فوكرز أخرى تسقط (صور)

Posted: السبت,8 أكتوبر, 2011 by طارق أب أحمد in اخرى

فى كل حالات سقوط الطائرات ترسل الشركه المصنعه مهندسيها لبحث سبب وقوع الحادث و تحديد المسئوليه أو لتلافى عيب التصنيع (إن وجد)

أما هنا فقد بادر مسئول طيران (ستهم) بالتصريح بأن السبب هو صعوبة الحصول على الأسبير بسبب المقاطعه ((يعنى لا عارف و لا أب دقن)) موفراً على الشركه المصنعه مشاق البحث و التقصى بل و تحمل المسئوليه حال معرفة السبب إذا كان السقوط بسبب عطل فنى
يقينى أن هذا المسئول لم يبادر بتحديد السبب و قفل الموضوع إلا لسبب ألا وهو عدم مراجعة الطائره من الشركه المصنعه حتى لا ينكشف المستور
و المستور هو الإسبير الصينى أو الإيرانى الذى تلجأ له الشركه و هو غير مطابق للمواصفات
يا مواصفات يا
الحديث عن المواصفات حديث ذو شجون و يتطلب تنكة قهوه مضبوطه (بس يا ريت البن يكون نضيف و ما مخلوط بى لوبا ولا بعر فار)
ما تذكر المواصفات إلا و تذكر المحاليل فاسده ، التقاوى فاسده ، الأدويه ، الأسمنت ،نفايا ألكترونيه مسرطنه حتى براز البنى آدمين قارب الدخول للبلاد من اليونان لولا عناية الله ووقفة ناس عزت …. بإختصار ذمم فاسده يععععع
و دا كلو كوم و المنتجات الصينيه كوم .السودان أصبح مكب زبالة المنتجات الصينيه و اكيد حيجى واحد يقول المنتجات الصينيه موجوده فى أوروبا و أمريكا و هى منتجات ذات جوده عاليه لأنه هنا يأتى دور المواصفات التى من المفروض أن تمنع دخول المنتجات المتدنية الجوده.
صباح امس شاءت العنايه الإلهيه أن تكتب لإبنتى لينا عمر جديد إذ سقطت مروحة السقف فوق الفراش الذى كانت تنام عليه بعد لحظات من مغادرتها له.
المروحه طبعن صينيه وتم تركيبها قبل أقل من عام لأنها أصلن ما بتم السنه
سبب السقوط تآكل المسمار الرابط بين الماسوره و القلب.
تخيل مسمار مفروض يكون صلب يتآكل و (ينقطم) فى أقل من سنه و مراوح جدنا ال جى إى سى فى بورسودان ما زالت تعمل رغم الرطوبه و ضعف الكهرباء منذ 50 سنه.
نهاية الكلام يا ريت شيخ عبد الحى ما يربط رداءة الكوالتى الصينيه برداءة أعمالنا
و الله المستعان.


……………


………….
.

تعليقات
  1. طارق أب أحمد قال:

    هسى الواحد لو كان فى أمريكا مش كان طلب ستين تعويض
    واحد عشان فوبيا النوم تحت المراوح وواحد عشان مخصصات للبعوض و مخصص للملاريا و مخصص للفريون و كلو بسبب عدم المروحه
    هى البغله البتعتر دى إلا يكون عليها بيرق رئاسة الجمهوريه

  2. ود المهدي قال:

    يا طارق حمدا لله علي سلامه بنتكم وبعد كدة تعمل مراوح استاند بدل السقف ولا ننوم في السهلة مع الناموسية – والا كيف تثبت الموروحة والمسمار اعوج. هسة يجيك وزير الكهربء يقول ارجعوا للهبابات – مافي هبابات اكتر من كدة
    سلام

  3. عزت قال:

    حمد الله بالسلامة يا طارق

    فعلا البضاعة الصينية بقت أي زمان وأي مكان بس الكويس بقت خفيفة شوية… لأنو لو لحقت مروحة الجي أي سي ووقعت جايز تخفس الأرض…. عارف يا طارق عندنا مروحة من النوع القديم داك في المقرن يكون الوالد اشتراها في الخمسينات ووزنها زي كمين كيلو ولديها حاجة نازلة كدا من تحت زي الدربكين…. كل يوم لمن يصحوا الأولاد أجي أطمئن على السقف ما تكون وقت بيهو….عموما استرحنا اليومين ديل من المتاوقة ورحلنا من المقرن… في انتظار أن يسهلها الله ونجيبو في الأرض ونرفع لينا حاجة حديثة كدا….

    ربنا قدر ولطف

  4. حنين قال:

    أب أحمد .
    يازول حمدالله على سلامة البنية وتستاهل كرامة .
    عندى ليك إقتراح .إما تجيبو مراوح واقفة .أو تنوموا واقفين .
    والله سلامة .

