فطييرة ,, فطيرة ,,, فطييييرة

Posted: الخميس,22 نوفمبر, 2012 by ياسين شمباتى in اخرى

امس وبعد منتصف الليل فاجانى احد الاحباب واوصل لى رسالة بما معناه انو فى تحركات لاحداث انقلاب عسكرى ! طبعا ما تتخيلوا كمية الفرحة الدخلت فينى , حتى انى سهرت فوق (التقروقة) وما خليت دعاء ما نزلتو ,, ومن باب (الاستشمار) والاستطلاع قمت اخدت جولة فى عدد من المواقع الاسفيرية ,, اكان القى ليك امة لا اله الا الله تتكلم عن الموضوع دا ! لا وكمان متابعين تحركات الدبابات والآليات العسكرية ! اجي ياااااا الكدة !!!

والقى ليك واحد كاتب (انعطفت الدبابة يسارا تجاه القيادة العامة) والتانى ( عدة دبابات عسكرية-التقول فى دبابات مدنية- تتجه صوب المطار) ,, بس كنت متخيل انى ح الاقى واحد كاتب (وتوقفت الدبابة عند امواج لتاخذ عشاء للطاقم) ! اححححححححح

اها انا هنا اتوغوشت !ّ وعرفت انو الشئ دا عجينة ! آييييي ,, لانو الانقلاب معرووووف انو بكون على درجة عالية من السرية مش زى بص السيرة !! الناس كلها عارفاهو اتحرك متين واتعطل وين وداخل على وين ! بعدين الناس المتهمين بقيادة الانقلاب دا ما ناس قريعتى راحت ولا هم ضأن ساى ! الفريق / قوش رجل محنك خبير قوى الشكيمة , وتحت امرتو العديد من جنرالات الجيش والامن والقياديين السياسيين , خليك من الجهوية والعنصرية اللى هو ارسى قواعدها فى الكيان الامنى !

واللواء / كمال عبد المعروف قائد ما اصطلح على تسميتها ب(معركة تحرير هجليج) يفترض انو رجل حرب ! ما ممكن ينقبض بالساااهل كدة !

اها الفطيرة مكوناتها شنووووو ؟ (تذمر قيادات بالجيش-اللواء / كمال نااااقش فولة معركة تحرير هجليج ومطلع على الاسرار-قوش بما له من سطوة وما له من تصريحات مقلقة تحت تحت , خسوسا انو اسمو ظهر ونجمو ارتفع كبديل حتمى-بعض الضباط ذوى الرتب العالية المناوئين للنظام-ومدنيين مطلوبين نوعا ما) , اها دى يخلطوها كيفن !؟

كدة بس ! كما تم تلفيق العديد من المحاولات التخريبية لاناس لم يسمعوا عنها شيئا , وللاسف التلفيق دا من زمن نميرى موجود ,, ولا تفوتنا المحاولة التخريبية لحركة العدل والمساواة التى نسبت للترابى , وانا هنا ما عايز اتكلم فى الرجل الكان مطلوب للعدالة ثم اصبح رأسا فى الدولة ! طااااااااااااااااااااخ…

بعدين فى انقلاب ببدأ بعد صلاة العشا !؟ (غايتو انقلاب زى دا الا يحصل فى اسرائيل او يكون قائدو هناى ! واااااى) بعد صلاة العشا معرووووووف بتحرك بص السيرة , آييييييي ,, وكمان يوم الاربعاء ! ياخى تخ وبخ , وبى تلاتة دبابات ! امممممم دى حقارة بس ..

عزيزيى المنقلب ,, الجاتك فى انقلابك ما سامحتك كلو كلو ,,

الما عزيزيى المنقلب عليه ,, سوووووووحى اييييا بالجنبة مووووووووحى ايييييا ,,

وعلشان نعرف كلامى دا صاح وما غلط ننتظر نتيجة المحاكمة , فلو عملوا ليهم محاكمة عسكرية واعدموهم اسوة بمن سبقهم يكون انا غلطان وواجب على آكل الفطيرة دى !
ولو ما حاكموهم عسكريا واعدموهم لازم يزيدوا ليها الخميرة !

وانت ايها المواطن السودانى الطيرة المبارى بص السيرة , عد الى رشدك وصوابك والزم تقروقتك وخليها ديمى على القبلى وارفع اكف الدعاء معى (اللهم خذ الظالمين بعضهم ببعض , وارنا فيهم عجاائب قدرتك ,, الهم وسلط عليهم بفعائلهم من لا يخافك او يرحمهم ,, اللهم ارنا فيها اياما كايام عاد وثمود ,, اللهم فخذهم ولا تفلتهم , فانهم قد ظلموا وطغوا وتجبروا ونازعوك رداء الكبرياء والعظمة , اللهم كن لنا وانصرنا وكن عليهم ودمر عليهم وعلى الظالمين امثالهم,,آميين آمييييين) ..

