكبرؤنا هو الفجور في الخصومة ….ملاحظ إنو الرئيس عمر البشير يا أخويييييييييييييييي كلامو ما فيه شتيمة …يعني عمك يعينو الله…إنتا كفار قريش زمان كانو مع وفد الرسول بالحبشة بهذه البجاحة التي نراها اليوم ….ما ممكن عشان حركاتم دي ح أصوت للبشير ما ممكن واحد عايز يبقى رئيس ويكون أسلوبه مثل رجل الشارع
الترابي دا مش أقنع الشباب بالجهاد في الجنوب
الصادق المهدي جاب المرتزقة وزاق
وفي واحد كدى إشار لضرب مصنع الشفاء
بتاع طاقية الإخفاء دا كان زميل بالجامعة وما مقنع من أركان النقاش
بالله أقرؤا صحيفة السوداني عدد اليوم عن تاريخ القضاء بالسودان للأستاذ فقراي وحلقات حي أبروف لسوار الدهب ولمحات عن الحقيبة والحاج محمد أحمد سرور وتاريخ الأغنية والشعر والأخيلية الشعرية لذلك الزمان ..بلا إنتخابات بلا لمة يا أخييييييييييييييييي ديل حيروا العالم وزهجو ناس الدوحة ذاتم …سلطة وثروة والله عين الجهل والنقاش البيزنطي…ما ح أصوت الدايرنو سوووووووووووووه بس للبشير لا يمكن أن نخاطب بلغة الطير في الباقير يا أخي ما يتلمو ويهتموا بالتعليموالصحة بعد ما نشبع ونتعلم الديمقراطية دي رفاهية والزول الشبعان بفكر كويس. …..زههههههههههههههههههههههههجة
ولدنا الباشمهندس مشاكل … سلام ..
عندى سؤال سغيروووونى كالمعتاد .. إنت خريج هندسة ولاّ علوم سياسية ؟ حيرتنا معاك ..نصيحتى ليك ابعد من السياسة دى وناس ساس يسوس فهو سائس ..وخليك فى هندستك ودى هى البتنفعك إلا إذا كان ليك اهداف أخرى خفية ..مثل دخول البرلمان وعضو فى حزب …. الما بعرفو شنو دااااك .
وزى ما قالوا من سبقونى بالتعليق أعلاه لماذا كل هذا البذخ والصرف العشوائى فى أمر محسوم أصلاً قبل إجراء عملية التصويت ..؟
أضم صوتى إلى أصواتهم فىصرف هذه الأموال لمن يستحقونها فعلاً ..
الاخ مشاكل صباح الخير
بس نفسي افهم الناس الكتار ديل البهيصوا وبرقوصوا مع ابو شجره ديل عايشين في نعيم وقصور وبياكلوا جكن وتفاح كل يوم وبساهروا في النوادى وبتعشوا في امواج ولاشنو الفكره؟ ما ممكن ديل بعانوا من شئ والله حكايه غريبه والله إلا اكون كتبهم !
الاخوة الاعزاء جميعا .. السلام عليكم ورحمة الله وبركاته .. الاخ الفولاني .. مافقدتك شينة
بعض اهلنا الكبار يقول ليك يا حليل زمن الانجليز (يعني ياحليل الاستعمار) يعني في حاجات كانت كويسة بالرغم من انه استعمار ، هذه واحدة ثانيا انتو ياجماعة حيرتونا عديل .. يعني لا نافع البشير ولا الصادق ولا الميرغني ولا فاطمة ولا مبارك ولا بتاع الترابي ولا عرمان وديل هم الان الموجودين والجود بالموجود . والشئ العجبيب ان كلكم تقريبا متفقين على انو مافي اي ايجابيات للحكومة الحالية (البشير) والبعض منكم يستغرب كيف ان هذا الكم الهائل من الشعب السوداني يستقبله ويهتف معه . الا ترون انكم تبالغون في اظهار المساوئ اكثر من مبالغتكم في اخفاء ماهو ايجابي كما قال الشاعر :
عين الرضا عن كل عيب كليلة ولكن عين السخط تبدي المساويا
لكن يا جماعة ما للدرجة دي خلو لينا حاجة شوية نتفق معاكم فيها كان تقولوا مثلا البشير محظوط تم استخراج البترول في عهده وتم عمل سد مروي في عهده وتكون من ايجابيات البشير ايضا انه محظوط امكن نقدر ناخد وندي معاكم في الموضوع .. والله الحقيبة زيها مافي .
ولكم تحياتي وتقدير
سلام ياقبيلة،،
هجار بالرأء أم هجّام فريق أم زين بالميم لك الود والتحايا العطرة،،
أنت ياصديقي لوخليت بالك كده يا دوبك داير تمرق من الجنة وسقطة، لقد كنت محبوبا” ولك مريدين بين أظهر الناس، حيث أنك ولا بد وأن تبغض الحكومة كيفما اتفق، ولا بد لك من الوقوف مع المعارضة حيثما أتفق، (بس كدا خبط لزق) زي ما بيقولوا أخوانا في الشمال، وعليك دائما” بذكر المساؤي والمساخط وحذاري ثم حذاري من ذكر مناقب الحكومة ومحاسنها، أو ذكرها بطيب القول، وده عيب كبير حيث أننا نغمط الناس أشياءهم ولا نبرز محسانهم، ودائما” متشائمون ونظرتنا للأمور سوداء داكنة وليس هناك من ينصف الآخرين ويعطيهم حقهم، في حين أنهم يطلبون الحقوق من غير أن يردوها!!!