  5. ياسين شمباتى قال:

    حمدالله على السلامة يا حبيب…الحمدلله الذى لطف بها وبكم..
    وعلينا بالدعاء (عليهم) ليل نهار…

  6. زووووووول قال:

    اولا الف حمدا لله ع السلامه اخى طارق اب احمد
    لكن انت بصفتك المسعول فى البيت دا يفترض انك تعمل معطمر صحفى توضح فيهو الحقايق كامله وتكلم الاولاد بانو المروحه دى لم تم شراؤها بسبب جودتها وان هذا الامر لا علاقة له بالاسعار لا من قريب ولا من بعيد … كمان توضح للشعب بتاعك انو الكهربجى الركب المروحه برئ من التهم التى اطلقها عليه الشعب وكمان تخلى الميه ميه واردب وترسل للكهربجى وتعمل ليهو احتفال وتديهو ظرف منفوخ …. وبعد داك تطمنن انو الامور تحت السيطره وتبشرهم بمزيد من الرفاهيه والمراوح ال ما بتقع وبانو سيتم الرد على سقوط المروحه بتركيب مكيف 24 الف وحده واننا كلما سقطط مروحه سنرد عليها بمكيف ..
    تانى الف حمدا لله على السلامه …

  7. زووووووول قال:

    فى التعليق اعلاه الكتابه الدارجيه على مسعولية قارئها
    قلت كيف يا شمباتى ؟؟؟ تقصد منو الصينيين ؟ ولا الكهربجيه ؟ ولا المراوح ؟؟؟؟؟؟؟

  8. طارق أب أحمد قال:

    الإخوه المحمدلين
    لا أراكم الله مكروه فى أيي حاجه لديكم
    أول نكته سمعناها لامن عيونا فتحت على الزمن الجميل
    قال ليك واحد صينى ماشى فى الشارع وقع إتكسر ـههههـ
    ضحكنا ضحك
    ضحكنا ضحك
    بس كنا بريئين شديد ما قايلين بجى يوم يضحكوا علينا

  9. ياسين شمباتى قال:

    زووووول..سلام..
    لقيتك واعى جدا جدا ! ادوك كورس ولا شنو؟وى

  10. زووووووول قال:

    لا ادونى فنان عديل كدا يا شمباتى …. امورك واحوالك وجميع من معك ؟؟

  11. ياسين شمباتى قال:

    الحمدلله بخير وصحة وما علينا خلاف..
    لكن انت مالك لابد كدة؟
    حتى الشوق بقيت ما بتردوا ! وى

  12. عباس ركس قال:

    سلام للجميع :
    حمدا لله على سلامتكم أب أحمد :
    مروحة فاسدة !!!!! اسي بلاي ناس المواصفات ديل يخلوا بالهم من المحاليل الفاسدة ولا الدم الفاسد ( سوري منتهي الصلاحية على قول عبدو بسامة ) ولا التقاوي الفاسدة ولا ولا ولا – كمان دايرهم يشوفو مروحتك دي – بالغت لكن يا اب احمد .
    بعدين اتضح ان الخطأ من طريقة الاستعمال – المراوح دي ما بدوروها , تخلوها واقفة وتهوززوا رؤوسكم .

  13. سحر قال:

    والله سلامه وكرامه- تلقيك لمن مشيت تشتريها قالو ليك دى احسن نوع رغم انو سعرها غالى حبه لكن احسن تدفع عشان تعيش (كلام ناس السوق وكده)
    هى مامشكله فى المروحه والله الخوف من السيخ والاسمنت النايمين تحتو

  14. طارق
    الف حمد لله على سلامه البنيه وربنا قدر ولطف
    نصيحه اجود انواع المراوح في السوق هذه الايام المراوح الباكستانيه فعليك بها

  15. سهيل قال:

    حمداللع على السلامه و ربنا يرمي الباقيات و انتو بره البيت

  16. زووووووول قال:

    بالمناسبه يا اخوانا فى فوكرز تالته برضو وقعت … شايفكم ولا شغالين بيها … الفوكرز دى وقعت بالتونسيه طبعا … لكن الظاهر الناس متعوده على وقوعا عشان كدا مافى زول هبب ليها ….. المهم فى زول حكاية الفوكرز التالته دى مجنناهو شديد والزول دا اللى هو اخوكم الكاتب الصحفى بابكر سلك …….ادناه تطالعون مقاله الحبشى قلبها المنشور اليوم فى بعض الصحف
    الحبشي قلبها
    رساله رائعه وصلتني من عبدالله كشه المريخابي بمدني
    • استنبط منها العنوان اليوم
    • وفتحت فيها خيال
    • واحد من الجماعه قال لي وصلنا دوري الاربعه
    • قلت ليهو سمعت بقصة الحبشي الاربعه؟
    • قال لي الحبشي مالو ؟؟
    • قلت ليهو قالوا الحبشي يسوق الشاحنه من بورتسودان
    • يجي باروما وكسلا والقضارف
    • بعرف يتخارج من النقاط كيف
    • باي طريقه يعبرها
    • لاعندو رخصة ولا الشاحنه مرخصه ولا عندو منفستو
    • المهم
    • من القضارف الفاو ومدني
    • ياخد ليهو صنه في مدني يقيل
    • ويتحرك من عصرا بدري
    • يصل الحصاحيصا قبل المغرب
    • يركلس
    • حبشي شفت
    • باقي عارف في نقطة مرور في قرية الصداقه
    • الواطه تضلم ويتحرك
    • ياكل ليك النقطه ابنصات سااااااي
    • يصل الكاملين
    • يلقي ناس العبور
    • ياكلهم حنك
    • حبشي حناك
    • جمب الكاملين اتنين راكبين برادو يلفت نظرهم الحبشي السايق القندراني بالسرعه دي والتكويشه دي
    • ويتناقشوا كيف الزول ده بمستوي سواقتو ده قدر يصل من بورتسودان للكاملين
    • وكيف عبر تلك المسافه
    • وكيف عبر تلك النقاط الكتيره
    • ويقوموا يقرروا يغشوا صاحبا ليهم في الكاملين
    • ويواصل حبشي الشاحنه
    • المسيد دي مره يشوف لاسلكي القطر مره مايشوف القطر زاتو
    • يجر ليك باقي الطريق بالليل داك
    • ويصل سوبا والدنيا ضلام
    • ناس البرادو يتحركوا من الكاملين بعد اخدو قعدتهم مع صاحبهم في الكاملين
    • السواق يقول للراكب معاهو خلي بالك حبشي الشاحنه القبيييييل داك يكون في الخرطوم اسي
    • الراكب مع السواق يقول للسائق بعملها
    • جماعتك ناس البرادو يجو ماشين
    • يصلوا سوبا
    • من بعيد السائق يشوف ليهو دهمه كبيييييييييره
    • يتلفت علي التاني ويقول ليهو الحاجه المتندله جمب الزلط دي شنو ؟
    • الراكب جمب السواق يتاوك
    • ويقول
    • امك الحبشي قلبها
    • يلقوا الشاحنه مفنقله والحاجات مكشحه
    • السايق يقول سبحان الله , الحبشي ده اربعه خلي بالك ,اول من زول يقول ليهو يا اربعه بتبرجل ,طواااالي قالبها في سوبا دي , حيرنا
    • ايها الناس
    • ست الحبايب بفضل الله ودعواتكم استقرت حالتها
    • وتبقي مشوار لاعادة التأهيل
    • مزيدا من الدعوات
    • وبالذات اخوتنا الاهله
    • تاني حاجه تشغلهم مافي
    • متفرغيييييييييييين
    • وأبشركم
    • امي مرقت من المستشفي يوم السبت بالليل
    • الحمد لله
    • امي والهلال مرقوا مع بعض
    • سبحان الله
    • في نفس اليوم
    • السبت بالليل
    • المهم
    • قال ليك ناس الترجي فنائلهم ماغسلوها
    • حايلعبوا بيها النهائي كده
    • يغسلوها من شنو ؟
    • عرق ماعرقوا
    • نفسهم ماقام
    • هو المدينه جري ؟؟؟
    • ايها الناس
    • تتذكروا لما قلت ليكم اسلام حلمانه ميشو بستف في شنطتو ؟
    • ستفها ولا ما ستفها ؟؟؟
    • تتذكروا لما قلت ليكم اسلام حلمانه النهائي مخطط ؟؟؟
    • الترجي مخطط ولا ما مخطط ؟
    • الوداد مخطط ولا مامخطط ؟؟؟
    • احلام اسلام الحمد لله بتتحقق
    • بت مريخاب وصالحين
    • استاذنا يس قال اسلام حلمانه بتأهل الهلال من تونس
    • طبعا انا بثق في كلام يس كل الالوان
    • لون لون
    • زنقه زنقه
    • مرقه مرقه
    • لكن يا اخوي اسلام منو القالت ليك الهلال متأهل من تونس ؟؟؟