                                                       ونلتقى ,,,,,,

تعليقات
  1. عزت قال:

    اللهم اساك في هذا اليوم الكريم الجمعة أن تحصهم عدداً وتدمرهم بددا.. اللهم أشغلهم بأنفسهم وافتنهم ببعضهم بعضا ورد كيدهم في نحورهم واجعل تدميرهم في تدبيرهم ..وخلص البلاد من شرورهم وفسادهم …..آمين
    (أبكرون من الفيس بوك )

    الليلة الصباح قلنا نلقى أخبار جديدة عن المحاولة الفطيرة….
    زادت فطرا اذ لم نجد سوى كلام وزير الاعلام الفارغ بتاع أمبارح
    والليلة بتاع هجليج طلع برئ بعد ما جرمه (ربيع المتعاطي) القيادي في الدمس الوطني على مستوى العالم في الجزيرة
    هسة البرئ دا ممكن يفتح بلاغ في القيادي والا كيف

  2. عزت قال:

    كتب سيد محمود الحاج
    كاشف الانقلابات
    Coupe detector

    لا أعرف تماماً طبيعة هذا الجهاز وكيف يعمل لكنه دون شك هو جهاز فعّال وذو تقنية عالية جدّا لا تفوت عليه فائتة يظل متتبّعا ً الحدث منذ لحظة التفكير في القيام به إلى لحظة تنفيذه على أرض الواقع أي حتى ساعة الصفر فينقض على الأجسام المناوئة ويا ويلها ساعتئذ ٍ إذ لا تنحصر مهمته في الكشف والمتابعة بل تتعدّى ذلك إلى التحقيق والتعذيب والتنكيل وإصدار الحكم وتنفيذ الحكم. ولهذا الجهاز طاقة جبّارة وإمكانيات متقدمة جدا تمكنه من كشف أكثر من إنقلاب في الأسبوع الواحد وربما في الليلة الواحدة فهو قد كشف عن حركة رمضان من قبل ومنذ التخطيط لها وحتى لحظة تنفيذها وهو الذي قام بتصفيتها من بعد وهو الذي كشف ما يدور في أذهان كثير من ضباط الجيش من غير الموالين فأصدر زعيق التنبيه الذي تم بناء عليه إقصاء مصدر الخطر بطرق مختلفة تشمل العزل والإبعاد والإعتقال والتعذيب وحوادث السيارات والطائرات وغيرها..

    وها هو يكشف عن محاولة في الأسبوع الماضي قيل ان زعيمها أحد الذين ساهموا بشكل فعّال في تصنيع هذا الجهاز المنيع كما يكشف فجر هذا اليوم عن محاولة أخرى نسبوها لمعارضين ومخربين .. لا يختلف أثنان حول منعة هذا الجهاز ويقظته التامة في الكشف عن أي مؤامرة تحاك ضد النظام او أي محاولة لنزع السلطة من بين يديه وهذا يؤكد جودة التصنيع والتقنية العالية والمادة المكونة لعناصره ومكوناته فيتساءل المرء حيال ذلك ..

    هل هذا الجهاز صناعة جيادية بتقنية فارسية أم صناعة فارسية بتقنية جيادية أو أنه تقنية تجمع بين الجيادية والفارسية والحماسية!!؟

    ومهما تكون الحقيقة إلا أنه جهاز ناجع ومتطور جدا إلى درجة تجعلنا نقترح على القائمين على أمره بل ونناشدهم ان يستفيدوا من ذات التقنية في تطوير رادارت وأجهزة إلتقاط تمكنهم من رصد أي طائرات او تحركات لأطراف مناوئة تستهدف الوطن و أمن المواطن فالوطن أسمى وأبقى من كل نظام والسلطة زائلة مهما طال بقاؤها … هذا إذا كان همهم الأكبر هو الوطن لا السلطة التي قتلوا من أجلها الأبرياء وأذاقوا الأحياء صنوفاً من الذل والمرائر !!
    ………………………
    مقال بديع يكشف عن هذا الجهاز المذهل

  3. ياسين شمباتى قال:

    الحبيب عزت…سلام وتقبل الله عملك ودعاء الحبيب ابكرون….
    طبعا من الغباء السياسى والعسكرى انك تجرم ضابط فى رتبة اللواء / عبدالمعروف وخصوصا انو تحت يدو لواء كاااامل وجالس ليك فى منطقة حيوية وعلى حدود العدو اللدود ! انا استغربت من حركتهم دى طبعا !
    لكن لحقوا اتداركوها وولات حين مناص !
    وكاشفهم دا حقو يسموهو (مكاشفى القوم) !
    وسى يا بدوى سى,,,

  4. abushagrod قال:

    شمباتي كيف حالك
    الموضوع التحت دا نقلا عن سودانيز أون لاين تحت عنوان ( المحير في الموضوع ) في المنبر العام

    (مرة كنا لاعبين مع فريق ، الشوط الأول غلبونا واحد صفر

    بعد الراحة بين الشوطين دخلنا الشوط الثاني زايدين لاعبين يعني لاعبين 13

    غلبناهم 3/1 ولحدي النهاية لا الحكم لا الجمهور ما اكتشف الحكاية دي

    السودان دا فتة ياخ)