أسوق هذا الكلام وقد تم تصنيف الناس مسبقا” حسب الهوي والمزاج والميول القلبية (فهذا أحبه وهذا لا أريده) ولأنني جابهت مواقف ومناظر كثيرة مشابهة لما ذكرته يا صديقي، وحيث أنني كنت أذكر المواقف الجميلة والمشرفة في حق الأوطان يتم تصنيفي مع هؤلاء، وحين أذكر الأخطاء والمثالب وأطالب بتصحيحها ممن أخطأوا يتم تصنيفي مع أولئك وديل همن منو زاتم لا أعرف ولا أدري المهم البلد حقت المعارضة أي كانت طالما هي خارج الحكومة، وينسي الناس أن هنالك معارضة أمضي وأشد وأكثر فعالية وقد تقود الناس نحو الطريق الصحيح من داخل الحكومة نفسها، (وهؤلاء هم أكثر صدقا” وعدلا” في مواقفهم الوطنية)، ولكنك لتجد أحدا يلقي لهم بالا” ويتم تصنيف هذا الفعل كنوع من العمل التكتيكي أو هكذا يوهمون أنفسهم!!
لا يوجد نظام حكم في الدنيا لا يحكم بما أنزل الله منزه عن الخطأ والعيوب، ولابد للحكام من الأحتكام للشرع وللكتاب وللعودة للأصول أن كانوا صادقين فيما يقولون، ولكن بريق المناصب وحب الشهوات يطمس القلوب ويعمي الأبصار، ويجعل الناس يتقاتلون من اجل الدنيا الفانية الزائلة والتي لا تسوي عند خالقها جناح بعوضة، ولو كانت تسوي شيئا” ما سقي منها كافر شربة ماء..
أنا لا أدافع عن أحد وكل واحد يستطيع الدفاع عن نفسه ويجادل عنها والحُكم لله رب العالمين يمنحه لمن يشاء، وينزعه عن من يشاء بيده الخير وهو علي كل شيء قدير.
ولكن نريد من الناس الوسطية في الأمور والحكم بالعدل بين الناس وأن تُرد الحقوق لأهلها وأن لا يُظلم أحد بجريرة الآخر..
يقول الحق جلا وعلا في محكم التنزيل في سورة المائدة الآية (8) (يا ايها الذين امنوا كونوا قوامين لله شهداء بالقسط ولا يجرمنكم شنان قوم على الا تعدلوا اعدلوا هو اقرب للتقوى واتقوا الله ان الله خبير بما تعملون).
شكرا” لك أخي هجّار فقد أيقظت في نفسي كوامن الأشجان والأحزان وعدت بي لغابر الأزمان لله درك يا رجل وكما قال أحدهم أشوف في شخصك أحلامي،
ولك التحايا مجددا” يا صديقي.
سهيل ياصديقي أين أنت يارجل من هذه المواعظ الشجية؟؟
قلت لي التركي مالو؟….. الزول قال ليهو شنو؟؟ (ساحبك ده موتمور وتني!!!)
ههههههههه، لكن نظرتو مابعيييييييدة خلاس،،،
الحكاية أتاريها ليها مقومات ما ساكت يعني!!
ودالخلا لك التحية والود
اولا اتشرف بمعرفتك اخي العزيز وشكرا للاشادة بمداخلتي التي اتت متأخرة وما كنت اريد ان ادخل في مثل هذه المواضيع وهجرت السياسة والساسة وكل ما يمت اليها بصلة ولكن شفت اخواني واحبائي الذين اغزهم كثيرا واقدر وجهات نظرهم .. رسموا خطا واحدا ساروا فيه جميعا فاردت ان انصرهم ظالمين
انا ما عارفه بقولوا ليك عرمان ما ينفع ليه انتوا جربتو حكمو بعدين دا زول انظلم كتير اي داووت (اشك) في انه ح يكون زول كعب . يا اخوانا نحن جربنا الكعب الكداب نجيبوا تاني والله نكون اغبي واعور شعب في الدنيا شفتوا ليكم ضنب كلب بنعدل ديل بعد اجوا تاني الشعب ده ح ادخلو في الفرامه وافرموه كفته وبعدين اقعدوا انقنقوا في جحورهم عجبي!!