    • غايتو ما اسلام بتي
    • يمكن يكون القال ليك اسلام صالح صديقي
    • واحتمال اسلام قالت ليك لكن الكلام ماوقع ليك
    • يعني ممكن تكون قالت ليك حلمانه الهلال بتتندل في تونس , وانت سمعتها بتأهل
    • او تكون قالت ليك الهلال بتأخر في تونس
    • او تكون قالت ليك الهلال بتفنقل في تونس
    • كلها احتمالات يا يس اخوي ولا شنو يا بتاع الالوان انت ؟
    • ايها الناس
    • مجموعة ابو الهل مافيها زول في النهائي
    • والمعني واضح
    • بالمناسبه ابو الهل مازال في التنافس
    • وفي احتمالات لاستمراه في المنافسه ووصوله للدور النهائي
    • الاحتمال الاول انيمبا يغلب الوداد تلاته واحد
    • ويسوق الهلال معاهو كالعاده
    • الاحتمال التاني الترجي يموت (لاقدر الله )
    • الاحتمال التالت يقولوا المسيكني كاميرا خفيه
    • الاحتمال الرابع اتوبونج يشتكي الترجي
    • واذا تحقق واحد من الاحتمالات اعلاه
    • تصبح فرصة الهلال في الفوز بالبطوله واحده
    • وهي موت الفريق المنافس في النهائي وموت الفريق الاحتياطي وموت الاتحاد الافريقي وموت لجنة التحقيق في موضوع البلنجه
    • مع العلم بان الهلال هو الاول افريقيا وعربيا وعالميا وصفريا
    • ايها الناس
    • التومه لسه
    • المهم
    • رسائل كتيره وصلتني
    • منها من صاحب الرقم 0918505050 الذي قال الهلال والصفر زي ( كيو يو ) ما بتفارقن
    • استهجي لي (كويين )
    • موش (كيو يو دبل اي ان ؟)
    • كما ورد بالفيس بوك من عبد السلام وتانا الآتي
    • نزلت الطائره التونسيه القادمه من راداس الي مطار الخرطوم وتحمل في طياتها اكبر صفر في العالم
    • وصاحب الرقم 090588505 قال الجماعه زي ناس ياجوج وماجوج كلما يقربوا يقدوا الواطه يقعوا
    • ايها الناس
    • طولنا من النشايد
    • المره دي عندنا نشيد جديد
    • اسمو كل ما احلم تجي تصحيني يا واقع ليه !!!!
    • طبعا في زول الجن
    • وفي زول الدغ
    • وفي زول اطجن
    • الاطجن ده بنطق اللام نون
    • يعني لو داير يقول عادل بقول عادن
    • اها
    • في واحداطجن
    • داير يقول مسكل لي قال مسكن لي
    • اه يا اطجن
    • الفاتح النقر للامانه كان اضافه للهلال
    • علي اقل تقدير اخير من ميشو في الشكل
    • اسي بدلة النقر دي ما احلي من بدله ميشو الوااااااحده ديك
    • وكمان بنطلونها مامعاها
    • البدله لون
    • والبنطلون
    • خليت شنو ليس في كل الالوان يا ميشو ؟؟؟
    • لكن المطمم بطن الفاتح النقر شنو ماعارف !!!!!!
    • كلما الكاميرا تجيبو نلقي بطنو طامه
    • ادوهوا ليمونه
    • ايها الناس
    • خطفت يد المنون بالامس المريخي الغيور الشاب المهذب نزار البلال اثر حادث حركه مؤسف
    • بفقده فقدنا مريخيا مخلصا ووفيا ونقيا
    • اسألكم الفاتحه علي روحه
    • ولاحولة ولا قوة الا بالله
    سلك كهربا
    ننساك كيف والصفر ماداير ينسي الجماعه
    والي لقاء
    سلك
    كسره : ايه رايكم فى المفاجأه اللذيذه دى ؟؟؟؟؟؟؟؟

  17. زووووووول قال:

    الكسره دى جات عفوا … اصلو الكوبى والبيست دى بتعمل كدا .. وسقوط الفكرزات بعمل اكتر من كدا واسألوا اب احمد شخصيا

  18. سهيل قال:

    مامشكله يالزووووول – لكن الفواكرز لسه حيقعن .. هو الصقر وقع … شن الرخم ؟؟

  19. زووووووول قال:

    سهيل اهلا وسهلا بيك
    يا زوول نعلك سلامه اوعى الفوكرز الاخيره دى تكون اصابتك ؟؟ والله الفوكرزات ديل الله يقطعن كل يوم واقعه واحده … بعدين انتو قصتكم مع التونسيه دى بالذات شنو باقى ولفتوا عليها شديد
    2007 النجم الساحلى
    2010 الصفاقسى
    2011 المسيكنى
    الكترااااااااااااااااااااااااااااااااااااااااابه
    وين اخونا ود الزبير وبقية ركاب الفوكرز المنكوبه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s