  5. ياسين شمباتى قال:

    ابوشقورد..
    هههههههههههههههههههههههههههههههههههههااااى,,اها يعنى جا الدور علينا ناكل الفتة دى ! ؟؟
    احححححححححح..
    مرحبابك وحباب الجابك يا حبيب…

  6. Dakeen قال:

    ياشنباتي ،،
    اسع نفهم شنو ،، بص السيرة ده ماشي النادي ، ولا بيت اهل العروس ،،
    بعدين كان لقيت خبر وصف لينا ياتو نادي ؟
    نادي الضباط ولا نادي البياطرة ولا نادي الدكاترة ولا نادى منادي الجداد.
    امس : في لقاء ابو العروس مع اللمبي :
    اللمبي قال : المحاولة الانقلابية
    وواحد تاني قال المحاولة التخريبية

    زي ماقال صاحبنا : انت قلت مطانية ولا مطارية ،،
    الجماعة بقو كايسين للزوغة ،، (الفكي قال ليهم : كان الموضوع اتتور الأروس دي بتجيبو جنا هرام) على وزن هرمنا هرمنا
    فترنا من اكل الدكوة – شوف لينا فكي يدينا فتوة ،،،

    لكن بقول ليك : خليك في المخمر والمشمر والمحمر واالمعتق ،، وكت هي فطيرة الجابك جمبها شنو؟ (اها جابت ليك المغص)

  7. ياسين شمباتى قال:

    هههههههههههههههههههههههااااى,,
    الله يجازى محنك يا دكون ! دا شنو دا ؟؟؟
    عن النادى فهو حتما (نادى المحامين) آيييييييي ,,
    بعدين دى بطارية نازلة عديييييل كدة ,, ونازلة فى الخرطوم تلاتة ,, ويييييين (…) المرسوم فى ضميرى ,,
    وعليييييك الله ورينى محل المشمر دا عشان اشمر عن نواجز الجد والبخو ليك !
    نجم نجم نجم (بتعطيش الجيم)….وى

  8. نيام قال:

    شمبة:
    حبيبنا شمبة..ياخي دي فطيرة ماسخة بلبن رائب مترع المرارة..ياخي دي مرارة لمان عملت لي مراريا..عشان كده يادوب شفتكم فمع الاسف الاسيف…قف ..دبابتنا عملناها طراحة في شارع عبيد ختف…الكلاكلة اللفة…ويا سايق البوباي الاشارة جاي و لا جاي…معليش للتخريمة ما عقاب مراريا…

  9. ياسين شمباتى قال:

    الحبيب نيام…
    سلامتك من المرارات وتوابعها ,,,
    وحتى الطرحة بقت ما جايبة حقها ! تنفع عربات آيسكريم ؟؟
    احححححححححححححح

  10. افليقا قال:

    شمبوت والعيال والبنوت :
    فى زول كاتلاهو غيره
    ومن مغستو الكتيره
    كسر بيت ناس اميره
    وقال تخطيطو شاتر
    الخرطه الكبيره
    وقوم يا اميره موتى
    من المغسه الفى توتى
    كسرو ليكى بيتك
    ورسمو خرط جديده
    وقومى يا المره موتى ..

  11. افليقا قال:

    يحكى ان :
    والقصه معروفه ومسيخه :
    ارسل امير المؤمنين احد رعاياه ليفاوض الفرس فعاد الرجل وقال للامير هذا لكم وهذا اهدى الى الامير حرقتو اهدى الى وما عرفا كمها وخاف تكون كتيره وخطيره
    فبدلا من ان يقول امير المؤمنين للرجل هلا جلست فى بيت ابيك قام جلسو فى بيت ابيه طوالى !!
    قام الرجل وبما له من علاقات بالفرس والروم والعرب !! انكرب وعمل الشغل الصعب .
    قام امير المؤمنين خاف الفرس يشيلوهو ويختو الزول انا يا الله جيب الزول انا
    قام الفرس المفتحين ومعاهم الروم الشفوت قايطو الامير وزولو واستبزو من الاستبزاز الطرفين شالو من ده ومن ده والاتنين كرما شديد ما خلو شيئ ما ادوهو للجماعه ناشف ولين وروح ما بعدك روح
    قامو اصحاب الامورى بتاع المؤمنين والناس البياكلو معاهو عملا بالاية الكريمه وان لم ترضعو له فسترضع له اخرى خافو من الاخرى وبالذات الاخرى دى رضااااااعه قام اى زول طلع لبنو وسقو الفرس ثلاث شربات كافيات مشبعات وبقو الفرس والروم خيلاننا مش اخو امك خالك …؟؟؟ هههههههههههه

  12. افليقا قال:

    كسره : بالمناسبه : ….. امك ذاتو !!!

  13. افليقا قال:

    بالمناسبة : لمن فاته الفيلم الفطير ادعوكم لمشاهدة فيلم الديلر لاحمد السقا يعرض الان بتايم سينما

  14. ياسين شمباتى قال:

    عاد فطيرتك ما عينة !!!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s