سلامز
العزيز ود الباشا
الصرف في الإنتخابات ناتج من أنها اول انتخابات حرة نزيهة تقام في عهد حكومة الوحدة الوطنية
خليهم يشبعو بيها ح.. فلو دامت لغيرهم لما آلت ؛إليهم
صديق الفولاني
إذا إستثنينا دكتور كامل فالبشير هو احسن السيئين … و لكن
الوالد الحبيب حاج السلاوي
قرينا هندسة … لكن هي وينها الهندسة في في بلدنا دي … اخير لينا شغلة العطلة دي زي ما بقول واحد من الوزراء الحاليين
يا مشاااااااااااااااااااااااااااااااااااااااااااكل
سلام ولكل الحبان العمارات القايمة دي القاعد يبنيها منو طلب ولا مقاولين اليومين ديل سوق البناء عامر في صالحة أنا خ أديد دكان ونكتب عليهو إسم رائع للهندسة والإستشارات بس أوع من ناس الضرايب يا إبني لو ضاقت فالإجابة ألم تكن أرض الله واسعة وإذا إتقفات عليك ببعض الهوايات الزمان يمكن تجيب قروش والمصريين الشغالين ديل اليومين ديل شغالين شنو بس كدي أقلع جبة المهندس دي وأغتنم وقتك وصلي الصح حاضر وعليك بالإستغفار كل حركة فيها بركة
mon amie
مجانين عايشين في نعيم
هجار
أوافقك تماما في كل حديثك فكثير مننا شايفين المؤتمر الوطني ب ( العين البايظة ) و ما قرينا
و الذي نفسه بغير جمال … لا يرى في المؤتمر الوطني شيئا جميلا
حبيب ألبي ود الخلا
ماف أي رد أصدق و أروع من كلامك …. فالتصنيف عار علينا اذا فعلنا عظيم .. و لكن
انا اتهيا لي واستغفرالله ان كمية الاثيوبيين الدخلوهم الخرطوم ديل بكونوا عملوا ليهم بطاقات شخصيه سودانيه وسجلوهم عشان ادلوا باصواتهم للمؤتمر ووعدوهم بان يكون المقابل بقائهم في الخرطوم لكن بعد مايقضوا غرضهم ح اكوشوهم بره العاصمه لانو الواري قالوا بتنقلهم نقل وبدخلوا مررورا بنقاط التفتيش دون سؤال!ناس المعارضه ما جايبين خبر رايحين ساكت
يا مينو؟
إنتا المك نمر لمن هرب إلى أثيوبيا ما سوى متمة هناك …؟ هو مشى براهو الجماعة ما سوووو وليدات هناك يعني المسألة دي قبل مية سنة تقريباً ..غايتو في زيارتي لتركيا لقيت الجماعة ديل عابرين فقط وبلمو حق التذكرة بالسودان والله الطائرة كلها أثيوبين المغادرة من الخرطوم …
أنا أعتقد أنو الحكومة حقو تلم بعض المعارضين ويفسحوهم بلاد بره يمكن يغيرو فكرتهم عن الحرب
الناس بره حلوة وسمحين كدي بجربو المسألة في مية نصهم لمصر والباقي لإستنبول …يا جماعة حنفضل نكورك كدي لمن تجي القيامة ونضيع حق الجايين ..أقول ليك سؤال لو الدمازين إنضمت للجنوب الكهرباء تجي من وين؟ حقو ناس سد مروي يفكرو جيداً هناك عمل رائع لا ينكر بس رأي ورأيك بدون تشنج يقود البلد للأمام أحسبها من:
الإستقلال- أكتوبر -نميري – الإنتفاضة- الديقراطية البتراء- الإنقاذ …كم سنة وهسع جاية كمان حاجة تانية ما معروفة تكون شنو ؟ دى ما عمر راح؟
يا أخي سلطة وثروة الأخيرة دي ما شايفنها من الحروب وخلافه دعو الأشجار تنمو ونحقق التنمية والفاهية بعدين يحلها الله …عليك الله جنس الشكل دى في فلم كاو بوي مافي؟ روقو المنقة
عندى حب استطلاع صغير الكابات الابسنها ناس الشجره دى فهمها شنو؟ حكايه عجيبه! ياربي دى موضه!
هجار..سلام..
من حقك ان تقول رايك ولكن اذا ذكرت وقائع نأريخية او معاصرة يجب تدعيمها بما يثبت ولو على سبيل المعروف والمشهود..وهذا المنبر يضمن لك حرية التعبير ولا يجرؤ كائنا من كان على تجريمك او تحقير رأيك..فكل ذى عقل يميز..وخليك قريب دائما..
ودالخلا..سلام..
ما اظنى فهمتك غلط من ايماءاتك لاحداث سابقة,لكنى اذكرك بانك من صنف وشنع وجاء بسيرة الارتزاق والعمالة,,ومع ذلك لم يصنفك احد او يشير الى اشياء خبيئة..لكنك ما تفتأ تذكرها بين الفينة والفينة,والآن كأنك تقول للاخ هجار ان المنتدى وقف على معارضة الدولة وسبها وانه لا توجد حرية تعبير واشياء عجيبة اخرى!! ارجو انى اكون فهمت غلط…
وما ادل على حرية التعبير والتنوع بالمنتدى الا بوست الصوفية والفلاتة والاجتماعيات والادبيات..